တၢ်မၤနၢၤသးသမူအတၢ်ဒုး (၂ကွဲးနီၣ်တၢ် ၂၀း၃, ၁၂, ၁၅-၁၇, ၂၁)

ဘီမုၢ်လီၤဖးခံဘ့ၣ်, အံၣ်စရ့လးဒီးယူဒၤ

ဒီးစီၤယဟိရှၤဖးပျံၤတၢ်, ဒီးဃၣ်ဃီၤအသးဒ်သိး အကဃုယွၤလီၤ. ဒီးကိးထီၣ် တၢ်ဒုၣ်တၢ်အီၣ်လၢ ယူဒၤဖိ ခဲလၢာ်အကျါလီၤ. (၂ကွဲးနီၣ်တၢ် ၂၀း၃)

ပကစၢ်ဧၢ, နတစံၣ်ညီၣ်အီၤဘၣ်ဧါ. အဂ့ၢ်ဒ်အံၤ, ပဂံၢ်ပဘါတအိၣ်ဘၣ်လၢ ပှၤဂီၢ်မုၢ်ဖးဒိၣ် အမဲာ်ညါ လၢအဟဲထီဒါ ပှၤအံၤဘၣ်. ဒီးပကမၤဒ်လဲၣ်ဒ်လဲၣ်န့ၣ် ပတသ့ၣ်ညါဘၣ်. (၂ ကွဲးနီၣ်တၢ် ၂၀း၁၂)

ဒီးစံးဝဲဒၣ်, ကယဲၢ်ယူဒၤဖိ, ဒီးပှၤအိၣ်ဝဲဆိးဝဲလၢ ယရူၤရှလ့ၣ်အပူၤ သုဝဲဒၣ်, ဒီးနဲဒၣ် စီၤပၤယဟိရှၤဖးဧၢ, ကနၣ်တက့ၢ်. ယွၤစံးဘၣ်သုဒ်အံၤ, ပျံၤတၢ်တဂ့ၤ. ဒီးဘၣ်ယိၣ်တၢ်လၢ ပှၤဂီၢ်မုၢ်ဖးဒိၣ်အံၤ အဃိတဂ့ၤ. အဂ့ၢ်ဒ်အံၤ, တၢ်ဒုးသုးန့ၣ် တမ့ၢ်ဘၣ်သုတၢ်ဘၣ်. မ့ၢ်ယွၤအတၢ်လီၤ. ခဲဂီၤတနံၤန့ၣ် လဲၤလီၤဆူအအိၣ်တက့ၢ်. ကွၢ်ကွၢ်, ဟဲထီၣ်ဝဲလၢ စံာ်အစိခိၣ်, ဒီးသုကထံၣ်န့ၢ်အီၤလၢ ထံကျိဖိ အကတၢၢ်လၢ ပှၢ်မုၢ်ကနၢ ယရူၤအ့လး အမဲာ်ညါလီၤ. သုတဒုးဘၣ်လၢ တၢ်အံၤအပူၤဘၣ်. ပာ်ဆၢထၢၣ် သုသး, ဒီးဆၢထၢၣ်, ဒီး ထံၣ်ဘၣ်ယွၤ အတၢ်အုၣ်က့ၤခီၣ်က့ၤ အိၣ်ဒီးသုတက့ၢ်. ယူဒၤ, ဒီးယရူၤရှလ့ၣ်သ့ၣ်ဧၢ, ပျံၤတၢ်တဂ့ၤ. ဘၣ်ယိၣ်တၢ် တဂ့ၤ, ခဲဂီၤကိာ်န့ၣ် လဲၤထီၣ်ဆူ အအိၣ်တက့ၢ်. အဂ့ၢ်ဒ်အံၤ, ယွၤအိၣ်ဝဲဒီးသု လီၤ. (၂ကွဲးနီၣ်တၢ် ၂၀း၁၅-၁၇)

ဒီးကူၣ်လိာ်အသးဒီး ပှၤဂီၢ်မုၢ်ဝံၤဒီး, ပာ်ပှၤသးဝံၣ်ယွၤဖိ, ဒီးပှၤလၢ အကစံးထီၣ်ပတြၢၤ တၢ်စီဆှံ အဃံအလၤ, ဖဲအလဲၤထီၣ်လၢ ပှၤသုးမုၢ်အမဲာ်ညါ အဖၢမုၢ်ဒီး စံး, စံးထီၣ်ပတြၢၤယွၤ တက့ၢ်. အဂ့ၢ်ဒ်အံၤ, အဘျုး အဖှိၣ်အိၣ်ဝဲ လီၤစိၤလီၤထီလီၤ. (၂ကွဲးနီၣ်တၢ် ၂၀း၂၁)

တၢ်ကတိၤလၢညါ

ပဝဲကိးဂၤဒဲး ပအိၣ်ဒီး တၢ်ကိၢ်တၢ်ဂီၤ, တၢ်ကီတၢ်ခဲ, တၢ်ဘၣ်ယိၣ်ဘၣ်ဘီ လၢပဂီၢ်, လၢပဟံၣ်ဖိဃီဖိ အဂီၢ် လၢပဘူးပတံၢ်အဂီၢ်, ဒီးလၢပပှၤကလုာ်အဂီၢ် န့ၣ်လီၤ. တၢ်ကိၢ်တၢ်ဂီၤ တၢ်ကီတၢ်ခဲတဖၣ်အံၤ မ့ၢ်ဒၣ် သးသမူ အတၢ်ဒုး လၢပဘၣ်ဒုးအီၤ လၢတနံၤဘၣ်တနံၤ အတီၢ်ပူၤန့ၣ်လီၤ. ပဝဲတနီၤ ပဂုာ်ကျဲးစၢးမၤနၢၤ တၢ်ကီတၢ်ခဲတဖၣ် လၢပဂံၢ်ပဘါ, ပတၢ်ကူၣ်တၢ်ဆးဒၣ်ပဝဲလီၤ. ဘၣ်ဆၣ် အါစုအါဘျီ ပတၢ်ဂုာ်ကျဲးစၢး တဖၣ် တကဲထီၣ်လိၣ်ထီၣ် တၢ်ဘၣ်အဃိ, ပသးလီၤဘှံးလီၤဘှါ ဝဲန့ၣ်အိၣ်ဝဲဒၣ်လီၤ.

ဘၣ်ဆၣ် တနံၤအံၤ အတၢ်ကစီၣ်လၢအမ့ၢ် "တၢ်မၤနၢၤ သးသမူအတၢ်ဒုး" အံၤ ပကမၤလိသကိး စီၤပၤတဂၤလၢ အအိၣ်လၢလံာ်စီဆှံလီၢ်လံၤအပူၤ တဂၤ အဂ့ၢ်န့ၣ်လီၤ. စီၤပၤတဂၤအံၤ မ့ၢ်ဝဲ စီၤပၤယဟိရှၤဖး လၢအမ့ၢ် ယူဒၤအစီၤပၤန့ၣ်လီၤ. ဖဲန့ၣ်အဆၢကတီၢ် ယူဒၤ ဒီး အံၣ်စရ့လး မ့ၢ်ဝဲဘီမုၢ်ခံဘ့ၣ် လၢအလီၤဖးလိာ်အသး ဒီး အိၣ်ဒီး အကစၢ်ဒၣ်ဝဲ အစီၤပၤစုာ်စုာ်န့ၣ်လီၤ. အံၣ်စရ့လး အစီၤပၤတဖၣ် အါတက့ၢ်မ့ၢ် ပှၤလၢ အဘါထီၣ်တၢ်ဂီၤတၢ်ဖီၣ်, ဒီးပှၤလၢ တလဲၤဒ်ယွၤ အတၢ်ဘၣ်သး တဖၣ်န့ၣ်လီၤ. မ့မ့ၢ် ယူဒၤတခီ စီၤပၤအိၣ်ဒံးတဘျုးဂၤလၢ အမၤဒ်ယွၤ အတၢ်ဘၣ်သးအသိး န့ၣ်လီၤ. လၢအကျါ, စီၤပၤယဟိရှၤဖး မ့ၢ်ပှၤလၢ အမၤဒ်ယွၤ အတၢ်ဘၣ်သးအသိး, မၤဟးဂီၤကွံာ်တၢ်ဂီၤတၢ်ဖီၣ် တၢ်လုၢ်လီၢ် တဖၣ်, ဒီးအိၣ်ဒီး တၢ်စူၢ်တၢ်နာ်လၢ ယွၤအပူၤန့ၣ်လီၤ.

၂ကွဲးနီၣ်တၢ် အဆၢဒိၣ် ၂၀ အပူၤ ပကထံၣ်ဘၣ် စီၤပၤယဟိရှၤဖး အတၢ်စူၢ်တၢ်နာ်လၢယွၤအပူၤ န့ၣ်လီၤ. ပှၤကလုာ်ဖးဒိၣ်သၢကလုာ် လၢအမ့ၢ် ပှၤမိၤအးဖိ, ပှၤဧၣ်မိၣ်ဖိ, ဒီးပှၤမူနးဖိ တဖၣ်ပာ်ဖှိၣ်ထီၣ်အသး ဒ်သိး ကဟဲဒုးတၢ်ဒီးအီၤန့ၣ်လီၤ. တုၤအနၢ်ဟူတဘျီဃီ, အဝဲပျံၤတၢ် ဘၣ်ဆၣ် ကိးထီၣ်ယွၤ ခီဖျိ တၢ်ထုကဖၣ် ဒီး တၢ်ဒုၣ်တၢ်အီၣ် န့ၣ်လီၤ. လၢတၢ်န့ၣ်အဃိ, ကစၢ်ယွၤစံးဘၣ်အီၤ ဒ်သိးအသုတပျံၤတၢ်တဂ့ၤဒီး စံးဝဲလၢ တၢ်ဒုးတၢ်ယၤန့ၣ် မ့ၢ်ယွၤအတၢ်လီၤ, တမ့ၢ်ပှၤကညီအတၢ်ဘၣ်. လီၢ်ခံကတၢၢ် ပကထံၣ်ဘၣ်လၢ, ဒုၣ်ဒါတဖၣ် မၤသံလိာ်အသးကဒဲကဒဲ ဒီး မၤနၢၤစီၤပၤယဟိရှၤဖး တန့ၢ်ဘၣ်န့ၣ်လီၤ.

လၢတၢ်ဂ့ၢ်အံၤအဖီခိၣ်, ပကမၤလိသကိး တၢ်ဂ့ၢ်ဃုမံၤလၢ စီၤပၤယဟိရှၤဖး အအိၣ်လၢအဘၣ်ဃး ပကဘၣ်မၤနၢၤ သးသမူ အတၢ်ဒုးဒ်လဲၣ်ဒ်လဲၣ်န့ၣ်လီၤ.

၁. သ့ၣ်ညါနဒုၣ်နဒါ

ပဂံၢ်ပဘါတအိၣ်ဘၣ်လၢ ပှၤဂီၢ်မုၢ်ဖးဒိၣ်အမဲာ်ညါ လၢအဟဲထီဒါပှၤအံၤဘၣ်. (၂ကွဲးနီၣ်တၢ် ၂၀း၁၂)

ပဝဲအါဒံအါဂၤ ပတသ့ၣ်ညါလီၤတံၢ် ပဒုၣ်ပဒါမ့ၢ် မတဂၤလဲၣ် န့ၣ်ဘၣ်. အါတက့ၢ် ပဆိမိၣ်ဒၣ်ထဲလၢ ပဒုၣ်ပဒါမ့ၢ် ပှၤလၢအသးစဲလၢ ကဟံးန့ၢ်ကွံာ် ပတၢ်ဖံးတၢ်မၤ, ပဖိပမါ, ပဖိပဝၤ, ဒီး ပကျိၣ်ပစ့တဖၣ် န့ၣ်လီၤ. ဘၣ်ဆၣ်, အါစုအါဘျီ ပဒုၣ်ပဒါမ့ၢ် ပကစၢ်ဒၣ်ဝဲ အတၢ်ပာ်သူၣ်ပာ်သး န့ၣ်လီၤ. တမ့ၢ်တၢ်လၢ အဟဲလၢတၢ်ချၢ မၤလီၤဃံၤပှၤဘၣ်, မ့ၢ်ဒၣ် ပကစၢ်ဒၣ်ဝဲ ပတၢ်ပာ်သူၣ်ပာ်သး, ပတၢ်ဖံးတၢ်မၤလၢ တၢ်အိၣ်သး အဖီခိၣ်န့ၣ်လီၤ. လၢတၢ်န့ၣ်အဃိ, တချုးနမၤနၢၤဒံး တၢ်ဘၣ်န့ၣ်, အဆိကတၢၢ် နကဘၣ်သ့ၣ်ညါ နဒုၣ်နဒါ န့ၣ်လီၤ. ဖဲစီၤပၤယဟိရှၤဖး နၢ်ဟူလၢ ပှၤဂီၢ်မုၢ်ဖးဒိိၣ်, ပှၤသၢကလုာ်လၢအမ့ၢ် ပှၤမိၤအးဖိ, ပှၤဧၣ်မိၣ်ဖိ, ပှၤမူနးဖိ, ဟဲထီဒါအီၤလၢ ပီၣ်လဲၣ်ဝၢ်ဘးခီလၢ အဒိၣ်တကပၤအခါ, တၢ်လၢစီၤပၤယဟိရှၤဖး မၤဝဲအဆိကတၢၢ်န့ၣ်, အဝဲမ့ၢ်ပျံၤတၢ်ဘၣ်ဆၣ် အဝဲဃၣ်အသးဒ်သိး အကဃုယွၤလီၤ. (၂ကွဲးနီၣ်တၢ် ၂၀း၂-၃). အါစုအါဘျီ ဖဲတၢ်ကီတၢ်ခဲဖးဒိၣ် ဟဲတုၤအိၣ်ပှၤအခါ, တၢ်ပျံၤတၢ်ဖုးလီၤဘၣ်ပှၤ ဒီးပဘၣ်ယိၣ်လၢ တၢ်ကဟဲကဲထီၣ်အသးဒီးပှၤ ဒ်လဲၣ်န့ၣ်လီၤ. အနီၢ်ကီၢ်န့ၣ်, တၢ်ပျံၤတၢ်ဖုး တမ့ၢ်တၢ်ကမၣ်ဘၣ်, ထဲဒၣ်ဖဲလၢ ပသူအီၤလၢကျဲလၢအကမၣ် အပူၤမး တၢ်ပျံၤတၢ်ဖုးအံၤ ကဲထီၣ်တၢ်ကမၣ်န့ၣ်လီၤ. ပသူတၢ်ပျံၤတၢ်ဖုး ဒ်သိး ကဟ့ၣ်အါထီၣ်ပှၤ တၢ်ဂံၢ်တၢ်ဘါဒ်သိး ပကမၤနၢၤ တၢ်ကီတၢ်ခဲ တဖၣ် ဒီး ဒ်သိး ကဆှၢပှၤဘူးထီၣ်ဆူ ကစၢ်ယွၤ အအိၣ်န့ၣ်လီၤ.

ဖဲပဘၣ်သဂၢၢ်လိာ်သးဒီး တၢ်ကီတၢ်ခဲအဆၢကတီၢ်, ပဟ့ၣ်အဃၣ်, ပသးဒိၣ်ထီၣ်, ဒီးပသံကွၢ်ကစၢ်ယွၤ "ယွၤဧၢ ဘၣ်မနုၤတၢ်အံၤ ကဲထီၣ်အသးဒီးယၤလဲၣ်." တၢ်မ့ၢ်ကဲထီၣ်အသးဒီးပှၤဒ်န့ၣ်, တၢ်ပျံၤတၢ်ဖုး မၤနၢၤပှၤ န့ၣ်လီၤ.

နမ့ၢ်အိၣ်ဘၣ်လၢ တၢ်အိၣ်အသးလၢ အပှဲၤဒီး တၢ်ပျံၤတၢ်ဖုး, ဒီးတၢ်ကိၢ်တၢ်ဂီၤ လၢတနံၤအံၤန့ၣ်, သ့ၣ်နီၣ်ထီၣ်, ကစၢ်ယွၤတစံးဆၢ တၢ်ခီဖျိ နတၢ်လိၣ်ဘၣ်အဃိဘၣ်, မ့မ့ၢ်တခီ စံးဆၢတၢ်ခီဖျိ နတၢ်နာ် အဃိ န့ၣ်လီၤ. လၢတၢ်န့ၣ်အဃိ, ပာ်လီၤနတၢ်နာ် လၢအကလုၢ်ကထါအပူၤ, ဒီးဆၢထၢၣ်ဂၢၢ်ဂၢၢ်ကျၢၤကျၢၤလၢ အတၢ်အၢၣ်လီၤအပူၤ န့ၣ်တက့ၢ်.

ကစၢ်ယွၤအတၢ်အၢၣ်လီၤပှၤ ပကထံၣ်ဘၣ်အီၤဖဲ ဝံယရှါယၤ ၄၁း၁၀ အပူၤစံးဝဲ -

ပျံၤတၢ်တဂ့ၤ. အဂ့ၢ်ဒ်အံၤ, ယအိၣ်ဒီးနၤလီၤ. ကွၢ်တရံးတၢ်တဂ့ၤ, အဂ့ၢ်ဒ်အံၤ, ယမ့ၢ်နကစၢ်လီၤ. ယဒုးဆူၣ် ထီၣ်လံနဂံၢ်နဘါလံ, မ့ၢ်မး ယမၤစၢၤလံနၤလံ. မ့ၢ်မး ယဒုးအိၣ်ကျၢၤလံနၤ လၢယစုထွဲ အတီအလိၤ န့ၣ်လီၤ.

၂. သ့ၣ်ညါနတၢ်ဂံၢ်ဆံးဘါစၢ်

ဒီးပကမၤဒ်လဲၣ်ဒ်လဲၣ်န့ၣ် ပတသ့ၣ်ညါဘၣ်. မ့မ့ၢ်ပမဲာ်အိၣ်လၢ နအိၣ်လီၤ. (၂ကွဲးနီၣ်တၢ် ၂၀း၁၂)

ပှၤလၢကစၢ်ယွၤ မၤစၢၤအီၤတသ့ တဖၣ် မ့ၢ်ဒၣ်ထဲလၢ ပှၤလၢ အဆိမိၣ်လီၤအသးလၢ တလိၣ်ယွၤအတၢ်မၤစၢၤဘၣ် တဖၣ်န့ၣ်လီၤ. စီၤပၤယဟိရှၤဖး စံးဝဲ, "အဂ့ၢ်ဒ်အံၤ, ပဂံၢ်ပဘါ တအိၣ်ဘၣ်လၢ ပှၤဂီၢ်မုၢ်ဖးဒိၣ် အမဲာ်ညါလၢ အဟဲထီဒါ ပှၤအံၤဘၣ်. ဒီးပကမၤဒ်လဲၣ်ဒ်လဲၣ်န့ၣ် ပတသ့ၣ်ညါဘၣ်." (၂ကွဲးနီၣ်တၢ် ၂၀း၁၂). အါစုအါဘျီ ပကွၢ်တၢ်ဆူ ပှၤဂၤအိၣ်, ဒီးဆူ တၢ်အဂၤအအိၣ်, ဘၣ်ဆၣ် ပတကွၢ်တၢ်ဆူ ယွၤအအိၣ်, ပှၤလၢ အမၤစၢၤပှၤသ့တဂၤ အအိၣ်န့ၣ်ဘၣ်. ပတၢ်အိၣ်သးတဖၣ် လီၤဂာ်ဒီး လီၢ်ခူလၢပမံနီၤ လၢအလိၤန့ၣ်လီၤ. ပမ့ၢ်အိၣ်လၢ လီၢ်ခူအလိၤန့ၣ်, ပအိၣ်ဘှံးအိၣ်သါ သ့ညီညီကဒၣ်, ဘၣ်ဆၣ် ပမ့ၢ်အိၣ်လၢ လီၢ်ခူအဖီလာ်ဒု ယံာ်ယံာ် ပကသါတသ့လၢၤဘၣ်. လၢတၢ်န့ၣ်အဃိ, ကွၢ်တၢ်ဆူ ကစၢ်ယွၤအအိၣ် ဒီးနကမၤနၢၤ တၢ်ကီတၢ်ခဲလၢ ကဟဲဘၣ်နၤန့ၣ်လီၤ.

စီၤပၤယဟိရှၤဖး သ့ၣ်ညါ အဒုၣ်အဒါ, အဒုၣ်အဒါဒိၣ်ဝဲမုၢ်ဝဲ, ဒီးသ့ၣ်ညါစ့ၢ်ကီး အတၢ်ဂံၢ်စၢ်ဘါစၢ် သတးဒီး အဝဲအမဲာ်အိၣ်လၢ ကစၢ်ယွၤအအိၣ် အဃိ ကစၢ်ယွၤ ကမၤစၢၤအီၤလီၤန့ၣ် ပသမၢတသ့ဘၣ်.

၃. အးလီၤနတၢ်ကီတၢ်ခဲဆူယွၤအအိၣ်

ဒီးစီၤယဟိရှၤဖးပျံၤတၢ်, ဒီးဃၣ်အသးဒ်သိး အကဃုယွၤလီၤ. (၂ကွဲးနီၣ်တၢ် ၂၀း၃)

ဖဲစီၤပၤယဟိရှၤဖး ဘၣ်သဂၢၢ်ဒီး တၢ်ကီတၢ်ခဲအဆၢကတီၢ်, အဝဲဃၣ်အသးဒ်သိး အကဃုယွၤ ဒီး ကိးထီၣ် တၢ်ဒုၣ်တၢ်အီၣ် န့ၣ်လီၤ. ပတၢ်အိၣ်မူအပူၤ ညီနုၢ်တၢ်လၢ အမၤအသးဒီးပှၤန့ၣ် မ့ၢ်ဝဲ ပဃုဆိ တၢ်မၤစၢၤလၢ တၢ်အဂၤအအိၣ်, ဒီး တၢ်ထုကဖၣ်မ့ၢ် တၢ်လီၢ်ခံကတၢၢ်တမံၤလၢ ပဆိမိၣ်အီၤန့ၣ်လီၤ. ဘၣ်မနုၤအဃိ ပမၤအီၤဒ်အံၤလဲၣ်. မ့ၢ်လၢ ပအဲၣ်ဒိး ဘှါလီၤက့ၤ တၢ်ကီတၢ်ခဲလၢ ပကစၢ်ဒၣ်ဝဲ ပဂံၢ်ပဘါ အဃိ န့ၣ်လီၤ.

တၢ်အိၣ်ဖှိၣ်သဲၣ်ထီးတဂၤ လဲၤဆူ တၢ်အိၣ်ဖှိၣ်သရၣ်အအိၣ် ဒီး စံးဝဲ, "သရၣ်ဧၢ, ပဘၣ်သဂၢၢ်ဒီး တၢ်ကီတၢ်ခဲဖးဒိၣ်တမံၤလၢ ပဘှါလီၤအီၤ တန့ၢ်ဘၣ်. ပဂုာ်ကျဲးစၢး လၢကျဲအဘိဘိဘၣ်ဆၣ် တကဲထီၣ်လိၣ်ထီၣ် နီတမံၤဘၣ်." သရၣ်န့ၣ်တဲဘၣ်အီၤ, "ဂ့ၤလံ, တၢ်လၢပမၤသ့တမံၤန့ၣ် ပကဘါထုကဖၣ်လၢ တၢ်ဂ့ၢ်အံၤမီၤ." သဲၣ်ထီးန့ၣ် တဲဆၢက့ၤအီၤ, "သရၣ်ဧၢ, ကြၢးပဘါထုကဖၣ်လၢ အဂ့ၢ်လံဧါ." ဖဲပဘၣ်သဂၢၢ်ဒီး သးသမူ အတၢ်ဒုးအဆၢကတီၢ်, တၢ်ထုကဖၣ် ကဘၣ်မ့ၢ် တၢ်စုကဝဲၤ အဆိကတၢၢ်လၢနဂီၢ်, တဘၣ်မ့ၢ် တၢ်လီၢ်ခံကတၢၢ်ဘၣ်. ဒီးတဘျီတခီၣ်ဖဲ တၢ်ထုကဖၣ်တမံၤဧိၤ ဘှါလီၤက့ၤ တၢ်ကီတၢ်ခဲ တသ့ဘၣ် အဆၢကတီၢ်, ကစၢ်ယွၤဆှၢနၤလၢ နကမၤအါထီၣ်တၢ်စုကဝဲၤ အဂၤတခါလၢ အမ့ၢ် တၢ်ဒုၣ်တၢ်အီၣ် န့ၣ်လီၤ.

စီၤကန့လံး လၢအမ့ၢ် ပှၤတခီဘီမုၢ်ဖိတဂၤ ဒုၣ်တၢ်အီၣ်ဒီး ဘါထုကဖၣ်လၢ လွံၢ်သီအတီၢ်ပူၤ, ဃ့ကစၢ်ယွၤလၢ ကပၢကဆှၢအီၤန့ၣ်လီၤ. လၢတၢ်န့ၣ်အဃိ, ကစၢ်ယွၤဆှၢလီၤ စီၤပ့းတရူး ဆူအဟံၣ်ဒ်သိး ကတဲတၢ်သးခုကစီၣ် ဆူ ပှၤတခီဘီမုၢ်ဖိတဖၣ် အဂီၢ်န့ၣ်လီၤ. စးထီၣ်ဖဲန့ၣ် ခရံာ်အတၢ်သးခုကစီၣ် ရၤလီၤအသးဆူ တခီဘီမုၢ် အအိၣ်န့ၣ်လီၤ. (မၤတၢ် ၁၀).

လၢလံာ်မၤတၢ်အပူၤ, ဖဲပှၤတၢ်မၢဖိတဖၣ် ကဃုထၢထီၣ် ခိၣ်နၢ်တဖၣ်အဆၢကတီၢ်, အဝဲသ့ၣ် ဒုၣ်တၢ်အီၣ်, ဘါထုကဖၣ်ဒီး ဃ့ကစၢ်ယွၤ အတၢ်ပၢတၢ်ဆှၢန့ၣ်လီၤ. လၢတၢ်ဂ့ၢ်အံၤအဃိ, စီၤပီလူး ဒီး စီၤဘၢ်နါဘၤ ကဲထီၣ်ကစၢ်ယွၤ အပှၤဒိးဖူအသးလၢ ကစိာ်ခရံာ်တၢ်သးခုကစီၣ်ဆူ တခီဘီမုၢ်တဖၣ် အအိၣ်န့ၣ်လီၤ. (မၤတၢ် ၁၃း၂-၃). အဃိ ဖဲနဘၣ်သဂၢၢ်ဒီး တၢ်ကီတၢ်ခဲ တဘျီလၢ်လၢ်, ဖဲနပာ်နသးစၢၢ်ဆၢ လၢ တၢ်ထုကဖၣ် ဒီးတၢ်ဒုၣ်တၢ်အီၣ်န့ၣ်, ကစၢ်ယွၤကဒုးနဲၣ်နၤ တၢ်လၢနကဘၣ်မၤအီၤ န့ၣ်လီၤ.

၄. အိၣ်ဂၢၢ်အိၣ်ကျၢၤလၢနတၢ်စူၢ်တၢ်နာ်အပူၤ

အဂ့ၢ်ဒ်အံၤ, တၢ်ဒုးသုးန့ၣ် တမ့ၢ်ဘၣ်သုတၢ်ဘၣ်, မ့ၢ်ယွၤအတၢ်လီၤ. (၂ကွဲးနီၣ်တၢ် ၂၀း၁၅)

ဖဲအံၤ ပကထံၣ်ဘၣ် ကစၢ်ယွၤစံးဆၢ စီၤပၤယဟိရှၤဖး အတၢ်ထုကဖၣ်ဒ်လဲၣ် န့ၣ်လီၤ. "တၢ်ဒုးသုးန့ၣ် တမ့ၢ်ဘၣ်သုတၢ်ဘၣ်, မ့ၢ်ယွၤအတၢ်လီၤ." ပဝဲဒၣ်အါဒံအါဂၤ သိးထီၣ်ပကစၢ်ဒၣ်ဝဲ ပတၢ်စုကဝဲၤ တၢ်ပီးတၢ်လီ ဒ်သိး ပကဒုးယွၤ အတၢ်ဒုးလၢ ပကစၢ်ဒၣ်ဝဲ ပဂံၢ်ပဘါန့ၣ်လီၤ. ဘၣ်ဆၣ် တုၤပဂုာ်ကျဲးစၢး လၢပကစၢ်ဒၣ်ပဝဲ ဒ်န့ၣ်ဝံၤအလီၢ်ခံ, တၢ်မ့ၢ်တၢ်တီ ဟဲဖျါထီၣ်ဝဲလီၤ. လီၢ်ခံကတၢၢ်, ပဘျိၣ်ကဒါက့ၤ ပသး, ပတီၤလီၤ လၢပခီၣ်လ့ၣ်ခိၣ်, ဒီး ပသးဂံၢ်ဘါ လီၤစၢ်ဝဲန့ၣ်လီၤ. လၢတၢ်န့ၣ်အဃိ, အလီၢ်အိၣ်ဝဲလၢ ပကအိၣ်ဂၢၢ်လၢ ပတၢ်စူၢ်တၢ်နာ်အပူၤ ဒီး ပကပျဲယွၤ ဒုးတၢ် ခီဖျိလၢပှၤ တက့ၢ်. ခီဖျိ စီၤပၤယဟိရှၤဖး အတၢ်စူၢ်တၢ်နာ်အိၣ်ဂၢၢ်အိၣ်ကျၢၤလၢ ကစၢ်ယွၤအပူၤအဃိ, ကစၢ်ယွၤ ကဒုးတၢ်လၢအဂီၢ်န့ၣ်လီၤ. တၢ်ဒုးသုးန့ၣ် တမ့ၢ်ပတၢ်ဘၣ်, မ့ၢ်ယွၤအတၢ်လီၤ. ဒ်စီၤပၤယဟိရှၤဖး အသိး, ပကအိၣ်ဂၢၢ်ကျၢၤလၢ ပတၢ်စူၢ်တၢ်နာ်အပူၤတက့ၢ်.

၅. ဆၢထၢၣ်ဂၢၢ်ဂၢၢ်ကျၢၤကျၢၤ

ပာ်ဆၢထၢၣ်သုသး, ဒီးဆၢထၢၣ်, ဒီးထံၣ်ဘၣ် ယွၤအတၢ်အုၣ်က့ၤခီၣ်က့ၤ အိၣ်ဒီး သုတက့ၢ်. (၂ကွဲးနီၣ်တၢ် ၂၀း၁၇)

ဖဲအံၤပကထံၣ်ဘၣ်, ကစၢ်ယွၤစံးဘၣ် စီၤပၤယဟိရှၤဖး လၢ, "ပာ်ဆၢထၢၣ်သုသး, ဒီးဆၢထၢၣ်", ပာ်ဆၢထၢၣ်သုသး အံၤ ဖဲတၢ်ကီတၢ်ခဲ အဆၢကတီၢ် အခီပညီ ကမ့ၢ်ဒ်လဲၣ်. မ့ၢ်ဝဲ နီၣ်သးအတၢ်ပာ်သူၣ်ပာ်သး လၢအအိၣ်ဒီး တၢ်ပာ်သးကျၢၤမူဆှူ လၢအမ့ၢ်, "ယကနာ်ကစၢ်ယွၤလၢလၢပှဲၤပှဲၤ" န့ၣ်လီၤ.

Rick Warren ကွဲးဝဲ, "အဝဲအံၤမ့ၢ် တၢ်လၢယကမၤလိအီၤ ကယီကယီ န့ၣ်လီၤ. တၢ်လၢယကမၤလိအီၤန့ၣ် မ့ၢ်ဝဲ, အဝဲအံၤတမ့ၢ်ကစၢ်ယွၤအတၢ်ဘၣ်အသး လၢယဂီၢ် လၢယကဃ့ၢ်ကွံာ်လၢ တၢ်အိၣ်သးလၢအကီအခဲအပူၤဘၣ်. ယမ့ၢ်ဃ့ၢ်ကွံာ်န့ၣ်, တၢ်ကီတၢ်ခဲတဖၣ် ကလူၤယခံ ဒီး ကဃ့ၢ်ဝဲလၢယမဲာ်ညါ လီၤ. တၢ်ကီတၢ်ခဲတဖၣ် မ့ၢ်တဖျါလၢအလီၤဂာ်လိာ်အသးဘၣ်ဆၣ်, တၢ်ကီတၢ်ခဲမ့ၢ်တၢ်တမံၤဃီလီၤ. ဘၣ်မနုၤအဃိလဲၣ်. မ့ၢ်လၢ ကစၢ်ယွၤအဲၣ်ဒိး သိၣ်လိယၤ လၢအဝဲန့ၣ် လၢဝဲပှဲၤဝဲလၢ တၢ်ကီတၢ်ခဲတမံၤလၢ်လၢ်အဂီၢ်လီၤ. ပမ့ၢ်တမၤလိအီၤ တနံၤအံၤဘၣ်န့ၣ်, ပကဘၣ်မၤလိအီၤ ခဲကိာ်တနွံလီၤ. ဘၣ်ဆၣ်လီၢ်ခံကတၢၢ် ပကမၤလိန့ၢ်အီၤလီၤ, ပမ့ၢ်မၤလိန့ၢ်အီၤဆိဆိ န့ၣ်ဂ့ၤဒိၣ်တက့ၢ်လီၤ. ပမၤပူၤဖျဲးလီၤပသးလၢတၢ်ကီတၢ်ခဲအပူၤ ခီဖျိ ပဆၢထၢၣ်ဂၢၢ်ကျၢၤ ဒီးအိၣ်ခိးယွၤ လၢတၢ်သးကျၢၤမူဆှူအပူၤ န့ၣ်လီၤ."

အဃိ, ပကဘၣ်ဆၢထၢၣ်ဂၢၢ်ကျၢၤလၢ မနုၤအလိၤလဲၣ်. ၂ကွဲးနီၣ်တၢ် ၂၀း၂၀ စံးဘၣ်ပှၤ, "နာ်က့ၤယွၤ သုကစၢ်တက့ၢ်. ဒီးသုကအိၣ်ဂၢၢ်ဆိးကျၢၤလီၤ. နာ်အဝံတဖၣ်တက့ၢ်. ဒီးသုကဘီၣ်ထီၣ်ညီထီၣ်လီၤ." တၢ်တၢတမံၤန့ၣ်, ပကဘၣ်ဆၢထၢၣ်ဂၢၢ်ကျၢၤလၢ ကစၢ်ယွၤအကစၢ်ဒၣ်ဝဲ အပူၤန့ၣ်လီၤ. ခံမံၤတမံၤန့ၣ်, ပကဘၣ်ဆၢထၢၣ်ဂၢၢ်ကျၢၤလၢ အတၢ်ကွဲးအပူၤ, လၢအဟ့ၣ်ပှၤခီဖျိလၢအဝံတဖၣ်, လၢအမ့ၢ် လံာ်စီဆှံအံၤန့ၣ်လီၤ.

လံာ်စီဆှံမ့ၢ် ယွၤကလုၢ်ကထါ, ဒီးပကဘၣ်ဒိးသန့ၤပသးလၢအီၤ ဂၢၢ်ဂၢၢ်ကျၢၤကျၢၤ လၢအတၢ်အၢၣ်လီၤအီလီၤ အပူၤန့ၣ်လီၤ.

၆. စံးဘျုးယွၤလၢအဆိ

ပာ်ပှၤသးဝံၣ်ယွၤဖိ, ဒီးပှၤလၢ အကစံးထီၣ်ပတြၢၤတၢ်စီဆှံ အဃံအလၤ, ဖဲအလဲၤထီၣ်လၢ ပှၤသုးမုၢ်အမဲာ်ညါအဖၢမုၢ်ဒီးစံး, စံးထီၣ်ပတြၢၤယွၤတက့ၢ်. (၂ကွဲးနီၣ်တၢ် ၂၀း၂၁).

ဆိကမိၣ်မှံကွၢ် လၢနဆၢထၢၣ်လၢ ကစၢၢ်ဒီခိၣ် ဒီးကွၢ်တၢ် ဆူကစၢၢ်အဂၤတဖျၢၣ် လၢအဘၢၣ်စၢၤအိၣ်ဒီး တၢ်တြီၤလာ် န့ၣ်လီၤ. တၢ်ဒုးဖးဒိၣ် ကကဲထီၣ်အသးလၢ တၢ်တြီၤပူၤန့ၣ်လီၤ. လၢကစၢၢ်တဖျၢၣ်အလိၤ အိၣ်ဒီးကလုာ်ဖးဒိၣ်သၢကလုာ်အသုးမုၢ် လၢအအိၣ်ကတဲာ်ကတီၤအသးလၢ ကဒုးဟးဂီၤကွံာ် အံၣ်စရ့လး န့ၣ်လီၤ. ပှၤအံၣ်စရ့လးဖိတဖၣ် အိၣ်ဝဲလၢ ကစၢၢ်လၢနဆၢထၢၣ် အလိၤန့ၣ်လီၤ. ဒီးအစီၤပၤ စီၤပၤယဟိရှၤဖး တဲဲဘၣ်အဝဲသ့ၣ်, "အဝဲအံၤမ့ၢ် ကစၢ်ယွၤအတၢ်ဒုးသုး အတၢ်ရဲၣ်တၢ်ကျဲၤလီၤ. ပှၤလၢအသးဝံၣ်ခွါယၢၣ် တဖၣ်, လဲၤဆူတၢ်မဲာ်ညါ တက့ၢ်." ဒီး ပှၤသးဝံၣ်တၢ်ဖိတဖၣ် လဲၤထီၣ်ဆူ တၢ်ဒုးပျီ လၢပှၤသုးဖိအ မဲာ်ညါ ဒီးသးဝံၣ်စံးထီၣ်ပတြၢၤယွၤလီၤ. တၢ်သုးတၢ်ကျဲၤအံၤ ကဲထီၣ်လိၣ်ထီၣ် စ့ၢ်ကီးဧါ. ကဲထီၣ်ဝဲလီၤ. ဒုၣ်ဒါတဖၣ် အတၢ်ဆိကမိၣ်လီၤမုၢ်ပြံပြါ ဒီးလီၢ်ခံကတၢၢ် မၤသံလီၤအသး ကဒဲကဒဲန့ၣ်လီၤ. ဒီးပှၤအံၣ်စရ့လးဖိတဖၣ် တၢ်လၢကဘၣ်မၤန့ၣ်မ့ၢ်ဝဲ လဲၤထီၣ်ဟံးန့ၢ်က့ၤ ဒုၣ်ဒါ အတၢ်အိၣ်လီၤတဲာ်တဖၣ်န့ၣ်လီၤ.

ဘၣ်မနုၤအဃိ ကစၢ်ယွၤမၤဒ်အံၤလဲၣ်. မ့ၢ်ဒ်သိး ကဟ့ၣ်ပှၤတၢ်မၤလိဘၣ်ဃး တၢ်စံးထီၣ်ပတြၢၤယွၤ တချုးလၢ တၢ်မၤနၢၤ ဒုၣ်ဒါဒံးဘၣ်ဒၣ်လဲာ်န့ၣ်လီၤ.

အဃိဖဲနဘါထုကဖၣ် အဆၢကတီၢ် စံး, "ယွၤဧၢ, ယသ့ၣ်ညါလၢ ယအိၣ်ဒီးတၢ်ကီတၢ်ခဲ, ဘၣ်ဆၣ် ယစံးဘျုးဆိနၤ ဒိၣ်မးလၢ နမ့ၢ်ပှၤလၢအဒိၣ်န့ၢ် ယတၢ်ကီတၢ်ခဲတဖၣ်အဃိန့ၣ်လီၤ.

ဘၣ်ဆၣ် တၢ်လၢပကဘၣ်ပာ်သူၣ်ပာ်သးန့ၣ်, ပသုတစံးဘျုးယွၤ ထဲတဘျီဧိၤဒီး ပာ်ပတုာ်အီၤတဂ့ၤ, ပကစံးဘျုးကစၢ်ယွၤတဘိယူၢ်ဃီ တုၤပသးသမူဟးထီၣ်တစုန့ၣ်တက့ၢ်.

တၢ်ကတိၤလၢခံ

ကစၢ်ယွၤစံးဘၣ်စီၤယိၤရှူ ဖဲစီၤမိၤရှ့သံဝံၤအလီၢ်ခံ ဒ်အံၤ -

ယမၤလိာ်လံနၤလံ, တမ့ၢ်ဘၣ်ဧါ. ပာ်ဆူၣ်နသး, ဒီးတံးတဟီၣ်တက့ၢ်. ပျံၤတၢ်တဂ့ၤ, ဘၣ်ယိၣ်တၢ်တဂ့ၤ. အဂ့ၢ်ဒ်အံၤ, ယွၤနကစၢ်အိၣ်ဒီးနၤ ဖဲနလဲၤတၢ် တပူၤလၢ်လၢ်လီၤ. (ယိၤရှူ ၁း၉).

စီၤယိၤရှူ ဘၣ်ဆှၢအပှၤကလုာ်လၢ စီၤမိၤရှ့အလီၢ် ဖဲစီၤမိၤရှ့သံဝံၤအလီၢ်ခံန့ၣ်လီၤ. ကဘၣ်ဆှၢကလုာ်ဖးဒိၣ် ဒီတဒူၣ်ဆူကီၢ်တၢ်စံးပာ် တမ့ၢ်တၢ်ညီဘၣ်. တကးဒံးဘၣ် လၢအမဲာ်ညါ ကလုာ်ဖးဒိၣ် လၢအအိၣ်လၢ ကီၢ်တၢ်စံးပာ်အပူၤ လၢအဝဲသ့ၣ်ဘၣ်ဒုးန့ၢ်ဝဲ အတၢ်လီၢ်တၢ်ကျဲန့ၣ် အိၣ်ဝဲအါမးလီၤ. လၢအဂီၢ် မ့ၢ်တၢ်ကီတၢ်ခဲ ခံမံၤခံကထၢန့ၣ်လီၤ. ဘၣ်ဆၣ် ကစၢ်ယွၤစံးဘၣ်အီၤလၢ ကဘၣ်ပာ်ဆူၣ်အသး, ဒီးတံးတဟီၣ် န့ၣ်လီၤ. တၢ်ပျံၤတၢ်ဖုး တၢ်ဘၣ်ယိၣ်ဘၣ်ဘီ မ့ၢ်အိၣ်ဝဲဘၣ်ဆၣ် ကစၢ်ယွၤစံးဘၣ်အီၤလၢ ပျံၤတၢ်တဂ့ၤ, ဒီး ဘၣ်ယိၣ်တၢ်တဂ့ၤန့ၣ်လီၤ. မ့ၢ်လၢ ကစၢ်ယွၤအၢၣ်လီၤအီၤ လၢကအိၣ်ဒီးအီၤ ဖဲအလဲၤတပူၤလၢ်လၢ်လီၤ.

ဒ်စီၤပၤယဟိရှၤဖး, ဒီးဒ် စီၤယိၤရှူအသိး ကစၢ်ယွၤစံးဘၣ်ပှၤ တၢ်တမံၤဃီန့ၣ်လီၤ. တၢ်ကီတၢ်ခဲ အတၢ်ဒုးတၢ်ယၤ မ့ၢ်ကစၢ်ယွၤအတၢ်လီၤ. ထဲဒၣ်တမံၤ ကစၢ်ယွၤအဲၣ်ဒိးဝဲလၢ ပကကွၢ်တၢ်ဆိဆူ အအိၣ်, တချုးလၢ ပသးဟဲထူပၢၢ်ထီၣ်လၢ ပကဂုာ်ကျဲးစၢးအီၤလၢ ပဂံၢ်ပဘါ ဒၣ်ပဝဲန့ၣ်လီၤ. ပမ့ၢ်ကွၢ်ဆိတၢ်ဆူယွၤအအိၣ်န့ၣ်, တၢ်အဂၤတဖၣ် ကစၢ်ယွၤကသုးကကျဲၤဒၣ်ဝဲ ဒ်အသုးကျဲၤန့ၢ် စီၤယိၤရှူ, ဒီး ဒ်စီၤပၤယဟိရှၤဖး အသိး န့ၣ်လီၤ.

မ်ယွၤဆိၣ်ဂ့ၤအကလုၢ်ကထါ ဒီးဆိၣ်ဂ့ၤပဝဲကိးဂၤဒဲးတက့ၢ်.