သိဖိအမါ (Wife of Lamb) (တၢ်မၤလိလံာ်တၢ်လီၣ်ဖျါ - အကူာ် ၈ ကတၢၢ်)

စီၤယိၤဟၣ်အတၢ်ထံၣ် လွံၢ်ခါတခါအပူၤ, အဝဲဘၣ်တၢ်စိာ်ထီၣ် အီၤဆူ ကစၢၢ်ထီၣ်ထီ တဖျၢၣ်အလိၤန့ၣ်လီၤ. လံာ်တၢ်လီၣ်ဖျါ ၂၁း၉ အံၤ မ့ၢ် တၢ်ထံၣ်လၢ အဘၣ်ဃးဒီး တလးမူးပိာ်မုၣ်, သိဖိအမါ, လၢအမ့ၢ် ယရူၤရှလ့ၣ် အသီန့ၣ်လီၤ. တၢ်ထံၣ်တၢ်လၢညါခီ တခါအံၤ တဲဘၣ်ဃး တၢ်ဃံတၢ်လၤ, တၢ်ဃူတၢ်ဖိး, တၢ်အိၣ်ဆူၣ်အိၣ်ချ့, တၢ်ဘီၣ်တၢ်ညီ, ဒီး တၢ်သူၣ်ခုသးခု လၢဟးဂီၤတသ့နီတဘျီ, လၢအကအိၣ်ထီၣ် ဖဲ တၢ်မၤကဆှီထီၣ်က့ၤ ဟီၣ်ခိၣ် လၢအဘၣ်တၢ်ပၢအီၤလၢ ယွၤအဒုၣ်အဒါ တဖၣ် ဝံၤအလီၢ်ခံ န့ၣ်လီၤ. ဒီးဖဲ စီၤယိၤဟၣ် အပှၤဖးလံာ်အခီၣ်ထံးခီၣ်ဘိတဖၣ် ဖးဘၣ်တၢ်အံၤ အခါ, အဝဲသ့ၣ် ကဒိးန့ၢ်တၢ်ဂံၢ်တၢ်ဘါ ဒ်သိး ကဂုာ်ကျဲးစၢး လၢကဒိးန့ၢ် ယွၤအတၢ်ဆိၣ်ဂ့ၤ, ခီဖျိ အိၣ်မူဒ် ယွၤအတၢ်ဘၣ်သးအသိး, ဒီးကွၢ်တၢ် ဆူမဲာ်ညါ ဖဲတၢ်အုၣ်က့ၤခီၣ်က့ၤ အလၢအပှဲၤ လၢကမၤအသးဖဲ ခရံာ်ဟဲကဒါက့ၤ အခါန့ၣ်လီၤ.

ယရူၤရှလ့ၣ်အသီ အံၤဘၣ်တၢ်တဲအဂ့ၢ် ဖဲ တၢ်လီၣ်ဖျါ ၂၁း၉-၂၇ အပူၤန့ၣ်လီၤ. ၀့ၢ်အံၤ ဘၣ်တၢ်ကတဲာ်ကတီၤအီၤလၢ မူခိၣ်, ဒီး ကဘၣ်တၢ်ဟဲစိာ် လီၤအီၤ ဆူဟီၣ်ခိၣ် အသီအလိၤ န့ၣ်လီၤ. ၀့ၢ်အသီအံၤ ဘၣ်တၢ်တ့အီၤ အက့ၢ်အဂီၤ မ့ၢ် လွံၢ်နၢၣ်ကိးကပၤဒဲး န့ၣ်လီၤ. လံာ်စီဆှံအလီၢ်လံၤအပူၤ, တၢ်လီၢ်စီဆှံကတၢၢ်လၢ ဒဲစီဆှံအပူၤ, ဒီး တၢ်လုၢ်ဟံၣ် တၢ်ဘၣ်တ့အီၤ လွံၢ်နၢၣ်ကိးကပၤဒဲး စ့ၢ်ကီးန့ၣ်လီၤ. ဒ်ယွၤလီၣ်ဖျါထီၣ် အတၢ်အိၣ်ဖျါလၢအစီဆှံ လၢတၢ်လီၢ်စီဆှံကတၢၢ် အပူၤအသိး, အဝဲကလီၣ်ဖျါထီၣ် အတၢ်လၤကပီၤ ဆူအပှၤဂီၢ်မုၢ်အအိၣ် လၢ ၀့ၢ်အသီယရူၤရှလ့ၣ် အပူၤန့ၣ်လီၤ.

ဝ့ၢ်ယရူၤရှလ့ၣ်အသီ

၀့ၢ်အသီ ယရူၤရှလ့ၣ် အတၢ်ထိၣ်တဖၣ် ဘၣ်တၢ်ထိၣ်အီၤလၢ နီၣ်ဂံၢ် တဆံခံ န့ၣ်လီၤ. လံာ်စီဆှံအလီၢ်လံၤအပူၤ, နီၣ်ဂံၢ်အံၤ မ့ၢ်၀ဲ အံၣ်စရ့လး တဆံခံဒူၣ်, လၢအမ့ၢ် ယွၤအပှၤဂီၢ်မုၢ် ဖဲအစိၤဆၢကတီၢ် ဖဲန့ၣ်အခါန့ၣ်လီၤ. ဒီးလၢလံာ်စီဆှံ အသီအပူၤ, နီၣ်ဂံၢ် တဆံခံ မ့ၢ်ပှၤတၢ်မၢဖိ တဆံခံဂၤ အပနီၣ်, လၢအတဲဘၣ်ဃး ယွၤအပှၤဂီၢ်မုၢ်လၢ ပစိၤဆၢကတီၢ်ခဲအံၤ န့ၣ်လီၤ. အဲၣ်ဒိးစံး၀ဲလၢ, လၢယရူၤရှလ့ၣ်အသီ အပူၤ ယွၤအပှၤဂီၢ်မုၢ် တဖၣ် ကမ့ၢ်ကလုာ်အါဖု ပာ်ဖှိၣ်ထီၣ်အသး ဃုာ်ဒီး အကစၢ်ဒၣ်၀ဲ အတၢ်ဆဲးတၢ်လၤ စုာ်စုာ်န့ၣ်လီၤ.

လၢ၀့ၢ်သီယရူၤရှလ့ၣ်အပူၤ, ထံမူကျိ ယွၤလီၤ၀ဲလၢ ယွၤအလီၢ်ပစိာ်ဆူ ၀့ၢ်အခၢၣ်သးန့ၣ်လီၤ. ထံမူကျိအံၤ ကမၤဂ့ၤထီၣ် သ့ၣ်တၢ်မူ, ဒီးသ့ၣ်အံၤ အလၣ်မၤဘျါ တၢ်ဆူးတၢ်ဆါ လၢပှၤကိးကလုာ်ဒဲး အဂီၢ်န့ၣ်လီၤ. တၢ်ပနီၢ်အံၤ မ့ၢ်ဝဲ, လၢဟီၣ်ခိၣ်အသီအပူၤ တၢ်ဒဲးဘးအတၢ်ဆိၣ်အၢ ကဘၣ်တၢ် တြူာ်ကွံာ်အီၤ ခဲလၢာ်ခဲဆ့ န့ၣ်လီၤ. ဟီၣ်ခိၣ်ချၢဒီတဘ့ၣ်ညါ ကဘၣ်တၢ် မၤသီထီၣ်က့ၤအီၤ ဒီး ကဘၣ်တၢ်မၤဘျါက့ၤအီၤလၢ တၢ်ဒဲးဘးအတၢ်ပူၤလီၢ် ခီဖျိ မိၢ်ပၢ်လၢပျၢၤ အတၢ်ဒဲးဘး အဃိန့ၣ်လီၤ.

လီၢ်ခံကတၢၢ်, စီၤယိၤဟၣ်ထံၣ်လၢ ဝ့ၢ်အသီ ယရူၤရှလ့ၣ် ကပီၤကပြုၢ်ကပြီၤ ဃုာ်ဒီး ယွၤအလၤကပီၤ န့ၣ်လီၤ. လၢၢ်လုၢ်ဒိၣ်ပှ့ၤဒိၣ် ဒီး တၢ်မျၢ်ပလဲ လၢ၀့ၢ်ပူၤတဖၣ် ဒုးနဲၣ်ဖျါထီၣ် ဝ့ၢ်အတၢ်ထူးတၢ်တီၤ, အတၢ်ဃံတၢ်လၤ, ဒီး အတၢ်လၢတၢ်ပှဲၤ န့ၣ်လီၤ. ဒီးအါန့ၢ်အန့ၣ်, ယွၤအတၢ်လၢတၢ်ပှဲၤ ကမၤပှဲၤ ဝ့ၢ်အသီအံၤ, ဒီး ဝ့ၢ်အံၤ တလိၣ်လၢၤ တၢ်ကပီၤအဂၤ ဒ်အမ့ၢ် မုၢ်ဒီးလါ အသိးလၢၤဘၣ်.

လံာ်တၢ်လီၣ်ဖျါ အတၢ်ကတိၤလၢခံ

 စီၤယိၤဟၣ် မၤကတၢၢ်လံာ်တၢ်လီၣ်ဖျါခီဖျိ ကွၢ်ကဒါက့ၤ တၢ်ကစီၣ်လၢ အတဲတ့ၢ်လၢ အတၢ်ထံၣ်တဖၣ်အပူၤ န့ၣ်လီၤ. အဝဲစံးဝဲလၢ တၢ်ထံၣ် တၢ်လၢညါခီတဖၣ် မ့ၢ်တၢ်လၢပနာ်န့ၢ်အီၤသ့, မ့ၢ်လၢ အဘၣ်တၢ်ဟ့ၣ်လီၤအီၤလၢ ခရံာ်အကလူး အဃိန့ၣ်လီၤ. အဝဲဟ့ၣ်သဆၣ်ထီၣ် အပှၤဖးလံာ်ဖိ တဖၣ်လၢ ကအိၣ်ဂၢၢ်ဆိးကျၢၤလၢ တၢ်မၤလၢအဂ့ၤတဖၣ်, ဒ်သိး ကမၤန့ၢ် တၢ်ဆိၣ်ဂ့ၤလၢအဒိၣ် လၢ မူခိၣ်အသီ ဒီး ဟီၣ်ခိၣ်အသီ အပူၤန့ၣ်လီၤ. ဒီး စီၤယိၤဟၣ် ဒုးသ့ၣ်နီၣ်စ့ၢ်ကီး အပှၤဖးလံာ်ဖိတဖၣ်လၢ တၢ်ဒုးအိၣ်ထီၣ် ယွၤအဘီအမုၢ် ဒီး တၢ်စံၣ်ညီၣ်လၢခံကတၢၢ် မ့ၢ်တၢ်လၢ ကကဲထီၣ်အသး လၢခါဆူညါ န့ၣ်လီၤ. အဃိခဲအံၤ, ပှၤခရံာ်ဖိတဖၣ် ကဘၣ်အိၣ်ဂၢၢ်ဆိးကျၢၤလၢ တၢ်စူၢ်တၢ်နာ် အပူၤ, ဒီး ပှၤတၢ်ဒဲးဘးဖိတဖၣ် ကြၢးဟံးန့ၢ် တၢ်ခွဲးတၢ်ယာ်လၢ ကပီၢ်ယၢ်လီၤက့ၤသး အဂီၢ် န့ၣ်လီၤ.

တၢ်လီၣ်ဖျါ မ့ၢ် ယွၤအတၢ်ကစီၣ်လၢ အကတၢၢ်ကတာ်တသ့ လၢယွၤအပှၤဂီၢ်မုၢ်အဂီၢ်န့ၣ်လီၤ. ပမ့ၢ်စံးလၢ လံာ်တၢ်လီၣ်ဖျါအံၤ လၢပှဲၤဝဲလၢ တၢ်ဆၢကတီၢ် ဒ်အံၤဒ်နုၤ အပူၤဘၣ်ဆၣ်, ပှၤခရံာ်ဖိကိးဂၤဒဲး ကြၢးတူၢ်လိာ် လၢ လံာ်တၢ်လီၣ်ဖျါအံၤ ကဲဘျုးဒံးလၢ ပစိၤဆၢကတီၢ်ခဲအံၤအဂီၢ် ဒ် အကဲဘျုးတ့ၢ်လၢ စီၤယိၤဟၣ်အစိၤအဆၢကတီၢ် အသိးန့ၣ်လီၤ. ပတၢ်အိၣ်သး ကလီၤဆီလိာ်အသး ဘၣ်ဆၣ်, ပကစၢ်ယွၤ တဆီတလဲဘၣ်. စီၤယိၤဟၣ် အတၢ်သိၣ်လိ အလုၢ်အပှ့ၤ ဒီးအတၢ်ထံၣ်တဖၣ် လၢပစိၤဆၢကတီၢ် ခဲအံၤ ကဲဘျုးကဲဖှိၣ်ဒံးဝဲ န့ၣ်လီၤ. ပဘၣ်တၢ်ဟ့ၣ်ဆူၣ်ထီၣ်က့ၤ ပဂံၢ်ပဘါ သ့ခီဖျိ ယွၤအတၢ်ဂ့ၤတၢ်ဝါ လၢ အပူၤကွံာ်, အခဲအံၤ, ဒီးခါလၢကဟဲ အပူၤန့ၣ်လီၤ. ပအိၣ်ဒီးတၢ်သူၣ်ဆူၣ်သးဆူၣ် သ့လၢ ယွၤအတၢ်အဲၣ်ပှၤ အပူၤ ဒီး အတၢ်ပၢဆှၢ တၢ်စံၣ်စိၤတဲစိၤ အပူၤန့ၣ်လီၤ. ဒီးပဟ့ၣ်ဆၢက့ၤအီၤ ပတၢ်အဲၣ် လၢဆၢကတီၢ်အခဲအံၤ ဒီး ပတၢ်အိၣ်မူဒီကတီၢ်ညါ သ့ခီဖျိ ပတၢ်စူၢ်အီၤနာ်အီၤ အဃိန့ၣ်လီၤ.