ပှၤအဲးစဲ (Essenes)

ပှၤအဲးစဲဖိတဖၣ် အတၢ်အိၣ်တၢ်ဆိးလီၢ်

ဘၣ်တဘၣ် ပှၤအဲးစဲ ဖိတဖၣ်အံၤ အိၣ်ဖျါထီၣ် အခီၣ်ထံးကတၢၢ် ဖဲ မၤကဘံၣ် အတၢ်ပူထီၣ် တၢ် ဘူးကကတၢၢ်၀ဲ အဆၢ ကတီၢ်, ဖဲပှၤစၤဒူၤကဲ တဖၣ် တူၢ်လိာ် ဟ့းလ့ၣ် အတၢ်ဆဲးတၢ်လၤ အခါန့ၣ်လီၤ. ပှၤယူဒၤဖိလၢ အအိၣ်စီအိၣ်ဆှံ သးတဖၣ် ဟးထီၣ်ကွံာ်လၢ ပှၤကူပှၤကညီ အသိးအကျါ ဒီးလဲၤအိၣ်လဲၤ ဆိး၀ဲလၢ တၢ်လီၢ်လီၤဆီဖဲ ပိာ်မုၣ်တဖၣ် လဲၤတသ့ တတုၤဘၣ် အလီၢ်န့ၣ်လီၤ. အ၀ဲသ့ၣ် ထုးဖးကွံာ်အသးဒီး ကိးနံၤဒဲး အတၢ်အိၣ်မူ, ဒီးအိၣ်မူ၀ဲဒၣ် အတၢ်အိၣ်မူ ဒ် ပှၤပတီၢ်မုၢ်ဖိ တဖၣ်အသိးန့ၣ်လီၤ. အ၀ဲသ့ၣ် မၤစီမၤဆှံ အသးခီဖျိ တၢ်ဒိးစူၢ်ဒိးဘျၢ, ဒီးတၢ်အီၣ်သကိး ဟါတၢ်အီၣ် န့ၣ်လီၤ. အ၀ဲသ့ၣ်ထီဒါ သုးသံၣ် အတၢ်ဖံးတၢ်မၤ ဒီး အ၀ဲသ့ၣ် မၤစၢၤလီၤက့ၤ အသးခီဖျိ တၢ်မၤမုၢ်ဆ့ၣ်မုၢ်ဂီၤ, ဒီး တၢ်သူၣ် တၢ်ဖျး တဖၣ်န့ၣ်လီၤ. အ၀ဲသ့ၣ် မ့ၢ်တမၤတၢ် အဆၢကတီၢ်, အ၀ဲသ့ၣ် ဟ့ၣ်လီၤအသးလၢ တၢ်ဘါထုကဖၣ် ဒီး တၢ်မၤလိ တၢ်သိၣ်တၢ်သီ တဖၣ်န့ၣ်လီၤ.

 ပှၤအဲးစဲဖိတဖၣ် မ့ၢ်ဘၣ်သူၣ်ဘၣ်သး ပှၤဖၤရံၤရှဲ တဖၣ် အတၢ်ဖံးတၢ်မၤ ဘၣ်ဃး နီၢ်တဂၤ တၢ်မၤစီဆှံသး, ဒီး တၢ်အိၣ်လီၤဖးဒီး တၢ်တစီတဆှံ ဘၣ်လၢ တနံၤဘၣ်တနံၤ အတီၢ်ပူၤဘၣ်ဆၣ်, အ၀ဲသ့ၣ်ထီဒါ ပှၤဖၤရံၤရှဲတဖၣ် အတၢ်စူၢ်တၢ်နာ် ဘၣ်ဃး တၢ်ဂဲၤထၢၣ်သမူထီၣ်က့ၤ လၢနီၢ်ခိနီၢ်ခီ န့ၣ်လီၤ. ဘၣ်ဆၣ် အ၀ဲသ့ၣ်နာ် သးသမူ အတၢ်လီၤထူလီၤယိာ် န့ၣ်လီၤ. အ၀ဲသ့ၣ်ထံၣ်၀ဲလၢ ပှၤစၤဒူၤကဲ ဒီး တၢ်ဖံးတၢ်မၤလၢ တၢ်လုၢ်ဟံၣ်အပူၤတဖၣ် မ့ၢ်တၢ်မၤ ကဘျံးကဘျၣ် တၢ်, အဃိ အ၀ဲသ့ၣ် ထုးလီၤဖး အသးဒီး ပှၤကူပှၤကညီ န့ၣ်လီၤ. အ၀ဲသ့ၣ် မၤပိာ်ထွဲ မုၢ်အိၣ်ဘှံးနံၤ, ဒီး တၢ်သိၣ်တၢ်သီ ဘၣ်ဃး တၢ်စီတၢ်ဆှံ ဃံးဃံးလီၤ. အ၀ဲသ့ၣ်တတူၢ်လိာ် တၢ်အၢၣ်လီၤအီလီၤ ဘၣ်, ဘၣ်ဆၣ် စံး၀ဲလၢ တုၤနအၢၣ်လီၤ တၢ်လံဒီး နထုးက့ၤအီၤ တသ့လၢၤဘၣ်.

လၢလံာ်စီဆှံ အသီတကတြူၢ်အပူၤ, ပှၤအဲးစဲ ဖိတဖၣ် တၢ်တပာ်ဖျါထီၣ်အီၤ ဘၣ်. သနာ်က့, ပှၤကူၣ်ဘၣ်ကူၣ်သ့ တဖၣ် နာ်၀ဲလၢ စီၤယိၤဟၣ် ဘျၢတၢ် ဒိးန့ၢ် တၢ်သူၣ်ဆူၣ်သးဂဲၤ လၢ အ၀ဲသ့ၣ် အအိၣ်န့ၣ်လီၤ. အတၢ်အိၣ်မူ လၢ အခီၣ်ထံးတဖၣ် အိၣ်၀ဲဒၣ်လၢ ခူၤရၤ အပှၤတ၀ၢ အပူၤန့ၣ်လီၤ (ခူၤရၤ အပှၤတ၀ၢ အတၢ်အိၣ်မူ ဒီး အတၢ်ဖံးတၢ်မၤ မ့ၢ်တၢ်ဒ်သိး ဒီး ပှၤအဲးစဲဖိ တဖၣ်န့ၣ်လီၤ). ပှၤကူၣ်ဘၣ်ကူၣ်သ့ အါဂၤနာ်၀ဲလၢ တၢ်အိၣ်ဖှိၣ်လၢ အခီၣ်ထံးခီၣ်ဘိ တဖၣ် ဘၣ်တၢ်လုၢ်ဘၢအီၤလၢ ပှၤအဲးစဲ ဖိတဖၣ် အတၢ်စူၢ်တၢ်နာ် ဒီး အတၢ်ကရၢ ကရိန့ၣ်လီၤ.