တၢ်ကွၢ်ဆၢၣ်မဲာ်

ဘၣ်ဆၣ်ဒီး တုၤစီၤပ့းတရူးဟဲဆူ အၣ်တံၤအီာ်ဒီး, ယဂ့ၢ်လိာ်ဘှီလိာ်အီၤလၢ အမဲာ်သၣ်ပူၤလီၤ. အဂ့ၢ်ဒ်အံၤ, ပာ်တၢ်ကမၣ်လၢ အလိၤအလီၢ်အိၣ်လီၤ. (ကလၤတံ ၂း၁၁).

စီၤပ့းတရူးဘၣ်သဂၢၢ်ဒီး သုးဖိတကယၤအခိၣ် သုးခိၣ်စီၤကန့လံး ဝံၤအလီၢ်ခံ စီၤပ့းတရူးဒီး ပှၤတၢ်မၢဖိအဂၤ တဖၣ် ဆှၢတၢ်အိၣ်ဖှိၣ်လၢအခီၣ်ထံးခီၣ်ဘိ တဖၣ်လၢ ကနၢ်ပၢၢ်ကစၢ်ယွၤအတၢ်ဘျုးတၢ်ဖှိၣ် လၢပှၤကိးဂၤဒဲး အဂီၢ် အပူၤ န့ၣ်လီၤ (မၤတၢ် ၁၀-၁၁, ၁၅). ဘၣ်ဆၣ်သနာ်က့, လီၢ်ခံန့ၣ် စီၤပ့းတရူး ဘၣ်သူၣ်ဘၣ်သးဒိၣ်လၢ ပှၤယူဒၤ ဖိလၢအကဲထီၣ်က့ၤပှၤခရံာ်ဖိတဖၣ်, ဖဲစီၤပီလူး မၤတၢ်သးခုကစီၣ်အတၢ်မၤလၢ ကလုာ်ဂၤတဖၣ် အကျါအခါလီၤ (မၤတၢ် ၉, ၁၃-၁၄, ၁၆-၁၈). စီၤပ့းတရူးမ့ၢ်နာ်လၢ ကစၢ်ယွၤအတၢ်အဲၣ်န့ၣ်လၢပှၤကိးဂၤဒဲး အဂီၢ်ဘၣ်ဆၣ်, တဘျီတခီၣ် အဝဲဒၣ်က့ၤကဒါက့ၤဆူ တၢ်အဲၣ်အပှၤကလုာ်, အဃိ အဝဲဒၣ်ဟးဆှဲးလၢကအီၣ်သကိးတၢ် ဒီး ပှၤတခီဘီမုၢ်ဖိတဖၣ်, မ့ၢ်လၢ အဘၣ်ယိၣ်ဝဲလၢ ကမၤသးတမုာ်ဘၣ် ပှၤယူဒၤဖိလၢ အကဲထီၣ်ပှၤခရံာ်ဖိ တဖၣ်လီၤ. လၢဝ့ၢ်အၣ်တံၤအီာ်အပူၤန့ၣ် စီၤပီလူး ကွၢ်ဆၢၣ်မဲာ်ဒီး စီၤပ့းတရူး ဒီးစံးအီၤလၢ အမ့ၢ်ပှၤပာ်မၤ အသး မ့ၢ်လၢ အထုးဖးအသးဒီး ပှၤတခီဘီမုၢ်ဖိတဖၣ်အဃိလီၤ.

 
စီၤပီလူးအတၢ်စံးတၢ်ကတိၤမ့ၢ်တလၢကွံာ်အခၢးဘၣ်ဆၣ်, ပစံးဘျုးယွၤသ့လၢ စီၤပီလူး တမၤကဒံကဒါ ကစၢ်ခရံာ် အတၢ်သးခုကစီၣ် ဘၣ်ဃး တၢ်အဲၣ်တၢ်ကွံဒီး တၢ်ဃူတၢ်ဖိးန့ၣ်ဘၣ်. ဒီး, လီၢ်ခံလၢတၢ်သးအုးအပူၤ ပထံၣ်ဘၣ်လၢ စီၤပ့းတရူး လၢအမ့ၢ်ထူၣ်တထူၣ်လၢ တၢ်အိၣ်ဖှိၣ်လၢအခီၣ်ထံးခီၣ်ဘိအဂီၢ် ဘၣ်ဆၣ်, ဒုးနဲၣ်ဖျါ ထီၣ် အတၢ်ဂံၢ်စၢ်ဘါစၢ် လၢပှၤယူဒၤဖိလၢ အခိၣ်ကိၤတဖၣ် အမဲာ်ညါလီၤ.

 
ဘၣ်ဆၣ် စီၤပ့းတရူး တလီၤဃံၤဝဲဖဲအံၤဘၣ်. လၢအတၢ်ကွဲးတဖၣ်အပူၤ ပထံၣ်ဘၣ်လၢ အဝဲဒၣ်တူၢ်လိာ် စီၤပီလူး အတၢ်ဂ့ၢ်လိာ်ဘှီလိာ်အီၤ ဒီးလဲၤဝဲဒၣ်ဆူညါ လၢတအိၣ်ဒီး တၢ်ပာ်ဒ့ၣ်ပာ်ကမၣ်နီတမံၤဘၣ်န့ၣ်လီၤ. လၢအတၢ်ကွဲးဆူ ခရံာ်ဖိလၢ အအိၣ်လၢကလၤတံအပူၤတဖၣ်အပူၤ, စီၤပ့းတရူး ပာ်ဖျါထီၣ်ဝဲလၢ စီၤပီလူးမ့ၢ် “ပဒီပုၢ်ဝဲၢ်သးဘိ” ပှၤလၢအကွဲးန့ၢ်စ့ၢ်ကီးတၢ်ပရၢဆူ အဝဲသ့ၣ်အအိၣ် လၢ “တၢ်ကူၣ်သ့လၢယွၤဟ့ၣ်လီၤ အီၤ” န့ၣ်လီၤ (၂ ပ့းတရူး ၃း၁၅).

 
ဒ်စီၤပ့းတရူးအသိး ပလီၤဃံၤသ့ဝဲန့ၣ်လီၤ. ဒ်ပဒိၣ်ထီၣ်လၢ တၢ်ကဲထီၣ်အပျဲၢ်အဘီၣ်အပူၤ, ဒ်စီၤပ့းတရူး အသိး လၢတၢ်ဆီၣ်လီၤသးအပူၤ မ်ပကတူၢ်လိာ်တၢ်ဘှီက့ၤပှၤ ဒီး လဲၤဆူမဲာ်ညါလၢတၢ်ပိာ်ခရံာ်အခံန့ၣ်တက့ၢ်.