ကွၢ်ကဒါက့ၤဒီးဒိးန့ၢ်တၢ်ဂံၢ်တၢ်ဘါ

ကွၢ်ကွၢ်, ပှၤလၢအဝံသးစူၤတၢ်န့ၣ်, ပစံးလၢအဘၣ်ဆိၣ်ဂ့ၤဝဲလီၤ. (ယၤကိာ် - ၅း၁၁).

စီၤယၤကိာ်ကွဲးဝဲဒ်အံၤ, “ယဒီပုၢ်ဝဲၢ်သ့ၣ်ဧၢ, ပာ်ဝံလၢအစံၣ်တဲၤတဲလီၤလၢ ကစၢ်အမံၤတဖၣ်, အဒိးတၢ်နး တၢ်ဖှီၣ်, ဒီးအဝံသးစူၤတၢ်န့ၣ်, လၢတၢ်အဒိအတဲာ်တက့ၢ်. ကွၢ်ကွၢ်, ပှၤလၢအဝံသးစူၤတၢ်န့ၣ်, ပစံးလၢ အဘၣ်ဆိၣ်ဂ့ၤဝဲလီၤ. သုနၢ်ဟူဘၣ်စီၤယိၤဘး အတၢ်ဝံသးစူၤအဂ့ၢ်အကျိၤ, ဒီးသုထံၣ်ဘၣ်ကစၢ် အကတၢၢ်လၢ ကစၢ်သူၣ်အိၣ်သးအိၣ်တၢ်, ဒီးသူၣ်ကညီၤသးကညီၤတၢ် အါမးလီၤ.” (ယၤကိာ် - ၅း၁၀-၁၁). ဖဲအံၤတၢ်ဒုးသ့ၣ်နီၣ်ထီၣ်က့ၤပှၤလၢ ပကဘၣ်ကွၢ်က့ၤဆူပလီၢ်ခံ ဒီးဒိးန့ၢ်တၢ်ဂံၢ်တၢ်ဘါ ဒီး တၢ်တၤတၢ်သ့ၣ်တဖၣ် ဆူပှၤလၢအလဲၤတ့ၢ်လၢပမဲာ်ညါတဖၣ်အအိၣ် ဖဲပခိးကွၢ်လၢ် ကစၢ်ခရံာ်အတၢ် ဟဲက့ၤခံဘျီတဘျီအခါန့ၣ်လီၤ.

 
ပကကွၢ်ကဒါက့ၤဝံဟိၤရှ့အဂ့ၢ်တက့ၢ်. အမါမ့ၢ်ပာ်တ့ၢ်အီၤဘၣ်ဆၣ် လၢတၢ်သးတီအပူၤ အဝဲဒၣ်အိၣ်ခိးဝဲ, ဒီးကစၢ်ယွၤ မၤဘၣ်ဂီၢ်က့ၤအဝဲသ့ၣ် အတၢ်ဆီဟံၣ်ဆီဃီန့ၣ်လီၤ. (ဟိၤရှ့ ၃း၂-၃). ပကကွၢ်ကဒါက့ၤစီၤဒၤနံးယ့လး တက့ၢ်. အဝဲဘၣ်တၢ်တ့ၢ်လီၤအီၤဆူ ခ့ယုၢ်ကပိၤပူၤခီဖျိလၢ အအိၣ်ဂၢၢ် ကျၢၤလၢအတၢ်စူၢ်တၢ်နာ်အဃိ, ဘၣ်ဆၣ်ဒီး ကစၢ်ယွၤထုးထီၣ်ကွံာ်အီၤ ဒီး သုးထီထီၣ်အလီၢ်အလၤ န့ၣ်လီၤ. (ဒၤနံးယ့လး ၆း၁-၂၈). ပကကွၢ်ကဒါက့ၤဝံယံးရမံယၤတက့ၢ်. အဝဲဘၣ်တၢ်ဖီၣ်အီၤ, ဆှိးအီၤလၢ အမ့ၢ်ပှၤယိးကဒါဘီ, ဒီးထၢနုာ်အီၤဆူထံပူၤ အပူၤလၢကသံဝဲအဂီၢ်လီၤ. (ယံးရမံယၤ ၃၇-၃၈). ဘၣ်ဆၣ် အဝဲဒၣ်ကျ့ထီၣ်အမဲာ်, ဒီးကစၢ်ယွၤထုးထီၣ်ကွံာ်အီၤလီၤ.

 
ဝံၤအလီၢ်ခံ လၢလံာ်ဧ့ၤဘြံၤ အဆၢဒိၣ် တဆံတၢအပူၤန့ၣ် ပကထံၣ်ဘၣ် ပှၤလၢအသးတီတဖၣ် ဘၣ်တၢ်ကွဲးလီၤအမံၤတဘျုးဂၤန့ၣ်လီၤ. ပဝဲလၢ အဘၣ်တၢ်တကနၣ်ဃုာ်ပှၤလၢ ပဟံၣ်ဖိဃီဖိတဖၣ်န့ၣ် ပကကွၢ်ကဒါက့ၤ စီၤဟ့းဘ့းလး တက့ၢ်. (အဆၢဖိ ၄). ပှၤလၢအဘၣ်တၢ်ဆိကမိၣ်ကမၣ်အီၤတဖၣ် န့ၣ် ကွၢ်ကဒါက့ၤ စီၤနိအၤတက့ၢ်. (အဆၢဖိ ၇). ပှၤလၢအဘၣ်ဒုးတၢ်ဒီး တၢ်စူၢ်တၢ်နာ်တဖၣ် ဒီး ကဘၣ်မၤ တၢ်လၢ တၢ်ဖံးတၢ်မၤလၢတၢ်မၤအီၤ တသ့တညီတဖၣ်န့ၣ် ကွၢ်ကဒါက့ၤ စီၤအၤဘြၤဟၣ်တက့ၢ်. (အဆၢဖိ ၈-၁၀).

 
နမ့ၢ်ဘၣ်တၢ်သူနၤ ဒီး တၢ်မၤတရီတပါနၤန့ၣ်, ကွၢ်ကဒါက့ၤ စီၤယိၤသးတက့ၢ်. (အဆၢဖိ ၂၂). ပှၤလၢ အကဘၣ်လဲၤခီဖျိ တၢ်ကီတၢ်ခဲလၢအတၢ်အိၣ်မူအပူၤတဖၣ် ကွၢ်ကဒါက့ၤစီၤယိၤရှူတက့ၢ်. (အဆၢဖိ ၃၀). ပှၤလၢအကဘၣ်တၢၤကွံာ် အတၢ်ဒဲးဘးလၢအမၤတ့ၢ်ဝဲတဖၣ်န့ၣ် ကွၢ်ကဒါက့ၤ နီၢ်ရၤဃး တက့ၢ်. (အဆၢဖိ ၃၁). အဃိ, အဝဲအံၤမ့ၢ်တနွံအံၤ အတၢ်ကတိၤလၢနဂီၢ် လၢအမ့ၢ်ဝဲ, “ကွၢ်ကဒါက့ၤဒီး ဒိးန့ၢ်တၢ်ဂံၢ်တၢ်ဘါတက့ၢ်.”