ဖၤရံၤရှဲ (Pharisees)

၀့ၢ်ယရူၤရှလ့ၣ် လီၤပှီၢ်ဖဲ ချ.ခ.န. ၅၈၆ နံၣ် ၀ံၤအလီၢ်ခံ, ပှၤလၢအမၤဂ့ၤထီၣ်က့ၤ ယူဒၤ အတၢ်ဘါ ဒီး ပှၤယူဒၤဖိ တဖၣ် အတၢ်အိၣ်မူ အိၣ်ဂဲၤ ဒီး အတၢ်ဆိကမိၣ်ဆိကမး မ့ၢ် ဖၤရံၤရှဲ တဖၣ် န့ၣ်လီၤ. အ၀ဲသ့ၣ် အမံၤဒီး အတၢ်ကရၢကရိ ဟဲကဲထီၣ် အသး ဒ်လဲၣ်န့ၣ် တၢ်တသ့ၣ်ညါ လီၤတံၢ်လီၤဆဲး ဘၣ်. ဘၣ်တဘၣ် အမံၤ အခီပညီ ကမ့ၢ်, "ပှၤလၢ တၢ်ပာ် လီၤဆီအီၤ" ဘၣ်ဆၣ် တၢ်ပာ်လီၤဆီအီၤ လၢမနုၤအဂီၢ် လဲၣ်န့ၣ် တၢ်တသ့ၣ်ညါအီၤ လီၤတံၢ်လီၤဆဲး ဘၣ်. အ၀ဲသ့ၣ် တမ့ၢ် ပှၤဟဲလီၤစၢၤလၢ ပှၤလုၢ်တၢ်အဒိၣ် အဟံၣ်ဖိဃီဖိ ဘၣ်. မ့မ့ၢ်တခီ မ့ၢ်ပှၤဟဲ လီၤစၢၤလၢ ပှၤပတီၢ်မုၢ် တဖၣ်လီၤ. အ၀ဲသ့ၣ် စ့ၢ်ကီး မ့ၢ်ပီၢ်ရီ တဖၣ်လီၤ.

ဖၤရံၤရှဲ အတၢ်ပာ်သူၣ်ပာ်သး ဘၣ်သ့ၣ်သ့ၣ် ကဟဲကဲထီၣ် အသးဖဲ တၢ်မၢကဲကုၢ် အဆၢကတီၢ်, ဘၣ်ဆၣ် ဖၤရံၤရှဲ အကရူၢ်ဖိအံၤ အိၣ်ထီၣ်၀ဲဖဲ မၤကဘံၣ် တဖၣ် ထီဒါက့ၤ ပှၤဟ့းလ့ၣ်ဖိ တဖၣ် အဆၢကတီၢ် န့ၣ်လီၤ. ဖၤရံၤရှဲ တဖၣ် ဟံးန့ၢ် ၀ံတဖၣ် အသးသဟီၣ်လၢ တၢ်ပၢၤဃာ် တၢ်သိၣ်တၢ်သီ တကပၤ န့ၣ်လီၤ. ဖၤရံၤရှဲ တဖၣ် မ့ၢ်ပှၤန့ၢ်သါ တၢ်လၢ စီၤဧ့စြၤ အအိၣ်လၢ အဘၣ်ဃးဒီး တၢ်မၤထွဲ တၢ်သိၣ်တၢ်သီ န့ၣ်လီၤ. တကးဒံးဘၣ်, အ၀ဲသ့ၣ် နာ်၀ဲလၢ တၢ်သိၣ်တၢ်သီ ကြၢး အိးထီၣ် အသးလၢ တၢ်ကကျိာ်ထံ က့ၤအီၤ လၢအသီ န့ၣ်လီၤ.

ပှၤဖၤရံၤရှဲ တဖၣ် ကဲထီၣ် ကရူၢ်တဖု ဖဲ စီၤယိၤဟၣ် ဟၤခါနၢး အဆၢကတီၢ် န့ၣ်လီၤ. အ၀ဲသ့ၣ်ထီဒါ မူဒါ အတၢ်ဖံး တၢ်မၤလၢ ဟးစမိၤနံယါ ဟံးန့ၢ်၀ဲလၢ အမ့ၢ် ပှၤလုၢ်တၢ်အဒိၣ် ဒီး တကတီၢ်ဃီ စီၤပၤ န့ၣ်လီၤ. ဘၣ်ဆၣ် ထံရူၢ်ကီၢ်သဲး တကပၤ အ၀ဲသ့ၣ် အတၢ်စိတၢ်ကမီၤ တအိၣ်ဒ်သိး ပှၤစၤဒူၤကဲ တဖၣ်ဘၣ်.

အ၀ဲသ့ၣ် အတၢ်စူၢ်တၢ်နာ်တခီ လီၤဆီလိာ် အသးဒီး ပှၤစၤဒူၤကဲ တဖၣ်န့ၣ်လီၤ. အ၀ဲသ့ၣ် နာ် တၢ်ဂဲၤထၢၣ်သမူ ထီၣ်က့ၤ, ဒီး တၢ်အိၣ်မူလၢ ခါဆူညါ ဃုာ်ဒီး တၢ်ဟ့ၣ်ကၣ် ဒီး တၢ်စံၣ်ညီၣ်လီၤ. အ၀ဲသ့ၣ် ကွၢ်တၢ်ထဲ တၢ်မၤထွဲ တၢ်သိၣ် တၢ်သီ လၢနီၢ်ခိ တကပၤ, ဘၣ်ဆၣ် လၢနီၢ်သး တခီ အ၀ဲသ့ၣ် တကွၢ်၀ဲဘၣ်. မ့ၢ်လၢ တၢ်ဂ့ၢ်အံၤအဃိ, ကဲထီၣ် တၢ်သဘံၣ်ဘုၣ် လၢအ၀ဲသ့ၣ်ဒီး ကစၢ်ခရံာ် အဘၢၣ်စၢၤ န့ၣ်လီၤ. ပှၤစၤဒူၤကဲ တဖၣ် အတၢ်စူၢ်တၢ်နာ် ကမၣ်, ပှၤဖၤရံၤရှဲ တဖၣ် အတၢ်စူၢ်တၢ်နာ် ဘၣ်၀ဲ, ဘၣ်ဆၣ် အတၢ်အိၣ်မူ တလီၤပလိာ်အသးဒီး အတၢ်သိၣ် လိသီလိ တဖၣ်န့ၣ်ဘၣ်. လၢ တၢ်န့ၣ်အဃိ ယ့ၣ်ရှူးစံး၀ဲ, "ပှၤကွဲးလံာ် ဒီးပှၤဖၤရံၤရှဲ သ့ၣ်တဖၣ် ဆ့ၣ်နီၤလၢ စီမိၤရှ့ အလီၢ်ဆ့ၣ်နီၤ အဖီခိၣ်လီၤ. မၤသး ဒ်န့ၣ်ဒီး, ဖဲဒၣ် အမၤလိာ်သု ခဲလၢာ်န့ၣ်, တိၢ်န့ၢ်ဒီး မၤတက့ၢ်. မ့မ့ၢ် ဒ်အမၤတၢ်အသိး န့ၣ်, မၤတဂ့ၤ. အဂ့ၢ်ဒ်အံၤ, အ၀ဲသ့ၣ် စံးတၢ်န့ၣ် ဒီး တမၤဘၣ်၀ဲ ဘၣ်" (မးသဲ ၂၃း၂-၃).