ကွီၢ်ဘျီၣ် (The Sanhedrin)

ကွီၢ်ဘျီၣ်အံၤ မ့ၢ် ပှၤယူဒၤဖိတဖၣ် အတၢ်စံၣ်ညီၣ်ပီတ့ အလီၢ်ခၢၣ်သး ဒီး ပှၤလုၢ်တၢ်အဒိၣ် မ့ၢ်ပှၤအခိၣ် န့ၣ်လီၤ. အိၣ်ဒီး အပှၤမၤသကိး တၢ်ဖိ ၇၀ ဂၤ မ့တမ့ၢ် ၇၁ ဂၤ, ဒီး အါတက့ၢ်မ့ၢ် ပှၤလၢ အဘၣ်ထွဲဒီး ပှၤလုၢ်တၢ်ဒိၣ် အဟံၣ်ဖိဃီဖိ တဖၣ် န့ၣ်လီၤ. ပှၤကွဲးလံာ်, ပှၤသူၣ်က့သးပှၢ်, ဒီး ပှၤသ့လံာ်တၢ်သိၣ်တၢ်သီ တဖၣ် ဘၣ်တၢ်ယၢၤထီၣ်အီၤ လၢလံာ်စီဆှံ အသီတကတြူၢ် အပူၤ မ့ၢ်လၢ အ၀ဲသ့ၣ် ဘၣ်ထွဲဒီး ကွီၢ်ဘျီၣ်အံၤ အဃိန့ၣ်လီၤ. အ၀ဲသ့ၣ် စံၣ်ညီၣ်တၢ်လၢ တၢ်မူးတၢ်ကွီၢ် ခဲလၢာ်အဂီၢ် လၢအပၣ်ဃုာ်ဒီး တၢ်ဘူၣ်တၢ်ဘါ တကပၤ စ့ၢ်ကီးန့ၣ်လီၤ. မ့ၢ်လၢ စီၤမိၤရှ့ အတၢ်သိၣ်တၢ်သီ ဘၣ်ထွဲဒီး တၢ်အိၣ်မူ ကိးကပၤဒဲး အဃိ, တၢ်မူးတၢ်ကွီၢ် လၢ တလီၤ ဘၣ်လၢ ကွီၢ်ဘျီၣ်အံၤ အတၢ်စံၣ်ညီၣ်အဖီလာ် ဘၣ်န့ၣ် အိၣ်စှၤဒိၣ်မး လီၤ.


ကွီၢ်ဘျီၣ်အံၤ ဘၣ်တဘၣ် အခီၣ်ထံးခီၣ်ဘိ စးထီၣ်အသးလၢ ပှၤလ့ၤ၀ံဖိ တဖၣ်, ပှၤလုၢ်တၢ်ဒိၣ်တဖၣ်, ဒီး အံၣ်စရ့လး အပၢ်ဖးဒိၣ် တဖၣ်န့ၣ်လီၤ. အ၀ဲသ့ၣ် ဘၣ်တၢ်တီခိၣ်ရိာ်မဲအီၤလၢ ပှၤလုၢ်တၢ်ဒိၣ် လၢအအိၣ်လၢ ယရူၤရှလ့ၣ် အပူၤ, ဒီး အတၢ်တိာ်န့ၣ်မ့ၢ်၀ဲ တၢ်ဒိကနၣ် တၢ်မူးတၢ်ရၢ် လၢအဟဲထီၣ်ဆူ အ၀ဲသ့ၣ် အအိၣ်တဖၣ် န့ၣ်လီၤ (ကွၢ် ၂ကွဲးနီၣ်တၢ် ၁၉း၅-၁၁).

ကျိၤကျဲလၢ တၢ်ဃုထၢထီၣ် ပှၤမၤ သကိးတၢ်လၢ ကွီၢ်ဘျီၣ် အပူၤတဖၣ် တၢ်တသ့ၣ်ညါ အီၤဘၣ်. လၢစီၤပၤ ဟ့ၤရိာ် အတၢ်ပၢအဖီလာ်န့ၣ်, ပှၤဖၤရံၤရှဲ အါဒံအါဂၤ ကဲထီၣ်ပှၤမၤသကိးတၢ်လၢ ကွီၢ်ဘျီၣ် အပူၤန့ၣ်လီၤ. ဘၣ်ဆၣ် ပှၤလၢအဒိၣ် စိဒိၣ်ကမီၤလၢ ကွီၢ်ဘျီၣ်အပူၤ မ့ၢ် စၤဒူၤကဲ သ့ၣ်တဖၣ်န့ၣ်လီၤ. ခိၣ်နၢ်တဖၣ်လၢ တၢ်ထံၣ် တလီၤပလိာ်လိာ်သး တဖၣ် ညီနုၢ် တဲၤလိာ်ဃိလိာ် အသးဘၣ်ဃး တၢ်သိၣ်တၢ်သီ လၢ ကွီၢ်ဘျီၣ် အပူၤန့ၣ်လီၤ. တၢ်အိၣ်ဖှိၣ် ဘၣ်တၢ်မၤအီၤလၢ တၢ်လုၢ်ဟံၣ် အဟီၣ်က၀ီၤအပူၤ, ဒီး ပှၤယူဒၤဖိ လၢအအဲၣ်ဒိးသ့ၣ်ညါ ဘၣ်ဃး တၢ်သိၣ် တၢ်သီ တဖၣ် ဟဲဒိကနၣ်၀ဲသ့ န့ၣ်လီၤ. ပှၤခိၣ်ပှၤနၢ်တဖၣ် ဆ့ၣ်နီၤက၀ီၤ အသး တကူာ်လာ် (ဆ့ၣ်နီၤဒ် "U" အသိး) ဒ်သိး ကဒိကနၣ် တၢ်မူးတၢ်ရၢ်တဖၣ်, ဒီးပှၤလၢ အဘၣ် တၢ်မူးတဖၣ် ဘၣ်တၢ်ပာ်အီၤလၢ အ၀ဲသ့ၣ် အမဲာ်ညါ န့ၣ်လီၤ.