စၤဒူၤကဲ (Sadducee)

စၤဒူၤကဲ အမံၤဒီး အတၢ်ကရၢကရိ စးထီၣ်အသး အခီၣ်ထံးခီၣ်ဘိ ဒ်လဲၣ်န့ၣ် တၢ်တသ့ၣ်ညါအီၤ လီၤတံၢ်လီၤဆဲး ဘၣ်. စၤဒူၤကဲ အမံၤ အခီၣ်ထံးခီၣ်ဘိ ဘၣ်သ့ၣ်သ့ၣ် ကဟဲလၢ စၤဒံး (Zadik) လၢအခီပညီမ့ၢ် တၢ်တီတၢ်လိၤ န့ၣ်လီၤ. စၤ ဒူၤကဲ အတၢ်ကရၢကရိ ဘၣ်တဘၣ် ကဘၣ်ထွဲလိာ်အသးဒီး အၤထံၤကိနၢး စိၤခိၤ (Antigonus Soko) လၢအမ့ၢ် ကွီၢ်ဘျီၣ်ခိၣ် လၢ ၀့ၢ်ယရူၤရှလ့ၣ် အပူၤ, တၢ်ဘူၣ်တၢ်ဘါ အကၠိခိၣ် ဖဲ ချ.ခ.န. ၃ ယၤဖှိၣ်နံၣ် အပူၤ န့ၣ်လီၤ. အ၀ဲမ့ၢ် ပှၤယူဒၤ အပှၤကူၣ်ဘၣ်ကူၣ်သ့ အခီၣ်ထံး ကတၢၢ်တဂၤ လၢအဟံးန့ၢ် ဟ့းလ့ၣ် အမံၤ, ဒီးမ့ၢ်စ့ၢ်ကီး ပှၤကၠိဖိ တဂၤအလၢ အမံၤ စၤဒိး (Zadok) တဂၤ အသရၣ် န့ၣ်လီၤ. ဖဲမၤကဘံၣ် ထီဒါက့ၤ ပှၤဟ့းလ့ၣ်ဖိ တဖၣ်အဆၢကတီၢ်, စၤဒူၤကဲ အိၣ်ဖျါ ထီၣ်ဒ် ကရၢတခါ အသိးန့ၣ်လီၤ. အ၀ဲသ့ၣ်မ့ၢ် ပှၤလၢအဟဲလၢ ပှၤလုၢ်တၢ်ဒိၣ် အဟံၣ်ဖိဃီဖိ ဒီး မ့ၢ်ပီၢ်ရီ တဖၣ် န့ၣ်လီၤ.

စၤဒူၤကဲ တဖၣ်မၤစၢၤ ပှၤဟၢးစမိၤနံယါ လၢအကဲထီၣ် ပှၤလုၢ်တၢ်အခိၣ် ဒီး စီၤပၤ ခံမံၤလၢာ် တဖၣ်န့ၣ်လီၤ. လၢစီၤယိၤဟၣ် ဟၤခါနၢး အဖီလာ်န့ၣ်, တၢ်လုၢ်ဟံၣ် ပှၤဘၣ်မူဘၣ်ဒါ တဖၣ်, တၢ်သိၣ်တၢ်သီ ပှၤဘၣ်မူဘၣ်ဒါ တဖၣ်, ဒီး ကွီၢ်ဘျီၣ် အပူၤ ခိၣ်နၢ်တဖၣ် ပှဲၤထဲ စၤဒူၤကဲ တဖၣ်န့ၣ်လီၤ. အ၀ဲသ့ၣ် အတၢ်ဒိၣ်စိဒိၣ် ကမီၤ အိၣ်ဒံး၀ဲတုၤ စၤလိၤမဲ အလဲးစါဒြၤ ဒိးန့ၢ် လီၢ်ပစိာ် ဖဲ ချ.ခ.န. ၇၆ နံၣ်န့ၣ်လီၤ. စၤလိၤမဲ အလဲးစါဒြၤအံၤ ဘၣ်သူၣ်ဘၣ်သး ဖၤရံၤရှဲ တဖၣ်အါန့ၢ် စၤဒူၤကဲ တဖၣ်န့ၣ်လီၤ. ပှၤရိမ့ၤဖိ တဖၣ် နုာ်လီၤမၤန့ၢ် ကီၢ်ယူဒၤ ၀ံၤအလီၢ်ခံ, စၤဒူၤကဲ တဖၣ် ဒိးန့ၢ်ကဒါက့ၤ တၢ်စိ တၢ်ကမီၤ န့ၣ်လီၤ. ဘၣ်ဆၣ် ၀့ၢ်ယရူၤရှလ့ၣ် လီၤပှီၢ်ကွံာ်ဖဲ ခ.န. ၇၀ နံၣ်၀ံၤအလီၢ်ခံ ပှၤစၤဒူၤကဲ တဖၣ် ဟါမၢ် ကွံာ်၀ဲ န့ၣ်လီၤ.

လၢထံရူၢ်ကီၢ်သဲး တကပၤန့ၣ်, ပှၤစၤဒူၤကဲတဖၣ် ဒိၣ်စိဒိၣ်ကမီၤ လၢ ကွီၢ်ဘျီၣ် အပူၤ လၢပှၤလုၢ်တၢ်အဒိၣ် အတၢ်ပၢ တၢ်ပြး အဖီလာ် န့ၣ်လီၤ. ကၠိစဲးဖၢး လၢအမ့ၢ် ပှၤကွဲးက့ၤ ယူဒၤ အတၢ်စံၣ်စိၤ တဲစိၤတဂၤ စံး၀ဲလၢ ပှၤစၤဒူၤကဲ တဖၣ် မ့ၢ် "ပှၤဖးဒိၣ်တဖု" အအိၣ်ဒီး ပှၤထူးပှၤတီၤ တဖၣ်လၢ အကပၤ ဘၣ်ဆၣ် တအိၣ်ဒီး ပှၤပတီၢ်မုၢ် တဖၣ်ဘၣ်. စၤဒူၤကဲ တဖၣ် ပာ်လီၤဖး ထံရူၢ်ကီၢ်သဲးဒီး တၢ်ဘူၣ်တၢ်ဘါ န့ၣ်လီၤ. ပှၤဖၤရံၤရှဲ တဖၣ်နာ်၀ဲလၢ ကစၢ်ယွၤ ကမၤတၢ်လၢ အပှၤကလုာ် အဘူၣ်အတီၢ် အဂီၢ်န့ၣ်လီၤ. ဘၣ်ဆၣ်, မ့မ့ၢ် ပှၤစၤဒူၤကဲတဖၣ် တခီ မၤသကိး တၢ်ဒီး ပှၤတခီဘီမုၢ်ဖိ တဖၣ်, မ့ၢ်လၢ အ၀ဲသ့ၣ် နာ်လၢ ထံကီၢ် အတၢ်သဘျ့န့ၣ် နမၤန့ၢ်အီၤလၢ နပၢၤဃာ် တၢ်သိၣ်တၢ်သီ ဃံးဃံး အဃိတသ့ ဘၣ် န့ၣ်လီၤ. ပှၤစၤဒူၤကဲတဖၣ် အကျါ ပၣ်ဃုာ်ဒီး သုးခိၣ်ဖးဒိၣ် တဖၣ်, သုးဖိတဖၣ်, ဒီး ပဒိၣ်ပပှၢ်တဖၣ် န့ၣ်လီၤ.

လၢတၢ်ဘူၣ်တၢ်ဘါ တကပၤ, အ၀ဲသ့ၣ် ဘၣ်တၢ်သ့ၣ်ညါအီၤဒ် ပှၤလၢ အသမၢ တၢ်စူၢ်တၢ်နာ် ဘၣ်ဃး တၢ်ဂဲၤထၢၣ် သမူထီၣ်က့ၤ, ဒီးမူခိၣ်ကလူးဒီး တၢ်၀ံတၢ်ကလၤ တဖၣ်န့ၣ်လီၤ. အ၀ဲသ့ၣ် နာ်စ့ၢ်ကီး၀ဲလၢ ပနီၢ်ခိမ့ၢ်သံန့ၣ် ပသးသမူ စ့ၢ်ကီး သံဃုာ်၀ဲ န့ၣ်လီၤ. အဃိ လၢအ၀ဲသ့ၣ် အဂီၢ် တၢ်အိၣ်မူ လၢ တၢ်သံအလီၢ်ခံ န့ၣ် တအိၣ်ဘၣ်.