နကဘၣ်မၤဆူၣ်ထီၣ်နတၢ်ဆီဟံၣ်ဆီဃီဒ်လဲၣ်

မူသးခုဒီး နမါလၢ နအဲၣ်အီၤလၢ နတၢ်ကလီကလီ အသးသမူအမုၢ်နံၤ ခဲလၢာ် အတီၢ်ပူၤလၢ ယွၤဟ့ၣ်လီၤနၤ လၢမုၢ်အဖီလာ်, နမုၢ်နံၤကလီကလီ ခဲလၢာ်အတီၢ်ပူၤတက့ၢ်. အဂ့ၢ်ဒ်အံၤ, အဝဲန့ၣ်မ့ၢ် နဂီၢ်လၢ နမူဒံးအဖၢမုၢ်, ဒီးလၢ နတၢ်မၤအပူၤလၢ နမၤလၢ မုၢ်အဖီလာ်လီၤ. (စံၣ်တဲၤတဲလီၤတၢ် ၉း၉).

ဒ်သိးကမၤဆူၣ်ထီၣ် နတၢ်ဆီဟံၣ်ဆီဃီအဂီၢ် တၢ်လၢနကဘၣ်သ့ၣ်ညါအိၣ်သၢမံၤ -

 
(၁) တၢ်ဆီဟံၣ်ဆီဃီ မ့ၢ် မုၣ်ကီၤလံၢ် အတၢ်ခးပနီၣ်လၢ အဘၣ်သးဝဲအဒိၣ်ကတၢၢ်တခါ လီၤ. ခီဖျိလၢ ကစၢ်ယွၤ အဲၣ်ဘၣ် စီၤယိၤဘးဒီး အဟံၣ်ဖိဃီဖိအဃိ မုၣ်ကီၤလံၢ် အသးဒိၣ်ဝဲလီၤ. အဃိ, ဖဲနဟံၣ်ဖိဃီဖိ အိၣ်ဒီး တၢ်အဲၣ် တၢ်ကွံ ဒီး ဘၣ်တၢ် ဆိၣ်ဂ့ၤဆိၣ်ဝါအီၤန့ၣ်, အဝဲဒၣ် ကဂုာ်ကျဲးစၢး ထီဒါအီၤလီၤ. အဝဲ အဲၣ်ဒိးကဲထီၣ် ပှၤသၢဂၤ တဂၤလၢ နတၢ်ဘၣ်ထွဲ အပူၤ, လၢကမၤသူၣ်ပိၢ်သးဝးနၤ ဒီး ကမၤသူၣ်ဟးဂီၤသးဟးဂီၤနၤ, ခီဖျိ ကသူဝဲ နတၢ် ဂံၢ်စၢ်ဘါစၢ် တဖၣ်လီၤ. အဝဲဒၣ် အဲၣ်ဒိးလၢ နကအိၣ်ဒီး တၢ်မုၢ်လၢ်လၢ အကဲထီၣ်အသး တသ့ဘၣ်, ဒီးဆှၢက့ၤ နတၢ်သးစဲ လၢ တၢ်ဖံးတၢ် မၤလၢဟံၣ်ပူၤဆူ တၢ်ကွၢ်တၢ်လၢ နီၢ်ကစၢ်ဒၣ်ဝဲအဂီၢ်လီၤ. အဝဲဒၣ်မၤအါထီၣ် နတၢ် ဆိကမိၣ်ဆိကမး ခီဖျိ တၢ်ရ့လိာ် လၢအတဂ့ၤတဘၣ်တဖၣ်, တုၤဒၣ်လဲာ် ကစၢ်ယွၤ တမ့ၢ်လၢၤ တၢ်တိာ်ပာ်လၢ နတၢ်ဆီဟံၣ်ဆီဃီ အတၢ် မုာ်တၢ်ခုၣ်အဂီၢ်လၢၤဘၣ်. ပလီၣ်နသးလၢ မုၣ်ကီၤလံၢ် အတၢ်ဖံးတၢ်မၤဒီး ကဲထီၣ် ပှၤဒီသဒၢ နဟံၣ်ဖိဃီဖိ တက့ၢ်.

 
(၂). နခိၣ်နူာ်အတၢ်ဆိကမိၣ် ဆၢတဲာ် နတၢ်ပာ်သူၣ်ပာ်သးလီၤ. တၢ်ဆိကမိၣ်န့ၣ် အိၣ်ဝဲဒၣ်ထီဘိလီၤ. ဖဲပှၤတဂၤဂ့ၤ တဂၤဂ့ၤ ဟဲနုာ်လီၤလၢ နဟံၣ်ပူၤန့ၣ်, နကပလၢၣ်ဘၣ် တၢ်ဘၣ်ဂံာ်ဂူာ် မ့တမ့ၢ် တၢ်သူၣ်မုာ်သးမုာ်, တၢ်သူၣ်က့ၣ် သးကါ မ့တမ့ၢ် တၢ်သူၣ်ခုသးခု န့ၣ်လီၤ. ပတၢ်ပာ်သူၣ်ပာ်သးန့ၣ် ဘၣ်ကူဘၣ်ဂာ်တၢ်သ့ဂ့ၤမး, ဒ်တၢ်ထိၣ်တၢ်ကိၢ် အသိး, ထိၣ်ကွၢ်တၢ်ကိၢ်တၢ်ခုၣ်လၢ နဟံၣ်ပူၤလီၤ. အဒိ, ပိာ်ခွါ တဂၤ ကကွၢ်တၢ်ဂီၤမူလၢ အပၣ်ဃုာ်ဒီး ပိာ်မုၣ် က့ၢ်ဂီၤ အတၢ်အိၣ်ဖျါတဖၣ် လၢအမၤကတၢထီၣ်အသး, ဒီးဖဲန့ၣ် ကထိၣ်သတြီၤ အမါအက့ၢ်အဂီၤဒီး ပိာ်မုၣ် တဂၤ န့ၣ်အက့ၢ်အဂီၤလီၤ. ပိာ်မုၣ်စ့ၢ်ကီး ကကွၢ် တၢ်ဘိးဘၣ်ရၤလီၤ ဘၣ်ဃး တၢ်မၤဂ့ၤမဲာ်သၣ် လၢ တၢ်ဂီၤမူ အပူၤ, ဝံၤအလီၢ်ခံ ကသးက့ၣ်ဘၣ် အဝၤလၢ တပှ့ၤန့ၢ်အီၤ တၢ်အဝဲန့ၣ်ဘၣ်အဃိလီၤ. တၢ်ပာ်သူၣ်ပာ်သး ကိးမံၤဒဲး အိၣ်ဒီး အခီၣ်ထံးခီၣ်ဘိဒၣ်ဝဲ, အဃိ ပလီၣ်သး လၢ တၢ်ဆီတလဲ လၢနခိၣ်နဃၢၤ ဒီး နကံၢ်နလဲအပူၤန့ၣ်တက့ၢ်.

 
(၃). တၢ်နၢ်ပၢၢ်န့ၣ်ဟဲအသးခီဖျိ ဒိကနၣ်တၢ်လီၤ. တၢ်အဲၣ်တၢ်ကွံန့ၣ် မ့ၢ်တၢ်လၢအဘၣ်ဃးဒီး ဒိကနၣ်တၢ်အါ ဒီး ကတိၤတၢ်စှၤလီၤ. ဒိကနၣ်တၢ်တုၤလၢ တၢ်ပာ်သူၣ်ပာ်သးလၢအအိၣ်ခူသူၣ်တဖၣ် ဘၣ်တၢ်ပာ်ဖျါထီၣ်အီၤ တက့ၢ်. ဒိကနၣ်လီၤတံၢ်လီၤဆဲး တုၤလၢနနၢ်ပၢၢ်အီၤဂ့ၤဂ့ၤတက့ၢ်. ဒိကနၣ်တၢ်ဂ့ၤဂ့ၤ တုၤလၢ နသ့ၣ်ညါ နမါ/နဝၤ အတၢ် လိၣ်ဘၣ်အမ့ၢ်အတီတက့ၢ်. တၢ်သံကွၢ်လၢနသံကွၢ် ဒုးနဲၣ်ဖျါထီၣ် နကဟုကယာ်အီၤထဲလဲၣ် သ့ဝဲ, အဃိ သံကွၢ် အီၤကဖီလီ ဒီး တဘျီဝံၤတဘျီ, ဒီး ဘါထုကဖၣ် တချုး နစံးဆၢအီၤ, မၤလၢပှဲၤအီၤ န့ၣ်တက့ၢ်. တၢ်န့ၣ် မ့ၢ်တၢ်မၤ ဆူၣ်ထီၣ်က့ၤ နတၢ်ဆီဟံၣ်ဆီဃီဒ်လဲၣ် န့ၣ်လီၤ.

 
(ဟံးန့ၢ်ကွဲးကျိာ်ထံ “The Word for Today” Jun 2, 2021.)