လံာ်တၢ်လီၣ်ဖျါ အယွၤဂ့ၢ်ပီညါ အတၢ်ဂ့ၢ်လီၢ်ခံ ဘၣ်တၢ်စံးကတိၤအီၤ သ့ကျဲတဘျုးဘိ န့ၣ်လီၤ. ဘၣ်ဆၣ်လၢ တၢ်မၤလိ အံၤအပူၤ ပကကွၢ်အီၤထဲ ကျဲသၢဘိ လၢအမ့ၢ်, တၢ, လံာ်စီဆှံ တၢ်နာ်အတၢ်သိၣ်လိ ဘၣ်ဃး မုၢ်နံၤခံကတၢၢ်ဂ့ၢ်ပီညါ (Eschatology)(မ့) "မုၢ်နံၤလၢခံကတၢၢ်တဖၣ်", ခံ, ဘၣ်ဃး တၢ်အၢၣ်လီၤအီလီၤ (Covenant), သၢ, လံာ်စီဆှံအပူၤ ၀ံတဖၣ် အမူအဒါ န့ၣ်လီၤ. အခဲအံၤ ပကကွၢ်သကိး တၢ်နာ်အတၢ်သိၣ်လိ ဘၣ်ဃး မုၢ်နံၤခံကတၢၢ်ဂ့ၢ်ပီညါ န့ၣ်တက့ၢ်.
မုၢ်နံၤခံကတၢၢ်ဂ့ၢ်ပီညါ (Eschatology)
ဖဲစီၤယိၤဟၣ်အစိၤ, တၢ်အိၣ်ဖှိၣ်တဖၣ် ဘၣ်လဲၤခီဖျိ တၢ်ဖ့ၣ်စၢ ဒိၣ်ဒိၣ်အါအါ မ့ၢ်လၢ ကစၢ်ခရံာ်တဟဲက့ၤ ဒံးဘၣ်ဒီး တမၤ၀ံၤက့ၤ အတၢ်မၤဒံးဘၣ် အဃိန့ၣ်လီၤ. ဖဲကစၢ်ခရံာ် ဖံးတၢ်မၤတၢ်သီသီအခါ, ကစၢ်ခရံာ်စးထီၣ် ဟဲစိာ်တၢ်အုၣ်က့ၤ ခီၣ်က့ၤလၢ ပှၤကိးကလုာ်ဒဲး အဂီၢ်, ဒ်သိးကဒုးအိၣ်ထီၣ် ယွၤအဘီအမုၢ်လၢ ဟီၣ်ခိၣ်ချၢ အဂီၢ်န့ၣ်လီၤ. ဘၣ်ဆၣ် ဖဲ စီၤယိၤဟၣ် ကွဲးလံာ်တၢ်လီၣ်ဖျါအဆၢကတီၢ်, ကစၢ်ခရံာ်က့ၤထီၣ်ဆူ မူခိၣ်န့ၢ်လံ ယၤဖှိၣ်နံၣ်တ၀ာ်လံ, အဃိ ပှၤခရံာ်ဖိ တနီၤစးထီၣ် ကမၢကမၣ်လၢ မ့ၢ်ကစၢ်ခရံာ် ဘၣ်ကဟဲက့ၤဒံးဧါ. လၢတၢ်န့ၣ်အဃိ, တၢ်ဂ့ၢ်တခါလၢ စီၤယိၤဟၣ် ကွဲးလံာ်အံၤ မ့ၢ်ဒ်သိး ကမၤလီၤတံၢ် ပှၤဖးလံာ်ဖိတဖၣ်လၢ ကစၢ်ခရံာ်ဂုာ်ကျဲးစၢး မၤတၢ် ဒ်သိးအကသူၣ်ထီၣ် အဘီအမုၢ်, ဒီး ကဟဲက့ၤ၀ဲ သပှၢ်တၢၢ် ဒ်သိးကမၤလၢပှဲၤ လံာ်စီဆှံ အတၢ်အၢၣ်လီၤကိးခါဒဲး လၢအဘၣ်ဃးဒီးအီၤ န့ၣ်လီၤ. ပမ့ၢ်ဘၣ်တဲ လၢတၢ်ကတိၤအဂၤန့ၣ်, စီၤယိၤဟၣ်ကွဲးလံာ်အံၤ မ့ၢ်ဒ်သိးကရှဲပၠး လံာ်စီဆှံ အတၢ်နာ်တၢ်သိၣ်လိ ဘၣ်ဃး မုၢ်နံၤခံကတၢၢ် ဂ့ၢ်ပီညါ, လၢအမ့ၢ် လံာ်စီဆှံတၢ်သိၣ်လိဘၣ်ဃး တၢ်ကမၤအသးတဖၣ် လၢ မုၢ်နံၤခံကတၢၢ် အစိၤန့ၣ်လီၤ.တၢ်ကတိၤ "မုၢ်နံၤခံကတၢၢ် ဂ့ၢ်ပီညါ" (Eschatology) အခီပညီ မ့ၢ် "တၢ်မၤလိဘၣ်ဃး တၢ်ဆၢကတီၢ်လၢ မုၢ်နံၤခံ ကတၢၢ်" န့ၣ်လီၤ. လံာ်ဖျၢၣ်အံၤ ဟဲလၢ ဟ့းလ့ၣ်ကျိာ် "အဲးစ်ခၤထိး" (eschatos) လၢအခီပညီမ့ၢ် "လီၢ်ခံကတၢၢ်" န့ၣ်လီၤ. တၢ်ကတိၤ "မုၢ်နံၤခံကတၢၢ်ဂ့ၢ်ပီညါ" (Eschatology) မ့ၢ်လံာ်စီဆှံ အတၢ်သိၣ်လိ ဘၣ်ဃး ကစၢ်ခရံာ် အတၢ်ဟဲ ခံဘျီတဘျီ န့ၣ်လီၤ. ဘၣ်ဆၣ် ပှၤကူၣ်ဘၣ်ကူၣ်သ့ လၢစိၤခဲအံၤတဖၣ် သူတၢ်ကတိၤ Eschatology ဒ် တၢ်မၤလိ တၢ်ဆၢ ကတီၢ်ဒီကတီၢ်လၢ ကစၢ်ခရံာ် အတၢ်ဟဲတၢတဘျီ တုၤ ကစၢ်ခရံာ်အတၢ်ဟဲက့ၤကဒါက့ၤ တစု န့ၣ်လီၤ. Eschatology အတၢ်ထံၣ်လၢ အလဲၢ်ထီၣ်၀ဲအံၤ လီၤပလိာ်ဃုာ် အသးဒီး လံာ်စီဆှံအဆၢဖိ တဖၣ်ဒ်အမ့ၢ် ဧ့ၤဘြံၤ ၁း၂ ဒီး ၁ပ့းတရူး ၁း၂၀ လၢအတဲဘၣ်ဃး လံာ်စီဆှံ အသီတကတြူၢ် အစိၤ မ့ၢ်မုၢ်နံၤခံကတၢၢ် အစိၤန့ၣ်လီၤ.
ဒ်သိးပကသ့ၣ်ညါ ပှၤကွဲးလံာ်စီဆှံ အသီတကတြူၢ် တဖၣ် အတၢ်နၢ်ပၢၢ်ဘၣ်ဃး မုၢ်နံၤခံကတၢၢ် အဂ့ၢ်န့ၣ်, ပမ့ၢ်စးထီၣ်ဆိ အီၤလၢ လံာ်စီဆှံအလီၢ်လံၤတကတြူၢ် အတၢ်သိၣ်လိ တဖၣ် န့ၣ် ကမၤစၢၤပှၤ ဒိၣ်ဒိၣ်အါအါ န့ၣ်လီၤ. လံာ်စီဆှံ အလီၢ်လံၤ တကတြူၢ် အ၀ံတဖၣ် တဲဆိတ့ၢ်၀ဲလၢ မ့ၤရှံအၤ မ့တမ့ၢ် ခရံာ် ကမၤကတၢၢ်ကွံာ် တခီဘီမုၢ်အတၢ်ပၢလၢ အအၢအသီ, ဒီး ကသူၣ်ထီၣ် ကစၢ်ယွၤအဘီအမုၢ် လၢဟီၣ်ခိၣ်အံၤ န့ၣ်လီၤ.
လံာ်ဒၤနံၤယ့လး ၂း၄၄ စံး၀ဲ -
ဒီးတၢ်လၢ စီၤပၤ တဖၣ်န့ၣ် အမုၢ်နံၤ အတီၢ်ပူၤ, မူခိၣ်အကစၢ် ကပာ်လီၤ ဘီမုၢ်တဘီမုၢ် လၢအတဟးဂီၤ ဘၣ် လီၤထူလီၤယိာ်ဘၣ်. ဒီးဘီမုၢ်န့ၣ် တအိၣ်လီၤတဲာ်ဘၣ်လၢ ပှၤ အဂၤတကလုာ်အဂီၢ် ဘၣ်. ကမၤလီၤကလဲ, ဒီးကမၤ လၢာ်ကွံာ် ဘီမုၢ်ခဲလၢာ် လီၤ. မ့မ့ၢ်အ၀ဲန့ၣ် ကအိၣ်လီၤထူ လီၤယိာ်လီၤ.လံာ်စီဆှံအဆၢအံၤ သိၣ်လိပှၤလၢ ကစၢ်ယွၤအဘီအမုၢ် ကမၤဟးဂီၤကွံာ် ဘီမုၢ်တဖၣ် ဒီး အပှၤပၢတၢ်တဖၣ် ဒ်သိး ကသူၣ်ထီၣ် ကစၢ်ယွၤ အတၢ်ပၢလၢ အကတၢၢ်တသ့ လၢဟီၣ်ခိၣ်ချၢ ဒီတဘ့ၣ်ညါအံၤ အပူၤန့ၣ်လီၤ. ဒီးလၢ လံာ်ဒၤနံၤယ့လး ၇း၁၃-၁၄ အပူၤ, ၀ံဒၤနံၤယ့လး စံးအါထီၣ်၀ဲလၢ ဘီမုၢ်အ၀ဲအံၤ ကဟဲခီဖျိ ပှၤကညီအဖိခွါ အတၢ်ဖံးတၢ်မၤ, လၢဘၣ်တၢ်သ့ၣ်ညါအီၤလၢ မ့ၤရှံအၤ မ့တမ့ၢ် ခရံာ် န့ၣ်လီၤ.
၀ံအတၢ်စံးပာ် ဒ် လံာ်ဒၤနံၤယ့လး အပူၤတဖၣ် ဆှၢ ယူဒၤ အပှၤကူၣ်ဘၣ်ကူၣ်သ့ လၢယွၤဂ့ၢ်ပီညါ တကပၤ လၢတၢယၤဖှိၣ် နံၣ်အပူၤတဖၣ် လၢကဒီၣ်ဖး တၢ်စံၣ်စိၤတဲစိၤ လၢစိၤဖးဒိၣ်ခံစိၤ, စိၤလၢအပှဲၤဒီးတၢ်ဒဲးဘး, တၢ်တူၢ်ဘၣ်ခီၣ်ဘၣ် ဒီး တၢ်သံတၢ်ပှၢ်, ဒီးစိၤလၢကဟဲဆူညါ, ဖဲကစၢ်ယွၤ ကမၤဟးဂီၤကွံာ် အဒုၣ်အဒါ ခဲလၢာ်, ဒီး ဆိၣ်ဂ့ၤ အပှၤဂီၢ်မုၢ် ထီဘိ န့ၣ်လီၤ.
စီၤဒၤနံၤယ့လး အစိၤ၀ံၤ ယၤဖှိၣ်နံၣ်တဖၣ် အဆၢကတီၢ်, ပှၤအံၣ်စရ့လးဖိ တဖၣ် ဂုာ်ကျဲးစၢး ထီဒါ တခီဘီမုၢ်ဖိတဖၣ် အဘီအမုၢ် ဒီး အပှၤပၢတၢ် တဖၣ်န့ၣ်လီၤ. ယူဒၤ အပှၤကူၣ်ဘၣ်ကူၣ်သ့ တဖၣ် အိၣ်ဒီး တၢ်မုၢ်လၢ်အါထီၣ်လၢ မ့ၤရှံအၤ ကဟဲ ဒီး ကမၤကတၢၢ်ကွံာ် တၢ်တူၢ်ဘၣ်ခီၣ်ဘၣ် တဖၣ်အံၤ ဒီး ကဟ့ၣ်အ၀ဲသ့ၣ်လၢ စိၤလၢအကဟဲ အတၢ်မုာ် တၢ်ခုၣ် န့ၣ်လီၤ.
ယ့ၣ်ရှူးအနီၢ်ကစၢ်ဒၣ်၀ဲ လၢအတၢ်စံၣ်တဲၤတဲလီၤအပူၤ ဒိးသန့ၤ အသးဒီး တၢ်စံၣ်စိၤတဲစိၤ အတၢ်ထံၣ်ဘၣ်ဃး စိၤခံစိၤအဂ့ၢ် တလီၢ်လီၢ် န့ၣ်လီၤ. အဒိ, အ၀ဲကတိၤဘၣ်ဃး စိၤခဲအံၤ ဒီးစိၤလၢကဟဲ အဂ့ၢ်အံၤ ဖျါလၢ လံာ်မးသဲ ၁၂း၃၂, မၢ်ကူး ၁၀း၂၉-၃၀, ဒီးလူၤကၣ် ၂၀း၃၄-၃၅ အပူၤန့ၣ်လီၤ. ဘၣ်ဆၣ် ယ့ၣ်ရှူး ဟ့ၣ်ထီၣ် တၢ်ထံၣ်အသီ တခါ ဘၣ်ဃး စိၤခံစိၤ န့ၣ်လီၤ. ဘၣ်ဃး စိၤလၢကဟဲန့ၣ်, ကစၢ်ယ့ၣ်ရှူးခရံာ်စံး၀ဲလၢ အကမ့ၢ် တၢ်လၢကမၤအသးလၢ ခါဆူညါ န့ၣ်လီၤ. ဘၣ်ဆၣ်, အ၀ဲကတိၤဘၣ်ဃး ယွၤအဘီအမုၢ် ဟဲလၢ အ၀ဲအမုၢ်နံၤ တဖၣ်အပူၤ န့ၣ်လီၤ. ပမ့ၢ်တဲလၢ တၢ်ကတိၤအဂၤန့ၣ်, အ၀ဲသိၣ်လိ၀ဲလၢ ဖဲအ၀ဲအစိၤန့ၣ်, တၢ်စံၣ်စိၤတဲစိၤ အစိၤခံစိၤအံၤ စးထီၣ် ဒီကထၢလိာ်သး န့ၣ်လီၤ. စိၤလၢအကဟဲ စးထီၣ်မၤအသး ဖဲ စိၤခဲအံၤ တကတၢၢ်ဒံးဘၣ်အခါ န့ၣ်လီၤ. ပှၤနာ်တၢ်ဖိတဖၣ် အခဲအံၤ အိၣ်လၢ ကစၢ်ယွၤအဘီအမုၢ် အပူၤလံ, ဒီးသးခုလၢ ယွအဘီအမုၢ်အတၢ်ဆိၣ်ဂ့ၤဆိၣ်၀ါ တဖၣ်အပူၤလံ.
ပကဒိကနၣ်ကွၢ် ယ့ၣ်ရှူးခရံာ် အတၢ်ကတိၤ ဖဲ မးသဲ ၁၂း၂၈ တက့ၢ်.
မ့မ့ၢ်ယဲဒၣ်အံၤ, ယမ့ၢ်ဟီထီၣ်ကွံာ် တၢ်နါလၢယွၤ အသးဒီး, ယွၤအဘီအမုၢ် န့ၣ်တုၤ သပှၢ်တၢၢ်လံလၢ သုအိၣ်လံ. (မးသဲ ၁၂း၂၈).ကစၢ်ခရံာ် မၤနၢၤတၢ်နါ အစိၤကမီၤ န့ၣ်အုၣ်အသးလၢ အ၀ဲစးထီၣ်သူၣ်ထီၣ် ကစၢ်ယွၤအဘီအမုၢ် လၢဟီၣ်ခိၣ်ချၢ အံၤလံ န့ၣ်လီၤ.
ဖဲကစၢ်ခရံာ် မၤတၢ်လၢဟီၣ်ခိၣ်ချၢအံၤ အခါ, လၢအဒုၣ်အဒါ အဂီၢ်မ့ၢ်တၢ်အရှူ လၢအလီၢ်ခံကတၢၢ် တပတီၢ် လံ, ဒီးလၢပှၤနာ်တၢ်ဖိတဖၣ် အဂီၢ်မ့ၢ် တၢ်ဆိၣ်ဂ့ၤ လၢအလီၢ်ခံကတၢၢ် တပတီၢ်လံ န့ၣ်လီၤ. အဘီအမုၢ် ဟဲနုာ်လီၤလၢ စိၤလၢအအၢ အံၤအပူၤလံ န့ၣ်လီၤ. ယွၤအဘီအမုၢ် မၤပူၤဖျဲး ပှၤနာ်တၢ်ဖိတဖၣ် ဒီးမၤလီၤတံၢ် န့ၢ်တၢ်ဆိၣ်ဂ့ၤဆိၣ်၀ါ လၢကဟဲလၢ ခါဆူညါ န့ၣ်လီၤ. မးသဲ ၁၂း၂၈ တဲ၀ဲအသိး, တၢ်မၤပူၤဖျဲးအံၤ စးထီၣ်အသးလၢ ကစၢ်ခရံာ်အစိၤအဆၢကတီၢ် လံန့ၣ်လီၤ. တၢ်ဂ့ၢ်မိၢ်ပှၢ်တခါအံၤ ပကထံၣ်န့ၢ်စ့ၢ်ကီးလၢ လူၤကၣ် ၁၆း၁၆, လူၤကၣ် ၁၇း၂၀-၂၁, ဒီး ယိၤဟၣ် ၃း၃ အပူၤ န့ၣ်လီၤ. အခဲအံၤ အဘီအမုၢ် ဆဲးဒိၣ်ထီၣ်ဒံး, ဒ်ပထံၣ်ဘၣ်လၢ မးသဲ ၁၃း၂၄-၃၀, ဒီးအဆၢဖိ ၃၆-၄၃, ဒီးလူၤကၣ် ၁၉း၁၁-၂၇ အသိးလီၤ. ဒီးဘီမုၢ်အံၤ ကလၢထီၣ်ပှဲၤထီၣ် လၢခါဆူညါ အပူၤ, ဖဲကစၢ်ခရံာ်ကဟဲကဒါက့ၤ အဆၢကတီၢ်, ဒ်ကစၢ်ခရံာ်သိၣ်လိ ပှၤလၢ လံာ်မးသဲ ၁၆း၂၇-၂၈, ၂၄း၄၄-၅၁, ဒီး ၂၅း၃၁-၄၆ အပူၤအသိးန့ၣ်လီၤ.
မုၢ်နံၤခံကတၢၢ်ဂ့ၢ်ပီညါ အတၢ်ထံၣ်ဘၣ်ဃး စိၤခံစိၤအံၤ စီၤပီလူးအုၣ်အသး ဘၣ်ဃးအဂ့ၢ် လၢ အတၢ်ကွဲးတဖၣ် အပူၤ လီၤ. စီၤပီလူးစံး၀ဲလၢ, တၢ်ဒဲးဘးဒီး တၢ်သံ အစိၤခဲအံၤ အိၣ်ဒံး၀ဲ န့ၣ်လီၤ. အဒိ, အ၀ဲစံးလၢ မုၣ်ကီၤလံၢ်မ့ၢ် "စိၤခဲအံၤ အကစၢ်" (၂ကရံၣ်သူး ၄း၄) န့ၣ်လီၤ. ဒီးအ၀ဲကတိၤတၢ်ဘၣ်ဃး ပှၤအံၤတဃၣ်ဖိ အပှၤကူၣ်ဘၣ်ကူၣ်သ့ တဖၣ်ဒ် "စိၤခဲအံၤ အပှၤကူၣ်ဘၣ်ကူၣ်သ့တဖၣ်" လၢ ၁ကရံၣ်သူး ၁း၂၀ အပူၤန့ၣ်လီၤ. အါန့ၢ်အန့ၣ်, စီၤပီလူးသူ တၢ်ကတိၤ "စိၤလၢ ကဟဲ" န့ၣ်မ့ၢ် ခါဆူညါအစိၤ ဖဲ တၢ်စံၣ်ညီၣ်လၢခံကတၢၢ် ဒီး တၢ်ဆိၣ်ဂ့ၤတဖၣ် ကဟဲဆူ ပှၤကညီအအိၣ် န့ၣ်လီၤ. ပထံၣ်အီၤ သ့၀ဲဖဲ အ့းဖ့းစူး ၂း၇, ဒီး ၁တံၤမသ့း ၆း၁၉ အပူၤလီၤ. ဒီးအ၀ဲထိၣ်သတြီၤ စိၤခံစိၤလၢာ်လၢ အ့းဖ့းစူး ၁း၂၁ အပူၤန့ၣ်လီၤ.
ဘၣ်ဆၣ်, စီၤပီလူး စံးစ့ၢ်ကီး၀ဲလၢ စိၤလၢကဟဲ စးထီၣ်အသးတနီၤလံ န့ၣ်လီၤ. အဒိ, ၁ကရံၣ်သူး ၁၀း၁၁ အပူၤ စီၤပီလူးကွဲး၀ဲ စိၤတဖၣ် အံၤလၢထီၣ်ပှဲၤထီၣ်လၢ ကစၢ်ခရံာ်အပူၤလံ. ဖဲ ကလီးစဲ ၁း၁၃-၁၄ အပူၤ အ၀ဲစံးလၢ ပှၤနာ်တၢ်ဖိတဖၣ် ဘၣ်တၢ်ဟဲစိာ်အီၤလၢ ခရံာ်အဘီအမုၢ် အပူၤလံန့ၣ်လီၤ.
မုၢ်နံၤခံကတၢၢ်ဂ့ၢ်ပီညါ လၢ ကစၢ်ခရံာ်ဒီး စီၤပီလူး တဲလၢအဂ့ၢ်န့ၣ် ဘၣ်တၢ်ကိးအီၤလၢ "မုၢ်နံၤခံကတၢၢ်ဂ့ၢ်ပီညါလၢ အမၤအသးခဲအံၤ" (inaugurated eschatology), မ့ၢ်လၢ စံး၀ဲလၢ နံၣ်လၢကဟဲ စးထီၣ်သး အခဲအံၤလံ, စးထီၣ် မၤအသးလံ ဘၣ်ဆၣ် တတုၤလၢတၢ်လၢတၢ်ပှဲၤ ဒံးဘၣ်. ကစၢ်ခရံာ်ဒုးအိၣ်ထီၣ် ကစၢ်ယွၤအဘီအမုၢ် ဖဲအဟဲလီၤ အခီၣ်ထံးတဘျီအဆၢကတီၢ်လံ, ဘၣ်ဆၣ် အတမၤဟးဂီၤကွံာ် စိၤခဲအံၤ ဒံးဘၣ်. စးထီၣ်ဖဲန့ၣ်, စိၤခံစိၤ အိၣ်သဃဲၤလိာ် အသး န့ၣ်လီၤ. လၢတၢ်န့ၣ်အဃိ, ပှၤနာ်တၢ်ဖိတဖၣ် စးထီၣ်လဲၤခီဖျိဘၣ် စိၤလၢကဟဲ အတၢ်ဆိၣ်ဂ့ၤဆိၣ်၀ါ တနီၤလံ. ဘၣ်ဆၣ် ပတလဲၤခီဖျိ တၢ်ဆိၣ်ဂ့ၤဆိၣ်၀ါ လၢလၢပှဲၤပှဲၤ တုၤလၢ ကစၢ်ခရံာ်ဟဲခံဘျီတဘျီ တစု န့ၣ်ဘၣ်.
ယူဒၤ အမုၢ်နံၤခံကတၢၢ်ပီညါစံး၀ဲလၢ မ့ၤရှံအၤ ကဘၣ်မၤကတၢၢ်ကွံာ် စိၤခဲအံၤ အတၢ်ဒဲးဘး ဒီး အတၢ်သံ ဒီး ကဘၣ်ဒုးအိၣ်ထီၣ် စိၤလၢကဟဲ အတၢ်မုာ်တၢ်ခုၣ် န့ၣ်လီၤ. ဘၣ်ဆၣ်, ယ့ၣ်ရှူးတမၤ၀ဲဒ်န့ၣ်ဘၣ်. လၢတၢ်န့ၣ်အဃိ, ပှၤအါဂၤ ကမၢကမၣ်လၢ မ့ၢ်ယ့ၣ်ရှူး ဘၣ်ကမ့ၢ် မ့ၤရှံအၤဧါ. မ့ၢ်အဂ့ၢ်ဒ်န့ၣ်အဃိ, ပှၤကွဲးလံာ်စီဆှံ အသီတဖၣ် ဂုာ်ကျဲးစၢး ဒ်သိး ကရှဲပၠးလၢ ကစၢ်ယွၤအဘီအမုၢ်န့ၣ် ဟဲလၢအပတီၢ်ပတီၢ် န့ၣ်လီၤ. ဘၣ်ဆၣ် တၢ်ဆီတလဲအံၤ မ့ၢ်တၢ်လၢ အလီၤကမၢကမၣ် ဒိၣ်မးလီၤ. ကစၢ်ခရံာ် အတၢ်မၤတၢ်လီၤလး ဒီးအတၢ်အုၣ်အသး အိၣ်လၢ၀ဲပှဲၤ၀ဲ လၢကဒုးနဲၣ် အတၢ်ကတိၤတဖၣ် မ့ၢ်တၢ်မ့ၢ်တၢ်တီ, လၢအဘၣ်ဃး ယွၤအတၢ်အဲၣ်ဒိးလၢ ကဒုးအိၣ်ထီၣ် အဘီအမုၢ် လၢကျဲလၢ ပနၢ်တပၢၢ်ဘၣ် အပူၤ န့ၣ်လီၤ. ဖဲကစၢ်ခရံာ်ကဟဲက့ၤ ကဒါက့ၤန့ၣ်, စိၤအအၢအသီ အံၤ ကကတၢၢ်ကွံာ်၀ဲ, ဒီးစိၤလၢကဟဲ ကဖျါထီၣ် လၢလၢ ပှဲၤပှဲၤန့ၣ်လီၤ. ဘၣ်ဆၣ် တချုးတၢ်ဆၢကတီၢ်အ၀ဲန့ၣ် တုၤဃီၤဒံးဘၣ်န့ၣ်, စိၤခံစိၤ ကအိၣ်သဃဲၤဒံး၀ဲ အသးန့ၣ်လီၤ.
ဘၣ်ဆၣ်, ဘၣ်မနုၤ မုၢ်နံၤခံကတၢၢ်ဂ့ၢ်ပီညါ အတၢ်ထံၣ်အံၤ လုၢ်ဘၢစီၤယိၤဟၣ် လၢအတၢ်ကွဲး လံာ်တၢ်လီၣ်ဖျါ အံၤလဲၣ်. ဒီး ဘၣ်မနုၤ ယွၤဂ့ၢ်ပီညါ တခါအံၤ အရ့ဒိၣ် လၢအဂီၢ် ဒီး အပှၤဖးလံာ်တဖၣ်အဂီၢ်လဲၣ်.
ဖဲစီၤယိၤဟၣ်ကွဲးလံာ် တၢ်လီၣ်ဖျါ အဆၢကတီၢ်, တၢ်အိၣ်ဖှိၣ်လၢကီၢ်အၤစံ အပူၤတဖၣ် အိၣ်လၢ တၢ်ဂုာ်ကျဲးစၢး ပၢၤဃာ် အတၢ်စူၢ်တၢ်နာ် အပူၤန့ၣ်လီၤ. အ၀ဲသ့ၣ်နာ်လၢ ကစၢ်ယွၤ ပၢဆှၢ တၢ်စံၣ်စိၤတဲစိၤ, ဒီးကစၢ်ခရံာ်မၤနၢၤ စိၤခဲအံၤလၢ အအၢအသီလံ န့ၣ်လီၤ. ကစၢ်ခရံာ် မၤလၢပှဲၤ လံာ်စီဆှံအလီၢ်လံၤတကတြူၢ် အတၢ်မုၢ်လၢ် ခီဖျိ ဟဲမၤပူၤဖျဲး ပှၤလၢအနာ်အီၤ တဖၣ်န့ၣ်လီၤ.
ဘၣ်ဆၣ်သနာ်က့, တၢ်အိၣ်ဖှိၣ်လၢ ကီၢ်အၤစံ အပူၤတဖၣ် ဘၣ်သဂၢၢ်ဒီး တၢ်မ့ၢ်တၢ်တီလၢအမ့ၢ် တၢ်အၢတၢ်သီ အိၣ်ဒံးလၢ အ၀ဲသ့ၣ်အသိး အကျါဒံးန့ၣ်လီၤ. လၢတၢ်န့ၣ်အဃိ, အ၀ဲသ့ၣ် အိၣ်ဒီး တၢ်သံကွၢ်လၢ အကီအခဲတဖၣ်ဒ် "တၢ်အုၣ်က့ၤခီၣ်က့ၤ မ့ၢ်ဟဲခီဖျိလၢ ကစၢ်ခရံာ်န့ၣ်, ဘၣ်မနုၤ ပှၤခရံာ်ဖိတဖၣ် ဒိးဘၣ်တၢ်လ့ပစီလဲၣ်" "ကစၢ်ခရံာ်မ့ၢ်ပၢတၢ်န့ၣ်, ဘၣ်မနုၤ အ၀ဲတမၤပူၤဖျဲးပှၤ လၢပတၢ်တူၢ်ဘၣ်ခီၣ်ဘၣ် အပူၤလဲၣ်." "တၢ်မၤကွၢ်တဖၣ်အံၤ ကကတၢၢ်ဒ်လဲၣ်ဒီး အခါဖဲလဲၣ်." တၢ်သံကွၢ်တဖၣ်အံၤ ဘၣ်ထွဲလိာ်အသးဒီး မုၢ်နံၤခံကတၢၢ် ဂ့ၢ်ပီညါ န့ၣ်လီၤ. ဒီး မ့ၢ်တၢ်သံကွၢ် တဖၣ်လၢ လံာ်တၢ်လီၣ်ဖျါ စံးဆၢက့ၤ၀ဲန့ၣ်လီၤ.
စီၤယိၤဟၣ် သ့ၣ်ညါ လီၤတံၢ်ဘၣ်ဃး ယွၤဂ့ၢ်ပီညါ အတၢ်ဖ့ၣ်ဆၢ လၢအအိၣ်ထီၣ်လၢ လံာ်စီဆှံအသီတကတြူၢ် အပူၤ လၢအဘၣ်ဃး မုၢ်နံၤခံကတၢၢ် အဂ့ၢ်န့ၣ်လီၤ. အတၢ်တိာ်အကျါတခါ လၢအတၢ်ကွဲးလံာ်တၢ်လီၣ်ဖျါအံၤ မ့ၢ်ဒ်သိး ကမၤစၢၤ ပှၤခရံာ်ဖိတဖၣ် ဘၣ်ဃး တၢ်ဂ့ၢ်အံၤ န့ၣ်လီၤ. လၢအတၢ်ကွဲးအပူၤ, အ၀ဲဟ့ၣ်ဂံၢ်ဟ့ၣ်ဘါ အပှၤဖးလံာ်ဖိ တဖၣ် ကကွၢ် တၢ်ဖ့ၣ်ဆၢအံၤ လၢ တၢ်မၤနၢၤခံခါ အပူၤန့ၣ်လီၤ. အခီၣ်ထံးတခါ, မ့ၢ်တၢ်မၤနၢၤလၢ ကစၢ်ခရံာ်မၤနၢၤ တ့ၢ် စိၤခဲအံၤ အတၢ်အၢတၢ်သီ န့ၣ်လီၤ.
ခီဖျိ အတၢ်သံ, အတၢ်ဂဲၤထၢၣ်သမူထီၣ်က့ၤ, ဒီးအတၢ်က့ၤထီၣ်ဆူမူခိၣ် အဃိ ကစၢ်ခရံာ် မၤဂၢၢ်မၤကျၢၤ ပှၤနာ်တၢ်ဖိ ကိးဂၤဒဲး အသးသမူ အတၢ်အုၣ်က့ၤခီၣ်က့ၤလံ န့ၣ်လီၤ. တၢ်မၤနၢၤအံၤ ဘၣ်တၢ်ပာ်ဖျါထီၣ်အီၤလၢ လံာ်တၢ်လီၣ်ဖျါ ၁း၁၈, ဖဲကစၢ်ခရံာ်စံးလၢ အ၀ဲဂဲၤထၢၣ်က့ၤလၢတၢ်သံ ဒီးတသံလၢၤနီတဘျီလၢၤ ဘၣ်န့ၣ်လီၤ. ဒီးဖဲ အဆၢဒိၣ် ၅ ဒီး ၁၂ အပူၤ ကတိၤ၀ဲတလီၢ်လီၢ်ဘၣ်ဃး တၢ်စိတၢ်ကမီၤ လၢကစၢ်ခရံာ်ဒိးန့ၢ် ခီဖျိ အတၢ်သံ ဒီး အတၢ်ဂဲၤထၢၣ်သမူထီၣ် က့ၤ အဃိ န့ၣ်လီၤ.
တၢ်မၤနၢၤခံခါတခါ လၢစီၤယိၤဟၣ် ပာ်ဖျါထီၣ်၀ဲန့ၣ် မ့ၢ်တၢ်မၤနၢၤ လီၢ်ခံကတၢၢ် လၢကစၢ်ခရံာ် ကမၤနၢၤ ဖဲအဟဲက့ၤ ခံဘျီတဘျီအခါ, မ့ၢ်တၢ်မၤဟးဂီၤ ကစၢ်ယွၤ အဒုၣ်အဒါ ခဲလၢာ်ခဲဆ့ ဒီး တၢ်မၤသီထီၣ်က့ၤ တၢ်ဘၣ်တ့ခဲလၢာ် န့ၣ်လီၤ. တၢ်မၤနၢၤလီၢ်ခံကတၢၢ်အံၤ ပကထံၣ်ဘၣ်လၢ လံာ်တၢ်လီၣ်ဖျါ ၁း၇ အပူၤ ဒီး အဆၢဒိၣ် ၁၉ ဒီး ၂၂ အပူၤန့ၣ်လီၤ.
စီၤယိၤဟၣ်အဲၣ်ဒိးလၢ အပှၤဖးလံာ်ဖိတဖၣ် ကသ့ၣ်ညါလၢ ကစၢ်ခရံာ် မၤနၢၤကွံာ် တၢ်ဒဲးဘး, တၢ်တူၢ်ဘၣ်ခီၣ်ဘၣ်, ဒီး တၢ်သံ အတၢ်စိတၢ်ကမီၤတဖၣ် ဒ် လံာ်စီဆှံ အလီၢ်လံၤတကတြူၢ် စံးပာ်၀ဲ အသိးန့ၣ်လီၤ. ဒီးလၢတၢ်အံၤအဃိ, စီၤယိၤဟၣ် ဟ့ၣ်ဂံၢ်ဟ့ၣ်ဘါ အပှၤဖးလံာ်ဖိတဖၣ် လၢကနာ်လၢ ကစၢ်ခရံာ်ကဟဲက့ၤ ဒီးမၤလၢပှဲၤ ယွၤအတၢ်စံၣ်ညီၣ် ဒီး အတၢ် အုၣ်က့ၤခီၣ်က့ၤန့ၣ်လီၤ.
ခဲအံၤ ပသ့ၣ်ညါဘၣ် မုၢ်နံၤခံကတၢၢ်ဂ့ၢ်ပီညါ လံအဃိ, ပကလဲၤဆူတၢ်ဂ့ၢ်ခံခါတခါ လၢအဘၣ်ဃး လံာ်တၢ်လီၣ်ဖျါ အယွၤဂ့ၤပီညါ လၢအမ့ၢ်, တၢ်အၢၣ်လီၤအီလီၤ (Covenant) န့ၣ်တက့ၢ်.
တၢ်အၢၣ်လီၤအီလီၤ (Covenant)
"တၢ်အၢၣ်လီၤအီလီၤ" (Covenant) မ့ၢ်ဖျါထဲတဘျီဧိၤ လၢလံာ်တၢ်လီၣ်ဖျါ အပူၤဘၣ်ဆၣ်, လံာ်စီဆှံ အလီၢ်လံၤ တကတြူၢ် အတၢ်ထံၣ်ဘၣ်ဃး တၢ်အၢၣ်လီၤအီလီၤ အရ့ဒိၣ် ဒိၣ်မးလၢ လံာ်တဘ့ၣ်အံၤ အပူၤန့ၣ်လီၤ. တၢ်အၢၣ်လီၤအီလီၤ အံၤ မ့ၢ်တၢ်လၢအဘၣ်ဃးဒီး လၢယွၤအဘီအမုၢ်အပူၤ ယွၤအပှၤဂီၢ်မုၢ်တဖၣ် ကအိၣ်ဒီးတၢ်မနုၤလဲၣ်. တၢ်အၢၣ်လီၤအီလီၤ အံၤအုၣ်အသးလၢ ယွၤအပှၤဂီၢ်မုၢ် ကဒိးန့ၢ်ဘၣ် တၢ်မၤပူၤဖျဲး ဒီးတၢ်ဆိၣ်ဂ့ၤဆိၣ်၀ါ န့ၣ်လီၤ. ဒီးတၢ်အၢၣ်လီၤ အီလီၤအံၤ ဟ့ၣ်ဆူၣ်ထီၣ်အ၀ဲသ့ၣ်အသး ဒ်သိးကလဲၤခီဖျိကွံာ် တၢ်ကီတၢ်ခဲလၢ အ၀ဲသ့ၣ် ဘၣ်သဂၢၢ်၀ဲ တဖၣ်န့ၣ်လီၤ. ဒ်သိးပကသ့ၣ်ညါ တၢ်အၢၣ်လီၤအီလီၤ လၢလံာ်တၢ်လီၣ်ဖျါ အပူၤအဂီၢ်, ပကကွၢ်ကဒါက့ၤ တၢ်အၢၣ်လီၤအီလီၤ လၢလံာ်စီဆှံ ဒီတဘ့ၣ်ညါ အပူၤန့ၣ်လီၤ.ကစၢ်ယွၤ အတၢ်အၢၣ်လီၤအီလီၤ မ့ၢ်လီၤဆီ၀ဲ ဘၣ်ဆၣ်, တၢ်အဒိအိၣ်၀ဲသၢခါ လၢအတဲဘၣ်ဃး ယွၤအတၢ်အၢၣ်လီၤ အီလီၤတဖၣ် န့ၣ်လီၤ. အခီၣ်ထံးတခါ, တၢ်အၢၣ်လီၤအီလီၤ တခါစုာ်စုာ် ဒုးနဲၣ်ဖျါထီၣ် ကစၢ်ယွၤ အတၢ်မၤဂ့ၤလၢ အပှၤ ဂီၢ်မုၢ် အဂီၢ်န့ၣ်လီၤ. ခံခါတခါ, ကစၢ်ယွၤ လိၣ်ဘၣ် တၢ်သးတီ လၢအပှၤဂီၢ်မုၢ်အအိၣ် လၢကဟ့ၣ်ဆၢက့ၤ ယွၤအတၢ်မၤ ဂ့ၤတဖၣ်အဂီၢ်န့ၣ်လီၤ. သၢခါတခါ, ယွၤသူၣ်ထီၣ် အဘီအမုၢ် ခီဖျိ ဒုးအိၣ်ထီၣ် သနူလၢ အတီအလိၤ န့ၣ်လီၤ. ပမ့ၢ်ဘၣ်တဲလၢအဖုၣ်န့ၣ်, ပှၤလၢအသးတီ ဒိးန့ၢ်ဘၣ် တၢ်ဆိၣ်ဂ့ၤ, ဒီးပှၤလၢအသးတတီတဖၣ် ဒိးန့ၢ်ဘၣ် တၢ်ဆိၣ်အၢ န့ၣ်လီၤ.
လၢတၢ်အၢၣ်လီၤအီလီၤ ဒီး စီၤဒၤ၀ံး အပူၤ, ပကထံၣ်ဘၣ်အီၤလၢ ၂ရှမူၤအ့လး ၇း၁-၁၇, ထါစံးထီၣ်ပတြၢၤ ၈၉ ဒီး ထါစံးထီၣ်ပတြၢၤ ၁၃၂ အပူၤ, ကစၢ်ယွၤသူၣ်ထီၣ် စီၤဒၤ၀ံးအဘီအမုၢ် ဒ်သိးအကကဲထီၣ် ယွၤအတၢ်ဆိၣ်ဂ့ၤ ဆိၣ်၀ါ ဒီး အတၢ်စံၣ်ညီၣ် လၢအပှၤဂီၢ်မုၢ် အဂီၢ်န့ၣ်လီၤ. စီၤဒၤ၀ံး အဖိခွါတဖၣ် မ့ၢ်စီၤပၤတဖၣ်လၢ ယွၤအဖီလာ် လၢအကကဲထီၣ် ခၢၣ်စးလၢ လၢယွၤအမဲာ်ညါ လၢဘီမုၢ်ဒီဘ့ၣ်ညါ အဂီၢ်န့ၣ်လီၤ. လၢတၢ်အၢၣ်လီၤအီလီၤ တဖၣ်အပူၤ, ယွၤဒုးနဲၣ်ဖျါ ထီၣ် အတၢ်မၤဂ့ၤတဖၣ်, ဒီးလိၣ်ဘၣ်တၢ်သးတီ, ဒီးဒုးသ့ၣ်နီၣ် စီၤဒၤ၀ံး အပှၤဟံၣ်ဖိတဖၣ်လၢ အတၢ်ဆိၣ်ဂ့ၤဒီး အတၢ်ဆိၣ် အၢမ့ၢ်မနုၤတဖၣ် လဲၣ်န့ၣ်လီၤ. ဘၣ်ဆၣ် လၢအံၣ်စရ့လး အတၢ်စံၣ်စိၤတဲစိၤ အပူၤ, စီၤဒၤ၀ံး အစၢၤအသွဲၣ်တဖၣ် တမၤပိာ်ထွဲ တၢ်အၢၣ်လီၤအီလီၤ အခံဘၣ်အဃိ အံၣ်စရ့လး အဘီအမုၢ်ဒီတဘ့ၣ်ညါ ဘၣ်တၢ်စိာ်မၢကဲကုၢ်အီၤ လၢယွၤ အတၢ်ဆိၣ်အၢ အဃိန့ၣ်လီၤ.
ဘၣ်ဆၣ်လၢတၢ်စိာ်မၢကဲကုၢ် အဆၢကတီၢ်ဒၣ်လဲာ်, အံၣ်စရ့လး အ၀ံတဖၣ် စံးပာ်လၢ မုၢ်နံၤလၢခံကတၢၢ် တဖၣ်အပူၤ ယွၤကမၤသီထီၣ်က့ၤ အတၢ်အၢၣ်လီၤအီလီၤ ခီဖျိ စီၤဒၤ၀ံးအဖိခွါလၢ အတီအလိၤ တဂၤအဃိ န့ၣ်လီၤ. ၀ံယံးရမံယၤ ကိးတၢ်မၤသီထီၣ်က့ၤ အ၀ဲအံၤလၢ တၢ်အၢၣ်လီၤအီလီၤအသီ လၢ ယံးရမံယၤ ၃၁း၃၁ အပူၤန့ၣ်လီၤ.
လံာ်စီဆှံအသီတကတြူၢ်စံးလၢ, ခရံာ်မ့ၢ် စီၤဒၤ၀ံးအဖိခွါ အဒိၣ်ကတၢၢ်တဂၤ လၢအမၤလၢပှဲၤ တၢ်အၢၣ်လီၤအီလီၤ အသီ အံၤန့ၣ်လီၤ. ကစၢ်ခရံာ် မ့ၢ်စီၤပၤ လၢယွၤအဘီအမုၢ်လၢ ဟီၣ်ခိၣ်ချၢ အံၤန့ၣ်လီၤ. ဒီးယွၤ, စီၤပၤဖးဒိၣ်တဂၤ, မၤတၢ်အၢၣ် လီၤအီလီၤ ဃုာ်ဒီး ကစၢ်ခရံာ်ဒီး အတၢ်အိၣ်ဖှိၣ် န့ၣ်လီၤ. လၢခရံာ်အပူၤ, ယွၤ အတၢ်မၤစၢၤ အိၣ်ဖျါထီၣ်၀ဲ န့ၣ်လီၤ. ကစၢ်ခရံာ် အနီၢ်ကစၢ်ဒၣ်၀ဲ ဒုးနဲၣ်ဖျါထီၣ် တၢ်သးတီခဲလၢာ် လၢပခၢၣ်စး န့ၣ်လီၤ. အ၀ဲတူၢ် တၢ်အၢၣ်လီၤအီလီၤ အတၢ်ဆိၣ် အၢ ဖဲအသံလၢ ပလီၢ်အခါ န့ၣ်လီၤ. သၢသီ၀ံၤအလီၢ်ခံ အ၀ဲဂဲၤထၢၣ်ကဒါက့ၤလၢတၢ်သံ မ့ၢ်ဒ်သိး ကဟ့ၣ်နီၤလီၤ ယွၤအတၢ်အၢၣ်လီၤအီလီၤ အတၢ်ဆိၣ်ဂ့ၤတဖၣ် ဆူအပှၤဂီၢ်မုၢ် အအိၣ်န့ၣ်လီၤ. ဒီးအ၀ဲကဟဲက့ၤကဒါက့ၤ အသီတဘျီ မ့ၢ်ဒ်သိး အကဟ့ၣ် ယွၤအတၢ်ဆိၣ်ဂ့ၤဆိၣ်၀ါ တဖၣ် လၢတၢ်ဘၣ်တ့လၢအသီထီၣ်က့ၤ အပူၤန့ၣ်လီၤ.
ယွၤအတၢ်အၢၣ်လီၤအီလီၤ အပှၤဂီၢ်မုၢ် တဖၣ်အကျါ ထီဘိပၣ်ဃုာ်ဒီး ပှၤလၢအသးတီ တဖၣ်ဒီး ပှၤလၢအသးတတီ တဖၣ်န့ၣ်လီၤ. ဒီးတၢ်အံၤ ကဆဲးလဲၤဒံး အသးဆူညါ တုၤ ခရံာ်ဟဲက့ၤကဒါက့ၤ တစုန့ၣ်လီၤ. ဖဲစီၤအၤဒၣ် ဒီး စီၤနိအၤ အဆၢကတီၢ်, ပှၤဟီၣ်ခိၣ်ဖိ တဖၣ်အိၣ်၀ဲလၢ အပၣ်ဃုာ်ဒီး ပှၤနာ်တၢ်ဖိ ဒီး ပှၤတနာ်တၢ်ဖိ တဖၣ်န့ၣ်လီၤ. ယွၤအပှၤကလုာ် လီၤဆီအစိၤ ဒ် စီၤအၤဘြၤဟၣ်, စီၤမိၤရှ့, ဒီး စီၤဒၤ၀ံး အစိၤ တၢ်ဒ်န့ၣ်အသိး တဖၣ်အိၣ်၀ဲလီၤ. ဖဲလံာ်စီဆှံအသီတကတြူၢ် အတၢ်အိၣ်ဖှိၣ် အပူၤဒၣ်လဲာ် ပှၤနာ်တၢ်ဖိ ဒီး ပှၤတနာ်တၢ်ဖိ တဖၣ်အိၣ်ကျဲကျီဃုာ် အသးန့ၣ်လီၤ.
ပှၤတနီၤအိၣ်ဒီး တၢ်နာ်အတီလၢ ခရံာ်ပူၤ, ဘၣ်ဆၣ် ပှၤအဂၤတနီၤ တၢ်နာ်ဒ်န့ၣ်အသိး တအိၣ်ဘၣ်. လၢတၢ်န့ၣ်အဃိ, ဖဲစီၤယိၤဟၣ် ကွဲး လံာ်တၢ်လီၣ်ဖျါအံၤလၢ တၢ်အိၣ်ဖှိၣ်လၢ အအိၣ်လၢ ကီၢ်အၤစံပူၤ အခါ, အ၀ဲသ့ၣ်ညါလၢ ထဲအပှၤဖးလံာ် တနီၤဧိၤလီၤ မ့ၢ်ခရံာ်ဖိလၢ အမ့ၢ်အတီန့ၣ်လီၤ. ပှၤနာ်တၢ်ဖိတဖၣ် အိၣ်ခိး ယွၤအတၢ်ဆိၣ်ဂ့ၤဆိၣ်၀ါတဖၣ် ခီဖျိအ၀ဲသ့ၣ် အတၢ်သးတီအဃိ လၢတၢ်သူၣ်ဆူၣ်သးဆူၣ် အပူၤန့ၣ်လီၤ. ဘၣ်ဆၣ် ပှၤအဂၤတနီၤ လၢတၢ်အိၣ်ဖှိၣ်အပူၤ အတၢ်သးတီအံၤ ဒံ၀့ၤဒံ၀ီၤ၀ဲ, ဒီးလီၤဘၣ်လၢ ယွၤအတၢ်ဆိၣ်အၢ အဖီလာ် သ့၀ဲန့ၣ်လီၤ. ခီဖျိလၢ တၢ်ဂ့ၢ်ဒ်အံၤအဃိ, စီၤယိၤဟၣ် ဒုးသ့ၣ်နီၣ်ထီၣ် အပှၤဖးလံာ်တဖၣ် ဘၣ်ဃး တၢ်မူလၢ ယွၤအတၢ်အၢၣ်လီၤအီလီၤ အပူၤန့ၣ်လီၤ.
ကစၢ်ခရံာ်အတၢ်ဟဲ တၢတဘျီဒီး ခံဘျီတဘျီ အဘၢၣ်စၢၤ, ပအိၣ်မူလၢ တၢ်မၤကွၢ်အဆၢကတီၢ်, ဖဲ တၢ်အိၣ်လၢပသးပူၤ အမ့ၢ်အတီတဖၣ် လီၣ်ဖျါထီၣ် အသးအဆၢကတီၢ်န့ၣ်လီၤ. ဖဲခရံာ်ဟဲက့ၤအဆၢကတီၢ်, ပှၤလၢ အနာ်ကစၢ်ခရံာ် လီၤတံၢ်လီၤဆဲးတဖၣ် ကဒိးန့ၢ် တၢ်အၢၣ်လီၤအီလီၤ အတၢ်ဆိၣ်ဂ့ၤတဖၣ်န့ၣ်လီၤ. ဘၣ်ဆၣ် ပှၤလၢအတနာ်ခရံာ် လီၤတံၢ်လီၤဆဲးတဖၣ်, ကလီၤတဲာ်ကွံာ်လၢ တၢ်အၢၣ်လီၤအီလီၤ အတၢ်ဆိၣ်အၢ တဖၣ်အပူၤန့ၣ်လီၤ.
ဖးကွၢ် ကစၢ်ခရံာ် ကတိၤတၢ်ဆူ တၢ်အိၣ်ဖှိၣ်လၢ လီၤဒံၤကံ အပူၤဖဲ လံာ်တၢ်လီၣ်ဖျါ ၃း၁၆ န့ၣ်တက့ၢ်.
မၤသးဒ်န့ၣ်ဒီး, နတခုၣ်ဘၣ်, နတကိၢ်ဘၣ်, မ့ၢ်နလၢၤဒီး, ယကဘှိးထီၣ်ကွံာ်နၤလၢ ယကိာ်ပူၤလီၤ. (တၢ်လီၣ်ဖျါ ၃း၁၆).ပှၤတနီၤလၢ လီၤဒံၤကံ တၢ်အိၣ်ဖှိၣ်အပူၤ တဖၣ် ဃၣ်ကပၤကွံာ်အသးလၢ ခရံာ်အတၢ်သးခုကစီၣ်အပူၤ န့ၣ်လီၤ. လၢတၢ်န့ၣ်အဃိ, စီၤယိၤဟၣ် ဟ့ၣ်ပလီၣ်အ၀ဲသ့ၣ်လၢ အ၀ဲသ့ၣ် မ့ၢ်တသးတီဘၣ်န့ၣ်, က၀ဲသ့ၣ် ကတူၢ်ဘၣ် ယွၤအတၢ်အၢၣ်လီၤ အီလီၤ အတၢ်ဆိၣ်အၢ တဖၣ်န့ၣ်လီၤ.
တၢ် ဟ့ၣ်ပလီၣ် အံၤ, မ့ၢ်ယွၤ အတၢ်အဲၣ်လၢအပှၤဂီၢ်မုၢ်အဂီၢ်, မ့ၢ်လၢ အဟ့ၣ်လီၤ ပှၤဖးလံာ်တဖၣ်လၢ တၢ်ခွဲးတၢ်ယာ် လၢ တၢ်ပီၢ်ယၢ်လီၤက့ၤ အသးအဂီၢ်န့ၣ်လီၤ. ပကထံၣ်ဘၣ် ကစၢ်ယွၤအတၢ်မၤစၢၤလၢ လံာ်တၢ်လီၣ်ဖျါ ဒီတဘ့ၣ်ညါ အပူၤန့ၣ်လီၤ. ဒီးလံာ်တၢ်လီၣ်ဖျါအံၤ ပာ်ဖျါထီၣ် ယွၤအတၢ်အဲၣ်လၢအပှၤဂီၢ်မုၢ် အဂီၢ်, ခီဖျိ ခရံာ် အတၢ်ဒိးသံအသးလၢ ပဂီၢ်, ခီဖျိ ယွၤအဘီအမုၢ်, ဒီးခီဖျိ ပတၢ်မုၢ်လၢ်လၢ ခရံာ် အတၢ်ဟဲကဒါက့ၤ အပူၤန့ၣ်လီၤ. ယွၤအဲၣ်ပှၤဒိၣ်မး ခီဖျိ ဟ့ၣ်လီၤ အဖိခွါ လၢကဟဲတူၢ်တၢ်လၢ ပဂီၢ်, ဒီး ဂဲၤထၢၣ်က့ၤလၢတၢ်သံ မ့ၢ်ဒ်သိး ပကမူလီၤထူလီၤယိာ်လၢ အဘီအမုၢ် အပူၤ န့ၣ်လီၤ. ဒီး အတၢ်မၤစၢၤ တဖၣ် ဟ့ၣ်ဂံၢ်ဟ့ၣ်ဘါပှၤ ဒ်သိး ပကသးတီဒီးအီၤ, ဖဲပအိၣ်ဒီး တၢ်တူၢ်ဘၣ်ခီၣ်ဘၣ် ဒိၣ်ဒိၣ်အါအါ အဆၢကတီၢ်ဒၣ်လဲာ်န့ၣ်လီၤ.
ခဲအံၤပသ့ၣ်ညါဘၣ် မုၢ်နံၤခံကတၢၢ် ဂ့ၢ်ပီညါ ဒီး ယွၤအတၢ်အၢၣ်လီၤအီလီၤ လံအဃိ, ပကလဲၤဆူညါ လၢအမ့ၢ် ၀ံတဖၣ် အတၢ်ဖံးတၢ်မၤန့ၣ်လီၤ.
၀ံတဖၣ် (Prophets)
ပကကွၢ် ၀ံတဖၣ်အတၢ်မၤ ခီဖျိထိၣ်သတြီၤ အ၀ဲသ့ၣ်ဒီး စိၤလၢပျၢၤ တၢ်အၢၣ်လီၤအီလီၤ အခၢၣ်စးတဖၣ်, ၀ံၤပကကွၢ် အ၀ဲသ့ၣ်အတၢ်ဖံးတၢ်မၤ အဆၢတဖၣ်, ၀ံၤ ပကကွၢ် ပှၤတၢ်မၢဖိစီၤယိၤဟၣ် မၤလၢပှဲၤ ၀ံအမူအဒါ လၢလံာ် တၢ်လီၣ်ဖျါ အပူၤန့ၣ်လီၤ. အခဲအံၤ, ပကစးထီၣ်ကွၢ် ၀ံတဖၣ်ဒ် တၢ်အၢၣ်လီၤအီလီၤ အခၢၣ်စး တဖၣ်အသိး တက့ၢ်.တၢ်အၢၣ်လီၤအီလီၤ အခၢၣ်စးတဖၣ် (Covenant Ambassadors)
ပထံၣ်ဘၣ်လံလၢ လံာ်စီဆှံတဲဘၣ်ပှၤ ယွၤအတၢ်အၢၣ်လီၤအီလီၤ ဒီးအပှၤဂီၢ်မုၢ် လီၤဂာ်ဒ် စိၤလၢပျၢၤ နူၢ်ပူၤစီၤပူၤ အတၢ်အၢၣ်လီၤအီလီၤ အသိးန့ၣ်လီၤ. အဃိ ပကကွၢ် ၀ံတဖၣ်လၢလံာ်စီဆှံအပူၤ ဒ် ပှၤတၢ်မၢဖိ စီၤယိၤဟၣ် အသိး လၢအမၤ တၢ်ဒ် ယွၤအတၢ်အၢၣ်လီၤအီလီၤ အခၢၣ်စး အသိး န့ၣ်လီၤ. |
| ၀ံယဃ့းစက့လး ဒီးတၢ်အဃံတဖၣ် |
လၢစိၤလၢပျၢၤန့ၣ်, စီၤပၤတဖၣ် တဟး၀့ၤ၀ီၤလၢ အဘီအမုၢ်အပူၤ ထဲအကစၢ်ဒၣ်၀ဲဘၣ်. မ့မ့ၢ်တခီ, အ၀ဲသ့ၣ် ပာ်လီၤ အခၢၣ်စး တဖၣ်လၢ ကမၤတၢ်မၤအံၤ လီၤ. ခၢၣ်စးတဖၣ်အံၤ အတၢ်မၤ မ့ၢ်ဒ်သိး ကဟ့ၣ်ဂံၢ်ဟ့ၣ်ဘါ တၢ်ခ့တၢ်ပှၤတဖၣ် ဒီးမၤလၢပှဲၤမူဒါလၢ တၢ်အၢၣ်လီၤအီလီၤ အဂီၢ်န့ၣ်လီၤ. ခၢၣ်စးတဖၣ်အံၤ ဒုးသ့ၣ်နီၣ်ထီၣ် တၢ်ခ့တၢ်ပှၤ တဖၣ်လၢ ပှၤလၢအတီ ဒီးတၢ်အၢၣ်လီၤအီလီၤ န့ၣ်ကဒိးန့ၢ်ခိၣ်ဖး, ဒီး ပှၤလၢ အမၤဟးဂီၤ တၢ်အၢၣ်လီၤအီလီၤ န့ၣ်ကဒိးန့ၢ် တၢ်စံၣ်ညီၣ် န့ၣ်လီၤ.
ဒ်န့ၣ်အသိးစ့ၢ်ကီး, ယွၤဆှၢလီၤ ၀ံတဖၣ်လၢ လံာ်စီဆှံအလီၢ်လံၤတကတြူၢ်အပူၤ မ့ၢ်ဂ့ၤ အသီတကတြူၢ်အပူၤ မ့ၢ်ဂ့ၤ ဒ်ကမၤတၢ်ဒ် အတၢ်အၢၣ်လီၤအီလီၤအခၢၣ်စး တဖၣ်အသိးန့ၣ်လီၤ. အ၀ဲမၢလီၤ ၀ံတဖၣ်ဒ်သိး ကဟ့ၣ်တၢ်ကစီၣ်ဆူ အပှၤဂီၢ်မုၢ်အအိၣ်န့ၣ်လီၤ. ဖဲပှၤဂီၢ်မုၢ် ဒိကနၣ်တၢ်အဆၢကတီၢ်, ၀ံတဖၣ် ဟ့ၣ်ဂံၢ်ဟ့ၣ်ဘါ အ၀ဲသ့ၣ်ခီဖျိ ဒုးသ့ၣ်နီၣ်ထီၣ်က့ၤ အ၀ဲသ့ၣ်လၢ အ၀ဲသ့ၣ်မ့ၢ်ဒိကနၣ်တၢ်န့ၣ် ကဒိးန့ၢ် ခိၣ်ဖးန့ၣ်လီၤ. ဘၣ်ဆၣ်အ၀ဲသ့ၣ် မ့ၢ်တဒိကနၣ် တၢ်ဘၣ်န့ၣ်, ၀ံတဖၣ် ဟ့ၣ်ပလီၣ် အ၀ဲသ့ၣ် လၢယွၤအတၢ်စံၣ်ညီၣ် ကဘၣ်အီၤ ဖဲအ၀ဲသ့ၣ် တပီၢ်ယၢ်လီၤက့ၤသး ဒီး ဆီတလဲကွံာ် အကျဲဘၣ် အခါန့ၣ်လီၤ.
ဒ်ပတဲလၢ အပူၤကွံာ်အသိး, ပှၤခရံာ်ဖိ အစိၤခဲအံၤတဖၣ် ပာ်ကဲ၀ဲ "၀ံအတၢ်ကတိၤ" ဒ် တၢ်တဲစိ တၢ်ကမၤအသး ခါဆူညါ န့ၣ်လီၤ. ဘၣ်ဆၣ် ပမ့ၢ်ကွၢ်လၢ လံာ်စီဆှံအပူၤန့ၣ်, တၢ်ကတိၤ "၀ံအတၢ်ကတိၤ" လီၣ်ဖျါထီၣ် ယွၤအတၢ်ကစီၣ် လၢ အဆှၢ၀ဲဆူ အပှၤဂီၢ်မုၢ်အအိၣ် ဒ်သိး ကဟ့ၣ်ဂံၢ်ဟ့ၣ်ဘါအ၀ဲသ့ၣ်လၢ ကသးတီဒီးယွၤ အဂီၢ်န့ၣ်လီၤ. ၀ံတဖၣ်မ့ၢ် ယွၤအတၢ်အၢၣ်လီၤအီလီၤ အခၢၣ်စး တဖၣ်န့ၣ်လီၤ. အ၀ဲသ့ၣ် ဒုးသ့ၣ်နီၣ်ထီၣ် ယွၤအပှၤဂီၢ်မုၢ်တဖၣ်ဘၣ်ဃး မူဒါတဖၣ် လၢတၢ်အၢၣ်လီၤအီလီၤအပူၤ, ဒီးအ၀ဲသ့ၣ် အတၢ်ဖံးတၢ်မၤ အဆၢတဖၣ် န့ၣ်လီၤ.
ဖဲ၀ံအတၢ်ကတိၤ မ့ၢ်ဒ်သိး ကဟ့ၣ်ဂံၢ်ဟ့ၣ်ဘါ ယွၤအပှၤဂီၢ်မုၢ်အခါ, ပတဘၣ်ထံၣ်အီၤဒ် တၢ်တဲစိပာ်စၢၤ တၢ်ကမၤအသး လၢခါဆူညါ န့ၣ်ဘၣ်. မ့မ့ၢ်တခီ, ပကဘၣ်ထံၣ်အီၤဒ် တၢ်ဆိၣ်ဂ့ၤ မ့တမ့ၢ် တၢ်ဆိၣ်အၢ အသိးန့ၣ်လီၤ. ဖဲပှၤဂီၢ်မုၢ် ဒိကနၣ်ဒီးမၤထွဲ ၀ံအတၢ်ကတိၤန့ၣ်, အ၀ဲသ့ၣ် ကဒိးန့ၢ်ဘၣ် တၢ်ဆိၣ်ဂ့ၤတဖၣ် န့ၣ်လီၤ. ဘၣ်ဆၣ် အ၀ဲသ့ၣ် မ့ၢ်တပီၢ်ယၢ် လီၤက့ၤအသး ဒီးတဒိကနၣ်တၢ်ဘၣ်န့ၣ်, အ၀ဲသ့ၣ်ကဒိးန့ၢ်ဘၣ် တၢ်ဆိၣ်အၢ န့ၣ်လီၤ.
ပကဖးသကိး ကစၢ်ယွၤတဲဘၣ်ဃး ၀ံအတၢ်ကတိၤ အတၢ်တိာ်ပာ် လၢလံာ်ယံးရမံယၤ ၁၈း၇-၁၀ တက့ၢ်.
ယမ့ၢ်ကတိၤတၢ် တဘျီလၢပှၤ တကလုာ်အဂ့ၢ်, လၢတၢ်အဘီမုၢ်အဂ့ၢ်, ဒ်သိး တၢ်ကထဲးထီၣ်ကွံာ်, ဒီးမၤလီၤပှီၢ်, ဒီးမၤဟးဂီၤန့ၣ်ဒီး, ပှၤတကလုာ်လၢ ယကတိၤတၢ်လၢ အဂ့ၢ်န့ၣ် မ့ၢ်ဟဲက့ၤလၢအတၢ်အၢ ဒီး, ယကပီၢ်ယၢ်လီၤက့ၤယသး လၢတၢ်အၢ လၢယတိာ်မၤအီၤ လီၤ. ဒီးယမ့ၢ် ကတိၤတၢ်တဘျီလၢ ပှၤတကလုာ်အဂ့ၢ်, တၢ်အဘီမုၢ်အဂ့ၢ် လၢယကမၤ ထီၣ်အီၤ, ဒီးသူၣ်လီၤအီၤ န့ၣ်ဒီး, မ့ၢ်မၤတၢ်အၢလၢယမဲာ်ညါ, ဒီးတဒိကနၣ်ဘၣ် ယကလုၢ်ဘၣ်ဒီး, ယကပီၢ်ယၢ်လီၤက့ၤ ယသးလၢ တၢ်ဂ့ၤလၢ ယစံးယကမၤအီၤ န့ၣ်လီၤ. (ယံးရမံယၤ ၁၈း၇-၁၀).ဖဲအံၤ ကစၢ်ယွၤစံး၀ဲလၢ ၀ံအတၢ်ကတိၤတဖၣ်အံၤ မ့ၢ်တၢ်ဘိးဘၣ်သ့ၣ်ညါဘၣ်ဃး တၢ်ဆိၣ်အၢ မ့တမ့ၢ် တၢ်ဆိၣ်ဂ့ၤ န့ၣ်လီၤ. ဘၣ်ဆၣ် ဒိးသန့ၤထီၣ်အသးလၢ ပှၤနၢ်ဟူတၢ်တဖၣ် ဘၣ်ဃး ၀ံအတၢ်ကတိၤ အတၢ်လၢထီၣ်ပှဲၤထီၣ်န့ၣ်လီၤ. တၢ်ဘိးဘၣ်သ့ၣ်ညါ ဘၣ်ဃးတၢ်ဆိၣ်အၢ ဘၣ်တၢ်ဆိမိၣ်ကဒါက့ၤအီၤသ့၀ဲ ဖဲ ပှၤဂီၢ်မုၢ်ပီၢ်ယၢ်လီၤက့ၤ အသးန့ၣ်လီၤ. ဒီး တၢ်ဘိးဘၣ်သ့ၣ်ညါဘၣ်ဃး တၢ်ဆိၣ်ဂ့ၤစ့ၢ်ကီး ဘၣ်တၢ်ဆိမိၣ်ကဒါက့ၤအီၤသ့၀ဲ ဖဲ ပှၤဂီၢ်မုၢ်စးထီၣ်မၤ တၢ်ဒဲးဘး အခါန့ၣ်လီၤ.
တၢ်အံၤ ကဖျါလီၤတိၢ်လီၤဆီသ့ၣ်သ့ၣ်, ဘၣ်ဆၣ် ဖဲပသ့ၣ်ညါလၢ ၀ံတဖၣ်မ့ၢ် တၢ်အၢၣ်လီၤအီလီၤ အခၢၣ်စးတဖၣ်အခါ တၢ်အံၤကဲထီၣ်အသးသ့ ၀ဲန့ၣ်လီၤ. ယွၤအတၢ်အၢၣ်လီၤအီလီၤ လိၣ်ဘၣ် ယွၤအပှၤဂီၢ်မုၢ် အတၢ်သူၣ်တီသးတီ, ဒီးဟ့ၣ်လီၤ၀ဲ တၢ်ဟ့ၣ်တဖၣ်ဆူ ပှၤလၢအဒိကနၣ်တၢ်မ့ၢ်ဂ့ၤ တဒိကနၣ်တၢ် မ့ၢ်ဂ့ၤ အအိၣ်န့ၣ်လီၤ.
တဘျီတခီၣ် ကစၢ်ယွၤအဲၣ်ဒိးစ့ၢ်ကီး၀ဲလၢ ၀ံအတၢ်ကတိၤ ကဟ့ၣ်အပှၤဂီၢ်မုၢ်တဖၣ် ဘၣ်ဃးတၢ်ကမၤအသးခါဆူညါ န့ၣ်လီၤ. ကစၢ်ယွၤအဲၣ်ဒိးလၢ ၀ံအတၢ်ကတိၤအံၤ ကလဲၤခီဖျိအသး ခီဖျိ အပှၤဂီၢ်မုၢ်တဖၣ် အတၢ်ဖံးတၢ်မၤ လၢတၢ်မၤလၢပှဲၤ ၀ံအတၢ်ကတိၤအဂီၢ်န့ၣ်လီၤ. ဖဲတၢ်ဆၢကတီၢ် ဒ်အံၤတဖၣ်အပူၤ, ၀ံတဖၣ်ပာ်ဖျါထီၣ် ယွၤအတၢ်တိာ်ပာ် လီၤတံၢ် လီၤဆဲးန့ၣ်လီၤ.
ကျဲတဘိလၢ ယွၤပာ်ဖျါထီၣ် အတၢ်တိာ်ပာ် န့ၣ်မ့ၢ် ပာ်ဖှိၣ်၀ဲ အတၢ်အုၣ်ကီၤသးလၢ ၀ံအတၢ်ကတိၤ အပူၤန့ၣ်လီၤ. ကမ့ၢ်၀ဲ တၢ်ကတိၤသ့ၣ်သ့ၣ်, မ့တမ့ၢ်၀ံအတၢ်ဟူးတၢ်ဂဲၤအဒိအတဲာ်, မ့တမ့ၢ် တၢ်ပနီၣ်လီၤလး တမံၤမံၤ န့ၣ်လီၤ. တၢ်အုၣ်ကီၤသးအံၤ မ့ၢ်မၤသကိးဃုာ်တၢ်ဒီး ၀ံအတၢ်ကတိၤ တဘျီလၢ်လၢ်, လီၣ်ဖျါထီၣ်၀ဲလၢ ပှၤကညီကဆီတလဲ ၀ံအတၢ်ကတိၤ အတၢ်ကဲထီၣ်ပိာ်ထွဲအခံ န့ၣ်ကီဒိၣ်ထီၣ် န့ၣ်လီၤ.
တဘျီတခီၣ် ပကထံၣ်ဘၣ်လၢ ၀ံအတၢ်ကတိၤ တဖၣ် လၢအပၣ်ဃုာ်ဒီး တၢ်အၢၣ်လီၤအီလီၤ ဒ် ဧၤမိၣ် ၄း၂, ဖဲ ကစၢ်ယွၤ ဆိၣ်တၢ်လၢ အတၢ်စီဆှံအမဲာ်ညါ, ယံးရမံယၤ ၄၉း၁၃, ဖဲယွၤဆိၣ်တၢ်လၢ အကစၢ်ဒၣ်၀ဲအမဲာ်ညါ, ဒီး ယဃ့းစက့လး ၅း၁၁, ဖဲယွၤစံး၀ဲ တၢ်စံၣ်ညီၣ်ကဟဲ လီၤတံၢ်လီၤဆဲး ဒ်အမူ၀ဲ အသိးန့ၣ်လီၤ.
ဖဲယွၤဆိၣ်တၢ်လၢ အကစၢ်ဒၣ်၀ဲအမဲာ်ညါ အခါ, အ၀ဲသုးကွံာ် ပှၤဟီၣ်ခိၣ်ဖိ အတၢ်ဖံးတၢ်မၤလၢအဘၣ်ဃးဒီး ၀ံအတၢ် ကတိၤ အစၢ န့ၣ်လီၤ. ယွၤအတၢ်အၢၣ်လီၤအီလီၤ တဲစိပာ် တၢ်အစၢတဖၣ်လံ န့ၣ်လီၤ. ဒ်ကစၢ်ယွၤ လီတၢ်တသ့ဘၣ် အသိး, တၢ်လၢအ၀ဲဆိၣ်တၢ်လၢ အကစၢ်ဒၣ်၀ဲအမဲာ်ညါ န့ၣ် အ၀ဲတဆီတလဲ၀ဲဘၣ်.
တဘျီတခီၣ် ကစၢ်ယွၤ ပာ်ဖျါထီၣ်၀ံအတၢ်ကတိၤ ခီဖျိ တၢ်အုၣ်ကီၤ တဖၣ်ဒီး တၢ်အၢၣ်လီၤ တဖၣ်န့ၣ် မ့ၢ်ဒ်သိးကမၤမုာ်ပှၤ, မ့ၢ်လၢ ပတၢ်စူၢ်တၢ်နာ် သူၣ်လီၤအသးလၢ ၀ံအတၢ်ကတိၤလၢ လံာ်စီဆှံအပူၤ အတၢ်လၢထီၣ်ပှဲၤထီၣ် န့ၣ်လီၤ. အရ့ဒိၣ်ကတၢၢ်န့ၣ်, ပနာ်လၢ မုၢ်ကအိၣ်၀ဲတနံၤ ခရံာ်ကဟဲက့ၤကဒါက့ၤဆူ ဟီၣ်ခိၣ် ဒီးကစံၣ်ညီၣ် အဒုၣ်အဒါ တဖၣ် ဒီး ကဟ့ၣ်ခိၣ်ဖးလၢ ပှၤလၢအသးတီဒီးအီၤ တဖၣ်န့ၣ်လီၤ. ပအိၣ်ဒီး တၢ်မုၢ်လၢ်လၢ မုၢ်ကအိၣ်၀ဲတနံၤ ယွၤကဒုးအိၣ်ထီၣ် တၢ်ဘၣ်တ့အသီ ဒီးထွါကွံာ် ပမဲာ်ထံတဖၣ်လၢ ပမဲာ်ချံ အပူၤန့ၣ်လီၤ. ၀ံအတၢ်ကတိၤတဖၣ်အံၤ ဘၣ်တၢ်ပာ်ဖျါထီၣ်အီၤ တလီၢ်လီၢ်လၢ လံာ်စီဆှံအပူၤ အဃိ ပသ့ၣ်ညါလၢ တၢ်မၤစံးလီၤစှၤလီၤအီၤ တသ့တန့ၢ်ဘၣ်. မုၢ်ကအိၣ်၀ဲတနံၤ, တၢ်တဲစိ ပာ်စၢၤဘၣ်ဃး ကစၢ်ခရံာ်အတၢ်ဟဲက့ၤကဒါက့ၤန့ၣ် ကမၤအသးသပှၢ်ကတၢၢ်လီၤ.
ခဲအံၤပသ့ၣ်ညါ ၀ံတဖၣ်ဒ်အမ့ၢ် တၢ်အၢၣ်လီၤအီလီၤ အခၢၣ်စးတဖၣ် လံအဃိ, ပကလဲၤဆူ ၀ံအတၢ်မၤအစၢလၢ အကဲထီၣ်အသးသ့ န့ၣ်တက့ၢ်.
တၢ်မၤအစၢလၢအကဲထီၣ်အသးသ့ (Potential Results)
ဒ်ပထံၣ်ဘၣ်လံအသိး, ၀ံအတၢ်ကတိၤဘၣ်ဃး တၢ်ဆိၣ်ဂ့ၤတဖၣ် တမ့ၢ်ဒၣ်ထဲ ယွၤကဆိၣ်ဂ့ၤ အပှၤဂီၢ်မုၢ် တပယူာ်ဃီ အဂီၢ်ဘၣ်. အပှၤဂီၢ်မုၢ် တဖၣ်မ့ၢ်ဟးသဒၣ်အီၤန့ၣ်, တၢ်အစၢလၢ အကဲထီၣ်အသးသ့ တမံၤမ့ၢ်၀ဲ ယွၤကဆိမိၣ်ကဒါက့ၤ တၢ်လၢအကဆိၣ်ဂ့ၤ ၀ဲတဖၣ် ဖဲအပှၤဂီၢ်မုၢ် တဒိကနၣ်အီၤ အခါန့ၣ်လီၤ.ဒ်န့ၣ်အသိးစ့ၢ်ကီး, ၀ံအတၢ်ကတိၤဘၣ်ဃး တၢ်စံၣ်ညီၣ်အံၤ မ့ၢ်၀ဲတၢ်ဟ့ၣ်ပလီၣ်လၢ ပှၤလၢအစံးလီၤအသးလၢ အမ့ၢ် ယွၤအပှၤဂီၢ်မုၢ် အဂီၢ်န့ၣ်လီၤ. ၀ံအတၢ်ဟ့ၣ်ပလီၢ် ဒုးနဲၣ်ပှၤလၢ တၢ်လၢကစၢ်ယွၤကမၤအီၤ ဖဲပှၤဂီၢ်မုၢ်တဖၣ် ဆဲးမၤ တၢ်ဒဲးဘးအခါန့ၣ်လီၤ. ဒီးတၢ်ဟ့ၣ်ပလီၢ်အံၤ တၢ်တဲဆိအီၤ, မ့ၢ်လၢကစၢ်ယွၤ မ့ၢ်ပှၤလၢအသးကညီၤတၢ်သ့ အဃိ, မ့ၢ်လၢ အ၀ဲအဲၣ်ဒိး ဟ့ၣ်အပှၤဂီၢ်မုၢ် တၢ်ခွဲးတၢ်ယာ်လၢ ကပီၢ်ယၢ်လီၤက့ၤသးအဂီၢ်, ဒီးဒ်သိး ကသ့ပဒ့ၣ်ကွံာ် အတၢ်တဒိကနၣ် အစၢ အဂီၢ်န့ၣ်လီၤ. လၢတၢ်န့ၣ်အဃိ, ၀ံအတၢ်ကတိၤဘၣ်ဃး တၢ်စံၣ်ညီၣ်အံၤ အါတက့ၢ် ဟဲအသးလၢ ယွၤအတၢ်သးကညီၤ အပှၤဂီၢ်မုၢ် တဖၣ်အဃိန့ၣ်လီၤ. ၀ံအတၢ်ကတိၤအံၤ တမ့ၢ်လၢ အတဲဆိ ယွၤအတၢ်စံၣ်ညီၣ်ဃၣ် ဘၣ်, မ့မ့ၢ်တခီ မ့ၢ်တၢ်ဟ့ၣ်ပလီၣ်လၢ တၢ်ဆီတလဲက့ၤ အဂီၢ်န့ၣ်လီၤ.
လံာ်စီဆှံ ပာ်ဖျါထီၣ် ကျဲအစှၤကတၢၢ် ယဲၢ်ဘိ ဘၣ်ဃး ၀ံအတၢ်ကတိၤ အစၢလၢကဲထီၣ်အသးသ့ ဖဲပှၤဖးလံာ်ဖိတဖၣ် ဒိကနၣ်မၤထွဲ ၀ံအတၢ်ကတိၤအခံ န့ၣ်လီၤ. အဆိကတၢၢ်တဘိ, တဘျီတခီၣ်ကစၢ်ယွၤ ထုးကွံာ် ၀ံအတၢ်ဟ့ၣ်ပလီၣ် မ့တမ့ၢ် အတၢ်ဟ့ၣ်တဖၣ်န့ၣ်လီၤ.
အဒိ, ဖး၀ံယိၤအ့လး အတၢ်ကတိၤလၢ ယိၤအ့လး ၂း၁၂-၁၄ အပူၤတက့ၢ်.
မ့မ့ၢ်ခဲကနံၣ်အံၤ ဒၣ်လဲာ်ယွၤစံး၀ဲဒၣ်, ဃၣ်သုသးဆူ ယအိၣ်လၢ သုသးဒီဖျၢၣ်ညါ, ဒီးဒုၣ်တၢ်အီၣ်, ဒီးဟီၣ်, ဒီး သူၣ်အုး သးအုး န့ၣ်တက့ၢ်. ဒီးမၤဖှီသုဆ့တဂ့ၤ, မၤဖှီသုသးဒီး ဃၣ်လိၤသုသးဆူ ယွၤသုကစၢ် အအိၣ်တက့ၢ်. အဂ့ၢ်ဒ်အံၤ, သူၣ်ကညီၤသးကညီၤတၢ်, ဒီးသးအိၣ်တၢ်, ဒီးသးထီၣ်ကီ, ဒီးအဘျုးအဖှိၣ် ဒိၣ်မးလီၤ. ဒီးပီၢ်ယၢ်လီၤက့ၤ အသးလၢ တၢ်အအၢ အဃိလီၤ. (ယိၤအ့လး ၂း၁၂-၁၃).၀ံယိၤအ့လး မ့ၢ်ကတိၤ၀ံအတၢ်ကတိၤဘၣ်ဃးတၢ်စံၣ်ညီၣ် ယွၤအပှၤဂီၢ်မုၢ်ဒၣ်ကယၢာ်, အ၀ဲနၢ်ပၢၢ်လၢ တၢ်မုၢ်လၢ် အိၣ်ဒံး၀ဲ လီၤ. တၢ်ပီၢ်ယၢ်လီၤက့ၤသးနီၢ်နီၢ် ဆီတလဲကွံာ် ၀ံအတၢ်ကတိၤ အစၢ သ့၀ဲန့ၣ်လီၤ.
ကျဲခံဘိတဘိ, တၢ်ဆိၣ်ဂ့ၤ မ့တမ့ၢ် တၢ်ဆိၣ်အၢလၢ ဘၣ်တၢ်တဲဆိပာ်စၢၤအီၤန့ၣ်, ထုးယံာ်အဆၢကတီၢ် သ့၀ဲန့ၣ်လီၤ. အဒိ, ပကကွၢ် လံာ် ၂စီၤပၤ ၂၀း၁-၇, ၀ံယရှါယၤ စံးလၢ စီၤပၤဃံးစကံယၤ ကသံလၢတၢ်ဆူးတၢ်ဆါ အဃိန့ၣ်လီၤ. စီၤပၤဃံးစကံယၤ တုၤအနၢ်ဟူ၀ံအတၢ်ကတိၤအံၤအလီၢ်ခံ, အ၀ဲဟီၣ်ဟ့သး, ဒီးဘါထုကဖၣ်တၢ်, ဒီး ဃ့ကစၢ်ယွၤလၢ ကသ့ၣ်နီၣ်ထီၣ် အတၢ်သးတီ အတၢ်မၤတဖၣ်န့ၣ်လီၤ. လၢတၢ်န့ၣ်အဃိ, ကစၢ်ယွၤသုးယံၤထီၣ် အတၢ်သံ ဒီးအိၣ်မူဘၣ်ဒံး ဆူမဲာ်ညါ ၁၅ နံၣ်ဒံးန့ၣ်လီၤ.
ကျဲသၢဘိတဘိ, တဘျီတခီၣ် ကစၢ်ယွၤ မၤစှၤလီၤ အတၢ်ဆိၣ်ဂ့ၤ မ့တမ့ၢ် အတၢ်စံၣ်ညီၣ် လၢအစံး၀ဲ တဖၣ်န့ၣ်လီၤ. အဒိ, ၂ကွဲးနီၣ်တၢ် ၁၂း၅-၁၂ တဲဘၣ်ဃး ၀ံရှမါယၤ အဂ့ၢ်, လၢအစံး၀ဲ ယွၤကပျဲအဲၤကူပတူး မၤဟးဂီၤ အံၣ်စရ့လး န့ၣ်လီၤ. ဖဲစီၤရဃၤဘၣ် ဒီး အံၣ်စရ့လးအခိၣ်အနၢ်တဖၣ် နၢ်ဟူတၢ်အံၤန့ၣ်, အ၀ဲသ့ၣ် ဆီၣ်လီၤက့ၤအသး န့ၣ်လီၤ. လၢတၢ်န့ၣ်အဃိ, ကစၢ်ယွၤ မၤစှၤလီၤ အတၢ်စံၣ်ညီၣ် ထီဒါအ၀ဲသ့ၣ်န့ၣ်လီၤ. လၢအဲၤကူပတူး ကမၤဟးဂီၤအ၀ဲသ့ၣ် အလီၢ်န့ၣ်, အ၀ဲသ့ၣ်ကဲထီၣ် အဲၤကူပတူး အကုၢ်အပှၤ န့ၣ်လီၤ.
ကျဲလွံၢ်ဘိတဘိ, တဘျီတခီၣ် ကစၢ်ယွၤမၤအါထီၣ် ၀ံအတၢ်ကတိၤ အတၢ်လၢထီၣ်ပှဲၤထီၣ် န့ၣ်လီၤ. ကစၢ်ယွၤမၤအါထီၣ် ၀ံအတၢ်ကတိၤ အတၢ်လၢထီၣ်ပှဲၤထီၣ်န့ၣ် ပကထံၣ်န့ၢ်ဘၣ်အီၤလၢ လံာ်ဒၤနံၤယ့လး ၉း၁-၂၇ န့ၣ်လီၤ. ပကထံၣ်ဘၣ်လၢ ယွၤဆိၣ်အၢ အပှၤဂီၢ်မုၢ်ခီဖျိ ဘၣ်အိၣ်လီၤဖးဒီး ကီၢ်တၢ်စံးပာ် လၢအနံၣ် ၇၀ အတီၢ်ပူၤ န့ၣ်လီၤ. ဘၣ်ဆၣ်, အနံၣ် ၇၀ ၀ံၤအလီၢ်ခံ, အ၀ဲသ့ၣ် တပီၢ်ယၢ်လီၤက့ၤအသး လၢအတၢ်ဒဲးဘးဒံးဘၣ်. အဃိ ကစၢ်ယွၤမၤအါထီၣ် အတၢ်ကဲကုၢ် ခီဖျိ ထုးထီထီၣ် အီၤန့ၣ်လီၤ.
ဒီးကျဲယဲၢ်ဘိတဘိ, ၀ံအတၢ်စံးပာ် လၢထီၣ်ပှဲၤထီၣ် ညီကဒၣ်သ့၀ဲန့ၣ်လီၤ. အဒိ, လံာ်ဒၤနံၤယ့လး ၄း၂၈, ၃၃ ပာ်ဖျါထီၣ် လၢ၀ံဒၤနံၤယ့လး ကျိာ်ထံ တၢ်မံမီၢ်အတၢ်လၢထီၣ်ပှဲၤထီၣ် န့ၣ်လီၤ. တၢ်မံမီၢ် ကတိၤဆိပာ်စၢၤလၢ စီၤပၤနဘူၤကၤန့စၢ် ကဘၣ်တၢ်နီၣ်ဟးထီၣ်ကွံာ်အီၤလၢ အပှၤကလုာ်အကျါ ဒီးအီၣ်နီၣ်ဒ် ဆၣ်ဖိကီၢ်ဖိ အသိးန့ၣ်လီၤ. တၢ်မံမီၣ်အံၤ ယွၤစံးကတိၤအါထီၣ်အီၤလၢ အဆၢဖိ ၃၀ ဒီး ၃၁ အပူၤ ဖဲနံၣ်ဆၢက့ၤအလီၢ် တနံၣ်၀ံၤ အလီၢ်ခံန့ၣ်လီၤ. ဖဲကစၢ်ယွၤစံးဒံးအံၤ၀ံၤ အလီၢ်ခံသတူၢ်ကလာ်, ဒ်၀ံစံးပာ်၀ဲအသိး ဟဲကဲထီၣ်အသးန့ၣ်လီၤ.
 |
| စီၤပၤနဘူၤကၤန့စၢ်အီၣ်နီၣ်ဒ်ဆၣ်ဖိကီၢ်ဖိအသိး |
ပထိၣ်သတြီၤ ၀ံလၢလံာ်စီဆှံ ပူၤတဖၣ် အတၢ်ဖံးတၢ်မၤဒီး စိၤလၢပျၢၤ တၢ်အၢၣ်လီၤအီလီၤ အခၢၣ်စးတဖၣ်, ဒီးပကွၢ်ကဒါက့ၤ ၀ံအတၢ်ကတိၤအစၢလၢ အကဲထီၣ်အသးသ့၀ံၤ, ခဲအံၤ ပကကွၢ်ကဒါက့ၤ ပှၤတၢ်မၢဖိစီၤယိၤဟၣ် မၤလၢပှဲၤ ၀ံအမူအဒါလၢ လံာ်တၢ်လီၣ်ဖျါ အပူၤ ဒ်လဲၣ်န့ၣ်လီၤ.
ပှၤတၢ်မၢဖိစီၤယိၤဟၣ် (Apostle John)
ဖဲစီၤယိၤဟၣ်ကွဲးလံာ်တၢ်လီၣ်ဖျါ အဆၢကတီၢ် ပထံၣ်အီၤသ့ညီကဒၣ်လၢ အ၀ဲဟူးဂဲၤဒ် ယွၤအတၢ်အၢၣ်လီၤအီလီၤ အခၢၣ်စးတဂၤအသိး, ဒီးအတၢ်တိာ်မ့ၢ်ဒ်သိး ကဟ့ၣ်သဆၣ်ထီၣ် တၢ်အိၣ်ဖှိၣ်တဖၣ် လၢကအိၣ်ဒီး တၢ်သူၣ်တီသးတီ တပယူာ်ဃီ န့ၣ်လီၤ. စီၤယိၤဟၣ် ဒုးသ့ၣ်နီၣ်က့ၤ တၢ်အိၣ်ဖှိၣ်လၢ ကီၢ်အၤစံအပူၤတဖၣ် တလီၢ်လီၢ် ဘၣ်ဃးတၢ်ဂ့ၢ်ခိၣ်သ့ၣ် လၢ လံာ်စီဆှံအတၢ်အၢၣ်လီၤအီလီၤ တဖၣ်အပူၤန့ၣ်လီၤ. အ၀ဲဒုးသ့ၣ်နီၣ်က့ၤ တၢ်အိၣ်ဖှိၣ်တဖၣ် ဘၣ်ဃး ကစၢ်ယွၤ အတၢ်သူၣ်ကညီၤသးကညီၤ တဖၣ်န့ၣ်လီၤ. အ၀ဲပာ်ဖျါထီၣ် တၢ်လိၣ်ဘၣ် ဘၣ်ဃး တၢ်သူၣ်တီသးတီ န့ၣ်လီၤ. ဒီးအ၀ဲ ပာ်ဖျါထီၣ်စ့ၢ်ကီး တၢ်အစၢလၢ ကဟဲကဲထီၣ်အသး ဘၣ်ဃး တၢ်ဆိၣ်ဂ့ၤလၢ ပှၤလၢအသးတီ အဂီၢ်, ဒီး တၢ်ဆိၣ်အၢလၢ ပှၤလၢအသးတတီဘၣ် တဖၣ်အဂီၢ်န့ၣ်လီၤ. |
| ပှၤတၢ်မၢဖိစီၤယိၤဟၣ် |
တၢ်တဖၣ်အံၤ အိၣ်ဖျါထီၣ်လၢကျဲတဘျုးဘိ လၢ လံာ်တၢ်လီၣ်ဖျါ အပူၤန့ၣ်လီၤ. ဘၣ်ဆၣ် တၢ်သ့ၣ်တဖၣ်အံၤ ဖျါထီၣ် တြၢၢ်ကလာ် လၢလံာ်ပရၢဆူ တၢ်အိၣ်ဖှိၣ်နွံဖှိၣ် အအိၣ်လၢ လံာ်တၢ်လီၣ်ဖျါ အဆၢဒိၣ် ၂ ဒီး ၃ အပူၤန့ၣ်လီၤ. လံာ်ပရၢ တဘ့ၣ်စုာ်စုာ် စးထီၣ်အသးလၢ ကစၢ်ယ့ၣ်ရှူးခရံာ် အတၢ်ဒိၣ်တၢ်မုၢ် ဒီး တၢ်သးကညီၤ တဖၣ်န့ၣ်လီၤ. ၀ံၤအလီၢ်ခံ, လံာ်ပရၢ တဖၣ်အံၤဆှၢပှၤဆူ တၢ်လိၣ်ဘၣ် တၢ်သူၣ်တီသးတီ, ဒီး တၢ်ဆိၣ်ဂ့ၤဆိၣ်၀ါ အတၢ်ဟ့ၣ်တဖၣ် မ့တမ့ၢ် တၢ်ဆိၣ်အၢ တဖၣ်န့ၣ်လီၤ.
အဒိတတီၤဖျါဖဲ လံာ်ပရၢဆူ တၢ်အိၣ်ဖှိၣ်လၢ ၀့ၢ်အ့းဖ့းစူး အပူၤ ဖဲလံာ်တၢ်လီၣ်ဖျါ ၂း၁-၇ န့ၣ်လီၤ. တၢ်လီၣ်ဖျါ ၂း၁ စးထီၣ်အသးလၢ ယွၤ အတၢ်သူၣ်အိၣ်သးအိၣ် န့ၣ်လီၤ.
ကွဲးန့ၢ် အ့းဖ့းစူး အတၢ်အိၣ်ဖှိၣ် အကလူး, ပှၤလၢအဟံးဃာ် ဆၣ်နွံဖျၢၣ် လၢအစုထွဲပူၤ, ဒီးဟးလၢ မ့ၣ်အူဒၢ ထူနွံဖျၢၣ် အကျါ တဂၤန့ၣ်, စံးတၢ်ဒ်အံၤ, (တၢ်လီၣ်ဖျါ ၂း၁).ယွၤအတၢ်သးအိၣ် အိၣ်ဖျါထီၣ်လၢ လံာ်တၢ်လီၣ်ဖျါ ၂း၁ အပူၤ, လၢအစံး၀ဲ ယ့ၣ်ရှူးခရံာ်ဟးလၢ မ့ၣ်အူဒၢထူ နွံဖျၢၣ် အကျါ, လၢအဒုးနဲၣ်ဖျါထီၣ် တၢ်အိၣ်ဖှိၣ်နွံဖု လၢလံာ်ပရၢတဘ့ၣ်အံၤ အပူၤန့ၣ်လီၤ. ယွၤတဟးသဒၣ် အ၀ဲသ့ၣ်ဘၣ်, မ့မ့ၢ်တခီ အိၣ်ဒီးအ၀ဲသ့ၣ် ထီဘိန့ၣ်လီၤ.
ပမ့ၢ်ဆဲးဖးဆူညါ လၢလံာ်ပရၢဆူ ၀့ၢ်အ့းဖ့းစူး အပူၤအံၤန့ၣ် ပကထံၣ်ဘၣ်လၢ တၢ်လိၣ်ဘၣ် ဘၣ်ဃးပှၤကညီ အတၢ်သးတီ န့ၣ်လီၤ. အဒိ, လၢအဆၢဖိ ၂-၄ အပူၤ, ယ့ၣ်ရှူးခရံာ် စံးထီၣ်ပတြၢၤ အ့းဖ့းစူး အတၢ်အိၣ်ဖှိၣ် လၢ အမၤတၢ်ဆူၣ် အိၣ်ဒီး တၢ်သးစွံကတုၤ, ဘၣ်ဆၣ် စံး၀ဲလၢ အတၢ်အဲၣ်ခီၣ်ထံး လီၤမၢ်ကွံာ် န့ၣ်လီၤ. အ၀ဲဘၣ်သူၣ်ဘၣ်သး လၢ အ့းဖ့းစူး တၢ်အိၣ်ဖှိၣ်ဖိတဖၣ် သးဟ့ပှၤနံၤကလါ ဖိတဖၣ် အတၢ်ဖံးတၢ်မၤ န့ၣ်လီၤ.
၀ံၤအလီၢ်ခံ လံာ်ပရၢအံၤ ဆှၢပှၤဆူ တၢ်အၢၣ်လီၤအီလီၤအစၢ လၢအကဲထီၣ်အသးသ့ န့ၣ်လီၤ. တၢ်ဆိၣ်အၢ အစၢ လၢပှၤလၢအတဒိကနၣ်တၢ် တဖၣ်အဂီၢ် ပထံၣ်ဘၣ်အီၤသ့လၢ အဆၢဖိ ၅ အပူၤ, ဖဲယ့ၣ်ရှူးခရံာ် စံးလၢ ကသုးကွံာ် တၢ်အိၣ်ဖှိၣ် အမဲၣ်အူထူၣ် ဖဲတၢ်အိၣ်ဖှိၣ် မ့ၢ်တပီၢ်ယၢ်လီၤက့ၤအသး ဒီး ဒိးန့ၢ်က့ၤ တၢ်အဲၣ်ခီၣ်ထံး ဘၣ်အခါန့ၣ်လီၤ. ဒီး တၢ်ဆိၣ်ဂ့ၤအစၢ လၢပှၤလၢအဒိကနၣ်တၢ် တဖၣ်အဂီၢ် ပကထံၣ်ဘၣ်အီၤလၢ အဆၢဖိ ၇ အပူၤ, ဖဲယ့ၣ်ရှူးခရံာ် ဟ့ၣ်လီၤ တၢ်ဆိၣ်ဂ့ၤဆိၣ်၀ါ ဆူပှၤပိာ်အခံလၢအဒိကနၣ်တၢ် တဖၣ်အအိၣ် ဘၣ်ဃးတၢ်ဒိးန့ၢ် သ့ၣ်တၢ်မူ န့ၣ်လီၤ.
ဖဲပှၤတၢ်မၢဖိ စီၤယိၤဟၣ် ကွဲးလံာ်တၢ်လီၣ်ဖျါ အဆၢကတီၢ်, တၢ်အိၣ်ဖှိၣ်လၢ ကီၢ်အၤစံ အပူၤတဖၣ် အတၢ်ဟ့ၣ်လီၤသး လၢ ယွၤအတၢ်အၢၣ်လီၤအီလီၤ အပူၤ အံၤ အိၣ်လၢ တၢ်သးဒ့ဒီ အပူၤန့ၣ်လီၤ. ပှၤတနီၤ စးထီၣ် သးဒ့ဒီ ဘၣ်ဃး ယ့ၣ်ရှူး ခရံာ် အတၢ်ဟဲခံဘျီတဘျီ န့ၣ်လီၤ. ဒီးပှၤအဂၤတနီၤ ကမၢကမၣ်လၢ ယ့ၣ်ရှူးခရံာ်အဘီအမုၢ် ကဒိၣ်ထီၣ်၀ဲဒ်လဲၣ် ဖဲအ၀ဲ သ့ၣ်အကစၢ်ဒၣ်၀ဲ ဘၣ်လဲၤခီဖျိ တၢ်တူၢ်ဘၣ်ခီၣ်ဘၣ်ဒီး တၢ်ထီဒါအီၤ အခါန့ၣ်လီၤ. လၢတၢ်န့ၣ်အဃိ, လၢလံာ်တၢ်လီၣ်ဖျါ ဒီတဘ့ၣ်ညါအပူၤ, ပှၤတၢ်မၢဖိ စီၤယိၤဟၣ် မၤတၢ်ဒ် ယွၤအ၀ံတဂၤလၢ တၢ်အိၣ်ဖှိၣ် တဖၣ်အံၤ အဂီၢ်န့ၣ်လီၤ. အ၀ဲ ဒုးသ့ၣ်နီၣ်ထီၣ်က့ၤ တၢ်အိၣ်ဖှိၣ်တဖၣ် ဘၣ်ဃးယွၤ အတၢ်သူၣ်အိၣ်သးအိၣ် တဖၣ်န့ၣ်လီၤ. အ၀ဲ ဟ့ၣ်ပလီၣ် အပှၤဖးလံာ်ဖိတဖၣ် ဘၣ်ဃး တၢ်ဘၣ်ယိၣ်လၢ ပှၤလၢအသးတတီဘၣ် တဖၣ်အဂီၢ်န့ၣ်လီၤ. ဒီးအ၀ဲဟ့ၣ် တၢ်မုၢ်လၢ်လၢ ခါဆူညါ အဂီၢ် ဒ်သိးကဟ့ၣ်ဂံၢ်ဟ့ၣ်ဘါ အ၀ဲသ့ၣ် ဒ်သိး ကအိၣ်လၢ တၢ်သးတီအပူၤ တုၤခရံာ်ဟဲက့ၤ ခံစုတစုန့ၣ်လီၤ.
){kind=link}
0 Comments