ဖိသၣ်မ့ၢ်တၢ်သူၣ်ခုသးခုအခီၣ်ထံးခီၣ်ဘိ (ဖိသၣ်မုၢ်နံၤ)

ကွၢ်ကွၢ်, ပဖိပလံၤန့ၣ်မ့ၢ် တၢ်န့ၢ်သါလၢယွၤလီၤ. ဒီးပှၤဒၢလီၢ်အတၤသၣ်န့ၣ် မ့ၢ်တၢ်အဘူးအလဲလီၤ. (စံးထီၣ်ပတြၢၤ - ၁၂၇း၃).

ကစၢ်ယွၤမ့ၢ်ဆိၣ်ဂ့ၤနၤ ခီဖျိဟ့ၣ်နၤလၢ နဖိတဖၣ်န့ၣ်, မ့ၢ်နထံၣ်အဝဲသ့ၣ်ဒ် ကစၢ်ယွၤထံၣ်ဝဲ အသိးဧါ. ဖဲနအိၣ်ဒီးတၢ်ဂုာ်ကျဲးစၢး ဒီးတၢ်တၤတၢ်တဖၣ် ဖဲနဒုးဒိၣ်ထီၣ်နဖိတဖၣ်အခါန့ၣ်, မ့ၢ်နဃုန့ၢ် တၢ်ဂံၢ်တၢ်ဘါ လၢကစၢ်ယွၤအကလုၢ်ကထါအပူၤ, ဒ်သိးနသုနဟ့ၣ်အဃၣ်တဂ့ၤအဂီၢ် တဘျီဘျီဧါ. ထါစံးထီၣ်ပတြၢၤ ၁၂၇ စံးဘၣ်ပှၤလၢ “ဖိသၣ်မ့ၢ်တၢ်န့ၢ်သါဟဲလၢယွၤ,” ဒီး “ပှၤလၢအလၢပီၤပှဲၤဒီး အီၤန့ၣ် ဘၣ်ဆိၣ်ဂ့ၤ ဝဲလီၤ.”

 
ဖိသၣ်မ့ၢ်တၢ်ဟ့ၣ်လၢအဟဲလၢယွၤလီၤ. တမ့ၢ်လၢပဒုးကဲထီၣ်အဝဲသ့ၣ်လၢ ပကစၢ်ဒၣ်ပဝဲဘၣ်. ကစၢ်ယွၤ ဟ့ၣ်ပှၤလၢပဖိတဖၣ် မ့ၢ်ဒ်သိး ပကဒုးဒိၣ်ထီၣ်အီၤ လၢကသ့ၣ်ညါယွၤ အဂီၢ်န့ၣ်လီၤ. ဒ်သိးပဝဲဒၣ်သ့ၣ် တဖၣ်အသိး, ပဖိတဖၣ် ကဘၣ်သ့ၣ်ညါလၢ အဝဲသ့ၣ်တဖၣ် ဘၣ်တၢ်ကိးအီၤလၢ ကမူလၢကစၢ်ယွၤ အဂီၢ် ဒီး မၤကစၢ်ယွၤ အတၢ်မၤလီၤ. ကစၢ်ယွၤဟ့ၣ်လီၤ ပဖိတဖၣ်အတၢ်အိၣ်မူ ဒီး တၢ်ဟ့ၣ်လၢအဂ့ၤ တဖၣ်အါမး ဒ်သိး အဝဲသ့ၣ်ကဒိၣ်ထီၣ် ဒီးမၤလိန့ၢ်, ဒီးသ့ၣ်ညါ အဝဲသ့ၣ်အတၢ်အိၣ်မူအတၢ်ကိးမ့ၢ် တၢ်မနုၤလဲၣ်အဂီၢ်န့ၣ်လီၤ. အဝဲသ့ၣ်အတၢ်ကိး ဘၣ်သ့ၣ်သ့ၣ် ကလီၤဆီဒီးပှၤ, ဒီးဘၣ်သ့ၣ်သ့ၣ် ကလီၤဆီ ဒီးတၢ်လၢပအဲၣ်ဒိးလၢအဝဲသ့ၣ်ကကဲထီၣ် ဝဲတဖၣ်န့ၣ်လီၤ. ဘၣ်ဆၣ် ပနာ်သ့လၢ ကစၢ်ယွၤ ကပၢဆှၢ ပဖိတဖၣ် ဒ်သိး အတၢ်အိၣ်မူ ကကဲထီၣ် တၢ်လၤကပီၤလၢကစၢ်ယွၤအဂီၢ်န့ၣ်လီၤ. လၢတၢ်ခဲလၢာ်အဖီ ခိၣ်န့ၣ်, ကစၢ်ယွၤမ့ၢ်ပှၤလၢအတ့လီၤအဝဲသ့ၣ်, ဒီး အဝဲသ့ၣ်မ့ၢ်ကစၢ်ယွၤ အတၢ်လီၤ. အဝဲသ့ၣ်ဘၣ်ထွဲဒီး ကစၢ်ယွၤ, အနီၢ်ခိအနီၢ်သးခဲလၢာ်, ဒ်ပဝဲဒၣ်အသိးလီၤ.

 
ပဖိတဖၣ်မ့ၢ်တၢ်ဆိၣ်ဂ့ၤလီၤ. တမ့ၢ်တၢ်ကီတၢ်ခဲ, ဒီး တၢ်နိးတၢ်ဘျးလၢ ပတၢ်အိၣ်မူအဂီၢ်ဘၣ်. တကးဒံးဘၣ်, ဒ်ဟံၣ်ဖိဃီဖိတဖၣ်အသိး, အဝဲသ့ၣ်ကမၤစၢၤပှၤဖဲပလိၣ်ဘၣ် တၢ်မၤစၢၤတဘျီလၢ်လၢ် အခါ, ဒ်ဟံၣ်ဖိဃီဖိအဂၤအသိး ဒီး ဒ်ပှၤတဝၢ တဖၣ်မၤဝဲအသိးလီၤ.

 
ပဘၣ်တၢ်ကိးပှၤလၢ ပကအဲၣ်ပဖိတဖၣ် ဒီး ဒုးဒိၣ်ထီၣ်အဝဲသ့ၣ်လၢ “ကစၢ်အတၢ်သိၣ်တၢ်သီ, ဒီး အတၢ်သိၣ်ဃီၣ်သီဃီၣ်အပူၤ” န့ၣ်လီၤ. (အ့းဖ့းစူး - ၆း၄). ဒ်ကစၢ်ယွၤအတၢ်ဟ့ၣ်အသိး, အဝဲသ့ၣ် ဟဲစိာ် တၢ်သူၣ်ခုသးခု ဒီး တၢ်သူၣ်ဖှံသးညီလၢပတၢ်အိၣ်မူအပူၤလီၤ.