တၢ်ကဲထီၣ်သိဖိ (၂)

ယွၤမ့ၢ်ယပှၤကွၢ်သိ, တၢ်တမိၣ်န့ၢ်ဘၣ်ယသးလၢ တၢ်နီတမံၤဘၣ်. (ထါစံးထီၣ်ပတြၢၤ - ၂၃း၁).

ဘၣ်ဃးဒီးပှၤကွၢ်သိအဂ့ၢ်န့ၣ် ပကဘၣ်သ့ၣ်ညါတၢ်ခံမံၤ,-

(၁). ပပှၤကွၢ်သိအတၢ်သကဲာ်ပဝး. ကစၢ်ယ့ၣ်ရှူးခရံာ် ပာ်လီၤဆီဝဲ ပှၤကွၢ်သိလၢအဂ့ၤ ဒီး ပှၤကွၢ်သိ လၢအအၢတဖၣ်န့ၣ်လီၤ. (ကွၢ် ယိၤဟၣ် - ၁၀း၁၁-၁၆). ပှၤကွၢ်သိလၢအအၢတဖၣ်န့ၣ် ကွၢ်တၢ်လၢ အကစၢ်ဒၣ်ဝဲ အတၢ်ဘၣ်ဘျုးဘၣ်ဖှိၣ်အဂီၢ်, ဘၣ်ဆၣ် တကွၢ်တၢ်လၢ သိတဖၣ်အတၢ်လိၣ်အဂီၢ်ဘၣ်. ပဒိးသန့ၤပသးဒီး အဝဲသ့ၣ်တသ့ဘၣ်. ဖဲတၢ်ကီတၢ်ခဲဟဲတုၤ အခါ, အဝဲသ့ၣ် ပာ်တ့ၢ်ကွံာ်အသိ တဖၣ်လီၤ. ဘၣ်ဆၣ် ကစၢ်ယ့ၣ်ရှူးခရံာ် စံးဝဲ, “ယမ့ၢ်ပှၤကွၢ်သိလၢအဂ့ၤတဂၤလီၤ.” (ယိၤဟၣ် - ၁၀း၁၁). တၢ်မနုၤလၢအဒုးကဲထီၣ်အီၤလၢ ပှၤကွၢ်သိလၢအဂ့ၤလဲၣ်. “ပှၤကွၢ်သိလၢအဂ့ၤတဂၤန့ၣ် ပာ်လီၤ ကွံာ်အသးသမူလၢသိအဂီၢ်လီၤ.” (ယိၤဟၣ် - ၁၀း၁၁). သိတဖၣ်အတၢ်လိၣ်ဘၣ် ဒီး အတၢ်ပူၤဖျဲးအလီၢ် န့ၣ်မ့ၢ်ဝဲဒၣ်နီၣ်ဂံၢ်တၢ လၢအဂီၢ်, ဒီး တၢ်လိၣ်မ့ၢ်အိၣ်သပှၢ်ကတၢၢ်န့ၣ် အဝဲဒၣ်ကသံလၢ အသိတဖၣ်အဂီၢ် လီၤ. “ယဲဒၣ်အံၤ, ယမ့ၢ်ပှၤကွၢ်သိလၢ အဂ့ၤတဂၤလီၤ. ဒီးယသ့ၣ်ညါယတၢ်, ဒီးယတၢ်သ့ၣ်ညါယၤ,-“ (ယိၤဟၣ် - ၁၀း၁၄). ကစၢ်ယ့ၣ်ရှူးခရံာ်သ့ၣ်ညါ အသိတဂၤစုာ်စုာ်လီၤတံၢ် လီၤဆဲး ဒီးလိၣ်ဘၣ် တၢ်ရ့လိာ်သး ဘူးဘူးတံၢ်တံၢ် ဒီးအဝဲသ့ၣ်တဖၣ်လီၤ. အဝဲဒၣ်ကိး အသိဖိတဂၤ စုာ်စုာ် လၢ အကစၢ်ဒၣ်ဝဲအမံၤ, ဒီးအဝဲသ့ၣ် နာ်န့ၢ်အီၤ ဒီးပိာ်အခံဖဲအဝဲဒၣ်ကလဲၤတပူၤလၢ်လၢ်လီၤ. (ကွၢ် ယိၤဟၣ် - ၁၀း၃). နဒိး သန့ၤနသးလၢ နပှၤကွၢ်သိသ့ဝဲဒၣ်, မ့ၢ်လၢအဝဲဒၣ် ကဒီသဒၢနၤ ဒီးကပၢဆှၢနၤ လီၤ.

 
(၂) သိတဖၣ်အတၢ်အိၣ်သးန့ၣ် မ့ၢ်ပှၤကွၢ်သိတဂၤန့ၣ်အမုၢ်ကျိၤဝဲၤကွာ်လီၤ. အသိဖိတဖၣ် အတၢ်လိၣ် ဘၣ် မ့ၢ်တဘၣ်တၢ်မၤလၢမၤပှဲၤအီၤဘၣ်န့ၣ် ပှၤကွၢ်သိတဂၤန့ၣ် ကဲထီၣ်ပှၤကွၢ်သိလၢအဂ့ၤတသ့ဘၣ်. သိတဖၣ်တသ့ၣ်ညါကျဲလၢ ကလဲၤဆူ တၢ်အီၣ်ဆၣ်လီၢ်, ထံဂၢၢ်အနံၤ, ဒီးအကစၢ်ဒၣ်ဝဲအတၢ်ပူၤဖျဲး အလီၢ်ဘၣ်. ဘၣ်ဆၣ် ပှၤကွၢ်သိတဂၤန့ၣ် သ့ၣ်ညါဝဲလီၤ. အသိတဖၣ်နာ်န့ၢ်အီၤ, ဒိးသန့ၤအသးလၢ အီၤ, ဒီးပိာ်အခံလီၤ. ဘၣ်ဆၣ်, တၢ်နာ်န့ၢ်အီၤ ဒီး တၢ်ဒိးသန့ၤအသးလၢအတၢ်ကဟုကယာ်န့ၣ် တဟဲဒၣ်အတၢ် ဘၣ်, မ့ၢ် နကစၢ်ဒၣ်ဝဲ နတၢ်ဆၢတဲာ်လၢနကဘၣ်မၤအီၤ, ဒီးမၤအီၤဒ်နသးဒၣ်နဲအသိးလီၤ. နတၢ်တူၢ် ဘၣ်ဒီး နတၢ်အိၣ်သးမ့ၢ်အိၣ်ဒ်လဲၣ်ဒ်လဲၣ်ဘၣ်ဆၣ်, နဘၣ်ဆၢတဲာ်လၢနကစၢ်ဒၣ်နဲ လၢနကနာ်န့ၢ် နပှၤကွၢ် သိ လၢကမၤစၢၤနၤ ဒီး ကကဟုကယာ်နၤ လီၤ. ဖဲနပာ်လီၤ နတၢ်ဘၣ်ကိၢ်ဘၣ်ဂီၤ ဒီး နတၢ်ဘၣ်ယိၣ် ဘၣ်ဘီတဖၣ် လၢအလိၤ ဒီး အိၣ်ဘှံးလၢ အတၢ်ဂ့ၤတၢ်ဝါအပူၤန့ၣ်, အဝဲဒၣ် ကမၤလၢပှဲၤ အတၢ်အၢၣ် လီၤအီလီၤလီၤ. အဝဲဒၣ်ကကွၢ်ထွဲနၤထီဘိလီၤ.