ပှၤလၢအတဲလဲၢ်ထီၣ်အါထီၣ် တၢ်တဖၣ် ဒုးကဲထီၣ်တၢ်သး ဒ့ဒီ ဘၣ်ဃးကစၢ်ခရံာ် အတၢ်ဟဲအိၣ်ဖျဲၣ်ထီၣ် အတၢ်ဂ့ၢ်တၢ်ကျိၤ လၢအဂၤ တဖၣ်စ့ၢ်ကီး န့ၣ်လီၤ. ဖဲကစၢ်ခရံာ် အိၣ်ဖျဲၣ်ထီၣ်အခါ ဆၣ်လၢ တၢ်ထံၣ်န့ၢ်အီၤလၢ ပှၤမၤကူး စ့ၢ်ကီး တၢ်သးဒ့ဒီ အိၣ်ထီၣ်၀ဲ န့ၣ်လီၤ. မးသဲ ၂း၇-၉ စံးလၢ ဆၣ်တဖျၢၣ်အံၤ အိၣ်ဖျါထီၣ် တယံာ်ဒံးဘၣ်. ဒီးလဲၤတၢ်လၢ မူခိၣ် ဒီး အိၣ်ပတုာ်၀ဲလၢ ဘ့ၤသလ့ဃ့ၣ် အဖီခိၣ်န့ၣ်လီၤ.
ပှၤအါတက့ၢ် ကထံၣ် ဆၣ်အံၤလၢ အမ့ၢ် ဆၣ်မဲၢ်ထီၣ် န့ၣ်လီၤ. ပှၤတရူးဖိတဖၣ် အတၢ်ကွဲးနီၣ် အပူၤ ပာ်ဖျါထီၣ်၀ဲလၢ ဆၣ်မဲၢ်ထီၣ် လၢအလီၤလိၢ် လီၤလး အိၣ်ဖျါထီၣ်၀ဲ သၢဘျီ လၢအစိၤအဆၢ ကတီၢ်ဖဲန့ၣ် (လၢ ချ.ခ.န ၁၂, ၅, ဒီး ၄ အပူၤ) န့ၣ်လီၤ. ဒီးဆၣ်မဲၢ်ထီၣ် သၢဘျီ အကျါ လၢအမ့ၢ် တၢ်ခၢၣ်သး တဘျီန့ၣ် ဘၣ်လိာ်အသး ဒီး တၢ်လၢ လံာ်စီဆှံ အပူၤ န့ၣ်လီၤ. ပသ့ၣ်ညါလၢ ယ့ၣ်ရှူးအသးအိၣ် အနံၣ် သၢဆံဖဲ ခ.န. ၂၉ နံၣ် (ကွၢ်လူၤကၣ် ၃း၂၃) အဃိ, ဆၣ်မဲၢ်ထီၣ်လၢ ချ.ခ.န ၁၂ န့ၣ် မ့ၢ်တၢ်ဆိတလၢ, ဒီးဆၣ်မဲၢ်ထီၣ် လၢ ချ.ခ.န ၄စ့ၢ်ကီး စဲၤခံ တလၢလံ. ပသ့ၣ်ညါ စ့ၢ်ကီးလၢ တၢ်ဒိၣ် စီၤပၤဟ့ၤရိာ် (စီၤပၤလၢ အသးက့ၣ်ဖဲ အနၢ်ဟူ ကစၢ်ခရံာ်အိၣ်ဖျဲၣ်ထီၣ်အခါ) သံလၢ တချုး လါမးရှး အလၢာ် ဖဲ ခ.န. ၄ အဆၢကတီၢ် န့ၣ်လီၤ. ပှၤတရူးတဖၣ် အတၢ်ကွဲးနီၣ် အပူၤ စံး၀ဲလၢ ဆၣ်မဲၢ်ထီၣ် လၢအဖျါ ထီၣ်လၢ ချ.ခ.န ၅ န့ၣ် အလီၤဂာ်ဒီး ဆၣ်မဲၢ်ထီၣ် အဂၤခံဖျၢၣ် ဘၣ်. မ့ၢ်ဆၣ်မဲၢ်ထီၣ် တဖျၢၣ်လၢ အမဲၢ် လီၤကစဲၤဖးထီ, ဒီး အိၣ်ဖျါထီၣ် ၀ဲဒၣ် လၢမုၢ်ထီၣ် တခီလၢ အသီ ၇၀ အတီၢ်ပူၤ န့ၣ်လီၤ.
အဃိ, ဆၣ်မဲၢ်ထီၣ်လၢ ချ.ခ.န ၅ ကဘၣ်မ့ၢ် ဆၣ်လီၤလး တဖျၢၣ်လၢ လံာ်မးသဲ တဲ၀ဲန့ၣ်လီၤ. ဆၣ်လီၤလး တဖျၢၣ် အံၤ ဘၣ်တၢ်ထံၣ်န့ၢ်အီၤလၢ ပှၤမၤကူး တဖၣ်လၢ မုၢ်ထီၣ်တခီ, ဒီးလၢခံ ခံလါ ပူၤကွံာ်ဖဲ အ၀ဲသ့ၣ် ဟဲတုၤ ၀့ၢ်ယရူၤရှလ့ၣ်အခါ ဆၣ်တဖျၢၣ်အံၤ သုးက့ၤ အသးဆူ ကလံၤထံး တခီ န့ၣ်လီၤ. ၀့ၢ်ဘ့ၤသလ့ဃ့ၣ် အိၣ်လၢ ၀့ၢ်ယရူၤရှလ့ၣ် အကလံၤ ထံး တကပၤအဃိ ဖဲပှၤမၤကူး တဖၣ် ဟဲဘူးဒီး ၀့ၢ်ဘ့ၤသလ့ဃ့ၣ်အခါ ဆၣ်လီၤလး တဖျၢၣ်အံၤ ကအိၣ်ဖျါထီၣ်၀ဲလၢ ၀့ၢ်ဘ့ၤသလ့ဃ့ၣ် အဖီခိၣ် တီတီန့ၣ်လီၤ.
ဆၣ်လီၤလးတဖျၢၣ်အံၤ မ့ၢ်အိၣ်ဖျါထီၣ်လၢ ချ.ခ.န ၅ အပူၤန့ၣ် ပတဲဖျါထီၣ် ကစၢ်ခရံာ် အတၢ်အိၣ်ဖျဲၣ် ထီၣ်အဆၢ ကတီၢ် လီၤတံၢ်လီၤဆဲး သ့လံန့ၣ်လီၤ. ဆၣ်မဲၢ်ထီၣ်တဖျၢၣ်အံၤ အိၣ်ဖျါထီၣ်လၢ လါမးရှး ၉ သီ ဒီး လါအ့ဖြ့ၣ် ၆ သီ အဘၢၣ်စၢၤလၢ ချ.ခ.န ၅ အပူၤအဃိ, ပှၤမၤကူး တဖၣ် အတၢ်ဟဲတုၤဆူ ၀့ၢ်ယရူၤရှလ့ၣ် န့ၣ် ကမ့ၢ်၀ဲဖဲ လါမ့ၤ အလၢာ် လါယူၤ အထီၣ်န့ၣ်လီၤ. ကစၢ်ခရံာ်မ့ၢ်အိၣ်ဖျဲၣ်ထီၣ် ဆိန့ၢ်ဒံး တၢ်ဆၢကတီၢ်အံၤ, ဘၣ်ဆၣ် တၢ်ဆိမိၣ် တယာ်လၢ လံာ်မး သဲအတၢ်ကွဲးဘၣ်ဃး ကစၢ်ခရံာ် အတၢ်အိၣ်ဖျဲၣ်ထီၣ် ဒီး ဆၣ်လီၤလး အတၢ်အိၣ်ဖျါထီၣ် မ့ၢ်တၢ်လၢ အဘၣ်ထွဲ လိာ်အသး (မးသဲ ၂း၇) န့ၣ်လီၤ. မ့မ့ၢ်ဒ်န့ၣ်ဒီး, ကစၢ်ခရံာ် ကအိၣ်ဖျဲၣ်ထီၣ် ၀ဲဒၣ်ဖဲ ဘူၣ်လဲၤကပာ် အဆၢကတီၢ် လၢ ချ.ခ.န ၅ အပူၤ (ဘူၣ်လဲၤကပာ်လၢ နံၣ်တနံၣ် န့ၣ် လီၤဘၣ်လၢ အ့ဖြ့ၣ် ၂၀ သီ) န့ၣ်လီၤ. အဃိ ကစၢ်ခရံာ် အတၢ်အိၣ်ဖျဲၣ်ဆၢ က့ၤ ပှဲၤထီၣ် အနံၣ် ၂၀၀၀ န့ၣ် ကဘၣ်မ့ၢ်၀ဲဖဲ ၁၉၉၅ နံၣ်လါအ့ဖြ့ၣ် အပူၤန့ၣ်လီၤ.
အ၀ဲအံၤ မ့ၢ်တၢ်လၢ အဘၣ်လိာ် အသးဒီး ပှၤကွၢ်သိတဖၣ် ကွၢ်အသိလၢ မုၢ်နၤလၢ စံာ်ပျီပူၤ, မ့ၢ်တၢ်ဂိၢ်အဆၢ ကတီၢ် (လါဒံၤစဲဘၢၣ် တုၤ လါဖ့ၤဘြူၤအါရံး) ဒီး မ့ၢ် တၢ်ဆၢကတီၢ်လၢ သိဖိတဖၣ် ဖှံလီၤ၀ဲ အဆၢကတီၢ်န့ၣ်လီၤ. မ့ၢ်လၢ တၢ်ဂိၢ်ဒိၣ်မး အဃိ ဘၣ်လိာ်အသးဒီး ပှၤမုၢ်နုာ် အတၢ်အိၣ်ဖှိၣ် အလံာ်နံၣ်လံာ်လါ လၢအမ့ၢ်လါဒံၤစဲဘၢၣ် ၂၅ သီလၢ ယၤဖှိၣ် နံၣ်အခီၣ်ထံးလွံၢ်၀ီ အပူၤန့ၣ်လီၤ. မုၢ်နံၤအံၤ ဘၣ်တၢ်ဃုထၢအီၤလၢ ပှၤခရံာ်ဖိတဖၣ်လၢ အကဟံးန့ၢ် ပှၤတခီဘီမုၢ်ဖိ တဖၣ်အဘူၣ်ဖးဒိၣ် လၢအမ့ၢ် "တၢ်ဒိၣ်, မုၢ်" အလီၢ်န့ၣ်လီၤ (ပှၤခရံာ်ဖိ အခါဖဲန့ၣ်တဖၣ် အါတက့ၢ် မ့ၢ်ပှၤဟဲလီၤစၢၤလၢ ပှၤတခီဘီမုၢ်ဖိ တဖၣ်န့ၣ်လီၤ).
ဘၣ်ဆၣ်, ကစၢ်ခရံာ်အတၢ်အိၣ်ဖျဲၣ်ထီၣ်န့ၣ် ကဘၣ်မ့ၢ်၀ဲဒၣ် လၢ လါအ့ဖြ့ၣ် အပူၤ, ဖဲဘူၣ်လဲၤကပာ် အဆၢကတီၢ် န့ၣ်လီၤ. နီၢ်မၤရံ ဒီးစီၤယိၤသး ကဘၣ်လဲၤဆူ ၀့ၢ်ယရူၤရှလ့ၣ် အတၢ်လုၢ်ဟံၣ် ဖဲဖိသၣ် ယ့ၣ်ရှူး ကအိၣ်ဒၣ်ထဲ ၆နွံ အဆၢကတီၢ် လၢတၢ်ကူးတရံးအဂီၢ်, ၀ံၤကဟဲက့ၤကဒါက့ၤဆူ ၀့ၢ်ဘ့ၤသလ့ဃ့ၣ် န့ၣ်လီၤ. ဒီးစှၤသီ၀ံၤ အလီၢ်ခံ ပှၤမၤကူး တဖၣ် ကဟဲအိၣ်သကိးအီၤ, ဘၣ်ဆၣ် မ့ၢ်လၢ စီၤပၤဟ့ၤရိာ် ကူၣ်ထီၣ် လၢကမၤသံဖိသၣ် အဃိ အ၀ဲသ့ၣ် ဃ့ၢ်ပူၤဖျဲး အသးဆူ ကီၢ်အဲၤကူပတူး န့ၣ်လီၤ.
0 Comments