ဆိးသီတက့ၢ်, အိၣ်စံာ်အိၣ်ကျၢၤလၢ တၢ်နာ်အပူၤတက့ၢ်. မၤသုသးဒ်ပိာ်ခွါ အသိးန့ၣ်တက့ၢ်. အိၣ်ဆူၣ်တက့ၢ်. (၁ ကရံၣ်သူး ၁၆း၁၃).ယ့ၣ်ရှူးစံးဝဲဒၣ်, “တုၤပှၤဒုၣ်ဒွဲၣ်သု, ဒီး မၤအၢမၤနးသု, ဒီး စံးအၢသု ကဘျံးကဘျၣ်လၢ ကယဲၢ်တၢ်အၢတၢ်သီ လၢ ယဃိဒီး, သုဘၣ်ဆိၣ်ဂ့ၤဆိၣ်ဝါ လီၤ. သူၣ်ခုသးခု, ဒီးသူၣ်ဖှံသးညီ တက့ၢ်. အဂ့ၢ်ဒ်အံၤ, သုဘျုးအိၣ်ဝဲလၢ မူခိၣ်န့ၣ် ဒိၣ်ဝဲလီၤ. အဂ့ၢ်ဒ်အံၤ, ပှၤမၤအၢမၤနးဝံလၢ အအိၣ်ထီၣ်လၢ သုမဲာ်ညါတဖၣ် ဒ်န့ၣ်အသိးလီၤ” (မးသဲ ၅း၁၁-၁၂). နမ့မ့ၢ်ပှၤလၢ အသးဆံးသ့န့ၣ် နကအိၣ်ဒီး တၢ်ဆၢကတီၢ်ကီခဲလၢ နတၢ်အိၣ်မူအပူၤ, မ့ၢ်လၢ နကဲထီၣ် မုၣ်ကီၤလံၢ် အတၢ်ခးပနီၣ်သ့ ညီကဒၣ်အဃိလီၤ. စီၤပီလူးဘၣ်လဲၤခီဖျိ အသကိးအတၢ်ဟးသဒၣ်အီၤ, ပှၤကရံၣ်သူးဖိတဖၣ် အတၢ်ကွဲးထီဒါအီၤ, အတၢ်သးဟးဂီၤလၢ ပှၤကလၤတံဖိတဖၣ်အဖီခိၣ်, ဘၣ်တၢ်မၤတရီတပါအီၤလၢ ဖံလံးပံၤ, ဘၣ်တၢ်ဒုၣ်ဒွဲၣ်ပယွဲအီၤလၢ ဝ့ၢ်အၤသ့ၣ်, ဒီးလီၢ်ခံကတၢၢ် ဘၣ်တၢ်ဖၢနုာ်အီၤလၢဃိၣ်ပူၤ ဒီး ဘၣ်တၢ်ဒီၣ်ကွံာ်အခိၣ် လၢ ဝ့ၢ်ရိမ့ၤအပူၤလီၤ.
လံာ်စီဆှံဟ့ၣ်ပှၤ တၢ်သိၣ်တၢ်သီမိၢ်ပှၢ်လွံၢ်ထံၣ်လၢ တၢ်အိၣ်မူလၢအပှဲၤဒီး တၢ်မၤနၢၤအဂီၢ်လီၤ.
၁. အိၣ်ပလီၢ်သးထီဘိ. ဘၣ်မနုၤအဃိလဲၣ်. မ့ၢ်လၢ နအိၣ်ဒီး ပှၤထီဒါနၤ လၢအိၣ်ကတီၤအသးထီဘိ လၢကမၤ န့ၢ်နၤ အဂီၢ်အဃိလီၤ (၁ ပ့းတရူး ၅း၈). အဝဲလိၣ်ဘၣ်တၢ်မနုၤလၢနအိၣ်လဲၣ်. အဝဲသ့ၣ်ညါလၢ သးလၢကစၢ်ယွၤ ဟ့ၣ်လီၤနၤန့ၣ် အိၣ်ဝဲလၢနပူၤအဃိလီၤ. နမ့ၢ် တၢ်ချံလၢ အဒုးမဲထီၣ် တၢ်ဆိၣ်ဂ့ၤဆိၣ်ဝါတဖၣ် သ့ဝဲလီၤ.
၂. ဆၢထၢၣ်ဂၢၢ်ကျၢၤလၢ တၢ်စူၢ်တၢ်နာ်အပူၤ. ဘၣ်မနုၤအဃိလဲၣ်. မ့ၢ်လၢနဆၢထၢၣ်လၢ နသးအတၢ်တူၢ်ဘၣ် အလိၤ, နတၢ်အိၣ်သးအလိၤ, ဒီး ပှၤဂၤအတၢ်ဟ့ၣ်ကူၣ်အလိၤ တသ့ဘၣ်အဃိလီၤ. တၢ်တဖၣ်န့ၣ် ဆီတလဲအသး သ့တပယူာ်ဃီလီၤ. အဃိ, နကဘၣ်ဆၢထၢၣ်ဂၢၢ်ကျၢၤလၢ ကစၢ်ယွၤအကလုၢ်ကထါအလိၤလီၤ.
၃. မၤတၢ်ဒ်ပှၤဒိၣ်တူာ်ခိၣ်ပှဲၤအသိး. ဘၣ်မနုၤအဃိလဲၣ်. ဖဲတၢ်ဒုးတၢ်ယၤအိၣ်ဆူၣ်ဆူၣ်ကလဲာ်အခါ တၢ်ဆၢတဲာ်တၢ် ဒ်ဖိသၣ်အသိးန့ၣ် တမၤတၢ်မၤဘၣ်. အခဲအံၤ မ့ၢ်တၢ်ဆၢကတီၢ်အဂ့ၤလၢ ပကဒိၣ်ထီၣ်အဂီၢ်လီၤ. နမ့မၤကမၣ်တၢ် တမံၤဃီ လၢ ခံဆံယဲၢ်နံၣ်အလီၢ်ခံန့ၣ် တမ့ၢ်နမၤလိန့ၢ်တၢ်မူာ်မူာ်နီၣ်နီၣ်လံဘၣ်.
၄. အိၣ်ဒီးတၢ်ဂံၢ်ဆူၣ်ဘါဆူၣ်. ဘၣ်မနုၤအဃိလဲၣ်. မ့ၢ်လၢ တၢ်ဂံၢ်စၢ်ဘါစၢ်န့ၣ် မ့ၢ်တၢ်ကွဲမုာ် ဒုၣ်ဒါအဃိလီၤ. တၢ်ဂံၢ်စၢ်ဘါစၢ် ဒုးအိၣ်ထီၣ် တၢ်ဟ့ၣ်လီၤသး ထီဘိလီၤ. ဘၣ်ဆၣ်, လၢနဂီၢ် တၢ်ဟ့ၣ်လီၤသး တမ့ၢ်ကျဲလၢ နကဘၣ်မၤအီၤဘၣ်. ကစၢ်ယွၤတဲဘၣ် အပှၤဂီၢ်မုၢ်လၢ ကီၢ်တၢ်စံးပာ်မ့ၢ်အဝဲသ့ၣ်အဂီၢ်, ဘၣ်ဆၣ် အဝဲသ့ၣ် ကဘၣ် ဒုးန့ၢ်အီၤလီၤ. နၤစ့ၢ်ကီး နကဘၣ်ဒုးအီၤလီၤ.
(ဟံးန့ၢ်ကွဲးကျိးထံ The Word for Today, 13 March 2024)
0 Comments