ယဲဒၣ်အံၤ, ယမ့ၢ်စပံးအမုၢ်, သုဝဲသ့ၣ်အံၤ, သုမ့ၢ်အဒ့အဖီလီၤ. ပှၤလၢအအိၣ်လၢယပူၤ, ဒီးယအိၣ်လၢ အပူၤန့ၣ်, သၣ်ထီၣ်ဝဲဒၣ်အါဖျၢၣ်လီၤ. အဂ့ၢ်ဒ်အံၤ, မ့တမ့ၢ်ဘၣ်လၢယၤဒီး, သုမၤတၢ်တသ့ဘၣ် နီတမံၤဘၣ်. ပှၤမ့ၢ်တအိၣ် တဆိးဘၣ်လၢ ယပူၤဘၣ်ဒီး, ကဘၣ်တၢ်ညိကွံာ်အီၤ, ဒ်တၢ်အဒ့အသိး, ဒီးကဃ့ထီကွံာ်ဝဲလီၤ. ဒီးပှၤကထၢဖှိၣ် အီၤ, ဒီး ဖၢလီၤအီၤလၢ မ့ၣ်အူအပူၤ, ဒီးမ့ၣ်အူကအီၣ်ကွံာ်အီၤလီၤ. (ယိၤဟၣ် ၁၅း၅-၆).
တၢ်လၢအမူကိးမံၤဒဲးန့ၣ်ဒိၣ်ထီၣ်ဝဲလီၤ. ဒ်တၢ်မူကိးမံၤဒဲး ဒိၣ်ထီၣ်ဝဲဒၣ်အသိး, နီၢ်သးအတၢ်အိၣ်မူစ့ၢ်ကီးဒိၣ်ထီၣ်ဝဲ လီၤ. ဖဲပအိၣ်ဖျဲၣ်ကဒီးအသီတဘျီလၢခရံာ်အပူၤန့ၣ်, ပနီၢ်သးအတၢ်အိၣ်မူ ကဘၣ်ဒိၣ်ထီၣ်ဝဲလီၤ. သးစီဆှံလၢပပူၤ န့ၣ် ဟ့ၣ်ပှၤတၢ်စိတၢ်ကမီၤ လၢ ကဆီတလဲပှၤ ဒ်သိးပကလီၤဂာ်အါထီၣ်ဒီး ခရံာ်, ဒီးဒိၣ်ထီၣ်လၢ ကျဲအါဘိ အပူၤလီၤ.
အခီပညီန့ၣ်, ပဆဲးဒိၣ်ထီၣ်လၢ သးအတၤသၣ်တဖၣ်အပူၤ ဒီး ပတၢ်သကဲာ်ပဝး ကဘၣ်ဂ့ၤထီၣ်ဝဲလီၤ. လၢတၢ် န့ၣ်အဃိ, မ်ပကဃုအါထီၣ် တၢ်စီတၢ်ဆှံ ဒီး တၢ်လီၤဂာ်ဒီးယွၤအါထီၣ်လၢ ပတၢ်အိၣ်မူအပူၤတက့ၢ်. မ်ပကနီၤလီၤ အါထီၣ် တၢ်သးခုကစီၣ်ဆူ ပှၤဂၤအအိၣ်လၢ တၢ်သဘျ့အပူၤတက့ၢ်. ပတၢ်အိၣ်မူလၢ အမုာ်အခုၣ်အံၤ ကဆီတလဲ အသးဆူ တၢ်မၤတၢ်လၢ ကစၢ်ယွၤအဘီအမုၢ်အဂီၢ်လီၤ. အခီပညီ, ပသးအတၢ်သးစၢၢ်ဆၢ လၢ ဟီၣ်ခိၣ် အတၢ် သးကွံတဖၣ်န့ၣ် ကစှၤလီၤဝဲ ဒီး ပကဂုာ်ကျဲးစၢး အါထီၣ်လၢ မူခိၣ် အတၢ်ပီးတၢ်လီလၢအဟးဂီၤတသ့ဘၣ် တဖၣ်အဂီၢ်လီၤ.
မ့ၢ်လီၤ. တၢ်မူတဖၣ်န့ၣ်ဒိၣ်ထီၣ်ဝဲလီၤ. ဒီးဖဲ တၢ်မူတဖၣ် ပတုာ်ကွံာ်လၢအတၢ်ဒိၣ်ထီၣ်အပူၤန့ၣ်, အဝဲသ့ၣ်စးထီၣ် သံကွံာ်ဝဲဒၣ်ကယီကယီလီၤ. ဖဲနဆိကမိၣ်အီၤထံထံန့ၣ် နကထံၣ်ဘၣ်လၢ နမ့ၢ်တဒိၣ်ထီၣ်လၢနနီၢ်သးတကပၤ ဘၣ်န့ၣ် နနီၢ်သးန့ၣ် ကသံကွံာ်ဝဲဒၣ် ကယီကယီလီၤ.
ကွၢ်ကစၢ်ယ့ၣ်ရှူးခရံာ် အတၢ်ထိၣ်သတြီၤ ဘၣ်ဃး တၢ်ဂ့ၢ်အံၤတက့ၢ်.
အဝဲမ့ၢ် စပံးမုၢ် ဒီး ပမ့ၢ် အဒ့အဖီတဖၣ် လီၤ. မ့ၢ်ပကသၣ်ထီၣ်ပတၤသၣ် တဖၣ်ဧါ, မ့တမ့တခီ ပကလီၤညွံးလီၤ ဘဲကွံာ်ဧါ. ပကဒိၣ်ထီၣ်ဧါ, မ့တမ့ၢ်ဘၣ်တခီ ပကသံကွံာ်ကယီကယီဧါ. တၢ်ဂ့ၢ်အိၣ်ဒၣ်ထဲတခါဧိၤန့ၣ်မ့ၢ်ဝဲ, ပနီၢ်သး အတၢ်ဒိၣ်ထီၣ် ဒီး ပနီၢ်သးအတၢ်သံလီၤ.
လီၤဂာ်ဒ်သိးဒီး ပစးထီၣ်အီ ခီဖံၣ် အသိးလီၤ. ဖဲပအီခီဖံၣ် သီသီအခါန့ၣ် ပကတူၢ်ဘၣ်လၢ အခၣ်ဝဲ, ဘၣ်ဆၣ် ဖဲပဆဲးအီအီၤ ကိးနံၤဒဲးန့ၣ် လီၤဂာ်က့ၤဒ်သိးဒီး ပမ့ၢ်တအီအီၤဘၣ်န့ၣ် ပအိၣ်တကဲဘၣ်အသိးလီၤ.
တၢ်အါမံၤန့ၣ် လီၤဂာ်ဒ်န့ၣ်အသိးလီၤ. ပၣ်ဃုာ်ဒီး နီၢ်သးတကပၤစ့ၢ်ကီးလီၤ. ဘၣ်တဘၣ် ဖဲနစးထီၣ်ဖီၣ်ထီၣ် လံာ်စီဆှံ အဆိကတၢၢ်တဘျီ ဒ်သိးဒီးနကဖးအီၤ ဒီး နကတိၢ်န့ၢ်အီၤအဂီၢ်န့ၣ် မ့ၢ်တၢ်ကီတၢ်ခဲဖးဒိၣ်လီၤ. ဘၣ်ဆၣ် ဖဲနဆဲးမၤအီၤဒ်န့ၣ် ကိးနံၤဒဲးန့ၣ် နသးကစၢၢ်ဆၢဒိၣ်ထီၣ်လီၤ.
ဖဲန့ၣ်နကအဲၣ်ဒိး တၢ်လၢအပူၤကွံာ်လၢ နတအဲၣ်ဒိးအီၤဘၣ်, ဝံၤနကအဲၣ်ဒိးမၤတၢ်လၢ နမၤအီၤလၢအပူၤကွံာ် တသ့ဘၣ် န့ၣ်လီၤ.
တၢ်ဒဲးဘးန့ၣ် ဒ်န့ၣ်အသိးလီၤ. ဖဲနထံၣ် ပှၤတဂၤဂၤ လီၤတဲာ်ကွံာ်လၢ တၢ်ဒဲးဘးအပူၤန့ၣ်, နကဆိကမိၣ်လၢ နသးပူၤ လၢ “ယတကဲထီၣ်ဒ်သိးဒီးအီၤဘၣ်.” ဘၣ်ဆၣ် ပှၤတဂၤန့ၣ် တကဲထီၣ်အသးဒ်န့ၣ် တနၤဃီ အတီၢ်ပူၤ ဘၣ်. အဝဲဒၣ် အတၢ်ဒဲးဘးန့ၣ် စးထီၣ်ကယီကယီ, ဒိၣ်ထီၣ်ကယီကယီလီၤ. ဒိၣ်ထီၣ်, ဒိၣ်ထီၣ်တုၤလၢ အဝဲဒၣ် လီၤတဲာ်ကွံာ်လၢာ်လၢာ်ဆ့ဆ့လၢ တၢ်ဒဲးဘးအပူၤလီၤ.
အဃိ, ပကဘၣ်ပလီၣ်ပသးလၢ ပတၢ်စံးတၢ်ကတိၤ ပတၢ်ဆိကမိၣ်ဆိကမးလၢ ပှၤဂၤအဖီခိၣ်လီၤ. မ့ၢ်လၢ တၢ်တမံၤဃီန့ၣ် ဘၣ်နၤသ့ညီကဒၣ်အဃိလီၤ.
ပတၢ်အီၣ်ဝံၣ်န့ၣ်ဒိၣ်ထီၣ်ဝဲကယီကယီ, ဒီးပတၢ်အီၣ်ဝံၣ်န့ၣ် ဒိၣ်ထီၣ်ဝဲခီဖျိ ပတၢ်ဃုထၢလၢ ပမၤအီၤလၢ ကိးနံၤဒဲး အပူၤလီၤ.
အဃိ တၢ်အီၣ်ဝံၣ်လၢ နကဒုးအီၣ် နနီၢ်သး န့ၣ်မ့ၢ်မနုၤလဲၣ်.
0 Comments