နဘၣ်တၢ်အဲၣ်နၤ

ဒီးတၢ်မုၢ်လၢ်န့ၣ်, တမၤမဲၥ်ဆှးဘၣ်တၢ်ဘၣ်. အဂ့ၢ်ဒ်အံၤ, သးစီဆှံလၢ တၢ်ဟ့ၣ်လီၤအီၤလၢပှၤန့ၣ်, ဂၢ်လီၤယွၤ အတၢ်အဲၣ်တၢ်ကွံ လၢပသးကံၢ်ပူၤလီၤ. (ရိမ့ၤ ၅း၅).

လံၥ်စီဆှံအဆၢဖိလၢ အစိကမီၤအိၣ် ဒိၣ်ကတၢၢ်အကျါတဆၢဖိ လၢ လံၥ်စီဆှံအပူၤန့ၣ် မ့ၢ်ဝဲ ၁ ယိၤဟၣ် ၄း၈, လၢအစံးဝဲ, “ပှၤလၢအတအဲၣ်ဘၣ်န့ၣ်, တသ့ၣ်ညါဘၣ်ယွၤဘၣ်. အဂ့ၢ်ဒ်အံၤ, ယွၤမ့ၢ်တၢ်အဲၣ်တၢ်ကွံလီၤ.” လၢ တၢ်ကတိၤအဂၤတဖျၢၣ်န့ၣ်, ကစၢ်ယွၤအန့ဆၢၣ်မ့ၢ် တၢ်အဲၣ်တၢ်ကွံ, ဒီးမ့ၢ်တၢ်စိကမီၤလၢအဒိၣ်န့ၢ်ဒံး တၢ်ကိးမံၤဒဲး လၢဟီၣ်ခိၣ်အံၤလီၤ. တၢ်အဒိၣ်ကတၢၢ်လၢ ကစၢ်ယွၤဟ့ၣ်ပှၤန့ၣ် မ့ၢ်တၢ်အဲၣ်တၢ်ကွံလီၤ. တၢ်ကိးမံၤဒဲးလၢ ကစၢ်ယွၤ မၤဝဲန့ၣ် ဒိးသန့ၤအသးလၢ တၢ်အဲၣ်တၢ်ကွံလီၤ. ဖဲနဆိကမိၣ်ဘၣ်ဃး ကစၢ်ယွၤအဂ့ၢ်အကျိၤ တဘျီလၢ်လၢ်, ဖးအဂ့ၢ်အကျိၤလၢ အကလုၢ်ကထါအပူၤ, မ့တမ့ၢ် ကတိၤတၢ်ဒီးအီၤ, ဒီးဖဲန့ၣ် နကအၢၣ်လီၤတူၢ်လိၥ်လၢ ကစၢ်ယွၤ အဲၣ်နၤကိးဆၢကတီၢ်ဒဲးလီၤ.

 
ပှၤတၢ်မၢဖိစီၤပီလူး ကွဲးဝဲဒၣ်ဖဲ ရိမ့ၤ ၅း၅ လၢ ကစၢ်ယွၤအတၢ်အဲၣ်အံၤဘၣ်တၢ်လူလီၤအီၤလၢ ပသးပူၤခီဖျိ သးစီဆှံလီၤ. ဖဲပဃုထၢ ယ့ၣ်ရှူးခရံၥ် ဒ်ပကစၢ်ဒီးပှၤလၢအပှ့ၤက့ၤပှၤန့ၣ်, သးစီဆှံဟဲနုၥ်လီၤဒီးအိၣ်ဆိးလၢ ပသး ပူၤ ခီဖျိ တၢ်နၥ် ဒ်ကစၢ်ယွၤ အတၢ်ဟ့ၣ်လၢပဂီၢ်အသိးလီၤ. အဝဲဒၣ်မၤတၢ်လၢပဂီၢ် တဘျုးမံၤ, ဒီးမၤတၢ်လၢ ပတၢ်အိၣ်မူ လၢကျဲတဘျုးဘိအပူၤ, ဒီးအကျါတဘိန့ၣ် မ့ၢ်ဝဲ တၢ်ဟဲစိၥ်ကစၢ်ယွၤ အတၢ်အဲၣ် ဆူပအိၣ် ဒီး ဒုးသ့ၣ်နီၣ်ထီၣ်ပှၤ ဘၣ်ဃး တၢ်အံၤန့ၣ်လီၤ.

 
ပှၤတဂၤဂၤလၢ အအိၣ်ဒီး နီၣ်သး အတၢ်ပူၤလီၣ်န့ၣ် ကဘၣ်နၥ်ဝဲလၢ ကစၢ်ယွၤအဲၣ်အီၤန့ၣ် ကီခဲဝဲဒိၣ်မးလီၤ. အဝဲ ဒၣ်ကတူၢ်ဘၣ်လၢ အတကြၢးဝဲဘၣ်ဝဲဒီး ကစၢ်ယွၤအတၢ်အဲၣ်ဘၣ်, မ့တမ့ၢ် အဝဲဒၣ် ကပျံၤလၢ ကစၢ်ယွၤန့ၣ် လီၤဂၥ်ဒ်သိးဒီး ပှၤလၢ အစံးလၢ အအဲၣ်အီၤ ဝံၤအလီၢ်ခံ မၤဆါအီၤန့ၣ်လီၤ. ဘၣ်ဆၣ်, တၢ်လၢကစၢ်ယွၤ အဲၣ်ဒိးဝဲ န့ၣ်မ့ၢ် ပကဒိးန့ၢ် အတၢ်အဲၣ်ခီဖျိ တၢ်နၥ်အဃိ, နၥ်လၢ ကစၢ်ယွၤန့ၣ် ဒိၣ်န့ၢ်ဒံး ပတၢ်ပျံၤတၢ်ဖုးတဖၣ်, ပတၢ်တဂိၥ် တသီၣ်တဖၣ်, ပတၢ်ဂံၢ်စၢ်ဘါစၢ်တဖၣ်, ဒီးတၢ်ဆူးတၢ်ဆါလၢ အပူၤကွံၥ်တဖၣ်လီၤ.

 
ဖဲပဂဲၤဆၢထၢၣ်ဂၢၢ်ကျၢၤလၢ တၢ်သ့ၣ်ညါကစၢ်ယွၤ အတၢ်အဲၣ်ပှၤအပူၤန့ၣ်, ပသးကပှဲၤဒီး တၢ်နၥ်န့ၢ်လီၤသး, တၢ်ဃူတၢ်ဖိး, တၢ်သူၣ်ခုသးခု, တၢ်မုၢ်လၢ်, တၢ်ကွၢ်န့ၣ်တၢ်လၢပှၤဂၤဂီၢ်, ဒီး တၢ်ပၥ်သးအဂ့ၤလၢ ပခါဆူညါ အဂီၢ် န့ၣ်လီၤ.
ဟ့ၣ်ဂံၢ်ဟ့ၣ်ဘါနၤလၢ နကဃ့သးစီဆှံလၢ ကဆဲးလီၣ်ဖျါထီၣ်န့ၢ်နၤ ကစၢ်ယွၤ အတၢ်အဲၣ် ဆူနအိၣ်, ဒီး ကွၢ်ဃု တၢ်လၢလံၥ်စီဆှံအပူၤ ဘၣ်ဃး ကစၢ်ယွၤအတၢ်အဲၣ်တၢ်ကွံအဂ့ၢ်လီၤ. ဟ့ၣ်ဂံၢ်ဟ့ၣ်ဘါစ့ၢ်ကီးနၤလၢ နကတိၢ်န့ၢ် လံၥ်စီဆှံအဆၢဖိလၢလၥ်တဖၣ်အံၤ ဒ်သိးကမၤစၢၤနၤ လၢ နကဆၢထၢၣ်ဂၢၢ်ကျၢၤလၢ ကစၢ်ယွၤအတၢ်အဲၣ်နၤ အပူၤအဂီၢ်လီၤ.

• “အဂ့ၢ်ဒ်အံၤ, ယွၤအဲၣ်ဟီၣ်ခိၣ်ဖိ တုၤအဟ့ၣ်လီၤကွံၥ် အဖိခွါအိၣ်တဂၤဃီ, ဒ်သိးကယဲၢ်ပှၤလၢ အစူၢ်က့ၤနၥ်က့ၤ အီၤ တဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ်တၢ်မူအထူအယိၥ်လီၤ.” (ယိၤဟၣ် ၃း၁၆).
• “ယွၤလီၣ်ဖျါအသးလၢ ယမဲၥ်ညါလၢအယံၤ, ဒီးစံးဝဲဒၣ်, ယအဲၣ်တ့ၢ်နၤလၢ တၢ်အဲၣ်အထူအယိၥ်လီၤ. မၤသးဒ်န့ၣ် ဒီး ယမိၤလံနၤလၢ တၢ်ဘျုးတၢ်ဖှိၣ်လီၤ.” (ယံးရမံယၤ ၃၁း၃).
• “ဘၣ်ဆၣ်ဒီးနဲဒၣ်, ယွၤဧၢ, နမ့ၢ်ကစၢ်တဂၤလၢ အသးအိၣ်တၢ်, ဒီးသးကညီၤတၢ်, သးထီၣ်ကီ, ဒီး အိၣ်ဒီး တၢ်ဘျုး တၢ်ဖှိၣ် တၢ်မ့ၢ်တၢ်တီလၢ အဒိၣ်အအါလီၤ.” (စံးထီၣ်ပတြၢၤ ၈၆း၁၅).
• “မ့မ့ၢ်ဖဲ ပမ့ၢ်ပှၤတၢ်ဒဲးဘးဖိ အဖၢမုၢ်ဒီး, ခရံၥ်ဒိးသံအသးလၢ ပဂီၢ်သတးဒီး, ယွၤပၥ်ဖျါထီၣ် အတၢ်အဲၣ်တၢ်ကွံ ဒၣ်ဝဲလၢပှၤလီၤ.” (ရိမ့ၤ ၅း၈).

ဖဲနဆိမိၣ်ဘၣ်ဃး လံၥ်စီဆှံအဆၢတဖၣ်အံၤ ဒီးလံၥ်စီဆှံအဆၢအဂၤဒ်သိးအံၤတဖၣ်အဆၢကတီၢ် ဃ့သးစီဆှံလၢ ကဒုးကဲထီၣ် လံၥ်စီဆှံအဆၢဖိတဖၣ်အံၤ လၢတၢ်မ့ၢ်တၢ်တီလၢနဂီၢ်, ဒီး နကဒိၣ်ထီၣ်လၢ တၢ်နၥ်န့ၢ်လီၤသးလၢ ကစၢ်ယွၤအတၢ်အဲၣ်နၤအပူၤ န့ၣ်လီၤ.