မံမုာ်လၢ ခရံာ်ပူၤ (ခရံာ်ဖိ အတၢ်စူၢ်တၢ်နာ် ဘၣ်ဃး တၢ်သံ၀ံၤအလီၢ်ခံ)

တၢ်သံ မ့ၢ်တၢ်မနုၤလဲၣ်. မုၢ်ကအိၣ်၀ဲတနံၤ ပကဘၣ်သံ ကိးဂၤဒဲး န့ၣ်လီၤ. ဘၣ်ဆၣ် လၢပှၤခရံာ် ဖိတဖၣ် အဂီၢ် တၢ်သံ တမ့ၢ် တၢ်ကတၢၢ်ဘၣ်. တၢ်သံ၀ံၤအလီၢ်ခံ တၢ်လၢ အကဟဲန့ၣ် အိၣ်ဒံး. အဃိ, လၢ ပှၤခရံာ်ဖိ တဖၣ် အဂီၢ် တၢ်မုၢ်လၢ် အဒိၣ်ကတၢၢ် န့ၣ် တမ့ၢ် တၢ်သံဘၣ်, မ့ၢ် ကစၢ်ခရံာ် အတၢ်ဟဲ ခံဘျီတဘျီ လၢအအိၣ် ဒီး အလၤကပီၤ န့ၣ်လီၤ. လံာ်စီဆှံ သိၣ်လိ ပှၤလၢ တၢ်သံမ့ၢ် တၢ်ဒဲးဘး အဘူးအလဲ န့ၣ်လီၤ. လံာ်ရိမ့ၤ အတၢ်ကစီၣ် အကံၢ်အလဲ စံးဘၣ်ပှၤလၢ ပှၤဟီၣ်ခိၣ်ဖိ အတၢ်အိၣ်သး အခဲအံၤ အခီၣ်ထံးခီၣ်ဘိ မ့ၢ်၀ဲ စီၤအၤဒၣ် အတၢ်ဒဲးဘး န့ၣ်လီၤ. ခီဖျိ စီၤအၤဒၣ် အတၢ်ဒဲးဘး အဃိ, တၢ်ဒဲးဘး နုာ်လီၤလၢ ဟီၣ်ခိၣ် ဒီး ရၤလီၤအသးဆူ ပှၤကိးဂၤဒဲး အအိၣ် န့ၣ်လီၤ. တၢ်ဒဲးဘး အဘူးအလဲ မ့ၢ်တၢ်သံ, ဒီး တၢ်သံအံၤ တကွၢ်ဒိၣ် ဆံးအါစှၤ တၢ်ဘၣ်.


 အါန့ၢ်အန့ၣ်, လံာ်စီဆှံ စံးဘၣ်ပှၤလၢ တၢ်သံအံၤ မ့ၢ် တၢ်ဒဲးဘး အတၢ်ဆိၣ်အၢ အကျါ တခါ န့ၣ်လီၤ. တမ့ၢ် တၢ်ဆိၣ်ဂ့ၤ ဒီး တမ့ၢ် သးသမူ အကတၢၢ်လၢ အအိၣ်ဒီး တၢ်မုာ်တၢ်ခုၣ် န့ၣ်ဘၣ်. မ့ၢ်၀ဲ တၢ်မၤကတၢၢ် ကွံာ် ပတၢ်ဘၣ်ထွဲဒီး ကစၢ်ယွၤ အတၢ်ဘၣ်တ့ တဖၣ်န့ၣ်လီၤ. တၢ်သံမ့ၢ် တၢ်လၢ အလာ်အၢ၀ဲ, မ့ၢ်တၢ်လၢ အမၤဟးဂီၤတၢ်, ဒီး မ့ၢ်ပဒုၣ်ပဒါ အလီၢ်ခံကတၢၢ် တခါ န့ၣ်လီၤ.

ကဲထီၣ်အသးသ့ဒ်လဲၣ်. မ့ၢ်လၢတၢ်သံ မၤလီၤဖးပှၤဒီး ပှၤလၢပအဲၣ် အဃိ န့ၣ်လီၤ. ထုးလီၤဖးပှၤဒီး ပတၢ်အိၣ်ယၢၤ တဖၣ် ဖဲပအိၣ်မူဒံး အခါန့ၣ်လီၤ. တကးဒံးဘၣ် တၢ်သံ ထုးလီၤဖး ပသးဒီး ပနီၢ်ခိ န့ၣ်လီၤ. လံာ် ၂ကရံၣ်သူး ၅း၁ စံးဘၣ်ပှၤ လၢ ပဒဲဟီၣ်ခိၣ်အံၤ ကဘၣ်တၢ်ပာ်တ့ၢ်ကွံာ် အီၤန့ၣ်လီၤ. ဘၣ်ဆၣ် မုၢ်ကအိၣ်တနံၤ ဖဲကစၢ်ခရံာ်ကဟဲက့ၤ ခံဘျီ တဘျီ လၢအအိၣ်ဒီး တၢ်လၤတၢ်ကပီၤ န့ၣ်, ပဒဲဟီၣ်ခိၣ် အံၤ ကဂဲၤဆၢထၢၣ် သမူထီၣ်ဒ် ခရံာ်ဂဲၤထၢၣ်သမူထီၣ် က့ၤလၢ တၢ်သံအသိး, ဒီး ကက့ၤထံၣ်လိာ်သးဒီး ကဲထီၣ် က့ၤတၢ်တမံၤဃီ ဒီး ပသးသမူ လၢ အက့ၤထီၣ်ဆိပာ်စၢၤ လၢ ကစၢ်ယွၤအဂီၤထံး န့ၣ်လီၤ.

တၢ်သံအံၤ တမ့ၢ်တၢ်လီၤထူလီၤယိာ် လၢပှၤခရံာ်ဖိ အဂီၢ်ဘၣ်. ကစၢ်ခရံာ် အတၢ်ဟဲလီၤဆူ ဟီၣ်ခိၣ်ချၢ, အတၢ်အိၣ်မူ တၢ်ဖံးတၢ်မၤ, အတၢ်သံ, ဒီး အတၢ်ဂဲၤဆၢထၢၣ်သမူထီၣ်က့ၤ ဒုးနဲၣ်ပှၤကျဲလၢ မုၢ်ကအိၣ်တနံၤ ပ၀ဲလၢ အစူၢ်အနာ်ခရံာ် တဖၣ် ပကဂဲၤထၢၣ်သမူထီၣ်က့ၤ ဒ်န့ၣ်အသိး လီၤ. ဒ်ကစၢ်ခရံာ်အနီၢ်ခိ ဘၣ်တၢ်ဆီတလဲအီၤ ဒ် နီၢ်ခိလၢ အလၢအပှဲၤလၢ တၢ်ဒဲးဘးတအိၣ်လၢၤဘၣ် ဖဲအဂဲၤထၢၣ်သမူထီၣ်က့ၤ၀ံၤ အလီၢ်ခံ အသိး, ပ၀ဲသ့ၣ်တဖၣ်အံၤ ပနီၢ်ခိ ကဘၣ်တၢ်ဆီ တလဲကွံာ်အီၤဒ်န့ၣ်အသိး ဖဲကစၢ်ခရံာ်ဟဲက့ၤ ခံဘျီတဘျီ အဆၢကတီၢ်န့ၣ်လီၤ.

တၢ်ကတဲာ်ကတီၤသးလၢ တၢ်သံအဂီၢ်

ပှၤခရံာ်ဖိတဖၣ် ထံၣ်တၢ်သံ မ့ၢ်တၢ်မနုၤလဲၣ်. တၢ်သံမ့ၢ် ပဒုၣ်ပဒါ, လၢအမၤလီၤပှီၢ် ပတၢ်ဘၣ်ထွဲ ဒီး ပှၤလၢပအဲၣ်အီၤ တဖၣ် န့ၣ်လီၤ. အဃိ လၢပှၤခရံာ်ဖိတဂၤ အဂီၢ် တၢ်အိၣ်ကတဲာ်ကတီၤသး လၢနီၢ်ခိ ဒီးနီၢ်သး မ့ၢ်တၢ်လၢ အလီၢ်အိၣ်၀ဲ ဒ်သိး ပသးသမူ ကတုၤလၢတၢ်အုၣ်က့ၤခီၣ်က့ၤအဂီၢ် ဖဲတၢ်သံဟဲတုၤ အိၣ်ပှၤ အခါန့ၣ်လီၤ. ပကမၤလိသကိး တၢ်အိၣ် ကတဲာ်ကတီၤသး သၢခါ ဒ်လာ်အံၤအသိးလီၤ.

၁. ပကဘၣ်ပာ်ပသး သပှၢ်ပှၢ်လၢကစၢ်ခရံာ်အပူၤ န့ၣ်လီၤ. 

အ၀ဲအံၤမ့ၢ် တၢ်လၢ စီၤပီလူးမၤ၀ဲန့ၣ်လီၤ. အ၀ဲထံၣ်လၢ တၢ်က့ၤအိၣ်ဒီး ကစၢ်ခရံာ်န့ၣ် မ့ၢ်တၢ်ဂ့ၤဒိၣ်ဒိၣ် ကလဲာ်လီၤ (ဖံးလံးပံၤ ၁း၂၃). ဖဲအမူအဆၢကတီၢ် မ့ၢ်ခရံာ်အဂီၢ်, ဒီး အသံမ့ၢ် တၢ်ဘျုး, တၢ်ဘျုးလၢ တၢ်သ့ၣ်ညါက့ၤ ကစၢ်ခရံာ် နီၢ်နီၢ် န့ၣ်လီၤ. အ၀ဲမ့ၢ်တၢ်ကဲထီၣ်အသးသ့လၢ ပှၤလၢ အအဲၣ်ကစၢ်ခရံာ် အခဲအံၤ တဖၣ်အဂီၢ်န့ၣ်လီၤ. ပမ့ၢ်ပာ်အီၤလၢ တၢ်ကိးမံၤဒဲးအဖီခိၣ်, ဒီး ဃုအဘီအမုၢ်ဒီး အတၢ်မ့ၢ်တၢ်တီလၢ တၢ်ခဲလၢာ် အမဲာ်ညါန့ၣ်, မုၢ်ကအိၣ်၀ဲတနံၤ ပကထံၣ် အီၤလၢမဲာ်သကိးမဲာ် ဖဲပလဲၤပူၤကွံာ် ဟီၣ်ခိၣ်အံၤ၀ံၤ န့ၣ်လီၤ. အဃိ တၢ်ကတဲာ်ကတီၤသး ခဲအံၤန့ၣ် ဂ့ၤန့ၢ် တၢ်ကတဲာ်ကတီၤသးလၢ တၢ်ဆၢကတီၢ်လၢအအိၣ်တ့ၢ်ဒီးပှၤ တစိၢ်ဖိ န့ၣ်လီၤ.

၂. ပကဘၣ်သ့ၣ်နီၣ် လၢ တၢ်ဆိၣ်ဂ့ၤကဟဲအါမးလၢ တၢ်အိၣ်မူလၢ ခဲကိာ်တဃၣ်န့ၣ်လီၤ.

ကစၢ်ခရံာ်အိၣ် ဖဲန့ၣ် န့ၣ်လီၤ. ဖဲန့ၣ် ပကသဂၢၢ်ဘၣ်စ့ၢ်ကီး ပှၤလၢအမံမုာ်လၢ ခရံာ်ပူၤ တဖၣ်န့ၣ်လီၤ. ပှၤလၢပသ့ၣ် ညါတ့ၢ်အီၤတဖၣ်, ပဟံၣ်ဖိဃီဖိ, ပဘူးပတံၢ်, ပတံၤသကိး, ပခိၣ်ပနၢ်, ပှၤလၢအမၤစၢၤ တ့ၢ်ပှၤ တဖၣ် ကအိၣ်၀ဲဖဲန့ၣ် စ့ၢ်ကီး န့ၣ်လီၤ. တၢ်အိၣ်ဖှိၣ်လၢ မူခိၣ်ဘီမုၢ်အပူၤ ကမ့ၢ်တၢ်လီၤကမၢကမၣ် ဆံးဒိၣ်လဲၣ်. ဒီး ပတၢ်လဲၤမၤသကိး တၢ်ဒီး တၢ်အိၣ်ဖှိၣ်အံၤ ကမ့ၢ်တၢ်ဂ့ၤတမံၤ လၢပဂီၢ်ဆံးဒိၣ်လဲၣ် (ဧ့ၤဘြံၤ ၁၂း၂၃).

ဘၣ်ဆၣ် ပှၤအါဒံအါဂၤ ကသံကွၢ်၀ဲ, လၢမူခိၣ်ဘီမုၢ်န့ၣ် ပတၢ်ရ့လိာ်ဘၣ်ထွဲ ကမ့ၢ်တၢ်ဒ်လဲၣ်. တၢ်မုာ်လၢ ဟီၣ်ခိၣ်အံၤ လၢမူခိၣ်ဘီမုၢ်အပူၤ အိၣ်စ့ၢ်ကီးဧါ. ပှၤလၢအသံလၢ အဖိသၣ် မ့တမ့ၢ် အသးစၢ်တဖၣ် ကကဲထီၣ်ပှၤဒိၣ်တုာ်ခိၣ်ပှဲၤ ဧါ. မ့ၢ်ပတၢ်သ့ၣ်ညါဘၣ်ဃး ကစၢ်ယွၤ ကဟဲနုာ်လီၤလၢပပူၤ တဘျီဃီဧါ. မ့ၢ်ပကသ့ၣ်ညါလိာ်ပသး စ့ၢ်ကီးဧါ. လၢတၢ်သံကွၢ် ခဲလၢာ်အံၤ အပူၤ တၢ်စံးဆၢအိၣ်၀ဲဒၣ်ထဲတဖျၢၣ်ဧိၤ န့ၣ်လီၤ, လၢတၢ်လၤကပီၤ အပူၤ တၢ်ဆိၣ်အၢ တအိၣ်လၢၤ ဘၣ်. ပှၤကိးဂၤဒဲး ကအိၣ်ဒီး တၢ်သူၣ်ခုသးခု န့ၣ်လီၤ. မ့ၢ်လၢ ကစၢ်ယွၤ အတၢ်ဆိၣ်ဂ့ၤ ကယွၤလီၤ၀ဲ လၢတအိၣ်ဒီး တၢ်တြီမၤတံာ်တာ် နီတမံၤဘၣ် န့ၣ်လီၤ. တၢ်သူၣ်ခုသးခု လၢပလဲၤခီဖျိလၢ ဟီၣ်ခိၣ်အံၤ ပကထံၣ်န့ၢ်အီၤ ဖဲန့ၣ်, ဘၣ်ဆၣ် ကမ့ၢ်တၢ်သးခုလၢ အအိၣ်ဒီး တၢ်ဆိၣ်ဂ့ၤဆိၣ်၀ါလၢ အဟဲလၢ ကစၢ်ယွၤန့ၣ်လီၤ. တၢ်ခဲလၢာ်ကမ့ၢ် တၢ်မ့ၢ်တၢ်တီ, ဒီး တဟးဂူာ်ဟးဂီၤ နီတဘျီဘၣ်.

၃. ခဲအံၤပကဘၣ်မၤလိလၢ တၢ်အိၣ်မူလၢ ဟီၣ်ခိၣ်အံၤ မ့ၢ်တၢ်တစိၢ်တလီၢ် န့ၣ်လီၤ. 

ပတၢ်အိၣ်မူ တနံၤဘၣ်တနံၤ အပူၤ ပကဘၣ်သ့ၣ်နီၣ်လၢ မုၢ်နံၤကတုၤအိၣ်ပှၤလၢ ပကဘၣ်ပာ်တ့ၢ်ကွံာ် ဟီၣ်ခိၣ်အံၤ န့ၣ်လီၤ. အ၀ဲအံၤမ့ၢ် စီၤပီလူး အတၢ်ကွဲးဆူ ပှၤကရံၣ်သူးဖိတဖၣ် အအိၣ် ဖဲ ၁ကရံၣ်သူး ၇း၃၁ လၢအစံး၀ဲ, "အဂ့ၢ်ဒ်အံၤ, တၢ်အိၣ်လၢခိအံၤ, အက့ၢ်အဂီၤဒံကွံာ်၀ဲလီၤ." အခဲအံၤ ပမ့ၢ်ဟံးဃာ် ကစၢ်ခရံာ်ကျၢၤကျၢၤလၢ ပတၢ်အိၣ်မူ အပူၤန့ၣ်, တလိၣ်ပဘၣ်ကိၢ်ဘၣ်ဂီၤ လၢ ပကသံဆိဆိ မ့တမ့ၢ် ပကသံလၢပသးပှၢ်ခိၣ်၀ါ အဆၢကတီၢ်ဘၣ်န့ၣ်လီၤ.

မ်ယွၤဆိၣ်ဂ့ၤပှၤ ဒီး မ်ပကမ့ၢ်ပှၤလၢ အဟံးဃာ်ကစၢ်ခရံာ်ကျၢၤကျၢၤလၢ ပတၢ်အိၣ်မူတနံၤဘၣ်တနံၤ အပူၤန့ၣ်တက့ၢ်.