ပှၤသးဆူၣ်တဖၣ်, "ပှၤစံလီး" (Zealots)

ပှၤစံလီး တဖၣ်အံၤ မ့ၢ်ကရူၢ်တဖုလၢ ဘၣ်တၢ်ပာ်အီၤ လီၤဆီလၢ ကဘၣ်ဒီသဒၢ တၢ်သိၣ်တၢ်သီ, ဒီး ပှၤယူဒၤဖိ တဖၣ် အတၢ်အိၣ်မူ အိၣ်ဂဲၤ န့ၣ်လီၤ. အခီၣ်ထံး အ၀ဲသ့ၣ် ဒိၣ်စိဒိၣ်ကမီၤလၢ ကၤလံၤလါ တကပၤ ဒီးလၢခံ လၢ၀့ၢ်ယရူၤရှလ့ၣ် တကပၤ စးထီၣ်လၢ စီၤပၤဟ့ၤရိာ် အဆၢကတီၢ်ဒီး တုၤလီၤလၢ ၀့ၢ်ယရူၤရှလ့ၣ် လီၤပှီၢ်ဖဲ ခ.န. ၇၀ နံၣ် အပူၤန့ၣ်လီၤ. အ၀ဲသ့ၣ်ထီဒါ ရိမ့ၤ အတၢ်ဒိၣ်စိ ဒိၣ်ကမီၤ ဒီး မ့ၢ်စ့ၢ်ကီး ပှၤယူဒၤဖိ အပှၤဖီၣ်တၢ်စုက၀ဲၤ တဖုလၢ အထီဒါ ရိမ့ၤ တဖၣ် န့ၣ်လီၤ. ပှၤစံလီးဖိတဖၣ် ဟ့ၣ်လီၤအသးလၢ တၢ်မၤသံ ပှၤတခီဘီမုၢ်ဖိ လၢ အနုာ်လီၤဆူၣ် လၢ တၢ်လုၢ်ဟံၣ် အတၢ်စီဆှံ အလီၢ်တဖၣ် အပူၤန့ၣ်လီၤ.

 ပှၤစံလီးဖိတဖၣ် ကဲထီၣ်အသးဒ်လဲၣ် တၢ်မ့ၢ် တသ့ၣ်ညါအီၤ လီၤတံၢ်လီၤဆဲးဘၣ်ဆၣ်, အ၀ဲသ့ၣ် ဟံးန့ၢ် ပှၤမၤကဘံၣ် တဖၣ် အသးသဟီၣ် န့ၣ်လီၤ. အ၀ဲသ့ၣ် မ့ၢ်ပှၤလၢ အအဲၣ်အပှၤကလုာ်, ဒီး အသးဆူၣ်လၢ တၢ်သိၣ်တၢ်သီ အဂီၢ် န့ၣ်လီၤ. အ၀ဲသ့ၣ် အတၢ်စူၢ်တၢ်နာ် န့ၣ် လီၤပလိာ်အသးဒီး ပှၤဖၤရံၤရှဲ တဖၣ် အတၢ်စူၢ်တၢ်နာ် န့ၣ်လီၤ. ဘၣ်ဆၣ် အ၀ဲသ့ၣ် စိာ် တၢ်အဲၣ်ပှၤကလုာ် အသးသဟီၣ် ဆူၣ်ဒိၣ်န့ၢ်ဒံး ပှၤဖၤရံၤရှဲ တဖၣ်ဒံး န့ၣ်လီၤ. ပှၤစံလီးဖိလၢ အသးဆူၣ် ဒိၣ်ဒိၣ် ကလဲာ်တဖၣ် ဘၣ်တၢ်သ့ၣ်ညါ အ၀ဲသ့ၣ်လၢ စံၤခၤရံၤ (Sicarii), အခီပညီ, ပှၤမၤသံတၢ် တဖၣ်န့ၣ်လီၤ. ပှၤစံလီးတဖၣ် အံၤ ပာ်ခူသူၣ် အဒီ ဆံးဆံးဖိ တဖၣ်လၢ အတၢ်ကူအဖီလာ် ဒ်သိး ကမၤသံ ပှၤယူဒၤဖိလၢ အသမၢကွံာ် အပှၤကလုာ် ဒီး မၤသကိးတၢ်ဒီး ပှၤရိမ့ၤ ဖိတဖၣ် န့ၣ်လီၤ.