တၢ်စဲပနီၣ်နွံဖျၢၣ် (လံာ်တၢ်လီၣ်ဖျါ ၆, ၈း၁-၅)

တၢ်ကတိၤလၢညါ 

လံာ်တၢ်လီၣ်ဖျါန့ၣ် မ့ၢ်လံာ်တဘ့ၣ်လၢ အလၢပှဲၤဝဲဒီး တၢ်ပနီၣ်တဖၣ် လီၤဆီဒၣ်တၢ် နီၣ်ဂံၢ် နွံ မ့ၢ်တၢ်ပနီၣ်လၢအရ့ဒိၣ် တခါ လၢအအိၣ်ဖျါထီၣ် တလီၢ်လီၢ်လၢ လံာ်တၢ်လီၣ်ဖျါ အပူၤန့ၣ်လီၤ. လံာ်တၢ်လီၣ်ဖျါ အဆၢဒိၣ်တၢ အပူၤ ပကထံၣ် ဘၣ်လၢ စီၤယိၤဟၣ် ထံၣ်တၢ်ထံၣ်လၢညါခီ လၢအဘၣ်ထွဲဒီး ကစၢ်ခရံာ်ဟးလၢ မ့ၣ်အူဒၢနွံဖျၢၣ် အကျါ န့ၣ်လီၤ. မ့ၣ်အူဒၢ နွံဖျၢၣ်အံၤ ဆၢထၢၣ်လၢ တၢ်အိၣ်ဖှိၣ်နွံဖု အခၢၣ်စး န့ၣ်လီၤ. လံာ်တၢ်လီၣ်ဖျါ အဆၢဒိၣ်တၢ တဲဘၣ် ဃး ကစၢ်ခရံာ် ဟးလၢမ့ၣ်အူဒၢ နွံဖျၢၣ်အကျါဝံၤ, လံာ်တၢ်လီၣ်ဖျါ အဆၢဒိၣ် ခံဒီး သၢ တဲပှၤဘၣ်ဃး လံာ်ပရၢ လၢ တၢ်အိၣ်ဖှိၣ် နွံဖုအဂီၢ် လၢအမ့ၢ် တၢ်ကစီၣ်နွံခါ န့ၣ်လီၤ. ဒ်န့ၣ်အသိး, အဆၢဒိၣ် လွံၢ်ဒီးယဲၢ် တဲပှၤဘၣ်ဃး စီၤယိၤဟၣ် အတၢ်ထံၣ်တၢ်လၢညါခီ ဘၣ်ဃး မူခိၣ်ဘီမုၢ်အဂ့ၢ် အသီတဘျီကဒီးန့ၣ်လီၤ. လၢတၢ်ထံၣ်တၢ်လၢညါခီ တခါအံၤ အပူၤ လၢအခီၣ်ထံးတပတီၢ်န့ၣ်, တၢ်ခဲလၢာ်တဲဘၣ်ဃး ယွၤအလီၢ်ပစိာ်န့ၣ်လီၤ. ဝံၤအလီၢ်ခံ ကစၢ်ခရံာ် ကဲထီၣ် တၢ်ဂ့ၢ်ခိၣ်သ့ၣ် န့ၣ်လီၤ. ကစၢ်ခရံာ်အတၢ်အိၣ်ဖျါထီၣ်အံၤ တမ့ၢ်ဒ် ပှၤကညီအဖိခွါ အသိးဘၣ်, မ့ၢ်ဒ် သိဖိတဒုလၢ အဘၣ်တၢ်လုၢ်ထီၣ်အီၤ, လၢအအိၣ်ဒီး အနၢၤနွံဘိ ဒီး အမဲာ်ချံ နွံတိၣ်န့ၣ်လီၤ. ဝံၤအလီၢ်ခံ ပကထံၣ်နီၣ်ဂံၢ်နွံ ပိာ်ထွဲထီၣ် အခံတခါန့ၣ်လီၤ. အခဲအံၤ တမ့ၢ်လၢၤ မ့ၣ်အူဒၢ နွံဖျၢၣ်လၢၤဘၣ်. မ့ၢ်ဝဲဒၣ်လံာ်ထူလၢအအိၣ်ဒီး တၢ်စဲပနီၣ် နွံဖျၢၣ်န့ၣ်လီၤ. လံာ်ထူအံၤ အိၣ်လၢယွၤအစုထွဲ အလိၤ ဒီး ဟ့ၣ်လီၤဝဲဆူ ကစၢ်ခရံာ်အစုပူၤ, မ့ၢ်လၢထဲခရံာ်တဂၤ ကြၢးဝဲဘၣ်ဝဲလၢ ကအိးထီၣ် တၢ်စဲပနီၣ်တဖၣ်အံၤန့ၣ်လီၤ. လံာ်ထူလၢအအိၣ်ဒီး တၢ်ပနီၣ်နွံဖျၢၣ် တဲဘၣ်ပှၤ တၢ်မနုၤလဲၣ်. တဲဘၣ်ပှၤ ဘၣ်ဃး ကစၢ်ယွၤ အတၢ်သုးတၢ်ကျဲၤလၢ ပှၤဟီၣ်ခိၣ်ဖိ အတၢ်စံၣ်စိၤတဲစိၤ အဂီၢ် န့ၣ်လီၤ. စီၤယိၤဟၣ် ဘၣ်တၢ်ကွဲမုာ်အီၤလၢ မူခိၣ်အလီၢ်ပစိာ် ဒ်သိးအကထံၣ်ဘၣ် “တၢ်အံၤဝံၤအလီၢ်ခံ တၢ်မနုၤကမၤအသး လဲၣ်” န့ၣ်လီၤ.

 လံာ်တၢ်လီၣ်ဖျါ အဆၢဒိၣ်ဃု တုၤ အဆၢဒိၣ် ဃီး တဲပှၤဘၣ်ဃး တၢ်အိးထီၣ်တၢ်ပနီၣ်နွံဖျၢၣ်, တဖျၢၣ်ဝံၤတဖျၢၣ် န့ၣ်လီၤ. ဖဲတၢ်ပနီၣ် တဖျၢၣ်ဘၣ်တဖျၢၣ် အိးထီၣ်အသး အခါ တၢ်အသီတခါဘၣ်တခါ လီၣ်ဖျါထီၣ် အသးလၢ စီၤယိၤဟၣ်အမဲာ်ညါ, ဒီးဆူပမဲာ်ညါ ခီဖျိ စီၤယိၤဟၣ်အတၢ်ကွဲး, လၢအဘၣ်ဃး ဒီး တၢ်လၢကဟဲကဲထီၣ် အသး စးထီၣ်လၢ စီၤယိၤဟၣ်အမုၢ်နံၤ ဒီး ဆူမဲာ်ညါ န့ၣ်လီၤ. စီၤယိၤဟၣ်ဒုးနဲၣ် ပှၤ တၢ်လၢကဟဲကဲထီၣ်အသး တဆီဘၣ် တဆီ လၢကဟဲကဲထီၣ်အသးလၢ တၢ်အံၤဝံၤအလီၢ်ခံ န့ၣ်လီၤ. “တၢ်အံၤ” တဲဘၣ်ဃး စီၤယိၤဟၣ် အစိၤအဆၢကတီၢ်, ဒီး တမ့ၢ် ပစိၤပဆၢကတီၢ်ခဲအံၤဘၣ်.

 ၁. တၢ်ပနီၣ်နွံဖျၢၣ်အံၤ ဘၣ်ထွဲဒီး တၢ်မၤအသး တချုး လံာ်တၢ်လီၣ်ဖျါအစိၤ, ဒီးတၢ်မၤအသး လၢလံာ်တၢ်လီၣ်ဖျါ အစိၤဝံၤ အလီၢ်ခံ 

တၢ်အဆိကတၢၢ်န့ၣ်, ပကဘၣ်သ့ၣ်ညါ ပာ်ပနီၣ်လၢ တၢ်ပနီၣ်နွံဖျၢၣ်အံၤ မ့ၢ်တၢ်လၢ အဘၣ်ထွဲဒီး တၢ်မၤအသး တချုး စီၤယိၤဟၣ်အစိၤ ဒီး စီၤယိၤဟၣ်အစိၤ ဝံၤအလီၢ်ခံ န့ၣ်လီၤ. လံာ်တၢ်လီၣ်ဖျါဒီတဘ့ၣ်ညါ အိၣ်ဒီး အကူာ်တဖၣ်, တကူာ်ဘၣ်တကူာ်, ဒီး လံာ်တကူာ်ဘၣ်တကူာ် အံၤ ပာ်ဖှိၣ်ထီၣ်အသး ဒီး ကဲထီၣ် လံာ်တၢ်လီၣ်ဖျါ တဘ့ၣ် န့ၣ်လီၤ. လံာ်အံၤ မ့ၢ်တဲပှၤ တၢ်ဂ့ၢ်တဘျုးခါ ဘၣ်ဆၣ်, အတၢ်ကစီၣ်မ့ၢ်ဒၣ်ထဲ တခါန့ၣ်လီၤ. လံာ်တၢ်လီၣ်ဖျါ ဒီတဘ့ၣ်အတၢ် ကစီၣ်မ့ၢ်ဝဲ “လၢမူခိၣ်အလီၢ်ပစိာ်အပူၤ တၢ်မၤအသးဒ်အံၤလီၤ. လၢဟီၣ်ခိၣ် အံၤတၢ်ကမၤအသး ဖဲ ကစၢ်ခရံာ် အတၢ်ဟဲ တၢတဘျီ ဒီး ခံဘျီတဘျီ အဘၢၣ်စၢၤ မ့ၢ်တၢ်ဒ်အံၤ လီၤ. ဒီး မုၢ်နံခံကတၢၢ် တၢ်ကမၤအသး မ့ၢ်ဒ်အံၤ လီၤ. အဃိ လၢဟီၣ်ခိၣ်အံၤ လဲၤတၢ်လၢ တၢ်စူၢ်တၢ်နာ်အပူၤ တက့ၢ်. ဘါထီၣ်ခရံာ်, ဒီး မၤအတၢ်မၤတက့ၢ်. ကဲထီၣ်ပှၤအုၣ် အသးလၢခရံာ်ဂီၢ်, ဒီး ဃၣ်ကဒါနသးနီတဘျီ တဂ့ၤ.” အဝဲအံၤမ့ၢ် လံာ်တၢ်လီၣ်ဖျါ အတၢ်ကစီၣ် န့ၣ်လီၤ. တၢ်ကစီၣ်အံၤ မ့ၢ်ခရံာ်ဖိလၢ စီၤယိၤဟၣ်အစိၤအဆၢကတီၢ် အဂီၢ်, ဒီးလၢပဂီၢ် ခဲအံၤ န့ၣ်လီၤ.

 ခရံာ်လၢ အအိးထီၣ် တၢ်ပနီၣ်နွံဖျၢၣ် အံၤ မ့ၢ်ခရံာ်တဂၤဃီလၢ အဒိးန့ၢ် လံာ်ထူလၢ ကစၢ်ယွၤ အအိၣ်န့ၣ်လီၤ. မ့ၢ်ခရံာ်တဂၤဃီလၢ အမၢစီၤယိၤဟၣ် ကွဲးတၢ်ပရၢဆူ တၢ်အိၣ်ဖှိၣ်နွံဖုအအိၣ်, ဒီး မ့ၢ်ခရံာ်တဂၤဃီလၢ အဟးလၢ မ့ၣ်အူဒၢ နွံဖျၢၣ်အကျါန့ၣ်လီၤ. အဃိလံာ်တၢ်လီၣ်ဖျါဒီတဘ့ၣ်ညါ အံၤ မ့ၢ်ဝဲ ဒ် လံာ်တၢ်လီၣ်ဖျါ ၁း၁-၃ စံးဝဲအသိး -

ယ့ၣ်ရှူးခရံာ် အတၢ်လီၣ်ဖျါလၢယွၤဟ့ၣ်လီၤအီၤ, ဒ်သိး အကဒုးနဲၣ်အခ့အပှၤ တဖၣ်လၢ တၢ်လၢအဘၣ်မၤ အသးချ့ချ့တဖၣ် န့ၣ်လီၤ. ဒီးမၢလီၤအကလူး, ဒီးဒုးနဲၣ် ဝဲလၢအခ့အပှၤ စီၤယိၤဟၣ်, လၢအအုၣ်အသးလၢ ယွၤ အကလုၢ်အကထါ, ဒီး ယ့ၣ်ရှူးခရံာ် အတၢ်အုၣ်အသး, ဖဲဒၣ် တၢ်လၢအထံၣ်ဝဲတဖၣ် အဂ့ၢ်အကျိၤလီၤ. ပှၤလၢ အဖး, ဒီးပှၤလၢ အနၢ်ဟူ ဝံအကလုၢ်အကထါအံၤ, ဒီးတိၢ်န့ၢ်ဖံးဃာ် တၢ်ကွဲးအသး အိၣ်လၢ အပူၤန့ၣ်, ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ, အဆၢအကတီၢ် ဘၣ်ဘူးတ့ၢ်လီၤ. 

 အဆၢအကတီၢ် ဘၣ်ဘူးတ့ၢ် လၢ စီၤယိၤဟၣ်အစိၤ အံၤ, တဲတၢ်စ့ၢ်ကီးလၢ တၢ်စံၣ်စိၤတဲစိၤအပူၤ ပှၤခရံာ်ဖိ တဖၣ်အဂီၢ်, ဒီး လၢပစိၤပဆၢကတီၢ်ခဲအံၤ တဲတၢ်တမံၤဃီ န့ၣ်လီၤ. ပှၤကျိာ်ထံ လံာ်တၢ်လီၣ်ဖျါအါဂၤ စံးဝဲလၢ တၢ်ကွဲးအသးလၢ လံာ်တၢ်လီၣ်ဖျါ အပူၤတဖၣ် ကမၤအသးလၢ ခါဆူညါ ဖဲတချုးကစၢ်ခရံာ်ဟဲခံဘျီတဘျီ န့ၣ်လီၤ. ဘၣ်ဆၣ်ပဘၣ်သ့ၣ်ညါလၢ တၢ်ကမၤအသးလၢ လံာ်တၢ်လီၣ်ဖျါအပူၤတဖၣ် ကကဲထီၣ်အသးဖဲ ကစၢ်ခရံာ် အတၢ်ဟဲ တၢတဘျီဒီး ခံဘျီတဘျီ အဘၢၣ်စၢၤန့ၣ်လီၤ. မ့ၢ်သပှၢ်ကတၢၢ် လံာ်တၢ်လီၣ်ဖျါအံၤ တဲပှၤ ဘၣ်ဃးတၢ်ကမၤအသးလၢ မုၢ်နံၤလၢခံကတၢၢ်တဖၣ် န့ၣ်လီၤ. လံာ်ဧ့ၤဘြံၤ ၁း၁-၂ စံးဘၣ်ပှၤ -

ယွၤကတိၤတၢ်ဒီး ပၢ်သ့ၣ်လၢပျၢၤ အါတီၤဒီးအါကျိၤ လၢဝံတဖၣ်ဘၣ်ဆၣ်ဒီး, လၢနံၤကတၢၢ်တဖၣ်အံၤ, ကတိၤတၢ်ဒီး ပှၤ, လၢအဖိခွါ လၢအပာ်အီၤလၢ ပှၤန့ၢ်ဘၣ်သါတၢ်ခဲလၢာ်, ဒီးတ့ဟီၣ်ခိၣ် စ့ၢ်ကီးလၢအီၤလီၤ. 

မုၢ်နံၤလၢခံကတၢၢ်, လံာ်ဧ့ၤဘြံၤစံးဝဲလၢ “နံၤကတၢၢ်တဖၣ်အံၤ” မ့ၢ်နံၤတဖၣ်လၢ ကစၢ်ခရံာ်အတၢ်ဟဲ တၢတဘျီဝံၤ အလီၢ်ခံန့ၣ်လီၤ. အဃိ, မုၢ်နံၤလၢခံကတၢၢ် တဖၣ်အံၤ မ့ၢ်စ့ၢ်ကီး နံၤလၢ စီၤယိၤဟၣ်အစိၤ, ဒီးမ့ၢ်စ့ၢ်ကီးပစိၤပဆၢကတီၢ် ခဲအံၤန့ၣ်လီၤ. စီၤယိၤဟၣ်အတၢ်ကွဲးဘၣ်ဃး တၢ်အိးထီၣ် တၢ်စဲပနီၣ်နွံဖျၢၣ်အံၤ မ့ၢ်ဝဲဒ်သိး ကဟ့ၣ်တၢ်ကစီၣ်ဆူ တၢ်အိၣ်ဖှိၣ်နွံဖုလၢအအိၣ်လၢ ကီၢ်အၤစံ အပူၤအဂီၢ်, ဒ်သိးတၢ်အိၣ်ဖှိၣ်ဖိတဖၣ် ကအိၣ်ဒီး တၢ်နာ်ယွၤလၢာ်လၢာ်ဆ့ဆ့ လၢအတၢ်အိၣ်မူအပူၤဖဲ အထံၣ်ဘၣ်တၢ်ကီတၢ်ခဲအဆၢကတီၢ် န့ၣ်လီၤ.

 တၢ်အိၣ်သးလၢ ပစိၤပဆၢကတီၢ်အခဲ အံၤ တၢ်ဆါ ခိဝံး - ၁၉ ဘၣ်ဟီၣ်ခိၣ် ဒီဘ့ၣ်ညါ အခဲအံၤ ပှၤအါဂၤကစံး ဝဲလၢ မ့ၢ်တၢ်ပနီၣ်တခါလၢ လံာ်တၢ်လီၣ်ဖျါအပူၤ ဒီး ကစၢ်ခရံာ်အတၢ်ကတိၤလၢ လံာ်မၤသဲ ၂၄ အပူၤ အတၢ်စံးပာ်တခါ လၢထီၣ်ပှဲၤထီၣ်လၢ အမ့ၢ် မုၢ်နံၤခံကတၢၢ် ဘူးထီၣ်လံ. ဘၣ်ဆၣ် ပမ့ၢ်ကွၢ် တၢ်ဆါသံသတြိာ်ဒ်အံၤတကလုာ်အံၤ လၢဟီၣ်ခိၣ်အတၢ်စံၣ်စိၤတဲစိၤ အပူၤ ကဲထီၣ်အသးတဘျုးဘျီလံ. တၢ်ဆါအၢလၢ ပှၤသံအါကတၢၢ်လၢ တၢ်စံၣ်စိၤ တဲစိၤအပူၤတဖၣ် ပကကွၢ် -

• ခ.န. ၁၆၅ နံၣ် - Antonine တၢ်ဆါသံသတြိာ် - ပှၤသံခဲလၢာ် ယဲၢ်ကကွဲၢ် 
• ခ.န. ၅၄၁ - ၅၄၂ နံၣ် - Justinian တၢ်ဆါသံသတြိာ် - ပှၤသံခဲလၢာ် ၂၅ ကကွဲၢ် 
• ခ.န. ၁၃၄၆ - ၁၃၅၃ နံၣ် - The Black Death - ပှၤသံခဲလၢာ် ၇၅ - ၂၀၀ ကကွဲၢ် 
• ခ.န. ၁၈၅၂ - ၁၈၆၀ နံၣ် - တၢ်ဟၢဖၢလူ တၢ်ဆါသံသတြိာ် သၢဘျီတဘျီ - ပှၤသံခဲလၢာ် ၁ ကကွဲၢ် 
• ခ.န. ၁၈၈၉ - ၁၈၉၀ နံၣ် - တၢ်ညၣ်ဂိၢ်တၢ်ဆါ သံသတြိာ် - ပှၤသံခဲလၢာ် ၁ ကကွဲၢ် 
• ခ.န. ၁၉၁၀ - ၁၉၁၁ နံၣ် - တၢ်ဟၢဖၢလူတၢ်ဆါသံသတြိာ် ဃုဘျီတဘျီ - ပှၤသံခဲလၢာ် ဃိးကလီၢ်ဘျဲၣ် 
• ခ.န. ၁၉၁၈ နံၣ် - တၢ်ညၣ်ဂိၢ်တၢ်ဆါသံသတြိာ် - ပှၤသံခဲလၢာ် ၂၀ -၅၀ ကကွဲၢ် 
• ခ.န. ၁၉၅၆ - ၁၉၅၈ နံၣ် - အ့ရှၢၣ် အတၢ်ညၣ်ဂိၢ် - ပှၤသံခဲလၢာ် ၂ ကကွဲၢ် 
• ခ.န. ၁၉၆၈ နံၣ် - တၢ်ညၣ်ဂိၢ်တၢ်ဆါသံသတြိာ် - ပှၤသံခဲလၢာ် ၁ ကကွဲၢ် 
• ခ.န. ၂၀၀၅ - ၂၀၁၂ နံၣ် - အ့းစ် တၢ်ဆါ - ပှၤသံခဲလၢာ် ၃၆ ကကွဲၢ်  

အဃိ ပတဲလၢ ခိဝံး-၁၉ တၢ်ဆါအံၤ မ့ၢ်တၢ်ပနီၣ်တခါလၢ မုၢ်နံၤခံကတၢၢ် ဘူးထီၣ်လံန့ၣ် မ့ၢ်ကသ့စ့ၢ်ကီးဧါ. စီၤယိၤဟၣ်တဲဝဲတဘျီဝံၤတဘျီလၢ တၢ်ဆၢကတီၢ်ဘူးတ့ၢ်လံ. စီၤယိၤဟၣ်အပှၤဖးလံာ်ဖိ လၢစီၤယိၤဟၣ်အစိၤ တဖၣ် ကဖးဝဲလံာ်တၢ်လီၣ်ဖျါအံၤ ဒီး ဒုးဘၣ်ထွဲအီၤလၢ အစိၤအဆၢကတီၢ် အခါဖဲန့ၣ် လၢ တၢ်ဆၢကတီၢ်ဘူးတ့ၢ်လံလၢ အဝဲသ့ၣ်အဂီၢ်သ့ဝဲအသိး, လၢတၢ်စံၣ်စိၤတဲစိၤအပူၤ ပှၤခရံာ်ဖိတဖၣ် ဖးလံာ်တၢ်လီၣ်ဖျါအံၤ ဒီး ဒုးဘၣ်ထွဲဝဲဒီး အဝဲ သ့ၣ်အတၢ်အိၣ်သး သ့ဝဲန့ၣ်လီၤ. အစိၤဆၢကတီၢ်အခဲအံၤ ပှၤခရံာ်ဖိတနီၤ စံးဝဲလၢ တၢ်ကမၤအသးလၢ လံာ်တၢ်လီၣ်ဖျါတဲဝဲတဖၣ် ကကဲထီၣ်အသး ဖဲ တၢ်စိာ်ထီၣ်ပှၤစီဆှံဝံၤအဆၢကတီၢ် န့ၣ်လီၤ. ဘၣ်ဆၣ် လံာ်တၢ်လီၣ်ဖျါ အတၢ်ဂ့ၢ်လီၤတံၢ်လီၤဆဲးန့ၣ် မ့ၢ်ဝဲ တၢ်ကမၤအသး လၢလံာ်တၢ်လီၣ်ဖျါတဲဝဲတဖၣ် မ့ၢ်ဝဲဖဲ ခရံာ်အတၢ်ဟဲ တၢတဘျီ ဒီးခံဘျီတဘျီ အဘၢၣ်စၢၤ န့ၣ်လီၤ.

 ၂. တၢ်အိးထီၣ် တၢ်ပနီၣ် အခီၣ်ထံး လွံၢ်ဖျၢၣ် ပာ်ဖျါထီၣ်ဝဲလၢ ကစၢ်ယွၤ အတၢ်စံၣ်ညီၣ်ဟီၣ်ခိၣ် လၢအခဲအံၤ မ့ၢ် မုၢ်နံၤလၢခံကတၢၢ်တဖၣ် န့ၣ်လီၤ. 

တၢ - ပှၤဒိးကသ့ၣ်တဖၣ် ဘၣ်တၢ်ဆှၢအီၤလၢယွၤ ဆူဟီၣ်ခိၣ်ချၢ န့ၣ်လီၤ. အဝဲသ့ၣ်ဘၣ်တၢ်မၢအီၤလၢ ကလဲၤ ဖဲ တၢ်စဲပနီၣ်တဖၣ် ဘၣ်တၢ်မၤဟးဂီၤအီၤ အခါန့ၣ်လီၤ. တၢ်စဲပနီၣ်တဖၣ်အံၤ ဘၣ်တၢ်အိးထီၣ်အီၤလၢ ခရံာ်လီၤ. ဒီးခရံာ်ဒိးန့ၢ်လံာ်ထူအံၤလၢ ယွၤအအိၣ်န့ၣ်လီၤ. တၢ်လၢ ပှၤဒိးကသ့ၣ် မၤဝဲသ့ၣ်တဖၣ် မ့ၢ်လၢကစၢ်ယွၤ မၢအဝဲသ့ၣ် အဃိအဝဲသ့ၣ်မၤဝဲလီၤ. 

ခံ - ဖဲပှၤဒိးကသ့ၣ်တဖၣ် လဲၤတၢ်အဆၢကတီၢ် အဝဲသ့ၣ်စိာ်ဃုာ်ဒီး တၢ်စံၣ်ညီၣ်လၢ ယွၤအဒုၣ်အဒါ တဖၣ်အဂီၢ် ခီဖျိ တၢ်ဒုးသုးဒုးသံၣ်, ထံလီၢ်ကီၢ်ပူၤတၢ်ဒုး, တၢ်သၣ်ဝံၤလီၤဒိ, တၢ်ဆါသံသတြိာ်, ဒီး တၢ်သံတၢ်ပှၢ် တဖၣ်န့ၣ်လီၤ. ပှၤခရံာ်ဖိ အါဂၤကစံးဝဲ ယွၤပၢဆှၢ တၢ်ခဲလၢာ်, ဘၣ်ဆၣ် တပၣ်ဃုာ်ဒီး တၢ်အၢတၢ်သီ လၢအကဲထီၣ်အသးလၢ ဟီၣ်ခိၣ်ချၢအံၤ ဘၣ်. လံာ်စီဆှံစံးဝဲလၢ ယွၤပၢဆှၢတၢ်ခဲလၢာ်န့ၣ်လီၤ. တၢ်ခဲလၢာ်ဟဲကဲထီၣ်အသးလၢအီၤလီၤ. အဝဲတမၤဒီး ဒုးကဲထီၣ် တၢ်အၢတၢ်သီဘၣ်, ဘၣ်ဆၣ် အဝဲပျဲ တၢ်အၢတၢ်သီအံၤ ဒီး သူအီၤလၢ ကဒုးနဲၣ်ဖျါထီၣ် အတၢ်တိာ်လၢ အပှၤဂီၢ်မုၢ်အဂီၢ် န့ၣ်လီၤ.

 အစိၤအဆၢကတီၢ်ခဲအံၤ ကစၢ်ယွၤစံၣ်ညီၣ်တၢ်လၢ ကျဲအါဘိန့ၣ်လီၤ. လီၤဆီဒၣ်တၢ် တၢ်စဲပနီၣ် တဖၣ်အံၤ ဒုးသ့ၣ်နီၣ် ထီၣ်ပှၤခရံာ်ဖိတဖၣ်လၢ ဖဲအဝဲသ့ၣ် လဲၤခီဖျိဘၣ် ဒီးနၢ်ဟူဘၣ် တၢ်ဒုးတၢ်ယၤအကစီၣ်, တၢ်ဆါသံသတြိာ်တဖၣ် အဆၢကတီၢ် ယွၤသ့တၢ်လၢာ်တဂၤ မ့ၢ်ပှၤသ့တၢ်လၢာ် လၢတၢ်ခဲလၢာ်အဖီခိၣ်န့ၣ်လီၤ.

နကွၢ်ကွၢ် ပှၤဒိးကသ့ၣ်လွံၢ်ဂၤ အတၢ်ဖံးတၢ်မၤတဖၣ်, ဒီး နထိၣ်သတြီၤကွၢ် ဟီၣ်ခိၣ်အတၢ်အိၣ်သး အံၤ မ့ၢ်နထံၣ် အတၢ်ဖံးတၢ်မၤတဖၣ်ဧါ. နကွၢ်က့ၤလၢတၢ်စံၣ်စိၤတဲစိၤ အပူၤ နထံၣ်စ့ၢ်ကီး အဝဲသ့ၣ် အတၢ်ဖံးတၢ်မၤ စ့ၢ်ကီးဧါ. ပှၤဒိးကသ့ၣ်လွံၢ်ဂၤ အတၢ်မၤတဖၣ် ပကကွၢ်, တၢတဂၤ ဒိးကသ့ၣ်ဝါ, အိၣ်ဒီးချံၣ်လၢအလိၤ, ဒ်သိးအကမၤနၢၤ တၢ်, ဒီးဟးထီၣ်မၤနၢၤတၢ်, ခံဂၤတဂၤ, ဒိးကသ့ၣ်ဂီၤ, အိၣ်ဒီးနးဖးဒိၣ်တဘ့ၣ်, ဒ်သိး အကထုးကွံာ်တၢ်ဃူတၢ်ဖိလၢ ဟီၣ်ခိၣ်ချၢ, ဒီးလၢပှၤကမၤသံလိာ်အသး, သၢဂၤတဂၤ ဒိးကသ့ၣ်သူ, အိၣ်ဒီးစီၤပီၢ်လၢအစုပူၤ, မၤအါထီၣ် တၢ်ပှ့ၤတၢ်ကလံၤ, လွံၢ်ဂၤတဂၤ ဒိးကသ့ၣ်လါဝါ ဒီးအမံၤမ့ၢ်တၢ်သံ, မၤသံတၢ်လၢနး, လၢတၢ်သၣ်ဝံၤလီၤဒိ, ဒီးလၢ တၢ်ဆါသံသတြိာ်, ဒိးဟီၣ်ခိၣ်အတၢ်ဒူတၢ်ဃိၤ တဖၣ်လီၤ. တၢ်တဖၣ်အံၤ ပမ့ၢ်ကွၢ်လၢ ဟီၣ်ခိၣ်အတၢ်စံၣ်စိၤတဲစိၤ အပူၤ ပထံၣ်ကဲထီၣ်အသးတလီၢ်လီၢ်လီၤ. တမ့ၢ်ကကဲထီၣ်အသးလၢ မုၢ်နံၤလၢခံကတၢၢ်ဖဲ ကစၢ်ခရံာ်ကဟဲ ခံဘျီ တဘျီအခါန့ၣ်ဘၣ်.

၃. ပှၤစီဆှံတဖၣ် မ့ၢ်တူၢ်ဘၣ် ဟီၣ်ခိၣ်အတၢ်နးတၢ်ဖှီၣ်ဘၣ်ဆၣ်, ယွၤကဟုကယာ်အဝဲသ့ၣ် န့ၣ်လီၤ. 

ဖဲတၢ်အိးထီၣ်တၢ်စဲပနီၢ်ယဲၢ်ဖျၢၣ်တဖျၢၣ်အခါ ပကထံၣ်ဘၣ် တၢ်မၤအသး တမ့ၢ်လၢၤလၢ ဟီၣ်ခိၣ်ဘၣ်, မ့ၢ်လၢမူခိၣ် န့ၣ်လီၤ. ဖဲတၢ်ပနီၣ်ယဲၢ်ဖျၢၣ်တဖျၢၣ်အိးထီၣ်အသးအခါ စီၤယိၤဟၣ်ထံၣ် ပှၤလၢ အဒိးသံ အသးလၢယွၤကလုၢ်ကထါအဃိ, ဒီးအတၢ်အုၣ်အသးလၢ အဟံးဃာ်ဝဲအဃိ, အသးတဖၣ်အိၣ်လၢ တၢ်လုၢ်လီၢ် အဖီလာ် (တၢ်လီၣ်ဖျါ ၆း၉). စီၤယိၤဟၣ်ထံၣ် ပှၤခရံာ်ဖိတဖၣ်အသးသမူ, လီၤဆီဒၣ်တၢ် အဝဲထံၣ်တၢ်အသးတဖၣ် လၢပှၤလၢအဘၣ်တၢ်မၤသံအီၤ လၢယွၤကလုၢ်ကထါအဂီၢ်န့ၣ်လီၤ.

တၢ်ဂ့ၢ်အဝဲအံၤ ဒုးနဲၣ်ပှၤ တၢ်ဂ့ၢ်ခံမံၤ န့ၣ်လီၤ. တၢတမံၤ - စိၤခဲအံၤ မ့ၢ်စိၤလၢ ပှၤခရံာ်ဖိတဖၣ် ဘၣ်လဲၤခီဖျိ တၢ်တူၢ်ဘၣ်ခီၣ်ဘၣ် ဒီး တၢ်ကီတၢ်ခဲတဖၣ်န့ၣ်လီၤ. ပှၤခရံာ်ဖိတနီၤ ကဘၣ်တၢ်မၤသံအီၤ မ့ၢ်လၢ အဝဲသ့ၣ် တဲယွၤ အကလုၢ်ကထါ ဒီးအုၣ်အသးလၢ ခရံာ်အဂ့ၢ်န့ၣ်လီၤ. ခံမံၤတမံၤ - တၢ်သံလၢခရံာ်အဂီၢ် တမ့ၢ် တၢ်သံလီၤထူလီၤ ယိာ်ဘၣ်, မ့ၢ်တၢ်မူန့ၣ်လီၤ. အဃိ ပဒိးန့ၢ်ဘၣ်တၢ်ဂံၢ်တၢ်ဘါလၢတၢ်ဂ့ၢ်အံၤလီၤ. ပလဲၤတၢ်လၢ တၢ်နာ်အဃိလီၤ. တမ့ၢ်လၢ တၢ်ထံၣ်အဃိဘၣ်.

တၢ်ပနီၣ်ဃုဖျၢၣ်တဖျၢၣ်ဒီး တၢ်ပနီၣ်နွံဖျၢၣ်တဖျၢၣ်တဲပှၤဘၣ်ဃး တၢ်စံၣ်ညီၣ်လၢခံကတၢၢ်, ယွၤအတၢ်စံၣ်ညီၣ်ဖးဒိၣ် ကဟဲဝဲန့ၣ်လီၤ. ဒီးတၢ်စံၣ်ညီၣ်အံၤကဟဲဝဲ သတူၢ်ကလာ်န့ၣ်လီၤ. တၢ်လီၣ်ဖျါ ၆း၁၂ - ၁၇ စံးဝဲ -

ဒီးယထံၣ်တၢ်, ဖဲအအိးထီၣ်တၢ်စဲပနီၣ်ဃာ်လၢအပှဲၤထီၣ်ဃုဖျၢၣ်တဖျၢၣ်န့ၣ်ဒီး, ဟီၣ်ခိၣ်ဟူးဝးဒိၣ်မး, ဒီးမုၢ်သူထီၣ်ဒ် ထၢၣ်အတၢ်ကံးညာ်တၢ်ဆူၣ်အသိး, ဒီးလါကဲထီၣ်ဒ် တၢ်သွံၣ်အသိးခဲလၢာ်, ဒီးဆၣ်ဧိၤဖီဧိၤလၢ မူကပိာ်လိၤ, လီၤဆှူဆူ ဟီၣ်ခိၣ်ချၢ ဒ်ချၢၣ်ဒၢသၣ်လၢ အတမံဒံးဘၣ်လၢ အဘၣ်တၢ်ဟူးဝးလၢ ကလံၤဒိၣ်ဒိၣ်ကလဲာ် အသိးန့ၣ်လီၤ. ဒီးမူခိၣ် ဒံကွံာ်, ဒ်လံာ်လၢ တၢ်ထူထီၣ်အီၤအသိး, ဒီးကယဲၢ်ကစၢၢ်ကလိ, ဒီးကယဲၢ်ကီးတဖၣ်, သုးကွံာ်အလီၢ်, ဒီးဟီၣ်ခိၣ် အစီၤပၤ, ပဒိၣ်ပပှၢ်, ဒီးပှၤသုးဖိအကထိအခိၣ်, ဒီးပှၤအထူးအတီၤ, ဒီးပှၤအိၣ်ဒီး အစိအကမီၤသ့ၣ်တဖၣ်, ဒီးကယဲၢ် တၢ်အကုၢ်အပှၤ, ဒီးပှၤသဘျ့တဂၤလၢ်လၢ်န့ၣ်, ပာ်ခူသူၣ်အသးလၢ တၢ်အိပူၤ, ဒီးလၢကစၢၢ်တဖၣ်လၢၢ်အိပူၤ, ဒီးစံးဘၣ် ကစၢၢ်ကလိ, ဒီးလၢၢ်ဧိၤလ့ဧိၤသ့ၣ်တဖၣ်န့ၣ်, လီၤတဲာ်လၢပလိၤ, ဒီးမၤဘၢကွံာ် ပှၤလၢ ပှၤလၢအဆ့ၣ်နီၤလၢလီၢ်ပစိာ် တဂၤန့ၣ် အမဲာ်ညါ, ဒီးလၢသိဖိအသးဒိၣ်ထီၣ်န့ၣ် တက့ၢ်. အဂ့ၢ်ဒ်အံၤ, တၢ်ဒိၣ်အမုၢ်တနံၤ ဘၣ်ဃးဒီး အဝဲဒၣ်အတၢ်သး ဒိၣ်ထီၣ်န့ၣ် ဘၣ်လံ, ဒီးမ့ၢ်မတၤဆၢထၢၣ်သ့တဂၤလဲၣ်.

လီၤဂာ်လၢ တၢ်ကတၢၢ်ကွံာ်ခဲလၢာ်လံ. 

တၢ်စဲပနီၣ်နွံဖျၢၣ်တဖျၢၣ် ပိာ်ထွဲထီၣ် တၢ်ပနီၣ်ဃုဖျၢၣ်တဖျၢၣ်အခံ လၢအဘၣ်ဃးဒီး တၢ်စံၣ်ညီၣ်လီၤ. လံာ်တၢ်လီၣ်ဖျါ ၈း၁ ဒီး ၅ -

ဒီးဖဲအအိးထီၣ်တၢ်စဲပနီၣ်ဃာ်လၢအပှဲၤထီၣ်နွံဖျၢၣ်တဖျၢၣ်န့ၣ်, တၢ်အိၣ်ဘှီၣ်ကလာ်လၢမူခိၣ် တခီနၣ်ရံၣ်ဃၣ်ဃၣ်လီၤ. - ဒီးကလူးန့ၣ်ဟံးန့ၢ် တၢ်ဆိၣ်ကဲၤနၢမူအလီခီ, ဒီးမၤပှဲၤဝဲလၢ မ့ၣ်အူအိၣ်လၢ တၢ်လုၢ်လီၢ်, ဒီးတ့ၢ်လီၤဝဲဆူ ဟီၣ်ခိၣ်ချၢ, ဒီး တၢ်ကလုၢ်သီၣ်တဖၣ်, ဒီးလီသီၣ်, ဒီးလီဝၢ်အဒံး, ဒီးဟီၣ်ခိၣ်ဟူးဝး တဖၣ်, မၤအသးလီၤ.  

အဃိပမ့ၢ်ကွၢ်တၢ်စဲပနီၣ်တဖၣ်အံၤ တၢ်ပနီၣ်လၢအမၤအသးတဖၣ် တၢ်စဲပနီၣ် တၢတုၤလၢယဲၢ် မ့ၢ် တၢ်လၢအမၤအသး လၢ တၢ်စံၣ်စိၤတဲစိၤအပူၤ ဒီးတုၤလၢပစိၤခဲအံၤ, ဒီး တၢ်စဲပနီၣ် ဃုဒီးနွံ မ့ၢ်တၢ်လၢကမၤအသးလၢ တၢ်စံၣ်ညီၣ်လၢ ခံကတၢၢ်အမုၢ်နံၤ န့ၣ်လီၤ. ပှၤခရံာ်ဖိကိးဂၤဒဲး လဲၤခီဖျိ ဒီး ကလဲၤခီဖျိ တၢ်သ့ၣ်တဖၣ်အံၤ ဘၣ်ဆၣ် ယွၤအၢၣ်လီၤ ပှၤလၢ ကအိၣ်ဒီးပှၤကိးမုၢ်နံၤမုၢ်နၤဒဲးလီၤ.

၄. တၢ်စံၣ်ညီၣ်လၢခံကတၢၢ်ကမၤအသးအခါဖဲလဲၣ်. 

ဘၣ်ဆၣ် တၢ်စံၣ်ညီၣ်လၢခံကတၢၢ် တမၤအသးတဘျီဃီဘၣ်. ပကကွၢ်ဖဲ တၢ်အိးထီၣ်တၢ်စဲပနီၣ် ယဲၢ်ဖျၢၣ်တဖျၢၣ်ဝံၤ အလီၢ်ခံ စီၤယိၤဟၣ်ထံၣ်ပှၤစီဆှံတဖၣ် အသးသမူ လၢအဘၣ်တၢ်မၤသံအီၤလၢ ယွၤအကလုၢ်ကထါ အဃိန့ၣ်လီၤ. အဝဲသ့ၣ်သံကွၢ်ယွၤ -

တၢ်စီဆှံ, တၢ်အမ့ၢ်အတီကစၢ်ဧၢ, နတစံၣ်ညီၣ်ဘၣ်ပှၤအိၣ်လၢ ဟီၣ်ခိၣ်ချၢ တဖၣ်, ဒီးနတဟ့ၣ် ကၣ်အတၢ်ဒဲးဘး လၢပသွံၣ်အဃိန့ၣ်ဒီး, နကအိၣ်ဆံးယံာ်လဲၣ်. ဒီးတၢ်ဟ့ၣ်လီၤအီၤလၢဆ့ဝါ, ဒီးတၢ်စံးဘၣ်အီၤလၢ အကအိၣ်ဘှံးဒံးအဆၢအကတီၢ်တစဲး တုၤအခ့အပှၤ သကိးဒီးအီၤ, ဒီးအဒီပုၢ်ဝဲၢ်, လၢအကဒိးသံအသးဒ်သိးသိး ဒီး အီၤန့ၣ်, ကလၢထီၣ်ပှဲၤထီၣ်လီၤ. လီၣ်ဖျါ ၆း၁၀-၁၁. 

 လံာ်စီဆှံဒုးနဲၣ်ပှၤတၢ်ဂ့ၢ်လၢအလီၤဆီ တဖၣ်ဘၣ်ဃး ကစၢ်ခရံာ်အတၢ်ဟဲခံဘျီတဘျီ တမၤအသးချ့သဒံးဘၣ်လဲၣ် လီၤ. မးသဲ ၂၄း၁၄ အပူၤ ကစၢ်ခရံာ်စံးဝဲ -

ဒီးဘီမုၢ် အတၢ်သးခုကစီၣ်အံၤ, ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ, လၢတၢ်အုၣ်အသးလၢ ပှၤကလုာ်ခဲလၢာ် အဂီၢ်လီၤ. တုၤနုၤတစု တၢ်အကတၢၢ်န့ၣ် ကဟဲဘၣ်ဝဲလီၤ.  

တချုးတၢ်အကတၢၢ်ဟဲဒံးဘၣ်န့ၣ် တၢ်ကဘၣ်မၤအသးမနုၤတဖၣ်လဲၣ်. တၢ်သးခုကစီၣ်အံၤ ကဘၣ်တၢ်စံၣ်တဲၤတဲလီၤ အီၤလၢဟီၣ်ခိၣ်ဒီဘ့ၣ်ညါ, ဆူပှၤကလုာ်ခဲလၢာ်အအိၣ်န့ၣ်လီၤ. ဘၣ်ဆၣ်လံာ်တၢ်လီၣ်ဖျါတဲဘၣ်ပှၤလၢ ဖဲမၤထူရၤအလီၢ်ခံကတၢၢ်တဂၤသံဝဲန့ၣ် တၢ်အကတၢၢ်ကဟဲဝဲဖဲန့ၣ်လီၤ. တမ့ၢ်လံာ်စီဆှံ ထီဒါလိာ်အသးဘၣ်. မ့ၢ်တၢ်စံးဆၢတၢ်သံကွၢ် “အခါဖဲလဲၣ်” လၢကျဲလီၤဆီလိာ်သး အပူၤန့ၣ်လီၤ. ပမ့ၢ်ပာ်ဖှိၣ်လံာ်စီဆှံခံဆၢအံၤ ပကထံၣ်ဘၣ်လၢ “တၢ်သးခုကစီၣ် ကဘၣ်တၢ်စံၣ်တဲၤတဲလီၤအီၤ လၢဟီၣ်ခိၣ်ဒီဘ့ၣ်ညါ, ဒီးမၤထူရၤ လၢယွၤအဂီၢ် တဖၣ်ကဘၣ်လၢပှဲၤဝဲ အန့ၣ်မး တၢ်အကတၢၢ်ကဟဲဝဲလီၤ.

တၢ်ကတိၤလၢခံ 

မးသဲ ၂၄း၄-၁၄ တဲဘၣ်ပှၤ -

ဒီးယ့ၣ်ရှူးစံးဆၢတၢ်ဒီးစံးဘၣ်အီၤ, ဒ်သိးပှၤသုတလီန့ၢ်သု နီတဂၤတဂ့ၤဒီး ပလီၢ်သုသးတက့ၢ်. အဂ့ၢ်ဒ်အံၤ, ပှၤအါဂၤ ကဟဲလၢယမံၤ, ဒီးကစံး, ယဲဒၣ်အံၤ, ယမ့ၢ်ခရံာ်လီၤ. ဒီးကလီန့ၢ် ပှၤအါဂၤလီၤ. ဒီးသုကနၣ်ဟူတၢ်ဒုးသုးဒုးသံၣ် တဖၣ်အဂ့ၢ်, ဒီးတၢ်ဒုးသုးဒုးသံၣ်တဖၣ် အကစီၣ်လီၤ. ပလီၢ်သုသးတက့ၢ်. သုတသူၣ်ကိၢ်သးဂီၤ တဂ့ၤ. အဂ့ၢ်ဒ်အံၤ, တၢ်န့ၣ်တဖၣ်ဘၣ်မၤအသးခဲလၢာ်လီၤ. ဘၣ်ဆၣ်ဒီး, တၢ်အကတၢၢ်တအိၣ်ဒံးဘၣ်ဝဲဘၣ်. အဂ့ၢ်ဒ်အံၤ, ပှၤကညီတကလုာ် ကထီဒါ ပှၤကညီတကလုာ်, ဒီးတဘီတမုၢ် ကထီဒါ တဘီတမုၢ်လီၤ. ဒီးတၢ်အိၣ်ဝံၤအိၣ်ဃဲၤ တဖၣ်, ဒီးတၢ်ဆါသံသတြိာ်တဖၣ် ကအိၣ်ထီၣ်, ဒီးဟီၣ်ခိၣ်ကဟူးဝးဆှဲးဆှိးလၢအံၤတပူၤ လၢနုၤတပူၤလီၤ. တၢ်န့ၣ်တဖၣ် ခဲလၢာ်မ့ၢ်တၢ်နးတၢ်ဖှီၣ်အခီၣ်ထံးလီၤ. တုၤနုၤတစု, ပှၤကဟ့ၣ်လီၤကွံာ်သုဆူ တၢ်နးတၢ်ဖှီၣ်အပူၤ, ဒီးသုကဘၣ်တၢ်မၤသံသုလီၤ. ဒီးကယဲၢ်ပှၤကလုာ်ခဲလၢာ် ကမၤသံသုလၢ ယမံၤအဃိလီၤ. တုၤနုၤတစု ပှၤအသး ကဟးဂီၤဝဲအါဂၤ, ဒီးကဟ့ၣ်လီၤကွံာ်လိာ်အသး, ဒီးကသးဟ့လိာ်အသးလီၤ. ဒီးဝံအဘျၣ်ကအိၣ်ထီၣ်ဝဲအါဂၤ, ဒီးကလီန့ၢ်ပှၤကညီ အါဂၤလီၤ. ဒီးမ့ၢ်တၢ်တတီတလိၤဘၣ် ကအါထီၣ်ဒီး, ပှၤအါဂၤ အတၢ်အဲၣ်တၢ်ကွံ ကစှၤလီၤ ဝဲလီၤ. မ့မ့ၢ်ပှၤလၢအအိၣ်ဂၢၢ်ဆိးကျၢၤဝဲ တုၤအကတၢၢ်န့ၣ်, ကတုၤလၢ တၢ်အုၣ်က့ၤခီၣ်က့ၤလီၤ. ဒီးဘီမုၢ် အတၢ်သးခု ကစီၣ်အံၤ, ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ, လၢတၢ်အုၣ်အသးလၢ ပှၤကလုာ်ခဲလၢာ် အဂီၢ်လီၤ. တုၤနုၤတစု တၢ်အကတၢၢ်န့ၣ် ကဟဲဘၣ်ဝဲလီၤ. 

 ကစၢ်ခရံာ်အတၢ်ကတိၤလၢ လံာ်မးသဲ ၂၄ အပူၤအံၤ မ့ၢ်တၢ်တမံၤဃီဒီး တၢ်စဲပနီၣ်နွံဖျၢၣ်လၢ လံာ်တၢ်လီၣ်ဖျါ အပူၤန့ၣ်လီၤ. အဃိဖဲပအိၣ်မူလၢ ဟီၣ်ခိၣ်ချၢအံၤ, ပကဘၣ်သဂၢၢ်ဒီး တၢ်ကီတၢ်ခဲ တၢ်ဆါသံသတြိာ် တဖၣ်အံၤလီၤ. ဘၣ်ဆၣ်, တၢ်အကတၢၢ် တဟဲဒံးဘၣ်. တၢ်အကတၢၢ်တဟဲဒံးဘၣ်အဃိ, တဘၣ်ဆိကမိၣ်လၢ ကဘၣ်အိၣ် ဖှံဖှံညီညီ, ကနာ်ယွၤဖှံဖှံညီညီ, ကဘါထီၣ်ယွၤဖှံဖှံညီညီ န့ၣ်တဂ့ၤ. အဂ့ၢ်ဒ်အံၤ, တၢ်နးတၢ်ဖှီၣ်အံၤ ကဘၣ်ပှၤ တုၤလၢပကဘၣ်သံန့ၣ် အိၣ်ဝဲလီၤ.

ဘၣ်ဆၣ် ခရံာ်စံးဘၣ်ပှၤလၢ, မ့မ့ၢ်ပှၤလၢအအိၣ်ဂၢၢ်ဆိးကျၢၤဝဲတုၤအကတၢၢ်န့ၣ်, ကတုၤလၢ တၢ်အုၣ်က့ၤခီၣ်က့ၤလီၤ. လံာ်တၢ်လီၣ်ဖျါ ၂း၁၀ အကတၢၢ်တဒ့စံးဘၣ်ပှၤလၢ “အိၣ်နဲဆိးနဲလၢနကလုၢ်တီ တုၤနသံတက့ၢ်. ဒီးယကဟ့ၣ်နၤလၢ တၢ်မူအခိၣ်သလုးန့ၣ်လီၤ.” ပမ့ၢ်အိၣ်ဆိးလၢပကလုၢ်တီ တုၤပသံန့ၣ်, ကစၢ်ခရံာ်အနီၢ်ကစၢ်ဒၣ်ဝဲ စံးဘၣ်ပှၤလၢ အကစၢ်ဒၣ်ဝဲ ကဟ့ၣ်ပှၤတၢ်မူအခိၣ်သလုးလီၤ.

မ်ပကအိးဆိးလၢ ပကလုၢ်တီတုၤပသံ ကိးဂၤဒဲးတက့ၢ်. မ်ယွၤဆိၣ်ဂ့ၤအကလုၢ်အကထါ ဒီး ဆိၣ်ဂ့ၤ ပဝဲကိး ဂၤဒဲး တက့ၢ်.