စီၤဒၤဝံးႇ စီၤနၤဘလးႇ ဒီး နီၢ်အဘံၤကါယံးလး

တၢ်စံၣ်တဲၤတဲလီၤ တယုၢ်အံၤ မ့ၢ်တၢ်စံၣ်တဲၤတဲလီၤ တကလုာ်လၢ ပကိးအီၤလၢ Narrative Preaching (တၢ်စံၣ်တဲၤတဲလီၤ ဒ်တၢ်ဃဲၤပူအသိး) လၢပတညီနုၢ်သူအီၤ ဘၣ်န့ၣ်လီၤႉ ဆူမဲာ်ညါ မးယကကွဲးဖျါထီၣ် တၢ်စံၣ်တဲၤတဲလီၤ တကလုာ် အံၤ အဂ့ၢ်အကျိၤလီၤႉ 

၁ႉ ဆၢကတီၢ် ခဲအံၤ တၢ်မၤအသးလၢ ကီၢ်ပယီၤ အပူၤ န့ၣ်ပကသ့ၣ်ညါႇ ထံၣ်အီၤႇ နၢ်ဟူဘၣ် အီၤ လီၤႉ စးထီၣ် ဖဲ ပယီၤသုး ပဒိၣ် ဟံးန့ၢ်ဆူၣ် တၢ်စိတၢ်ကမီၤ ဝံၤအလီၢ်ခံႇ ဟံၣ်ဖိဃီဖိ အါဒူၣ် ဘၣ်လဲၤ ခီဖျိ ဆှူၣ်မဲာ်ကဲၤမဲာ်ႇ ခီဖျိ ပယီၤသုးတ ဖၣ် အတၢ်မၤသံ မၤဝီႇ အတၢ်ဂုာ်ဆူၣ် ပျိဆူၣ်ႇ အ တၢ် မၤအၢ မၤနး တဖၣ် အဃိန့ၣ်လီၤႉ ဟံၣ်ဖိဃီဖိ တနီၤ အဖိလၢ အလိၣ်ဘီဘိထီၣ် တဖၣ်ႇ လၢ အမိၢ် အပၢ် တိာ်တၢ်လၢအဂီၢ် သ့ၣ်တဖၣ် ဘၣ်တၢ်မၤ သံကွံာ်အီၤႇ ပမ့ၢ်အိၣ်ဘၣ်ဖုး လၢ မိၢ်ပၢ် ဒ်န့ၣ် အသိး တဖၣ်အလီၢ်ႇ မ့ၢ်ပကတူၢ်ဘၣ်ဒ်လဲၣ် န့ၣ် ပသ့ၣ်ညါလီၤႉ ပှၤသးစၢ်ဖိ တဂၤ အိၣ်ဒၣ် ၁၆ နံၣ် ၁၇ နံၣ် ဒံး လီၤႉ မ့ၢ် တရူးအဟံၣ်ဖိဃီဖိ လၢအအိၣ်လၢ ကီၢ်ပယီၤ အပူၤ ဖးယံာ်လံလီၤႉ အတၢ်တိာ် န့ၣ် အိၣ်ဖးဒိၣ် ညါႇ ကကဲထီၣ်ကသံၣ်သရၣ်ဖးဒိၣ် တဂၤလီၤႉအဝဲမ့ၢ် သးစၢ်လၢ အဖၠဲး ဒိၣ်မးတဂၤ လီၤႉ တချုး ပယီၤသုး ဟံးတၢ်စိတၢ် ကမီၤ အခါ စးထီၣ်မၤလိ တၢ်လၢ ကသံၣ်ခီလ့ၣ်ကၠိ တၢ တနံၣ် လံ လီၤႉ အမိၢ် အပၢ် မုၢ်လၢ် တၢ်လၢ အအိၣ်ဒိၣ်ဒိၣ်အါအါလီၤႉ ဘၣ်ဆၣ် ပယီၤသုး ဟံး တၢ်စိ တၢ် ကမီၤဝံၤႇ ခီဖျိ လၢ အဝဲတတူၢ်လိာ် တၢ်ဟံးတၢ်စိတၢ်ကမီၤ ဒ်အံၤ တကလုာ် ဘၣ်အဃိႇ အဝဲ ပၣ်ဃုာ်ပၣ်ဂီၢ် လၢ တၢ်ထီဒါ သုးအ တၢ်ဟံးတၢ်စိ တၢ်ကမီၤ အပူၤန့ၣ်လီၤႉ တယံာ် ဘၣ် အဝဲ ဘၣ်တၢ် ခး သံအီၤ လၢ ပယီၤသုးဖိ တဖၣ်န့ၣ် လီၤႉ အမိၢ်အပၢ်ခံ ဂၤ အသးက ဘၣ်ဒိထဲလဲၣ်ႉ ပမ့ၢ်အိၣ် ဘၣ်လၢ အဝဲ သ့ၣ် အ လီၢ် ပ သးလၢ အဲၣ် ဒိး မၤကၣ်က့ၤ တၢ် ကအိၣ်ထီၣ် ဧါႉ ပှၤသးစၢ်အါဂၤ ထံၣ်ဘၣ် အသ ကိး တဖၣ် ဒီး ပှၤလၢ အ အဲၣ်ဝဲတဖၣ် ဘၣ်သံဆှူၣ်မဲာ်ကဲၤ မဲာ်အဃိ ဟဲထီၣ် လၢ တၢ်ပၢၢ် ဆၢ ဟီၣ် ကဝီၤ အပူၤႇ ဒ်သိးက မၤလိန့ၢ် သုး အတၢ်မၤလိႇ ဒ်သိး ကမၤဆၢက့ၤ တၢ်လၢ ပှၤလၢအ အဲၣ်ဝဲတဖၣ် အဂီၢ်န့ၣ်လီၤႉ 

 ပမ့မ့ၢ် ဒၣ်လဲာ်ပှၤခရံာ်ဖိ ဘၣ်ဆၣ်ႇ သးလၢ အအဲၣ်ဒိး ဟ့ၣ်ကၣ် တၢ်အိၣ်ဝဲလီၤႉ ပဟ့ၣ်ကၣ်လၢ ပကစၢ် ဒၣ်ပဝဲ မ့ၢ်တသ့ ဘၣ်ဆၣ်ႇ ပဆၢလၢ ပှၤလၢ အမၤတၢ်ဒ်န့ၣ်အသိး တဖၣ် ကတူၢ်ဘၣ်က့ၤ တၢ်တမံၤ ဃီ ဒ်အ မၤတ့ၢ်ပှၤ အသိးန့ၣ်လီၤႉ ပှၤတနီၤနီၤ မ့ၢ်တမၤတၢ်အၢ တၢ်သီ ဒိၣ်ဒိၣ်မုၢ်မုၢ် ဒ်န့ၣ် အသိး ဘၣ်ဆၣ်ႇ ခီဖျိ အဝဲသ့ၣ် အတၢ်ဖံးတၢ်မၤလၢ အမၤဘၣ်ဒိ ပသူးပသံၣ် ပလၤပကပီၤ အိၣ်ဝဲ အဃိႇ ပအဲၣ် ဒိးဟ့ၣ်ကၣ် က့ၤ အီၤ ဒ်အမၤပှၤ အသိးန့ၣ်အိၣ်ဝဲလီၤႉ 

 ၂ႉ စီၤဒၤဝံး စ့ၢ်ကီး အဲၣ်ဒိးမၤကၣ်က့ၤ တၢ်တဘျီဃီ ဖဲ အနၢ်ဟူ စီၤနၤဘလး အတၢ်ကတိၤ တဖၣ် ဝံၤ အလီၢ်ခံ န့ၣ်လီၤႉ ဖဲ လံာ် ၁ ရှမူၤအ့လး ၂၅း ၁ တုၤ ၃၈ အပူၤ ပကထံၣ်ဘၣ် စီၤဒၤဝံး အတၢ်ကူၣ် ထီၣ်လၢ ကမၤ ကၣ် က့ၤ စီၤနၤဘလး န့ၣ်လီၤႉ စီၤနၤဘလး မ့ၢ် ပှၤကဲဒိၣ်တဂၤလီၤႉ ၁ ရှမူၤအ့လး ၂၅း၂ စံးဝဲ လၢ အဝဲဒၣ်အိၣ် ဒီး အသိသၢကထိႇ ဒီးမဲာ်တဲးလဲး တကထိလီၤႉ အိၣ်စ့ၢ်ကီး ဒီး ခ့အပှၤ အါအါဂီၢ်ဂီၢ် လၢကမၤန့ၢ်တၢ်လၢ အဂီၢ်လီၤႉ ဖဲန့ၣ်အဆၢကတီၢ် ခီဖျိ တမျိၤတမျာ် အါဝဲ အဃိႇ ဒ်သိး စီၤနၤဘလး အပှၤကွၢ်သိ တဖၣ် ကပူၤဖျဲး အဂီၢ် စီၤဒၤ ဝံး မၢလီၤ အပှၤ သုးဖိတဖၣ် ကကဟု ကယာ် အဝဲသ့ၣ်န့ၣ်လီၤႉ ဖဲန့ၣ်အဆၢ ကတီၢ်ႇ ဘၣ်ဖဲ စီၤဒၤဝံး ဘၣ်ဃ့ၢ်ခူသူၣ် လၢ လၢၢ်ခိၣ်လ့ကျါ ခီဖျိ စီၤ ပၤစီၤစီလူး အတၢ်ဃုမၤသံ အီၤအဃိ လီၤႉ ခီဖျိ ဘၣ်ဃ့ၢ်ဝဲလၢ လၢၢ်ခိၣ်လ့ကျါႇ တကးဘၣ် အိၣ်စ့ၢ်ကီး ဒီး အပှၤသုးဖိ အဂၤ ဃုကယၤ အဃိ တၢ်အီၣ် တၢ်အီလၢ အဝဲသ့ၣ်အဂီၢ် လိၣ်ဝဲဒၣ်န့ၣ်လီၤႉ စီၤဒၤဝံး ဆိကမိၣ် လၢ အမၤဘျုးဘၣ် စီၤနၤဘလး ခီဖျိ ကွၢ်ထွဲစၢၤ န့ၢ် စီၤနၤဘလး အတၢ်စုလီၢ်ခီၣ်ခိၣ် တဖၣ်အဃိ စီၤနၤဘလး ကဟ့ၣ်က့ၤ အီၤ လၢ တၢ်ဘျုးတၢ် ဖှိၣ် တမံၤမံၤလီၤႉ 

 အဃိ စီၤဒၤဝံးမၢလီၤ အပှၤ ဆံဆဲၣ်ဂၤ လၢကလဲၤဆူစီၤနၤဘလး အအိၣ် ဒီးလဲၤဃ့ တၢ်မၤစၢၤႇ တၢ်အီၣ် တၢ်အီ တဖၣ် လၢအပှၤသုးဖိ အဂီၢ်န့ၣ်လီၤႉ စီၤဒၤဝံးမၢ အပှၤတဖၣ် လဲၤ လၢတၢ်ဆီၣ်လီၤသး အပူၤ ဒီး ဃ့စီၤနၤဘလး အတၢ်မၤစၢၤလၢ ကလုၢ်ကပုာ်လုး အပူၤ လီၤႉ ဘၣ်ဆၣ်န ဆိကမိၣ် စီၤနၤဘလး စံးဆၢ အဝဲသ့ၣ် ဒ်လဲၣ်ႉ လံာ် ၁ ရှမူၤအ့လး ၂၅း၃ စံးဘၣ်ပှၤလၢ စီၤနၤဘလး မ့ၢ် ပှၤအကီႇ ဒီးမၤတၢ်အၢ တဂၤ န့ၣ်လီၤႉ တၢ်လၢ နၤဘ လး အခီ ပညီ မ့ၢ် ပှၤအပျုၢ်လီၤႉ ဒ်အမံၤ အသိး အကစၢ်စ့ၢ်ကီး မ့ၢ်တၢ်ဒ် န့ၣ် အသိးလီၤႉ အဃိ အဝဲစံးဆၢက့ၤ စီၤဒၤဝံးအပှၤ တဖၣ်လၢ ဖဲအဆၢဖိ ၁၀ န့ၣ်ပကထံၣ်ဘၣ်ႇ 

စီၤဒၤဝံးန့ၣ်မ့ၢ် မတၤတဂၤလဲၣ်ႉ ဒီးစီၤယံးရှဲ အဖိခွါန့ၣ် မ့ၢ်မတၤတဂၤလဲၣ်ႉ တၢ်အကုၢ်လၢ အဃ့ၢ် ဟးထီၣ် ကွံာ်လၢ အကစၢ် အအိၣ်န့ၣ် အိၣ် ဝဲအါဂၤလၢ မုၢ်နံၤ တဖၣ်အံၤလီၤႉ ဒီးယကဟံးန့ၢ် ယ ကိၣ်ႇ ဒီး ယထံႇ ဒီး ယတၢ် ညၣ် လၢ ယမၤသံ အီၤလၢ ယပှၤတံာ် တၢ်ဖိ အဂီၢ်န့ၣ်ႇ ဒီးဟ့ၣ် လီၤ အီၤလၢ ပှၤလၢ အ ဟဲလၢ လဲၣ်န့ၣ် ယတသ့ၣ်ညါဘၣ် န့ၣ်ဧါႉ 

 စီၤနၤဘလး အတၢ်ကတိၤ အံၤဖျါဒ်သိး ဒီး အတ သ့ၣ် ညါ စီၤဒၤ ဝံးဘၣ်န့ၣ်လီၤႉ ဘၣ်ဆၣ် အသ့ၣ်ညါ စီၤဒၤဝံး လီၤ တံၢ်လီၤဆဲးလီၤႉ စီၤဒၤဝံးမ့ၢ် ပှၤလၢ အဟဲလီၤစၢၤလၢ ယူဒၤ အဒူၣ်အထၢလီၤႉ စီၤနၤ ဘလး စ့ၢ်ကီး မ့ၢ်ပှၤလီၤစၢၤလၢ ယူဒၤ အဒူၣ်စ့ၢ်ကီးလီၤႉ ၁ရှမူၤအ့လး ၂၅း၃ စံးဘၣ်ပှၤ လၢ စီၤနၤဘ လး မ့ၢ် စီၤကၤ လ့း အပှၤဟံၣ်ဖိလီၤႉ ဖဲစီၤမိၤရှ့ ဆှၢလီၤ ပှၤ ၁၂ ဂၤလၢ ကလဲၤကွၢ်ဟုၣ် ကီၢ် က နၤဟၣ် အခါ စီၤကၤ လ့း လဲၤလၢ ယူဒၤ အဒူၣ်အခၢၣ်စး န့ၣ်လီၤႉ ထဲစီၤကၤလ့း ဒီး စီၤယိၤရှူ ခံဂၤ စံးလၢ ကီၢ်ကနၤဟၣ်အံၤ ပဒုးအီၤ န့ၢ်လီၤႇ သ့လီၤ လၢယွၤအဂံၢ်အဘါန့ၣ်ႉ မ့မ့ၢ် ပှၤအဂၤတဆံ တခီစံး လၢ ပ ဒုး ကီၢ်ကနၤဟၣ် တန့ၢ်ဘၣ် မ့ၢ်လၢ ပှၤလၢ အအိၣ်လၢအပူၤ တဖၣ် အဂံၢ် အဘါဆူၣ်န့ၢ် ဒိၣ်န့ၢ် ပှၤ လီၤႉ လီၢ် ခံကတၢၢ် ပကထံၣ် ဘၣ် လၢ ထဲဒၣ်စီၤယိၤရှူ ဒီးစီၤကၤလ့း ခံဂၤလဲၤနုာ်ဘၣ်လၢ ကီၢ်ကနၤ ဟၣ် အပူၤလီၤႉ မ့မ့ၢ် ပှၤအဂၤ တဆံ ဒီး ပှၤလၢ အဒိကနၣ် ပှၤအဂၤတဆံ အကလုၢ် တဖၣ် တလဲၤနုာ် ဘၣ်ဆူ ကီၢ်ကနၤဟၣ် နီတဂၤဘၣ်ႉ 

 စီၤနၤဘလး မ့ၢ်ပှၤလီၤ စၢၤလၢ စီၤကၤလ့း န့ၣ်လီၤႉ ခီဖျိ လၢစီၤကၤလ့း အဃိ ပှၤလၢအလီၤစၢၤလၢအီၤ တဖၣ် ဘၣ်တၢ်ပာ်ကဲအီၤ ဒိၣ်မးလီၤႉ စီၤဒၤဝံးန့ၣ် မ့မ့ၢ်ဒၣ်ကယၢာ် ပှၤယူဒၤ အဒူၣ်ဖိ ဘၣ်ဆၣ်ႇ အဖုလၢ ပျၢၤ တဖၣ်အမံၤ တဟူသၣ် တဖျါဒ်သိး စီၤ နၤဘလး ဘၣ်ႉ အဃိႇ စီၤနၤဘလး ပာ်ကဖိ အ သး လၢစီၤဒၤ ဝံး အဖီခိၣ် သ့ဝဲလၢ တဂ့ၢ်အံၤလီၤႉ အဂၤတခါန့ၣ်ႇ စီၤနၤဘလး သ့ၣ်ညါထွဲ တၢ်ဂ့ၢ်လၢ စီၤဒၤဝံး ဒီးစီၤပၤ စီၤစီလူး အဘၢၣ်စၢၤန့ၣ်လီၤႉ တဲဝဲလၢ စီၤဒၤဝံးမ့ၢ် စီၤပၤ စီၤစီလူး အကုၢ်လၢ အဃ့ၢ် ဖျိးကွံာ် တဂၤ လီၤႉ အဃိႇ ဒ်အဝဲမ့ၢ် သဲထံဖးဒိၣ် တဂၤ အသိးႇ ဒ်အဝဲမ့ၢ် ကစၢ်တဂၤအသိးႇ အဝဲကွၢ်တလီၤ စီၤဒၤဝံး န့ၣ် ပနၢ်ပၢၢ်သ့လီၤႉ ဘၣ်ဆၣ်တၢ်လၢ စီၤနၤဘလး တပာ်သူၣ် ပာ် သး ဘၣ်န့ၣ် အိၣ် တခါႇ စီၤ ဒၤဝံး အိၣ်ဒီး အပှၤသုးဖိ ဃုကယၤႇ ဒီး ခီဖျိ လၢ အတၢ်ဂ့ၢ်လိာ် စီၤဒၤဝံးအပှၤ တဖၣ်အံၤ အဃိႇ တၢ်ကကဲထီၣ်အသးဒီးအီၤ ဒ်လဲၣ်န့ၣ် တပာ်သူၣ်ပာ်သး ဝဲဘၣ်ႉ စီၤဒၤဝံးမ့ၢ် ပှၤ လၢ အ သး ချ့ တဂၤ စ့ၢ်ကီးလီၤႉ တုၤလၢ အနၢ်ဟူ ဘၣ် စီၤနၤဘလး အတၢ်စံးဆၢ တဘျီဃီ အဲၣ်ဒိး မၤ ကၣ် က့ၤ စီၤ နၤ ဘလး တဘျီဃီလီၤႉ တၢတမံၤႇ စီၤနၤဘလး မၤဟးဂီၤ အသူးအသံၣ် အလၤအ ကပီၤ လီၤႉ ခံမံၤတမံၤႇ စီၤနၤဘလး တမ့ၢ်ပှၤတဂၤလၢ အသ့ၣ်ညါဆၢက့ၤ တၢ်ဘျုးတၢ်ဖှိၣ် ဘၣ် အဃိလီၤႉ အဃိႇ စီၤဒၤဝံးကိးထီၣ် အပှၤ သုးဖိလွံၢ်ကယၤ ဒ်သိး ကလဲၤမၤသံကွံာ် စီၤနၤဘလး ဒီး အဟံၣ်ဖိဃီဖိ ခဲလၢာ်န့ၣ်လီၤႉ 

 ၃ႉ ဘၣ်ဆၣ်ႇ တၢ်လၢကဘှီလိၤက့ၤ စီၤဒၤဝံးအကျဲ အိၣ်ဖျါထီၣ်လၢ အမဲာ်ညါ ဖဲအလဲၤ တၢ်လၢ ကျဲအ ဖၢမုၢ် လီၤႉ မ့ၢ်နီၢ်အဘံၤကါယံးလး လီၤႉ နီၢ်အဘံၤကါယံးလး မ့ၢ် စီၤနၤဘလး အမါလီၤႉ စီၤနၤ ဘလး မ့မ့ၢ် ပှၤအပံာ်အ ကီႇ ဒီးမၤတၢ်အၢ တဂၤဘၣ်ဆၣ် အမါ နီၢ်အဘံၤကါယံးလး မ့ၢ် ပှၤလၢ အဒိၣ် တၢ်ဂ့ၤႇ ပှၤအသူၣ်ဂ့ၤ သးဝါ တဂၤလီၤႉ မ့ၢ်အဝဲသ့ၣ်ကဲထီၣ် နီၣ်ဒီမါဝၤ ဒ်လဲၣ် ပတသ့ၣ်ညါဘၣ်ႉ တလဲးလိာ် အသး နီတ စဲးဘၣ်ႉ လီၤဂာ်ဒ်သိး ဒၣ်တၢ်ဂီၤမူ အပူတယုၢ် လၢအမ့ၢ် “The Beast and the Beauty” လီၤႉ လၢပူတယုၢ်အံၤ အပူၤ ပှၤလၢအထံၣ်ဘၣ်တဖၣ် ကထံၣ်ဝဲလၢ ပိာ်မုၣ်လၢ အဒိၣ်တၢ် ဂ့ၤႇ လီၤအဲၣ်လီၤကွံတဂၤ အဲၣ်လိာ် အ သးဒီး စီၤပၤဖိခွါလၢ အဘၣ်တၢ်ဆိၣ်အၢႇ လၢအက့ၢ် အဂီၤ လီၤဂာ် ဒ်တၢ်နါ အ သိး န့ၣ် လီၤႉ ဘၣ်ဆၣ် ပိာ်မုၣ်အံၤ အဲၣ်အီၤကဲလီၤႉ မ့ၢ်နီၢ်အဘံၤကါယံးလး ဒီး စီၤနၤဘလး ဒီ မါဝၤခံဂၤ အံၤ ကလီၤ ဂာ်ဒ် သိး အံၤ ဧါပတဲတဘၣ်ဘၣ်ႉ 

 နီၢ်အဘံၤကါယံးလး အခ့အပှၤ ပိာ်ခွါ တဂၤတဲဘၣ်အီၤ တၢ်ကဲထီၣ်အသး ဘၣ်ဃးဒီး စီၤဒၤဝံး အတၢ်ဆှၢ လီၤအပှၤ ဆူစီၤနၤဘလး အ အိၣ်ႇ ဒီး စီၤနၤ ဘလး တတူၢ်လိာ် စီၤဒၤဝံး ဘၣ် ဒ်လဲၣ် အဂ့ၢ်ႇ ဒီးစီၤဒၤဝံး ကဟဲကဒီး ဃုာ်ဒီး အသုးမုၢ်သံၣ်ဘိ တဖၣ် ဒီး မၤဟး ဂီၤကွံာ် စီၤနၤဘလး အဂ့ၢ်ႇ ဒီး တဲ ဘၣ်ဃုာ် ဝဲ စီၤ ဒၤဝံး အခ့ အပှၤတဖၣ် မၤစၢၤအဝဲသ့ၣ် ဒ်လဲၣ်အဂ့ၢ်ႇ ဝံၤတဘျီဃီ နီၢ်အဘံၤကါယံး လး သုးကျဲၤ တၢ်အီၣ်တၢ်အီ တဘျီဃီ ဒီး လဲၤသဂၢၢ် စီၤဒၤဝံး အခိၣ်လၢကျဲ လီၤႉ ဖဲ နီၢ်အဘံၤ ကါယံးလး ထံၣ်စီၤဒၤဝံးဟဲဝဲတဘျီဃီႇ လံာ် ၁ရှမူၤအ့လး ၂၅း၂၃ စံးလၢ အဝဲဒၣ် မၤဝဲ ချ့ချ့ႇ ဒီးယုၢ် လီၤလၢ ကသ့ၣ်ယီၤအလိၤႇ ဒီးတီၤလီၤကဒွံကျိာ်ႇ ဒီးထိၣ်လီၤပှီၤအသး စီၤဒၤဝံးအခီၣ် ထံးႇ ဝံၤ ဃ့ ထီၣ် ဝဲ တၢ်ဂ့ၢ် သၢခါ န့ၣ်လီၤႉ 

 တၢ်ဂ့ၢ်တၢ တခါန့ၣ် မ့ၢ် တၢ်ဃ့န့ၢ်တၢ်လၢ အဝၤစီၤနၤဘလး အတၢ်ပူၤဖျဲး အဂီၢ်လီၤႉ ပကထံၣ်ဘၣ်အီၤ လၢ ၁ရှမူၤအ့လး ၂၅း၂၅ အပူၤန့ၣ်လီၤႉ တဲဝဲစီၤဒၤဝံးလၢ အဝၤစီၤနၤဘလး န့ၣ် ဒ်အမံၤအခီ ပညီ အ သိး အိၣ်မူ ဝဲဒ်န့ၣ်လီၤႉ အဃိ တဘၣ်ပာ်တၢ်ကမၣ်လၢအလိၤ နီတမံၤ တဂ့ၤႉ 

 တၢ်ဂ့ၢ်ခံခါတခါန့ၣ် မ့ၢ် တၢ်ဘှီက့ၤ စီၤဒၤဝံး ဒ်သိး သုတပိာ်ကျဲ ကမၣ် တဂ့ၤ အဂီၢ်န့ၣ်လီၤႉ ပကထံၣ် ဘၣ် အီၤ လၢ ၁ရှမူၤအ့လး ၂၅း၂၆ အပူၤန့ၣ်လီၤႉ နီၢ်အဘံၤကါယံးလး စံးဘၣ် စီၤဒၤဝံး လၢ နီၢ်အ ဘံၤ ကါယံး လး အတၢ်ဟဲအံၤ မ့ၢ် ယွၤမၢအီၤ လၢကဟဲတြီ စီၤဒၤဝံးအကျဲ ဒ်သိး အသု တမၤဆၢ တၢ်အၢလၢ အစုဒၣ်ဝဲ တဂ့ၤႇ ဒ်သိး အကပာ်ထီၣ် တၢ်ဟ့ၣ်ကၣ်အံၤ လၢ ကစၢ်ယွၤ အစုပူၤ အဂီၢ် န့ၣ်လီၤႉ 

 တၢ်ဂ့ၢ်သၢခါတခါန့ၣ် မ့ၢ်ဝံအတၢ်ကတိၤ လၢအဘၣ်ဃးဒီး ကစၢ်ယွၤ ကဒုးအိၣ်ထီၣ် ဘီမုၢ်လၢ က တၢၢ် တသ့ ဘၣ်တဘ့ၣ် ခီဖျိ စီၤဒၤဝံး န့ၣ်လီၤႉ အိၣ်ဖျါဝဲလၢ ၁ရှမူၤအ့လး ၂၅း၂၈ တုၤ ၃၁ အပူၤ န့ၣ်လီၤႉ အဝဲအံၤမ့ၢ် နီၢ်အဘံၤကါယံးလး အတၢ်ဃ့ထီၣ်သၢထံၣ်ႇ ဒီးပစံးသ့လၢ မ့ၢ်ကစၢ်ယွၤ အတၢ်သုး တၢ်ကျဲၤလၢ စီၤဒၤဝံးအဂီၢ် ဒ်သိး အသုတမၤကၣ်က့ၤ တၢ်လၢ အကစၢ်ဒၣ် ဝဲ တ ဂ့ၤႇ ဒီး ပာ်လီၤ အတၢ်မၤကၣ်လၢ ကစၢ်ယွၤ အစုပူၤ အဂီၢ်န့ၣ်လီၤႉ 

 ၄ႉ စီၤဒၤဝံး နၢ်ဟူ တၢ်ကတိၤလၢ နီၢ်အဘံၤကါယံးလး စံးဘၣ်အီၤ တဖၣ်ဝံၤအလီၢ်ခံ အဝဲစံး ထီၣ် ပတြၢၤ ကစၢ်ယွၤႇ ပာ်ထီၣ် အတၢ်ဟ့ၣ်ကၣ်လၢ ကစၢ်ယွၤအစုပူၤႇ ဒီးမၤထွဲဝဲဒ် နီၢ်အဘံၤကါယံးလး အတၢ် စံးတၢ်က တိၤ အသိးန့ၣ်လီၤႉ စီၤဒၤဝံးသ့ၣ်ညါဝဲလၢ နီၢ်အဘံၤကါယံးလး အတၢ်ဟဲတြီအကျဲ န့ၣ် မ့ၢ် ကစၢ်ယွၤ အတၢ်သုး တၢ်ကျဲၤ တမံၤလီၤႉ အဃိႇ စီၤဒၤဝံး အသးမုာ်ထီၣ် ဒီး ဟံးန့ၢ်တၢ် လၢ နီၢ်အဘံၤ ကါယံးလး ဟဲစိာ်န့ၢ် အီၤ တဖၣ် ဝံၤ က့ၤကဒါက့ၤဆူ အလီၢ် ခံန့ၣ်လီၤႉ 

 ၅ႉ လၢတၢ်န့ၣ်အဃိႇ ပာ်ထီၣ်နတၢ်ဟ့ၣ်ကၣ် တဖၣ်လၢ ယွၤအစုပူၤတက့ၢ်ႉ ဒီးအဝဲကကွၢ်ကျဲၤန့ၢ် နၤ တၢ်လၢ နဂီၢ်ခဲလၢာ် ဒ် အကျဲၤန့ၢ် စီၤဒၤဝံး အသိးန့ၣ်လီၤႉ စီၤဒၤဝံး က့ၤတလၢဝံၤ အလီၢ် ခံႇ နီၢ်အဘံၤ ကါယံး လး စ့ၢ်ကီး က့ၤဆူအဟံၣ်လီၤႉ ဖဲက့ၤတုၤလၢ အဟံၣ်အခါ ထံၣ်ဝဲလၢ အဝၤစီၤနၤ ဘလး မၤတၢ် အီၣ်တၢ်အီ ဒိၣ်ဒိၣ်မုၢ်မုၢ်ႇ အီၣ်လုၣ်ကိလုၣ်ကပာ်တၢ်ႇ အီမူၤအသး ဒိၣ်မး အဃိႇ နီၢ်အဘံၤကါ ယံး လး တ တဲစီၤ နၤဘလး ဘၣ်ဃး တၢ်ဂ့ၢ် အံၤနီတမံၤဘၣ်ႉ လၢခံတနံၤ မး တဲဘၣ်က့ၤဝဲ စီၤနၤဘလး ဘၣ်ဃး တၢ်ဂ့ၢ်အံၤလီၤႉ ဖဲစီၤနၤဘ လး နၢ်ဟူ ဝဲတဘျီဃီ လံာ်စီဆှံစံးဘၣ်ပှၤလၢ အသးသံဝဲလၢ အ ပူၤႇ ဒီးကဲထီၣ်ဝဲဒ် လၢၢ် အသိးန့ၣ် လီၤႉ ၁ရှမူၤအ့လး ၂၅း၃၇ႉ ဝံၤအလီၢ်ခံႇ ဆံဆဲၣ်နံၤ ဃၣ်ဃၣ်ႇ တၢ် မၤအ သးလၢ ယွၤတီၢ် စီၤနၤဘလးႇ ဒီးသံဝဲလီၤႉ (၁ရှမူၤအ့လး ၂၅း၃၈)ႉ တလိၣ်စီၤဒၤဝံး မၤကၣ် စီၤနၤဘလး လၢ အကစၢ်ဒၣ်ဝဲဘၣ်ႉ မ့မ့ၢ်တခီ ပာ်ထီၣ် တၢ်မၤကၣ် အံၤလၢ ကစၢ်ယွၤ အလိၤႇ ဒီး ယွၤ သုး ကျဲၤ န့ၢ်တၢ်လၢ အဂီၢ်ခဲလၢာ်လီၤႉ 

 ပဝဲအါဂၤ ပကသ့ၣ်ညါ သုးခိၣ်စီၤဘးဝါလီၤႉ ဖဲတၢ်ကဲထီၣ်အသးလၢ ကနဲလ့ ဝံၤ အလီၢ်ခံ အဝဲကတိၤ လီၤတၢ်လၢ Facebook အပူၤဒီး တဲဝဲ လၢ ပှၤလၢအအဲၣ်တဖၣ် ဘၣ်တၢ်မၤသံအီၤ ဆှူၣ်မဲာ်ကဲၤမဲာ်လၢ ပယီၤ သုးတဖၣ်လီၤႉ တူၢ်ဝဲတန့ၢ် လၢၤ အဃိ လီၢ်ခံကတၢၢ် နုာ်လီၤလၢ သုးပူၤ ဒ်သိး ကကဒီသဒၢ ပှၤကလုာ်လၢ တၢ်မၤသံဆှူၣ်မဲာ်ကဲၤမဲာ် အံၤန့ၣ်လီၤႉ အသးလၢ ကမၤကၣ်က့ၤ ပှၤမၤ တၢ်အၢတၢ်သီ တဖၣ် အံၤတအိၣ် ဘၣ်ႉ မ့မ့ၢ်တခီ ဖဲအဖီၣ်န့ၢ် ပယီၤသုး အဆၢကတီၢ်ႇ အကစၢ် ဒၣ်ဝဲစံး လၢႇ တၢ် ဘၣ် ဒိ ဘၣ်ထံးမ့ၢ် အိၣ် ကူဆါယါဘျါက့ၤ ဝဲဒီး ပျၢ်ဖျဲးကွံာ်ဝဲန့ၣ်လီၤႉ တၢ်ဟ့ၣ်ကၣ်န့ၣ် တအိၣ်လၢ ပစုပူၤ ဘၣ်ႇ အိၣ်ဒၣ် လၢ ယွၤအစုပူၤလီၤႉ 

 လံာ်ရိမ့ၤ ၁၂း၁၉ စံးဘၣ်ပှၤ 

 ပှၤလၢယအဲၣ်အီၤသ့ၣ်ဧၢႇ သုတမၤကၣ်တၢ်လၢ သုဂီၢ်ဒၣ်သုဝဲတဂ့ၤႉ မ့မ့ၢ် ပျဲတၢ်သးဒိၣ် တက့ၢ်ႉ အဂ့ၢ်ဒ်အံၤႇ တၢ်ကွဲးအသးစံးဝဲဒၣ်ႇ တၢ်မၤကၣ်န့ၣ်ႇ အိၣ်ဒီးယၤလီၤႇ ယကဟ့ၣ်ကၣ် တၢ်ယဲလီၤႉ ယွၤစံးဝဲဒၣ်ႉ 

 ပဝဲတနီၤ ပဘၣ်လဲၤခီဖျိတၢ်အါမး လၢပတၢ်အိၣ်မူအပူၤႇ ပှၤလၢပအဲၣ် တဖၣ် ဘၣ်တၢ်မၤသံအီၤ ဆှူၣ် မဲာ်ကဲၤမဲာ်န့ၣ်လီၤႉ ပဝဲတနီၤနီၤ ပဘၣ်လဲၤခီဖျိအီၤလၢ ပကစၢ်ဒၣ်ပဝဲန့ၣ်လီၤႉ ဘၣ်တၢ်ဒိ ပှၤ တီၢ်ပှၤႇ ပသူး ပသံၣ်ပလၤပကပီၤ တဖၣ် ဘၣ်တၢ်မၤဟးဂီၤအီၤ အိၣ်ဝဲလီၤႉ ပအဲၣ်ဒိး မၤကၣ် က့ၤ ပှၤလၢ အမၤပှၤဒ်န့ၣ်အသိး တဖၣ်ႇ ဘၣ်ဆၣ် ခီဖျိလၢ ပမၤအီၤ တသ့ဘၣ်အ ဃိႇ တုၤခဲအံၤ ဒၣ်လဲာ် ပဆၢ လၢ ပှၤတ ဖၣ်န့ၣ် ကဟးဂီၤကွံာ် ချ့ချ့ႇ ကဘၣ်ဒၣ်ဝဲဒ် အမၤပှၤ အသိး တက့ၢ်ႉ ဒီပုၢ်ဝဲၢ်သ့ၣ်ဧၢႇ ပကဟ့ၣ်လီၤ အးလီၤ ပသးလၢ အအဲၣ်ဒိး မၤကၣ် က့ၤ တၢ်တဖၣ် လၢယွၤ အစုပူၤ တက့ၢ်ႉ ပကတဲဘၣ် ကစၢ်ယွၤႇ ယွၤဧၢမၤစၢၤယၤ ဒ်သိး ယသး ကကဆှီ ထီၣ်ကွံာ် လၢသးလၢ အအဲၣ်ဒိးမၤကၣ် က့ၤတၢ်အံၤ န့ၣ်တက့ၢ်ႉ တၢ်မၤကၣ်န့ၣ် အိၣ်လၢ ကစၢ်ယွၤ အစုပူၤလီၤႉ ကစၢ်ယွၤကမၤကၣ်န့ၢ် တၢ်လၢ ပဂီၢ် အခါဖဲလဲၣ်ဒု ပတသ့ၣ်ညါဘၣ်ႉ ဘၣ်ဆၣ် ကစၢ်ယွၤ ကမၤဝဲသပှၢ်ကတၢၢ်လီၤႉ ကစၢ်ခရံာ်ဟဲလီၤလၢ ဟီၣ်ခိၣ်ချၢႇ ဘၣ်တၢ် တီၢ်အီၤႇ အသွံၣ်ဘၣ်ယွၤလီၤႇ ဒီး ဘၣ်တၢ်မၤသံအီၤလၢ သ့ၣ်ဖျၢၣ်ထူၣ်စုညါ အလိၤလီၤႉ ဘၣ်ဆၣ်ႇ အဝဲ တမၤကၣ်ဆၢက့ၤ ဝဲဘၣ်ႇ မ့မ့ၢ်တခီစံးဝဲလၢ ပၢ်ဧၢပျၢ်အတၢ်ကမၣ် တက့ၢ်ႉ မ့ၢ်လၢတသ့ၣ်ညါ ဝဲအဃိ မၤဝဲလီၤႉ ဖဲကစၢ်ခရံာ်ဟဲခံဘျီတဘျီ အခါႇ တၢ်မၤကၣ်ႇ တၢ်မၤသံ မၤဝီ တဖၣ် အအိၣ် လၢၤ ဘၣ်ႉ ပှၤလၢ အမၤတ့ၢ် တၢ်အၢတၢ်သီတဖၣ် တၢ်ကဟ့ၣ်ကၣ် က့ၤအဝဲသ့ၣ် တဘျီဃီ ဒ် အ မၤတ့ၢ်ဝဲအသိးလီၤႉ အဃိ နသးလၢ အအဲၣ်ဒိး မၤကၣ်က့ၤ တၢ်မ့ၢ်အိၣ်ႇ ပာ်ထီၣ်လၢ ကစၢ်ယွၤ အလိၤ တက့ၢ်ႉ ခါဆူမဲာ်ညါ လၢနတၢ်အိၣ်မူအပူၤႇ အဆၢကတီၢ်ကတုၤဝဲလၢ နက အဲၣ် ဒိး မၤကၣ် က့ၤ ပှၤ လၢ အကမၤသးအုးနၤႇ မၤတံာ်တာ်နသးႇ မၤအၢမၤသီနၤ န့ၣ်လီၤႉ မ့ၢ်ကဲထီၣ် အသး ဒ်န့ၣ်အခါႇ သ့ၣ်နီၣ်ထီၣ် က့ၤ လၢနမ့ၢ်ပှၤခရံာ်ဖိ ဒီး ပျၢ်ကွံာ်ပှၤလၢ အမၤအၢနၤ တဖၣ် အတၢ်ကမၣ်ႇ ဒီးဘါထုကဖၣ်န့ၢ် တၢ်လၢ အဂီၢ်တက့ၢ်ႉ ပာ်ထီၣ် နသးလၢအအဲၣ်ဒိးမၤကၣ် တၢ်လၢ ကစၢ်ယွၤ အစု ပူၤ တက့ၢ်ႉ ဒီးနကအိၣ်က့ၤ ဒီး တၢ်သူၣ်မံသးမုာ်လၢ နတၢ်အိၣ်မူ အပူၤန့ၣ်လီၤႉ