ဒီပုၢ်ဝဲၢ်သ့ၣ်ဧၢ, ပှၤကညီတဂၤဂၤမ့ၢ် ဘၣ်တၢ်ချုးန့ၢ်အီၤလၢ အလီၤကမၣ်တမံၤမံၤဒီး, သုဝဲလၢ အဘၣ်ဃးဒီးသးန့ၣ်, ဝံၣ်ဆၢထၢၣ်က့ၤအီၤ အိၣ်ဒီး သုသူၣ်စူၤသးစူၤ, ဒီး ကွၢ်လီၤနသးဒၣ်နဲ ဒ်သိး နသုတဘၣ် တၢ်လ့ပစီတဂ့ၤန့ၣ် စ့ၢ်ကီးတက့ၢ်. ဝံလိၥ်သုတၢ်ဝံတၢ်ဃၢ သကိးသကိး, ဒီး မၤလၢထီၣ်ပှဲၤထီၣ် ခရံၥ်အတၢ်သိၣ်တၢ်သီ ဒ်န့ၣ်အသိးတက့ၢ်. (ကလၤတံ ၆း၁-၂).
ပမ့ၢ်သ့ၣ်ညါလၢ ပှၤလၢပတဝၢအပူၤတဖၣ် အိၣ်ဒီးသးအတၢ်ဆါ, နီၢ်ခိအတၢ်ဆါ, မ့တမ့ၢ် ခိၣ်နူာ်အတၢ်ဆါ လၢအစိာ်ဝဲလၢတၢ်ခူသူၣ်အပူၤတဖၣ် လၢမၤဟးဂီၤအဝဲသ့ၣ် ဒ်ခဲစၢၣ်တၢ်ဆါအသိး န့ၣ် ကမ့ၢ်တၢ်လီၤလိၢ်လီၤလး ဒိၣ်မးလီၤ. နမ့မ့ၢ် ပှၤဒ်န့ၣ်အသိးအကျါတဂၤန့ၣ်, ဝံသးစူၤ စးထီၣ်တဲဘၣ်ကစၢ်ယွၤ, ဒီး အဝဲဒၣ် ကမၤဖှံလီၤ နတၢ်ဝံတၢ်ယိး, မ့တမ့ၢ် အဝဲကဆှၢနၤဆူ တၢ်လၢနကဘၣ်မၤအီၤဆူညါလီၤ. တၢ်လၢပဘၣ်မၤအီၤတဖၣ် ပမ့ၢ် တမၤအီၤဘၣ်န့ၣ် မ့ၢ်တၢ်လၢအလီၤဘၣ်ယိၣ် ဒိၣ်မးလီၤ.
ကစၢ်ယွၤ အတၢ်ဘၣ်သးလၢ ပဂီၢ်န့ၣ် မ့ၢ်တၢ်လၢတၢ်ပှဲၤလီၤ. တမ့ၢ်ဘၣ် တၢ်အိၣ်ဒီး သးသမူလၢအပှဲၤဒီး တၢ်ပူၤဟိ တဖၣ် ဒီး ကွၢ်ပတၢ်အိၣ်မူ လၢအလီၤလဲာ်တဖၣ် တနံၤဝံၤတနံၤန့ၣ်ဘၣ်. တၢ်ပာ်ဖျါထီၣ် တၢ်ခူသူၣ်တဖၣ် န့ၣ်မ့ၢ်တၢ် လၢအကီအခဲဝဲ, ဘၣ်ဆၣ် တၢ်လၢအကီအခဲဒိၣ်န့ၢ်အန့ၣ် တက့ၢ်န့ၣ် မ့ၢ်တၢ်ပာ်ခူသူၣ်အီၤ, ဒီးတၢ်အိၣ်မူလၢ အိၣ်ဒီး တၢ်ပျံၤလၢ တၢ်ခူသူၣ်အံၤကအိၣ်ဖျါထီၣ်ဝဲလီၤ. အဃိ, နကဘၣ်ကတိၤတၢ်ဒီး နီၢ်သးခိၣ်နၢ်လၢနနာ်န့ၢ်အီၤတဂၤ, နဟံၣ်ဖိဃီဖိလၢ နနာ်န့ၢ်အီၤအကျါတဂၤ, နတံၤသကိး, မ့တမ့ၢ် ပှၤလၢအဟ့ၣ်ကူၣ်တၢ်တဂၤ န့ၣ်လီၤ.
ကစၢ်ယွၤကနဲၣ်နခီၣ်ခါတဖၣ် ဖဲနလဲၤဆူအအိၣ် ဒီး တဲအီၤလၢ နဘၣ်သူၣ်ဘၣ်သးအီၤ လၢလၢပှဲၤပှဲၤအခါလီၤ. တၢ်အိၣ်ဘူးဒီးယွၤ ဘူးဘူးတံၢ်တံၢ် အခီပညီန့ၣ် မ့ၢ် နကတိၤတၢ်ဒီးကစၢ်ယွၤဖျိဖျိဖျါဖျါသ့ဝဲဒၣ်, ဒီးတဲဘၣ်အီၤ တၢ်ခဲလၢာ်ခဲဆ့ သ့ဝဲဒၣ်န့ၣ်လီၤ. နတဲတၢ်ဒီးကစၢ်ယွၤမ့ၢ်အါ, နသးမုာ်ထီၣ်ဒ်အါလီၤ.
တၢ်ဂ့ၢ်လၢ ပကဘၣ်တဲဖျါထီၣ်ပတၢ်ခူသူၣ်တဖၣ်န့ၣ်မ့ၢ် တၢ်ကီတၢ်ခဲလၢ ပဃုပှၤတဂၤလၢ ပကနာ်န့ၢ်အီၤ လၢ ပကတဲအီၤအဂီၢ်အဃိလီၤ. တၢ်လၢပှၤဂၤမၤအီၤန့ၣ် ပပၢဆှၢအီၤတသ့ဘၣ်, ဘၣ်ဆၣ် ဒ်သိးပကကဲထီၣ် တံၤသကိး လၢ အသးတီအဂီၢ် ပမၤလိန့ၢ်အီၤသ့လီၤ. ပှၤမ့ၢ်တဲနၤတၢ်တမံၤမံၤလၢ နကဘၣ်ပာ်အီၤလၢ တၢ်ခူသူၣ် အဂီၢ်န့ၣ်, တဘၣ်တဲဘၣ်ပှၤအဂၤတဂၤတဂ့ၤ. အဝဲသ့ၣ်မ့ၢ်တဲနၤ တၢ်တမံၤမံၤလၢ အမၤကမၢကမၣ်နၤန့ၣ်, မၤတၢ်အဂ့ၤကတၢၢ်ဒ်သိး နသုတဖျါလၢနကမၢကမၣ်တဂ့ၤ, တဘၣ်စံၣ်ညီၣ်အီၤတဂ့ၤ. တၢ်တိာ်လၢ တၢ်ပာ်ဖျါ ထီၣ် တၢ်ခူသူၣ်န့ၣ်မ့ၢ်လၢ တၢ်မၤဂ့ၤထီၣ်က့ၤတၢ်အဂီၢ်, တမ့ၢ်လၢ တၢ်တဲဆါအီၤအဂီၢ် ဒီး တၢ်စံၣ်ညီၣ်အီၤအဂီၢ် ဘၣ်. ပကဘၣ်မၤ ပှၤလၢ အတဲဖျါထီၣ် အတၢ်ခူသူၣ်ဆူပအိၣ် ဒ်ပအဲၣ်ဒိး တၢ်မၤပှၤအသိးလီၤ.
0 Comments