မၤသးဒ်န့ၣ်ဒီး သုဂံၢ်စဲၤလီၤ, ဒီးသုဘၣ်တၢ်မၤထီၣ်မၤထီသုလၢအပူၤ, ဒီးသုအိၣ်ဂၢၢ်ဆိးကျၢၤလၢ တၢ်နာ်အပူၤ, ဒ်တၢ်သိၣ်လိသုအသိးသတးဒီး, အါထီၣ်လၢ တၢ်စံးထီၣ်ပတြၢၤ အဘျုးအဖှိၣ်, ဒီးလဲၤတၢ်လၢ ကစၢ်ယ့ၣ်ရှူးခရံာ်အပူၤ, ဒ်သုဒိးန့ၢ်အီၤအသိးန့ၣ်တက့ၢ်. (ကလီးစဲ - ၂း၆-၇).ပှၤခရံာ်ဖိအတၢ်အိၣ်မူတကတၢၢ်ကွံာ်ဝဲဖဲ ပစးထီၣ်တူၢ်လိာ်ခရံာ်အခါန့ၣ်ဘၣ်. ကစၢ်ခရံာ်လၢ ပနာ်န့ၢ်အီၤ လၢပတၢ်အုၣ်က့ၤခီၣ်က့ၤအဂီၢ်န့ၣ် မ့ၢ်ခရံာ်တဂၤဃီလၢ ကလဲၤတၢ်ဒီးပှၤလၢ ပတၢ်အိၣ်မူ တနံၤဘၣ်တနံၤ အပူၤန့ၣ်လီၤ. စီၤပီလူးဒုးသ့ၣ်နီၣ် ပှၤခရံာ်ဖိလၢကလီးစဲတဖၣ် လၢတၢ်သးခုကစီၣ်လၢ အဝဲသ့ၣ် ဒိးန့ၢ်အီၤန့ၣ် တမ့ၢ်အဝဲသ့ၣ်အတၢ်စူၢ်တၢ်နာ်အခီၣ်ထံးခီၣ်ဘိဧိၤဘၣ်, မ့ၢ်လၢၢ်ခၢၣ်သနၢၣ်လၢ အဝဲသ့ၣ် အတၢ်အိၣ်မူတစိၤသးအဂီၢ်န့ၣ်လီၤ.
စီၤပီလူးကွဲးဝဲ, “ဒီးလဲၤတၢ်လၢကစၢ်ယ့ၣ်ရှူးခရံာ်အပူၤ, ဒ်သုဒိးန့ၢ်အီၤအသိးန့ၣ်တက့ၢ်.” (ကလီးစဲ - ၂း၇).
ပဒိးန့ၢ်ခရံာ်ဒ်လဲၣ်. ပဒိးန့ၢ်အီၤခီဖျိ တၢ်နာ်အဃိလီၤ.
ပတဟဲဆူကစၢ်ခရံာ်အအိၣ် ခီဖျိပနာ်ပတၢ်တီတၢ်လိၤအဃိဘၣ်. ပဟဲဒ်ပှၤတၢ်ဒဲးဘးဖိ လၢအလိၣ်ဘၣ် တၢ်ဘျုးတၢ်ဖှိၣ်တဖၣ်အသိးန့ၣ်လီၤ. ပတဟဲစိာ်ပတၢ်မၤနၢၤတဖၣ်ဆူကစၢ်ယွၤအဂီၤထံး ဒ်သိး ပကဒိးန့ၢ် တၢ်အုၣ်က့ၤခီၣ်က့ၤအဂီၢ်ဘၣ်. ပဟဲဒၣ်ထဲစုယၢ်ခီ ဒီး ဒိးန့ၢ်ကစၢ်ခရံာ်ဒ် ပကစၢ် ဒီး ပှၤလၢအအုၣ်က့ၤခီၣ် က့ၤပှၤန့ၣ်လီၤ.
လၢတၢ်န့ၣ်အဃိ, စီၤပီလူးစံးဝဲလၢ ပကဘၣ်လဲၤဒံးဆူညါ လၢကစၢ်ခရံာ်အပူၤ ဒ်န့ၣ်အသိးစ့ၢ်ကီးန့ၣ်လီၤ. ပထုးဖး ကစၢ်ခရံာ်ဒီး တၢ်စူၢ်တၢ်နာ် တသ့ဘၣ်. ပှၤနာ်တၢ်ဖိတဖၣ် အနီၣ်သးအတၢ်အိၣ်မူအတၢ်လဲၤကျဲ န့ၣ်လဲၤအသးခီဖျိ တၢ်မၤသကိးဃုာ်တၢ်ဒီး ကစၢ်ခရံာ်န့ၣ်လီၤ. ပတစးထီၣ်အီၤလၢ တၢ်ဘျုးတၢ်ဖှိၣ်အပူၤ ဝံၤဒီး လဲၤဆူညါခီဖျိ တၢ်နာ်န့ၢ်ပတၢ်ဂံၢ်တၢ်ဘါဒၣ်ဝဲဘၣ်. တၢ်ဘျုးတၢ်ဖှိၣ်လၢ အမၤပူၤဖျဲးပှၤန့ၣ် မ့ၢ် တၢ်ဘျုးတၢ်ဖှိၣ်တမံၤဃီ လၢကပၢဆှၢပှၤလၢပတၢ်လဲၤကျဲဆူညါအဂီၢ်န့ၣ်လီၤ.
0 Comments