မ်တၢ်န့ၢ်မါန့ၢ်ဝၤဒီး လီၢ်မံတဘၣ်အၢဘၣ်န့ၣ်, အိၣ်ဒီး အလၤအကပီၤ လၢပှၤခဲလၢာ်အကျါ တက့ၢ်. မ့မ့ၢ်ပှၤမၤ ကမၣ် ပိာ်မုၣ်ပိာ်မၢၤ,ဒီးပှၤလၢ အမၤကမၣ် ပှၤမါန့ၣ်, ယွၤ ကစံၣ်ညီၣ်အီၤလီၤ. (ဧ့ၤဘြံၤ ၁၃း၄).
ဒ်သိးပကအိၣ်ဒီး တၢ်ဆီဟံၣ်ဆီဃီလၢ အဂ့ၤအဂီၢ်, တၢ်မၤလိာ်အထံၣ်တဆံလၢ တၢ်န့ၢ်မါန့ၢ်ဝၤအဂီၢ် မ့ၢ်ဒ်လာ်အသိးအံၤလီၤ.
- ကစၢ်ယွၤစံးဝဲဒၣ်, “မ်တၢ်န့ၢ်မါန့ၢ်ဝၤန့ၣ် အိၣ်ဒီးအလၤအကပီၤတက့ၢ်.” အဃိ အိၣ်ဒီးတၢ်သးတီလၢ တဂၤဒီး တဂၤအဘၢၣ်စၢၤတက့ၢ်. စူးကွံာ်ညိကွံာ်တၢ်အဂၤတဖၣ်, ပာ်နမါနဝၤ လၢနမိၢ်အမဲာ်ညါ, နပၢ်အမဲာ်ညါ, နဖိခွါ ဒီး နဖိမုၣ်အမဲာ်ညါ တက့ၢ်. မ့ၢ်လၢနမါနဝၤမ့ၢ် နသးသမူအတံၤသကိး အဃိလီၤ.
- သ့ၣ်နီၣ်ထီၣ်, “သုမ့ၢ်ယွၤအတၢ်လုၢ်ဟံၣ်, ဒီးယွၤအသးအိၣ်ဝဲဆိးဝဲ လၢသုပူၤန့ၣ်, မ့ၢ်သုတသ့ၣ်ညါဘၣ်ဧါ.” (၁ ကရံၣ်သူး ၃း၁၆). တဘၣ်မၤဟးဂီၤနတၢ်အိၣ်ဆူၣ်အိၣ်ချ့လၢ တၢ်အီၣ်တၢ်အီ, တၢ်အီသံးတၢ်မူၤတၢ်ဘှီး တဂ့ၤ. အန့ၣ်မး, နကအိၣ်ဒီး တၢ်အိၣ်မူလၢအအိၣ်ဆူၣ်အိၣ်ချ့ လၢပှၤလၢနအဲၣ်တဂၤအဂီၢ်လီၤ.
- တဘၣ်ပျဲ နတၢ်ဖံးတၢ်မၤ ဒီး နတၢ်သးစဲတဖၣ် လၢကဒုးကဲထီၣ်နၤ ပှၤစီစၣ် လၢနဟံၣ်ဖိဃီဖိအဂီၢ် တဂ့ၤ. “ကွၢ်ကွၢ်, ပဖိပလံၤန့ၣ် မ့ၢ်တၢ်န့ၢ်သါ လၢယွၤလီၤ.ဒီး ပှၤဒၢလီၢ် အတၤသၣ်န့ၣ် မ့ၢ်တၢ်အဘူးအလဲ လီၤ.” (စံးထီၣ်ပတြၢၤ ၁၂၇း၃). ဒီး တၢ်ဟ့ၣ်အလုၢ်ဒိၣ်ပှ့ၤဒိၣ်ကတၢၢ်လၢ နကဟ့ၣ်အဝဲသ့ၣ်န့ၣ် မ့ၢ် နတၢ်ဆၢကတီၢ် လီၤ.
- သးပ့ၤနီၣ်လၢ တၢ်ကဆှီန့ၣ် မ့ၢ် တၢ်စိတၢ်ကမီၤန့ၣ်တဂ့ၤ.
- ဟ့ၣ်နီၤလီၤ တၢ်လၢအအိၣ်ဒီးနၤတဖၣ် လၢတၢ်သးအိၣ်အပူၤတက့ၢ်. တဘၣ်ဒုးကဲထီၣ် နမါနဝၤ လၢ ပှၤဃ့ အီၣ်တၢ်ဖိတဂ့ၤ. “ပိာ်ခွါသ့ၣ်ဧၢ, အဲၣ်သုမါ, ဒ်ခရံာ်အဲၣ်တၢ်အိၣ်ဖှိၣ်,ဒီး ဟ့ၣ်လီၤကွံာ်အသးလၢအဂီၢ်,” (အ့းဖ့းစူး ၅း၂၅).
- တဘၣ်သးပ့ၤနီၣ်လၢနကစံး, “ယအဲၣ်နၤ” တဂ့ၤ. နတၢ်အဲၣ်မ့ၢ်ဂၢၢ်ကျၢၤဘၣ်ဆၣ်, နမါနဝၤ တလီၤဘှံးလၢ ကနၢ်ဟူတၢ်ကတိၤအဝဲန့ၣ်အဂီၢ် ဘၣ်.
- သ့ၣ်နီၣ်ထီၣ်လၢ နမါနဝၤ အတၢ်ဘၣ်သးန့ၣ် ဂ့ၤဒိၣ်န့ၢ်ဒံး ပှၤစီစၣ် လၢအကယၤ အတၢ်ဘၣ်သူၣ်ဘၣ်သး တက့ၢ်လီၤ.
- မ်နဟံၣ်ဖိဃီဖိကအိၣ်ဒီး တၢ်ဃူတၢ်ဖိးတက့ၢ်. မ့ၢ်လၢတၢ်အံၤအဃိ ကကဲထီၣ် တၢ်သူၣ်ခုသးခု ဖဲနသးပှၢ် အဆၢကတီၢ်လီၤ.
- ထီဘိ ပျၢ်တၢ်ကမၣ်လၢ တၢ်ဘျုးတၢ်ဖှိၣ်အပူၤတက့ၢ်. ပှၤလၢပကျါလၢ တကြၢးဘၣ် တၢ်ပျၢ်အတၢ်ကမၣ် အိၣ်တဂၤဂၤစ့ၢ်ကီးဧါ. “ဒီးဝံသးစူၤလိာ် သုသး, သူၣ်ကညီၤသးကညီၤလိာ်သုသး, ပျၢ်လိာ်သု တၢ်, ဒ်ယွၤအိၣ် လၢခရံာ်အပူၤ ပျၢ်သုတၢ်အသိးန့ၣ်တက့ၢ်.” (အ့းဖ့းစူး ၄း၃၂).
- ဟ့ၣ်ကစၢ်ယွၤလၢ တၢ်လၤကပီၤတက့ၢ်. နဖိတဖၣ် ကဒိၣ်ထီၣ် ဒီး ကပာ်လၤပာ်ကပီၤနၤလီၤ. “ဆှၢဖိဒံဖိသၣ်လၢအကျဲဧိၤကပူၤဧိၤန့ၣ်တက့ၢ်.ဒီးတုၤ အသးပှၢ်ဒီး, တဟးဖးဒီးအီၤဘၣ်.” (ကတိၤဒိ ၂၂း၆).
0 Comments