ယွၤလၢအအိၣ်ခိးနၤ

ဒီးမၤသးဒ်န့ၣ်ဒီး ယွၤကအိၣ်ခိးဒ်သိး အကသးကညီၤသု, ဒီး မၤသးဒ်န့ၣ်ဒီး ကဂဲၤဆၢထၢၣ်ဒ်သိး အကသးအိၣ် သုလီၤ. အဂ့ၢ်ဒ်အံၤ, ယွၤမ့ၢ် တၢ်စံၣ်ညီၣ်အကစၢ် လီၤ. ပှၤလၢအကွၢ်လၢ် အကျဲန့ၣ် ဘၣ်ဆိၣ်ဂ့ၤခဲလၢာ်လီၤ. (ယရှါယၤ ၃၀း၁၈).

ဖဲတၢ်ကီတၢ်ခဲအဆၢကတီၢ် လံာ်စီဆှံတဆၢအံၤ ကမ့ၢ်လံာ်စီဆှံတဆၢလၢ ကဟ့ၣ်နၤတၢ်ဂံၢ်တၢ်ဘါ ဒိၣ်မးလီၤ. ခ့ခါစှီၤကျိာ်ကွဲးဝဲဒ်အံၤ, “အန့ၣ်ဒၣ်လဲာ်, ယွၤအိၣ်ခိးသုလၢ ကသူၣ်ကညီၤသးကညီၤ သုအဂီၢ်လီၤ. အဝဲအိၣ်ကတဲာ် ကတီၤအသးလၢ ကသးကညီၤသုလီၤ. အဂ့ၢ်ဒ်အံၤ, အဝဲမၤတၢ်လၢ အဘၣ်ထီဘိလီၤ. ပှၤလၢအပာ်အတၢ်နာ်လၢ ယွၤအပူၤတဖၣ်န့ၣ်, မ့ၢ်ပှၤလၢ အဘၣ်ဆိၣ်ဂ့ၤနီၢ်နီၢ်လီၤ.” ခဲအံၤ ပကဆိကမိၣ်ဘၣ်ဃး တၢ်အၢၣ်လီၤအီလီၤအံၤ အတၢ်စံးဆၢ န့ၣ်တက့ၢ်. ပှၤလၢအတ့လီၤမူခိၣ်ဒီးဟီၣ်ခိၣ် တဂၤအံၤ ဃုထၢလၢ ကအိၣ်ခိးပှၤ - အိၣ်ခိးလၢ ပက သ့ၣ်ညါလီၤပသးအဂီၢ်, အိၣ်ခိးလၢ ပကအဲၣ်ဆၢက့ၤအီၤအဂီၢ်, အိၣ်ခိးလၢ ပကဃၣ်တရံးက့ၤပသးဆူအအိၣ်လၢ တၢ်မၤစၢၤအဂီၢ်လီၤ.

 
မ့ၢ်တၢ်တမံၤလၢ အလီၤဆိကမိၣ်ဖးဒိၣ်, ကစၢ်ယွၤအဲၣ်ဒိးဒုးနဲၣ်ပှၤ အတၢ်အဲၣ်လီၤ.

 
မုၣ်ကီၤလံၢ် ဂုာ်ကျဲးစၢးဒ်သိး ပခိၣ်ကကိၤ အဂီၢ်လီၤ. ဖဲပသးဒ့ဒီလၢ ယွၤအတၢ်အဲၣ်တၢ်ကွံအပူၤန့ၣ်, ပဝဲဒၣ်အါဂၤ ပတတူၢ်လိာ်အီၤညီညီဘၣ်. ပကဆိကမိၣ်ဒၣ်ထဲ ပတၢ်လီၤတူာ်လီၤကာ်, ပတၢ်ကမၣ်တဖၣ်, ဒီး တၢ်ဂ့ၢ်အဂၤတဖၣ် လၢ ဘၣ်မနုၤအဃိ ကစၢ်ယွၤအဲၣ်ပှၤတသ့ဘၣ်လဲၣ်.

 
ပဝဲဒၣ်အါဂၤ ပတထံၣ်တၢ်အဂ့ၤ လၢပမၤတဖၣ်ဘၣ်. မ့မ့ၢ်တခီ, ပထံၣ်က့ၤဒၣ်ထဲ ပတၢ်လီၤတူာ်လီၤကာ်တဖၣ်, ဒီး ပတၢ်ကမၣ်တဖၣ်လီၤ. လၢပှၤခရံာ်ဖိအါဂၤအသိးအကျါဒၣ်လဲာ် ကအိၣ်ဝဲသ့ၣ်သ့ၣ်လီၤ. ပထံၣ်လီၤက့ၤထဲ ပတၢ်ကမၣ် တဖၣ်အဃိ, ပတနာ်လၢ ကစၢ်ယွၤကဆိၣ်ဂ့ၤပှၤဘၣ်. နမ့ၢ်ဖးဘၣ်, “ကစၢ်ယွၤအဲၣ်ဒိးစံၣ်ညီၣ်နၤလီၤ” န့ၣ် တၢ်ကီတၢ်ခဲတအိၣ်နီတမံၤလၢ နကစံး, “မ့ၢ်လီၤ, ယကြၢးဘၣ်တၢ်စံၣ်ညီၣ်လီၤ.” ဘၣ်ဆၣ်, ပှၤတဂၤဂၤမ့ၢ်တဲ နၤ, “ကစၢ်ယွၤအဲၣ်ဒိးဆိၣ်ဂ့ၤနၤ” န့ၣ်, ဘၣ်တဘၣ်ပကစံး, “ယတကြၢးဒီးတၢ်ဆိၣ်ဂ့ၤဘၣ်.”

 
ပှၤလၢအနာ်လၢ အကြၢးဒိးန့ၢ် ကစၢ်ယွၤအတၢ်ဆိၣ်ဂ့ၤလီၤ န့ၣ်အိၣ်ပှဲၤဂၤလဲၣ်. ပအဲၣ်ဒိးတၢ်ဂ့ၤတၢ်ဝါတဖၣ်လီၤ. ပအဲၣ်ဒိးလၢ ယွၤကအဲၣ်ပှၤ, ဟ့ၣ်ဂံၢ်ဟ့ၣ်ဘါပှၤ, ဆိၣ်ဂ့ၤပှၤ, ဒီးဟ့ၣ်ပှၤတၢ်မၤနၢၤ, သနာ်က့ ပကြၢးဒိးန့ၢ် တၢ်ဆိၣ် ဂ့ၤဘၣ်ဆၣ်, ပတူၢ်လိာ်အီၤတဘူၣ် အါအါဘၣ်.

 
ဘၣ်မနုၤအဃိလဲၣ်န့ၣ်, ပဆိကမိၣ်လၢ ပကဘၣ်မၤတၢ်တမံၤမံၤ ဒ်သိး ပကဒိးန့ၢ် တၢ်ဆိၣ်ဂ့ၤအဂီၢ်အဃိလီၤ. ပကဘၣ်မ့ၢ်ပှၤလၢအိၣ်မူဂ့ၤဂ့ၤဘၣ်ဘၣ်, မ့တမ့ၢ် ပှၤလၢအသးတီဒီး ယွၤနီၢ်နီၢ်လီၤ. ပမ့ဆိကမိၣ်ဒ်န့ၣ်န့ၣ်, ပသးပ့ၤ နီၣ်လၢ ကစၢ်ယွၤမ့ၢ်ပှၤလၢအအိၣ်ဒီးတၢ်စိတၢ်ကမီၤ, ဒီး ပှၤလၢအအဲၣ်တၢ်ကွံတၢ်နီၢ်နီၢ်တဂၤလီၤ. ပတၢ်ဆိၣ်ဂ့ၤ လၢအဟဲလၢယွၤအအိၣ်န့ၣ် တမ့ၢ်လၢ ပမ့ၢ်ပှၤဂ့ၤပှၤဝါအဃိဘၣ်. မ့ၢ် ကစၢ်ယွၤအတၢ်ဂ့ၤတၢ်ဝါအဃိလီၤ.

 
ပကြၢးဒိးန့ၢ် ကစၢ်ယွၤအတၢ်ဆိၣ်ဂ့ၤသ့ဒၣ်ထဲ တၢ်ဂ့ၢ်တမံၤအဃိလီၤ. မ့ၢ်လၢပမ့ၢ် အဝဲဒၣ်အဖိ အဃိလီၤ. မ့ၢ်တၢ်ယိယိဖိလီၤ. ပှၤလၢအကဲမိၢ်ပၢ်တဖၣ် ကသ့ၣ်ညါဝဲလီၤ. ပဟဲစိာ်ပဖိတဖၣ်လၢ ဟီၣ်ခိၣ်အံၤအဃိ, အဝဲသ့ၣ် ကြၢးဒီး ပတၢ်အဲၣ်တၢ်ကွံလီၤ. ပဟ့ၣ်အီၤပတၢ်အဲၣ်လၢ တအိၣ်ဒီးအပှ့ၤကလံၤဘၣ်, တချုးလၢ အဝဲသ့ၣ်မၤတၢ်ဂ့ၤ မ့ၢ်ဂ့ၤ မၤတၢ်အၢမ့ၢ်ဂ့ၤ အခါဒၣ်လဲာ်လီၤ. အဝဲသ့ၣ်ကြၢးဒီး ပတၢ်ကဟုကယာ် ဒီး တၢ်ဂ့ၤတၢ်ဝါတဖၣ်လၢ ပဃုထၢ ဟ့ၣ်အဝဲသ့ၣ်န့ၣ်လီၤ. ခီဖျိလၢအဝဲသ့ၣ် မၤတၢ်ဂ့ၤတမံၤမံၤအဃိ အဝဲသ့ၣ်ကြၢးဒီး တၢ်တဖၣ်န့ၣ်လီၤ န့ၣ်တမ့ၢ်ဘၣ်. မ့ၢ်လၢအဝဲသ့ၣ်မ့ၢ်ပဖိတဖၣ်အဃိလီၤ.

 
မုၣ်ကီၤလံၢ် အဲၣ်ဒိး ဃၣ်ကဒါက့ၤ ပတၢ်ဆိကမိၣ်လၢတၢ်တမံၤ အဂ့ၢ်လီၤ. ဖဲပဆိကမိၣ်လၢ ပကြၢးဒီး တၢ်ဆိၣ်ဂ့ၤ လံန့ၣ်, အဝဲဒၣ် ကဒုးနဲၣ်ပှၤ ပတၢ်ဂံၢ်စၢ်ဘါစၢ်, မ့တမ့ၢ် ပတၢ်လီၤတူာ်လီၤကာ် တဖၣ်လီၤ. မ့မ့ၢ်ကစၢ်ယွၤကခီ ကဒုးနဲၣ်ပှၤ ပတၢ်ရ့လိာ်ဘၣ်ထွဲဒီးအီၤန့ၣ်လီၤ. အဝဲန့ၣ်မ့ၢ် တၢ်လီၤဆီလၢ ယွၤဒီး မုၣ်ကီၤလံၢ်အဘၢၣ်စၢၤလီၤ.