ပမ့ၢ်ကွၢ်လၢ လံာ်စီဆှံ အသီအပူၤ တၢ်မၤလိာ်အထံၣ်တဆံ လၢ တၢ်ပာ်ဖျါထီၣ်အီၤလၢ ၂ မိၤရှ့ ၂၀း၁-၁၇ အံၤ ဘၣ်တၢ် ပာ်ဖျါထီၣ်က့ၤအီၤဒၣ်ထဲ ခွံထံၣ်န့ၣ်လီၤ. (လၢလံာ်မးသဲ ၁၉း၁၈ အပူၤ ဘၣ်တၢ်ပာ်ဖျါထီၣ်အီၤ ဃုထံၣ်လၢ အမ့ၢ်၀ဲ, တၢ်မၤသံတၢ်, တၢ်အဲၣ်ဘၢမါအဲၣ်ဘၢ၀ၤ, တၢ်ဟုၣ်တၢ်, တၢ်အုၣ်သးကဘျံးကဘျၣ်, တၢ်စူၢ်မိၢ်ပၢ်ကလုၢ်, ဒီး တၢ်အဲၣ်ပှၤလၢပဃၢၤ န့ၣ်လီၤ.) တၢ်မၤလိာ်လၢ တၢ်တပာ်ဖျါထီၣ်အီၤ တထံၣ်န့ၣ်မ့ၢ်ဒၣ် တၢ်မၤလိာ်လၢ အဘၣ်ဃးဒီး မုၢ်အိၣ်ဘှံး အနံၤ န့ၣ်လီၤ. မ့မ့ၢ်တခီ ကစၢ်ယ့ၣ်ရှူးခရံာ်စံးလၢ အမ့ၢ်မုၢ်အိၣ်ဘှံးနံၤ အကစၢ် န့ၣ်လီၤ (မးသဲ ၁၂း၈).
ဖဲကစၢ်ယွၤ တ့လီၤတၢ်အဆၢကတီၢ် လံာ်စီဆှံစံး၀ဲလၢ အ၀ဲဒၣ်အိၣ်ဘှံးလၢ မုၢ်နွံနံၤတနံၤန့ၣ်လီၤ. ဘၣ်ဆၣ် မ့ၢ်လၢ ကစၢ်ယွၤ မ့ၢ်ပှၤသ့တၢ်လၢာ်အဃိ အ၀ဲတလီၤဘှံးနီတဘျီဘၣ်. တလိၣ်လၢ အ၀ဲဒၣ် ကဘၣ်ဟံးန့ၢ်တၢ်အိၣ်ဘှံးဘၣ်. အဃိ, ဘၣ်မနုၤ လံာ်စီဆှံစံးလၢ အ၀ဲဒၣ်ဘၣ်အိၣ်ဘှံးလဲၣ်. တၢ်စံးဆၢန့ၣ်မ့ၢ်ဒၣ်တၢ် ယိယိဖိလီၤ. မၢ်ကူး ၂း၂၇ စံး၀ဲ, "ဒီးစံးဘၣ်အီၤ, တၢ်လၢမုၢ်အိၣ်ဘှံးအနံၤန့ၣ်, ကဲထီၣ် ဝဲလၢပှၤကညီအဂီၢ်လီၤ. တမ့ၢ်ဘၣ် ပှၤကညီလၢမုၢ် အိၣ်ဘှံးအနံၤအဂီၢ်ဘၣ်." အခီပညီန့ၣ်, ကစၢ်ယွၤဒုးအိၣ်ထီၣ် မုၢ်အိၣ်ဘှံးအနံၤ န့ၣ်မ့ၢ်ဒၣ်လၢ ပှၤကညီကအိၣ်ဘှံးအဂီၢ်လီၤ. တမ့ၢ်လၢ အနီၢ်ကစၢ်ဒၣ်၀ဲ လိၣ်တၢ်အိၣ်ဘှံး အဃိဘၣ်. ခီဖျိလၢ ပအိၣ်ဘှံးအဃိ ပသးဒီး ပနီၢ်ခိ သီထီၣ်ကဒါက့ၤ ၀ဲန့ၣ်လီၤ.
လံာ်စီဆှံအလီၢ်လံၤ အတၢ်သိၣ်တၢ်သီ စံး၀ဲလၢ ပှၤယူဒၤဖိတဖၣ် ကဘၣ်ပာ်ဒိၣ်မုၢ်အိၣ်ဘှံး အနံၤလၢ ကဘူၣ်ထီၣ်ဘါ ထီၣ်ယွၤ, ဒီး တၢ်ပျၢ်တၢ်ဒဲးဘး တၢ်လုၢ်ထီၣ်ပာ်ထီၣ်တၢ် အဂီၢ်န့ၣ်လီၤ. တၢ်ပာ်ဒိၣ်မုၢ်အိၣ်ဘှံး နံၤန့ၣ် မ့ၢ်၀ဲတၢ်သိၣ် တၢ်သီတခါလၢ ပှၤယူဒၤဖိ တဖၣ်အဂီၢ်န့ၣ်လီၤ. ပှၤယူဒၤဖိတဂၤလၢ်လၢ် လၢတပာ်ဒိၣ် မုၢ်အိၣ်ဘှံးနံၤဘၣ်န့ၣ် ကဲထီၣ်ပှၤတၢ် ဒဲးဘးဖိ ဒီးဘၣ်တၢ်စံၣ်ညီၣ်အီၤန့ၣ်လီၤ (ယဃ့းစက့လး ၁၈း၄, ရိမ့ၤ ၆း၂၃, ၅မိၤရှ့ ၁၃း၁-၉, ၄မိၤရှ့ ၃၅း၃၁, ၃မိၤရှ့ ၂၀း၂).
ဘၣ်ဆၣ်ခီဖျိကစၢ်ယ့ၣ်ရှူးခရံာ် အတၢ်ဟဲတူၢ်သံအသး အဃိ, လၢတၢ်ကပာ်တီပာ်လိၤပှၤအဂီၢ် တလိၣ်လၢ ပကဘၣ်ဟံး ဃာ်စီၤမိၤရှ့ အတၢ်သိၣ်တၢ်သီတဖၣ်အံၤ လၢၤဘၣ်. တၢ်သိၣ်တၢ်သီတဖၣ် လၢထီၣ်ပှဲၤထီၣ်လၢ ကစၢ်ခရံာ်အပူၤလံ န့ၣ်လီၤ. အခဲအံၤ ပအိၣ်ဘှံးလၢ တၢ်သိၣ်တၢ်သီလံန့ၣ်လီၤ. အခဲအံၤ ပမုၢ်အိၣ်ဘှံးနံၤ အိၣ်တပယူာ်ဃီ လံန့ၣ်လီၤ.
မ့ၢ်ပဘါယွၤလၢ မုၢ်ခီၣ်ထံးနံၤ (Sunday) သ့ဧါ.
လံာ်စီဆှံအသီအပူၤ ပကထံၣ်ဘၣ် တၢ်ကွဲးအိၣ်အါတီၤလၢ တလိၣ်တၢ်ပာ်ဒိၣ် မုၢ်နွံနံၤ တနံၤလၢၤဘၣ် န့ၣ်လီၤ. ရိမ့ၤ ၁၄း၅-၆ စံး၀ဲ,
"ပှၤတဂၤစံၣ်ညီၣ်ဝဲလၢမုၢ်တနံၤန့ၣ်, ဂ့ၤန့ၢ်မုၢ်နံၤအဂၤတဖၣ်တက့ၢ်လီၤ. ဒီးပှၤတဂၤစံၣ်ညီၣ်ဝဲလၢကိးမုၢ်နံၤဂ့ၤဒ်သိးသိးလီၤ. မ်ပှၤနာ်ဝဲလၢလၢပှဲၤပှဲၤလၢအသးဒၣ်ဝဲ ကိးအဂၤဒဲးတက့ၢ်. ပှၤလၢအတိၢ်မုၢ်တနံၤန့ၣ်, တိၢ်ဝဲလၢယွၤအဃိ, ဒီးပှၤလၢအတတိၢ်ဘၣ်မုၢ်တနံၤန့ၣ်,တတိၢ်ဘၣ်ဝဲ, မ့ၢ်လၢယွၤအဃိလီၤ. ဒီးပှၤလၢအအီၣ်တၢ်န့ၣ်,အီၣ်တၢ်လၢယွၤအဃိလီၤ. အဂ့ၢ်ဒ်အံၤ,မ့ၢ်အစံးထီၣ်ပတြၢၤယွၤအဘျုးအဖှိၣ်လီၤ. ဒီးပှၤလၢအတအီၣ်ဘၣ်တၢ်န့ၣ်, တအီၣ်ဘၣ်ဝဲ, မ့ၢ်လၢယွၤအဃိ,ဒီးစံးထီၣ်ပတြၢၤယွၤအဘျုးအဖှိၣ်လီၤ."
ရိမ့ၤ ၁၄း၁-၁၂ ဒီတကူာ်ညါ ဂ့ၤပမၤလိအီၤ လီၤတံၢ်လီၤဆဲးန့ၣ်လီၤ. တၢ်ကွဲးဖဲအံၤ စံးဘၣ်ပှၤလၢ ပှၤကိးဂၤဒဲး အိၣ်ဒီး တၢ်ခွဲးတၢ်ယာ်လၢ ကဃုထၢ ဘူၣ်ထီၣ်ဘါထီၣ်ယွၤ လၢတၢ်သဘျ့အပူၤ လၢမုၢ်နံၤ တနံၤဂ့ၤတနံၤဂ့ၤ သ့၀ဲန့ၣ်လီၤ. မုၢ်နွံနံၤ တနံၤ မ့ၢ်ကြၢးဘၣ် တၢ်ပာ်ဒိၣ်အီၤန့ၣ် တမ့ၢ်လၢၤ ပှၤကညီအတၢ်ဃုထၢလၢၤဘၣ်, မ့ၢ်ကစၢ်ယွၤ အတၢ်ဃုထၢန့ၣ်လီၤ. လံာ်စီဆှံလၢထး တဆၢအံၤ မ့ၢ်လံာ်စီဆှံ တဆၢလၢ အစံးဆၢ ပတၢ်သးဒ့ဒီ တဖၣ်န့ၣ်လီၤ.
လၢန့ၣ်အမဲာ်ညါ, ကလီးစဲ ၂း၁၆-၁၇ စံးဘၣ်စ့ၢ်ကီးပှၤလၢ "မၤသးဒ်န့ၣ်ဒီးလၢတၢ်အီၣ်မ့ၢ်ဂ့ၤ, တၢ်အီမ့ၢ်ဂ့ၤ,တၢ်မၤဘူၣ်အနံၤမ့ၢ်ဂ့ၤ, လါထီၣ်သီအနံၤမ့ၢ်ဂ့ၤ, အိၣ်ဘှံးအနံၤမ့ၢ်ဂ့ၤအဃိ, မ်ပှၤသုတစံၣ်ညီၣ်သုလၢအဂ့ၢ်အကျိၤနီတ ဂၤတဂ့ၤ. တၢ်န့ၣ်တဖၣ်မ့ၢ်တၢ်ဆူညါတဖၣ်အကဒု လီၤ. မ့မ့ၢ်အမိၢ်ပှၢ်န့ၣ်မ့ၢ်ခရံာ်လီၤ."
ကွၢ်ဘၣ် တၢ်ဆၢကတီၢ် တၢ်လဲၤတရံးအသး လၢလံာ် ကလီးစဲ ၂း၁၆-၁၇ န့ၣ်တက့ၢ်. တၢ်မၤဘူၣ်အနံၤ မ့ၢ်တနံၣ်တဘျီ, လါထီၣ်သီအနံၤ မ့ၢ်တလါတဘျီ, အိၣ်ဘှံးအနံၤ မ့ၢ်တနွံတဘျီ န့ၣ်လီၤ. ပှၤတဂၤဂ့ၤတဂၤဂ့ၤ စံၣ်ညီၣ် ပှၤလၢ တၢ်ဂ့ၢ် အံၤအဃိတသ့ဘၣ်. အိၣ်ဘှံးအနံၤ မ့ၢ်ဒၣ် တၢ်ကဒုလီၤ. တၢ်အမိၢ်ပှၢ်န့ၣ်မ့ၢ်ခရံာ်လီၤ. ခရံာ်မ့ၢ် ပအိၣ်ဘှံးအနံၤ န့ၣ်လီၤ. ပှၤတဂၤဂ့ၤတဂၤဂ့ၤ မ့ၢ်စံၣ်ညီၣ်နၤ မ့ၢ်လၢ အ၀ဲသ့ၣ်ဘါယွၤလၢ မုၢ်နွံနံၤတနံၤ အဃိန့ၣ်ဒီး, အ၀ဲသ့ၣ်ကမၣ်၀ဲလီၤ. ဒ်န့ၣ်အသိးစ့ၢ်ကီး, နမ့ၢ်ပာ်မုၢ်ခီၣ်ထံးနံၤလၢ မုၢ်နွံနံၤတနံၤ အဖီခိၣ်န့ၣ်ဒီး နတၢ်ပာ်သူၣ်ပာ်သးစ့ၢ်ကီး ကဘၣ်မ့ၢ် တၢ်လၢ အဘၣ်န့ၣ်လီၤ.
လံာ်စီဆှံအသီအပူၤ တၢ်ဘူၣ်ထီၣ်ဘါထီၣ်ယွၤလၢ မုၢ်ခီၣ်ထံးနံၤ (Sunday) အိၣ်ဧါ.
"ဒီးနွံနံၤအကျါမုၢ်ခီၣ်ထံးန့ၣ်, ပအိၣ်ဖှိၣ်ရိဖှိၣ်ဒ်သိးကစိၢ်ဘျဲးကိၣ်, ဒီးစီၤပီလူးသါကဟးထီၣ်လၢမုၢ်ဆ့ၣ်ထီၣ်တနံၤသတးဒီး, စံၣ်တဲၤတဲလီၤတၢ်တုၤလၢဖးဖီမုၢ်လီၤ." (မၤတၢ် ၂၀း၇).
နွံနံၤအကျါ မုၢ်ခီၣ်ထံးနံၤ န့ၢ်မ့ၢ် မုၢ်ဒဲးနံၤ (Sunday), ဒီးနံၤတနံၤအံၤ မ့ၢ်နံၤလၢ ပှၤအိၣ်ဖှိၣ်ရိဖှိၣ်၀ဲ န့ၣ်လီၤ. လံာ်စီဆှံ တဆၢအံၤ ပထံၣ်အီၤသ့ ညီကဒၣ်လၢ မုၢ်နံၤတနံၤ အံၤမ့ၢ်နံၤလၢ တၢ်အိၣ်ဖှိၣ် အိၣ်ဖှိၣ်ထံၣ်လိာ်သးလၢ မုၢ်ခီၣ်ထံး နံၤ န့ၣ်လီၤ. လၢတၢ်အိၣ်ဖှိၣ်ရိဖှိၣ်အပူၤအံၤ တၢ်အိၣ်ဖှိၣ် အတၢ်မၤမိၢ်ပှၢ် အိၣ်၀ဲခံခါလၢ အမ့ၢ်၀ဲ, တၢ်စိၢ်ဘျဲးကိၣ် (တၢ်အီၣ်ဘူၣ် စီဆှံ) ဒီး တၢ်စံၣ်တဲၤတဲလီၤတၢ် (တၢ်ကစီၣ်) သ့ၣ်တဖၣ်န့ၣ်လီၤ. အါန့ၢ်အန့ၣ်, စီၤလူၤကၣ် ထၢနုာ်ဃုာ်ဒီး ရိမ့ၤအသနူ, ဒီး ယူဒၤအသနူလၢ တၢ်ဂံၢ်မုၢ်နံၤမုၢ်သီ အပူၤ န့ၣ်လီၤ. ယူဒၤ အတၢ်ဂံၢ်မုၢ်နံၤမုၢ်သီမ့ၢ်၀ဲ မုၢ်လီၤနုာ်ဆူ အဂၤတနံၤ မုၢ်လီၤ နုာ်န့ၣ်လီၤ. ဘၣ်ဆၣ် စီၤလူၤကၣ် သူ၀ဲ ပှၤရိမ့ၤဖိအသနူလၢ အမ့ၢ် ဖးဖီမုၢ် တုၤ ဖးဖီမုၢ် န့ၣ်လီၤ (လူၤကၣ် ၁၁း၅, မၤတၢ် ၁၆း၂၅, ၂၀း၇, ၂၇း၂၇). ပကသ့ၣ်ညါဘၣ်ပ၀ဲလၢ စီၤလူၤကၣ် တသူထဲ ပှၤယူဒၤဖိတဖၣ် အသနူ န့ၣ်ဘၣ်.
မုၢ်အိၣ်ဘှံးအနံၤ မ့ၢ်ဘၣ်တၢ်ပာ်စီဆှံအီၤ သပှၢ်ကတၢၢ်န့ၣ်, ဘၣ်မနုၤ ပှၤဘၣ်သူ ပှၤတခီဘီမုၢ်ဖိ အသနူလဲၣ်.
"ဒီးလၢတၢ်ထၢဖှိၣ်လၢ ပှၤစီဆှံတဖၣ်အဂီၢ်အဂ့ၢ်န့ၣ်,ဒ်ယမၤလိာ်တၢ်အိၣ်ဖှိၣ်တဖၣ် အိၣ်ဝဲလၢကလၤတံအ သိးန့ၣ်, မၤသုဝဲဒ်န့ၣ်သိးတက့ၢ်. ဒီးတုၤယဟဲ,ဒ်သိးတၢ်ထၢဖှိၣ်အလီၢ်သုတအိၣ်တဂ့ၤဒီး, နွံနံၤအကျါ,မုၢ်ခီၣ်ထံးအနံၤ, မ်ပှၤပာ်ဖှိၣ်ပာ်တၢ်,လၢတၢ်ပာ်ဖှိၣ်အလီၢ်, ဖဲအဒိးန့ၢ်ဘၣ်တၢ်ဘျုးတၢ်ဖှိၣ်အသိး,ကိးဂၤဒဲး တက့ၢ်." (၁ကရံၣ်သူး ၁၆း၁-၂).
လံာ်စီဆှံတဆၢအံၤ အပူၤပကထံၣ်ဘၣ်လၢ စီၤပီလူး မၤလိာ် တၢ်အိၣ်ဖှိၣ်တဖၣ် ကအိၣ်ဖှိၣ်ဘါသကိးယွၤ လၢ မုၢ်ထီၣ်ထံး အနံၤကိးနွံဒဲး, ဒီးထၢဖှိၣ် ပာ်စ့မၤဘူၣ် န့ၣ်လီၤ. အဃိ, တၢ်ဆၢကတီၢ်လၢ တၢ်အိၣ်ဖှိၣ် ကထံၣ်ဖှိၣ်လိာ်သး အဂီၢ်မ့ၢ် မုၢ်ခီၣ်ထံးနံၤ, ဒီးမ့ၢ်မုၢ်နံၤတနံၤလၢ တၢ်အိၣ်ဖှိၣ်လၢ ကလၤတံ အပူၤတဖၣ် ကဘၣ်ထၢ စ့မၤဘူၣ်န့ၣ်လီၤ. အ၀ဲအံၤ မ့ၢ်မုၢ် နံၤတနံၤလၢ တၢ်အိၣ်ဖှိၣ်အဆၢကတီၢ် ဖဲန့ၣ်ပာ်ပနီၣ်၀ဲန့ၣ်ဧါ. ဆၢတဲာ်ဒၣ်နဲ တက့ၢ်.
"ယအိၣ်လၢသးအပူၤလၢ ကစၢ်အမုၢ်တနံၤ, ဒီးယနၢ်ဟူတၢ်ကလုၢ်သီၣ်ဖးဒိၣ်လၢယချၢဃံဒ်ကွဲၤသီၣ်အသိး, ဒီးစံးဝဲဒၣ်,တၢ်လၢနထံၣ်,ကွဲးလၢလံာ်ပူၤ,ဒီးဟ့ၣ်ယုၢ်ဆူတၢ်အိၣ်ဖှိၣ်နွံပူၤ,ဆူအ့းဖ့းစူး,ဒီးစမူရနၤ, ဒီးပ့ၢ်ကမူး,ဒီးသူၤအတံရၤ,ဒီးစၢ်ဒံ, ဒီးဖံၤလဒ့းလဖံ, ဒီးလီၤဒံၤကံတက့ၢ်." (တၢ်လီၢ်ဖျါ ၁း၁၀-၁၁).
တၢ်အိၣ်ဖှိၣ်လၢ ခံယၤဖှိၣ် အနံၣ်တဖၣ် ပာ်ပနီၣ် ကစၢ်အမုၢ်တနံၤ လၢ မုၢ်ခီၣ်ထံးနံၤန့ၣ်လီၤ. အစိၤဆၢကတီၢ်ခဲအံၤ စ့ၢ်ကီး, တၢ်အိၣ်ဖှိၣ်အါဒၣ် တက့ၢ် ပာ်ပနီၣ် ကစၢ်အမုၢ်တနံၤလၢ မုၢ်ခီၣ်ထံးနံၤ စ့ၢ်ကီးန့ၣ်လီၤ. ပဘါယွၤလၢ မုၢ်နံၤလၢ ပအဲၣ်ဒိးဘါ အီၤသ့၀ဲန့ၣ်လီၤ. ပတၢ်ခွဲးတၢ်ယာ်အိၣ်လၢလၢ ပှဲၤပှဲၤ လၢယ့ၣ်ရှူးခရံာ်အပူၤန့ၣ်လီၤ. ပတအိၣ်လၢ စီၤမိၤရှ့ အတၢ်သိၣ်တၢ်သီအဖီလာ်ဘၣ်. ပမ့ၢ်ပှၤသဘျ့လၢ ကစၢ်ခရံာ်အပူၤ န့ၣ်လီၤ.
တၢ်ကတိၤလၢခံ, မုၢ်ခီၣ်ထံးနံၤ မ့ၢ်မုၢ်နံၤတနံၤလၢ ကစၢ်ခရံာ်ဂဲၤဆၢ ထၢၣ်လၢတၢ်သံ န့ၣ်လီၤ. ပှၤယူဒၤဖိလၢ အထီဒါ ကစၢ်ခရံာ်တဖၣ် ဆဲးဘါဒံးတၢ်လၢ မုၢ်အိၣ်ဘှံးနံၤလၢ အမ့ၢ်မုၢ်နွံနံၤ တနံၤန့ၣ်လီၤ. မ့မ့ၢ် ပှၤခရံာ်ဖိတခီ, မၤလၤကပီၤ ကစၢ် ယ့ၣ်ရှူးခရံာ်အတၢ်ဂဲၤဆၢထၢၣ် သမူထီၣ်က့ၤ အမုၢ်နံၤ သတးဒီး, အိၣ်ဖှိၣ်ရိဖှိၣ် ဒီးဘါထီၣ်ယွၤလၢ မုၢ်ခီၣ်ထံး ကတၢၢ် တနံၤန့ၣ်လီၤ.
ဟံးန့ၢ်ကွဲးကျိာ်ထံက့ၤတၢ်ကွဲးလၢ CARM အပူၤန့ၣ်လီၤ.
 ဧါ){kind=link}
0 Comments