လံာ်စီဆှံအဆၢဖိ အိၣ်ဝဲတနီၤ လၢအတဲပှၤ လီၤဂာ်ဒ်သိးဒီး ပသးသမူ မံသပ့ၤဝဲ ဖဲပသံဝံၤ အလီၢ်ခံ န့ၣ်လီၤ. ဖဲပှၤတဲဘၣ် ကစၢ်ခရံာ်လၢ စီၤလါစရူးသံဝဲ ဝံၤန့ၣ်, အဝဲအိၣ်ခိး ဒံးတၢ် တစိၢ်တလီၢ် တချုးအလဲၤ အိၣ်သကိး နီၢ်မၤရံဒီး နီၢ်မၤသၣ် န့ၣ်လီၤ. လီၢ်ခံကတၢၢ် ကစၢ်ခရံာ် တဲဘၣ်အပျဲၢ်အဘီၣ်, "... ပတခွါ လီၤလါစရူးမံသပ့ၤဝဲ, မ့မ့ၢ် ယလဲၤဒ်သိး ကထိၣ်ဂဲၤထီၣ်အီၤလီၤ." (ယိၤဟၣ် ၁၁း၁၁). အဝဲအံၤမ့ၢ် ကစၢ်ခရံာ် အတၢ်ကတိၤလိၤလိၤလၢ စီၤလါစရူးအံၤ "မံသပ့ၤဝဲ", ဒီးကစၢ်ခရံာ် အကစၢ်ဒၣ်ဝဲ ကလဲၤ "ထိၣ်ဂဲၤထီၣ်အီၤ" လၢ အတၢ်မံသပ့ၤ န့ၣ်လီၤ. ဝံၤအလီၢ်ခံ, ဖဲစီၤယၤအ့ရူး ကွဲမုာ် ကစၢ်ခရံာ် လၢအဟံၣ် လၢကမၤဘျါ အဖိမုၣ်အဆၢကတီၢ်, စီၤယၤအ့ရူးအဖိမုၣ် သံဝံၤအလီၢ်ခံ ကစၢ်ခရံာ်စံးဝဲ, "... တမ့ၢ်ဘၣ် ပိာ်မုၣ်ဖိသၣ် သံဘၣ်, မ့ၢ်အမံသပ့ၤလီၤ." (မၢ်ကူး ၅း၃၉).
လီၢ်ခံကတၢၢ် ဖဲစီၤပီလူး ကတိၤတၢ်ဘၣ်ဃး ကစၢ်ခရံာ်အတၢ်ဟဲက့ၤ ခံဘျီတဘျီ တၢ်စိာ်ထီၣ်ပှၤသံတ့ၢ် တဖၣ်အခါ, အဝဲစံးဝဲလၢ "... ပှၤလၢအမံ အဂ့ၢ်အကျိၤ ..." (၁ သ့း ၄း၁၃). တကးဒံးဘၣ်, စီၤပီလူး စံးအါထီၣ်, "အဂ့ၢ်ဒ်အံၤ, ပမ့ၢ်စူၢ်က့ၤနာ်က့ၤလၢ ယ့ၣ်ရှူးသံဝဲ, ဒီးဂဲၤဆၢထၢၣ်က့ၤဝဲဒီး, ပှၤလၢအမံလၢ ယ့ၣ်ရှူး အပူၤ တဖၣ်န့ၣ်, ယွၤကဒုးဟဲက့ၤထီၣ်အီၤ လၢအသိးဒ်န့ၣ် အသိးစ့ၢ်ကီးလီၤ." (၁ သ့း ၄း၁၄). ဖဲအံၤ စီၤပီလူး ကိးဝဲ ပှၤနာ်တၢ်ဖိလၢ အသံတဖၣ်လၢ "အမံသပ့ၤ" န့ၣ်လီၤ. စီၤပီလူး အတၢ်သိၣ်လိ လိၤလိၤ န့ၣ်မ့ၢ်ဝဲ, "အဂ့ၢ်ဒ်အံၤ, ကစၢ်အကစၢ်ဒၣ်ဝဲ ကဟဲလီၤလၢမူခိၣ် အိၣ်ဒီး တၢ်ကိးပသူ, ဒီးကလူး အခိၣ်တဂၤ အကလုၢ်သီၣ်, ဒီးအိၣ်ဒီးယွၤအကွဲၤဒီး, ပှၤလၢအသံလၢ ခရံာ်အပူၤတဖၣ်န့ၣ် ကဂဲၤဆၢထၢၣ်ဆိဝဲ, တုၤနုၤတစု, ပှၤလၢ အမူဒီး အိၣ်ဒံး ပဝဲဒၣ်အံၤ, တၢ်ကထုးထီၣ်န့ၢ်ပှၤ တပူၤဃီဒီး အဝဲသ့ၣ်, ဆူတၢ်အၢၣ်ပူၤ, ဒ်သိး ပကသဂၢၢ်ကစၢ်လၢ မူကပိာ်လိၤ, ဒီးပကအိၣ်ဒီး ကစၢ် အစိၤစိၤ အဃၣ်ဃၣ်ဒ်န့ၣ်လီၤ." (၁ သ့း ၄း၁၆-၁၇).
ပမ့ၢ်ကွၢ်အီၤထံထံန့ၣ်, လံာ်စီဆှံ အဆၢဖိ တဖၣ်အံၤ တသိၣ်လိပှၤလၢ ပသးသမူအံၤ မံသပ့ၤဝဲဘၣ်, မ့မ့ၢ်တခီ ပနီၢ်ခိအံၤ အိၣ်လၢတၢ်သွၣ်ခိၣ်အပူၤ, ဒီး တၢ်သံအံၤ တၢ်ဒိလီၤအီၤဒ် တၢ်မံသပ့ၤ အသိး န့ၣ်လီၤ. စီၤပီလူး စံးဝဲ ဖဲပသံ အဆၢကတီၢ်န့ၣ်, "... ဒီးဘၣ်ပသးလၢ ပအိၣ်ယံၤဒီး ပနီၢ်ခိ ဒီး အိၣ်ဒီးကစၢ်လီၤ." (၂ ကရံၣ်သူး ၅း၈). ဖဲတၢ်သံအဆၢကတီၢ်, ပှၤခရံာ်ဖိ အသးသမူ လဲၤနုာ်ဆူကစၢ်ယွၤအမဲာ်ညါ တဘျီဃီ န့ၣ်လီၤ. ကစၢ်ခရံာ် တဲဘၣ်ပှၤ ဘၣ်ဃး ပှၤဃ့အီၣ်တၢ် လၢအမ့ၢ်စီၤလါစရူး တဂၤ အတၢ်သံ ဒီးစံးဝဲလၢ, "ဒီးတၢ်မၤအသးလၢ ပှၤဖှီၣ်ဖိယာ်ဖိ တဂၤန့ၣ်သံဝဲ, ဒီးကလူး တဖၣ်စိာ် ထီၣ်အီၤဆူ စီၤအၤဘြၤဟၣ် အသးနါပှၢ်အပူၤလီၤ. ဒီးပှၤအထူးအတီၤန့ၣ် သံစ့ၢ်ကီးဝဲ, ဒီးတၢ်ခူၣ်လီၤအီၤလီၤ." (လူၤကၣ် ၁၆း၂၂). ပှၤထူးပှၤတီၤ တဂၤန့ၣ် အသးသမူ တမံသပ့ၤဘၣ်. မ့ၢ်လၢ လံာ်စီဆှံ စံးဘၣ်ပှၤလၢ, "ဒီးဘၣ်တၢ်ဆိးကဲးဆိးလီ, ဒီးကျ့ထီၣ်အမဲာ်လၢ ပျုၤပူၤ..." (လူၤကၣ် ၁၆း၂၃). ပှၤထူးပှၤတီၤ တဂၤန့ၣ် ထံၣ်လီၤအသးလၢ အအိၣ်လၢ ပျုၤပူၤန့ၣ်လီၤ. မ့မ့ၢ် စီၤလါစရူးတခီမီၣ်. "ဒီးထံၣ်ထီၣ်သကွ့ၤစီၤအၤဘြၤဟၣ်, ဒီးစီၤလါစရူး အိၣ်လၢအသးနါပှၢ်အပူၤလီၤ." (လူၤကၣ် ၁၆း၂၃). စီၤလါစရူးအသးသမူ တမံသပ့ၤ စ့ၢ်ကီးဘၣ်. အိၣ်ဒီးစီၤအၤဘြၤဟၣ်လၢ ပၤရဒံစူး အပူၤန့ၣ်လီၤ.
တၢ်မၤအသးအဂၤတဘျီ န့ၣ်မ့ၢ်ဝဲ ကစၢ်ခရံာ် တဲဘၣ်တၢ်ဘျၣ်လၢ အပီၢ်ယၢ်လီၤက့ၤအသး လၢထူၣ်စုညါ လိၤတဂၤန့ၣ်, "... ခဲမုၢ်ဆါအံၤ နကအိၣ်ဒီးယၤလၢ ပၤရဒံစူး အပူၤလီၤ." (လူၤကၣ် ၂၃း၄၃). အဝဲအံၤ တဖျါလီၤဂာ်လၢ သးသမူ မံသပ့ၤဝဲ န့ၣ်ဘၣ်.
လံာ်စီဆှံအဆၢလၢ ပဝဲတနီၤသူဝဲဒ်သိး ကမၤစၢၤ ပတၢ်နာ်ဘၣ်ဃး "သးသမူအတၢ်မံသပ့ၤ" လၢအမ့ၢ်, ကစၢ်ခရံာ်အတၢ်ကတိၤ ဘၣ်ဃး စီၤလါစရူး ဒီး စီၤယၤအ့ရူး အဖိမုၣ် ဘၣ်ဃး တၢ်မံသပ့ၤ န့ၣ်, အနီၢ်ကီၢ်န့ၣ် တမ့ၢ် ကစၢ်ခရံာ်အဲၣ်ဒိးတဲလၢ အဝဲသ့ၣ်အသးသမူ မံသပ့ၤဝဲ န့ၣ်ဘၣ်, မ့မ့ၢ်တခီ အနီၢ်ခိ မံသပ့ၤဝဲ လၢတၢ်သွၣ်ခိၣ်အပူၤ တုၤလၢ တၢ်ဂဲၤဆၢထၢၣ်သမူထီၣ်က့ၤ တစု န့ၣ်လီၤ. အဝဲအံၤမ့ၢ် လံာ် ၁ သ့းစၤလနံ ၄း၁၃-၁၈ အတၢ်သိၣ်လိ ပှၤန့ၣ်လီၤ.
0 Comments