တၢ်အိၣ်ဖှိၣ်လၢခရံာ်အဲၣ်ဒိး (လီၣ်ဖျါ ၂, ၃)

တၢ်ကတိၤလၢညါ

တၢ်ဆၢကတီၢ်ခဲအံၤ လၢဟီၣ်ခိၣ်ဒီဘ့ၣ်ညါ အပူၤ သရိာ်အတၢ်သူၣ်ထီၣ်တဖၣ် ဘၣ်အိၣ်ကလီဝဲ ခီဖျိ ပှၤခရံာ်ဖိတဖၣ် လဲၤသရိာ်စိၤမိၤ တသ့ဘၣ်အဃိ န့ၣ်လီၤ. မ့ၢ်နာ်သက့ဒ်န့ၣ်ဒီး, ပှၤခရံာ်ဖိတဖၣ် မ့ၢ်တလဲၤထီၣ် သရိာ်စိၤမိၤ သနာ်က့ တၢ်လၢပှၤကိးဝဲ တၢ်အိၣ်ဖှိၣ် (Church) န့ၣ် တမ့ၢ်တၢ်သူၣ်ထီၣ် ဘၣ်. တၢ်လၢ တၢ်အိၣ်ဖှိၣ်န့ၣ် မ့ၢ်ဒၣ် နၤယၤ ပဝဲပှၤခရံာ်ဖိတဖၣ် န့ၣ်လီၤ.

လၢလံာ်တၢ်လီၣ်ဖျါ အပူၤ ပကထံၣ်တၢ်အိၣ်ဖှိၣ်အိၣ်ဝဲဒၣ် နွံဖု န့ၣ်လီၤ. တၢ်အိၣ်ဖှိၣ် နွံဖုအံၤ အိၣ်သူၣ်လီၤအသး လၢ ကီၢ်အၤစံ အပူၤ, လၢအစိၤဆၢကတီၢ်ခဲအံၤ မ့ၢ် ကီၢ်ထၢခံၣ် အမုၢ်နုာ် တကပၤန့ၣ်လီၤ. တၢ်အိၣ်ဖှိၣ် နွံဖုလၢ လံာ်တၢ်လီၣ်ဖျါ အပူၤ တဖၣ်မ့ၢ်ဝဲ အ့းဖ့းစူး, စမူရနၤ, ပ့ၢ်ကမူး, သူၤအတံရၤ, စၢ်ဒံ, ဖံၤလဒ့းလဖံ, ဒီး လီၤဒံၤကံ တဖၣ်န့ၣ်လီၤ.

တၢ်ဆၢကတီၢ်, ဒီးတၢ်မၤအသး လၢလံာ်တၢ်လီၣ်ဖျါ အပူၤန့ၣ် မ့ၢ်ဝဲ ဒၣ်ဖဲ ခ.န. ၈၀ နံၣ်အခိၣ်အဃၢၤ ဖဲ ရိမ့ၤ အစီၤပၤဒိၤမံရှၤ ပၢတၢ်အစိၤန့ၣ်လီၤ. ရိမ့ၤအစီၤပၤ ဒိၤမံရှၤ မ့ၢ်စီၤပၤလၢ အအၢအသီတဂၤ လၢအမၤအၢမၤနး ပှၤခရံာ်ဖိ ဒိၣ်ဒိၣ်မုၢ်မုၢ် န့ၣ်လီၤ. အဂ့ၢ်ဒ်အံၤ, အကစၢ်ဒၣ်ဝဲ ကိးလီၤအသးလၢ ယွၤ, ဒီးအဲၣ်ဒိးဝဲလၢ ပှၤကိးဂၤဒဲးလၢ အဘီအမုၢ်အပူၤ ကဘါထီၣ်အီၤန့ၣ်လီၤ. ဖဲအစိၤအဆၢကတီၢ်, ပှၤကွဲးလံာ်တၢ်လီၣ်ဖျါ လၢအမ့ၢ် ပှၤတၢ်မၢဖိ စီၤယိၤဟၣ် ဘၣ်တၢ်ဖီၣ်အီၤ ဒီးဆှၢ အီၤဆူ ကီးပးမူး န့ၣ်လီၤ. ကီးပးမူး န့ၣ်မ့ၢ်ကီးတကီး လၢ ပှၤပာ်ပှၤဃိၣ်ဖိ လၢ တလူၤထွဲ မၤထွဲ ရိမ့ၤပဒိၣ်အတၢ်သိၣ်တၢ်သီ တဖၣ်န့ၣ်လီၤ. ဖဲစီၤယိၤဟၣ် အိၣ်လၢ ကီးပးမူး အဆၢကတီၢ်, အဝဲထံၣ်တၢ်လၢညါခီ, ဒီးအတၢ်ထံၣ်လၢညါခီတဖၣ် ဒိးသန့ၤထီၣ်အသး လၢ စိၤဆၢကတီၢ် တၢ်အိၣ်သးအဖီခိၣ်, ဒီးအတၢ်ကွဲးတဖၣ် ဟ့ၣ်ဂံၢ်ဟ့ၣ်ဘါ ပှၤခရံာ်ဖိလၢ တၢ်အိၣ်ဖှိၣ် နွံဖု အပူၤန့ၣ် ဒိၣ်ဒိၣ်အါအါ လီၤ. တကးဒံးဘၣ်, ကစၢ်ခရံာ်အနီၢ်ကစၢ်ဒၣ်ဝဲ လီၣ်ဖျါထီၣ်အသးလၢ စီၤယိၤဟၣ် အမဲာ်ညါ, ဒီးမၢစီၤယိၤဟၣ် ကွဲးန့ၢ်လံာ်ပရၢ နွံဘ့ၣ်ဆူ တၢ်အိၣ်ဖှိၣ်နွံဖု အအိၣ်, ဒီးပကထံၣ်န့ၢ်ဘၣ်အီၤလၢ လံာ်တၢ်လီၣ်ဖျါ အဆၢဒိၣ် ၂ ဒီး ၃ အပူၤန့ၣ်လီၤ.

ပကကွၢ်အစိၤအဆၢကတီၢ်ဖဲန့ၣ် အတၢ်အိၣ်အသးတစဲး. အစိၤဆၢကတီၢ်ဖဲန့ၣ် ပှၤခရံာ်ဖိတဖၣ် တၢ်ဆီၣ်သနံးအီၤ အကလုာ်ကလုာ် ဒ်သိး ကသမၢကွံာ် အတၢ်စူၢ်တၢ်နာ်အဂီၢ် န့ၣ်လီၤ. တၢ်ဆီၣ်သနံးတဖၣ် ဟဲလၢ တၢ်ချၢအိၣ်, ဒီး လၢခရံာ်ဖိကဒဲကဒဲ အပူၤ အိၣ် စ့ၢ်ကီးဝဲ န့ၣ်လီၤ. တၢ်ဆီၣ်သနံးလၢအဟဲလၢ တၢ်ချၢ တကပၤန့ၣ် ပကထံၣ်ဘၣ် ထံရူၢ်ကီၢ်သဲး အတၢ်ဆီၣ်သနံး လၢအမ့ၢ် တၢ်ဘါထီၣ်ရိမ့ၤ အစီၤပၤဒ် ကစၢ်ယွၤအသိး, ဒီး ပှၤလၢတဘါထီၣ်ရိမ့ၤအစီၤ ပၤတဖၣ် ကဘၣ်တၢ်မၤအၢမၤနးအီၤ, ကဘၣ်တၢ်ဒုးအီၣ်အီၤ ဒီးဆၣ်ဖိ ကီၢ်ဖိ, ကဘၣ်တၢ်ဒွဲၣ်အူသမူ အီၤ, အိၣ်ဝဲဒၣ်အကလုာ်ကလုာ်လီၤ. တကးဒံးဘၣ်, လၢမုၢ်ကျိၤဝဲၤကွာ်တကပၤ စ့ၢ်ကီး, ပှၤခရံာ်ဖိလၢ အအဲၣ်ဒိး မၤမုၢ်ကျိၤဝဲၤကွာ်တဖၣ် ကဘၣ်ဘါထီၣ် မုၢ်ကျိၤဝဲၤကွာ် ကရူၢ်ကရၢ တဖၣ် အကစၢ်ယွၤ တဖၣ်န့ၣ်လီၤ. မ့ၢ်တဘါထီၣ် ကစၢ်ယွၤ တဖၣ်ဘၣ်န့ၣ်, မၤမုၢ်ကျိၤဝဲၤကွာ် တသ့ဘၣ်. တကးဒံးဘၣ်, ပှၤအါဂၤထံၣ်လၢ ပှၤခရံာ်ဖိတဖၣ် တဘါထီၣ် ရိမ့ၤအကစၢ်ယွၤ တဖၣ်ဘၣ်မ့ၢ်ဂ့ၤ, တဘါထီၣ်ရိမ့ၤအစီၤပၤဘၣ် မ့ၢ်ဂ့ၤအဃိ, ပှၤထံၣ်ဝဲလၢခရံာ်ဖိတဖၣ်မ့ၢ် ပှၤလၢအယွၤ တအိၣ်ဘၣ် န့ၣ်လီၤ. တကးဒံးဘၣ်, ဖဲပှၤခရံာ်ဖိတဖၣ် ထံၣ်လိာ်သးတဘျီလၢ်လၢ် မၤဝဲ တၢ်အီၣ်ကိၣ်အီစပံးထံ, လၢအကိးဝဲ တၢ်အီၣ်ခရံာ်အညၣ် ဒီးအီခရံာ်အသွံၣ် အဃိ, ပှၤအါဂၤဆိကမိၣ်ဝဲလၢ ပှၤခရံာ်ဖိတဖၣ်မ့ၢ် ပှၤအီၣ်ပှၤကညီ အညၣ်, အဃိ အဝဲသ့ၣ်အါဂၤဘၣ်တၢ်ဖီၣ်အီၤ ဒီး မၤအၢမၤနးအီၤ လၢတၢ်န့ၣ်အဃိ အိၣ်ဝဲန့ၣ်လီၤ.

လၢတၢ်အိၣ်ဖှိၣ်အပူၤတခီ ပကထံၣ်ဘၣ်လၢ တၢ်အိၣ်ဖှိၣ်ဖိတနီၤ လူၤတၢ်အိၣ်ဖှိၣ်တၢ်စူၢ်တၢ်နာ် လၢအကမၣ် တဖၣ်, ပိာ်ထွဲတၢ်စူၢ်တၢ်နာ်လၢ အကမၣ်တဖၣ် အခံအဃိ, ကဲထီၣ်တၢ်လီၤမုၢ်လီၤဖးလၢ တၢ်အိၣ်ဖှိၣ် အပူၤအိၣ်ဝဲန့ၣ်လီၤ. လၢတၢ်န့ၣ်အဃိ, လံာ်တၢ်လီၣ်ဖျါ အဆၢဒိၣ်ခံ ဒီး သၢအပူၤ ကစၢ်ခရံာ် ကွဲးန့ၢ် လံာ်ပရၢ ဆူတၢ်အိၣ်ဖှိၣ် နွံဖုလၢအအိၣ်လၢ ကီၢ်အၤစံ အပူၤခီဖျိ စီၤယိၤဟၣ် အံၤ, မ့ၢ်ဒ်သိး ကမၤဘၣ်ဂီၢ်က့ၤ တၢ်အိၣ်ဖှိၣ်လၢ အတမၤဒ် ခရံာ်အတၢ်ဘၣ်သးတဖၣ်, ဒီး ဟ့ၣ်ဂံၢ်ဟ့ၣ်ဘါ တၢ်အိၣ်ဖှိၣ်လၢ အလူၤပိာ်ထွဲ ခရံာ် အတၢ်သိၣ်တၢ်သီတဖၣ်န့ၣ်လီၤ.

တနံၤအံၤအတၢ်ကစီၣ်အပူၤ ပကမၤလိသကိး တၢ်အိၣ်ဖှိၣ် သၢကလုာ်လၢ တၢ်အိၣ်ဖှိၣ်နွံဖု အပူၤ, ဒီးပကဟ့ၣ်ဂံၢ်ဟ့ၣ်ဘါလိာ်ပသး ဒ်သိးပကအိၣ်မူလၢ အစိၤအဆၢကတီၢ်အခဲအံၤ ဒ်လဲၣ်ဒ်လဲၣ် အဂီၢ်န့ၣ်လီၤ.

၁. တၢ်အိၣ်ဖှိၣ်လၢအမၤဒ်ခရံာ်အတၢ်ဘၣ်သး

လၢတၢ်အိၣ်ဖှိၣ်နွံဖု အကျါ, တၢ်အိၣ်ဖှိၣ်လၢ ကစၢ်ခရံာ်တလိၣ်ဟ့ၣ်ပလီၢ်အီၤ, တလိၣ်တဲတၢ်အၢလၢ အဂ့ၢ်ဘၣ်န့ၣ်အိၣ်ဝဲ ခံဖုလၢ အမ့ၢ် စမူရနၤ ဒီး ဖံၤလဒ့လဖံ န့ၣ်လီၤ.

လၢစမူရနၤ တၢ်အိၣ်ဖှိၣ်အဂီၢ် ကစၢ်ခရံာ်စံးဘၣ်အီၤဖဲ လံာ်လီၣ်ဖျါ ၂း၈-၁၁ န့ၣ်စံးဝဲ -

ဒီးကွဲးန့ၢ် စမူရနၤ အတၢ်အိၣ်ဖှိၣ် အကလူး, ပှၤလၢအသံတ့ၢ်, ဒီး မူထီၣ်က့ၤတဂၤန့ၣ်, စံးတၢ်ဒ်အံၤ, - ယသ့ၣ်ညါ နတၢ်နးတၢ်ဖှီၣ်, ဒီး နတၢ်ဖှီၣ်တၢ်ယာ်, ဘၣ်ဆၣ်ဒီး နထူးနတီၤ, ဒီးယသ့ၣ်ညါ ပှၤအတၢ်ဒုၣ်ဒွဲၣ် လၢအစံးလီၤ အသးလၢ ပှၤယူဒၤဖိ, ဒီးတမ့ၢ်ဘၣ်, မ့ၢ်လၢမုၣ်ကီၤလံၢ် အတၢ်အိၣ်ဖှိၣ်လီၤ. တၢ်နးတၢ်ဖှီၣ်လၢ အကဘၣ်နၤန့ၣ် သုတပျံၤအီၤ နီတမံၤတဂ့ၤ. ကွၢ်ကွၢ်, ဒ်သိး ကလ့ပစီသုဒီး, မုၣ်ကီၤလံၢ် ကဒၢနုာ်သုလၢ ဃိၣ်ပူၤတနီၤ, ဒီးသုကဘၣ် တၢ်နးတၢ်ဖှီၣ် ဆံဆဲၣ်သီလီၤ. အိၣ်နဲဆိးနဲ လၢနကလုၢ်တီ တုၤနသံတက့ၢ်. ဒီးယကဟ့ၣ်နၤလၢ တၢ်မူ အခိၣ်သလုး န့ၣ်လီၤ. ပှၤအိၣ်ဒီးအနၢ်, မ်အနၢ်ဟူတၢ်လၢ သးန့ၣ်စံးဘၣ် တၢ်အိၣ်ဖှိၣ် တဖၣ် တက့ၢ်. ပှၤလၢအမၤနၢၤတၢ်န့ၣ်, တၢ်သံပှဲၤထီၣ်ခံစုတစု တမၤအၢဘၣ်အီၤဘၣ်. 

ဖဲအံၤပကထံၣ်ဘၣ်လၢ စမူရနၤ အတၢ်အိၣ်ဖှိၣ် ဘၣ်သဂၢၢ်ဒီး တၢ်နးတၢ်ဖှီၣ်, ဒီးတၢ်ဖှီၣ်တၢ်ယာ် တဖၣ်ဒိၣ်ဒိၣ်မုၢ်မုၢ်န့ၣ်လီၤ. တကးဒံးဘၣ်, ယူဒၤတၢ်ဘူၣ်တၢ်ဘါ လၢအအိၣ်ဆိးလၢ အဝဲသ့ၣ်အသိးအကျါ တဖၣ်စ့ၢ်ကီး ဒုၣ်ဒွဲၣ်စံးအၢ အဝဲသ့ၣ် န့ၣ်လီၤ. ဘၣ်ဆၣ်, လံာ်တၢ်လီၣ်ဖျါ တတဲလၢ အဝဲသ့ၣ် လဲၤသဒၣ်ခရံာ်ဘၣ်. မ့မ့ၢ်တခီ, ကစၢ်ခရံာ်ဟ့ၣ်ဂံၢ်ဟ့ၣ်ဘါ အဝဲသ့ၣ် ဒ်သိး ကအိၣ်ဆိးလၢ အကလုၢ်တီအပူၤ ဖဲအဝဲသ့ၣ် ဘၣ်သဂၢၢ်ဒီး တၢ်နးတၢ်ဖှီၣ်မ့ၢ်ဂ့ၤ, တၢ်နုာ်လီၤအိၣ်ဘၣ်လၢ ဃိၣ်ပူၤမ့ၢ်ဂ့ၤ, တုၤဒၣ်လဲာ် တၢ်သံတၢ်ပှၢ်မ့ၢ်ဂ့ၤ အခါန့ၣ်လီၤ. ကစၢ်ခရံာ်စံးဘၣ်အဝဲသ့ၣ်လၢ, အဝဲသ့ၣ်မ့ၢ်အိၣ်ဆိးလၢ အကလုၢ်တီ တုၤအသံန့ၣ်, ကစၢ်ခရံာ်အနီၢ်ကစၢ်ဒၣ်ဝဲ ကဟ့ၣ်အီၤလၢ တၢ်မူအခိၣ်သလုးန့ၣ်လီၤ. တကးဒံးဘၣ်, ပှၤခရံာ်ဖိလၢ အအိၣ်ဆိးလၢ အကလုၢ်တီတုၤအသံန့ၣ် မ့ၢ်ပှၤမၤနၢၤတၢ်လီၤ. ပှၤလၢအမၤနၢၤ တၢ်န့ၣ်, တၢ်သံပှဲၤထီၣ်ခံစုတစု တမၤအၢဘၣ်အီၤဘၣ်.

မ့မ့ၢ်တၢ်အိၣ်ဖှိၣ်လၢ ဖံၤလဒ့းလဖံ အဂီၢ် ကစၢ်ခရံာ်စံးဘၣ်အဝဲသ့ၣ်ဖဲ တၢ်လီၣ်ဖျါ ၃း၈-၁၂ န့ၣ်မ့ၢ်ဝဲ -

နတၢ်ဖံးတၢ်မၤ ယသ့ၣ်ညါလီၤ. ကွၢ်ကွၢ်, ယဟ့ၣ်လံ တြဲၤအိၣ်အိးထီၣ်အသးလၢ ပှၤကးတံာ်ဃာ်အီၤ တသ့ဘၣ် နီတဂၤဘၣ်လၢ နမဲာ်ညါလီၤ. အဂ့ၢ်ဒ်အံၤ, နအိၣ်ဒီး နဂံၢ်နဘါတဆံးတက့ၢ်, ဒီးနတိၢ်န့ၢ် ယကလုၢ်ယကထါ, ဒီးနတသမၢ ဘၣ်ယမံၤဘၣ်. ကွၢ်ကွၢ်, ပှၤဘၣ်ဃးဒီး မုၣ်ကီၤလံၢ် အတၢ်အိၣ်ဖှိၣ် လၢအစံးလီၤ အသးလၢ ပှၤယူဒၤဖိ ဒီးတမ့ၢ်ဘၣ်, မ့ၢ်ပှၤလၢအကတိၤ ကဘျံးကဘျၣ်တဖၣ်န့ၣ်, ယဟ့ၣ်လီၤလၢ နစုပူၤ, ကွၢ်ကွၢ်, ယကဒုးဟဲအီၤဆူ နအိၣ်ဒ် သိးအကဘါ တၢ်လၢ နခီၣ်ထံး, ဒီးကသ့ၣ်ညါ ဝဲလၢ ယအဲၣ်နၤလီၤ. အဂ့ၢ်ဒ်အံၤ, မ့ၢ်နဟံးဃာ် ယတၢ်ဝံသးစူၤ အကလုၢ်အကထါဒီး, ယကဟံးဃာ်နၤလၢ တၢ်လ့ပစီ အနၣ်ရံၣ် လၢအကဟဲဘၣ်တ့ၢ်ဝဲ, ဒီးလ့ပစီ ပှၤအိၣ် သကုၤဆးဒး လၢ ဟီၣ်ခိၣ်ချၢန့ၣ်လီၤ. ယဟဲချ့ချ့လီၤ. ဒ်သိး ပှၤသုတဟံးန့ၢ် နခိၣ်သလုးတဂ့ၤဒီး, ဟံးဃာ် တၢ်အိၣ်ဒီး နၤတက့ၢ်. 

ဖံၤလဒ့းလဖံ အတၢ်အိၣ်ဖှိၣ် အတၢ်လဲၤခီဖျိ မ့ၢ်ဒ် စမူရနၤ အတၢ်အိၣ်ဖှိၣ် အသိးလီၤ. အဝဲသ့ၣ် စ့ၢ်ကီး ဘၣ်လဲၤခီဖျိ တၢ်ဆီၣ်သနံးအကလုာ်ကလုာ် လၢအဟဲလၢ ရိမ့ၤအပဒိၣ်မ့ၢ်ဂ့ၤ, ဒီး ဟဲစ့ၢ်ကီးဝဲလၢ ပှၤပိာ်ထွဲ ယူဒၤ အတၢ်ဘူၣ်တၢ်ဘါ ဖိတဖၣ်န့ၣ်လီၤ. မ့ၢ်နာ်သက့ဒ်န့ၣ်ဒီး, ကစၢ်ခရံာ် အနီၢ်ကစၢ်ဒၣ်ဝဲ ဘၣ်သူၣ်ဘၣ်သး ဖံၤလဒ့းလဖံ အတၢ်အိၣ်ဖှိၣ် အတၢ်ဖံးတၢ်မၤ လၢတၢ်ဂ့ၢ်ခံမံၤ အဖီခိၣ်န့ၣ်လီၤ.

၁. ဖံၤလဒ့းလဖံ အတၢ်အိၣ်ဖှိၣ် မ့ၢ်အိၣ်ဒီး အဂံၢ်အဘါတဆံးတက့ၢ်ဘၣ်ဆၣ်, အဝဲသ့ၣ်တိၢ်န့ၢ် ခရံာ်အကလုၢ်ကထါ ဒီး တသမၢဘၣ်ခရံာ်အမံၤဘၣ်. 
၂. ဖံၤလဒ့းလဖံ အတၢ်အိၣ်ဖှိၣ် ဟံးဃာ်ဂၢၢ်ကျၢၤ ကစၢ်ခရံာ် အတၢ်ဝံသးစူၤအကလုၢ်ကထါအဃိ, ကစၢ်ခရံာ်ကဟံးဃာ်အဝဲသ့ၣ် ဖဲတၢ်လ့ပစီ, တၢ်နးတၢ်ဖှီၣ်ဟဲတုၤအိၣ်အီၤ အဆၢကတီၢ် န့ၣ်လီၤ. 

လီၢ်ခံကတၢၢ် ကစၢ်ခရံာ်စံးဘၣ်အဝဲသ့ၣ်လၢ ကဟံးဃာ် တၢ်လၢအိၣ်ဒီးအဝဲသ့ၣ် လၢ အမ့ၢ်တၢ်တိၢ်န့ၢ် ခရံာ်အကလုၢ်ကထါ, တၢ်ဟံးဃာ်ဂၢၢ်ကျၢၤ ကစၢ်ခရံာ်အကလုၢ်ကထါ န့ၣ်လီၤ.

စမူရနၤဒီး ဖံၤလဒ့းလဖံ အတၢ်အိၣ်ဖှိၣ်ခံဖု အံၤ မ့ၢ်တၢ်အိၣ်ဖှိၣ်လၢ ကစၢ်ခရံာ် ဟ့ၣ်ဒုးပလီၣ်အဝဲသ့ၣ် အလီၢ်တအိၣ်ဘၣ်, ခီဖျိ အဝဲသ့ၣ်မၤတ့ၢ်လံ တၢ်အဂ့ၤကတၢၢ် ဖဲအဝဲသ့ၣ်ကွၢ်ဆၢၣ်မဲာ် တၢ်လ့ပစီ, တၢ်နးတၢ်ဖှီၣ်အဆၢကတီၢ်န့ၣ်လီၤ.

၂.တၢ်အိၣ်ဖှိၣ်လၢအလဲၤကပာ်ခရံာ်

အ့းဖ့းစူး ဒီး စၤဒံ တၢ်အိၣ်ဖှိၣ် မ့ၢ်တၢ်အိၣ်ဖှိၣ် ခံဖု လၢ ကစၢ်ခရံာ် ဟ့ၣ်ပလီၢ်အဝဲသ့ၣ် ဆူၣ်ဆူၣ်ကိၤကိၤ န့ၣ်လီၤ. ဒ်တၢ်အိၣ်ဖှိၣ်အဂၤအသိး အဝဲသ့ၣ်စ့ၢ်ကီး ဘၣ်ကွၢ်ဆၢၣ်မဲာ်တၢ်တမံၤဃီ န့ၣ်လီၤ. အ့းဖ့းစူး အတၢ်အိၣ်ဖှိၣ် မ့ၢ်ဘၣ်တၢ်ဟ့ၣ်ပလီၢ်အီၤ ဘၣ်ဆၣ် အတၢ်ဂံၢ်စၢ် အိၣ်ဝဲအသိး အတၢ်ဂံၢ်ဆူၣ် ဂ့ၢ်ကီးအိၣ်ဝဲလီၤ. ပကကွၢ်ဆိလၢ အတၢ်ဂံၢ်ဆူၣ် တကပၤ...

ယသ့ၣ်ညါ နတၢ်ဖံးတၢ်မၤ, ဒီးနမၤတၢ်တုၤ တၢ်ဘှံးနသး, ဒီး နတၢ်ဝံသးစူၤ, ဒီးလၢနအိၣ်ဘၣ်လိာ်ဒီး ပှၤအအၢအသီ တကဲဘၣ်, ဒီးပှၤလၢအစံးလီၤအသး လၢပှၤတၢ်မၢဖိ ဒီး တမ့ၢ်ဘၣ်ဝဲ တဖၣ်န့ၣ်, နမၤကွၢ်အီၤ, ဒီးနထံၣ်န့ၢ်အီၤလၢ အမ့ၢ်ပှၤကတိၤကဘျံးကဘျၣ်, ဒီးလၢ နအိၣ်ဒီး နတၢ်ဝံသးစူၤ, ဒီးနဒိးတၢ်လၢ ယမံၤအဃိ, ဒီးတၢ်တဘှံး ဘၣ်နသးဘၣ်လီၤ. (တၢ်လီၣ်ဖျါ ၂း၂-၃). 

အဝဲအံၤမ့ၢ် အ့းဖ့းစူး အတၢ်အိၣ်ဖှိၣ် အတၢ်ဂံၢ်ဆူၣ် န့ၣ်လီၤ. ဘၣ်ဆၣ် ကစၢ်ခရံာ် ပာ်တၢ်ကမၣ်လၢ အလိၤ အလီၢ်အိၣ်ဝဲ န့ၣ်လီၤ.

ဘၣ်ဆၣ်ဒီး, ယပာ်တၢ်ကမၣ်လၢနလိၤလီၤ. အဂ့ၢ်ဒ်အံၤ, နလဲၤသဒၣ် နတၢ်အဲၣ်လၢအခီၣ်ထံး တမံၤန့ၣ်လီၤ. မၤသးဒ်န့ၣ်ဒီး, မ့ၢ်နလီၤတဲာ်ကွံာ်လၢလဲၣ် လၢလဲၣ်န့ၣ် သ့ၣ်နီၣ်ထီၣ်က့ၤ, ပီၢ်ယၢ်လီၤက့ၤနသး, ဒီးမၤက့ၤ တၢ်လၢနမၤလၢသီ န့ၣ်တက့ၢ်. မ့တမ့ၢ်ဘၣ် ဒ်န့ၣ်ဒီး ယကဟဲဆူနအိၣ်, ဒီးနမ့ၢ်တပီၢ်ယၢ်လီၤက့ၤ နသး ဘၣ်ဒီး, ယကစိာ်ကွံာ် နမ့ၣ်အူဒၢ လၢအလီၢ်န့ၣ်လီၤ. (တၢ်လီၣ်ဖျါ ၂း၄-၅).

တချုးလၢ ပလဲၤဆူမဲာ်ညါ ပကကွၢ်သကိး တၢ်အဲၣ်လၢအခီၣ်ထံး န့ၣ်မ့ၢ်မနုၤလဲၣ်.

ပအဲၣ်တၢ်ကွံတၢ်လီၤ, အဂ့ၢ်ဒ်အံၤ, အဝဲဒၣ်အဲၣ်ဆိပှၤလီၤ. (၁ယိၤဟၣ် ၄း၁၉)

တၢ်အဲၣ်ခီၣ်ထံးမ့ၢ် ကစၢ်ခရံာ် န့ၣ်လီၤ.

အပူၤကွံာ်အနံၣ်သၢဆံ အခိၣ်အဃၢၤ ဖဲစီၤပီလူး သူၣ်ထီၣ်အ့းဖ့းစူး အတၢ်အိၣ်ဖှိၣ်ဝံၤ အလီၢ်ခံ, စီၤပီလူး ကွဲးန့ၢ် လံာ်ပရၢဆူ အ့းဖ့းစူး အတၢ်အိၣ်ဖှိၣ် ဒီး စံးဝဲ -

မၤသးဒ်န့ၣ်ဒီး, သုစူၢ်က့ၤနာ်က့ၤ ကစၢ်ယ့ၣ်ရှူး, ဒီး အဲၣ်ပှၤစီဆှံခဲလၢာ် န့ၣ် ယနၢ်ဟူ သတးဒီး, ယစံးထီၣ် ပတြၢၤအဘျုးအဖှိၣ် လၢသုဃိန့ၣ် ယတဆိတ့ၢ်ဘၣ်, ဒီးယသ့ၣ်နီၣ်ထီၣ်သု လၢယတၢ်ဘါထုကဖၣ် အပူၤလီၤ. (အ့းဖ့းစူး ၁း၁၅-၁၆).

ဖဲတၢ်အိၣ်ဖှိၣ်ကဲထီၣ်သီသီအခါ စီၤပီလူး စံးထီၣ်ပတြၢၤ အ့းဖ့းစူး အတၢ်အိၣ်ဖှိၣ်, မ့ၢ်လၢ အဝဲသ့ၣ်စူၢ်က့ၤ နာ်က့ၤ ကစၢ်ယ့ၣ်ရှူးခရံာ်, ဒီး အဲၣ်ပှၤစီဆှံခဲလၢာ် အဃိန့ၣ်လီၤ. ဘၣ်ဆၣ် အနံၣ်သၢဆံဝံၤအလီၢ်ခံ, ဖဲလံာ်တၢ်လီၣ်ဖျါဘၣ်တၢ်ကွဲးအီၤ အဆၢကတီၢ်, အဝဲသ့ၣ် လဲၤသဒၣ် အတၢ်အဲၣ်ခီၣ်ထံးလံ. အဃိ, ကစၢ်ခရံာ် ဟ့ၣ်ပလီၣ်အီၤ လၢကဟဲက့ၤကဒါက့ၤဆူ အတၢ်အဲၣ်ခီၣ်ထံး အအိၣ်, ဒီး မၤက့ၤတၢ်မၤဒ် အပူၤကွံာ်အသိး န့ၣ်လီၤ. မ့ၢ်တမၤဝဲဒ်န့ၣ်ဘၣ်ဒီး, ကစၢ်ခရံာ်ကစိာ်ကွံာ်အမ့ၣ်အူဒၢလၢ အလီၢ်န့ၣ်လီၤ.

စၢ်ဒံ အတၢ်အိၣ်ဖှိၣ် နးန့ၢ်ဒံး အ့းဖ့းစူး အတၢ်အိၣ်ဖှိၣ်ဒံး. ကစၢ်ခရံာ်ကွဲးန့ၢ် စၢ်ဒံ အတၢ်အိၣ်ဖှိၣ် ဒီးစံးဝဲ -

ဒီးကွဲးန့ၢ် တၢ်အိၣ်ဖှိၣ်လၢ စၢ်ဒံအကလူး, ပှၤအိၣ်ဒီးယွၤအသး နွံဖျၢၣ်, ဒီးဆၣ်နွံဖျၢၣ် တဂၤန့ၣ်, စံးတၢ်ဒ်အံၤ, ယသ့ၣ်ညါ နတၢ်ဖံးတၢ်မၤ, ဒီးနမံၤအိၣ်လၢနမူ, ဒီးနသံလီၤ. ဆိးသီတက့ၢ်. တၢ်လၢအအိၣ်လီၤ တဲာ်လၢအကသံတ့ၢ်တဖၣ်န့ၣ်, ဒုးဆူၣ်ထီၣ်အဂံၢ်အဘါ တက့ၢ်. အဂ့ၢ်ဒ်အံၤ, ယတထံၣ်န့ၢ်ဘၣ် နတၢ်ဖံးတၢ်မၤ လၢထီၣ်ပှဲၤထီၣ် လၢယွၤအမဲာ်ညါဘၣ်. မၤသးဒ်န့ၣ်ဒီး, နဒိးန့ၢ်တၢ်ဒီး နနၢ်ဟူတၢ် ဒ်လဲၣ်ဒ်လဲၣ်န့ၣ် သ့ၣ်နီၣ်ထီၣ် တက့ၢ်. ဒီးတိၢ်န့ၢ်တၢ်, ဒီးပီၢ်ယၢ်လီၤက့ၤ နသးတက့ၢ်. နမ့ၢ်တဆိးသီဘၣ်ဒီး, ယကဟဲဆူနအိၣ်, ဒ်တၢ်ဟုၣ်တၢ်ဘျၣ်အသိး, ဒီးယကဟဲဆူနအိၣ် နၣ်ရံၣ်ဖဲလဲၣ်ဖဲလဲၣ် န့ၣ်, နတသ့ၣ်ညါဘၣ်. (တၢ်လီၣ်ဖျါ ၃း၁-၃)

စၢ်ဒံ တၢ်အိၣ်ဖှိၣ်အံၤ အမံၤအိၣ်ဒၣ်လၢ အမူလီၤ, ဘၣ်ဆၣ်အသံလံ. ခိဖျိလၢ တၢ်ဆီၣ်သနံး အကလုာ်ကလုာ် အဃိ, တၢ်အိၣ်ဖှိၣ်ဖိ တဖၣ်အတၢ်စူၢ်တၢ်နာ်ဒံဝ့ၤဒံဝီၤ, လီၤဆံးလီၤစှၤလီၤလံ. အတၢ်မၤလၢ အတိာ်ပာ် လၢကမၤလၢကစၢ်ယွၤ အဂီၢ်တဖၣ်, တလၢထီၣ်ပှဲၤထီၣ်နီတမံၤဘၣ်. အဃိ, ကစၢ်ခရံာ် ဟ့ၣ်ပလီၢ်အဝဲသ့ၣ် ဒ်သိး ကပီၢ်ယၢ်လီၤက့ၤအသးဒီး အိၣ်ဒီးတၢ်ဆိးသီဒီး ဘါထုကဖၣ်န့ၣ်လီၤ.

အ့းဖ့းစူး ဒီး စၢ်ဒံအတၢ်အိၣ်ဖှိၣ် ခံဖုအံၤ မ့ၢ်လဲၤကပာ် ကစၢ်ခရံာ်, မ့ၢ်တမၤဒ် ကစၢ်ခရံာ် အတၢ်ဘၣ်သး အသိးလၢၤဘၣ် ဘၣ်ဆၣ်, ကစၢ်ခရံာ် ဟ့ၣ်ဒံးအီၤ တၢ်ခွဲတၢ်ယာ် လၢကပီၢ်ယၢ်လီၤက့ၤအသး ဒံး. ဒ်န့ၣ်အသိး, ပဝဲနၤယၤ တဖၣ် ကစၢ်ခရံာ် ဟ့ၣ်ပှၤ တၢ်ခွဲးတၢ်ယာ် လၢပကပီၢ်ယၢ်လီၤက့ၤ ပသး ဒီးဟဲက့ၤက့ၤဆူ ယွၤ အအိၣ်န့ၣ်လီၤ.

၃. တၢ်အိၣ်ဖှိၣ်လၢအိၣ်တၢ်ဘၢၣ်စၢၤ

တၢ်အိၣ်ဖှိၣ် အိၣ်တ့ၢ်သၢဖု လၢအမ့ၢ် ပ့ၢ်ကမူး, သူၤအတံရၤ, ဒီး လီၤဒံၤကံ အံၤ, မ့ၢ်တၢ်အိၣ်ဖှိၣ် လၢ တကိၢ်ဧီၢ်တကိၢ်, တခုၣ်ဧီၢ်တခုၣ် အိၣ်လၢ တၢ်ဘၢၣ်စၢၤ န့ၣ်လီၤ. ပကကွၢ်ဆိလၢ ပ့ၢ်ကမူး အတၢ်အိၣ်ဖှိၣ် -

ကစၢ်ခရံာ် ကွဲးန့ၢ် ပ့ၢ်ကမူး အတၢ်အိၣ်ဖှိၣ် ဒီးစံးဝဲ -

ယသ့ၣ်ညါ နအိၣ်နဆိးဖဲ မုၣ်ကီၤလံၢ် အလီၢ်ပစိာ်အိၣ်ဝဲအလီၢ်, ဒီးနဟံးဃာ်ယမံၤ, ဒီးလၢယပှၤအုၣ်အသး အကလုၢ်တီ စီၤအၣ်တံပၤ, ဒိးသံအသးလၢ ယဃိလၢ သုကျါ, ဖဲမုၣ်ကီၤလံၢ် အိၣ်ဝဲအလီၢ်, အမုၢ်နံၤတဖၣ်ဒၣ်လဲာ်န့ၣ်, နတသမၢဘၣ် ယတၢ်နာ်ဘၣ်လီၤ. ဘၣ်ဆၣ်ဒီး ယပာ်တၢ်ကမၣ် အဆံးအစှၤ လၢနလိၤ, အဂ့ၢ်ဒ်အံၤ, နအိၣ်ဒီးပှၤဖဲန့ၣ်, လၢအဟံးဃာ် စီၤဘံးလၣ် အတၢ်သိၣ်တၢ်သီ, လၢအသိၣ်က့ၤသီက့ၤ စီၤဘၤလး, ဒ်သိး အကပာ်တၢ်လီၤဃံၤ အလီၢ်လၢ ပှၤအံၣ်စရ့လးဖိအမဲာ်ညါ, ဒ်သိး ပှၤကအီၣ်တၢ်လၢ ပှၤလုၢ်လၢ တၢ်ဂီၤ, ဒီးမၤကမၣ်မုၣ်ကမၣ်ခွါလီၤ. ဒ်န့ၣ်အသိး, နအိၣ်ဒီး ပှၤလၢအဟံးဃာ် စီၤနံၤကလါအတၢ်သိၣ် တၢ်သီ ဒ်န့ၣ်အသိး စ့ၢ်ကီးလီၤ. ပီၢ်ယၢ်လီၤက့ၤ နသးတက့ၢ်. မ့တမ့ၢ်ဘၣ်ဒီး, ယကဟဲဆူနအိၣ်ချ့ချ့, ဒီးယဒုးတၢ် ဒီး ပှၤတဖၣ်န့ၣ်လၢ ယထးခိၣ် အနးလီၤ. (တၢ်လီၣ်ဖျါ ၂း၁၃-၁၆).

ဖဲလံာ်တၢ်လီၣ်ဖျါ ဘၣ်တၢ်ကွဲးအီၤအဆၢကတီၢ်, ဝ့ၢ်ပ့ၢ်ကမူး မ့ၢ် ကီၢ်အၤစံ အဝ့ၢ်ခိၣ်, ဒီးအိၣ်ဒီး တၢ်လုၢ်လီၢ် လၢပှၤဘါတၢ်ဂီၤတၢ်ဖီၣ်တဖၣ် အဂီၢ်တဘျုးဖျၢၣ်ညါ န့ၣ်လီၤ. တကးဒံးဘၣ်, တၢ်လုၢ်လီၢ် အိၣ်စ့ၢ်ကီး ဝဲလၢ တၢ်ဘါ ရိမ့ၤအစီၤပၤဒ် ကစၢ်ယွၤ တဂၤအသိး အဂီၢ်န့ၣ်လီၤ. အဃိ, လံာ်တၢ်လီၣ်ဖျါ ၂း၁၃ တဲပှၤလၢ ပ့ၢ်ကမူး အတၢ်အိၣ်ဖှိၣ်ဖိတဖၣ် အိးဆိးဝဲလၢ မုၣ်ကီၤလံၢ် အလီၢ်ပစိာ် အိၣ်ဝဲ အလီၢ်န့ၣ်လီၤ. မ့ၢ်နာ်သက့ဒ်န့ၣ်ဒီး, ပ့ၢ်ကမူး အတၢ်အိၣ်ဖှိၣ်ဖိတဖၣ် ဟံးဃာ်ဒံး ကစၢ်ခရံာ်အမံၤ, တကးဘၣ် မၤထူရၤ လၢအတူၢ်သံ အသးလၢ ကစၢ်ခရံာ်အဂီၢ် ဒ်စီၤအၣ်တံပၤ အသိး အိၣ်ဝဲဒၣ် န့ၣ်လီၤ.

အဝဲသ့ၣ်မ့ၢ်ကိၢ်လၢ တၢ်နာ်ကစၢ်ခရံာ် ဘၣ်ဆၣ်, အဝဲသ့ၣ် တထီဒါ ပှၤစူၢ်ကမၣ် နာ်ကမၣ် တၢ်, လၢအသိၣ်လိ တၢ်စူၢ်တၢ်နာ် လၢအလီၤဆီဒီး ပှၤခရံာ်ဖိ အတၢ်စူၢ်တၢ်နာ် တဖၣ်ဘၣ်. အဝဲသ့ၣ်အါဂၤ ဟံးန့ၢ်ဝဲ စီၤဘံးလၣ် ဒီး စီၤနံၤကလါ အတၢ်သိၣ်တၢ်သီ လၢအကမၣ်တဖၣ် န့ၣ်လီၤ. အဃိ, ကစၢ်ခရံာ်အဲၣ်ဒိးလၢ အဝဲသ့ၣ် ကပီၢ်ယၢ်လီၤက့ၤအသး ဒီး ပာ်တ့ၢ်ကွံာ် တၢ်စူၢ်တၢ်နာ် လၢအကမၣ်တဖၣ် န့ၣ်လီၤ.

လၢသူၤအတံရၤ အတၢ်အိၣ်ဖှိၣ်အဂီၢ် ကစၢ်ခရံာ်အတၢ်ကွဲး ပကထံၣ်ဘၣ်အီၤဖဲ လံာ်တၢ်လီၣ်ဖျါ ၂း၁၈-၂၉ န့ၣ်လီၤ. ပကဖးအီၤဆိဖဲ တၢ်လီၣ်ဖျါ ၂း၁၈-၂၀ န့ၣ်လီၤ.

ဒီးကွဲးန့ၢ် တၢ်အိၣ်ဖှိၣ်လၢ သူၤအတံရၤ အကလူး, ပှၤအိၣ်ဒီး အမဲာ်သၣ်တိၣ်ဒ် မ့ၣ်အူလၣ်, ဒီးအခီၣ်ဒ်တိၢ်ဘီစီ အသိးန့ၣ်, ယွၤအဖိခွါတဂၤ, စံးတၢ်ဒ်အံၤ, ယသ့ၣ်ညါ နတၢ်ဖံးတၢ်မၤ, ဒီး နတၢ်အဲၣ်တၢ်ကွံ, ဒီးနမၤ တၢ်အခ့အပှၤ အတၢ်မၤ, နတၢ်စူၢ်တၢ်နာ်, ဒီး နတၢ်ဝံသးစူၤ, ဒီးနတၢ်မၤ လၢခံကတၢၢ် န့ၣ် အါန့ၢ်လၢသီ တက့ၢ်လီၤ. ဘၣ်ဆၣ်ဒီး ယပာ် တၢ်ကမၣ်လၢ နလိၤ, အဂ့ၢ်ဒ်အံၤ, နတူၢ်လိာ် ပိာ်မုၣ်, နီၢ်အံၤစ့ဘ့ၤလး, လၢအစံးလီၤအသးလၢ ဝံမုၣ်တဂၤ, ဒီးအဝဲဒၣ် သိၣ်က့ၤသီက့ၤ တၢ်လၢ အတၢ်ကမၣ်မုၣ်ကမၣ်ခွါ, ဒီးလီန့ၢ် ယခ့ယပှၤ, ဒ်သိး အကမၤကမၣ်မုၣ်ကမၣ်ခွါ, ဒီးအီၣ်တၢ်လၢ ပှၤလုၢ်လၢတၢ်ဂီၤ လီၤ. (တၢ်လီၣ်ဖျါ ၂း၁၈-၂၀).

သူၤအတံရၤ မ့ၢ်ဝ့ၢ်ဆံးဆံးဖိ တဖျၢၣ် ဒီး အတၢ်အိၣ်ဖှိၣ်ဖိ အနီၣ်ဂံၢ် မ့ၢ်စှၤဘၣ်ဆၣ်, ကစၢ်ခရံာ်စံးဝဲလၢ အဝဲသ့ၣ်အိၣ်ဒီးတၢ်အဲၣ်တၢ်ကွံ, ဒီးမၤတၢ်အခ့အပှၤအတၢ်မၤ, အိၣ်ဒီးတၢ်စူၢ်တၢ်နာ်, တၢ်ဝံသးစူၤ ဒီး အဒိၣ်ကတၢၢ် တၢ်မၤဂ့ၤလၢအမၤ ခဲအံၤ တဖၣ်ဂ့ၤန့ၢ်အါန့ၢ် လၢညါဒံး တက့ၢ်န့ၣ်လီၤ. ဘၣ်ဆၣ် ဒ်ပ့ၢ်ကမူး တၢ်အိၣ်ဖှိၣ် အသိး, လၢအဝဲသ့ၣ်အကျါ အိၣ်ဒီး ပှၤသိၣ်လိကမၣ်တၢ် တဂၤလၢအကိးလီၤအသး လၢ ဝံမုၣ် နီၢ်အံၤစ့ဘ့းလး န့ၣ်လီၤ. ဒ်ပ့ၢ်ကမူး တၢ်အိၣ်ဖှိၣ်အသိး, အဝဲသ့ၣ်တထီဒါဝံမုၣ်တဂၤအံၤ အမဲာ်ညါ တၢ်အိၣ်ဖှိၣ်ဖိအါဂၤ လူပိာ်ထွဲ ဝံမုၣ်အံၤ အတၢ်သိၣ်လိသီလိ တဖၣ်န့ၣ်လီၤ.

ဘၣ်ဆၣ်ကစၢ်ခရံာ် ဟ့ၣ်ဂံၢ်ဟ့ၣ်ဘါ ပှၤလၢအတပိာ်ထွဲ ဝံမုၣ်အံၤ အတၢ်သိၣ်တၢ်သီ တဖၣ်ဒ်အံၤ -

ဘၣ်ဆၣ်ဒီး ယစံးဘၣ်သု, ပှၤလၢသူၤအတံရၤ လၢအအိၣ်လီၤတဲာ်, လၢအတဟံးန့ၢ်တၢ်သိၣ်တၢ်သီ အဝဲန့ၣ်ဘၣ်, ဒီးတသ့ၣ်ညါ ဘၣ်မုၣ်ကီၤလံၢ် အတၢ်ယိာ်ဒ်အဝဲသ့ၣ် စံးအသိးန့ၣ်, တၢ်ဝံတၢ်ယိးအဂုၤအဂၤ ယတပာ်ဘၣ်လၢ သုလိၤဘၣ်. ဘၣ်ဆၣ်ဒီး တၢ်လၢ သုန့ၢ်ဘၣ် န့ၣ်, ဟံးဃာ်တုၤယဟဲန့ၣ် တက့ၢ်. (တၢ်လီၣ်ဖျါ ၂း၂၄-၂၅)

ပှၤလၢ အတဟံးန့ၢ် ဝံမုၣ်အံၤအတၢ်သိၣ်တၢ်သီ, ဒီးအိၣ်ဂၢၢ်ဆိးကျၢၤလၢ ခရံာ်ဖိအတၢ်သိၣ်တၢ်သီအပူၤ တဖၣ်န့ၣ်, ကစၢ်ခရံာ်အၢၣ်လီၤအဝဲသ့ၣ်လၢ ကဟ့ၣ်အီၤလၢတၢ်မၤနၢၤ, ဒီး ကဟ့ၣ်အီၤလၢ ဆၣ်တူၢ်ဂီၤ လၢအမ့ၢ် ခိၣ်သလုး တၢ်မူန့ၣ်လီၤ.

တၢ်အိၣ်ဖှိၣ် အလီၢ်ခံကတၢၢ်တဖှိၣ် လၢအမ့ၢ် လီၤဒံၤကံ အတၢ်အိၣ်ဖှိၣ် န့ၣ် ကစၢ်ခရံာ်ပာ်တၢ်ကမၣ်လၢ အလိၤ အါန့ၢ်ဒံး တၢ်အိၣ်ဖှိၣ်အဂၤ တဖၣ်န့ၣ်လီၤ. ကစၢ်ခရံာ်အတၢ်ကတိၤ လၢ လီၤဒံၤကံ အတၢ်အိၣ်ဖှိၣ်အဂီၢ် အိၣ်ဖျါဖဲ လံာ်တၢ်လီၣ်ဖျါ ၃း၁၄-၂၂ န့ၣ်လီၤ. ဘၣ်ဆၣ် ပကကွၢ်အီၤဖဲ အဆၢဖိ ၁၄ တုၤ ၁၆ န့ၣ်လီၤ.

ဒီးကွဲးန့ၢ်တၢ်အိၣ်ဖှိၣ်လၢ လီၤဒံၤကံ အကလူး, တၢ်အၤမ့ၣ်, ပှၤအုၣ်အသး အကလုၢ်တီ အတီအလိၤ, တၢ်အခီၣ်ထံး လၢယွၤတ့လီၤတၢ်တဂၤန့ၣ်, စံးတၢ်ဒ်အံၤ, ယသ့ၣ်ညါ နတၢ်ဖံးတၢ်မၤလၢ ခုၣ်ဧီၢ်တခုၣ်, ကိၢ်ဧီၢ်တကိၢ်ဘၣ်လီၤ. နခုၣ်မ့ၢ်ဂ့ၤ, နကိၢ်မ့ၢ်ဂ့ၤ, ယသးအိၣ်လၢ နကမ့ၢ်တမံၤမံၤလီၤ. မၤသးဒ်န့ၣ်ဒီး, နတခုၣ်ဘၣ်, နတကိၢ်ဘၣ်, မ့ၢ်နလၢၤဒီး, ယကဘှိးထီၣ်ကွံာ်နၤလၢ ယကိာ်ပူၤ လီၤ. (တၢ်လီၣ်ဖျါ ၃း၁၄-၁၆).

 လီၤဒံၤကံ မ့ၢ်ဝ့ၢ်လၢအထူးအတီၤ တဝ့ၢ်လီၤ. တၢ်အိၣ်ဖှိၣ်ဖိ တဖၣ်စ့ၢ်ကီး, ဒ်ဝ့ၢ်အိၣ်ဒီး အတၢ်ထူးတၢ်တီၤ အသိး, အဝဲသ့ၣ်တဖၣ်စ့ၢ်ကီး ထူးတီၤဝဲန့ၣ်လီၤ. ခီဖျိ လၢ အတၢ်ထူးတၢ်တီၤ လၢနီၢ်ခိ အိၣ်အါဝဲ အဃိ, တၢ်ထူးတၢ်တီၤလၢနီၣ်သး တကပၤ လီၤဆံးလီၤစှၤလီၤ ကွ့ၢ်ကွ့ၢ် န့ၣ်လီၤ. လၢတၢ်န့ၣ်အဃိ, ကစၢ်ခရံာ်စံးဘၣ် အဝဲသ့ၣ်လၢ အဝဲသ့ၣ်မ့ၢ်ပှၤလၢအအိၣ်လၢ တၢ်ဘၢၣ်စၢၤ, လၢခုၣ်ဧီၢ်တခုၣ်, ကိၢ်ဧီၢ်တကိၢ်ဘၣ် န့ၣ်လီၤ. မ့ၢ်လၢ အတခုၣ်ဘၣ်, ဒီး အတကိၢ်ဘၣ်, မ့ၢ်အလၢၤအဃိ, ကစၢ်ခရံာ်စံးဘၣ်အဝဲသ့ၣ်လၢ ကဘှိးထီၣ်ကွံာ်အီၤလၢ ကစၢ်ခရံာ်အကိာ်ပူၤန့ၣ်လီၤ.

တၢ်ကတိၤလၢခံ

အစိၤဆၢကတီၢ်ခဲအံၤ, မ့ၢ်ပလီၤဂာ်ဒီး တၢ်အိၣ်ဖှိၣ် ဖဲလဲၣ်တဖုလဲၣ်. မ့ၢ်ပလီၤဂာ်ဒ်သိး ဖံၤလဒ့းလဖံ ဒီး စမူရနၤ တၢ်အိၣ်ဖှိၣ်လၢ အဟံးဃာ်ဂၢၢ်ကျၢၤ ပတၢ်စူၢ်တၢ်နာ် လၢကစၢ်ခရံာ်အပူၤ န့ၣ်ဧါ.

မ့ၢ်ပလီၤဂာ်ဒီး အ့းဖ့းစူး ဒီး စၢ်ဒံ တၢ်အိၣ်ဖှိၣ် လၢ အလဲၤကပာ် တၢ်အဲၣ်ခီၣ်ထံး, ဒီး သံကွံာ်လၢ ပတၢ်စူၢ်တၢ်နာ် အပူၤဧါ.

မ့ၢ်ပလီၤဂာ်ဒ်သိး ပ့ၢ်ကမူး, သူၤအတံရၤ, ဒီး လီၤဒံၤကံ လၢ အအိၣ်လၢတၢ်ဘၢၣ်စၢၤ တဖၣ်န့ၣ်ဧါ.

ပမ့ၢ်လီၤဂာ် တၢ်အိၣ်ဖှိၣ် တဖုဂ့ၤတဖုဂ့ၤ, ကစၢ်ခရံာ်ဟ့ၣ်ပှၤ တၢ်ခွဲးတၢ်ယာ်လၢ ပကပီၢ်ယၢ်လီၤက့ၤ ပသးဒီး ဟဲက့ၤကဒါက့ၤဆူ အအိၣ်, ဒီး စူၢ်နာ်အီၤ န့ၣ်လီၤ.

တၢ်လ့တၢ်ပစီ, တၢ်အၢတၢ်သီ တဖၣ် မ့ၢ်မၤတံာ်တာ်ပှၤ ဘၣ်ဆၣ်, ကစၢ်ခရံာ်အဲၣ်ဒိးဝဲလၢ ပကဟံးဃာ် ဂၢၢ်ကျၢၤအီၤ တုၤပသံတစုလီၤ.

မ့ၢ်ပတၤတၢ်ဒီး တၢ်အိၣ်သးလၢ ပစိၤပဆၢကတီၢ်ခဲအံၤ ဒ် စီၤပီလူးအသိး ကဲစ့ၢ်ကီးဧါ. စီၤပီလူး စံးဝဲဖဲ လံာ်ရိမ့ၤ ၈း၃၅ အပူၤ -

မ့ၢ်မတၤကမၤလီၤဖး ပှၤဒီးခရံာ် အတၢ်အဲၣ်တၢ်ကွံ တဂၤလဲၣ်. မ့ၢ်တၢ်နးတၢ်ဖှီၣ်, တၢ်ကိၢ်တၢ်ဂီၤ, တၢ်မၤအၢမၤနးပှၤ, တၢ်သၣ်ဝံၤပသး, တၢ်အိၣ်ဘ့ၣ်ဆ့, တၢ်ပျံၤတၢ်ဖုး, ဃဲာ်ဧိၤနးဧိၤဧါ.

တၢ်မၤလီၤဖးပှၤဒီး ခရံာ်အတၢ်အဲၣ်တၢ်ကွံ တသ့ဘၣ်နီတမံၤဘၣ်. အဃိ, ပကမ့ၢ်တၢ်အိၣ်ဖှိၣ်ဖိ သ့ၣ်တဖၣ်လၢ အဟံးဃာ်ဂၢၢ်ကျၢၤ ခရံာ်အတၢ်အဲၣ်တၢ်ကွံ ဒီး ဟံးဃာ်တၢ်လၢအအိၣ်ဒီး ပှၤလၢအမ့ၢ် ကစၢ်ခရံာ် တုၤပသံတက့ၢ်.

မ်ယွၤဆိၣ်ဂ့ၤ အကလုၢ်ကထါ ဒီးဆိၣ်ဂ့ၤပဝဲကိးဂၤဒဲးတက့ၢ်.


မ့ၢ်အဲၣ်ဒိးဖးအါထီၣ် တၢ်ဂ့ၢ်ဘၣ်ဃး တၢ်အိၣ်ဖှိၣ်နွံဖုအံၤန့ၣ် လဲၤဖးဘၣ်လၢ https://www.karenbiblestudies.com/2019/06/blog-post_29.html အပူၤသ့လီၤ.