ပှၤလုၢ်တၢ်ဒိၣ် စီၤဧ့စြၤ အတၢ်မၤတဖၣ်

ယူဒၤ အတၢ်ဘါ အိၣ်ထီၣ်အံၤ မ့တပၣ်ဃုာ်ဒီး စီၤဧ့စြၤ အတၢ်ဖံးတၢ်မၤ ဘၣ်န့ၣ် ပနၢ်ပၢၢ်အီၤတသ့ဘၣ်. ကလုာ်ဂၤတဖၣ် ဘူးတ့ၢ်မးလၢ ကယူၢ်လီၤကွံာ် ယူဒၤ အတၢ်ဘူၣ်ထီၣ်ဘါထီၣ် ယွၤ န့ၣ်လီၤ. ပှၤလၢ ဟဲက့ၤလၢ တၢ်မၢကဲကုၢ် အလီၢ် တဖၣ် တၢ်သးသဟီၣ်လၢ တၢ်ဘူၣ်တၢ်ဘါ တကပၤ ဆံးလီၤစှၤလီၤ၀ဲ, ဒီးအတၢ်အးလီၤ အသး လၢကစၢ်ယွၤ အတၢ်အၢၣ်လီၤအီလီၤအပူၤ စ့ၢ်ကီး စှၤလီၤ၀ဲ, ဒီးအ၀ဲသ့ၣ် အါထီၣ်လၢ တၢ်ဘါတၢ်ဂီၤ တၢ်ဖီၣ်ခီဖျိ တၢ်ဒိးတ့ဒိးဖျီ သးဒီး ကလုာ်ဂၤ သ့ၣ်တဖၣ် န့ၣ်လီၤ.

တၢ်တိာ်လၢ စီၤဧ့စြၤ အတၢ်ဟဲက့ၤဆူ ၀့ၢ်ယရူၤရှလ့ၣ် ဖဲ ချ.ခ.န ၄၅၈ နံၣ် အပူၤအံၤ မ့ၢ်ဒ်သိး ကမၤသီထီၣ်က့ၤ တၢ်ပၢၤ ဃာ် စီၤမိၤရှ့ အတၢ်သိၣ်တၢ်သီ န့ၣ်လီၤ. တၢ်သိၣ်တၢ်သီအံၤ ဘၣ်တၢ်ကျိာ်ထံအီၤ, ဒီး ပဒိၣ်ဖးဒိၣ် စီၤနဃ့မယၤ လၢအဟဲက့ၤလၢ ချ.ခ.န ၄၄၅ နံၣ်တဂၤ, ဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်တဖၣ်လၢ ကပၢၤဃာ် တၢ်သိၣ်တၢ်သီ တဖၣ်န့ၣ်လီၤ.


ပှၤဂီၢ်မုၢ် အၢၣ်လီၤတူၢ်လိာ်လၢ "ကလဲၤလၢယွၤ အတၢ်သိၣ်တၢ်သီ အပူၤ, လၢဘၣ်တၢ်ဟ့ၣ်လီၤအီၤလၢ စီၤမိၤရှ့ လၢအမ့ၢ် ကစၢ်ယွၤအခ့အပှၤ, ဒီးကမၤပိာ်ထွဲ တၢ်မၤလိာ်ခဲလၢာ် လၢ ကစၢ်ယွၤ ဟ့ၣ်လီၤ၀ဲတဖၣ်, ဒီး အတၢ်စံၣ်ညီၣ် ဒီး အတၢ်သိၣ်တၢ်သီ တဖၣ်န့ၣ်လီၤ." (နဃ့မယၤ ၁၀း၂၉). တၢ်လၢ ကဘၣ်မၤ၀ဲ တဖၣ်မ့ၢ်၀ဲ, ကဘၣ်ဟးဆှဲး တၢ်ဒိးတ့ဒိး ဖျီသးဒီး ကလုာ်ဂၤ, ဒီး ပှၤလၢ အထီၣ်ပှၢ် ဒီးကလုာ်ဂၤ တဖၣ် ကဘၣ်ဟံး လံာ်လီၤဖှၣ်, တဘၣ်မၤ တၢ်ကူၣ်လဲၤမၤကၤ အတၢ်မၤ လၢမုၢ်အိၣ်ဘှံးနံၤဘၣ်, ကဘၣ်မၤထွဲ တနံၣ်တဘျီ တၢ်စံးဘျုး, ဒီး ကဘၣ်ဟ့ၣ် သွဲဆူ တၢ်လုၢ်ဟံၣ် န့ၣ်လီၤ. (နဃ့မယၤ ၁၀း၃၀-၃၉). ယူဒၤ အတၢ်ဘါ အခီၣ်ထံး ခီၣ်ဘိလၢ ဘၣ်တၢ်စးထီၣ် အီၤဖဲ တၢ်မၢကဲကုၢ် အဆၢကတီၢ်အံၤ, ဒိးန့ၢ် အက့ၢ်အဂီၤ လၢလၢပှဲၤပှဲၤ လၢ စီၤဧ့စြၤ ဒီး စီၤနဃ့မယၤ အတၢ်ဖံးတၢ်မၤ တဖၣ်အဃိ န့ၣ်လီၤ. အဃိ, စီၤဧ့စြၤ ဘၣ် တၢ်ကိး အီၤလၢ "ယူဒၤ အတၢ်ဘါ အပၢ်ဖးဒိၣ်" န့ၣ်လီၤ.

ဖး ယူဒၤအတၢ်ဘါအဂ့ၢ် အလၢအပှဲၤဖဲအံၤတက့ၢ်.