မၤနၢၤနဝ့ၢ်ယရံၤဃိ (၁)

ဒီးယွၤစံးဘၣ်စီၤယိၤရှူ, ကွၢ်, ယဟ့ၣ်လီၤယရံၤဃိ, ဒီးအစီၤပၤ, ဒီးအသုးဖိ, ပှၤအဂံၢ်ဆူၣ်အဘါဆူၣ် တဖၣ်လၢ နစုပူၤလီၤ. (ယိၤရှူ - ၆း၂).

ဖဲအံၤ တၢ်လၢနကဘၣ်သ့ၣ်ညါတမံၤန့ၣ်မ့ၢ်ဝဲ ယရံၤဃိ အဝ့ၢ်ခိၣ်ဒူန့ၣ် ကျၢၤဒိၣ်မးလီၤ. ဝ့ၢ်ခိၣ်ဒူန့ၣ် ဝးတရံးဝဲ ဝ့ၢ်ဒီတဝ့ၢ် ဒ်ပှၤသုးဖိအတၢ်ကူတၢ်ကၤဒီသဒၢ အမိၢ်ပှၢ်အသိး, အကစီၤထီၣ်အိၣ်ဝဲ အပ့ၣ် ၄၀ ညါန့ၣ်လီၤ. တၢ်ကဘၢၣ်ဖျိအီၤန့ၣ် တမ့ၢ်တၢ်ညီညီဘၣ်. ဖဲအံၤ တၢ်လၢနကဘၣ်သ့ၣ်ညါ ဘၣ်ဃးဒီး စီၤယိၤရှူန့ၣ်မ့ၢ်ဝဲ, တမ့ၢ်စီၤယိၤရှူမၤလီၤပှီၢ် ဝ့ၢ်ခိၣ်ဒူဘၣ်, ကစၢ်ယွၤမၤလီၤပှီၢ်ဝ့ၢ်ခိၣ်ဒူန့ၣ်လီၤ. ဒီးကစၢ်ယွၤ ကမၤတၢ်ဒ်န့ၣ်အသိး လၢနဂီၢ်စ့ၢ်ကီးလီၤ.

 
နဝ့ၢ်ယရံၤဃိန့ၣ် မ့ၢ်နတၢ်ပျံၤတၢ်ဖုး, နတၢ်သးဒိၣ်, နတၢ်သးခၣ်, မ့တမ့ၢ်နတၢ်သးက့ၣ် တဖၣ်န့ၣ်လီၤ. မ့ၢ်စ့ၢ်ကီး နတၢ်ဘၣ်ယိၣ်ဘၣ်ဘီ ဘၣ်ဃးနခါဆူညါအဂီၢ် န့ၣ်လီၤ. နတၢ်သးတမုာ်လၢတၢ်လၢနမၤတ့ၢ် တဖၣ်, နတၢ်ထီဒါတ့ၢ်တၢ်တဖၣ်, နတၢ်သူၣ်ကိၢ်သးဂီၤတဖၣ်, ဒီးနတၢ်တဲတမုာ်ပှၤသး သ့ၣ်တဖၣ်, မ့တမ့ၢ် နပဲာ်ထံနီၤဖးတၢ်အါတလၢအဃိ သ့ၣ်တဖၣ်န့ၣ် မ့ၢ်ဒၣ်နဝ့ၢ်ယရံၤဃိန့ၣ်လီၤ. နဝ့ၢ်ယရံၤဃိ န့ၣ်မ့ၢ်ဝဲ နတၢ်အိၣ်သးတမံၤမံၤ, နတၢ်ပာ်သူၣ်ပာ်သး, ဒီး နတၢ်ဆိကမိၣ်ဆိကမး တဖၣ်လၢ အဒုးယံၤနၤဒီး နတၢ်သူၣ်ခုသးခု, နတၢ်ဃူတၢ်ဖိး, မ့တမ့ၢ် နတၢ်အိၣ်ဘှံးအိၣ်သါတဖၣ်န့ၣ်လီၤ. ဝ့ၢ်ယရံၤဃိ မၤတံာ်တာ်နတၢ်လဲၤကျဲအဃိ အဝ့ၢ်ခိၣ်ဒူ ကြၢးဘၣ်တၢ်မၤလီၤပှီၢ်ကွံာ်အီၤန့ၣ်လီၤ. “အဂ့ၢ်ဒ်အံၤ, လၢသၢနံၤအတီၢ်ပူၤန့ၣ် သုကခီဂာ်ယၢ်ဒ့ၣ်အံၤ ဒ်သိး သုကလဲၤနုာ်မၤန့ၢ် ထံဧိၤကီၢ်ဧိၤလၢ ယွၤသုကစၢ်ဟ့ၣ်လီၤသုလၢ သုကမၤန့ၢ်အီၤလီၤ” (ယိၤရှူ - ၁း၁၁).

 
တၢ်ကတိၤ “သုကမၤန့ၢ်အီၤ” အခီပညီန့ၣ်မ့ၢ်ဝဲ “သုကမၤန့ၢ်တၢ်ခဲလၢာ်ခီဖျိ နီၣ်ဟးထီၣ်ကွံာ် ပှၤအိၣ်ဆိးလၢ အပူၤတဖၣ် ဒီး အိၣ်ဆိးက့ၤလၢ အဝဲသ့ၣ်အလီၢ်” န့ၣ်လီၤ. ဘၣ်ဆၣ် မုၣ်ကီၤလံၢ်န့ၣ် တပာ်တ့ၢ်နၤ လၢအတပၣ်ဃုာ်ဒီး တၢ်ဒုးတၢ်ယၤဘၣ်. အဝဲဒၣ်ကထီဒါနၤလီၤ. အဝဲဒၣ်ကဆီၣ်တံၢ်နၤလီၤ. ဘၣ်ဆၣ် အဝဲဒၣ် မၤနၢၤနၤတန့ၢ်ဘၣ်. ဘၣ်မနုၤအဃိလဲၣ်? မ့ၢ်လၢ ကစၢ်ယွၤဘိးဘၣ်သ့ၣ်ညါပာ်စၢၤ တ့ၢ်လံဝဲလၢ နမ့ၢ်ပှၤမၤနၢၤတၢ်လံ န့ၣ်လီၤ. “ဒီးယွၤစံးဘၣ်စီၤယိၤရှူ, ကွၢ်, ယဟ့ၣ်လီၤယရံၤဃိဆူ နစုပူၤလံ.”

 
ကစၢ်ယွၤတစံးဝဲ, “စီၤယိၤရှူဧၢ, ဟံးန့ၢ်ဝ့ၢ်အံၤတက့ၢ်” န့ၣ်ဘၣ်. ဘၣ်ဆၣ်ကစၢ်ယွၤတဲဝဲ, “စီၤယိၤရှူဧၢ, ဒိးန့ၢ်ဝ့ၢ်အံၤလၢ ယဟံးန့ၢ်အီၤန့ၣ်တက့ၢ်.” လၢနဂီၢ်, ဒီးလၢ တၢ်လၢအတၤတၢ်ဒီးနၤတဖၣ်အဂီၢ်, ကစၢ်ယွၤကစံးဝဲဒ်သိးအံၤ စ့ၢ်ကီးန့ၣ်လီၤ. နကစံး, “ကစၢ်ယွၤမ့ၢ်မၤတ့ၢ်တၢ်လၢယဂီၢ်န့ၣ်, ယကဘၣ်မၤဒံး တၢ်မနုၤလဲၣ်.

 
(၁). ဟံးန့ၢ်နတၢ်မၤနၢၤခီဖျိတၢ်နာ်, ဒ်နဒိးန့ၢ်နတၢ်အုၣ်က့ၤခီၣ်က့ၤအသိးတက့ၢ်.
(၂). ကတိၤတၢ်မၤနၢၤ အတၢ်ကတိၤတက့ၢ်. ဘၣ်ဆၣ် နတၢ်ကတိၤန့ၣ် ကဘၣ်လဲၤပလိာ်အသးဒီး ကစၢ်ယွၤအတၢ်ကတိၤန့ၣ်လီၤ.
(၃). လဲၤတၢ်လၢတၢ်မၤနၢၤအပူၤ, လၢတနံၤဘၣ်တနံၤအဂီၢ်န့ၣ်တက့ၢ်.