တၢ်ထဲသိးတုၤသိးလၢပိာ်မုၣ်ပိာ်ခွါ အဘၢၣ်စၢၤ
အလီၢ်အိၣ်ဝဲဒၣ်လၢ ပကဘၣ်ကွၢ်ကဒါက့ၤ လံာ် ၁ မိၤရှ့ အဆၢဒိၣ်တၢ အပူၤန့ၣ်လီၤ.
တၢ်ထဲသိးတုၤသိးဒိးသန့ၤထီၣ်အသးလၢတၢ်တ့လီၤပာ်လီၤတၢ်
ဒီးယွၤစံးဝဲဒၣ်, "မ်ပတ့လီၤပှၤကညီဒ်ပဂီၤ ဒၣ်ပဝဲအသိး, ဒ်ပကစၢ်ဒၣ်ပဝဲအသိးတက့ၢ်. ဒီးမ်အပၢ ဒ့ၣ်ဧိၤညၣ်ဧိၤ လၢပီၣ်လဲၣ်ပူၤ, ဒီးထိၣ်ဧိၤလံၣ်ဧိၤ လၢတၢ်ဖးဖီ, ဒီးဆၣ်ဧိၤကီၢ်ဧိၤ, ဒီးဟီၣ်ခိၣ်ဒီဘ့ၣ်ညါ, ဒီးတၢ်အစွါအစွဲ လၢအစွါလၢဟီၣ်ခိၣ်ချၢတက့ၢ်."ဒီးယွၤတ့လီၤပှၤကညီဒ်အဂီၤ ဒၣ်ဝဲအသိးလီၤ. တ့လီၤဝဲလၢယွၤအဂီၤလီၤ, ပိာ်မုၣ်ဒီးပိာ်ခွါန့ၣ်တ့လီၤ ဝဲလီၤ.
ဒီးယွၤဆိၣ်ဂ့ၤအီၤဒီး စံးဘၣ်အီၤ, "မ်သုသၣ်ထီၣ်, ဒီးအါထီၣ်, ဒီးမၤပှဲၤထီၣ်ဟီၣ်ခိၣ် ဒီးမၤနၢၤအီၤ, ဒီးပၢဒ့ၣ်ဧိၤညၣ်ဧိၤလၢပီၣ်လဲၣ်ပူၤ, ဒီး ထိၣ်ဧိၤလံၣ်ဧိၤလၢတၢ်ဖးဖီ, ဒီးကယဲၢ်တၢ်အသးလၢ အဟူး အဂဲၤလၢဟီၣ်ခိၣ်ချၢန့ၣ်တက့ၢ်." ၁ မိၤရှ့ ၁း၂၆-၂၈.
လၢလံာ်စီဆှံတဆၢအံၤအပူၤ ပကထံၣ်ဘၣ် ကစၢ်ယွၤအတၢ်စံး တၢ်ကတိၤ ("မ်ပတ့လီၤပှၤကညီ .... ဒီးမ်အပၢ ....") ကစၢ်ယွၤအတၢ်တ့လီၤ ("ဒီး ယွၤတ့လီၤ .... ") ဒီး ကစၢ်ယွၤအတၢ်ဆိၣ်ဂ့ၤ ("မ်သုသၣ်ထီၣ် .... ဒီးမၤပှဲၤဟီၣ်ခိၣ်ဒီးမၤနၢၤအီၤ .... ") တဖၣ်န့ၣ်လီၤ. ပကထံၣ်ဘၣ် တၢ်မ့ၢ်တၢ် တီအခီၣ်ထံးခီၣ်ဘိသၢမံၤ လၢပှၤဟီၣ်ခိၣ်ဖိအဂီၢ်, လၢအမ့ၢ် (ယွၤတ့လီၤ)ပှၤကညီဒ်အက့ၢ်အဂီၤ ဒၣ်ဝဲအသိး .... ပိာ်မုၣ်ဒီးပိာ်ခွါန့ၣ် (တ့လီၤ) ဝဲလီၤ. ဒီးဟ့ၣ်လီၤဝဲ တၢ်ဖံးတၢ်မၤတခါလၢ အမ့ၢ်တၢ်မၤအါထီၣ် တၢ်ချံတၢ်သၣ်, တကးဒံးဘၣ် (ဟ့ၣ်လီၤ) အဝဲသ့ၣ်လၢကပၢဝဲ ဟီၣ်ခိၣ်ဒီး တၢ်အိၣ်လၢအပူၤခဲလၢာ်န့ၣ်လီၤ.
လၢတၢ်န့ၣ်အဃိ လၢအခီၣ်ထံးခီၣ်ဘိန့ၣ်, ပှၤဟီၣ်ခိၣ်ဖိမ့ၢ်ဝဲဒၣ် ပိာ်မုၣ် ဒီး ပိာ်ခွါန့ၣ်လီၤ. ပိာ်မုၣ်ဒီး ပိာ်ခွါ ခံဂၤလၢာ် ဘၣ်တၢ်တ့လီၤအီၤ လၢယွၤအဂီၤ, တကးဒံးဘၣ် ကယဲၢ်မ့ၢ် တၢ်အိၣ်လၢဟီၣ်ခိၣ်ချၢ တဖၣ် ပၢဘၣ်ဝဲဒၣ် ဒ်သိးသိးန့ၣ်လီၤ.
လၢလံာ်စီဆှံတဆၢ အံၤအပူၤန့ၣ် ပကထံၣ်ဘၣ်လၢ ယွၤတ့လီၤ ပှၤကညီလၢအက့ၢ်အဂီၤန့ၣ်, တဲဖျါထီၣ် ဝဲဒၣ် ခံဘျီ, ဒီးလၢသၢဘျီတဘျီန့ၣ် ပိာ်ခွါဒီးပိာ်မုၣ် ဟံးန့ၢ်ကွံာ်ဝဲ ယွၤအက့ၢ်အဂီၤအလီၢ် န့ၣ်လီၤ. ပတကြၢး ဆိကမိၣ်တၢ်အါန့ၢ်ဒံး လံာ်စီဆှံတဆၢအံၤ တဲပှၤဘၣ်. ဒ် ပိာ်ခွါဒီးပိာ်မုၣ် အိၣ်ဝဲဒီး ယွၤအက့ၢ် အဂီၤအသိး ခံဂၤမ့ ပာ်ဃုာ်န့ၣ် လီၤဂာ်ဝဲဒၣ်ဒ်သိးဒီး ယွၤသၢဂၤ တဂၤဃီအသိးန့ၣ်လီၤ. မ့ၢ်လၢကစၢ်ယွၤ တ့လီၤပိာ်ခွါ ဒီးပိာ်မုၣ် ဒ်အက့ၢ်အဂီၤအသိးအဃိ, လၢယွၤအပူၤန့ၣ် ပိာ်မုၣ်အသကဲးပဝး တကတီၢ်ဃီ ပိာ်ခွါ အသကဲးပဝး အိၣ်စ့ၢ်ကီးဧါ.
လံာ်စီဆှံအဆၢ အိၣ်စ့ၢ်ကီးဝဲ လၢအစံးဝဲ, ကစၢ်ယွၤန့ၣ်အိၣ်ဝဲဒီး မိၢ်အသကဲးပဝး လီၤဆီဒၣ်တၢ်, စီၤမိၤရှ့အတၢ်သးဝံၣ်အပူၤ စံးဝဲလၢ "မ့ၢ်လၢၢ်လၢအအံးထွဲကွၢ်ထွဲနၤ" တကးဒံးဘၣ်စံးစ့ၢ်ကီးဝဲလၢ "မ့ၢ်ယွၤလၢ အဒုးအိၣ်ဖျဲၣ်ထီၣ်နၤ" န့ၣ်လီၤ. အအံၤမ့ၢ်၀ဲ တၢ်ကတိၤတခါလၢ အဒုးနဲၣ်ဖျါထီၣ် လၢ ယွၤမ့ၢ် အံၣ်စရ့လး အပၢ် ဒီးအမိၢ်န့ၣ်လီၤ. လၢတၢ််န့ၣ်အဃိ, အံၣ်စရ့လးဖိတဖၣ် အိၣ်ဒီးတၢ်နာ် လၢ ကစၢ်ယွၤသးတီဒီးအဝဲသ့ၣ်, မ့ၢ်လၢဖဲ ပှၤဟီၣ်ခိၣ်ဖိ အမိၢ် မ့လဲၤသဒၣ် အဖိလၢအဒုးအီၣ်နုၢ် ဝဲဘၣ်ဆၣ် ကစၢ်ယွၤအၢၣ်လီၤ အဝဲသ့ၣ်လၢ "ယတလဲၤသဒၣ်သုနီတဘျီဘၣ်" န့ၣ်လီၤ. ကစၢ်ယွၤ အတၢ်အဲၣ်န့ၣ် တလီၤတူာ်လၢ အဝဲသ့ၣ်အဂီၢ်နီတဘျီဘၣ်. ယွၤအၢၣ်လီၤအဝဲသ့ၣ်လၢ "ဒ်မိၢ်မၤမုာ် အဖိအသးအသိး, ယကမၤမုာ်သု ဒ်န့ၣ်အသိးစ့ၢ်ကီးန့ၣ်လီၤ." တကးဒံးဘၣ်, ဒ်လံာ်စီဆှံစံးဝဲ လၢ ကစၢ် ယွၤလီၣ်ဖျါထီၣ် အသးဒ် မိၢ်လၢအပှၤဂီၢ်မုၢ်အံၣ်စရ့လးဖိတဖၣ် အမဲာ်ညါ အသိး, အံၣ်စရ့လးဖိတဂၤစုာ်စုာ် အိၣ်ဒီး တၢ်သဘျ့လၢ ကရ့လိာ်မုာ်လိာ်အသးဒီး ကစၢ်ယွၤန့ၣ်လီၤ. ကစၢ်ခရံာ် အနီၣ်ကစၢ်ဒၣ်ဝဲ, တဘျီတခီၣ်သူဝဲ တၢ်ကတိၤလၢ အပာ်ဝဲကစၢ်ယွၤဒ်ပိာ်မုၣ်အသိး, လီၤဆီဒၣ်တၢ်, ယွၤန့ၣ်လီၤဂာ်ဒ် သိး ပိာ်မုၣ်လၢ အဃုဝဲဒၣ်တိၢ်လၢအလီၤမၢ်တဘ့ၣ်, တကးဒံးဘၣ် ဘၣ်ဃးဒီး ယရူၤရှလ့ၣ်န့ၣ် စံးဝဲဒၣ် လီၤဂာ်ဒ်သိး ဆီမိၢ်လၢအကဟုကယာ် အဖိလၢ အဒံးဆ့အဖီလာ် န့ၣ်လီၤ. (၅ မိၤရှ့ ၃၂း၁၈, ယရှါယၤ ၄၉း၁၅, ၆၆း၁၃, စံးထီၣ်ပတြၢၤ ၁၃၁း၁ ဒီးဆူညါ, လူၤကၣ် ၁၅း၈ ဒီးဆူညါ, မးသဲ ၂၃း၃၇).
လၢတၢ်တ့လီၤပာ်လီၤ တၢ်အဆၢကတီၢ်န့ၣ်, စးထီၣ်လၢ၁ မိၤရှ့ အဆၢဒိၣ်တၢ ဒီးဆူညါ ပကထံၣ် ဘၣ်လၢ ပိာ်မုၣ်ဒီးပိာ်ခွါန့ၣ် တၢ်ထဲသိးတုၤသိး အိၣ်ဝဲဒၣ်န့ၣ်လီၤ. ပိာ်မုၣ်ဒီးပိာ်ခွါခံဂၤလၢာ် အိၣ် ဒီး ကစၢ်ယွၤအက့ၢ်အဂီၤ န့ၣ်လီၤ. ဒီးပိာ်မုၣ်ဒီးပိာ်ခွါခံဂၤလၢာ် ယွၤပာ်လီၤလၢ အကပၢဟီၣ်ခိၣ် ဃုာ်ဒီး အီၤ လၢတၢ်ဂ့ၤအဂီၢ်န့ၣ်လီၤ.
တၢ်ထဲသိးတုၤသိးအံၤဘၣ်တၢ်မၤဟးဂီၤအီၤလၢ တၢ်ဒဲးဘး
ပိာ်မုၣ်ဒီးပိာ်ခွါ အတၢ်ထဲသိးတုၤသိးအံၤ ဘၣ်တၢ်မၤဟးဂီၤအီၤလၢ တၢ်ဒဲးဘးန့ၣ်လီၤ. ကစၢ်ယွၤ အတၢ်စံၣ်ညီၣ် လၢပိာ်မုၣ်အဂီၢ်မ့ၢ်ဝဲ "ဒီး နကသန့ၤနသးလၢနဝၤ, ဒီးအဝဲဒၣ်ကပၢနၤ" န့ၣ်လီၤ. စးထီၣ်ဖဲန့ၣ်, တၢ်ထဲသိးတုၤသိး လီၤမၢ်ကွံာ်ဝဲန့ၣ်လီၤ. လၢတၢ်ထဲသိး တုၤသိးအခၢၣ်စးန့ၣ်, တၢ်ဒိၣ်စိဒိၣ်ကမီၤလၢ တဂၤဒီးတဂၤ အဖီခိၣ် အိၣ်ထီၣ်ဝဲဒၣ် န့ၣ်လီၤ. ပိာ်ခွါဒိၣ်စိဒိၣ်ကမီၤလၢ ပိာ်မုၣ် အဖီခိၣ် န့ၣ် မ့ၢ်လၢတၢ်ဒဲးဘးအဃိ, တမ့ၢ်လၢ ကစၢ်ယွၤတ့လီၤဝဲဒၣ်ဒ်န့ၣ် အဃိဘၣ်.တကးဒံးဘၣ်, ပိာ်ခွါတဖၣ် သူကမၣ် ကစၢ်ယွၤ အတၢ်စံၣ်ညီၣ်အံၤ အါန့ၢ်ဒံး တၢ်လၢကစၢ်ယွၤအဲၣ်ဒိး ဝဲဒၣ်န့ၣ်လီၤ. ပကထံၣ်ဘၣ်တၢ်အဒိအံၤလၢ ကလုာ်အါကလုာ် အတၢ်ဆဲးတၢ်လၤ ဒီးအတၢ်စံၣ်စိၤ တဲစိၤအပူၤန့ၣ်လီၤ.
လၢလံာ်စီဆှံအလီၢ်လံၤတကတြူၢ်အပူၤ, ပကထံၣ်ဘၣ်လၢ ပၢ်မ့ၢ်ကစၢ် ဒီးပှၤပၢတၢ် လၢ အဒူၣ်ဖိထၢဖိအပူၤန့ၣ်လီၤ. ဘၣ်ဆၣ်, အပှၤပိာ်မုၣ်တဖၣ် တဘၣ် တၢ်မၤနၢၤမၤဃၣ်အဝဲသ့ၣ် ဘၣ်. ပိာ်မုၣ်တဖၣ်ဘၣ်တၢ်ပာ်အဝဲသ့ၣ်ဒ် အဘၣ်ထွဲဒီး ယွၤအတၢ်အၢၣ်လီၤအီလီၤ အဃိ ပိာ်ခွါ, ပိာ်မုၣ် ဒီးဖိသၣ်တဖၣ် အိၣ်ဖှိၣ်ဝဲတပူၤဃီသ့ လၢ တၢ်ဒိကနၣ်ကစၢ်ယွၤကလုၢ်ကထါအဂီၢ်န့ၣ်လီၤ. (၅ မိၤရှ့ ၃၁း၁၂). တၢ်ဒိးတ့ဒိးဖျီန့ၣ် အိၣ်ဒီးအသူးအသ့ၣ်အလၤကပီၤ ဒ်ကစၢ်ယွၤ အတၢ်အဲၣ်လၢအပှၤဂီၢ် မုၢ် အံၣ်စရ့လးဖိတဖၣ်အဂီၢ်အသိးန့ၣ်လီၤ. လံာ်ကတိၤဒိ စံးထီၣ်ပတြၢၤ မါလၢအကူၣ်တၢ်သ့ တဂၤန့ၣ်လီၤ. (ကတိၤဒိ ၃၁). တကးဒံးဘၣ် ပိာ်မုၣ် ဒ် နီၢ်ဃၤနၤ, နီၢ်အဘံၤကါယံးလး, နီၢ်နၤဧိၤမံ, နီၢ်ရူၤသး, ဒီးနီၢ်အ့စတၤ တဖၣ် ဘၣ်တၢ်ပာ်လၤပာ်ကပီၤ အဝဲသ့ၣ် တဖၣ် မ့ၢ်လၢအဝဲသ့ၣ်တဖၣ် အတၢ်စူၢ်တၢ် နာ်ဒီး အတၢ်ဖံးတၢ်မၤ တဖၣ်အဃိန့ၣ်လီၤ.
ဘၣ်ဆၣ်, ယွၤအဝံတဖၣ် ခိးကွၢ်လၢ်မုၢ်နံၤလၢ တၢ်အၢၣ်လီၤအီလီၤအသီ ကဟဲတုၤဝဲ ဖဲပိာ်မုၣ် ဒီးပိာ်ခွါ အတၢ်ထဲသိးတုၤသိး ကဘၣ်တၢ်ဒုးအိၣ်ထီၣ် ကဒီးအသီတဘျီန့ၣ်လီၤ. ကမ့ၢ်မုၢ်နံၤတနံၤလၢ ကစၢ်ယွၤကလူလီၤအသးမုာ်စီဆှံ လၢတၢ်ဖံးတၢ်ညၣ်ခဲလၢာ်အလိၤ, လၢအပၣ်ဃုာ်ဒီး ဖိခွါ ဒီးဖိမုၣ် တဖၣ်, ကုၢ်ပိာ်ခွါ ဒီး ကုၢ်ပိာ်မုၣ်တဖၣ်န့ၣ်လီၤ. ကမ့ၢ်မုၢ်နံၤတနံၤလၢ တၢ်ဖုၣ်ထံၣ်ဖုၣ်ထီ တအိၣ်လၢၤ လၢပိာ်ခွါ ဒီး ပိာ်မုၣ်အဘၢၣ်စၢၤဘၣ်န့ၣ်လီၤ.
ကစၢ်ခရံာ်ဒုးအိၣ်ထီၣ် တၢ်ထဲသိးတုၤသိး
ကစၢ်ခရံာ် အိၣ်ဖျဲၣ်ထီၣ် လၢ ပိာ်မုၣ်စီဆှံန့ၣ်လီၤ (ကလၤတံ ၄း၄). ပဝဲလၢအမ့ၢ်ဖြီၤထဲစတဲး ဖိတဖၣ် ပမ့တပာ်ဒိၣ် နီၢ်မၤရံ ဒ် ရိမဲခဲးသလ့း ဘၣ်ဆၣ် ကြၢးလၢပကဘၣ်ဟ့ၣ်အီၤ တၢ်လၤတၢ်ကပီၤန့ၣ်လီၤ. ဖဲကလူးကၤဘြံၤအ့လး လဲၤဆူနီၢ်မၤရံအအိၣ်, ဒီးကိးအီၤလၢ "ပှၤလၢ အဘၣ်ဘျုးအါ" အဆၢကတီၢ် (လူၤကၣ် ၁း၂၈), ဒီးဖဲအတခွါမုၣ် နီၢ်အ့းလံၤစါဘ့း ကိးအီၤလၢ "ပှၤလၢ အဘၣ်ဆိၣ်ဂ့ၤတဂၤ" အဆၢကတီၢ် (လူၤကၣ် ၁း၄၂), ပဝဲလၢအမ့ၢ် ပှၤခရံာ်ဖိတဖၣ် ပတကြၢးမဲာ်ဆှးလၢ ပကကိးနီၢ်မၤရံ ဒ် ကလူးကၤဘြံၤအ့လး မ့ၢ်ဂ့ၤ နီၢ်အ့းလံၤစါဘ့း မ့ၢ်ဂ့ၤ ကိးဝဲအသိးန့ၣ်တဂ့ၤ. အဂ့ၢ်ဒ်အံၤ, အဖိခွါမ့ၢ် ပှၤလၢအဒိၣ် အမုၢ်တဂၤအဃိ န့ၣ်လီၤ.
တမ့ၢ်ထဲ ကစၢ်ခရံာ် အတၢ်ဟဲအိၣ်ဖျဲၣ်ထီၣ် လၢပိာ်မုၣ်အဃိ ဒီး ဒုးအိၣ်ထီၣ်ကဒါက့ၤ ပိာ်မုၣ် အသူးအသံၣ် လၢအလီၤမၢ် ဖဲတၢ်ဒဲးဘးနုာ်လီၤဆူ ဟီၣ်ခိၣ်ချၢအခါန့ၣ် ဧိၤဘၣ်, မ့မ့ၢ်တခီ ကစၢ်ခရံာ် အတၢ်ပာ်သူၣ်ပာ်သး လၢပိာ်မုၣ်တဖၣ် အဖီခိၣ်စ့ၢ်ကီး, ဒုးအိၣ်ထီၣ် ကဒါက့ၤပိာ်မုၣ်အသူးအသံၣ် လၢအလီၤမၢ်တဖၣ် န့ၣ်လီၤ. ပှၤလၢအပိာ်ကစၢ်ခရံာ်တဖၣ် အကျါ ပကထံၣ်ဘၣ်လၢ ပိာ်မုၣ်တဖၣ် ပၣ်ဃုာ်စ့ၢ်ကီးဝဲ န့ၣ် လီၤ. တကးဒံးဘၣ်, ဖဲကစၢ်ခရံာ်ကတိၤတၢ် ဒီးပှၤရှၤမရံ မုၣ် လၢစစီၤယၤကိာ်အထံပူၤ ကပၤအခါ, ပိာ်မုၣ် တဂၤအံၤမ့မ့ၢ်ဒၣ်လဲာ် ပိာ်မုၣ်, တကတီၢ်ဃီ ပှၤတၢ်ဒဲးဘးဖိတဂၤ, ဘၣ်ဆၣ် လၢကစၢ်ခရံာ် အမဲာ်ချံ အတၢ် ထံၣ်အပူၤန့ၣ် ပိာ်မုၣ်တဂၤအံၤ မ့ၢ်ဝဲဒၣ် သိလၢအဟါမၢ်န့ၣ်လီၤ. ဒ်န့ၣ်အသိး ဖဲပိာ်မုၣ်တဂၤ ဘၣ်တၢ်ဖီၣ်န့ၢ်အီၤဖဲ အမၤကမၣ်မုၣ်ကမၣ်ခွါအခါ ကစၢ်ခရံာ် သမၢဝဲလၢ ကစံၣ်ညီၣ်ပိာ်မုၣ် တဂၤ အံၤန့ၣ်လီၤ. ဖဲကစၢ်ခရံာ်ဆ့ၣ်နီၤအီၣ်တၢ် လၢ ဖၤရံၤရှဲတဂၤအဟံၣ်ပူၤ အခါစ့ၢ်ကီး အဝဲပျဲ ပှၤဃဲသဲ မုၣ်တဂၤလၢ ကထွါန့ၢ်အခီၣ် ဒီး နၢမူအခီၣ်န့ၣ်လီၤ. အဝဲတူၢ်လိာ် ပိာ်မုၣ်တဂၤ အံၤအတၢ်မၤ တကးဘၣ် စံးဘၣ်ပိာ်မုၣ်န့ၣ်လၢ အတၢ်ဒဲးဘးဘၣ် တၢ်ပျၢ်ကွံာ်အီၤလံန့ၣ်လီၤ. ဘၣ်တဘၣ် ကစၢ်ခရံာ် ကမ့ၢ်ပှၤအဆိကတၢၢ်တဂၤလၢ အကတိၤတၢ်ဒီး ပိာ်မုၣ်တဂၤအံၤ လၢတၢ်ပာ်ကဲအပူၤ ဖဲပိာ်ခွါ အဂၤတဖၣ်သူဝဲဒၣ် ပိာ်မုၣ်တဂၤအံၤဒ် တၢ်ပီးတၢ်လီတခါအသိး အဆၢကတီၢ် န့ၣ်လီၤ. (လူၤကၣ် ၈း၁ ဒီးဆူညါ, မၢ်ကူး ၁၅း၁၄, ယိၤဟၣ် ၈း၁ ဒီးဆူညါ, လူၤကၣ် ရး၃၆ ဒီးဆူညါ).
တၢ်မၤအသးအံၤ ပကထံၣ်ဘၣ်လၢ ကစၢ်ခရံာ်တူၢ်လိာ် ပိာ်မုၣ်လၢအမ့ၢ် ပှၤတၢ်ဒဲးဘးဖိတဖၣ် လၢပှၤဂီၢ်မုၢ်တဖၣ် အမဲာ်ညါ န့ၣ်လီၤ. အစိၤအဆၢကတီၢ်ဖဲန့ၣ်, ပှၤယူဒၤဖိပိာ်ခွါတဖၣ် တတဲတၢ်ဒီး အမါမ့ၢ်ဂ့ၤ အဖိမုၣ်မ့ၢ်ဂ့ၤ လၢပှၤမဲာ်ခိၣ်မဲာ်ညါဘၣ်. တကးဒံးဘၣ် ယူဒၤအတၢ်သိၣ်တၢ်သီစ့ၢ်ကီး တၢ်တသိၣ်လိ ပိာ်မုၣ်တဖၣ် ဘၣ်. ဘၣ်ဆၣ် ကစၢ်ခရံာ်မၤဟးဂီၤတၢ်ဘျၢတဖၣ်အံၤန့ၣ်လီၤ. ဖဲနီၢ်မၤရံ လၢဘ့ၤသနံ တဂၤဆ့ၣ်နီၤ ဒီးဒိကနၣ် အတၢ်စံးတၢ်ကတိၤအဆၢကတီၢ်, ကစၢ် ခရံာ်စံးဝဲလၢ ပိာ်မုၣ်အံၤ မၤတၢ်လၢ အဘၣ်တခါ န့ၣ်လီၤ. တကးဒံးဘၣ် ကစၢ်ခရံာ်ပာ်လၤပာ်ကပီၤ နီၢ်မၤရံ အဂၤတဂၤ, မ့ၢ်လၢပိာ်မုၣ်တဂၤအံၤ မ့ၢ်ပိာ်မုၣ်လၢ ထံၣ်ကစၢ်ခရံာ်အဆိကတၢၢ် ဖဲကစၢ်ခရံာ်ဂဲၤဆၢထၢၣ် သမူထီၣ်က့ၤဝံၤအလီၢ်ခံန့ၣ်လီၤ. ကစၢ်ခရံာ်ဒုးအိၣ်ထီၣ် ကဒါက့ၤပိာ်မုၣ်တဖၣ် အသူးအသံၣ်လၢ အလီၤမၢ်ကွံာ် ဖဲတၢ်ဒဲးဘးနုာ်လီၤဆူ ဟီၣ်ခိၣ်ချၢအခါ တကးဒံးဘၣ် တူၢ်လိာ် ပိာ်မုၣ်တဖၣ် လၢအဘီအမုၢ်အပူၤ ဖဲပိာ်မုၣ်ဒီးပိာ်ခွါ တၢ်ထဲသိးတုၤသိးအိၣ်ဝဲဒၣ် အလီၢ်န့ၣ်လီၤ.
စီၤပီလူးအတၢ်ကွဲးဘၣ်ဃးတၢ်ထဲသိးတုၤသိး
စီၤပီလူးစံးဝဲဒၣ် "ပှၤယူဒၤဖိတအိၣ်, ပှၤဟ့းလ့ၣ်ဖိတအိၣ်, ပှၤကုၢ်ဖိတအိၣ်, ပှၤသဘျ့ဖိတအိၣ်, ပှၤပိာ်မုၣ်တအိၣ်, ပှၤပိာ်ခွါတအိၣ်ဘၣ်. အဂ့ၢ်ဒ်အံၤ, သုမ့ၢ်တၢ်တမံၤဃီခဲလၢာ် လၢယ့ၣ်ရှူးခရံာ် အပူၤလီၤ" (ကလၤတံ ၃း၂၈). တၢ်လၢစီၤပီလူးအဲၣ်ဒိးစံးဝဲန့ၣ် ဖဲပဆၢထၢၣ်လၢ ကစၢ်ယွၤအမဲာ် ညါအဆၢကတီၢ် ပမ့ၢ်တၢ်တမံၤဃီ ခဲလၢာ်လၢ ခရံာ်အပူၤလီၤ. ပဘၣ်တၢ်ပာ်တီပာ်လိၤပှၤခီဖျိ တၢ်နာ်တမံၤဧိၤ န့ၣ်လီၤ. ဒီးပှၤတဂၤလၢ်လၢ်လၢ အစူၢ်က့ၤနာ်က့ၤခရံာ်န့ၣ် မ့ၢ်ဝဲဒၣ်ယွၤအဖိခဲလၢာ် န့ၣ်လီၤ. လၢတၢ်န့ၣ်အဃိ, လၢခရံာ်အပူၤန့ၣ် ပိာ်မုၣ်ပိာ်ခွါ တၢ်တထဲသိးတုၤသိး အိၣ်ဝဲဒၣ်တသ့ဘၣ်. အဂ့ၢ်ဒ်အံၤ, လၢကစၢ်ယွၤအမဲာ်ညါန့ၣ် ပိာ်မုၣ်တအိၣ် ပိာ်ခွါတအိၣ်ဘၣ်. ပှၤခဲလၢာ်မ့ၢ်တၢ်ဒ်သိးသိး လၢခရံာ်အပူၤန့ၣ်လီၤ.
ပိာ်မုၣ်ဒီးပိာ်ခွါ အတၢ်ထဲသိးတုၤသိး လၢ အဟါမၢ်ကွံာ်ဖဲ တၢ်ဒဲးဘးနုာ်လီၤဆူ ဟီၣ်ခိၣ်ချၢအခါ အံၤ ဘၣ်တၢ်ဒုးအိၣ်ထီၣ်ကဒါက့ၤအီၤ ခီဖျိ ကစၢ်ခရံာ် အတၢ်အုၣ်က့ၤခီၣ်က့ၤအဃိန့ၣ်လီၤ. လၢတၢ် န့ၣ်အဃိ, လၢကစၢ်ယွၤအမဲာ်ညါန့ၣ် ပိာ်မုၣ်ဒီးပိာ်ခွါ အလုၢ်အပှ့ၤ အိၣ်ထဲသိးလိာ်အသးလီၤ. အဂ့ၢ်ဒ်အံၤ, ပိာ်ခွါ ဒီးပိာ်မုၣ်ခံဂၤလၢာ် ဘၣ်တၢ်တ့လီၤအီၤ ဒ်ယွၤအက့ၢ်အဂီၤဒ်သိးသိး, ဘၣ်တၢ်ပာ်တီပာ်လိၤ အီၤ ဒ်သိးသိး ခီဖျိလၢတၢ်နာ်အဃိ, ဒီး ဘၣ်တၢ်မၤပှဲၤ အဝဲသ့ၣ်လၢသးစီဆှံ တမံၤဃီဒ်သိးသိးန့ၣ်လီၤ (၁ ပ့းတရူး ၃းရ).
ပိာ်မုၣ်ဒီးပိာ်ခွါ အတၢ်မၤပှဲၤန့ၢ်လိာ်အသး
ပိာ်မုၣ်ဒီးပိာ်ခွါ မ့မ့ၢ်တၢ်ဒ်သိးသိးဘၣ်ဆၣ် တၢ်တလီၤဂာ်လိာ်သး တဖၣ်အိၣ်ဝဲဒၣ်န့ၣ်လီၤ. ပလီၤဆီလိာ် ပသးကဒဲကဒဲ ဒီးပတၢ်လီၤဆီအံၤ မ့ၢ်ဒ်သိးကမၤပှဲၤ န့ၢ်လိာ်သးကဒဲကဒဲအဂီၢ်န့ၣ်လီၤ. ဒီးတၢ်လီၤဆီလိာ် သးအံၤ ပကထံၣ်န့ၢ်ဖဲ ၁ မိၤရှ့ အဆၢဒိၣ် ၂ အပူၤလၢအစံးဝဲ -
ဒီးယွၤစံးဝဲ "ပှၤကညီ အိၣ်တဂၤဃီတဂ့ၤဘၣ် ယကတ့န့ၢ်အီၤလၢ တၢ်မၤစၢၤလၢအကြၢးဒီးအီၤ လီၤ." ဒီးကစၢ်ယွၤတ့လီၤ ကယဲၢ်ဆၣ်ဧိၤကီၢ်ဧိၤလၢပှၢ်လၢ်ကျါ, ဒီးကယဲၢ်ထိၣ်ဧိၤ လံၣ်ဧိၤလၢ တၢ်ဖးဖီ လၢဟီၣ်ခိၣ်ကိးမံၤဒဲး, ဒီးဒုးဟဲဝဲဆူ ပှၤကညီအအိၣ် ဒ်သိးအကထံၣ်ဝဲလၢ အဝဲဒၣ်ကယုၢ်ဝဲအမံၤ ဒ်လဲၣ်ဒ်လဲၣ် န့ၣ်လီၤ. ဒီးဖဲဒၣ် ပှၤကညီယုၢ် တၢ်အသးအမံၤန့ၣ် မ့ၢ်အမံၤလီၤ. ဒီးပှၤကညီယုၢ် ကယဲၢ်ဆၣ် ဧိၤကီၢ်ဧိၤအဒၢ, ဒီးထိၣ်ဧိၤလံၣ်ဧိၤလၢတၢ်ဖးဖီ, ဒီးကယဲၢ်ဆၣ်ဧိၤကီၢ်ဧိၤလၢ ပှၢ်လၢ်ကျါကိးကလုာ်ဒဲး အမံၤလီၤ. မ့မ့ၢ်လၢပှၤကညီအဂီၢ်န့ၣ် တၢ်မၤစၢၤ ကြၢးဒီးအီၤန့ၣ် တၢ်တထံၣ်န့ၢ် ဘၣ်ဝဲဘၣ်. ဒီးကစၢ်ယွၤဒုးလီၤဘၣ် တၢ်မံသပ့ၤ လၢပှၤကညီ အလိၤ, ဒီးအဝဲဒၣ် မံသပ့ၤ, ဒီးထဲးထီၣ်န့ၢ်ဝဲ အဂုာ်ဃံ တဘ့ၣ်, ဒီးမၤမံထီၣ်က့ၤဝဲ အလီၢ်လၢအညၣ်လီၤ. ဒီးတၢ်ဂုာ်ဃံလၢအထဲးထီၣ်န့ၢ်ဝဲလၢ ပိာ်ခွါအလိၤန့ၣ် ကစၢ်ယွၤတ့အီၤလၢပိာ်မုၣ်, ဒီးဆှၢအီၤဆူ ပိာ်ခွါအအိၣ်လီၤ (၁ မိၤရှ့ ၂း၁၈-၂၂).လၢတၢ်တ့လီၤပာ်လီၤ လၢ ၁ မိၤရှ့ အဆၢဒိၣ် ၂ အပူၤအံၤန့ၣ် ပကထံၣ်ဘၣ်လၢ ကစၢ်ယွၤမ့တ့လီၤ ပိာ်မုၣ်ဒီးပိာ်ခွါ ဒ်သိးသိးဘၣ်ဆၣ် အဝဲတ့လီၤဝဲ လီၤဆီလိာ်အသးန့ၣ်လီၤ. လၢအဆၢဒိၣ်တၢ အပူၤ ပကထံၣ်ဘၣ်လၢ ပိာ်မုၣ်ဒီးပိာ်ခွါန့ၣ် ဘၣ်တၢ်တ့လီၤအီၤလၢယွၤအဂီၤ, ဒီးလၢ အဆၢဒိၣ်ခံ အပူၤန့ၣ် ပကထံၣ်ဘၣ်လၢ ပိာ်မုၣ်ဒီးပိာ်ခွါန့ၣ် ဘၣ်ထွဲလိာ်အသးန့ၣ်လီၤ. လၢအဆၢဒိၣ်တၢအပူၤ ပကထံၣ် ဘၣ် ပိာ်မုၣ်ဒီးပိာ်ခွါ အတၢ်ထဲသိးတုၤသိး, ဒီးလၢ အဆၢဒိၣ်ခံအပူၤ ပကထံၣ်ဘၣ် ပိာ်မုၣ်ဒီးပိာ်ခွါ အတၢ်မၤပှဲၤ န့ၢ်လိာ်အသးန့ၣ်လီၤ.
မ့ၢ်လၢ ပိာ်မုၣ်ဒီးပိာ်ခွါ မ့ၢ်တၢ်ဒ်သိးလိာ်အသး (ခီဖျိတၢ်တ့လီၤပာ်လီၤတၢ် ဒီး လၢခရံာ်အပူၤ) အဃိ တၢ်သံကွၢ်တကြၢးအိၣ်ထီၣ်ဝဲဒၣ် လၢ မ့ၢ်မတဂၤဒိၣ်န့ၢ် မတဂၤ န့ၣ်လဲၣ်ဘၣ်. မ့ၢ်လၢပိာ်ခွါ ဒီးပိာ်မုၣ် ဘၣ်တၢ်တ့လီၤအီၤ ဒ်သိးသိးအဃိ အဝဲသ့ၣ်ခံဂၤလၢာ် ကဘၣ်ပာ်ကဲလိာ်အသး, ကဘၣ်အဲၣ်လိာ်အသး, ဒီးကဘၣ်မၤစၢၤလိာ်အသး ကဒဲကဒဲန့ၣ်လီၤ. မ့ၢ်လၢပိာ်ခွါဒီးပိာ်မုၣ် ဘၣ်တၢ်တ့လီၤအီၤလၢ ကမၤပှဲၤ န့ၢ်လိာ်အသး ကဒဲကဒဲအဃိ, အဝဲသ့ၣ်ခံဂၤလၢာ် ကဘၣ်သ့ၣ်ညါ အတၢ်လီၤဆီတဖၣ်, ဒီးတဘၣ်မၤ နၢၤလိာ်သးလၢ အတၢ်လီၤဆီအဃိဘၣ်.
မဲးသယူ ဟဲနရံၣ် အတၢ်ကွဲးတခါ အပူၤ ကွဲးဖျါထီၣ်ဝဲလၢ နီၢ်အံၣ်အုန့ၣ် တဘၣ်တၢ်တ့လီၤအီၤလၢစီၤအၤဒၣ် အခိၣ်ဃံ ဒ်သိးအကဒိၣ်စိလၢစီၤအၤဒၣ် အဖီခိၣ်ဘၣ်. တဘၣ်တၢ်တ့လီၤအီၤ လၢစီၤအၤဒၣ်အခီၣ်ဃံ ဒ်သိးစီၤအၤဒၣ် ကဒိၣ်စိလၢ အဝဲအဖီခိၣ် ဘၣ်. မ့မ့ၢ်တခီ ဘၣ်တၢ်တ့လီၤအီၤလၢစီၤအၤဒၣ်အဂုာ်ဃံ မ့ၢ်ဒ်သိး အကထဲသိးတုၤသိးလိာ်အသး, လၢပိာ်ခွါ အစုဒုၣ်ဖီလာ် မ့ၢ်ဒ်သိး ကကဟုကယာ်အီၤအဂီၢ်, ဒီး ဘူးဒီးပိာ်ခွါ အသး ဒ်သိး ကအဲၣ်အီၤ အဂီၢ်န့ၣ်လီၤ. ဘံရှီးလၢဖဲရံး တဂၤစ့ၢ်ကီးကွဲးဝဲဒၣ် နီၢ်အံၣ်အု န့ၣ် တဘၣ်တၢ်ဟံးန့ၢ်အီၤလၢ စီၤအၤဒၣ် အခီၣ် ဒ်သိးအကကဲထီၣ် စီၤအၤဒၣ် အကုၢ်အဂီၢ်ဘၣ်. တဘၣ်တၢ်ဟံးန့ၢ်စ့ၢ်ကီးအီၤလၢစီၤအၤဒၣ် အခိၣ်ဒ်သိးအကကဲထီၣ်စီၤအၤဒၣ်အကစၢ်ဘၣ်. မ့မ့ၢ်တခီ ဘၣ်တၢ်ဟံးန့ၢ်အီၤလၢစီၤအၤဒၣ်အကပၤ ဒ်သိးအကကဲထီၣ်စီၤအၤဒၣ်အတံၤသကိးအဂီၢ်န့ၣ်လီၤ. (Leslie F. Church (ed.), Matthew Henry’s Commentary (London: Marshall, Morgan & Scott, 1960), p. 7). အဃိ ပဝဲလၢအမ့ၢ် ပိာ်ခွါတဖၣ် ပကဘၣ်သ့ၣ်ညါ ကစၢ်ယွၤအတၢ်ဟ့ၣ်ပှၤလၢအမ့ၢ်ပိာ်မုၣ်တဖၣ် ဒ်သိးပကသူၣ်ထီၣ်ဟံၣ်ဖိ ဃီဖိအတၢ် အိၣ်မူလၢအမုာ်ဝဲပၢၤဝဲတဖၣ် လၢအအိၣ်ဒီး တၢ်နၢ်ပၢၢ်လိာ်သးကဒဲကဒဲ ဒီး တၢ်အဲၣ်တၢ်ကွံ န့ၣ်လီၤ.
မူဒါတၢ်ဖံးတၢ်မၤတဖၣ်
စီၤပီလူးစံးဝဲဒၣ် "ဝၤမ့ၢ်မါအခိၣ်" (အ့ဖ့းစူး ၅း၂၃) န့ၣ်လီၤ. စီၤပီလူးကွဲးစ့ၢ်ကီးဝဲ "ကယဲၢ်ပိာ်ခွါ တဂၤ လၢ်လၢ်အခိၣ်မ့ၢ်ခရံာ်, ဒီးပိာ်မုၣ် အခိၣ်မ့ၢ်ပိာ်ခွါ, ဒီးခရံာ်အခိၣ်မ့ၢ်ယွၤလီၤ" (၁ ကရံၣ်သူး ၁၁း၃). ပမ့ကွၢ် တၢ်ကွဲးလၢစီၤပီလူးကွဲးဝဲအံၤ ပကဆိကမိၣ်လၢ ပိာ်မုၣ်ဒီးပိာ်ခွါ တၢ်ထဲသိးတုၤသိး တအိၣ်ဘၣ်န့ၣ်လီၤ. လၢကစံးဆၢ တၢ်ဂ့ၢ်အံၤ အဂီၢ်ပှၤအိၣ်ဝဲဒၣ် သၢဖု လၢအစံးဘၣ်ဃးဒီး ပိာ်ခွါ အတၢ်ကဲတၢ်အခိၣ်လၢ ပိာ်မုၣ်အဖီခိၣ် န့ၣ်လီၤ. ပှၤအခီၣ် ထံးတဖု ဟံးန့ၢ်ဝဲ တၢ်ဂ့ၢ် အံၤကျၢၤမူဆှု န့ၣ်လီၤ. ပှၤခံဖုတဖု တခီ သမၢဝဲတၢ်ဂ့ၢ်အံၤ မ့ၢ်လၢ အထံၣ်ဝဲလၢ အမ့ၢ်တၢ်ထဲသိးတုၤသိး တအိၣ်ဘၣ်န့ၣ်လီၤ. မ့မ့ၢ်ပှၤသၢဖုတ ဖုတခီ စံးဝဲဒၣ်လၢ တၢ်ကဲခိၣ်န့ၣ် မ့ၢ်ဒ်သိးကမၤဘၣ်ဂီၢ်က့ၤ တၢ်အဂီၢ်, တမ့ၢ်လၢ အကမၤဟးဂီၤတၢ်ထဲ သိးတုၤသိးလၢပိာ်မုၣ်ဒီးပိာ်ခွါ အဘၢၣ်စၢၤဘၣ် န့ၣ်လီၤ.
တၢ်အခိၣ်လၢအသူစိသူကမီၤ
လၢပှၤသၢဖုအံၤအကျါ ပှၤအခီၣ်ထံးကတၢၢ်တဖု န့ၣ်ပကိးအီၤသ့လၢ ပှၤတၢ်ဟဲလီၤစၢၤလီၤသွဲၣ် ဖိတဖၣ်န့ၣ်လီၤ. ပှၤတဖုအံၤစံးဝဲဒၣ်လၢ "တၢ်အခိၣ်" န့ၣ် မ့ၢ်တၢ်တမံၤဃီဒီး "ကစၢ်" မ့ၢ်လၢ ပိာ်ခွါ မ့ၢ်ဝဲဒၣ်ပိာ်မုၣ်အခိၣ် ဒ်ခရံာ်မ့ၢ် တၢ်အိၣ်ဖှိၣ်အခိၣ်အသိး န့ၣ်လီၤ. ပှၤတဖုအံၤဟံးန့ၢ်စီၤပီလူးအတၢ်ကတိၤ လိၤလိၤဖဲအစံးဝဲ ပိာ်မုၣ်တဘၣ်ကတိၤတၢ်လၢ တၢ်အိၣ်ဖှိၣ်အပူၤဘၣ်, ဒီးတဘၣ်သိၣ်လိ ပိာ်ခွါစ့ၢ်ကီးဘၣ်, ကဘၣ်အိၣ်ဘှီၣ်ကလာ် ဒီး ကဘၣ်အိၣ်လၢ ပိာ်ခွါအဖီလာ်န့ၣ်လီၤ. အဝဲသ့ၣ်စံးလၢ ပိာ်မုၣ်တဖၣ် မ့မၤတၢ်လၢယွၤအဂီၢ်ဘၣ်ဆၣ် တၢ်တီခိၣ်ရိာ်မဲ ဒီးတၢ်ဆၢတဲာ်အတၢ်မၤလၢ တၢ်အိၣ်ဖှိၣ်အပူၤမ့ၢ်ဂ့ၤ ဒီးလၢဟံၣ်ပူၤဃီပူၤမ့ၢ်ဂ့ၤ ကဘၣ်မ့ၢ်ဝဲဒၣ်ပိာ်ခွါ အမူအဒါ န့ၣ်လီၤ.တၢ်သမၢပိာ်ခွါ အတၢ်ကဲခိၣ်
ပှၤတဖုအံၤ မ့ၢ်ပှၤလၢအသမၢ တၢ်ဂ့ၢ်အံၤဆူၣ်ဆူၣ်ကလဲာ် န့ၣ်လီၤ. လၢစီၤပီလူး အတၢ်ကွဲးအပူၤန့ၣ် ပှၤတဖုအံၤပာ်ဖျါထီၣ်ဝဲဒၣ်လၢ ၁. ဘၣ်တဘၣ် အတၢ်ကွဲးန့ၣ်ကကမၣ်, ၂. ဘၣ်တဘၣ် အတၢ်ကွဲးန့ၣ် ပနၢ် ပၢၢ်အီၤတညီဘၣ်, ၃. ဘၣ်တဘၣ် အတၢ်ကွဲးန့ၣ် ကဒိးသန့ၤထီၣ်အသး လၢပှၤတကလုာ် အတၢ်ဆဲးတၢ်လၤ, ဒီး ၄. ဘၣ်တဘၣ် အတၢ်ကွဲးန့ၣ် ကဒိးသန့ၤထီၣ် အသးလၢ တၢ်အိၣ်အသး အဖီခိၣ်န့ၣ်လီၤ.မ့ၢ်စီၤပီလူးအတၢ်သိၣ်လိကမၣ်တခီဧါ
ပှၤတဖုအံၤစံးဝဲဒၣ်လၢ စီၤပီလူးအတၢ်ကွဲးန့ၣ် ကမၣ်ဝဲဒၣ်န့ၣ်လီၤ. မ့ၢ်လၢစီၤပီလူး အနီၢ်ကစၢ်ဒၣ်ဝဲ တသ့ၣ်ညါဝဲလီၤတံၢ်လၢ လၢခရံာ်အပူၤန့ၣ် ပိာ်မုၣ်တအိၣ် ပိာ်ခွါ တအိၣ်ဘၣ်န့ၣ်လီၤ. စီၤပီလူးတသ့ၣ် ညါအကစၢ်ဒၣ်ဝဲ အတၢ်ဆိကမိၣ်ဘၣ်. လၢတၢ်န့ၣ်အဃိ ပကြၢး ဃုထၢခရံာ်ဖိ အတၢ်သဘျ့ အါန့ၢ် ဒံး စီၤပီလူးအတၢ်ကွဲး တဖၣ်န့ၣ်လီၤ.မ့ၢ်စီၤပီလူးအတၢ်သိၣ်လိပနၢ်ပၢၢ်အီၤတညီဘၣ်တခီဧါ
တၢ်ဂ့ၢ်ခံခါတခါ လၢတၢ်သမၢစီၤပီလူး အတၢ်ကွဲးန့ၣ် မ့ၢ်ဝဲ အတၢ်ကွဲးအံၤ ပနၢ်ပၢၢ်အီၤတညီဘၣ် အဃိ တကဲထီၣ်တၢ်မၤစၢၤလၢ ပဝဲပှၤခရံာ်ဖိတဖၣ်အဂီၢ်ဘၣ် န့ၣ်လီၤ. မ့ၢ်လၢပှၤလၢအသမၢ တၢ်တဖၣ်စံးဝဲ လၢ ပိာ်မုၣ်တဖၣ်န့ၣ် ဘၣ်တၢ်အုၣ်က့ၤခီၣ်က့ၤအီၤ ဒ်သိးသိး ဒီးပိာ်ခွါတဖၣ် အဃိ အဝဲသ့ၣ်အိၣ်ဒီး တၢ်ခွဲး တၢ်ယာ်လၢတၢ်မၤ ကစၢ်ယွၤအတၢ်မၤအပူၤ ဒ်သိး ဒီးပိာ်ခွါတဖၣ်န့ၣ်လီၤ. လၢတၢ်န့ၣ်အဃိ အဝဲသ့ၣ်ထုးကွံာ်ဝဲ တၢ်ဂ့ၢ်လၢအဘၣ်ဃး 'ဝၤမ့ၢ်မါအခိၣ်' ဖဲအမၤလိစီၤပီလူး အလံာ်ပရၢတဖၣ် အခါန့ၣ်လီၤ.မ့ၢ်စီၤပီလူးအတၢ်သိၣ်လိ ဒိးသန့ၤထီၣ်အသးလၢ ပှၤတကလုာ် အတၢ်ဆဲးတၢ်လၤ တခီဧါ
စီၤပီလူးအတၢ်ကွဲး မ့တကမၣ်ဒီး မ့မ့ၢ်တၢ်လၢပနၢ်ပၢၢ်အီၤညီန့ၣ် မ့ၢ်စီၤပီလူးအတၢ်ကွဲး ဒိးသန့ၤထီၣ် အသးလၢပှၤတကလုာ် အတၢ်ဆဲးတၢ်လၤ တခီဧါ. ပတဲသ့လၢ တၢ်လၢစီၤပီလူးကွဲးတဖၣ် မ့ၢ်ဝဲ လၢစိၤ ဆၢကတီၢ်ဖဲ စီပီလူးအိၣ်မူဒံး ဝဲအခါ အဂီၢ် ဒီး တမ့ၢ်လၢပစိၤ ပဆၢကတီၢ်အခဲအံၤ အဂီၢ်ဘၣ်န့ၣ်ဧါ. ပမ့စံးဒ်န့ၣ်ဒီး လံာ်ပရၢ လၢပှၤတၢ်မၢဖိကွဲးဝဲ တဖၣ် မ့မ့ၢ် ဝဲလၢစိၤဆၢကတီၢ်ဖဲ အဝဲသ့ၣ်တဖၣ် အိၣ်မူ ဒံးဝဲအခါအဂီၢ်ဒီး အဝဲသ့ၣ်အတၢ်ကွဲး တဖၣ် တကဲဘျုးလၢပဂီၢ်ဘၣ် ဒီး တအိၣ်ဒီးတၢ်စိ တၢ်ကမီၤလၢ ပဖီခိၣ်စ့ၢ်ကီးဘၣ်. ပတအိၣ်ဒီးတၢ်သဘျ့ လၢပကဂ့ၢ်လိာ် ပှၤလၢအအိၣ်လၢ တၢယၤဖှိၣ်နံၣ် တဖၣ် အတၢ်ဆဲးတၢ်လၤဘၣ်, မ့မ့ၢ်တခီ တၢ်လၢပကဘၣ်မၤန့ၣ် မ့ၢ်ဝဲ ပကဘၣ်ပျဲ လံာ်စီဆှံအဆၢတဖၣ် ကကတိၤ တၢ်လၢပစိၤ ပဆၢကတီၢ်ခဲအံၤ ဒ်လဲၣ်န့ၣ်လီၤ.စီၤပီလူးအနီၢ်ကစၢ်ဒၣ်ဝဲ သ့ၣ်ညါ ကစၢ်ယွၤ အကလုၢ်ကထါ လီၤတံၢ်လီၤဆဲးန့ၣ်လီၤ. စီၤပီလူး စံးဝဲဒၣ် ဖဲ ၁ တံၤမသ့း ၂း၁၃ လၢ "အဂ့ၢ်ဒ်အံၤ, တၢ်တ့လီၤဆိစီၤအၤဒၣ်, ဒီးတ့က့ၤနီၢ်အံၣ်အု လၢခံလီၤ." ဒီးစံးစ့ၢ်ကီး ဝဲ ဖဲ ၁ ကရံၣ်သူး ၁၁း၈-၉ လၢ "အဂ့ၢ်ဒ်အံၤ, တမ့ၢ်ဘၣ်ပိာ်ခွါ အိၣ်ထီၣ်လၢပိာ်မုၣ် ဘၣ်. မ့ၢ်ပိာ်မုၣ် အိၣ်ထီၣ်လၢပိာ်ခွါလီၤ. အဂ့ၢ်ဒ်အံၤ, တမ့ၢ်စ့ၢ်ကီးဘၣ် ပိာ်ခွါ ဘၣ်တ့အသးလၢ ပိာ်မုၣ်အဂီၢ်ဘၣ်. မ့ၢ်ပိာ်မုၣ်ဘၣ်တ့အသးလၢပိာ်ခွါအဂီၢ်လီၤ." လၢတၢ်န့ၣ်အဃိ ဒ်လံာ်စီဆှံ စံးဝဲအသိး "ပိာ်ခွါ န့ၣ်အိၣ် ဖျဲၣ်လီၤလၢပိာ်မုၣ်" ဘၣ်ဆၣ် ပိာ်မုၣ်ဘၣ် တၢ်တ့လီၤအီၤလၢ ပိာ်ခွါအလီၢ်ခံ, ခီဖျိအသးလၢပိာ်ခွါ, ဒီး မ့ၢ်လၢပိာ်ခွါ အဂီၢ်လီၤ. ပလဲၤကပာ်ကွံာ် တၢ်ဂ့ၢ်အဝဲအံၤ တသ့ဘၣ်, မ့ၢ်လၢအမ့ၢ်တၢ်မ့ၢ်တၢ်တီအဃိ န့ၣ်လီၤ. နီၢ်အံၣ်အုတဘၣ်တၢ်တ့လီၤအီၤလၢ အကမ့ၢ်စီၤအၤဒၣ် အတၢ်ပီးတၢ်လီတခါအဂီၢ်ဘၣ်, မ့မ့ၢ်တခီ ဘၣ်တၢ်တ့လီၤအီၤဒ် အကမ့ၢ် စီၤအၤဒၣ် အတံၤသကိး လၢအကပၢဃုာ်တၢ်ဒီးအီၤ ဃုာ်ဒီး ကစၢ်ယွၤန့ၣ်လီၤ.
မ့ၢ်စီၤပီလူးအတၢ်သိၣ်လိ ဒိးသန့ၤထီၣ်အသးလၢ တၢ်အိၣ်သးတခီဧါ
တၢ်ဂ့ၢ်တခါအံၤ ဘူးကဒ်သိးလိာ်အသးဒီး တၢ်ဂ့ၢ်လၢအပူၤကွံာ် တခါန့ၣ်လီၤ. ဘၣ်ဆၣ်တၢ်လီၤဆီအိၣ် ဝဲဒၣ်တမံၤန့ၣ်လီၤ. တၢ်လီၤဆီတမံၤန့ၣ် ပကထံၣ်ဘၣ်အီၤလၢ ဖဲစီၤပီလူးစံးဝဲဒၣ် ပိာ်မုၣ်တဖၣ်ကဘၣ် အိၣ်ဘှီၣ်လၢ တၢ်အိၣ်ဖှိၣ်အပူၤ ဒီး တဘၣ်ကတိၤတၢ်ဘၣ် (၁ ကရံၣ်သူး ၁၄း၃၄-၃၅). ဖဲလံာ် ၁ တံၤမသ့း ၂း၁၂ စ့ၢ်ကီးစီၤပီလူးစံးဝဲလၢ ယတဟ့ၣ်တၢ်ခွဲးတၢ်ယာ်လၢ ပှၤပိာ်မုၣ်တဂၤ ကသိၣ်လိ ဒီး ကအိၣ်ဒီး တၢ်စိတၢ်ကမီၤလၢပိာ်ခွါ တဂၤ အဖီခိၣ်ဘၣ်, အဝဲကဘၣ်အိၣ်ဘှီၣ်လီၤ. တၢ်လၢစီၤပီလူး စံးဝဲအံၤ မ့ၢ်သပှၢ်ကတၢၢ် ဒိးသန့ၤထီၣ်အသးလၢ တၢ်အိၣ်အသးလၢ ဝ့ၢ်ကရံၣ်သူးအပူၤ ဒီး ဝ့ၢ်အ့ဖ့းစူး အပူၤ ဖဲစိၤဆၢကတီၢ် အခါဖဲန့ၣ်လီၤ. အစိၤအဆၢကတီၢ်ဖဲန့ၣ် လၢဝ့ၢ်ကရံၣ်သူးအပူၤ အိၣ်ဝဲ ဒီးတၢ်ဘူၣ်တၢ်ဘါတခါ, ဒီးဖဲတၢ်ဘါအဆၢကတီၢ် ပိာ်မုၣ်တဖၣ် ကိးပသူကိးပသီဝဲ န့ၣ်လီၤ. ပှၤခရံာ်ဖိလၢဝ့ၢ်ကရံၣ်သူး အပူၤတဖၣ် တချုးအကဲထီၣ် ပှၤခရံာ်ဖိအခါ အါတက့ၢ်မ့ၢ်ပှၤလၢ အပိာ်တၢ် ဘူၣ်တၢ်ဘါတခါန့ၣ် အခံန့ၣ်လီၤ. အဃိ စီၤပီလူးကွဲးဝဲတၢ်ဂ့ၢ်အံၤ မ့ၢ်ဒ်သိးပိာ်မုၣ် တဖၣ်ကအိၣ် ဒီးတၢ်ပၢၤ သူၣ်ပၢၤသးဖဲ တၢ်ဘူၣ်တၢ်ဘါ အဆၢကတီၢ်န့ၣ်လီၤ.မ့မ့ၢ်လၢဝ့ၢ်အ့ဖ့းစူး တခီ မ့ၢ်အဆၢကတီၢ်လၢ တၢ်သိၣ်ကမၣ်သီကမၣ်တၢ် အိၣ်ထီၣ် ဝဲဒၣ် န့ၣ်လီၤ. ပှၤသိၣ်ကမၣ်တၢ် သီကမၣ်တၢ် တဖၣ်စံးဝဲလၢ နီၢ်အံၣ်အု ဒိးန့ၢ်တၢ်သ့ၣ်ညါတၢ်ဂ့ၤဒီးတၢ်အၢ ဆိန့ၢ်ဒံး စီၤအၤဒၤ မ့ၢ်လၢအအီၣ်သ့ၣ်သၣ်ဆိန့ၢ်ဒံး စီၤအၤဒၣ်အဃိန့ၣ်လီၤ. လၢတၢ်န့ၣ်အဃိ နီၢ်အံၣ်အု အိၣ်ဒီး တၢ်ကူၣ်သ့လၢ အကသိၣ်လိစီၤအၤဒၣ် န့ၣ်လီၤ. လၢတၢ်န့ၣ်အဃိ ပိာ်မုၣ်အိၣ်ဝဲဒၣ် တနီၤလၢ အနာ်တၢ်ဂ့ၢ်အံၤ ဒီး စးထီၣ်ဟံးစိဟံးကမီၤ လၢပိာ်ခွါ အဖီခိၣ်န့ၣ်လီၤ. လၢစီၤပီလူးအတၢ် ကွဲးအပူၤ ပကထံၣ် "ပိာ်မုၣ်တဂၤ" လၢအဟံးစိဟံးကမီၤ လၢပိာ်ခွါ အဖီခိၣ်န့ၣ်လီၤ. တမ့ၢ်ပိာ်မုၣ်ခဲလၢာ် ခဲဆ့ဘၣ်.
စီၤပီလူး အတၢ်ကွဲးအံၤ မ့မ့ၢ်ဒၣ်ကယၢာ် တၢ်ကွဲးလၢ အဒိးသန့ၤထီၣ်အသးလၢ တၢ်အိၣ်သးအဖီခိၣ် ဘၣ်ဆၣ်, လၢစိၤဆၢကတီၢ်ခဲအံၤ လၢတၢ်အိၣ်သး တနီၤနီၤအဖီခိၣ် ပသူအီၤသ့ဝဲဒၣ်န့ၣ်လီၤ. လၢတၢ်ခဲလၢာ်အဖီခိၣ် ပစံးသ့လၢ လံာ်စီဆှံအသီတကတြူၢ်အံၤ မ့ဘၣ်တၢ်ကွဲးအီၤလၢတၢ်အိၣ်သး အဖီခိၣ် လၢတၢ်အိၣ်ဖှိၣ်လီၤလီၤဆီဆီ တဖၣ်အဂီၢ် ဘၣ်ဆၣ် တၢ်ကွဲးတဖၣ်အံၤ ကတိၤဒံးတၢ်လၢ ပစိၤပဆၢ ကတီၢ်အခဲအံၤန့ၣ်လီၤ.
တၢ်အခိၣ် အခီပညီ
ပကြၢးဒုးအိၣ်ထီၣ် လံာ်စီဆှံအတၢ်နၢ်ပၢၢ်ဘၣ်ဃး ပိာ်ခွါ အတၢ်ကဲခိၣ် လၢအပၣ်ဃုာ်ဒီး တၢ်ထဲသိးတုၤ သိးဖဲ တၢ်တ့လီၤပာ်လီၤတၢ်အဆၢကတီၢ် (၁ မိၤ ၁), တၢ်လူလီၤသးစီဆှံတမံၤဃီဖဲ ဘူၣ်ယဲၢ်ဆံ အဆၢကတီၢ် (မၤတၢ် ၂း၁၇ ဒီးဆူညါ), ဒီး တၢ်တမံၤဃီ လၢခရံာ်အပူၤ (ကလၤတံ ၃း၂၈) န့ၣ်လီၤ.
တၢ်အခိၣ်မ့ၢ်တၢ်အခီၣ်ထံးခီၣ်ဘိ
စီၤပီလူးစံးဝဲဒၣ် ပိာ်ခွါ မ့ၢ် ပိာ်မုၣ် အခီၣ်ထံးခီၣ်ဘိ မ့ၢ်လၢ ပိာ်ခွါ ဘၣ်တၢ်တ့လီၤအီၤလၢအဆိန့ၣ်လီၤ. အဃိ တၢ်အခိၣ် အခီပညီ တမ့ၢ် ပှၤလၢအပၢတၢ်ဘၣ်, မ့မ့ၢ်တခီမ့ၢ်ဝဲဒၣ် တၢ်အခီၣ်ထံးခီၣ်ဘိ န့ၣ်လီၤ.တၢ်အခိၣ်မ့ၢ်တၢ်စိတၢ်ကမီၤ
လၢလံာ်စီဆှံအသီ အပူၤန့ၣ် တၢ်အခိၣ် မ့ၢ်တၢ်စိတၢ်ကမီၤ တခါ ဖဲတၢ်ပာ်လီၤအသး လၢတၢ်အခိၣ် အဖီလာ်ကဘၣ်အိၣ်ဝဲ မ့ၢ်လၢ ကစၢ်ယွၤပာ်တၢ်ခဲလၢာ် လၢခရံာ်အဖီလာ် ဒီးပာ်လီၤအီၤလၢအကကဲ ထီၣ်တၢ်အခိၣ်လၢ တၢ်အိၣ်ဖှိၣ် အဖီခိၣ်အဃိန့ၣ်လီၤ (အ့ဖ့းစူး ၁း၂၂). ဘၣ်ဆၣ်, ပကဘၣ် ပလီၢ်ပသးလၢပသုတသူကမၣ် တၢ်စိတၢ်ကမီၤ တခါအံၤန့ၣ်လီၤ.တၢ်အခိၣ်မ့ၢ် မူဒါ
ပိာ်မုၣ်အခိၣ် မ့မ့ၢ်ပိာ်ခွါ ဒ်ခရံာ်အခိၣ်မ့ၢ်ယွၤအသိးန့ၣ် ပိာ်မုၣ်ဒီးပိာ်ခွါ ကဘၣ်မ့ၢ်တၢ်တမံၤဃီ ဒ် ခရံာ်မ့ၢ်တၢ်တမံၤဃီဒီးယွၤ အသိးန့ၣ်လီၤ. လၢအဂၤတကပၤန့ၣ် လၢအဘၣ်ဃးဒီး တၢ်တီခိၣ်ရိာ်မဲ န့ၣ် တၢ်အခိၣ်တမ့ၢ် တၢ်စိတၢ်ကမီၤဘၣ်, မ့မ့ၢ်တခီ မ့ၢ်ဝဲဒၣ် မူဒါ တခါန့ၣ်လီၤ. ဒ်ခရံာ်အံးထွဲကွၢ်ထွဲတၢ် အိၣ်ဖှိၣ် လၢအမ့ၢ်အနီၢ်ခိအသိး ပဝဲဒၣ်စ့ၢ်ကီး ပကဘၣ်အံးထွဲကွၢ်ထွဲ ပနီၢ်ခိစ့ၢ်ကီးန့ၣ်လီၤ.မူဒါ လၢတၢ်အဲၣ်လၢအဟ့ၣ်လီၤအသး
အ့းဖ့းစူး ၅း၂၃ စံးဝဲ "အဂ့ၢ်ဒ်အံၤ, ဝၤမ့ၢ်မါအခိၣ်, ဒ်ခရံာ်မ့ၢ်တၢ်အိၣ်ဖှိၣ်အခိၣ်အသိးန့ၣ်, ဒီးအဝဲဒၣ်န့ၣ် မ့ၢ်ပှၤအုၣ်က့ၤခီၣ်က့ၤပနီၢ်ခိတဂၤလီၤ." ခရံာ်မ့ၢ်တၢ်အိၣ်ဖှိၣ်အခိၣ် အခီပညီန့ၣ်မ့ၢ် ခရံာ်မ့ၢ်ပှၤအုၣ်က့ၤ ခီၣ်က့ၤတၢ်အိၣ်ဖှိၣ်န့ၣ်လီၤ. ခရံာ်အဲၣ် တၢ်အိၣ်ဖှိၣ်ဒ် အတလးမူးပိာ်မုၣ်အသိး ဟ့ၣ်လီၤအသးလၢအဂီၢ်, ဒုးစီဆှံထီၣ်အီၤ ဒ်သိးအကကဲထီၣ် တၢ်စီဆှံဒီးတသံၣ်သူမီၤကျာ် ဘၣ်လီၤ (အ့းဖ့းစူး ၅း၂၅-၂၇). လၢတၢ် န့ၣ် အဃိ ကစၢ်ခရံာ်ဒုးနဲၣ်ဖျါထီၣ် အတၢ်ကဲခိၣ်လၢတၢ်အိၣ်ဖှိၣ် အဖီခိၣ်ခီဖျိ အတၢ်အဲၣ်လၢအဟ့ၣ်လီၤ အသးလၢတၢ်အိၣ်ဖှိၣ် အဂီၢ်န့ၣ်လီၤ.မူဒါလၢတၢ်အံးထွဲကွၢ်ထွဲ လၢတအိၣ်ဒီးတၢ်အဲၣ်လီၤသး
အ့းဖ့းစူး ၅း၂၈-၃၀ စံးဝဲ "ဒ်န့ၣ်အသိး ပိာ်ခွါတဖၣ်ဂ့ၤအဲၣ်အမါဒၣ်ဝဲ, ဒ်အအဲၣ် အနီၢ်ခိဒၣ်ဝဲအသိး န့ၣ်လီၤ. ပှၤလၢအအဲၣ် အမါဒၣ်ဝဲန့ၣ် အဲၣ်အသးဒၣ်ဝဲလီၤ. အဂ့ၢ်ဒ်အံၤ, ပှၤလၢအသးဟ့အညၣ်ဒၣ်ဝဲ တအိၣ်ဘၣ် နီတဂၤဘၣ်. မ့ၢ်အလုၢ်ဝဲ, ဒီးအံးက့ၤကွၢ်က့ၤဝဲ, ဒ်ခရံာ်အံးက့ၤကွၢ်က့ၤ အတၢ်အိၣ်ဖှိၣ်အသိး န့ၣ်လီၤ. အဂ့ၢ်ဒ်အံၤ, ပမ့ၢ်အနီၢ်ခိ အဂီၤတဖၣ်လီၤ."ဒ်လံာ်စီဆှံတဆၢအံၤစံးဝဲအသိး ပိာ်ခွါ အတၢ်ကဲခိၣ်လၢပိာ်မုၣ် အဖီခိၣ် မ့ၢ်ဝဲဒၣ် မူဒါတခါ လၢအကအံး ထွဲကွၢ်ထွဲပိာ်မုၣ်အဂီၢ်န့ၣ်လီၤ. ပှၤတနီၤနီၤကစံးဝဲ လံာ်စီဆှံတဆၢအံၤမ့ၢ် ပိာ်မုၣ် လၢအအိၣ်ဒီး အဝၤ အဂီၢ်လီၤ. တမ့ၢ်ပိာ်မုၣ် လၢအအိၣ်သဘျ့အဂီၢ်ဘၣ်. ဖဲစီၤပီလူးကွဲးလံာ်အ့းဖ့းစူး အဆၢကတီၢ်န့ၣ် မ့ၢ်တၢ်ဆၢကတီၢ်လၢ ပိာ်မုၣ်လၢ အသဘျ့တဖၣ် ဘၣ်အိၣ်ဝဲဒၣ်လၢ အပၢ် အတၢ်အံးထွဲကွၢ်ထွဲအ ဖီလာ် ဒီးမ့မ့ၢ် ပိာ်မုၣ် လၢအအိၣ် ဒီး အဝၤတဖၣ်တခီ ဘၣ်အိၣ်ဝဲဒၣ်လၢ အဝၤအတၢ်အံးထွဲကွၢ်ထွဲ အဖီလာ်န့ၣ်လီၤ. ဒ်န့ၣ်အသိး လၢအစိၤအဆၢကတီၢ် အခဲအံၤစ့ၢ်ကီး တၢ်မၤအသးလၢ ပိာ်မုၣ် တနီၤတုၤ အဖျီအသးဝံၤန့ၣ် ထုးလီၤဖးအသးဒီးအမိၢ်အပၢ် ဒီးအိၣ်ဝဲဒၣ် ဒီးအဝၤလီၤလီၤဆီဆီလၢဟံၣ် အဂၤတဖျၢၣ်အပူၤလီၤ. ဒီးပိာ်မုၣ် အံၤမ့ထုးလီၤဖးအသးဒီး အမိၢ်အပၢ်ဘၣ်ဆၣ် ဘၣ်အိၣ်ဝဲဒၣ်ဒီးအဝၤ န့ၣ်လီၤ. လၢတၢ်န့ၣ်အဃိ အဝဲသ့ၣ်ခံဂၤ ကဘၣ်ဒိးသန့ၤထီၣ် အသးယၢ်ခီယၢ်ခီန့ၣ်လီၤ. ပိာ်မုၣ်ဒီးပိာ်ခွါ ခံဂၤလၢာ် ကဘၣ်ပာ်ကဲလိာ်အသး ယၢ်ခီယၢ်ခီ ဒီး ကဘၣ်အံးထွဲကွၢ်ထွဲလိာ်အသး ယၢ်ခီယၢ်ခီန့ၣ်လီၤ.
တၢ်အခိၣ်လၢအမ့ၢ်တၢ်ခ့တၢ်ပှၤ
လၢခရံာ်အပူၤန့ၣ် တၢ်အိၣ်ဖှိၣ် သရၣ် မ့ၢ်တၢ်အိၣ်ဖှိၣ်အခိၣ် ဒီးတၢ်အိၣ်ဖှိၣ်ဖိသ့ၣ်တဖၣ် ဘၣ်ဒိကနၣ် တၢ်အိၣ်ဖှိၣ်သရၣ် အကလုၢ်န့ၣ်လီၤ (၁ သ့းစၤလနံ ၅း၁၂, ဧ့ၤဘြံၤ ၁၃း၁၇). ဘၣ်ဆၣ် ကစၢ်ခရံာ်အ တၢ်မၤမိၢ်ပှၢ်တမ့ၢ် တၢ်အံၤဘၣ်. ကစၢ်ခရံာ် စံးကတိၤဝဲဘၣ်ဃး ဘီမုၢ်ခံခါ လၢအမ့ၢ်မူခိၣ် ဘီမုၢ် ဒီး ဟီၣ်ခိၣ်ဘီမုၢ်န့ၣ်လီၤ. ပှၤလၢအဒိၣ်စိဒိၣ်ကမီၤလၢ ဟီၣ်ခိၣ်အဘီအမုၢ်တဖၣ် မ့ၢ် ပှၤလၢတခီဘီမုၢ် အယွၤ ဟံးစိဟံးကမီၤလၢ အဝဲသ့ၣ်အဖီခိၣ်န့ၣ်လီၤ. ဘၣ်ဆၣ် ခရံာ်စံးဝဲဒၣ် သုတဘၣ်မ့ၢ်တၢ်ဒ်န့ၣ်အသိး တဂ့ၤ. ပှၤလၢအအဲၣ်ဒိးကဲတၢ်အခိၣ် န့ၣ် မ်အကဲလၢတၢ်ခ့တၢ်ပှၤတက့ၢ်. အဂ့ၢ်ဒ်အံၤ, ခရံာ်ဟဲလီၤဆူ ဟီၣ်ခိၣ်ချၢ မ့ၢ်ဒ်သိးအကမၤ တၢ်ခ့တၢ်ပှၤအတၢ်မၤန့ၣ်လီၤ (မၢ်ကူး ၁ဝး၄၂-၄၅).လၢတၢ်န့ၣ်အဃိ တၢ်အိၣ်ဖှိၣ် သရၣ်အတၢ်မၤစ့ၢ်ကီး ကဘၣ်မ့ၢ်တၢ်ခ့တၢ်ပှၤ အတၢ်မၤ ဒ်ခရံာ် ဒုးနဲၣ်ပှၤ တၢ်အဒိအတဲာ်အသိးန့ၣ်လီၤ. မ့မ့ၢ် ဒ်န့ၣ် ပိာ်မုၣ်တဖၣ်မီၤ မ့ၢ်အမၤဝဲတသ့ဘၣ်ဧါ. တၢ်လၢစီၤပီလူးအဲၣ်ဒိးစံးဝဲလၢ ၁ တံၤမသ့း ၂း၁၂ အပူၤန့ၣ် မ့ၢ်တၢ်တြီပိာ်မုၣ်လၢ အအဲၣ်ဒိးဒိၣ်စိဒိၣ် ကမီၤလၢပိာ်ခွါ အဖီခိၣ်န့ၣ်လီၤ. တမ့ၢ်အတြီပိာ်မုၣ်လၢ အကကဲထီၣ် တၢ်အခိၣ်ဘၣ်. တၢ်ဒိၣ်စိဒိၣ် ကမီၤလၢပိာ်ခွါ အဖီခိၣ် တမ့ၢ်ကစၢ်ယွၤအတၢ်တိာ် ဖဲအတ့လီၤပာ်လီၤ တၢ်အခါဘၣ်, တမ့ၢ်စ့ၢ်ကီး ယွၤအဘီအမုၢ်အသကဲးပဝး တခါစ့ၢ်ကီးဘၣ်. တၢ်လၢအရ့ ဒိၣ်န့ၣ် တဘၣ်မ့ၢ်တၢ်လီၢ်တၢ်လၤဘၣ်, မ့မ့ၢ်တခီ ကဘၣ်မ့ၢ် တၢ်လၢအဝဲသ့ၣ်မၤဝဲတဖၣ် မ့ၢ်အဒ်သိးလိာ်အသးဒီး ကစၢ်ခရံာ်အတၢ်သိၣ်လိ လၢအမ့ၢ် တၢ်အခိၣ်ကဘၣ်မၤ တၢ်ခ့တၢ်ပှၤအတၢ်မၤ ဧါ န့ၣ်လီၤ.
ကစၢ်ယွၤ မ့ဟ့ၣ် ပိာ်မုၣ် တဖၣ် တၤလၣ် လၢအကကဲတၢ်အခိၣ်, တကးဒံးဘၣ် ကစၢ်ယွၤမ့ကိး ပိာ်မုၣ်တဖၣ်လၢကသူတၤလၣ် လၢကစၢ်ယွၤဟ့ၣ်လီၤအဝဲသ့ၣ်န့ၣ် တၢ်အိၣ်ဖှိၣ် ကြၢးပာ်ပနီၣ် အဝဲသ့ၣ် အတၤလၣ်, ကြၢးဟ့ၣ်အဝဲသ့ၣ် တၢ်လီၢ်တၢ်လၤ, ဒီး ကြၢးပာ်စုအဝဲသ့ၣ် ဒ်သိး အဝဲသ့ၣ် ကသူတၤလၣ် အံၤလၢကစၢ်ယွၤအတၢ်ဖံးတၢ်မၤအပူၤန့ၣ်လီၤ. ကစၢ်ယွၤဘၣ်အသးလၢ ပှၤလၢအအိၣ် ဒီးအတၤလၣ် တဖၣ် ကသူအတၤလၣ် လၢတၢ်အိၣ်ဖှိၣ် အတၢ်ဒိၣ်ထီၣ်အဂီၢ်န့ၣ်လီၤ.
ဟံးန့ၢ်ဒီးကွဲးကျိာ်ထံတၢ်ကွဲးအံၤလၢ John Stott, Issues Facing Christians Today အပူၤန့ၣ်လီၤ.
0 Comments