သးစီဆှံ အိၣ်လၢပပူၤလီၤ န့ၣ်ပသ့ၣ်ညါအီၤဒ်လဲၣ်

လံာ်ယိၤဟၣ် ၁၇း၂၃ ကွဲးဖျါထီၣ် ကစၢ်ခရံာ်အတၢ်ထုကဖၣ် လၢ ပှၤနာ်တၢ်ဖိ တဖၣ်အခၢၣ်စး, စံး၀ဲဒၣ် "ဒ်သိးအဝဲသ့ၣ်ခဲလၢာ်ကမ့ၢ်တၢ်တမံၤဃီ, ပၢ်ဧၢ, ဒ်နအိၣ်လၢယပူၤ, ဒီးယအိၣ်လၢနပူၤအသိး, ဒ်သိးအဝဲသ့ၣ်ကမ့ၢ်တၢ်တမံၤဃီလၢပပူၤ, ဒ်သိးဟီၣ်ခိၣ်ကစူၢ်က့ၤနာ်က့ၤ လၢနမၢလီၤယၤလီၤ." ကစၢ်ခရံာ်အၢၣ်လီၤ စ့ၢ်ကီး လၢ လံာ်ယိၤဟၣ် ၁၄း၁၆ အပူၤလၢ သးစီဆှံ ကဟဲအိၣ်ဆိးလၢ ပှၤခရံာ်ဖိ အပူၤလၢ အစံး၀ဲ, "ဒီးယကဃ့တၢ်လၢပၢ်ဒီးကဟ့ၣ်သုလၢပှၤမၤစၢၤတၢ်လၢအဂၤတဂၤ ဒ်သိးအကအိၣ်ဒီးသုလီၤထူလီၤယိာ် လီၤ." အ၀ဲအံၤမ့ၢ် တၢ်အၢၣ်လီၤအီလီၤ လၢပှၤနာ်တၢ်ဖိ ကိးဂၤဒဲး အဂီၢ် န့ၣ်လီၤ. သးစီဆှံ ဟဲလီၤအိၣ်ဆိးဒီး ပှၤဖဲ ပပာ်လီၤပသးလၢပကစူၢ်နာ်အီၤ ဒီးအၢၣ်လီၤပသးလၢ ယွၤဒီး ပှၤကညီမဲာ်ညါ အခါ န့ၣ်လီၤ (ကွၢ် ယိၤဟၣ် ၇း၃၇-၃၉, ရိမ့ၤ ၈း၉, ၁ ကရံၣ်သူး ၂း၁၂, ၆း၁၉, ၁ ယိၤဟၣ် ၃း၂၄ တက့ၢ်). ၁ ကရံၣ်သူး ၃း၁၆ စံးဘၣ်ပှၤ, "သုမ့ၢ်ယွၤအတၢ်လုၢ်ဟံၣ်, ဒီးယွၤအသးအိၣ်ဝဲဆိးဝဲ လၢသုပူၤန့ၣ်, မ့ၢ်သုတသ့ၣ်ညါ ဘၣ်ဧါ."


သးစီဆှံ အတၢ်ဟဲအိၣ်ဆိးလၢ ပပူၤ အတၢ်တိာ်မ့ၢ်ဒ်သိး ကပၢၤ ပှၤနာ်တၢ်ဖိ တဂၤစုာ်စုာ် (၂ ကရံၣ်သူး ၅း၁၇, ကလၤတံ ၅း၁၆-၁၈, အ့းဖ့းစူး ၃း၁၆), ပၢဆှၢပှၤ (ယိၤဟၣ် ၁၆း၁၃, ရိမ့ၤ ၈း၁၄), သိၣ်လိပှၤ (၁ ယိၤဟၣ် ၂း၂၇), ဟ့ၣ်ပှၤတၢ်စိတၢ်ကမီၤ (မၤတၢ် ၁း၈), ဟ့ၣ်နီၤလီၤ ယွၤအတၢ်အဲၣ် ခီဖျိအီၤ (ရိမ့ၤ ၅း၅, ကလၤတံ ၅း၂၂), ဟ့ၣ်ဂံၢ် ဟ့ၣ်ဘါပှၤ (အ့းဖ့းစူး ၃း၁၆), ဒီးဟ့ၣ်ပှၤ တၢ်အုၣ်က့ၤခီၣ်က့ၤ န့ၣ်လီၤ (၁ ကရံၣ်သူး ၂း၁၀, ၁ ယိၤဟၣ် ၃း၂၄).

ပှၤလၢအပှဲၤဒီး သးစီဆှံန့ၣ် တၢ်မၤအသးဒီးအီၤဒ်လဲၣ်.

စီၤပီလူး စံးဘၣ် ပှၤအ့းဖ့းစူး ဖိတဖၣ်လၢ, "ဒီးအီမူၤသုသးလၢစပံးထံတဂ့ၤ. လၢအဝဲန့ၣ်အပူၤ,မ့ၢ်တၢ်လုၣ်ကိလုၣ်ကပာ်လီၤ. မ့မ့ၢ်အိၣ်လၢပှဲၤဒီးသးန့ၣ် တက့ၢ်." (အ့းဖ့းစူး ၅း၁၈). ကစၢ်ယွၤဟ့ၣ်လီၤပှၤ တၢ်ခွဲးတၢ်ယာ် လၢ ပကလၢပှဲၤဒီး သးစီဆှံ တပယူာ်ဃီ ဒ်သိးပကမၤ အတၢ်မၤလၢ တၢ်သးဆူၣ်နီၢ်နီၢ်ပူၤ အဂီၢ်န့ၣ်လီၤ. ပမ့ၢ်စးထီၣ်သူၣ်ထီၣ်ပတၢ် ရ့လိာ်သးဒီး ကစၢ်ယွၤ ခီဖျိ တၢ်တဲလီၤကျဲၤလီၤ ပတၢ်ဒဲးဘး (၁ ယိၤဟၣ် ၁း၉), ဒီး ဆီၣ်လီၤပသး လၢအဖီလာ်န့ၣ် (ရိမ့ၤ ၆း၁၃), ပကပှဲၤဒီး ယွၤအသးစီဆှံ ဒ် လံာ်စီဆှံ စံးဘၣ်ပှၤအသိးန့ၣ်လီၤ.

ပှၤခရံာ်ဖိအခဲအံၤ တနီၤ ဂုာ်ကျဲးစၢး ဃုန့ၢ် ပှၤလၢအပှဲၤဒီး သးစီဆှံတဂၤ တၢ်ပနီၣ်မၤသးဒီးအီၤ ဒ်လဲၣ်န့ၣ်လီၤ. အနီၢ်ကီၢ်န့ၣ်, လံာ်စီဆှံ တသိၣ်လိပှၤလၢ ပကဘၣ် မုၢ်လၢ် တၢ်တဖၣ်အံၤလၢ ပတၢ်အိၣ်မူလၢ အစိၤဆၢကတီၢ် ခဲအံၤန့ၣ်ဘၣ်. သးစီဆှံ အတၢ်အိၣ်ဆိးလၢပပူၤန့ၣ် မ့ၢ်ဒ်သိး ကဒုးသၣ်ထီၣ်ပှၤ သးအတၤသၣ် တဖၣ်န့ၣ်လီၤ (ကလၤတံ ၅း၂၂-၂၃). လံာ်မၤတၢ် တဲပှၤလၢ ကစၢ်ခရံာ်အတၢ်ဆှၢလီၤ သးစီဆှံန့ၣ် မ့ၢ်ဒ်သိး ကဟ့ၣ်ပှၤ တၢ်စိတၢ်ကမီၤလၢ ပကကဲထီၣ် ပှၤအုၣ်သးတဖၣ်န့ၣ်လီၤ (မၤတၢ် ၁း၈). တၢ်မၤအသးတဘျီ (တမ့ၢ်ထီဘိဘၣ်) ဖဲပှၤခရံာ်ဖိတဖၣ် လၢပှဲၤဒီး သးစီဆှံ န့ၣ်, တၢ်သူၣ်ထီၣ် ဟူး၀း၀ဲလီၤ (မၤတၢ် ၄း၃၁). တဘျီတခီၣ် အ၀ဲသ့ၣ်ကတိၤတၢ်လၢ တၢ်အပျ့ၤ တဖၣ်န့ၣ်လီၤ (မၤတၢ် ၁၀း၄၄-၄၆). ဘၣ်ဆၣ် ကိးဘျီဒဲးန့ၣ် တၢ်သးခုကစီၣ် ဘၣ်တၢ်စံၣ်တဲၤတဲလီၤအီၤ ဒီး ပှၤအါဂၤ ဒိးန့ၢ်ဘၣ် တၢ်အုၣ်က့ၤခီၣ်က့ၤ န့ၣ်လီၤ. တၢ်မၤအသးတဖၣ်လၢ လံာ်မၤတၢ်အပူၤအံၤ မ့ၢ်တၢ်ပနီၣ်လၢ အအိၣ်ဖျါလၢခိ ဒီး မ့ၢ်ကစၢ်ယွၤ အတၢ်ပီးတၢ်လီတခါ လၢကစၢ်ယွၤသူအီၤလၢ စိၤဆၢကတီၢ်အခါဖဲန့ၣ် ဒ်သိးကမၤလၢပှဲၤ အတၢ်တိာ်လၢ အမ့ၢ် တၢ်တဲ တၢ်သးခုကစီၣ် အဂီၢ်န့ၣ်လီၤ. တၢ်ပနီၣ်လၢ အအိၣ်ဖျါတဖၣ်အံၤ လီၤဂာ်ဒ်သိးဒီး တၢ်လီၤလး လၢ ပှၤခရံာ်ဖိလၢ လံာ်စီဆှံ အသီတကတြူၢ်တဖၣ် မၤ၀ဲ လၢအမ့ၢ် တၢ်ဒုးနဲၣ်ဖျါထီၣ် ကစၢ်ယွၤအတၢ်စိတၢ်ကမီၤ လၢတၢ်ကတိၤ တၢ်သးခုကစီၣ် အဂီၢ်န့ၣ်လီၤ. ဘၣ်ဆၣ် ဖဲကစၢ်ယွၤလီၣ်ဖျါထီၣ် န့ၢ်ပှၤ အကလုၢ်ကထါ လၢလၢပှဲၤပှဲၤ ခီဖျိ လံာ်စီဆှံ လၢအမ့ၢ် တၢ်ကစီၣ် လၢအအိၣ်ဒီးတၢ်စိတၢ်ကမီၤ အံၤန့ၣ်, တၢ်ပနီၣ် ဒီးတၢ်လီၤလးတဖၣ် ကတၢၢ်ကွံာ်၀ဲန့ၣ်လီၤ.