လ့ၣ်ကွၢ်ယွၤအကလုၢ်ကထါ

လၢယလ့ၣ်ကွၢ်တၢ်န့ၣ် နကလုၢ်ကထါဆၢဆံးဒိၣ်လဲၣ်, ဆၢန့ၢ်ကနဲစီလၢ ယကိာ်ပူၤန့ၣ်တက့ၢ်လီၤ. (စံးထီၣ်ပတြၢၤ - ၁၁၉း၁၀၃).

ပှၤယူဒၤဖိလၢ စိၤလၢပျၢၤ အတၢ်ဆဲးတၢ်လၤအပူၤ, တၢ်မၤလိတၢ်ကူၣ်ဘၣ်ကူၣ်သ့ လၢဘၣ်ဂ့ၢ်ဘၣ်ဝီ န့ၣ် စးထီၣ်အသးလၢ ဖိသၣ်အသးအိၣ် ၆ နံၣ်တဖၣ်န့ၣ်လီၤ. ပှၤယူဒၤဖိ ဖိသၣ်ပိာ်ခွါဖိတဖၣ် ဘၣ်လဲၤဆဲး လီၤမံၤလၢ ယူဒၤတၢ်ဘူၣ်တၢ်ဘါလီၢ်အကၠိ လၢဘၣ်တၢ်သ့ၣ်ညါအီၤလၢ “လံာ်အဟံၣ်” န့ၣ်လီၤ. လွံၢ်နံၣ်ဝံၤ အလီၢ်ခံ ဖဲအဝဲသ့ၣ်ဖျိထီၣ်ကၠိန့ၣ် အဝဲသ့ၣ်တိၢ်ရူးဝဲ ထိရၤ (လံာ်စီၤမိၤရှ့အတၢ်သိၣ်တၢ်သီယဲၢ်ဘ့ၣ်) ဒီတကတြူၢ်ညါန့ၢ်ဝဲလီၤ. မ့မ့ၢ်ပဝဲဒၣ်သ့ၣ်တဖၣ် ပကဟ့ၣ်ထီၣ်ဒံးတၢ်ဂ့ၢ်တၢ်ကျိၤလၢ ပတိၢ်ရူးလံာ်စီဆှံ တဆၢဖိဧိၤ တန့ၢ်ဘၣ်ဧါ.

 
လၢပှၤယူဒၤဖိ အတၢ်သိၣ်လိ အတၢ်လီၤစၢၤလီၤသွဲၣ်အပူၤန့ၣ်, ဖိသၣ်တဖၣ် ဘၣ်တၢ်ဒုးသ့ၣ်ညါအီၤလၢ ယွၤကလုၢ်ကထါ ဃုာ်ဒီး တၢ်လၢအဆၢ, လၢအပၣ်ဃုာ်ဒီး ကနဲစီ, ဒ်သိးကဟံးန့ၢ်ကစၢ်ယွၤအတၢ်ကတိၤ တဖၣ် လၢတၢ်သးခုအပူၤအဂီၢ်န့ၣ်လီၤ. ဝံၤအဝဲသ့ၣ် ကရူးဝဲ ထါစံးထီၣ်ပတြၢၤ ၁၁၉း၁၀၃, “လၢယလ့ၣ် ကွၢ်တၢ်န့ၣ် နကလုၢ်ကထါဆၢဆံးဒိၣ်လဲၣ်, ဆၢန့ၢ်ကနဲစီလၢ ယကိာ်ပူၤန့ၣ်တက့ၢ်လီၤ.” အဝဲန့ၣ်မ့ၢ် အဝဲ သ့ၣ်အတၢ်ကူၣ်ဘၣ်ကူၣ်သ့ခဲလၢာ် အခီၣ်ထံးခီၣ်ဘိ, ဒီး ဘၣ်သ့ၣ်သ့ၣ် ကမ့ၢ် တၢ်မၤလိလၢ အရ့ဒိၣ်ကတၢၢ် လီၤ.

 
ရၤဘံတဖၣ် အဲၣ်ဒိးလၢ အပှၤကၠိဖိတဖၣ် ကအဲၣ်ဘၣ် ကစၢ်ယွၤအကလုၢ်ကထါလီၤ. အဝဲသ့ၣ် အဲၣ်ဒိးလၢ အပှၤကၠိဖိတဖၣ် ကလ့ၣ်ကွၢ်ဒီး ထံၣ်လၢ ယွၤကလုၢ်ကထါမ့ၢ်တၢ်ဂ့ၤန့ၣ်လီၤ. (ကွၢ် ထါစံးထီၣ်ပတြၢၤ ၃၄း၈). ဝံယံးရမံယၤစ့ၢ်ကီး ဆိကမိၣ်ဝဲဒ်န့ၣ်အသိးလီၤ. “ယထံၣ်န့ၢ်နတၢ်ကတိၤ, ဒီးယအီၣ်ကွံာ်အီၤလီၤ. ဒီးနကလုၢ်မ့ၢ် ယသူၣ်ခုယသးခု, ဒီးယသူၣ်ဖှံယသးညီအလီၢ်လီၤ. အဂ့ၢ်ဒ်အံၤ, ယွၤအတၢ်သုးမုၢ်ဂီၢ်မုၢ်အကစၢ်ဧၢ, တၢ်ကိးယၤလၢနမံၤလီၤ." (ယံးရမံယၤ ၁၅း၁၆). စီၤဒၤဝံးစံးဝဲ, “တၢ်အိးထီၣ်နကလုၢ်ကထါန့ၣ် မၤကပီၤထီၣ်တၢ်, ဒီးဒုးနၢ်ပၢၢ်ပှၤလၢ အတမၤလိဘၣ်တၢ်ဘၣ်လီၤ.” (စံးထီၣ်ပတြၢၤ ၁၁၉း၁၃၀). စီၤပၤရှလိၤမိၤ စံးစ့ၢ်ကီးဝဲ, “အဂ့ၢ်ဒ်အံၤ, ယွၤဟ့ၣ်လီၤတၢ်ကူၣ်သ့လီၤ. တၢ်သ့ၣ်ညါ, ဒီးတၢ်သူၣ်ဆးသးဆးထီၣ်ဖျဲးလၢအထးခိၣ်လီၤ.” (ကတိၤဒိ ၂း၆).

 
ဖဲနလ့ၣ်ကွၢ်ကစၢ်ယွၤအကလုၢ်ကထါန့ၣ်, ယွၤအသးစီဆှံ, ပှၤလၢအကွဲးယွၤအကလုၢ်ကထါအံၤ ကမၤ တၢ်ခံမံၤလၢနဂီၢ်လီၤ. တၢတမံၤ, အဝဲဒၣ်ကလီၣ်ဖျါယွၤအကလုၢ်ကထါဆူနအိၣ်လီၤ. ခံမံၤတမံၤ, အဝဲဒၣ် ကဒုးသ့ၣ်နီၣ်ထီၣ်နၤ လၢယွၤကလုၢ်ကထါန့ၣ်လီၤ.