မၤနၢၤတၢ်အၢလၢတၢ်ဂ့ၤ

သုတဒိးတၢ်မၤနၢၤသုလၢတၢ်အၢတၢ်သီတဂ့ၤ. မ့မ့ၢ် မၤနၢၤတၢ်အၢလၢ တၢ်ဂ့ၤန့ၣ်တက့ၢ်. (ရိမ့ၤ - ၁၂း၂၁).

ဖဲခိၣ်ရံယါတၢ်ဒုးအဆၢကတီၢ်, ကလံၤထံးခိၣ်ရံယါထံဖိကီၢ်ဖိတဂၤ ဘၣ်တၢ်ဖီၣ်အီၤလၢ ခီၣ်မၠူနံးတဖၣ် ဝံၤဒီး တၢ်ဟ့ၣ်လီၤတၢ်ကလုၢ်လၢ တၢ်ကဘၣ်ခးသံအီၤန့ၣ်လီၤ. ဘၣ်ဆၣ်, ဖဲခီၣ်မၠူနံးခိၣ်နၢ်သးစၢ်ဖိတဂၤ သ့ၣ်ညါဝဲလၢ ပှၤလၢဘၣ်တၢ်ဖီၣ်အီၤတဂၤန့ၣ် မ့ၢ် ဖိၣ်ဃဲကၠိဒွဲ အကၠိခိၣ်တဂၤ လၢအကဟုကယာ် ပှၤဖိသၣ်တဖၣ်အဃိ, အဝဲပာ်လီၤအသးလၢ ကပာ်မူဒံးအီၤန့ၣ်လီၤ. ဘၣ်ဆၣ် ဖဲပှၤတဂၤန့ၣ်အလီၢ်, အဝဲဟ့ၣ်လီၤ တၢ်ကလုၢ်လၢ တၢ်ကဘၣ်မၤသံ ပှၤတဂၤန့ၣ်အဖိခွါန့ၣ်လီၤ.

 
ဖိခွါလၢအသးအိၣ် တဆံခွံနံၣ်တဂၤန့ၣ် ဘၣ်တၢ်ခးသံအီၤလၢ အပၢ်အမဲာ်ညါလီၤ. တၢ်ဒုးဝံၤအလီၢ်ခံ, ခီၣ်မၠူနံးခိၣ်နၢ်သးစၢ်တဂၤန့ၣ် ဘၣ်တၢ်ဖီၣ်အီၤလၢ ဘီမုၢ်စၢဖှိၣ်ကရၢ အသုးဖိတဖၣ်, ဒီးဘၣ်တၢ်ဟ့ၣ်လီၤ တၢ်ကလုၢ်လၢ တၢ်ကဘၣ်မၤသံအီၤန့ၣ်လီၤ. ဘၣ်ဆၣ်တချုးတၢ်မၤသံအီၤအဆၢကတီၢ်, ပှၤလၢအဖိခွါ ဘၣ်တၢ်ခးသံအီၤတဂၤန့ၣ် လဲၤဃ့ကညးတၢ်ဒ်သိး တၢ်ကပာ်မူဒံး ခီၣ်မၠူနံးခိၣ်နၢ်သးစၢ်တဂၤန့ၣ်လီၤ. အဝဲစံးဝဲဒၣ်လၢ ခီၣ်မၠူနံးခိၣ်နၢ်သးစၢ်တဂၤန့ၣ် ဖဲအဟ့ၣ်လီၤတၢ်ကလုၢ်လၢ ကခးသံအဖိခွါအခါ မ့ၢ်ဒၣ်ပှၤသးစၢ်တဂၤ အဃိ, တသ့ၣ်ညါတၢ်လၢအမၤဝဲတဖၣ်လီၤတံၢ်လီၤဆဲးဘၣ်.

 
ပှၤတဂၤန့ၣ်စံးဝဲ, “ဟ့ၣ်လီၤယၤခီၣ်မၠူနံးခိၣ်နၢ်သးစၢ်တဂၤန့ၣ်မီၣ်. ယကသိၣ်လိသီလိအီၤလီၤ.” မ့တမ့ၢ် တၢ်လၢအညီနုၢ်မၤအသးဘၣ်ဆၣ်, ဘီမုၢ်စၢဖှိၣ်ကရၢအသုးဖိတဖၣ် ဟ့ၣ်အီၤတၢ်ပျဲဒ်အဃ့ဝဲအသိး, အဃိ အဝဲဒၣ်ဟဲက့ၤကိးဝဲ ပှၤလၢအမၤသံအဖိခွါတဂၤန့ၣ် ဆူအဟံၣ်ဒီး အံးထွဲကွၢ်ထွဲအီၤလီၤ. လံာ်စီဆှံစံးဝဲ, “တၢ်အဲၣ်တၢ်ကွံန့ၣ် တလီၤတူာ်လီၤကာ်ဘၣ်,” (၁ ကရံၣ်သူး - ၁၃း၈). ခီၣ်မၠူနံးခိၣ်နၢ် သးစၢ်တဂၤန့ၣ် ဘၣ်တၢ်သိၣ်လိအီၤလၢ ထူကလုၢ်ယွၤကထါ, ဒီးကစၢ်ယွၤအတၢ်အဲၣ်အဃိ, လီၢ်ခံအဝဲ ကဲထီၣ်က့ၤပှၤခရံာ်ဖိတဂၤ ဒီးလၢခံကတၢၢ် ကဲထီၣ်က့ၤ တၢ်အိၣ်ဖှိၣ်တဖှိၣ် အတၢ်အိၣ်ဖှိၣ်သရၣ်တဂၤ န့ၣ်လီၤ.

မ့ၢ်နဘၣ်တၢ်မၤဆါနၤ, တၢ်မၤနၤတတီတလိၤ, ဒီးတၢ်သမၢကွံာ်နၤတဘျီဘျီဧါ. လၢနကမၤဆၢက့ၤတၢ် လၢတၢ်သးဒိၣ်အလီၢ်န့ၣ်, မၤဆၢက့ၤအီၤဒ်လံာ်စီဆှံစံးဝဲအသိးန့ၣ်တက့ၢ်. “ပှၤလၢယအဲၣ်အီၤသ့ၣ်ဧၢ, သုတမၤကၣ်တၢ်လၢသုဂီၢ်ဒၣ်သုဝဲတဂ့ၤ. မ့မ့ၢ် ပျဲတၢ်သးဒိၣ်တက့ၢ်. အဂ့ၢ်ဒ်အံၤ, တၢ်ကွဲးအသးစံးဝဲဒၣ်, တၢ်မၤကၣ်တၢ်န့ၣ်, အိၣ်ဒီးယၤလီၤ, ယကဟ့ၣ်ကၣ်တၢ်ယဲလီၤ, ယွၤစံးဝဲဒၣ်. သုတဒိးတၢ်မၤနၢၤသုလၢ တၢ်အၢတၢ်သီတဂ့ၤ. မ့မ့ၢ် မၤနၢၤတၢ်အၢလၢ တၢ်ဂ့ၤန့ၣ်တက့ၢ်.” (ရိမ့ၤ - ၁၂း၁၉, ၂၁).