ကလံၤအူဆီၣ်ကဒါက့ၤတၢ် (၃)

လီဝၢ်ဒံးဒီးသူၣ်, မူခိၣ်ဖီဒီးတၢ်အၢၣ်တဖၣ်, ကလံၤမုၢ်ဆူၣ်လၢအမၤလၢပှဲၤအတၢ်မၤလိာ်ဧၢ, - (စံးထီၣ်ပတြၢၤ-၁၄၈း၈ ခ့ခါကျိာ်).

ဖဲစီၤမိၤရှ့ထုးထီၣ်ပှၤအံၣ်စရ့လးဖိလၢ ကီၢ်အဲၤကူပတူးပူၤအခါ ကလံၤအူဆီၣ်ကဒါက့ၤတၢ်န့ၣ်လီၤ. ဖဲအဝဲ သ့ၣ်လဲၤတၢ်ဆူကီၢ်တၢ်စံးပာ်အခါ အဝဲသ့ၣ်ဘၣ်လဲၤဆူအဂၤတကပၤလီၤ. ဒီးဖဲအဝဲသ့ၣ်တုၤလီၤဖဲ ကီၢ် တၢ်စံးပာ်အခါ, အဝဲသ့ၣ်ဘၣ်တၢ်ထီဒါအီၤလီၤ.

 
ပီၣ်လဲၣ်အတၢ်လဲၤကျဲန့ၣ် ကလံၤမုၢ်တအူတၢ်ဘၣ်န့ၣ်တအိၣ်နီတဘျီဘၣ်. “ပကနုာ်လီၤဆူ ကစၢ်ယွၤ အဘီအမုၢ်အပူၤအဂီၢ်န့ၣ်, ပကဘၣ်လဲၤခီဖျိတၢ်ကီတၢ်ခဲ အါမးလီၤ” (မၤတၢ် ၁၄း၂၂ ခ့ခါကျိာ်). တနံၤဘၣ်တနံၤ အတီၢ်ပူၤ ဖဲန်ဒုးတၢ်လၢ နကထီၣ်ဖီအဂီၢ်န့ၣ်, နဒိးန့ၢ်တၢ်သူၣ်ဟးဂီၤသးဟးဂီၤညီကဒၣ်လီၤ. စီၤပီလူး စံးဝဲ, “ဒီးအါနံၤအါသီအတီၢ်ပူၤန့ၣ်, မုၢ်မ့ၢ်ဂ့ၤ, ဆၣ်ဧိၤဖီဧိၤမ့ၢ်ဂ့ၤ, တအိၣ်ဖျါထီၣ်ဘၣ်, ဒီးကလံၤမုၢ်တဆံးတစှၤဘၣ်န့ၣ် ဘၣ်ပှၤဒီး, ပကတုၤလၢ တၢ်အုၣ်က့ၤခီၣ်က့ၤန့ၣ်, တၢ်မုၢ်လၢ်တအိၣ်လၢၤဘၣ်လ့ၤတက့ၤဘၣ်လီၤ” (မၤတၢ် ၂၇း၂၀).

 
ဘၣ်တဘၣ် နကအိၣ်ဒီးတၢ်သးလီၤဘှါ ဒီး တၢ်သူၣ်ဟးဂီၤသးဟးဂီၤ ခီဖျိ တၢ်လၢနကဘၣ်ဒုးအီၤတဖၣ်အဃိန့ၣ်လီၤ. ဒ်ပှၤဟီၣ်ခိၣ်ဖိတဂၤအသိး, နအဲၣ်ဒိးဟ့ၣ်အဃၣ်လံ. နမ့ၢ်ဟ့ၣ်အဃၣ်သနာ်က့ မတဂၤမး တပာ်ဒ့ၣ်ပာ်ကမၣ်နၤဘၣ်. ဘၣ်ဆၣ် တချုးနဟ့ၣ်အဃၣ်ဒံးဘၣ်အခါ, သံကွၢ်လီၤနသးဒ်အံၤ, “ကစၢ်ယွၤမ့ပၢဆှၢ ကလံၤမုၢ်အံၤ ဒီးဆှၢနၤဆူ တၢ်လီၢ်လၢနအဲၣ်ဒိး လဲၤအလီၢ်န့ၣ် တၢ်ကကဲထီၣ်အသးဒ်လဲၣ်.” “ကစၢ်ယွၤမ့မ့ၢ်ပှၤတဂၤလၢ အကတိၤတၢ် ဒီးကလံၤမုၢ်တွၤအိၣ်ထီၣ် တဂၤန့ၣ်မီၣ် (စံး ၁၀၇း၂၅), မ့ၢ်နကကွၢ်တၢ်လိၤလိၤဆူအအိၣ်ဧါ.” ကစၢ်ယွၤမ့မ့ၢ်ပှၤတဂၤလၢ အမၢလီၤကလံၤမုၢ်ဖးဒိၣ်ဆူပီၣ်လဲၣ်ပူၤတဂၤန့ၣ်မီၣ် (ယိၤနါ ၁း၄), နမ့ၢ်တထံၣ် ကၢၢ်ခိၣ်ဘၣ်ဆၣ် နကအိၣ်ဒီးတၢ်စူၢ်တၢ်နာ်လၢ အပူၤစ့ၢ်ကီးဧါ.” ပှၤကွဲးထါစံးထီၣ်ပတြၢၤ ကွဲးဝဲ, “လီဝၢ်ဒံးဒီးသူၣ်, မူခိၣ်ဖီဒီးတၢ်အၢၣ်တဖၣ်, ကလံၤမုၢ်ဆူၣ်လၢအမၤလၢပှဲၤအတၢ်မၤလိာ်ဧၢ,” - (စံးထီၣ်ပတြၢၤ-၁၄၈း၈ ခ့ခါကျိာ်).

 
ဖဲ ၂ မိၤရှ့ အဆၢဒိၣ် ၁၀အပူၤ, “ဒီးစီၤမိၤရှ့ယူာ်ထီၣ်အနီၣ်ထိးဘိလၢ ကီၢ်အဲၤကူပတူးအဖီခိၣ်, ဒီးယွၤဒုးဟဲ ကလံၤ လၢမုၢ်ထီၣ်တခီ လၢကီၢ်န့ၣ်အဖီခိၣ်သ့တနံၤကျၢၤ, ဒီးသီတနၤကျၢၤလီၤ. မုၢ်ဆ့ၣ်ထီၣ်န့ၣ် ကလံၤလၢမုၢ်ထီၣ်တခီ ဟဲဒီး ဒွဲၣ်ဧိၤသကံၤဧိၤလီၤ. - ဒီးယွၤဃၣ်ကဒါက့ၤ ကလံၤမုၢ်ဆူၣ်ဟဲလၢမုၢ်နုာ်တခီ, ဒီးစိာ်ထီၣ်ကွံာ် ဒွဲၣ်ဧိၤသကံၤဧိၤ, ဒီးကွံာ်တ့ၢ်ကွံာ်အီၤလၢ ပီၣ်လဲၣ်ဂီၤအပူၤလီၤ.” (၂ မိၤရှ့ ၁၀း၁၃, ၁၉).

 
ပှၤကွဲးလံာ်ဖိတဂၤကွဲးဝဲ, “ဖဲကစၢ်ယွၤဒုးတၢ်လၢ ပှၤအံၣ်စရ့လးဖိအဂီၢ်အခါ, ကလံၤမုၢ်လၢအဆူၣ်န့ၣ် ဟဲစိာ်န့ၢ် အဝဲသ့ၣ် လၢတၢ်ထူၣ်ဖျဲးလီၤ. ဒီးမုၢ်ကအိၣ်ဝဲတနံၤန့ၣ်, ခီဖျိကစၢ်ယွၤအဘျုးအဖှိၣ်အဃိ, ပဝဲသ့ၣ်တဖၣ်စ့ၢ်ကီး ပကဆၢထၢၣ်လၢ မဲာ်ထံကလၤအပီၣ်လဲၣ်ဖီခိၣ် ဒီးပကကွၢ် ကလံၤမုၢ်ဆူၣ်ဟဲစိာ်န့ၢ်ပှၤလၢ တၢ်ထူၣ်ဖျဲးန့ၣ် ဒ်လဲၣ် န့ၣ်လီၤ.