ဘျၢထံခရံာ်ဖိအတၢ်စူၢ်တၢ်နာ်တဖၣ်

၁. ပနာ်လၢ လံာ်စီဆှံမ့ၢ် ကစၢ်ယွၤ အကလုၢ်ကထါလၢ အအိၣ်ဒီး တၢ်စိတၢ်ကမီၤ လၢလၢပှဲၤပှဲၤ လၢခရံာ်ဖိ အတၢ်စူၢ်တၢ်နာ်, ဒီး အတၢ်ဖံးတၢ်မၤ အဖီခိၣ်န့ၣ်လီၤ. (၂တံၤမသ့း ၃း၁၆-၁၇, ၂ပ့းတရူး ၁း၂၀-၂၁)

၂. ပနာ် ယွၤသၢဂၤ တဂၤဃီ လၢအမ့ၢ် ပၢ်ကစၢ်, ဖိကစၢ်, ဒီးသးစီဆှံ ကစၢ် န့ၣ်လီၤ. (မးသဲ ၂၈း၁၉, အ့းဖ့းစူး ၂း၁၈, ဧ့ၤဘြံၤ ၉း၁၄, ၅မိၤရှ့ ၆း၄)

၃. ပနာ် ကစၢ်ယ့ၣ်ရှူးခရံာ် မ့ၢ်ယွၤ, ကစၢ်ယွၤ အဖိခွါထဲတဂၤ, ဒီးပှၤကညီ, အိၣ်ဖျဲၣ်ထီၣ်လၢ မိၢ်နီၢ်မၤရံ, ဒီးမ့ၢ် ပှၤခံဂၤ တဂၤလၢ ယွၤသၢဂၤတဂၤဃီ အပူၤန့ၣ်လီၤ. (ဖံလံးပံၤ ၂း၆-၁၁, ကလီးစဲ ၁း၁၅-၂၀, ယရှါယၤ ၇း၁၄, ကလၤတံ ၄း၄)

၄. ပနာ်လၢ ပှၤကိးဂၤဒဲး အိၣ်ဖျဲၣ်ထီၣ် လၢတၢ်ဒဲးဘး အပူၤ, ဒီး လီၤဖးကွံာ်ဒီးယွၤ, ဒီးလိၣ်ဘၣ် ကစၢ်ယွၤ အတၢ်အုၣ်က့ၤ ခီၣ်က့ၤ န့ၣ်လီၤ. (ရိမ့ၤ ၃း၁၀-၁၈ ဒီး ၂၃, ယိၤဟၣ် ၃း၁၆)

၅. ပနာ်လၢ ကစၢ်ယ့ၣ်ရှူးခရံာ် ဟဲလီၤအုၣ်က့ၤ ခီၣ်က့ၤပှၤလၢ ပတၢ်ဒဲးဘး အပူၤ, ဒီးဒုးသဘျ့ ထီၣ်က့ၤပှၤလၢ မုၣ်ကီၤလံၢ် အတၢ် စၢဃာ် အဖီလာ်, ခီဖျိ အတၢ်ဒိကနၣ်, အတၢ်သံ, အတၢ်ဂဲၤဆၢထၢၣ် သမူထီၣ်က့ၤ, ဒီးအတၢ် ထုကဖၣ် တပယူာ်ဃီ အဃိန့ၣ်လီၤ. (ယိၤဟၣ် ၁၄း၆, မၤတၢ် ၄း၁၂, ၁ပ့းတရူး ၃း၁၈, ၁ပ့းတရူး ၂း၂၄, ရိမ့ၤ ၈း၃၄, ဧ့ၤဘြံၤ ၇း၂၅)

၆. ပနာ်လၢ သးစီဆှံ ဟဲစိာ် တၢ်အိၣ်ဖျဲၣ်ထီၣ်ကဒီး အသီတစု, ဒီးတၢ်မူလီၤထူ လီၤယိာ်လၢ ပှၤနာ်တၢ်ဖိ ကိးဂၤဒဲး အဂီၢ် န့ၣ်လီၤ. (၁ကရံၣ်သူး ၁၂း၁၃, အ့းဖ့းစူး ၁း၁၃-၁၄, ၂တံၤမသ့း ၁း၇)

၇. ပနာ်လၢ တၢ်အုၣ်က့ၤခီၣ်က့ၤ န့ၣ် ပဒိးန့ၢ်အီၤသ့ထဲ တၢ်ပီၢ်ယၢ် လီၤက့ၤသး, ဒီးအိၣ်ဒီး တၢ်စူၢ်တၢ်နာ် လၢ ကစၢ်ခရံာ် အပူၤန့ၣ်လီၤ. (မၤတၢ် ၂း၃၈, မၤတၢ် ၄း၁၂, မၤတၢ် ၁၆း၃၀-၃၁, မၤတၢ် ၂၀း၂၁)

၈. ပနာ် တၢ်ဂဲၤဆၢထၢၣ် သမူထီၣ်က့ၤ, ဒီး တၢ်စံၣ်ညီၣ် လၢမုၢ်နံၤလၢခံကတၢၢ် ကအိၣ်၀ဲ သပှၢ်ကတၢၢ် န့ၣ်လီၤ.
(မးသဲ ၂၅း၃၁-၃၃, ၁သ့းစၤလနံ ၄း၁၆-၁၇, ၁ကရံၣ်သူး ၁၅း၅၂, တၢ်လီၢ်ဖျါ ၂၀း၁၂-၁၃)

၉. ပနာ်ကစၢ်ခရံာ် ကဟဲက့ၤလၢ နီၢ်ခိနီၢ်ခီ ဃုာ်ဒီး အလၤအကပီၤ န့ၣ်လီၤ. (မၤတၢ် ၁း၁၁, ၁သ့းစၤလနံ ၄း၁၃-၁၈)

၁၀. ပနာ်ခရံာ်ဖိ အတၢ်စီတၢ်ဆှံ ခံမံၤလၢ အမ့ၢ် တၢ်ဒိးဘျၢထံ ဒီးတၢ်အီၣ်ဘူၣ် စီဆှံန့ၣ် မ့ၢ်ခရံာ်ဖိတဖၣ် အမူဒါလၢ ကဘၣ်မၤ၀ဲ န့ၣ်လီၤ.  (ရိမ့ၤ ၆း၄, လူၤကၣ် ၂၂း၁၉-၂၀)