ဖဲဘၣ်သဂၢၢ် သးသမူကလံၤမုၢ်တွၤ အခါ (မၤတၢ် ၂၇း၁၅-၂၀)

 

ဒီးတုၤကဘီဘၣ်ဝဲဒီး, စါကလံၤတသ့ဘၣ်ဒီး ပပျဲတၢ်, ဒီးလဲၤထွဲအခံလီၤ. ဒီးပလဲၤလၢ ကီးဖိတဖျၢၣ်, ကိးဝဲလၢ ကျီဒ့ၤ, အကလံၤတဒၢတခီ အဖၢမုၢ်ဒီး, ပဟံးန့ၢ်ချံဖိကီမး, ဒီးတုၤပထုးထီၣ်န့ၢ်အီၤဝံၤဒီး, မၤဝဲလၢ တၢ်မၤစၢၤ တဖၣ်သတးဒီး, ဘံတရံးဃာ် ကဘီလၢလာ်ခီလီၤ. ဒီးဘၣ်ယိၣ်ဝဲလၢ အကတုာ်ထီၣ်ဘၣ်ဖုး လၢမဲးခိၣ်ဒီး, ထုးလီၤကွံာ်ယၢ်လၣ်, ဒီးဒ်န့ၣ်အသိး ဘၣ်တၢ်စိာ်အီၤလၢကလံၤလီၤ. ဒီးကဘီကျံာ်ကျုာ်နးနးကလဲာ်ဒီး, မုၢ်ဆ့ၣ်ထီၣ်တနံၤ, ပှၤတ့ၢ်လီၤကွံာ်တၢ်ဖိတၢ်လံၤ လီၤ. ဒီးပှဲၤထီၣ်သၢနံၤ တနံၤန့ၣ်, ပကွံာ်တ့ၢ်ကွံာ် ကဘီအပိးအလီ လၢပစုဒၣ်ပဝဲ လီၤ. ဒီးအါနံၤအါသီ အတီၢ်ပူၤန့ၣ်, မုၢ်မ့ၢ်ဂ့ၤ, ဆၣ်ဧိၤဖီဧိၤမ့ၢ်ဂ့ၤ, တအိၣ်ဖျါထီၣ်ဘၣ်, ဒီးကလံၤမုၢ်တဆံးတစှၤ ဘၣ်န့ၣ် ဘၣ်ပှၤဒီး, ပကတုၤလၢ တၢ်အုၣ်က့ၤခီၣ်က့ၤန့ၣ်, တၢ်မုၢ်လၢ် တအိၣ်လၢၤဘၣ် လ့ၤတက့ၤဘၣ်လီၤ. (မၤတၢ် ၂၇း၁၅-၂၀)

တၢ်ကတိၤလၢညါ

ကညီဖိလၢ အအိၣ်လၢ ကီၢ်ပယီၤ ထံထၣ်စွ့ တဖၣ် လဲၤခီဖျိ ဘၣ်တ့ၢ်လံ ကလံၤမုၢ် လၢအမ့ၢ် နၣ်ကံး ဖဲ လါအ့ဖြ့ၣ် အလၢာ်, ၂၀၀၈ နံၣ်န့ၣ်လီၤ. ကလံၤမုၢ်နၣ်ကံးအံၤ မ့ၢ်ကလံၤမုၢ်ဖးဒိၣ် တဖျၢၣ် လၢအလီၤပျံၤလီၤဖုး ဒီး မၤသံပှၤကညီ အါအါကလဲာ်န့ၣ်လီၤ. ဝံးကံၣ် ပာ်ဖျါထီၣ်ဝဲလၢ ထဲလးပူးတၣ် ကဝီၤအပူၤ ပှၤသံကအိၣ်လၢ အဂၤ ဃိးကလး, ဒီး လၢဘိၣ်ကလ့န့ၣ် ပှၤသံကအိၣ်ဝဲအဂၤ တကလး အခိၣ်အဃၢၤ န့ၣ်လီၤ. 

ကလံၤမုၢ်လၢ ပထံၣ်ဘၣ်လၢနီၢ်ခိနီၢ်ခီအံၤ မ့ၢ်လီၤသပှၢ်ကတၢၢ် န့ၣ်မ့ၢ်တၢ်လီၤပျံၤလီၤဖုး ဖးဒိၣ်လၢ ပဂီၢ်န့ၣ်လီၤ. ဒ်န့ၣ်အသိး, ပသးသမူအပူၤ တၢ်လဲၤခီဖျိဒ် ကလံၤမုၢ်ဟဲဘၣ်ပှၤအသိး, အိၣ်ဝဲဒၣ်စ့ၢ်ကီးန့ၣ်လီၤ. တဘျီတခီၣ် ကဟဲဘၣ်ပှၤစၢ်စၢ်ဖိ ဘၣ်ဆၣ်, တဘျီတခီၣ် ကဟဲဘၣ်ပှၤတုၤလၢ ပတူၢ်တန့ၢ်ခီၣ်တကဲဘၣ်န့ၣ် အိၣ်ဝဲဒၣ်န့ၣ်လီၤ. 

တနံၤအံၤ တၢ်ကစီၣ်အပူၤ ပကဟံးန့ၢ်တၢ်မၤလိ ဘၣ်ဃး ပှၤကဘီဖိ လၢအဒိးသကိး ကဘီဒီး စီၤပီလူး တဖၣ် အတၢ်ဖံးတၢ်မၤ အတၢ်ပာ်သူၣ်ပာ်သး ဖဲအဘၣ်သဂၢၢ်ဒီး ကလံၤမုၢ်တွၤ အခါန့ၣ်လီၤ. ဖဲပဘၣ်သဂၢၢ်ဒီး သးသမူကလံၤမုၢ်တွၤ အဆၢကတီၢ်, တၢ်လၢပမၤအီၤ အိၣ်ဝဲဒၣ်သၢမံၤ ဒ် ပှၤကဘီဖိ လၢအလဲၤသကိးတၢ်ဒီး စီၤပီလူး တဖၣ် မၤဝဲအသိးန့ၣ်လီၤ. တၢ်လၢအဝဲသ့ၣ်မၤဝဲအခီၣ်ထံး တမံၤမ့ၢ်ဝဲ, လဲၤထွဲဝဲ ဒ်ကလံၤဆီၣ်အီၤအသိး ကယီကယီ, ခံမံၤတမံၤမ့ၢ်ဝဲ, တၢၤကွံာ်တၢ်လၢ အရ့ဒိၣ်တဖၣ်, ဒီးသၢမံၤတမံၤမ့ၢ်ဝဲ, အိၣ်ဒီး တၢ်သူၣ်ဟးဂီၤသးဟးဂီၤ, ဒီးတၢ်မုၢ်လၢ်လၢာ်ကွံာ်ဝဲ န့ၣ်လီၤ. အဃိ, ဒ်ပမ့ၢ်ပှၤခရံာ်ဖိ တဖၣ်အသိး, ဖဲပဘၣ်သဂၢၢ်ဒီး သးသမူ ကလံၤမုၢ်တွၤအခါ တၢ်လၢပဘၣ်မၤအီၤ ကဘၣ်မ့ၢ်တၢ်သၢမံၤလၢ အထီဒါလိာ်အသးဒီး တၢ်လၢပှၤကဘီဖိ တဖၣ်မၤဝဲအသိးန့ၣ်လီၤ.

၁. တဘၣ်လဲၤထွဲအခံတဂ့ၤ

၂. တဘၣ်တၢၤကွံာ်တၢ်အရ့ဒိၣ်တဂ့ၤ 

၃. တဘၣ်သးဟးဂီၤတဂ့ၤ န့ၣ်လီၤ.

၁. တဘၣ်လဲၤထွဲအခံတဂ့ၤ

ဒီးတုၤကဘီ ဘၣ်ဝဲဒီး, စါကလံၤတသ့ဘၣ်ဒီး ပပျဲတၢ်, ဒီးလဲၤထွဲအခံလီၤ. (မၤတၢ် ၂၇း၁၅)

လံာ်မၤတၢ် ၂၇း၁၅ အပူၤအံၤ ပကထံၣ်ဘၣ်လၢ ဖဲကလံၤမုၢ် ဟဲလီၤဘၣ်ကဘီတဘျီဃီ, ကဘီအံၤလဲၤတၢ် ဆူညါတသ့လၢၤဘၣ်အဃိ, ကဘီအံၤ ဘၣ်လဲၤထွဲဒ် ကလံၤမုၢ်ဆီၣ်အီၤ အသိးန့ၣ်လီၤ. ဒ်န့ၣ်အသိး, လၢပတၢ်အိၣ်မူ အပူၤ အါစုအါဘျီ ဖဲပဘၣ်သဂၢၢ်ဒီး သးသမူကလံၤမုၢ်တွၤ အဆၢကတီၢ် ပလဲၤဆူမဲာ်ညါ တသ့တညီဘၣ် အဃိ, ပလဲၤထွဲဒ် ကလံၤမုၢ်ဆီၣ်ပှၤ အသိးန့ၣ်လီၤ. ပဖီတၢၣ် တဖၣ်ဟါမၢ်ကွံာ်ဝဲ, ဒီးအါစုအါဘျီ ပသးပ့ၤနီၣ်ကွံာ် ပကလဲၤ ဖဲလဲၣ် န့ၣ်လီၤ. ပပာ်တ့ၢ်ကွံာ် ပလုၢ်ပပှ့ၤတဖၣ်, ဒီးပသးဟးဂီၤလၢ ပတၢ်ဖံးတၢ်မၤ အပူၤ န့ၣ်လီၤ. 

ခီဖျိလၢ ပှၤကဘီဖိတဖၣ် တအိၣ်ဒီး ဒီလ့ၣ်ဂီၤလၢ လဲၤတၢ်လၢပီၣ်လဲၣ်ပူၤအဆၢကတီၢ်မ့ၢ်ဂ့ၤ, ခီဖျိလၢ တထံၣ် မုၢ်လါဆၣ် တဖၣ်မ့ၢ်ဂ့ၤအဃိ, ဖဲကလံၤမုၢ်လီၤအဆၢကတီၢ် ပှၤကဘီဖိတဖၣ် ဘၣ်အိၣ်လၢ တၢ်ခံးသူ အပူၤန့ၣ်လီၤ. ဖဲအံၤ တၢ်သံကွၢ်အိၣ်ထီၣ်ဝဲ, "ဖဲနအိၣ်လၢတၢ်ခံးယုၢ် အပူၤ, ဖဲနတထံၣ်မုၢ်လါဆၣ်အဆၢကတီၢ်, ဒီးဖဲနဒီလ့ၣ်ဂီၤတအိၣ်ဘၣ်အဆၢကတီၢ်, နမၤဒ်လဲၣ်." အိၣ်ဒၣ်တမံၤဧိၤလၢ နကပိာ်ထွဲဒ် လပီစိာ်နၤ အသိးန့ၣ်လီၤ. နကပျဲနတၢ်ကီတၢ်ခဲတဖၣ် ဒိၣ်စိလၢနဖီခိၣ် ဒီးဂံၤဂုၤနၤ လၢမဲာ်ညါဆူလီၢ်ခံ န့ၣ်လီၤ. 

လၢနတၢ်အိၣ်မူအပူၤ, တၢ်ကိၢ်တၢ်ဂီၤတဖၣ် ကမၤသဘှံးနသး ဒီးကဒုးကမၢကမၣ်နၤ, "တၢ်အိၣ်မူအံၤ အခီပညီအိၣ်မနုၤလဲၣ်?, ပဘၣ်ဒုးဆၢကွံာ်အီၤမ့ၢ်အဘၣ်မနုၤလဲၣ်?" လၢတၢ်န့ၣ်အဃိ လီၢ်ခံကတၢၢ်နလဲၤဒ် ကလံၤမုၢ်ဆီၣ်နၤ အသိးန့ၣ်လီၤ. 

ဘၣ်ဆၣ်အခဲအံၤ, တၢ်လၢနကဘၣ်မၤန့ၣ် မ့ၢ်ဝဲ မၤထွဲက့ၤလၢ အကဒါတကပၤ န့ၣ်တက့ၢ်. လံာ်ဧ့ၤဘြံၤ ၁၀း၂၃ ဒီး အဆၢဖိ ၃၅-၃၆ စံးဝဲ -

မ်ပဟံးဃာ် ပတၢ်မုၢ်လၢ် အတၢ်အၢၣ်လီၤအီလီၤတက့ၢ်. အဂ့ၢ်ဒ်အံၤ, ပှၤလၢအစံးပာ်တၢ်န့ၣ်, မ့ၢ်ပှၤအကလုၢ်တီ လီၤ. (ဧ့ၤဘြံၤ ၁၀း၂၃)

မၤသးဒ်န့ၣ်ဒီး ညိကွံာ်သုတၢ်သး ခူတလ့ၢ်, လၢအအိၣ်ဒီး အဘူးအလဲဒိၣ်ဒိၣ်ကလဲာ်အံၤ, တဂ့ၤ. အဂ့ၢ်ဒ်အံၤ, သုဝံသးစူၤ အလီၢ်အိၣ်ဝဲ, ဒ်သိး သုမၤဖဲယွၤအသး ဝံၤဒီး, သုကန့ၢ်ဘၣ် တၢ်စံးပာ် တဖၣ်လီၤ. (ဧ့ၤဘြံၤ ၁၀း၃၅-၃၆)

လံာ်စီဆှံတဆၢအံၤ အပူၤပကကွၢ်သကိး တၢ်ကတိၤတဘီလၢအမ့ၢ်ဝဲ, "ပှၤလၢအစံးပာ်တၢ်န့ၣ်, မ့ၢ်ပှၤအကလုၢ်တီလီၤ." တက့ၢ်. မ့ၢ်ကစၢ်ယွၤ မၤလီၤတဲာ်နၤတဘျီဘျီဧါ. နီတဘျီဘၣ်. ဆူမဲာ်ညါ တမၤဝဲစ့ၢ်ကီးဘၣ်. လၢတၢ်န့ၣ်အဃိ, မ်ပဟံးဃာ်ပတၢ်မုၢ်လၢ် အတၢ်အၢၣ်လီၤအီလီၤတက့ၢ်. ပှၤလၢအစံးပာ်တၢ်လၢအမ့ၢ်ယွၤတဂၤန့ၣ်, မ့ၢ်ပှၤအကလုၢ်တီလီၤ. အဝဲကဆှၢပူၤနၤလၢ နတၢ်ကိၢ်တၢ်ဂီၤ နတၢ်ကီတၢ်ခဲ အပူၤန့ၣ်လီၤ. 

၂. တဘၣ်တၢၤကွံာ်တၢ်အရ့ဒိၣ်တဂ့ၤ

ဒီးပှဲၤထီၣ်သၢနံၤ တနံၤန့ၣ်, ပကွံာ်တ့ၢ်ကွံာ် ကဘီအပိးအလီ လၢပစုဒၣ်ပဝဲလီၤ. (မၤတၢ် ၂၇း၁၉)

စီၤပီလူးအတၢ်လဲၤကျဲ ဆူဝ့ၢ်ရိမ့ၤ အံၤတမ့ၢ်ကျဲလၢအညီတဘိဘၣ်. မၤတၢ် ၂၇း၁၈-၁၉ စံးဘၣ်ပှၤ -

ဒီးကဘီကျံာ်ကျုာ်နးနးကလဲာ်ဒီး, မုၢ်ဆ့ၣ်ထီၣ်တနံၤ, ပှၤတ့ၢ်လီၤကွံာ် တၢ်ဖိတၢ်လံၤလီၤ. ဒီးပှဲၤထီၣ် သၢနံၤတနံၤ န့ၣ်, ပကွံာ်တ့ၢ်ကွံာ် ကဘီအပီးအလီ လၢပစုဒၣ်ပဝဲလီၤ. 

တၢ်လၢအဝဲသ့ၣ် ကွံာ်တ့ၢ်ကွံာ်ဝဲတဖၣ် မ့ၢ် - 

၁. တၢ်ကူၣ်လဲၤမၤကၤအပီးအလီ - တၢ်လၢအလုၢ်ဒိၣ်ပှ့ၤဒိၣ်တဖၣ် 

၂. ကဘီအယၢ်လၣ် - တၢ်လၢအမၤဂၢၢ်ဒီးဒုးလဲၤကဘီ

၃. တၢ်အီၣ်တၢ်အီ - တၢ်လၢအလိၣ်ဘၣ်လၢအသးသမူအဂီၢ် 

၄. အနီၢ်ကစၢ်ဒၣ်ဝဲ - အဝဲသ့ၣ်ကိးဂၤဒဲး ဘၣ်ဖုလီၤလၢ ထံကျါ ဒီး ပှီၢ်ထံဆူခိသူခိၣ်န့ၣ်လီၤ. 

ဖဲပထံၣ်လီၤပသးလၢ ပအိၣ်လၢတၢ်ကိၢ်တၢ်ဂီၤ အဆၢကတီၢ်, တၢ်ကွဲန့ၢ်လွဲန့ၢ်ပှၤလၢ ပကဘၣ်တၢၤကွံာ် တၢ်လၢပလိၣ်ဘၣ် သပှၢ်ကတၢၢ်တဖၣ် န့ၣ်လီၤ. တၢ်လၢအရ့ဒိၣ်လၢပဂီၢ်မ့ၢ်ဝဲ, ဖဲပအိၣ်ဘီၣ်အိၣ်ညီအဆၢကတီၢ် တၢ်လၢပသူအီၤ တလီၢ်လီၢ်တဖၣ်န့ၣ်လီၤ. ဖဲပအိၣ်လၢတၢ်ဆီၣ်သနံးအဖီလာ် အဆၢကတီၢ်, ပအဲၣ်ဒိးတၢၤကွံာ် တၢ်တဖၣ်န့ၣ် ခဲလၢာ်လီၤ. ပတူၢ်ဃၣ်ကွံာ် ပတၢ်တိာ်ပာ်တဖၣ်, ပပာ်ပတုာ်ကွံာ် ပတၢ်ရ့လိာ်ဘၣ်ထွဲဒီး ပှၤအဂၤ, ဒီး ပတၢၤကွံာ် တၢ်စူၢ်တၢ်နာ် လၢပမၤန့ၢ်အီၤလၢ ပနီၢ်ဆံးခါလံၤလံၤ န့ၣ်လီၤ. ပဃုနီၢ်ခိ အတၢ်မၤစၢၤ, ဒီးတုၤပမၤန့ၢ်အီၤ ဒီး ပပာ်ဒိၣ်ပာ်ကဲက့ၤအီၤ လၢပတၢ်အိၣ်မူအပူၤ န့ၣ်လီၤ. 

စီၤယိၤရှူ စံးဘၣ်ပှၤအံၣ်စရ့လးဖိတဖၣ် -

မ့မ့ၢ် သုဘၣ်စဲဘူးဒီးယွၤ သုကစၢ်, ဒ်သုမၤတုၤ မုၢ်မဆါတနံၤအံၤ အသိးန့ၣ်လီၤ. (ယိၤရှူ ၂၃း၈)

တလိၣ်လၢနဘၣ်သးဒ့ဒီလၢ ယွၤအတၢ်အၢၣ်လီၤအီလီၤ အပူၤဘၣ်, မ့မ့ၢ်တခီ နာ်အီၤကျၢၤမူဆှုအါထီၣ် တက့ၢ်. တလိၣ်လၢ နဘၣ်ပာ်တ့ၢ်ကွံာ် ယွၤအတၢ်သုးတၢ်ကျဲၤဒီးအတၢ်တိာ်လၢ နဂီၢ်ဘၣ်, မ့မ့ၢ်တခီ မၤဃံးထီၣ် အီၤလၢ နတၢ်အိၣ်မူအပူၤတက့ၢ်. 

စီၤပီလူးကွဲးန့ၢ် ပှၤကရံၣ်သူးဖိတဖၣ်စံးဝဲ - 

မၤသးဒ်န့ၣ်ဒီး ပုၢ်သ့ၣ်ဝဲၢ်သ့ၣ်လၢ ယအဲၣ်အီၤသ့ၣ်ဧၢ, မ့ၢ်သုသ့ၣ်ညါလၢ သုမၤတၢ်လၢ ကစၢ်အပူၤန့ၣ်, တမ့ၢ်ဘၣ် တၢ်ကလီကလီ ဘၣ်သတးဒီး, မ်သုအိၣ်စံာ်အိၣ်ကျၢၤ, အိၣ်ဂၢၢ်အိၣ်ခၢၣ်, ဒီးမၤတၢ်အါအါဂီၢ်ဂီၢ်လၢ ကစၢ်အတၢ်မၤ, တထံၣ်ဃီတက့ၢ်. (၁ကရံၣ်သူး ၁၅း၅၈)

ကွဲးန့ၢ်စ့ၢ်ကီး ပှၤဖံးလံးပံၤ ဖိတဖၣ်ဒီးစံးဝဲ - 

ထဲတၢ်အံၤ, မ်သုမၤတၢ်လၢ အကြၢးဒီး ခရံာ်အတၢ်သးခုအကစီၣ်တက့ၢ်. (ဖံးလံးပံၤ ၁း၂၇)

နမ့ၢ်မၤဒ်န့ၣ်ဒီး, နကအိၣ်ကၢအိၣ်ခိး ဒီး ယွၤကဆှၢနၤဖဲ နဘၣ်ဆၢၣ်မဲာ်ဒီး တၢ်ကီတၢ်ခဲ တၢ်ကိၢ်တၢ်ဂီၤ အဆၢကတီၢ်န့ၣ်လီၤ. 

၃. တဘၣ်သးဟးဂီၤတဂ့ၤ 

ဒီးအါနံၤအါသီ အတီၢ်ပူၤန့ၣ်, မုၢ်မ့ၢ်ဂ့ၤ, ဆၣ်ဧိၤဖီဧိၤမ့ၢ်ဂ့ၤ, တအိၣ်ဖျါထီၣ်ဘၣ်, ဒီးကလံၤမုၢ် တဆံးတစှၤ ဘၣ်န့ၣ် ဘၣ်ပှၤဒီး, ပကတုၤလၢ တၢ်အုၣ်က့ၤခီၣ်က့ၤန့ၣ်, တၢ်မုၢ်လၢ် တအိၣ်လၢၤဘၣ် လ့ၤတက့ၤဘၣ်. (မၤတၢ် ၂၇း၂၀)

ဖဲပဘၣ်သဂၢၢ်ဒီး တၢ်ကီတၢ်ခဲ တၢ်ကိၢ်တၢ်ဂီၤ အဆၢကတီၢ်, တၢ်အလီၢ်ခံကတၢၢ် လၢပတၢၤကွံာ်အီၤ န့ၣ် မ့ၢ် ပတၢ်မုၢ်လၢ် န့ၣ်လီၤ. ပအိၣ်တ့ၢ်ဒီး ပတၢ်မုၢ်လၢ် ဘၣ်ဆၣ်, ဖဲတၢ်ကီတၢ်ခဲတၢ်ကိၢ်တၢ်ဂီၤ ဘၣ်ပှၤတုၤလၢ ပတူၢ်တန့ၢ်ခီၣ်တကဲလၢၤဘၣ် အဆၢကတီၢ် ပတၢၤကွံာ်အီၤ န့ၣ်လီၤ. မ့ၢ်နဘၣ်သဂၢၢ်ဒီး တၢ်ကိၢ်တၢ်ဂီၤ တၢ်ကီတၢ်ခဲ တုၤဒၣ်လဲာ် နအိၣ်ဒီးတၢ်သူၣ်ဟးဂီၤ တၢ်သးဟးဂီၤလၢ နတၢ်အိၣ်မူအပူၤန့ၣ်ဧါ. သ့ၣ်နီၣ်ထီၣ်, ပှၤကဘီဖိလၢ အဒိးဃုာ်ကဘီတဘ့ၣ်ဃီ ဒီးစီၤပီလူးတဖၣ်, "တၢ်မုၢ်လၢ် တအိၣ်လၢၤဘၣ်လ့ၤတက့ၤဘၣ်." မ့ၢ်လၢ အဝဲသ့ၣ် တကနၣ်ဃုာ် စီၤပီလူး အတၢ်ဟ့ၣ်ပလီၣ် ဒီး တသ့ၣ်ညါလၢ ယွၤမ့ၢ်ပှၤလၢ အပၢဆှၢတၢ်ခဲလၢာ် န့ၣ်ဘၣ်အဃိလီၤ. အဝဲသ့ၣ် တကနၣ်ဃုာ် ကစၢ်ယွၤ အတၢ်သုးတၢ်ကျဲၤဘၣ်. တကးဒံးဘၣ်, အဝဲသ့ၣ် တနာ်ကစၢ်ယွၤ အတၢ်သ့တၢ်ဘၣ်လၢ ကထၢနုာ် တၢ်မုၢ်လၢ် ဖဲ တၢ်မုၢ်လၢ်တအိၣ်လၢၤဘၣ်အပူၤ ဒၣ်လဲာ်န့ၣ်ဘၣ်. 

ဖဲလံာ်စီဆှံကတိၤတၢ် ဘၣ်ဃးတၢ်မုၢ်လၢ်န့ၣ်, တတဲဝဲဘၣ်ဃး တၢ်ဘူၣ်ဂ့ၤတီၢ်ဘၣ်, တၢ်ခွဲးတၢ်ယာ်, ဒီး တၢ်ဘၣ်ဆၢၣ်ဘၣ်တီၤ န့ၣ်ဘၣ်. တဲတၢ်ဘၣ်ဃးဒီး, တၢ်စူၢ်တၢ်နာ်လၢ အအိၣ်ဒီး တၢ်ကွၢ်တၢ်လိၤလိၤဆူ ကစၢ်ယွၤ အအိၣ်န့ၣ်လီၤ. ပကဟံးန့ၢ်သးတၢ်ဂံၢ်တၢ်ဘါ လၢလံာ်စီဆှံအဆၢဖိ လၢပကပာ်ဖျါထီၣ်အခဲအံၤအအိၣ်တက့ၢ်. 

ကယဲၢ်ပှၤလၢအမုၢ်လၢ်တၢ်လၢ ယွၤခဲလၢာ်သ့ၣ်ဧၢ, ပာ်ဆူၣ်သုဂံၢ်သုဘါ တက့ၢ်. ဒီးကဒုးဆူၣ်ထီၣ် သုသး အဂံၢ်အဘါလီၤ. (စံးထီၣ်ပတြၢၤ ၃၁း၂၄)

ကွၢ်ကွၢ်, ယွၤအမဲာ်အိၣ်လၢ ပှၤလၢအပျံၤအီၤအလိၤ, လၢပှၤလၢ အကွၢ်လၢ်အဘျုးအဖှိၣ် အကျဲတဖၣ်န့ၣ် အလိၤ, ဒ်သိး အကမၤပူၤမၤဖျဲး အသးလၢ တၢ်သံ, ဒီးဒ်သိး အကဒုးမူဒံးအီၤ လၢ တၢ်သၣ်ဝံၤလီၤဒိ အပူၤလီၤ. ပသးကွၢ်လၢ် ယွၤအကျဲလီၤ. အဝဲဒၣ်မ့ၢ် တၢ်မၤစၢၤပှၤ, ဒီးပကတီၤတဘ့ၣ်လီၤ. အဂ့ၢ်ဒ်အံၤ, ပသးခုလၢ အပူၤလီၤ. (စံးထီၣ်ပတြၢၤ ၃၃း၁၈-၂၁)

ဘၣ်မနုၤလၢ နသူၣ်ကၢ်သးလီၤလဲၣ်, ယသးဧၢ. ဒီးနသူၣ်ကိၢ်သးဂီၤ လၢယပူၤ ဘၣ်မနုၤလဲၣ်. ကွၢ်လၢ်ယွၤအကျဲ တက့ၢ်. အဂ့ၢ်ဒ်အံၤ, ယကစံးထီၣ်ပတြၢၤ ဒံးအီၤ, ယမဲာ်အတၢ်မၤစၢၤဒီး ယကစၢ်လီၤ. (စံးထီၣ်ပတြၢၤ ၄၂း၁၁)

အဂ့ၢ်ဒ်အံၤ, ဖဲဒၣ်တၢ်ကွဲးအသးတဘီလၢ်လၢ်န့ၣ်, ဘၣ်ကွဲးအသးလၢ ပဘၣ်တၢ်သိၣ်တၢ်သီ အဂီၢ်, ဒ်သိး တၢ်ဝံသးစူၤ, ဒီးတၢ်မၤမုာ်ဘၣ်ဃးဒီး တၢ်ကွဲးအသးတဖၣ်သတးဒီး ပကအိၣ်ဒီး တၢ်မုၢ်လၢ်လီၤ. (ရိမ့ၤ ၁၅း၄)

လၢတၢ်န့ၣ်အဃိ, အိၣ်ဒီးတၢ်သးဟးဂီၤဖဲနဘၣ်သဂၢၢ်ဒီး တၢ်ကိၢ်တၢ်ဂီၤတၢ်နးတၢ်ဖှီၣ်အခါတဂ့ၤ, မ့မ့ၢ်တခီ အိၣ်ဒီးတၢ်မုၢ်လၢ်လၢ ယွၤအပူၤန့ၣ်တက့ၢ်. 

တၢ်ကတိၤလၢခံ

လံာ် ၂ကွဲးနီၣ်တၢ် ၂၀ အပူၤပကထံၣ်ဘၣ် ယူဒၤအစီၤပၤ စီၤပၤယဟိရှၤဖး အဂ့ၢ်လီၤ. ဒုၣ်ဒါ သုးမုၢ်သၢဖု လၢအမ့ၢ် ပှၤမိၤအးဖိ, ပှၤဧၣ်မိၣ်ဖိ, ဒီးပှၤမူနးဖိ တဖၣ် ဟဲထီၣ်ဒ်သိး ကဒုးတၢ်ဒီး စီၤပၤယဟိရှၤဖး အဂီၢ်န့ၣ်လီၤ. ဒုၣ်ဒါ ပာ်ဖှိၣ်ထီၣ်အသး သုးမုၢ်သၢဖု တမ့ၢ်တၢ်လၢအစှၤဘၣ်. မ့ၢ်ထိၣ်သတြီၤဒီး ယူဒၤ အသုးမုၢ်န့ၣ်, ယူဒၤအသုးမုၢ် ကဲထီၣ်တၢ်ဆံးဆံးဖိလီၤ. လၢတၢ်န့ၣ်အဃိ, လံာ်စီဆှံစံးဝဲဒၣ်လၢ စီၤပၤယဟိရှၤဖး ပျံၤတၢ်ဒိၣ်ဒိၣ်ကလဲာ်လီၤ. ခီဖျိဒုၣ်ဒါသုးမုၢ်သၢဖု အဃိ, ကဲထီၣ်တၢ်ကိၢ်တၢ်ဂီၤလၢအဂီၢ် တကးဘၣ် လၢအပှၤကလုာ်ဒီကလုာ် ညါအဂီၢ်န့ၣ်လီၤ. 

ဖဲအံၤ, တၢ်လၢပမၤလိန့ၢ်တၢ်လၢ စီၤပၤယဟိရှၤဖး အအိၣ်န့ၣ်မ့ၢ်ဝဲ, အဝဲမ့ၢ်ပျံၤတၢ်ဘၣ်ယိၣ်တၢ်ဘၣ်ဆၣ်, အဝဲဃၣ်အသးဒ်သိးအကဃုယွၤလီၤ. ဒီးကိးထီၣ်တၢ်ဒုၣ်တၢ်အီၣ်လၢ ယူဒၤဖိခဲလၢာ်အကျါလီၤ (၂ကွဲးနီၣ်တၢ် ၂၀း၃). တကးဒ်ဘၣ်, ခီဖျိလၢ အကိးထီၣ်တၢ်ဒုၣ်တၢ်အီၣ်အဃိ, ပှၤယူဒၤဖိခဲလၢာ် အိၣ်ဖှိၣ်ရိဖှိၣ်ဒ်သိး အကဃ့တၢ်လၢယွၤ, ဒီးလၢယူဒၤအဝ့ၢ်ခဲလၢာ်န့ၣ် ဟဲဃုယွၤလီၤ. (၂ကွဲးနီၣ်တၢ် ၂၀း၄). 

လၢတၢ်ကီတၢ်ခဲ တၢ်ကိၢ်တၢ်ဂီၤအဆၢကတီၢ်, ခီဖျိလၢ စီၤပၤယဟိရှၤဖး ဒီး ပှၤယူဒၤဖိတဖၣ် ဃုယွၤ ဒီးအိၣ်ဒီး တၢ်မုၢ်လၢ်လၢ ယွၤအပူၤအဃိ, ကစၢ်ယွၤဒိကနၣ်အတၢ်ဃ့ ဒီး စံးဘၣ်အဝဲသ့ၣ်လၢ, "ဒီးစံးဝဲဒၣ်, ကယဲၢ်ယူဒၤဖိ, ဒီးပှၤအိၣ်ဝဲဆိးဝဲလၢယရူၤရှလ့ၣ် အပူၤသုဝဲဒၣ်, ဒီးနဲဒၣ်စီၤပၤယဟိရှၤဖးဧၢ, ကနၣ်တက့ၢ်. ယွၤစံးဘၣ်သုဒ်အံၤ, ပျံၤတၢ်တဂ့ၤ. ဒီးဘၣ်ယိၣ်တၢ်လၢ ပှၤဂီၢ်မုၢ်ဖးဒိၣ်အံၤအဃိတဂ့ၤ. အဂ့ၢ်ဒ်အံၤ, တၢ်ဒုးသုးန့ၣ်တမ့ၢ်ဘၣ် သု တၢ်ဘၣ်, မ့ၢ်ယွၤအတၢ်လီၤ." (၂ကွဲးနီၣ်တၢ် ၂၀း၁၅). 

လၢခံတသီ, ပကထံၣ်ဘၣ်လၢ ဒုၣ်ဒါတဖၣ် ကဒဲကဒဲမၤသံလိာ်အသး, ဒီး တၢ်လၢစီၤပၤယဟိရှၤဖး ဒီးပှၤယူဒၤဖိ တဖၣ်ဘၣ်မၤဝဲန့ၣ်, မ့ၢ်ဘၣ်လဲၤဟံးက့ၤ ဒုၣ်ဒါတဖၣ် အတၢ်အိၣ်လီၤတဲာ် သ့ၣ်တဖၣ်န့ၣ်လီၤ. 

အဃိ, ဖဲနဘၣ်သဂၢၢ်ဒီး သးသမူကလံၤမုၢ်တွၤအခါ, ဟံးဃာ်ဂၢၢ်ကျၢၤ တၢ်လၢအအိၣ်ဒီးနၤ ဒ်အမ့ၢ်နတၢ်စူၢ်တၢ်နာ်, ဒီးအိၣ်ဒီးတၢ်မုၢ်လၢ်အမူလၢ ယွၤအပူၤန့ၣ်တက့ၢ်. ကစၢ်ယွၤ အၢၣ်လီၤနၤလၢ တလဲၤသဒၣ်နၤ နီတဘျီဘၣ်.

မ်ယွၤဆိၣ်ဂ့ၤအကလုၢ်ကထါဒီးဆိၣ်ဂ့ၤပဝဲကိးဂၤဒဲးတက့ၢ်.