တၢ်နာ်လၢအခါထီၣ်အခီၣ်ဆူညါ

ဒီးဟံးန့ၢ်ကိၣ်ယဲၢ်ဖျၢၣ် ဒီး ညၣ်ခံဘ့ၣ်န့ၣ်, ဒီးကွၢ်ထီၣ်တၢ်ဆူမူခိၣ်, ဒီးဆိၣ်ဂ့ၤတၢ်, ဒီးစိၢ်ဘျဲးဝဲ, ဒီး ဟ့ၣ်လီၤကိၣ်န့ၣ်လၢ အပျဲၢ်အဘီၣ်, ဒီးအပျဲၢ်အဘီၣ် ဟ့ၣ်လီၤလၢ ပှၤဂီၢ်မုၢ်လီၤ. (မးသဲ - ၁၄း၁၉).

လၢ “တၢ်နာ်လၢအခါထီၣ်အခီၣ်ဆူညါ” အံၤအပူၤ တၢ်လီၤလးလၢကစၢ်ခရံာ်မၤအီၤ လၢအမ့ၢ် ကိၣ်ဒီး ညၣ်တဖၣ်အံၤ ဒုးသ့ၣ်နီၣ်ထီၣ်က့ၤပှၤလၢ ကစၢ်ခရံာ် မၤအါထီၣ် တၢ်လၢပထၢနုာ်အီၤလၢ အစုပူၤ ဖဲ ပဒိကနၣ် ဒီး မၤအတၢ်မၤလၢ တၢ်နာ်အပူၤန့ၣ်လီၤ.

 
ပှၤပိာ်မုၣ် ပိာ်ခွါလၢ အကထိတဖၣ် အိၣ်ဝးတရံးဝဲဒၣ် ကစၢ်ခရံာ်န့ၣ်လီၤ. တၢ်ဆၢကတီၢ်ဒ်စဲၤခံထီၣ်, ဒီး ကစၢ်ခရံာ်အပျဲၢ်အဘီၣ်တဖၣ် သ့ၣ်ညါဝဲလၢ ပှၤဂီၢ်မုၢ်တဖၣ် သၣ်ဝံၤဝဲလံအဃိ, အဝဲသ့ၣ် တဲကစၢ်ခရံာ် လၢ ကပျဲက့ၤက့ၤ ပှၤဂီၢ်မုၢ်သ့ၣ်တဖၣ်န့ၣ်လီၤ. ဘၣ်ဆၣ် အဝဲဟ့ၣ်ထီၣ် တၢ်အစၢလၢ အဂၤတခါ, တဲဘၣ် အပျဲၢ်အဘီၣ်လၢ “ဟ့ၣ်လီၤအဝဲသ့ၣ်တၢ်တမံၤမံၤလၢ ကအီၣ်ဝဲအဂီၢ်တက့ၢ်.” (အဆၢဖိ ၁၆).

 
အဝဲသ့ၣ်ကွၢ်ဃုတၢ် ဒီးထံၣ်ဒၣ်ထဲ ကိၣ်ယဲၢ်ဖျၢၣ် ဒီးညၣ်ဖိခံဘ့ၣ်ဧိၤန့ၣ်လီၤ. တၢ်အံၤတလၢလၢ ပှၤကိး ဂၤဒဲးအဂီၢ်ဘၣ်. ဘၣ်ဆၣ်, မၢပှၤဂီၢ်မုၢ်တဖၣ် ဆ့ၣ်နီၤဝဲဝံၤ, ကစၢ်ခရံာ်ဆိၣ်ဂ့ၤ တၢ်အီၣ်အံၤ ဒီးဟ့ၣ်လီၤ ဝဲဆူ အပျဲၢ်အဘီၣ်တဖၣ်အအိၣ်လီၤ. ဒီးအပျဲၢ်အဘီၣ်တဖၣ် ကဘၣ်ခါထီၣ်အခီၣ်လၢ တၢ်နာ်အပူၤ, ဒီး နီၤလီၤတၢ်အီၣ်ဆူပှၤဂီၢ်မုၢ် အအိၣ်န့ၣ်လီၤ. ဒ်အဝဲသ့ၣ်ဒိကနၣ်ဝဲအသိး, တၢ်လီၤလးမၤအသး, ဒီး ပှၤကိး ဂၤဒဲးလၢအီၣ်လၢအီဝဲ ခဲလၢာ်လီၤ.

 
ဒ်အပျဲၢ်အဘီၣ်တဖၣ်အံၤအသိး, ပဝဲတဂၤစုာ်စုာ် တၢ်ဟ့ၣ်ပှၤတၢ်ပီးတၢ်လီလၢ ပကသူအီၤအဂီၢ် န့ၣ်လီၤ. တဘျီတခီၣ်, လၢဟီၣ်ခိၣ်အမဲာ်အတၢ်ထံၣ်အပူၤန့ၣ် တမ့ၢ်တၢ်နီတမံၤဘၣ်သ့ၣ်သ့ၣ်လီၤ. ဘၣ်ဆၣ် ကစၢ်ခရံာ် ဃုကွၢ် ပှၤလၢအလီၤဂာ်ဒီး ဖိသၣ်ပိာ်ခွါအံၤ ဒီးအပျဲၢ်အဘီၣ်တဖၣ်, လၢအသးအိၣ်ဟ့ၣ်လီၤ အီၤလၢတၢ်ကိးမံၤဒဲး, ဒီးနာ်အီၤ, ဒီးကဲထီၣ်အကုၢ်အပှၤ, ဒီးသူတၢ်စိတၢ်ကမီၤလၢ ကစၢ်ခရံာ်ဟ့ၣ်လီၤဝဲ တဖၣ်န့ၣ်လီၤ. ကစၢ်ခရံာ်ကွၢ်ဃုစ့ၢ်ကီး ပှၤလၢအခါထီၣ်အခီၣ်လၢတၢ်စူၢ်တၢ်နာ်အပူၤ, ဒီးအိၣ်ဒီးတၢ်နာ် လၢ ကစၢ်ခရံာ် ကမၤလၢပှဲၤ အတၢ်ကတိၤတဖၣ်န့ၣ်လီၤ.

 
တနံၤအံၤ, နအိၣ်ဒီးတၢ်ခွဲးတၢ်ယာ်လၢ ကဆိၣ်ဂ့ၤပှၤဂၤလၢ တၢ်လၢအအိၣ်လၢနစုပူၤန့ၣ်လီၤ. ခါထီၣ် နခီၣ်လၢ တၢ်စူၢ်တၢ်နာ်အပူၤတက့ၢ်. ပျဲကစၢ်ယွၤမၤအါထီၣ် တၢ်လၢနအးလီၤဆူ အဝဲဒၣ်အစုပူၤ န့ၣ်တက့ၢ်. နီၤလီၤ ကစၢ်ယွၤအတၢ်အဲၣ်ဒီး အစိအကမီၤတက့ၢ်. သ့ၣ်နီၣ်ထီၣ်လၢ ကစၢ်ယွၤဆိၣ်ဂ့ၤနၤ အဃိ နကဲထီၣ်တၢ်ဆိၣ်ဂ့ၤလၢ ပှၤဂၤအဂီၢ်သ့ဝဲန့ၣ်တက့ၢ်. တဘၣ် ဃၣ်ကွံာ်နသး, မ့တမ့ၢ် တဘၣ်အိၣ်ဒီး တၢ်သးဒ့ဒီ လၢ ကတြီကွံာ် ကစၢ်ယွၤအတၢ်ဆိၣ်ဂ့ၤ အထံမူကျိ န့ၣ်တဂ့ၤ. ဟံးန့ၢ် တၢ်လၢကစၢ်ခရံာ်ဟ့ၣ်လီၤနၤ ဒီးလဲၤဆူညါတက့ၢ်.

 
တၢ်သံကွၢ် - တၢ်လၢကစၢ်ခရံာ်ဟ့ၣ်လီၤလၢနစုပူၤ လၢနကဟ့ၣ်နီၤလီၤအီၤလၢတနံၤအံၤန့ၣ် မ့ၢ်တၢ်မနုၤလဲၣ်.