ယွၤအကလုၢ်ဘၣ် စီၤယံးရမံယၤ ဒီးစံးဝဲဒၣ်, ဂဲၤဆၢထၢၣ်, ဒီးလဲၤလီၤဆူ ပှၤတ့သပၢၤအဟံၣ်, ဒီးယကဒုးနၢ်ဟူ နၤ လၢယကလုၢ်ဖဲန့ၣ် လီၤ. ဒီးယလဲၤလီၤဆူ ပှၤတ့သပၢၤအဟံၣ်, ဒီးကွၢ်ကွၢ်, မၤသပၢၤလၢ သ့ၣ်ဘၣ် အဖီခိၣ် လီၤ. ဒီးသပၢၤလၢ အတ့ဝဲလၢ ကပံာ်န့ၣ် ဟးဂီၤဝဲလၢ ပှၤတ့သပၢၤ အစုပူၤ, ဒီးမၤကဒီး သပၢၤတဖျၢၣ် ဒ်အဘၣ် ပှၤတ့သပၢၤ အသးလၢ အကမၤဝဲ အသိးန့ၣ်လီၤ.ဒီးယွၤအကလုၢ်ဘၣ်ယၤ ဒီးစံးဝဲဒၣ်, အံၣ်စရ့လး အပှၤဟံၣ်ဖိ သ့ၣ်ဧၢ, ယမၤသုဒ် ပှၤတ့သပၢၤ တဂၤအံၤ အသိးန့ၣ် တသ့ဘၣ်ဧါ, ယွၤစံးဝဲဒၣ်. ကွၢ်ကွၢ်, ဒ်ကပံာ်အိၣ်ဝဲလၢ ပှၤတ့သပၢၤ အစုပူၤ အသိးန့ၣ် သုအိၣ်ဝဲလၢ ယစုပူၤ ဒ်န့ၣ်သိး, အံၣ်စရ့လး အပှၤဟံၣ်ဖိ သ့ၣ်ဧၢ. ယမ့ၢ်ကတိၤတၢ်တဘျီ လၢပှၤတကလုာ်အဂ့ၢ်, လၢတၢ်အဘီမုၢ် အဂ့ၢ်, ဒ်သိး တၢ်ကထဲးထီၣ်ကွံာ်, ဒီးမၤလီၤပှီၢ်, ဒီးမၤဟးဂီၤ န့ၣ်ဒီး, ပှၤတကလုာ်လၢ ယကတိၤတၢ်လၢ အဂ့ၢ်န့ၣ် မ့ၢ်ဟဲက့ၤလၢ အတၢ်အၢဒီး, ယကပီၢ်ယၢ်လီၤက့ၤ ယသး လၢတၢ်အၢ လၢယတိာ်မၤအီၤ လီၤ. ဒီးယမ့ၢ် ကတိၤတၢ် တဘျီလၢ ပှၤတကလုာ်အဂ့ၢ်, တၢ်အဘီမုၢ်အဂ့ၢ် လၢယကမၤထီၣ်အီၤ, ဒီးသူၣ်လီၤအီၤန့ၣ်ဒီး, မ့ၢ်မၤ တၢ်အၢလၢ ယမဲာ်ညါ, ဒီးတဒိကနၣ်ဘၣ် ယကလုၢ်ဘၣ်ဒီး, ယကပီၢ်ယၢ်လီၤက့ၤ ယသး လၢတၢ်ဂ့ၤလၢ ယစံး ယကမၤအီၤ န့ၣ်လီၤ.ဒီးခဲကနံၣ်အံၤ ကတိၤတၢ်ဒီး ယူဒၤ အပှၤကညီ, ဒီး ပှၤယရူၤရှလ့ၣ်ဖိ, ဒီးစံး, ယွၤစံးဒ်အံၤ, ကွၢ်ကွၢ်, ယတိာ်တၢ် အၢထီဒါသု, ဒီးကူၣ်တၢ်ကူၣ် ထီဒါသုလီၤ. ဟဲက့ၤကဒါက့ၤ တဂၤလၢ အကျဲအၢစုာ်စုာ်, ဒီးမၤဂ့ၤထီၣ်က့ၤ သုကျဲဒီး သုတၢ်မၤ တဖၣ်တက့ၢ်.ဒီးစံးဝဲဒၣ်, မုၢ်လၢ် တၢ်အလီၢ် တအိၣ်ဘၣ်. ပကပိာ် ပကူၣ်ထီၣ်ဒၣ် ပဝဲအခံ, ဒီးပကမၤထွဲ တဂၤ အသးအၢ အနၢ်က့ၣ် အခံစုာ်စုာ်လီၤ. (ဝံယံးရမံယၤ ၁၈း၁-၁၂)
တၢ်ကတိၤလၢညါ
စိၤဆၢကတီၢ်ခဲအံၤ မ့ၢ်တၢ်လဲၤထီၣ်လဲၤထီအစိၤ, ပှၤလၢအကျိၣ်အိၣ်စ့အိၣ် တဖၣ် ကွၢ်ဖဲအအဲၣ်ဒိးလဲၤ န့ၣ် လဲၤဝဲတုၤ, တၢ်လၢအအဲၣ်ဒိးဝဲန့ၣ် ပှ့ၤဝဲန့ၢ် ခဲလၢာ်လီၤ. လီၤဆီဒၣ်တၢ်, စိၤခဲအံၤ မ့ၢ် Mobile Phone, Internet အစိၤအဃိ ပှၤအါတက့ၢ် သူဘၣ်ဝဲ န့ၣ်လီၤ. ပမ့ၢ်သူအီၤလၢ တၢ်လဲၤထီၣ်လဲၤထီ အဂီၢ်, တၢ်ဂ့ၤ အဂီၢ်ဒု ဂ့ၤဝဲလၢ ပဂီၢ်, ဒီးလၢ ပှၤဂၤအဂီၢ် စ့ၢ်ကီးန့ၣ်လီၤ. ဘၣ်ဆၣ်, တုၤလၢပသူအီၤ အါတလၢအခၢး တခီ ပကဲထီၣ်အကုၢ် သ့စ့ၢ်ကီးန့ၣ်လီၤ.
စိၤဆၢကတီၢ်ခဲအံၤ တၢ်လဲၤထီၣ်လဲၤထီတဖၣ် ဟံးန့ၢ်တၢ်လီၢ်တၢ်ကျဲ လၢပတၢ်အိၣ်မူအပူၤ, အဃိ ပဝဲသ့ၣ် တဖၣ် ပသန့ၤ ပသးလၢ တၢ်လဲၤထီၣ်လဲၤထီတဖၣ်အံၤ အါထီၣ်လၢ ပတၢ်အိၣ်မူအပူၤ တုၤဒၣ်လဲာ် ပသးပ့ၤနီၣ် သန့ၤပသးလၢ ကစၢ်ယွၤ န့ၣ်လီၤ. ယဟဲအိၣ်လၢ ကီၢ်သၢဘ့ၣ်တဘ့ၣ်အပူၤ, ယနၢ်ဟူဘၣ် ပှၤအါဂၤစံးဝဲ, "ယမိယပါ ယဟံၣ်ဖိဃီဖိ မ့ၢ်ပှၤခရံာ်ဖိ, ဘၣ်ဆၣ် ယတမ့ၢ်ခရံာ်ဖိဘၣ်." ဘၣ်မနုၤအဃိ တၢ်ဘၣ်ဆီတလဲ အသးဒ်အံၤလဲၣ်. မ့ၢ်ဒၣ်လၢ တၢ်လဲၤထီၣ်လဲၤထီ အဃိန့ၣ်လီၤ. တၢ်လဲၤထီၣ်လဲၤထီလၢ အစိၤအဆၢကတီၢ် ခဲအံၤ ဟ့ၣ်ပှၤတၢ် ခဲလၢာ်ခဲဆ့ လၢ ပအဲၣ်ဒိးအီၤ တဖၣ်န့ၣ်လီၤ. တၢ်လဲၤထီၣ်လဲၤထီ ကဲထီၣ် ပကစၢ်ယွၤ လၢအဟ့ၣ်ပှၤ တၢ်လၢပလိၣ်ဘၣ် တဖၣ်လၢ ကစၢ်ယွၤအမ့ၢ်အတီတဂၤ ဒၣ်လဲာ် တဟ့ၣ်ပှၤဘၣ် န့ၣ်လီၤ.
ဖဲပကွၢ်က့ၤ ပတၢ်အိၣ်သးလၢ စိၤဆၢကတီၢ်ခဲအံၤ, ပကထံၣ်ဘၣ်လၢ ပလီၤဂာ်ဒိၣ်မးဒီး ပှၤယူဒၤဖိ တဖၣ်လၢ ဝံယံးရမံယၤ အစိၤ န့ၣ်လီၤ. ပှၤယူဒၤဖိ တဖၣ်လဲၤသဒၣ်ယွၤ ခီဖျိ ဘူၣ်ထီၣ်ဘါထီၣ် ကလုာ်ဂၤ တဖၣ်အကစၢ် န့ၣ်လီၤ. တကးဒံးဘၣ်, အဝဲသ့ၣ် ဒိးသန့ၤအသးလၢ ထံကီၢ်တဖၣ် လၢအတၢ်ဘံၣ်တၢ်ဘၢ အဂီၢ် အါန့ၢ်ဒံး အဒိးသန့ၤ အသးလၢ ကစၢ်ယွၤန့ၣ်လီၤ. လၢတၢ်န့ၣ်အဃိ, ကစၢ်ယွၤ ကစံၣ်ညီၣ် အဝဲသ့ၣ်, ဒီး အဝဲသ့ၣ်ကဘၣ်တူၢ်တၢ် လၢ ပှၤဘၤဘူလိၣ်ဖိ တဖၣ် အတၢ်ပၢအဖီလာ် န့ၣ်လီၤ. ဘၣ်ဆၣ်သနာ်က့, ကစၢ်ယွၤ ဟ့ၣ်ဒံးအဝဲသ့ၣ် လၢ တၢ်ဃုထၢန့ၣ်လီၤ. အဝဲသ့ၣ်မ့ၢ်ဃုထၢလၢ ကပီၢ်ယၢ်လီၤက့ၤအသး လၢအတၢ်ဒဲးဘး န့ၣ်, ကစၢ်ယွၤ ကပီၢ်ယၢ်လီၤက့ၤအသးလၢ အတၢ်သုးတၢ်ကျဲၤအံၤ ဒီး တပျဲ တၢ်ဟဲမၤဟးဂီၤ အဝဲသ့ၣ်ဘၣ် (ယံးရမံယၤ ၁၈း၈). ကစၢ်ယွၤ အဲၣ်ဒိးဟ့ၣ် တၢ်ကစီၣ်အံၤဆူ ပှၤယူဒၤဖိ တဖၣ်အအိၣ် အဃိ, အဝဲကိးထီၣ် ဝံယံးရမံယၤ ဒ်သိး ကလဲၤဆူ ပှၤတ့သပၢၤ တဂၤအဟံၣ် ဒ်သိး အကကွၢ် ပှၤတ့သပၢၤလၢဟီၣ်ခိၣ် တဂၤအံၤ အတၢ်ဖံး တၢ်မၤတဖၣ် န့ၣ်လီၤ.
ပှၤတ့သပၢၤဒီး သပၢၤဟီၣ်ခိၣ် (ဝံယံးရမံယၤ ၁၈း၁-၄)
တၢ်တ့သပၢၤလၢ ဟီၣ်ခိၣ် အတၢ်မၤအံၤ ပကွၢ်လၢ အဖျါညီညီဖိလီၤ. ဘၣ်ဆၣ် ပှၤလၢ အတမၤဘၣ်အီၤ နီတဘျီဘၣ်တဖၣ် အဂီၢ်, မ့ၢ်တၢ်လၢအကီဒိၣ်မး န့ၣ်လီၤ. အစိၤဆၢကတီၢ်ခဲအံၤ ပတသူတၢ်ပီးတၢ်လီ တဖၣ်လၢ ပှၤတ့အီၤလၢ ဟီၣ်ခိၣ် ဘၣ်. ဘၣ်ဆၣ်, ဖဲဝံယံးရမံယၤအစိၤ ပှၤအါတက့ၢ် ဒိးသန့ၤထီၣ်အသးလၢ ပှၤတ့သပၢၤ အတၢ်ဖံးတၢ်မၤ တဖၣ် လၢအဝဲသ့ၣ်အတၢ်အိၣ်မူ ကိးကပၤဒဲး န့ၣ်လီၤ. Richard Niell Donovan အတၢ်ကွဲးလၢ Sermon Writer အပူၤစံးဝဲ, "စိၤဆၢကတီၢ်ဖဲန့ၣ် ပှၤအါတက့ၢ် သူ သပၢၤ လၢတၢ်တ့အီၤလၢ ဟီၣ်ခိၣ် လၢတၢ်ပာ်ကီၤတၢ်အဂီၢ်, ဒီးလၢ တၢ်ဖီအီၣ်တၢ် အဂီၢ်န့ၣ်လီၤ. အဝဲသ့ၣ်သူ ဟီၣ်ခိၣ်ဒီး မၤဘ့ၣ်ဘၣ်အီၤ လၢကဒုးအဟံၣ်ခိၣ် အဂီၢ်န့ၣ်လီၤ. အဝဲသ့ၣ်သူ ဟီၣ်ခိၣ် ဒီးဒုးကဲထီၣ်အီၤလၢ အူးခဲ လၢကဖီအီၣ် တၢ်အဂီၢ် န့ၣ်လီၤ. အဝဲသ့ၣ် သူ တၢ်ဂီၤလၢ တၢ်တ့အီၤလၢဟီၣ်ခိၣ် တဖၣ်လၢ တၢ်ကယၢကယဲ အဂီၢ်, ဒီးလၢ တၢ်ဂဲၤလိာ်ကွဲအဂီၢ် န့ၣ်လီၤ." လၢတၢ်န့ၣ်အဃိ, ပှၤတ့သပၢၤလၢ ဟီၣ်ခိၣ် တဖၣ် အကစၢ်ဒၣ်ဝဲ မ့ၢ်တသ့ၣ်ညါလီၤ အသးဘၣ်ဆၣ် အဝဲသ့ၣ် ကဲထီၣ် ပှၤလၢအရ့ဒိၣ်တဖၣ် လၢအပှၤတဝၢ အပူၤန့ၣ်လီၤ.
ဝံယံးရမံယၤ ၁၈း၁-၄ အပူၤ, ပကထံၣ်ဘၣ်လၢ ကစၢ်ယွၤ မၢဝံယံးရမံယၤ လၢ ကလဲၤဆူ ပှၤတ့သပၢၤလၢ ဟီၣ်ခိၣ်တဂၤ အဟံၣ်ဒ်သိး အကဒိးန့ၢ် တၢ်ကစီၣ်လၢ အဟဲလၢယွၤအအိၣ် ခီဖျိ အကွၢ်ဝဲ ပှၤတ့သပၢၤ တဂၤ အတၢ်ဖံးတၢ်မၤန့ၣ်လီၤ.
ဝံယံးရမံယၤ ၁၈း၃-၄ စံးဝဲ -
ဒီးယလဲၤလီၤဆူ ပှၤတ့သပၢၤအဟံၣ်, ဒီးကွၢ်ကွၢ်, မၤသပၢၤလၢ သ့ၣ်ဘၣ် အဖီခိၣ်လီၤ. ဒီးသပၢၤလၢ အတ့ဝဲလၢ ကပံာ်န့ၣ် ဟးဂီၤဝဲလၢ ပှၤတ့သပၢၤ အစုပူၤ, ဒီးမၤကဒီး သပၢၤတဖျၢၣ်ဒ် အဘၣ်ပှၤတ့သပၢၤ အသးလၢ အကမၤဝဲ အသိးန့ၣ်လီၤ.
ဖဲဝံယံးရမံယၤ ကွၢ်ပှၤတ့သပၢၤ တဂၤန့ၣ် တ့သပၢၤအဖၢမုၢ်, အဝဲထံၣ်ဝဲလၢ ကပံာ်န့ၣ် ဟးဂီၤဝဲလၢ ပှၤတ့သပၢၤတဂၤန့ၣ် အစုပူၤ န့ၣ်လီၤ. ဘၣ်ဆၣ် ပှၤတ့သပၢၤတဂၤန့ၣ် အတၢ်မၤ တဝံၤဖဲန့ၣ် ဘၣ်. ကပံာ်လၢ အဟးဂီၤဝဲန့ၣ်, သူက့ၤဝဲ အသီတဘျီကဒီး, ဒီးဒုးကဲထီၣ်က့ၤအီၤလၢ သပၢၤအသီတဖျၢၣ် ဒ်အဘၣ် အသးအသိး န့ၣ်လီၤ. ဖဲအတ့သပၢၤ အသီတဖျၢၣ် ဝံၤဝဲအခါ, အတၢ်မၤဝံၤဝဲ ဖဲန့ၣ်လီၤ. ဘၣ်ဆၣ်, တၢ်ကစီၣ်လၢ ကစၢ်ယွၤကတဲဘၣ် ဝံယံးရမံယၤန့ၣ်, တကတၢၢ်ဝဲ ဖဲန့ၣ် ဘၣ်. ပကကွၢ်ကဒီး လံာ်စီဆှံ ဆူညါ တကူာ်လၢအဘၣ်ဃးဒီး ယွၤလၢအမ့ၢ် ပှၤတ့သပၢၤ တဂၤ မၤဂ့ၤထီၣ်ကပံာ်လၢ အမ့ၢ် ပှၤကညီတဖၣ် ဒ်လဲၣ် န့ၣ်လီၤ.
ယွၤလၢအမ့ၢ်ပှၤတ့သပၢၤ ဒီး ပှၤကညီလၢအမ့ၢ်ဟီၣ်ခိၣ်ကပံာ် (ဝံယံးရမံယၤ ၁၈း၅-၁၂)
တုၤဝံယံးရမံယၤ ထံၣ်တၢ်ခဲလၢာ်လၢ ပှၤတ့သပၢၤတဂၤ မၤဝဲဝံၤန့ၣ်, ကစၢ်ယွၤစံးဘၣ်ဝံယံးရမံယၤ -
ဒီးယွၤအကလုၢ်ဘၣ်ယၤ ဒီးစံးဝဲဒၣ်, အံၣ်စရ့လး အပှၤဟံၣ်ဖိသ့ၣ်ဧၢ, ယမၤသုဒ် ပှၤတ့သပၢၤတဂၤ အံၤ အသိးန့ၣ် တသ့ဘၣ်ဧါ, ယွၤစံးဝဲဒၣ်. ကွၢ်ကွၢ်, ဒ်ကပံာ်အိၣ်ဝဲလၢ ပှၤတ့သပၢၤ အစုပူၤ အသိးန့ၣ် သုအိၣ်ဝဲလၢ ယစုပူၤ ဒ်န့ၣ်သိး, အံၣ်စရ့လး အပှၤဟံၣ်ဖိသ့ၣ်ဧၢ. (ဝံယံးရမံယၤ ၁၈း၅-၆)
ဖဲလံာ်ဝံယံးရမံယၤ အဆၢဒိၣ် ၁၈ အပူၤ ပကထံၣ်ဘၣ်လၢ ကစၢ်ယွၤ တဲတၢ်လိၤလိၤဆူ ပှၤယူဒၤ ဖိတဖၣ် အအိၣ်န့ၣ်လီၤ. ယူဒၤ မ့ၢ် ပှၤကလုာ်တကလုာ်လၢ ကစၢ်ယွၤဒုးကဲထီၣ်အီၤ ဒီး ကစၢ်ယွၤ အံးထွဲကွၢ် ထွဲအီၤန့ၣ်လီၤ. ဘၣ်ဆၣ်, ပမ့ၢ်ကွၢ်လၢ အံၣ်စရ့လး အတၢ်စံၣ်စိၤတဲစိၤအပူၤ ပကထံၣ်ဘၣ်လၢ ပှၤအံၣ်စရ့လးဖိ တဖၣ် လဲၤသဒၣ်ယွၤ တလီၢ်လီၢ်, ဒီး ဘါထီၣ် ကလုာ်ဂၤ တဖၣ် အကစၢ်, တကးဒံးဘၣ်, ဒိးသန့ၤအသးလၢ ကလုာ်ဂၤ တဖၣ်လၢ အတၢ်ဘံၣ်တၢ်ဘၢ အဂီၢ် အါန့ၢ်ဒံး ဒိးသန့ၤအသးလၢ ကစၢ်ယွၤ န့ၣ်လီၤ. ဝံယံးရမံယၤ စးထီၣ်အတၢ်ဖံးတၢ်မၤဒ် ဝံတဂၤအသိး ဖဲ အံၣ်စရ့လး အဘီအမုၢ် လီၤကွံာ်လၢ ပှၤအၤရှူၢ်ဖိ တဖၣ်အစုပူၤ ဝံၤအလီၢ်ခံ, ဒီး အိၣ်တ့ၢ်က့ၤထဲ ယူဒၤ အဘီအမုၢ် လၢအဘၣ်တၢ်မၤ ပျံၤမၤဖုး အီၤလၢ ဘၤဘူလိၣ်အဘီအမုၢ် အဆၢကတီၢ်န့ၣ်လီၤ.
အဆၢကတီၢ်ဖဲန့ၣ်, ယူဒၤဖိတဖၣ် အတၢ်ဒဲးဘး အါဒိၣ်မး တုၤဒၣ်လဲာ် ကစၢ်ယွၤ ဘၣ်ကိးထီၣ် ဝံယံးရမံယၤ ဒ်ဝံတဂၤအသိး ဒ်သိး ကကတိၤတၢ်လၢ အခၢၣ်စး ဆူပှၤယူဒၤ ဖိတဖၣ်အအိၣ် ဒီး ဆူကလုာ်ဂၤ တဖၣ်အအိၣ်န့ၣ်လီၤ. ပှၤယူဒၤဖိတဖၣ် မ့ၢ်လဲၤသဒၣ် ကစၢ်ယွၤဘၣ်ဆၣ်, ကစၢ်ယွၤ အဲၣ်ဒံးအဝဲသ့ၣ် ဒိၣ်မး န့ၣ်လီၤ. ကစၢ်ယွၤ အဲၣ်ဒိး ပှၤယူဒၤဖိ တဖၣ် ကသ့ၣ်ညါဝဲလၢ ကစၢ်ယွၤပၢဆှၢဒံး အဝဲသ့ၣ် န့ၣ်လီၤ.
တၢ်ကစီၣ်လၢ ပှၤတ့သပၢၤ တဂၤန့ၣ် အဟံၣ်ပူၤ မ့ၢ်ဝဲ, ဒ်ကပံာ်တလိၣ် အိၣ်လၢ ပှၤတ့သပၢၤ တဂၤ အစုပူၤအသိး, ပှၤယူဒၤဖိတဖၣ်စ့ၢ်ကီး အိၣ်ဝဲလၢ ကစၢ်ယွၤ အစုပူၤန့ၣ်လီၤ. ဒ်ပှၤတ့သပၢၤ တဂၤ သူကပံာ် တလိၣ်န့ၣ် ဒ်အတၢ်ဘၣ်သးဒၣ်ဝဲ အသိး, ကစၢ်ယွၤလၢ အမ့ၢ် ပှၤတ့သပၢၤ တဂၤစ့ၢ်ကီး ကမၤပှၤယူဒၤဖိ တဖၣ် ဒ်အတၢ်ဘၣ်သးဒၣ်ဝဲ အသိးန့ၣ်လီၤ. ဘၣ်ဆၣ်, ကစၢ်ယွၤတအဲၣ်ဒိး မၤဟးဂီၤကွံာ် အပှၤဂီၢ်မုၢ် လၢာ်လၢာ်ဆ့ဆ့ ဘၣ်. အဃိ, အဝဲအဲၣ်ဒိးဝဲလၢ ပှၤယူဒၤဖိ တဖၣ်ကပီၢ်ယၢ်လီၤက့ၤ အသးန့ၣ်လီၤ. အဃိ, လၢဝံယံးရမံယၤ ၁၈း၁၁ အပူၤ ကစၢ်ယွၤ မၢလီၤ ဝံယံးရမံယၤ လၢကစံးဘၣ်ပှၤယူဒၤဖိ တဖၣ်ဒ်အံၤ -
ဒီးခဲကနံၣ်အံၤ ကတိၤတၢ်ဒီး ယူဒၤ အပှၤကညီ, ဒီးပှၤယရူၤရှလ့ၣ်ဖိ, ဒီးစံး, ယွၤစံးဒ်အံၤ, ကွၢ်ကွၢ်, ယတိာ်တၢ်အၢ ထီဒါသု, ဒီးကူၣ်တၢ်ကူၣ်ထီဒါ သုလီၤ. ဟဲက့ၤကဒါက့ၤ တဂၤလၢအကျဲ အၢစုာ်စုာ်, ဒီး မၤဂ့ၤထီၣ် က့ၤသုကျဲ ဒီး သုတၢ်မၤ တဖၣ်တက့ၢ်. (ဝံယံးရမံယၤ ၁၈း၁၁).
ကစၢ်ယွၤ အတၢ်သ့တၢ်ဘၣ် ဒ်ပှၤသ့တၢ်လၢာ် တဂၤအသိး တၢ်လၢအမၤဝဲသ့ သ့ၣ်တဖၣ် ဘၣ်တၢ်ပာ် ဖျါထီၣ်အီၤလၢ ဝံယံးရမံယၤ ၁၈း၇-၁၀ အပူၤ န့ၣ်လီၤ. ပကဖးကွၢ်သကိး -
ယမ့ၢ်ကတိၤတၢ်တဘျီ လၢပှၤတကလုာ် အဂ့ၢ်, လၢတၢ်အဘီ မုၢ်အဂ့ၢ်, ဒ်သိး တၢ်ကထဲးထီၣ်ကွံာ်, ဒီး မၤလီၤပှီၢ်, ဒီးမၤဟးဂီၤန့ၣ်ဒီး, ပှၤတကလုာ်လၢ ယကတိၤတၢ်လၢ အဂ့ၢ်န့ၣ် မ့ၢ်ဟဲက့ၤလၢ အတၢ်အၢဒီး, ယကပီၢ်ယၢ်လီၤက့ၤ ယသးလၢ တၢ်အၢလၢ ယတိာ်မၤအီၤ လီၤ. ဒီးယမ့ၢ်ကတိၤတၢ် တဘျီလၢ ပှၤတကလုာ် အဂ့ၢ်, တၢ်အဘီမုၢ်အဂ့ၢ် လၢယကမၤထီၣ်အီၤ, ဒီးသူၣ်လီၤအီၤ န့ၣ်ဒီး, မ့ၢ်မၤတၢ်အၢလၢ ယမဲာ်ညါ, ဒီးတဒိကနၣ် ဘၣ်ယကလုၢ်ဘၣ်ဒီး, ယကပီၢ်ယၢ်လီၤက့ၤ ယသး လၢတၢ်ဂ့ၤလၢ ယစံးယကမၤအီၤ န့ၣ်လီၤ. (ဝံယံးရမံယၤ ၁၈း၇-၁၀)
လၢလံာ်စီဆှံ တတီၤအံၤအပူၤ ပကထံၣ်ဘၣ်လၢ ကစၢ်ယွၤအံၤ တမ့ၢ်ထဲ ယူဒၤဖိတဒူၣ် အကစၢ်ဘၣ်, မ့ၢ်ပှၤကိးကလုာ်ဒဲး အကစၢ် န့ၣ်လီၤ. လၢလံာ်ဝံယိၤနါ အပူၤ ပကထံၣ်ဘၣ်လၢ နံၤနဝ့ အဝ့ၢ်န့ၣ် ဘၣ်ထွဲဒီး ပှၤအၤရှူၢ် ဖိတဖၣ်န့ၣ်လီၤ. ထဲဒၣ်ဝံယိၤနါ စံးဘၣ် ပှၤနံၤနဝ့ဖိ တဖၣ်ဒ်အံၤ, "အိၣ်ဒံး အနံၤလွံၢ်ဆံ ဒီး နံၤနဝ့ကဘၣ် တၢ်မၤဟးဂီၤကွံာ် အီၤလီၤ." (ယိၤနါ ၃း၄). ဖဲပှၤဝ့ၢ်ဖိ တဖၣ်နၢ်ဟူ ဝံယိၤနါ စံးတၢ်ဒ်အံၤဝံၤ, ပှၤဝ့ၢ်ဖိ ခဲလၢာ် ပီၢ်ယၢ်လီၤက့ၤ အသးန့ၣ်လီၤ. လၢတၢ်န့ၣ်အဃိ, ဝံယိၤနါ ၃း၁၀ အပူၤ ပကထံၣ်ဘၣ် -
ဒီးယွၤထံၣ်ဘၣ် အမၤတၢ်တဖၣ် လၢအဃၣ်ကွံာ် အသးလၢ အကျဲအၢလီၤ. ဒီးယွၤပီၢ်ယၢ်လီၤက့ၤ အသးလၢ တၢ်အၢလၢ အစံးလၢ သါကမၤအီၤ, ဒီးတမၤဘၣ်ဝဲဘၣ်. (ဝံယိၤနါ ၃း၁၀).
ဒ်ကစၢ်ယွၤ မၤဝဲဒ် အမၤပှၤနံၤနဝ့ဖိ တဖၣ်အသိး, ကစၢ်ယွၤကမၤလၢ ပှၤယူဒၤဖိ တဖၣ်အဂီၢ် အါန့ၢ်အန့ၣ် ဒံး, ဖဲပှၤယူဒၤဖိတဖၣ် မ့ၢ်ပီၢ်ယၢ်လီၤက့ၤအသး အဆၢကတီၢ် န့ၣ်လီၤ. ဘၣ်မနုၤအဃိလဲၣ်န့ၣ် ကစၢ်ယွၤအဲၣ်ဘၣ် ပှၤယူဒၤဖိ တဖၣ်ဒ် အတၢ်ဒၣ်ဝဲ အသိးန့ၣ်လီၤ.
ယအဲၣ်တ့ၢ်သု, ယွၤစံးဝဲဒၣ်, ဘၣ်ဆၣ်ဒီး သုစံး, နအဲၣ်တ့ၢ်ပှၤ ဒ်လဲၣ်. ဧ့ရှီၤမ့ၢ် စီၤယၤကိာ်အဒီပုၢ်ဝဲၢ်, တမ့ၢ်ဘၣ်ဧါ, ယွၤစံးဝဲဒၣ်, ဘၣ်ဆၣ်ဒီး ယအဲၣ်စီၤယၤကိာ်, ဒီးယသးဟ့ စီၤဧ့ရှီၤ, ဒီးယမၤ သယုၢ် အကစၢၢ် ကလိ, ဒီးအတၢ်န့ၢ်သါ လၢအအိၣ်အဆိးအလီၢ် လၢ ပှၢ်မုၢ်ကနၢ လီၤ. (ဝံမၤလကံ ၁း၂-၃).
ယွၤနကစၢ်လၢ အဘၣ်အသးလၢနၤ ဒ်သိး အကဟ့ၣ် နဆ့ၣ်နီၤလၢ အံၣ်စရ့လး အလီၢ်ပစိာ် အဖီခိၣ် န့ၣ် မ်အဘၣ် တၢ်စံးထီၣ်ပတြၢၤ အီၤတက့ၢ်. မ့ၢ်ယွၤအဲၣ် အံၣ်စရ့လး လီၤထူလီၤယိာ် သတးဒီး, ပာ်နၤလၢ စီၤပၤဒ်သိး နကစံၣ်ညီၣ်တၢ်, ဒီးမၤတၢ်တီတၢ်လိၤလီၤ. (၁စီၤပၤ ၁၀း၉).
လၢအံၣ်စရ့လး မ့ၢ်ဖိသၣ် န့ၣ် ယအဲၣ်အီၤ, ဒီးယကိးန့ၢ် ယဖိခွါလၢ အဲၤကူပတူး အပူၤလီၤ. (ဝံၤဟိၤရှ့ ၁၁း၁)
ပှၤယူဒၤဖိတဖၣ် မ့ၢ်တပီၢ်ယၢ်လီၤက့ၤ အသးဘၣ်ဆၣ် ကစၢ်ယွၤ တမၤဟးဂီၤ အဝဲသ့ၣ် လၢာ်လၢာ် ဆ့ဆ့ဘၣ် (ဝံယံးရမံယၤ ၁၈း၁၂). ဒ်ကပံာ်လၢ အဟးဂီၤတလိၣ် လၢအဘၣ်တၢ် တ့ထီၣ်ကဒီးအီၤ အသီ တဘျီအသိး, လၢပှၤယူဒၤဖိ တဖၣ်အဂီၢ် တၢ်မၤသီထီၣ်က့ၤ တၢ်ကအိၣ်ဝဲ န့ၣ်လီၤ. ပကထံၣ်ဘၣ် အီၤလၢ လံာ်ဝံယံးရမံယၤ အဆၢဒိၣ် ၃၀အပူၤ, လၢအတဲဘၣ်ဃး တၢ်မုၢ်လၢ် လၢ တၢ်မၤဟးဂီၤကွံာ်ဝံၤ အလီၢ်ခံ ဖဲပှၤအံၣ်စရ့လးဖိ တဖၣ် ကဟဲက့ၤကဒါက့ၤ လၢကုၢ်အလီၢ် ဒ်ပှၤတကလုာ် အသိးန့ၣ်လီၤ.
တၢ်ကတိၤလၢခံ
အါစုအါဘျီ ပဝဲသ့ၣ်တဖၣ်အံၤ ပလီၤဂာ်ဒီး ပှၤယူဒၤဖိတဖၣ် လၢအလဲၤသဒၣ်ယွၤ ဒီးပိာ်ထီၣ် ကစၢ် အဂၤအခံန့ၣ်လီၤ. အါစုအါဘျီ ပဝဲသ့ၣ်တဖၣ် ပလီၤဂာ်ဒီး ကပံာ်တလိၣ်လၢ အဟးဂီၤလၢ ပှၤတ့သပၢၤ တဂၤအစုပူၤ အသိးန့ၣ်လီၤ. ဘၣ်မနုၤအဃိ ယတဲတၢ်အံၤလဲၣ်န့ၣ်, မ့ၢ်လၢ ပကဲထီၣ် စိၤခဲအံၤ အတၢ်လဲၤထီၣ်လဲၤထီ အကုၢ်အဃိ န့ၣ်လီၤ. ပဒိးသန့ၤထီၣ်ပသးလၢ တၢ်လဲၤထီၣ်လဲၤထီ တဖၣ်အါန့ၢ် ပဒိးသန့ၤ ပသးလၢ ကစၢ်ယွၤဒံးန့ၣ်လီၤ. ပတဖးလၢၤ လံာ်စီဆှံလၢၤဘၣ်. ပတဘါထုကဖၣ် အါအါလၢၤ ဘၣ်. ပဃုတၢ်မုာ်တၢ်လၤ လၢဟီၣ်ခိၣ်အံၤ အါန့ၢ် ပဆ့ၣ်နီၤလၢ သရိာ်ပူၤ ဒီးဒိကနၣ် ကစၢ်ယွၤ ကလုၢ်ကထါ န့ၣ်လီၤ. တၢ်လၢကစၢ်ယွၤလိၣ်ဘၣ် လၢပအိၣ်န့ၣ် မ့ၢ် တၢ်ပီၢ်ယၢ်လီၤသး ဒီး တၢ်ဟဲက့ၤ ဆူအအိၣ်န့ၣ်လီၤ. စိၤခဲအံၤ တၢ်လဲၤထီၣ်လဲၤထီ တဖၣ် ပသူအီၤမ့ၢ်သ့န့ၣ် ကဲထီၣ်တၢ်ဘျုးတၢ်ဖှိၣ် လၢပဂီၢ်လီၤ. ပတကြၢး ပျဲ တၢ်လဲၤထီၣ်လဲၤထီ တဖၣ် ကဲပကစၢ်ဘၣ်. ဖဲအကဲထီၣ် ပကစၢ်အခါ ပကဲထီၣ်အကုၢ် န့ၣ်လီၤ.
ဆၢကတီၢ်ခဲအံၤ ပဝဲလၢ ပဟဲအိၣ်လၢ ကီၢ်သၢဘ့ၣ်တဘ့ၣ် တဖၣ် ပကသ့ၣ်ညါဘၣ် တၢ်အုၣ်ကီၤသး လၢအမ့ၢ် Insurance တဖၣ်န့ၣ်လီၤ. တၢ်အုၣ်ကီၤသး တဖၣ်အံၤ ဟ့ၣ်ပတၢ်အိၣ်မူ တၢ်ဘံၣ်တၢ်ဘၢ သ့ဝဲန့ၣ်လီၤ. ပကအိၣ်ဒီး သိၣ်လ့ၣ် တၢ်အုၣ်ကီၤသး, တၢ်အိၣ်ဆူၣ်အိၣ်ချ့ တၢ်အုၣ်ကီၤသး, ဟံၣ်ဃီ တၢ်အုၣ်ကီၤသး, တၢ်အိၣ်မူ တၢ်အုၣ်ကီၤသး, တုၤဒၣ်လဲာ် တၢ်ပာ်လီၤဒဲဟီၣ်ခိၣ် တၢ်အုၣ်ကီၤသး တဖၣ်န့ၣ်လီၤ. တၢ်အုၣ်ကီၤသး တဖၣ်အံၤ အုၣ်ကီၤပှၤလၢ ပတၢ်အိၣ်မူအဂီၢ်, တုၤဒၣ်လဲာ် ပတၢ်သံ အဂီၢ် သ့ဝဲန့ၣ်လီၤ. ဘၣ်ဆၣ် အုၣ်ကီၤပှၤလၢ ပတၢ်အိၣ်မူလၢ တၢ်သံဝံၤ အလီၢ်ခံ တသ့ဘၣ်. ပှၤအါဒံအါဂၤ ဒိးသန့ၤ အသးလၢ တၢ်အုၣ်ကီၤ တဖၣ်အံၤ အါမး တုၤဒၣ်လဲာ် တသ့ၣ်နီၣ် ဒိးသန့ၤ အသးလၢ ကစၢ်ယွၤလၢၤဘၣ် န့ၣ်လီၤ. ဖဲပသးပ့ၤနီၣ် ဒိးသန့ၤပသးလၢ ကစၢ်ယွၤအခါန့ၣ်, ပလီၤဂာ်ဒီး ပှၤယူဒၤဖိ တဖၣ် လၢဝံယံးရမံယၤ အစိၤန့ၣ်လီၤ.
တမ့ၢ်ထဲ တၢ်လဲၤထီၣ်လဲၤထီ တဖၣ်ကဲ ပကစၢ်သ့လီၤ န့ၣ်ဘၣ်, တၢ်လၢ ပပာ်ဒိၣ်အီၤ လၢပတၢ်အိၣ် မူအပူၤ တဖၣ်ကဲထီၣ် ပကစၢ်သ့ဝဲ စ့ၢ်ကီးန့ၣ်လီၤ. ဖဲ တၢ်သ့ၣ်တဖၣ်အံၤ ဒိၣ်စိဒိၣ်ကမီၤလၢ ပတၢ်အိၣ်မူ အပူၤန့ၣ်, ကစၢ်ယွၤ ကဲထီၣ်က့ၤ တၢ်ဆံးဆံးဖိ လၢပဂီၢ်န့ၣ်လီၤ. ဖဲကစၢ်ယွၤ ကဲထီၣ် တၢ်ဆံးဆံး ဖိအခါ, တၢ်ကီတၢ်ခဲ ဒီး တၢ်ဘၣ်ယိၣ်ဘၣ်ဘီ တဖၣ် ဒိၣ်ထီၣ်လၢ ပတၢ်အိၣ်မူ အပူၤန့ၣ်လီၤ.
ဘၣ်ဆၣ် ကစၢ်ခရံာ်အနီၢ်ကစၢ်ဒၣ်ဝဲ ကွဲမုာ်ဃီၤပှၤ ဒီး စံးဘၣ်ပှၤ -
ပှၤလၢ တၢ်ဘှံးအသး, ဒီးဝံတၢ်ယိးတၢ်ဃၢ ခဲလၢာ်သ့ၣ်သုဧၢ, ဟဲဆူယအိၣ် တက့ၢ်. ဒီးယကဒုး အိၣ်ဘှံး သုလီၤ. ဟံးထီၣ်ယနီၣ်ယိးဘိ လၢသုလိၤ, ဒီးမၤလိ တၢ်လၢ ယၤတက့ၢ်. အဂ့ၢ်ဒ်အံၤ, ယသးစူၤ, ဒီးယသးဆီၣ်လီၤ ယသးလီၤ. ဒီးသုကထံၣ်န့ၢ် တၢ်အိၣ်ဘှံးလၢ သုသးအဂီၢ် လီၤ. အဂ့ၢ်ဒ်အံၤ, ယနီၣ်ယိးဘိ မ့ၢ်အညီ, ဒီးယတၢ်ဝံတၢ်ယိး မ့ၢ်အဖှံလီၤ. (မးသဲ ၁၁း၂၈-၃၀).
အခဲအံၤ, ပကက့ၤက့ၤဆူ ကစၢ်ခရံာ်အအိၣ်ဧါ န့ၣ်, ဒိးသန့ၤထီၣ်ပသးလၢ ပကစၢ်ဒၣ်ပဝဲ န့ၣ်လီၤ. ကစၢ်ယွၤ ဟ့ၣ်ပှၤ တၢ်သဘျ့လၢ ပကဃုထၢ လၢပကက့ၤက့ၤ ဆူအအိၣ်အဂီၢ် န့ၣ်လီၤ. ဖဲပက့ၤဆူ အအိၣ်, ဒီး ဖဲပဆိကမိၣ်လီၤ ပသးလၢ ပကဲ ကပံာ်တလိၣ်လၢ လၢအဟးဂီၤလၢ ပှၤတ့သပၢၤ တဂၤ အစုပူၤ အခါ, ကစၢ်ယွၤ ဒ်အမ့ၢ် ပှၤတ့သပၢၤ တဂၤအသိး ကဟံးန့ၢ်က့ၤ ပတၢ်ဝံတၢ်ယိး တဖၣ် ဒီး သိပှၤဘှီပှၤ ဒ်တၢ်ဘၣ်အသး ဒၣ်ဝဲအသိးန့ၣ်လီၤ.
){kind=link}
0 Comments