ဘူၣ်ဘျီၣ် (Synagogue)

ဘူၣ်ဘျီၣ်အခီၣ်ထံးခီၣ်ဘိ ကဲထီၣ်အသးဒ်လဲၣ်န့ၣ် တၢ်တသ့ၣ်ညါအီၤ လီၤတံၢ်လီၤဆဲးဘၣ်, ဘၣ်ဆၣ် ပှၤကူၣ်ဘၣ်ကူၣ်သ့ တဖၣ် နာ်လၢ ဘူၣ်ဘျီၣ်အံၤ ဟဲကဲထီၣ်အသးလၢ တၢ်မၢကဲကုၢ် အဆၢကတီၢ် န့ၣ်လီၤ. တၢ်ဂ့ၢ်လၢ ဘူၣ်ဘျီၣ် အတၢ်ကဲထီၣ် အသးမ့ၢ်၀ဲ, ပှၤယူဒၤဖိ လၢ အအိၣ်လၢ ယရူၤရှလ့ၣ် အချၢတဖၣ် လိၣ်ဘၣ် တၢ်ခွဲးတၢ်ယာ် လၢ ကဘါသကိး တၢ်ဒ်သိးသိး လၢ တၢ်လီၢ်တတီၤဃီ အဂီၢ် န့ၣ်လီၤ. မ့ၢ်လၢ တၢ်အိၣ်အသးဒီး တၢ်သိၣ်တၢ်သီ တဟ့ၣ်အခွဲး ဘၣ် အဃိ, တၢ်တဘၣ် ဘှီထီၣ် တၢ်လုၢ်ဟံၣ်လၢ တၢ်လီၢ်အဂၤ ဘၣ်. အဃိ, ပှၤယူဒၤဖိလၢ အအိၣ်လၢ တၢ်လီၢ်အဂၤ တဖၣ် မၤတၢ်လုၢ်ဟံၣ် အတၢ်ဖံးတၢ်မၤ တဖၣ် တသ့တညီ၀ဲဘၣ်. တကးဒံးဘၣ်, ယူဒၤ အတၢ်ဘါန့ၣ် မ့ၢ်တၢ်ဘါလၢ အဘၣ်ဃးဒီး လံာ်တၢ်သိၣ်တၢ်သီ န့ၣ်လီၤ. တၢ်မၤထွဲ တၢ်သိၣ်တၢ်သီ န့ၣ် ဒုးအိၣ်ထီၣ် တၢ်သ့ၣ်ညါ ဒီး တၢ်နၢ်ပၢၢ် တၢ်သိၣ် တၢ်သီ အါထီၣ်၀ဲန့ၣ်လီၤ. အဃိ, တၢ်လီၢ်လိၣ်၀ဲဒၣ်လၢ တၢ်ကမၤလိ တၢ်သိၣ် တၢ်သီအဂီၢ် န့ၣ်လီၤ. တၢ်ဘူၣ် တၢ်ဘါ လၢ ဘူၣ်ဘျီၣ်ပူၤ အတၢ်ကွၢ်စိ န့ၣ် မ့ၢ်လၢ တၢ်သိၣ်လိ အဂီၢ်န့ၣ်လီၤ. တၢ်ဘူၣ်တၢ်ဘါ ခိၣ်နၢ် လၢ ဘူၣ်ဘျီၣ်ပူၤ န့ၣ်မ့ၢ် ပှၤကွဲးလံာ် ဒီး ရၤဘံ တဖၣ်န့ၣ်လီၤ. သနာ်က့, ပှၤလုၢ်တၢ်အဒိၣ် စ့ၢ်ကီး အိၣ်ဒီး မူဒါ လၢ တၢ်သိၣ်လိသီလိ တကပၤ န့ၣ်လီၤ. လၢတၢ်လုၢ် ထီၣ်ပာ်ထီၣ်အလီၢ်, တၢ်သူက့ၤ တၢ်ထုကဖၣ် လၢ တၢ်ဘူၣ်တၢ်ဘါ အပူၤ န့ၣ်လီၤ.

ဘူၣ်ဘျီၣ်ပူၤန့ၣ် အိၣ်ဒီး တၢ်မၤလိ တၢ်သိၣ်တၢ်သီ ဒီး တၢ်ဘူၣ်ထီၣ်ဘါထီၣ် န့ၣ်လီၤ. တၢ်ဘူၣ်ထီၣ်ဘါထီၣ်အပူၤ ပၣ်ဃုာ် ဒီး တၢ်ထုကဖၣ်, တၢ်ဖးလံာ်စီဆှံ လၢ လံာ်တၢ်သိၣ်တၢ်သီ အပူၤ ဒီး လၢ လံာ်၀ံတဖၣ် အပူၤ, တၢ်သး၀ံၣ် ထါစံးထီၣ် ပတြၢၤ တဖၣ်, ဒီး တၢ်ကျိာ်က့ၤ ၀ံတဖၣ် အတၢ်ကစီၣ် န့ၣ်လီၤ. တၢ်ထုကဖၣ် န့ၣ် ဘၣ်တၢ်မၤအီၤ တနံၤ သၢဘျီ လၢဘူၣ်ဘျီၣ် အပူၤန့ၣ်လီၤ.

ဘူၣ်ဘျီၣ်တၢ်ကရၢကရိ န့ၣ် ကဘၣ်အိၣ်ဒီး ပှၤမၤသကိး တၢ်ဖိ အစှၤကတၢၢ် အဂၤတဆံ န့ၣ်လီၤ. ပှၤသူၣ်က့သးပှၢ် ကရူၢ်တဖု အိၣ်ဒီး တၢ်စိတၢ်ကမီၤ လၢ တၢ်ဘူၣ်တၢ်ဘါ ဒီး ထံရူၢ်ကီၢ်သဲး ခံမံၤလၢာ် အဖီခိၣ် န့ၣ်လီၤ. အ၀ဲသ့ၣ် အိၣ်ဒီး တၢ်စိတၢ်ကမီၤလၢ ကနီၣ်ဟးထီၣ် ကွံာ်ပှၤလၢ ဘူၣ်ဘျီၣ် အပူၤန့ၣ်လီၤ. လၢအ၀ဲသ့ၣ် အကျါ, ပှၤစှၤဂၤ ဘၣ်တၢ် ဟ့ၣ်အီၤ မူဒါလီၤဆီ လၢတၢ်ဂ့ၢ်လီၤဆီ အဂီၢ် န့ၣ်လီၤ. ဘူၣ်ဘျီၣ်ခိၣ်န့ၣ် ဘၣ်တၢ်ဃုထၢ အီၤလၢ ကမၤတၢ် တနံၣ်အဂီၢ်, လၢကပၢ ဆှၢ တၢ်ဘူၣ်တၢ်ဘါ အဂီၢ်န့ၣ်လီၤ. အ၀ဲဟ့ၣ်မူဟ့ၣ်ဒါ တဆီဆူ ပှၤလၢ ကဘၣ်ဖး ထီၣ်လံာ်စီဆှံ, လၢကဘါထု ကဖၣ်, ဒီး လၢကစံၣ်တဲၤတဲလီၤ တၢ် အအိၣ်န့ၣ်လီၤ. တၢ်ဃုထၢစ့ၢ်ကီး ပှၤပၢဆှၢ တၢ်တဂၤ လၢကကတီၤ တၢ်သူၣ်ထီၣ် လၢ တၢ်ဘူၣ်တၢ်ဘါ အဂီၢ်, လၢကကိးဖှိၣ် ပှၤကညီခီဖျိ အူထီၣ်ကွဲၤ လၢဘူၣ်ဘျီၣ်ဖီခိၣ်, ဒီး လၢကဟဲစိာ် လံာ်ထူလၢ တၢ်ဘူၣ်တၢ်ဘါအဂီၢ်, ဒီးကက့ၤစိာ် က့ၤ၀ဲ အဂီၢ် န့ၣ်လီၤ. တကးဒံးဘၣ်, ပှၤပိာ်ခွါ တဖၣ် ဘၣ်တၢ်ဃုထၢအီၤ လၢ ကဘါ ထုကဖၣ်တၢ်, ဒီးကထၢ တိၢ်မၤဘူၣ် န့ၣ်လီၤ.

ဘူၣ်ဘျီၣ်တဖၣ် ရၤလီၤအသးလၢ ရိမ့ၤ အဘီအမုၢ်အပူၤ ဖဲ တၢ်လီၢ်လၢ ပှၤယူဒၤဖိ တဖၣ် အိၣ်၀ဲအလီၢ် န့ၣ်လီၤ. ဖဲကစၢ်ခရံာ် အစိၤန့ၣ်, ယူဒၤ အ၀့ၢ်ကိး၀့ၢ်ဒဲး အိၣ်ဒီး အဘူၣ်ဘျီၣ်ဒၣ်၀ဲ စုာ်စုာ် န့ၣ်လီၤ.