တၢ်ကတိၤလၢညါ
လံာ်တၢ်လီၣ်ဖျါ ၄း၁-၂ စံးဝဲအသိး, တၢ်ထံၣ်တၢ်လၢညါခီ တခါအံၤ အိၣ်ထီၣ်အသးလၢ မူခိၣ်အလီၢ်ပစိာ် ဒီးဒုးနဲၣ်ဖျါထီၣ် တၢ်ကမၤအသးလၢ ကဟဲတဖၣ် ဖဲစီၤယိၤဟၣ်အစိၤအခါ ကမ့ၢ်တၢ်လၢ ကမၤအသးလၢ ခါဆူညါ န့ၣ်လီၤ. တၢ်ထံၣ်တၢ်လၢညါခီ တခါအံၤ တဲတၢ်ဆူ တၢ်အိၣ်ဖှိၣ်ခဲလၢာ် တပူၤဃီ, ဒီးကွၢ်တၢ်ဆူ ခါဆူညါ တၢ်အၢဒီးတၢ်ဂ့ၤ တၢ်သဘံၣ်သဘုၣ် ဒိၣ်ဒိၣ်မုၢ်မုၢ် အဆၢကတီၢ်န့ၣ်လီၤ. တၢ်ထံၣ်တၢ်လၢညါခီတခါ အံၤ ဘၣ်တၢ်ဒုးအိၣ်ထီၣ်အီၤလၢ ကဟ့ၣ်ဂံၢ်ဟ့ၣ်ဘါ စီၤယိၤဟၣ် အပှၤဖးလံာ်ဖိတဖၣ်လၢ ကအိၣ်ဆိးလၢ တၢ်သးတီ အပူၤ ဖဲအဝဲသ့ၣ်အိၣ်လၢ တၢ်သဘံၣ်ဘုၣ်ထီဒါလိာ်သး ဒီး တၢ်ဒဲးဘး ဒီးမုၣ်ကီၤလံၢ် အဆၢကတီၢ်ဒီတကတီၢ်ညါ, မ့ၢ်လၢ ယွၤအခါဆူညါ တၢ်မၤနၢၤ မ့ၢ်တၢ်လီၤတံၢ်လီၤဆဲး အဃိန့ၣ်လီၤ.တၢ်အခီၣ်ထံးကတၢၢ်တမံၤ လၢပကဘၣ်သ့ၣ်ညါဆိ ဘၣ်ဃး စီၤယိၤဟၣ် အတၢ်ထံၣ်တၢ်လၢညါခီ ဘၣ်ဃး တၢ်ကမၤအသးလၢအကဟဲတဖၣ် အံၤ ပၣ်ဃုာ်ဒီး တၢ်ထံၣ်တၢ်လၢညါခီ ဖုၣ်ကိာ်ဖိ လွံၢ်ခါ, လၢအမ့ၢ် တၢ်ပနီၣ်နွံခါ, ကွဲၤနွံဖျၢၣ်, တၢ်စံၣ်စိၤတဲစိၤ နွံခါ, ဒီး လီခီထူနွံဖျၢၣ် န့ၣ်လီၤ. ပှၤကျိာ်ထံတၢ်တနီၤ နာ်ဝဲလၢ တၢ်ထံၣ်တၢ်လၢညါခီ ဖုၣ်ကိာ်တဖၣ်အံၤ ကြၢးဘၣ်တၢ်ဖး အီၤ တခါဝံၤတခါ, မ့ၢ်လၢ အဝဲသ့ၣ် ဒုးနဲၣ်ဖျါထီၣ် တၢ်စံၣ်စိၤတဲစိၤ တကတီၢ်ဝံၤ တကတီၢ် အဃိန့ၣ်လီၤ. ဘၣ်ဆၣ်, ဘၣ်ဃးတၢ်ဂ့ၢ်အံၤ စီၤယိၤဟၣ် တတဲဖျါထီၣ်နီတဘျီဘၣ်.
ဘၣ်ဆၣ် တမံၤန့ၣ်, တၢ်ကတိၤလၢ အဒုးစဲဘူး တၢ်ဂ့ၢ်လွံၢ်ခါ အံၤ လၢအမ့ၢ် “တၢ်အံၤဝံၤအလီၢ်ခံ” အံၤ မ့ၢ်တၢ်ပာ်ဖျါထီၣ် တၢ်ထံၣ်တၢ်လၢညါခီ တခါဝံၤတခါ လၢစီၤယိၤဟၣ်ထံၣ်ဝဲ, ဒီး တမ့ၢ် တၢ်ကမၤအသး တခါဝံၤတခါလၢ ကဟဲကဲထီၣ်အသး န့ၣ်ဘၣ်.
အဂၤတမံၤ, ဘၣ်ဃး တၢ်ထံၣ်တဖၣ်အံၤ တၢ်ကဲထီၣ်အသးဒ် တၢ်ထံၣ်တၢ်လၢညါခီ အသိးအိၣ်ဝဲ အါန့ၢ်ဒံး တဘျီဒံး န့ၣ်လီၤ. လၢတၢ်န့ၣ်အဃိ, လၢပတၢ်မၤလိတခါ အံၤအပူၤ ပကဟံးန့ၢ်တၢ်ကျိာ်ထံတၢ်အကျဲသနူ တခါလၢ အမ့ၢ် “တၢ်တဲကဒါက့ၤတၢ်လၢကျဲအဂၤတဘိ” (Recapitulation) န့ၣ်လီၤ.
တၢ်တဲကဒါက့ၤတၢ်လၢ ကျဲအဂၤတဘိ ကဲထီၣ်အသးညီနုၢ်ဖဲ လံာ်စီဆှံ အဆၢဖိလၢ လီၢ်ခံတဖၣ် တဲကဒါက့ၤ လံာ်စီဆှံအဆၢဖိလၢ အမဲာ်ညါ တဖၣ် အတၢ်တဲ န့ၣ်လီၤ. ပမ့ၢ်ကွၢ်လၢ လံာ်တၢ်လီၣ်ဖျါ အပူၤန့ၣ်, တၢ်တဲကဒါ က့ၤတၢ်လၢ ကျဲအဂၤတဘိအံၤ မ့ၢ်ဝဲ တၢ်ထံၣ်တၢ်လၢညါခီ တဖၣ်တဲဘၣ်ဃး တၢ်ဆၢကတီၢ်ဒီကတီၢ် လၢ ခရံာ်အတၢ်ဟဲတၢတဘျီ ဒီး ခံဘျီတဘျီ အဘၢၣ်စၢၤ, ဘၣ်ဆၣ်ဃုာ်ဒၣ်ဒီး အကစၢ်ဒၣ်ဝဲအ ဂ့ၢ်အကျိၤ ဒၣ်ဝဲစုာ်စုာ်န့ၣ်လီၤ.
တၢ်တဲကဒါက့ၤတၢ်လၢ ကျဲအဂၤတဘိ အံၤ လၢလံာ်စီဆှံ လံာ်ဝံတဖၣ် တပူၤ ဘၣ်တၢ်ပာ်ဖျါထီၣ်အီၤအါမး န့ၣ်လီၤ. ဝံတဖၣ်လၢ လံာ်စီဆှံ အလီၢ်လံၤအပူၤ အါစုအါဘျီ သူကျိၤကျဲတဘိအံၤ, လီဆီဒၣ်တၢ် ဖဲအတဲကဒါ က့ၤ တၢ်မၤအသး တခါဃီ ဖဲ လံာ်စီဆှံ အဂၤ တတီၤ အခါန့ၣ်လီၤ. တဘျီတခီၣ်, တၢ်တဲကဒါက့ၤ တၢ်လၢ ကျဲအဂၤတဘိ သူတၢ်ဂ့ၢ် တခါဃီ, ဒ်လံာ် ဝံယံးရမံယၤ ၃၀ ဒီး ၃၁ ဖဲဝံယံးရမံယၤ တဲဘၣ်ဃး တၢ်မၤသီထီၣ် က့ၤ ပှၤအံၣ်စရ့လးဖိ အဂ့ၢ်န့ၣ်လီၤ. ဝံအဂၤတဂၤ သူဝဲကျိၤကျဲတခါအံၤ ခီဖျိ တဲဖျါထီၣ်ကဒါက့ၤ တၢ်မၤအသးတခါဃီ လၢ ကျဲအဂၤတဘိ, ဒ် ၀ံယရှါယၤ ၉ ဒီး ၁၁, ဖဲဝံယရှါယၤ တဲတၢ်ဘၣ်ဃး မ့ၤရှံအၤ အတၢ်ဟဲ န့ၣ်လီၤ.
ပထံၣ်န့ၢ်တၢ်တမံၤဃီအံၤ သ့ဖဲပကွၢ် ကစၢ်ယွၤ အတၢ်စံၣ်ညီၣ်ထီဒါ ပှၤအံၣ်စရ့လးဖိ ဖဲလံာ်ဟိၤရှ့ ၉ တုၤ ၁၄ အပူၤ န့ၣ်လီၤ. ပကထံၣ်ဘၣ်စ့ၢ်ကီး တၢ်အဒိဒ်အံၤ အါမးလၢ လံာ်စီဆှံ အပူၤန့ၣ်လီၤ. အဃိ, ဖဲစီၤယိၤဟၣ် သူကျိၤကျဲဒ်အံၤလၢ လံာ်တၢ်လီၣ်ဖျါ အပူၤအခါ, အ၀ဲသူ တၢ်လၢပှၤသ့ၣ်ညါ အီၤညီနုၢ် ဒ်သိး ကဒုးသ့ၣ်ညါ အတၢ် ကစီၣ်အဂီၢ်န့ၣ်လီၤ.
လၢစီၤယိၤဟၣ် အတၢ်ထံၣ်တၢ်လၢညါခီတဖၣ်အပူၤ ပကထံၣ်န့ၢ် တၢ်ကွဲးတဖၣ် လၢအတဲ၀ဲလီၤတံၢ်လီၤဆဲးလၢ စီၤယိၤဟၣ်သူ ကွဲး၀ဲတၢ်မၤအသး လၢအဒ်သိးလိာ်သး လၢကျဲအဂၤတဘိ န့ၣ်လီၤ. အဒိ, တၢ်ထံၣ်လၢစီၤယိၤဟၣ်ကွဲး၀ဲ လၢအမ့ၢ် တၢ်စံၣ်ညီၣ် လၢခံကတၢၢ် န့ၣ် အိၣ်ဖျါထီၣ် သၢဘျီညါန့ၣ်လီၤ.
လံာ်တၢ်လီၣ်ဖျါ ၆း၁၂-၁၆, လၢအပၣ်ဃုာ်လၢ တၢ်ထံၣ်တၢ်လၢညါခီဘၣ်ဃး တၢ်ပနီၣ်နွံခါ အပူၤ, မုၢ်ခံးသူလီၤ, လါကဲထီၣ်ဒ်တၢ်သွံၣ်, ဆၣ်လီၤတဲာ်လၢဟီၣ်ခိၣ်, ဒီး ပှၤကိးဂၤဒဲးလၢ အအိၣ်လၢ ဟီၣ်ခိၣ်လိၤ ဃ့ၢ်ခူသူၣ် ယွၤအတၢ်စံၣ်ညီၣ်န့ၣ်လီၤ. လံာ်တၢ်လီၣ်ဖျါ ၁၁း၁၅, လၢအပၣ်ဃုာ်လၢ တၢ်ထံၣ်တၢ်လၢညါခီဘၣ်ဃး ကွဲၤနွံဖျၢၣ် အပူၤ, တၢ်ကလုၢ်သီၣ်ဖးဒိၣ်စံး၀ဲ, "ဟီၣ်ခိၣ် အဘီအမုၢ်ကဲထီၣ် လၢပကစၢ်အတၢ်, ဒီးခရံာ်အတၢ်, ဒီးကပၢ၀ဲလီၤထူလီၤယိာ်လီၤ." လံာ်တၢ်လီၣ်ဖျါ ၁၅း၁, လၢအပၣ်ဃုာ်လၢ တၢ်ထံၣ်တၢ်လၢညါခီ ဘၣ်ဃး လီခီထူနွံဖျၢၣ်အပူၤ, တၢ်စံးဘၣ်ပှၤလၢ ဖဲလီခီထူနွံဖျၢၣ် ဘၣ်တၢ်လူလီၤအီၤန့ၣ်, ယွၤအတၢ်သးဒိၣ်ထီၣ် ကကတၢၢ်ကွံာ်၀ဲ န့ၣ်လီၤ.
လံာ်စီဆှံအဆၢ တခါစုာ်စုာ်အံၤ တဲပှၤဘၣ်ဃး တၢ်ကမၤအသးလၢ ခရံာ်အတၢ်ဟဲက့ၤခံဘျီတဘျီ အခါ ဒီး ယွၤအတၢ်စံၣ်ညီၣ်လၢခံကတၢၢ်လၢ ဟီၣ်ခိၣ်အံၤ န့ၣ်လီၤ. ဘၣ်ဆၣ် တၢ်ထံၣ်တခါစုာ်စုာ် ပၣ်ဃုာ်ဒီး တၢ်ဂ့ၢ်အဂၤတဖၣ် လၢအတဲဘၣ်ဃး တၢ်စံၣ်ညီၣ်လၢခံကတၢၢ်န့ၣ်လီၤ. လၢတၢ်န့ၣ်အဃိ, အဂ့ၤကတၢၢ် ပကဖးတၢ်ထံၣ်တခါ စုာ်စုာ် လီၤတံၢ်လီၤဆဲး လၢအတဲဘၣ်ဃး ယွၤအဘီအမုၢ် အတၢ်စံၣ်စိၤတဲစိၤတချုး ခရံာ်ဟဲက့ၤခံစုတစု န့ၣ်လီၤ.
ဒ်ပထံၣ်ဘၣ်လံအသိး, စီၤယိၤဟၣ် အတၢ်ထံၣ်တၢ်လၢညါခီဘၣ်ဃး တၢ်ကမၤသး ဆူညါ အံၤ ဘၣ်တၢ်နီၤဖးအီၤ လွံၢ်ကုာ် လၢအမ့ၢ် တၢ်ထံၣ်တၢ်လၢညါခီဘၣ်ဃး တၢ်ပနီၣ်နွံခါ, ကွဲၤနွံဖျၢၣ်, တၢ်စံၣ်စိၤတဲစိၤအတၢ်ပနီၣ်နွံခါ, ဒီးလီခီထူနွံဘ့ၣ် န့ၣ်လီၤ. ပကကွၢ်သကိး တၢ်ထံၣ်တၢ်လၢညါခီ တခါစုာ်စုာ် အဂ့ၢ်, ဒီးပကစးထီၣ်အဆိကတၢၢ်လၢ တၢ်ပနီၣ်နွံခါ န့ၣ်လီၤ.
တၢ်ပနီၣ်နွံခါ (Seven Seals)
တၢ်ထံၣ်တၢ်လၢညါခီ ဘၣ်ဃးတၢ်ပနီၣ်နွံခါ ဘၣ်တၢ်နီၤဖးအီၤ ခံတီၤ, ဒီးပကစးထီၣ် အီၤအဆိကတၢၢ် တတီၤလၢ ယွၤအလီၢ်ပစိာ်အဒၢး လၢမူခိၣ် လၢတၢ်လီၣ်ဖျါ ၄ ဒီး ၅ အပူၤန့ၣ်လီၤ. တၢ်ထံၣ်တၢ်လၢညါခီ အံၤဒုးနဲၣ်ပှၤ လံာ်ထူလၢအရ့ဒိၣ် လၢအပၣ်ဃုာ်ဒီး တၢ်ပနီၣ်နွံခါ န့ၣ်လီၤ.တၢ်လီၣ်ဖျါ ၄း၁-၁၁ တဲပှၤဘၣ်ဃး တၢ်မၤအသးလၢ ယွၤအလီၢ်ပစိာ်အဒၢးပူၤ, ဒီး တၢ်ထံၣ်တၢ်လၢညါခီအံၤ လီၤဂာ်လိာ်အသးဒီး ယဃ့းစက့လး ၁, ယရှါယၤ ၆, ဒီး လံာ်အဂၤတဖၣ်လၢ လံာ်စီဆှံအလီၢ်လံၤတကတြူၢ်အပူၤန့ၣ်လီၤ. ယွၤဆ့ၣ်နီၤလၢ အလီၢ်ပစိာ်အလိၤ, ဒီးတၢ်ဘၣ်တ့လၢအအိၣ်လၢ မူခိၣ်ဘီမုၢ်အပူၤတဖၣ် ဘူၣ်ထီၣ်ဘါထီၣ်အီၤ, ဃုာ်ဒီးတၢ်အသးလွံၢ်ဒု လၢစီၤယိၤဟၣ်တဲ၀ဲအဂ့ၢ် လီၤတံၢ်လီၤဆဲး န့ၣ်လီၤ. တၢ်အသးလွံၢ်ဒု လၢပှဲၤ၀ဲဒီး တၢ်မဲာ်ချံတဖၣ် ဒီးအိၣ်ဒီး အဒံးဆ့ဃုဘ့ၣ် စုာ်စုာ် န့ၣ်လီၤ. ဘၣ်ဆၣ်အတၢ်အိၣ်ဖျါ လီၤဆီလိာ်သး, အခီၣ်ထံးတဒုဖျါဒ် ခ့ယုၢ်အသိး, ခံဒုတဒုလီၤဂာ်ဒ် ဂီၤဖံးအသိး, သၢဒုတဒုလီၤဂာ်ဒ် ပှၤကညီအသိး, ဒီးလွံၢ်ဒုတဒု လီၤဂာ်ဒ် လံာ်ဖးဒိၣ် အသိးန့ၣ်လီၤ. ဘၣ်တဘၣ် အ၀ဲသ့ၣ်မ့ၢ် တၢ်ဘၣ်တ့လၢ အအိၣ်လၢဟီၣ်ခိၣ်ချၢခဲလၢာ် အခၢၣ်စးတဖၣ် လၢအစံးထီၣ်ပတြၢၤကစၢ်ယွၤ န့ၣ်လီၤ.
စီၤယိၤဟၣ် အတၢ်ထံၣ်တၢ်လၢညါခီ ဒုးနဲၣ်စ့ၢ်ကီး ပှၤသူၣ်က့သးပှၢ် ၂၄ ဂၤ အိၣ်၀းတရံး ယွၤအလီၢ်ပစိာ်, ဘၣ်တဘၣ် ကမ့ၢ် အံၣ်စရ့လး ၁၂ ဒူၣ်လၢ လံာ်စီဆှံအလီၢ်လံၤ တကတြူၢ်အပူၤ, ဒီး ပှၤတၢ်မၢဖိ ၁၂ ဂၤလၢ လံာ်စီဆှံအသီတကတြူၢ် အပူၤ အတၢ်ဂံၢ် န့ၣ်လီၤ. ပှၤသူၣ်က့သးပှၢ်တဖၣ်အံၤ မ့ၢ်၀ဲ ယွၤအပှၤကညီ လၢတၢ်စံၣ်စိၤတဲစိၤ အပူၤ တဖၣ်အတၢ်ပနီၣ် န့ၣ်လီၤ. ဖဲတၢ်အသးလွံၢ်ဒု စံးထီၣ်ပတြၢၤယွၤ တဘျီလၢ်လၢ်, ပှၤသူၣ်က့သးပှၢ်တဖၣ် တီၤလီၤကဒွံကျိၤ, ဒီးသ့ၣ်ညါပာ်ပနီၣ် ယွၤအတၢ်စိတၢ်ကမီၤ, ဒီး အၢၣ်လီၤအသးလၢ ကဟ့ၣ်လီၤအသး, ကဒိကနၣ်အီၤ, ဒီး ကယူးယီၣ်အီၤ န့ၣ်လီၤ. လၢပှၤသူၣ်က့သးပှၢ် တဖၣ်အလီၢ်ခံန့ၣ် အိၣ်ဒီး မူခိၣ်ကလူး ဂီၢ်မုၢ်ဂီၢ်ပၤ လၢ အမၤဟူထီၣ် တၢ်စံးထီၣ်ပတြၢၤယွၤ အသီၣ်ဆူတၢ်ချၢတခီ, ဒီးစံးထီၣ်ပတြၢၤစ့ၢ်ကီး ယွၤအသိဖိ န့ၣ်လီၤ.
တၢ်မၤအသးတခါအံၤ လီၤဂာ် တၢ်ဂ့ၢ်လၢ လံာ်စီဆှံအလီၢ်လံၤတကတြူၢ် အဒဲစီဆှံ ဒီးအတၢ်လုၢ်ဟံၣ်, လၢအမ့ၢ် မ့ၣ်အူဒၢတဖၣ် ကပီၤထီၣ်လၢ လီၢ်ပစိာ်အမဲာ်ညါ, ယွၤအပှၤဂီၢ်မုၢ်တဖၣ် အတၢ်ထုကဖၣ် ဟဲနၢမူထီၣ်, ပီၣ်လဲၣ်ယွၤခၣ်စိး လီၤဂာ်လၢ လၢၢ်ဖျါကလၤ, ဒီးအိၣ်ဒီး တၢ်သး၀ံၣ်စံးထီၣ်ပတြၢၤယွၤ လၢအလီၤဂာ်ဒီး ပှၤသး၀ံၣ်တၢ် ဖိလၢလံာ်လွံၢ်မိၤရှ့ ပာ်ဖျါထီၣ်၀ဲန့ၣ်လီၤ. တၢ်ပနီၣ်အံၤ ပာ်ဖျါထီၣ်လၢ စီၤယိၤဟၣ် ဘၣ်တၢ်ဟ့ၣ်အီၤ တၢ်ထံၣ်လၢ ယွၤအမူခိၣ်လီၢ်ပစိာ်အဒၢးပူၤ, ဒီဖဲန့ၣ် အ၀ဲပၢ၀ဲ တၢ်ဘၣ်တ့ခဲလၢာ် ဒီး ဖဲန့ၣ် အ၀ဲကစံၣ်ညီၣ်တၢ် န့ၣ်လီၤ. ဒီး တၢ်ထံၣ်အံၤ တဲဘၣ် စီၤယိၤဟၣ်အ ပှၤဖးလံာ်ဖိတဖၣ်ဘၣ်ဃး တၢ်ဂ့ၢ်လၢအရ့ဒိၣ်တမံၤ န့ၣ်လီၤ.
မူခိၣ်ဘီမုၢ်အတၢ်ထံၣ်အံၤ ဆဲးလဲၤအသးဆူညါ လၢ တၢ်လီၣ်ဖျါ ၅း၁-၁၄ အပူၤန့ၣ်လီၤ. ယွၤဖီၣ်လံာ်ထူလၢ အစုထွဲတခီ, လၢအဒုးနဲၣ်ဖျါထီၣ် အတၢ်တိာ်ကျဲၤလၢ ဟီၣ်ခိၣ်ဖိ အဂီၢ်န့ၣ်လီၤ. ဘၣ်ဆၣ် ပှၤအိးထီၣ် လံာ်ထူအံၤတသ့ နီတဂၤဘၣ်. ပမ့ဘၣ်တဲ လၢ တၢ်ကတိၤအဂၤန့ၣ်, ပှၤမၤလၢပှဲၤ အတၢ်တိာ်ကျဲၤတသ့ နီတဂၤဘၣ်. ၀ံၤအလီၢ်ခံ, သူၣ်က့သးပှၢ် အကျါတဂၤ တဲဘၣ်စီၤယိၤဟၣ်လၢ ခ့ယုၢ်လၢ ယူဒၤ အဒူၣ်အကျါ ကအိးထီၣ် တၢ်ပနီၣ်နွံမံၤ ဒီး ဖးလံာ်ထူအံၤ န့ၣ်လီၤ.
တၢ်ကတိၤဘၣ်ဃး ခ့ယုၢ်လၢယူဒၤအဒူၣ်အကျါ အံၤ ဘၣ်တၢ်ဟံးန့ၢ်အီၤလၢ ၁မိၤရှ ၄၉း၉-၁၀, လၢအစံး၀ဲ -
ယူဒၤမ့ၢ် ခ့ယုၢ်ဆံးတဒု, ... စီၤပၤအနီၣ်ထိး တဟးထီၣ်လၢ ယူဒၤအအိၣ်, ပှၤဟ့ၣ်တၢ်သိၣ်တၢ်သီ တဟးထီၣ်ကွံာ်လၢ အခီၣ်ကဆူး, တုၤတၢ်မၤဃူမၤဖိး တၢ်ဟဲ, ဒီးပှၤဂီၢ်မုၢ် ကဒိကနၣ် အကလုၢ်လီၤ. (၁မိၤရှ့ ၄၉း၉-၁၀)၀ံအတၢ်ကတိၤအံၤ ပာ်ဖျါထီၣ်လၢ ယူဒၤ ကပၢဘၣ် အံၣ်စရ့လး အဒူၣ်အဂၤတဖၣ်, ဒီးလီၢ်ခံကတၢၢ် ကဒုးအိၣ်ထီၣ်စီၤပၤလၢ ကပၢဟီၣ်ခိၣ်ဒီတဘ့ၣ် ညါန့ၣ်လီၤ.
ဘၣ်ဆၣ် ဖဲစီၤယိၤဟၣ် ကွၢ်တၢ်အဆၢကတီၢ်, တၢ်လီၤကမၢကမၣ်ဘၣ် အီၤဖဲ အထံၣ်လၢ ယူဒၤအခ့ယုၢ် အနီၢ်ကီၢ်န့ၣ်မ့ၢ်ဒၣ် သိဖိတဒု, လၢအဖျါလီၤဂာ်လၢ ကဘၣ်တၢ်မၤသံအီၤ န့ၣ်လီၤ. မ့ၢ်သပှၢ်ကတၢၢ်, သိဖိတဒုန့ၣ်မ့ၢ် ကစၢ်ခရံာ်န့ၣ်လီၤ. အ၀ဲဟဲလီၤစၢၤလၢ ယူဒၤအဒူၣ်, မ့ၢ်အံၣ်စရ့လး အစီၤပၤ န့ၣ်လီၤ. ဒီးအ၀ဲကဲထီၣ် ဘူၣ်လဲၤကပာ်အသိဖိ လၢအဟ့ၣ်လီၤအသးလၢ တၢ်ကမၤသံအီၤ, ဒ်ပဖးလၢ လံာ်ယိၤဟၣ် ၁း၂၉ အပူၤအသိးန့ၣ်လီၤ. ကစၢ်ခရံာ်အိးထီၣ် လံာ်ထူအံၤ သ့လီၤန့ၣ် ပာ်ဖျါထီၣ်လၢ အ၀ဲမ့ၢ်ပှၤတဂၤလၢ ခီဖျိလၢအီၤအဃိ ယွၤကမၤလၢပှဲၤ အတၢ်သုးတၢ်ကျဲၤ လၢဟီၣ်ခိၣ်အဂီၢ် ခဲလၢာ်န့ၣ်လီၤ.
တၢ်ထံၣ်ခံတီၤတတီၤ ဘၣ်ဃး တၢ်ထံၣ်တၢ်လၢညါခီ ဘၣ်ဃးတၢ်ပနီၣ်နွံမံၤ အံၤ မ့ၢ်တၢ်လၢအဘၣ်ဃးဒီး တၢ်အိးထီၣ်တၢ်ပနီၣ်တဖၣ်အံၤ လၢလံာ်တၢ်လီၣ်ဖျါ ၆း၁ - ၈း၁ န့ၣ်လီၤ. လံာ်စီဆှံတတီၤအံၤ စံးဘၣ်ဃး တၢ်အိးထီၣ် တၢ်ပနီၣ်ဃုခါ, ၀ံၤပိာ်ထွဲ ထီၣ်အခံ ဒီး တၢ်ဂ့ၢ်ဆှၢနုာ််တနီၤ, ၀ံၤမး တၢ်အိးထီၣ်တၢ်ပနီၣ်နီၣ်ဂံၢ် နွံ ပိာ်ထွဲထီၣ် အခံန့ၣ်လီၤ.
တၢ်ပနီၣ်အခီၣ်ထံးလွံၢ်ခါ ပျဲလီၤ ပှၤဒိးကသ့ၣ်လွံၢ်ဂၤ လၢအဟဲစိာ် တၢ်မၤအၢမၤနး တဖၣ်ဆူ ဟီၣ်ခိၣ်ချၢန့ၣ်လီၤ. ပှၤဒိးကသ့ၣ် လွံၢ်ဂၤအံၤ ဘၣ်တၢ်ဟံးန့ၢ်အီၤလၢ ၀ံစကၤရယၤ ၆ အပူၤ, လၢအတဲဘၣ်ဃး ကသ့ၣ်လွံၢ်ဒု လၢအအိၣ်ဒီး အလွဲၢ်လၢ အလီၤဂာ်လိာ်သး မ့ၢ် သးလွံၢ်ဖျၢၣ်လၢ မူခိၣ် န့ၣ်လီၤ. ဖဲတၢ်ပနီၣ်တၢတခါ ဘၣ်တၢ်အိးထီၣ်အီၤန့ၣ်, ပှၤလၢအဒိး ကသ့ၣ်၀ါ တဂၤ မၤနၢၤ ထံကီၢ်တဖၣ်န့ၣ်လီၤ. တၢ်ပနီၣ်ခံ ခါတခါ ဟဲစိာ်ပှၤဒိးကသ့ၣ် လၢအဒိး ကသ့ၣ်ဂီၤဆှူၣ်ကလာ်တဒု လၢအဟဲစိာ် တၢ်မၤသံမၤ၀ီ န့ၣ်လီၤ.
တၢ်ဒုးတၢ်ယၤ န့ၣ် မ့ၢ်တၢ်မၤသံမၤ၀ီအပနီၣ်, ဘၣ်ဆၣ်ဖဲအံၤ ပကထံၣ်ဘၣ်လၢ အဘၣ်ထွဲလိာ်အသးစ့ၢ်ကီးဒီး တၢ်မၤသံပှၤကညီလၢ ကျဲအဂၤ တဖၣ်န့ၣ်လီၤ. တၢ်ပနီၣ်သၢခါတခါ ဒုးကဲထီၣ် ပှၤလၢအဒိး ကသ့ၣ်သူ တဂၤ လၢအဟဲစိာ် တၢ်သၣ်၀ံၤလီၤဒိ န့ၣ်လီၤ. ဒီး တၢ်ပနီၣ်လွံၢ်ခါတခါ ဟဲစိာ်ပှၤလၢ အဒိးကသ့ၣ်လၢ ဘၣ်တၢ်ကိးအီၤလၢ တၢ်သံ, ပှၤတဂၤအံၤ ဒိး၀ဲ ဒီး ကသ့ၣ်၀ါလါ တဒု ဒီးဟဲစိာ် တၢ်သံခီဖျိ လၢနး, ဒီးလၢ တၢ်သၣ်၀ံၤလီၤ ဒိ, ဒီးလၢ တၢ်သံ, ဒီးလၢ ဟီၣ်ခိၣ်တၢ်ဒူတၢ်ဃိၤ န့ၣ်လီၤ. တၢ်မၤသံမၤ၀ီလၢ ဆှူၣ်မဲာ်ကဲၤမဲာ်အံၤ ဟီၣ်ခိၣ်ချၢ လွံၢ်ပူတပူ ဘၣ်လဲၤခီဖျိ၀ဲ, ဒီးပှၤအါဂၤ ပူၤဖျဲးလၢ ယွၤအတၢ်စံၣ်ညီၣ် န့ၣ်လီၤ.
ဖဲတၢ်ပနီၣ်ယဲၢ်ခါတခါ ဘၣ်တၢ်အိးထီၣ်အီၤန့ၣ်, စီၤယိၤဟၣ်ထံၣ် ခရံာ်ဖိ အမၤထူရၤ တဖၣ် လၢမူခိၣ်ဘီမုၢ်အပူၤန့ၣ်လီၤ. ပှၤစီဆှံ တဖၣ်အံၤ ဘၣ်တၢ်မၤသံအီၤ မ့ၢ်လၢ အ၀ဲသ့ၣ်သးတီဒီး ယွၤဒီး အကတၢ်ကတိၤ အဃိန့ၣ်လီၤ. အ၀ဲသ့ၣ်ဃ့ထီၣ်၀ဲလၢ ယွၤကစံၣ်ညီၣ် ပှၤလၢအမၤအၢမၤသီ အ၀ဲသ့ၣ်, ဘၣ်ဆၣ် ဘၣ်တၢ်စံးဘၣ်အီၤလၢ ယွၤတဟဲစိာ် အတၢ်တီတၢ်လိၤ ခဲလၢာ်ဒံးဘၣ်. အ၀ဲသ့ၣ် ကဘၣ်အိၣ်ဒီး တၢ်၀ံသးစူၤ, တုၤလၢ နီၣ်ဂံၢ်လၢ ပှၤလၢအကဘၣ်တၢ်မၤသံအီၤဒ် မၤထူရၤအသိး လၢထီၣ်ပှဲၤထီၣ် ၀ဲန့ၣ်လီၤ.
ဖဲတၢ်ပနီၣ်ဃုခါတခါ ဘၣ်တၢ်အိးထီၣ်အီၤအခါ, ဟီၣ်ခိၣ်ဒီဘ့ၣ်ညါ ဘၣ်လဲၤခီဖျိ ယွၤအတၢ်စံၣ်ညီၣ် န့ၣ်လီၤ. ဟီၣ်ခိၣ်ဟူး၀းဆှဲးဆှိး, မုၢ်ထီၣ်သူထီၣ်, လါကဲထီၣ်တၢ်သွံၣ်, ဆၣ်လီၤတဲာ်လၢ ဟီၣ်ခိၣ်လိၤ, မူကပိာ်လိာ် ဒံကွံာ်ဒံဖျိး၀ဲ, ဒီး ကစၢၢ်ဒီး ကီးတဖၣ် သုးကွံာ် အသးန့ၣ်လီၤ. တၢ်ကွဲးအ၀ဲအံၤ ဒုးသ့ၣ်နီၣ် ပှၤလၢ ၀ံအတၢ်ကတိၤလၢ လံာ်စီဆှံအလီၢ်လံၤအပူၤ လၢအဘၣ်ဃးဒီး ထံရူၢ်ကီၢ်သဲး အတၢ်ဘၣ်ဂံာ်ဂူာ်, ဒ်ပထံၣ်ဘၣ်အီၤလၢ ၀ံယရှါယၤ ၃၄း၁-၄ ဒီး ယိၤအ့လး ၂း၁၀-၁၁ အပူၤအသိးန့ၣ်လီၤ. အ၀ဲအံၤမ့ၢ် ကျဲတဘိလၢ တၢ်စံးကတိၤအီၤ ဘၣ်ဃး ကစၢ်ယွၤအတၢ်ဟဲစိာ် တၢ်စံၣ်ညီၣ်လၢခံကတၢၢ် လၢ အကမၤဟးဂီၤ ဟီၣ်ခိၣ်လၢ အအၢအသီ တဘ့ၣ်အံၤ န့ၣ်လီၤ.
တၢ်အိးထီၣ် တၢ်ပနီၣ်ဃုခါတခါ၀ံၤ တချုးတၢ်အိးထီၣ် တၢ်ပနီၣ်နွံခါတခါ န့ၣ်, လၢလံာ်တၢ်လီၣ်ဖျါ ၇ အပူၤ တၢ်တဲဘၣ်ဃး တၢ်ဂ့ၢ်အဂၤ အိၣ်ထီၣ်၀ဲန့ၣ်လီၤ. တၢ်ဂ့ၢ်အ၀ဲအံၤ တဲဘၣ်ဃး တၢ်အိၣ်ဖှိၣ် အဂ့ၢ် လၢအပာ်ဖျါထီၣ် ယွၤအတၢ်ကဟုကယာ် အပှၤဂီၢ်မုၢ် န့ၣ်လီၤ. အခီၣ်ထံးကတၢၢ်, စီၤယိၤဟၣ်နၢ်ဟူ တၢ်ဘိးဘၣ်ရၤလီၤလၢ အံၣ်စရ့လး တဒူၣ်စုာ်စုာ်အပူၤ ပှၤအဂၤ တကလးခံကထိဂၤ, ခဲလၢာ် တကလီၢ်လွံၢ်ကလးလွံၢ်ကထိဂၤ, ဘၣ်တၢ်စဲပနီၣ်အီၤလၢယွၤ လၢအကကဲထီၣ် အပှၤဂီၢ်မုၢ်လီၤဆီ န့ၣ်လီၤ. ပှၤတကလီၢ်လွံၢ်ကလးလွံၢ်ကထိဂၤ အဂ့ၢ် တၢ်နၢ်ပၢၢ်အီၤမ့ၢ်လီၤဆီ လိာ်အသးစုာ်စုာ်ဘၣ်ဆၣ်, လံာ်တၢ်လီၣ်ဖျါတဲလၢ စီၤယိၤဟၣ်နၢ်ဟူ တၢ်ဘိးဘၣ် ရၤလီၤ ဘၣ်ဃး ပှၤ တကလီၢ်လွံၢ်ကလးလွံၢ်ကထိ ဂၤအဂ့ၢ်, ဘၣ်ဆၣ် ဖဲအ၀ဲဃၣ်အသးဒီး ကွၢ်တၢ်အခါ အ၀ဲထံၣ်တၢ်လၢ အလီၤဆီန့ၣ်လီၤ.
ပကဒိကနၣ်သကိး စီၤယိၤဟၣ်ပာ်ဖျါထီၣ် အီၤလၢ လံာ်တၢ်လီၣ်ဖျါ ၇း၉ အပူၤန့ၣ်တက့ၢ်.
တၢ်န့ၣ်တဖၣ်အလီၢ်ခံဒီး, ယထံၣ်တၢ်, ဒီးကွၢ်ကွၢ်, ပှၤဂီၢ်မုၢ်ဖးဒိၣ်လၢ ပှၤဂံၢ်ထီၣ်တသ့ ဘၣ်နီတဂၤဘၣ်န့ၣ်, ဟဲလၢကယဲၢ်ပှၤကလုာ်, ဒီးကယဲၢ် ပှၤအဒူၣ်, ဒီးကယဲၢ်ပှၤဂီၢ်မုၢ်, ဒီးကယဲၢ်ပှၤကတိၤတၢ် အကျိာ် အကလုာ်ကလုာ် အကျါသ့ၣ်တဖၣ်န့ၣ် ဆၢထၢၣ် လၢလီၢ်ပစိာ်အမဲာ်ညါ ဒီးသိဖိအမဲာ်ညါ ... (တၢ်လီၣ်ဖျါ ၇း၉).တၢ်လၢအလီၤဂာ်လိာ်အသးဒ်အံၤ အိၣ်ဖျါထီၣ်စ့ၢ်ကီးလၢ တၢ်လီၣ်ဖျါ ၅ အပူၤန့ၣ်လီၤ. စီၤယိၤဟၣ်နၢ်ဟူတၢ်ဘိးဘၣ်ရၤလီၤ ဘၣ်ဃး ခ့ယုၢ်အဂ့ၢ်, ဘၣ်ဆၣ် ဖဲအ၀ဲကွၢ်တၢ်အဆၢကတီၢ် ထံၣ်၀ဲလၢအမ့ၢ် သိဖိတဒု န့ၣ်လီၤ. တၢ်ဒ်သိးလိာ်အသး ဒ်အံၤ အိၣ်ဖျါထီၣ် ဖဲအံၤစ့ၢ်ကီးန့ၣ်လီၤ. အ၀ဲနၢ်ဟူ တၢ်ဘိးဘၣ်ရၤလီၤ ဘၣ်ဃး ပှၤယူဒၤဖိ အဂၤ တကလီၢ်လွံၢ်ကလးလွံၢ်ကထိဂၤအဂ့ၢ်, ဘၣ်ဆၣ် ဖဲအကွၢ်၀ဲအခါ အထံၣ်၀ဲလၢ ပှၤဂီၢ်မုၢ်ဖးဒိၣ် လၢအပၣ်ဃုာ်ဒီး ပှၤယူဒၤဖိ ဒီး ပှၤကလုာ်ဂၤ တဖၣ်တပူၤဃီ န့ၣ်လီၤ. တၢ်ဂ့ၢ်ခံကလုာ်လၢာ်အံၤအပူၤ, စီၤယိၤဟၣ်နၢ်ဟူ တၢ်ကတိၤလၢ အဟဲလၢ တၢ်ပနီၣ်လၢ လံာ်စီဆှံအလီၢ်လံၤအပူၤလၢအမ့ၢ် ခ့ယုၢ် ဒီး ယူဒၤကလုာ် န့ၣ်လီၤ. ဘၣ်ဆၣ်ဖဲအကွၢ် ကဒါက့ၤ၀ဲအခါန့ၣ်, တၢ်လၢအထံၣ်၀ဲ ဖျါဒိၣ်န့ၢ်ဒံး တၢ်လၢ ပှၤဘိးဘၣ်ရၤလီၤအီၤ န့ၣ်လီၤ. တၢ်ပနီၣ်လၢ အမ့ၢ် ခ့ယုၢ်အံၤ လၢထီၣ်ပှဲၤထီၣ်လၢ ခရံာ်အပူၤ, ဒီး တၢ်ပနီၣ်လၢ အမ့ၢ်အံၣ်စရ့လးကလုာ်ဒူၣ်အံၤ လၢထီၣ်ပှဲၤထီၣ်လၢ ပှၤနာ်တၢ်ဖိဂီၢ်မုၢ်တဖၣ် လၢအဟဲလၢ ထံကီၢ်ကိးဘ့ၣ်ဒဲး န့ၣ်လီၤ.
တၢ်ဘၢၣ်စၢၤတခါအံၤ ၀ံၤအလီၢ်ခံ, တၢ်အိးထီၣ် တၢ်ပနီၣ် နွံခါတခါ ဘၣ်တၢ်ပာ်ဖျါထီၣ်အီၤလၢ လံာ်တၢ်လီၣ်ဖျါ ၈း၁ အပူၤန့ၣ်လီၤ. ဖဲတၢ်အိးထီၣ် တၢ်ပနီၣ်နွံခါတခါအံၤ အခါ, တၢ်ခဲလၢာ် ဘှ့ၣ်ဘှီၣ်၀ဲ လီၤ. တၢ်ဘၣ်တ့ခဲလၢာ် ဆၢထၢၣ်လၢ တၢ်ကမၢကမၣ်အပူၤ လီၤ. တၢ်ဘှ့ၣ်တၢ်ဘှီၣ်အံၤ ဒုးအိၣ်ထီၣ် တၢ်ဖ့ၣ်ဆၢလၢ ပှၤလၢအဖးစီၤယိၤဟၣ် အတၢ်ထံၣ်တဖၣ် အဆိကတၢၢ်တဘျီအဂီၢ် န့ၣ်လီၤ. တၢ်စံၣ်စိၤတဲစိၤ အလီၢ်ခံကတၢၢ်တပတီၢ် မၤအသးဒ်လဲၣ်. တၢ်စံးဆၢ လၢတၢ်သံကွၢ်တဖျၢၣ်အံၤအဂီၢ် ပကထံၣ်အီၤလၢ တၢ်ထံၣ်လၢ ကဟဲတဖၣ်အပူၤန့ၣ်လီၤ.
အခဲအံၤ ပကွၢ်သကိး တၢ်ပနီၣ်နွံမံၤ ၀ံၤလံအဃိ, အခဲအံၤ ပကလဲၤဆူ တၢ်ထံၣ်ခံခါတခါ လၢအဘၣ်ဃး တၢ်မၤအသးလၢအကဟဲတဖၣ်, ကွဲၤနွံဖျၢၣ်လၢ လံာ်တၢ်လီၣ်ဖျါ ၈း၂ - ၁၁း၁၉ အပူၤန့ၣ်တက့ၢ်.
ကွဲၤနွံဖျၢၣ် (Seven Trumpets)
တၢ်ထံၣ်ဘၣ်ဃး ကွဲၤနွံဖျၢၣ် အံၤပၣ်ဃုာ်ဒီး မူခိၣ်ကလူးတဖၣ် အူထီၣ် ကွဲၤတဖၣ်န့ၣ်လီၤ. ဖဲကွဲၤတဖျၢၣ်စုာ်စုာ် ဘၣ်တၢ်အူအီၤအခါ, တၢ်စံၣ်ညီၣ် တခါစုာ်စုာ် လီၤဘၣ်လၢ ဟီၣ်ခိၣ်ချၢန့ၣ်လီၤ. တၢ်လၢအရ့ဒိၣ် လၢပကကွၢ်အီၤန့ၣ် မ့ၢ်၀ဲ တၢ်ထံၣ်ဘၣ်ဃး ကွဲၤနွံဖျၢၣ်အံၤ ဘၣ်တၢ်သုးကျဲၤအီၤ လီၤဂာ်ဒီး တၢ်ထံၣ်ဘၣ်ဃး တၢ်ပနီၣ်နွံခါ န့ၣ်လီၤ. တၢ်ထံၣ်အံၤ တဲဖျါထီၣ် ကွဲၤဃုဖျၢၣ် ၀ံၤ ပိာ်ထွဲဒီး တၢ်ဘၢၣ်စၢၤတခါ, ၀ံၤမး ပိာ်ထွဲအခံ လၢ ကွဲၤနွံဖျၢၣ်တဖျၢၣ်န့ၣ်လီၤ. ကွဲၤတဖၣ်အံၤ ဒုးသ့ၣ်နီၣ်ပှၤလၢ ကွဲၤလၢ လံာ်စီဆှံ အလီၢ်လံၤ အ၀ံတဖၣ်အတၢ်ကွဲးအပူၤ ဒ် ဟိၤရှ့ ၅း၈, ဧၤမိၣ် ၂း၂, ဒီး ယကၤရယၤ ၉း၁၄ အပူၤန့ၣ်လီၤ. ကွဲၤတဖၣ်အံၤ သီၣ်ထီၣ်ဖဲ ယွၤဟဲဒီး အသုးမုၢ်ဖးဒိၣ်, လၢအကိးထီၣ် မူခိၣ်အတၢ်သုးမုၢ်ဂီၢ်မုၢ် လၢကဒုးတၢ်ဒီး ယွၤအဒုၣ်အဒါ အဂီၢ်န့ၣ်လီၤ.ကွဲၤအခီၣ်ထံးလွံၢ်ဖျၢၣ် ဘၣ်တၢ်အူအီၤ ဖဲ လံာ်တၢ်လီၣ်ဖျါ ၈း၂-၁၃ အပူၤ, မၤပနီၣ်တၢ်စံၣ်ညီၣ် တဖၣ်ခီဖျိ မူခိၣ်ကလူးသုးမုၢ်ဖးဒိၣ် လၢတၢ်ဘၣ်တ့ လွံၢ်နၢၣ် အလိၤန့ၣ်လီၤ. ဖဲကွဲၤအခီၣ်ထံးတဖျၢၣ် သီၣ်ထီၣ်အခါ, သူၣ်ဒီးမဲၣ်အူ လၢအကျဲၣ်ကျီ ဃုာ်အသးဒီး တၢ်သွံၣ် လီၤဘၣ်လၢ ဟီၣ်ခိၣ်လၢ အဃ့ထီအလိၤန့ၣ်လီၤ. ဖဲကွဲၤခံဖျၢၣ်တဖျၢၣ်သီၣ်ထီၣ်အခါ, တၢ်လၢအလီၤဂာ်ဒီး ကစၢၢ်ဖးဒိၣ် ဘၣ်တၢ်တ့ၢ်လီၤအီၤလၢ ပီၣ်လဲၣ်ပူၤ န့ၣ်လီၤ. ဖဲကွဲၤသၢဖျၢၣ်တဖျၢၣ်သီၣ်ထီၣ်အခါ, ဆၣ်ယူၤတဖျၢၣ် ဘၣ်တၢ်တ့ၢ်လီၤအီၤလၢ ထံကဆှီတဖၣ်အပူၤ, ဒီးဒုးကဲထီၣ်အီၤလၢ ထံခၣ်ဒီး တၢ်အီအီၤ တသ့လၢၤဘၣ်န့ၣ်လီၤ. ဒီးဖဲကွဲၤလွံၢ်ဖျၢၣ် တဖျၢၣ်သီၣ်ထီၣ်အခါ မူခိၣ်ဟးဂီၤကွံာ်၀ဲ, တနံၤ အတီၢ်ပူ သၢပူတပူ, ဒီးတနၤအတီၢ်ပူၤ သၢပူတပူ တၢ်ကပီၤတအိၣ်ဘၣ်. တၢ်စံၣ်ညီၣ်အံၤ မ့ၢ်နာ်ထဲလဲာ်ဘၣ်ဆၣ်, ဟီၣ်ခိၣ်အသနၢၣ် သၢပူတပူဧိၤ ဟးဂီၤကွာ်၀ဲ န့ၣ်လီၤ. ဖဲအကူာ်တခါအံၤ ၀ံၤအလီၢ်ခံ, လံာ်ကြီကြာ် တဘ့ၣ်ဟ့ၣ်ပလီၣ်တၢ်လၢ တၢ်စံၣ်ညီၣ်လၢ အနးန့ၢ်အံၤ ကဟဲ၀ဲဒံး န့ၣ်လီၤ.
ကွဲၤဃုဖျၢၣ်တဖျၢၣ် အတၢ်သီၣ်ထီၣ်အံၤ ဘၣ်တၢ်ကွဲးဖျါထီၣ်အီၤလၢ တၢ်လီၣ်ဖျါ ၉း၁-၁၂ အပူၤန့ၣ်လီၤ. ပကထံၣ်ဘၣ် ဒွဲာ်ဂဲာ် တဖၣ်ဒ်သုးမုၢ်တဖု အသိး ဟဲထီၣ်လၢ တၢ်ခုၣ်အပူၤ ဆူဟီၣ်ခိၣ်ချၢ န့ၣ်လီၤ. စီၤယိၤဟၣ်စံး၀ဲ ဒွဲာ်ဂဲာ်တဖၣ်အံၤ လီၤဂာ်ဒ် ကသ့ၣ်တဖၣ် လၢအကတဲာ်ကတီၤအသးလၢ တၢ်ဒုးသုးဒုးသံၣ် အဂီၢ်အသိး, အိၣ်ဒီး အခိၣ်သလုာ်ထူတဖၣ်, ဒီးအမဲာ် သၣ်ဒ် ပှၤကညီအမဲာ်, အခိၣ်သူဒ်ပိာ်မုၣ်အခိၣ်သူအသိး, အမဲဒ် ခ့ယုၢ် အမဲအသိး, ဒီးအမဲၢ်ဒ် ပတ့ၤချဲး အသိးန့ၣ်လီၤ. ဘၣ်ဆၣ်အတၢ်စိတၢ်ကမီၤ အိၣ်ဒၣ်ဒ် တၢ်ဟ့ၣ်လီၤအီၤ အသိးန့ၣ်လီၤ. တၢ်ဟ့ၣ်လီၤအီၤအခွဲးလၢ ကမၤအၢမၤနး တၢ်ထဲယဲၢ်လါဧိၤ, ဒီးဘၣ်မၤအၢမၤသီ ဒၣ်ထဲ ပှၤလၢ ယွၤအတၢ်စဲပနီၣ်ဃာ် တအိၣ်ဘၣ်လၢ အမဲာ်တူၢ်ခိၣ်အလိၤဘၣ် တဖၣ်ဧိၤ န့ၣ်လီၤ.
ကွဲၤဃုဖျၢၣ်တဖျၢၣ် အတၢ်သီၣ်ထီၣ် ဘၣ်တၢ် ကွဲးဖျါထီၣ်အီၤလၢ တၢ်လီၣ်ဖျါ ၉း၁၃-၂၁ အပူၤန့ၣ်လီၤ. ကွဲၤအတၢ်သီၣ်ထီၣ်အံၤ ပျဲလီၤ လံာ်ကြီကြာ် လွံၢ်ဘ့ၣ်လၢ အအိၣ်လၢ ထံကျိမိၢ်ပှၢ် ဖရၤသး (Euphrates River) အပူၤ, ဒ်သိးအကမၤသံပှၤကညီ သၢပူတပူ န့ၣ်လီၤ.
ကွဲၤဃုဖျၢၣ်သီၣ်ထီၣ် ၀ံၤအလီၢ်ခံ တၢ်ဘၢၣ်စၢၤ ခံကုာ် အိၣ်ဖျါထီၣ်လၢ တၢ်လီၣ်ဖျါ ၁၀း၁ - ၁၁း၁၄ အပူၤန့ၣ်လီၤ. ဒ်ယွၤလီၣ်ဖျါထီၣ် အတၢ်စံၣ်ညီၣ်လၢ ၀ံယဃ့းစက့လး အမဲာ်ညါ လၢ ယဃ့းစက့လး ၂း၉ - ၃း၉ အသိး, စီၤယိၤဟၣ်စ့ၢ်ကီး ဒိးန့ၢ် လံာ်ထူ ဆံးဆံးဖိတထူ လၢအပၣ်ဃုာ်ဒီး ၀ံအတၢ်ကစီၣ်တဖၣ်, ဒီး တၢ်စံးဘၣ်အီၤလၢ ကဘၣ်အီၣ် လံာ်ထူအံၤ န့ၣ်လီၤ. လံာ်ထူအံၤ အရီာ် ဆၢဒ် ကနဲစီ အသိး, ဘၣ်တဘၣ် ကမ့ၢ်တၢ်ကစီၣ်အမုာ်လၢ အမ့ၢ် ယွၤအတၢ်သုးတၢ်ကျဲၤလၢ ဟီၣ်ခိၣ်အဂီၢ်, ဒ်ယွၤအတၢ်တိာ်အသိး ကလၢထီၣ်ပှဲၤထီၣ်လၢ အဆိအချ့ န့ၣ်လီၤ. ဘၣ်ဆၣ် လံာ်ထူအံၤ ဒုးအိၣ်ထီၣ် အကဖုလၢ အဆံၣ်၀ဲ, ဘၣ်တဘၣ် ကမ့ၢ် တၢ်တူၢ်ဘၣ်ခီၣ်ဘၣ် ကအိၣ်ထီၣ် တချုး ယွၤအတၢ်တိာ်ကျဲၤ လၢပှဲၤဒံးဘၣ် န့ၣ်လီၤ.
တၢ်ဘၢၣ်စၢၤခံကုာ်တကုာ် စံး၀ဲလၢ စီၤယိၤဟၣ်ထံၣ် ပှၤလၢ ကအုၣ်အသးခံဂၤ လၢအသံတ့ၢ်လၢ တၢ်သးခုကစီၣ်အဂီၢ် န့ၣ်လီၤ. အ၀ဲသ့ၣ်မၤတၢ်လီၤလး, ဒီးကိးပှၤဂီၢ်မုၢ်ဒ်သိး ကပီၢ်ယၢ်လီၤက့ၤသး, ဒီးဟ့ၣ်ပလီၣ် တၢ်ဘၣ်ဃး တၢ်စံၣ်ညီၣ်လၢ ကဟဲ၀ဲ န့ၣ်လီၤ. ၀ံၤအလီၢ်ခံ အ၀ဲသ့ၣ်ဘၣ် တၢ်မၤသံအီၤ လၢ ကစၢ်ယွၤ အဒုၣ်အဒါန့ၣ်လီၤ.
စီၤယိၤဟၣ် အတၢ်ထံၣ်ဘၣ်ဃး ပှၤခံဂၤအံၤ, ပာ်ဖျါထီၣ် တၢ်သဘံၣ်သဘုၣ် အခီၣ်ထံးခီၣ်ဘိလၢ တၢ်စံၣ်စိၤတဲစိၤအပူၤ, တၢ်သဘံၣ်သဘုၣ် လၢအမ့ၢ် ကစၢ်ခရံာ်ဒီး အဒုၣ်အဒါ အဘၢၣ်စၢၤ န့ၣ်လီၤ. ပှၤခံဂၤအံၤ အိၣ်ဒီး အစိအကမီၤဒိၣ်နီၢ်မး, ဘၣ်ဆၣ် အဒုၣ်အဒါတဖၣ် သူၣ်အၢသးသီလၢ အဖီခိၣ်ဒိၣ်ဒိၣ်ကလဲာ်, ဒီးမၤသံကွံာ်အီၤန့ၣ်လီၤ. တၢ်ဂ့ၢ်အံၤ ပာ်ဖျါထီၣ် တၢ်မ့ၢ်တၢ်တီလၢ တၢ်ဘၢၣ်စၢၤတအိၣ်လၢ ခရံာ်ဒီး အဒုၣ်အဒါ အဘၢၣ်စၢၤန့ၣ်ဘၣ်. ပှၤကညီကိးဂၤဒဲး ကဘၣ်မ့ၢ်လၢခရံာ်အဂီၢ် မ့တမ့ၢ် ထီဒါခရံာ် န့ၣ်လီၤ.
တၢ်ဘၢၣ်စၢၤခံကုာ်၀ံၤအလီၢ်ခံ, ကလူးနွံဂၤတဂၤ အူထီၣ် ကွဲၤနွံဖျၢၣ်တဖျၢၣ် လၢလံာ်တၢ်လီၣ်ဖျါ ၁၁း၁၅-၁၉ အပူၤ, လၢအမၤကတၢၢ်ကွံာ် တၢ်ထံၣ်တၢ်လၢညါခီ တမံၤအံၤန့ၣ်လီၤ.
တၢ်လီၣ်ဖျါ ၁၁း၁၅ ကွဲးဖျါထီၣ် တၢ်စံးတၢ်ကတိၤလၢအဟဲလၢမူခိၣ် ဖဲကွဲၤနွံဖျၢၣ်တဖျၢၣ်သီၣ်ထီၣ်အဆၢကတီၢ် န့ၣ်လီၤ.
ဟီၣ်ခိၣ်အဘီအမုၢ် ကဲထီၣ်လၢပကစၢ်အတၢ်, ဒီးခရံာ်အတၢ်, ဒီးကပၢ၀ဲ လီၤထူလီၤယိာ်လီၤ. (တၢ်လီၣ်ဖျါ ၁၁း၁၅).ကွဲၤနွံဖျၢၣ်တဖျၢၣ် ဒုးနဲၣ်၀ဲ တၢ်ဘူၣ်တၢ်ဘါ လၢကအိၣ်ထီၣ်လၢ ယွၤအလီၢ်ပစိာ်အဒၢးပူၤ ဖဲ အမၤနၢၤကွံာ် ဟီၣ်ခိၣ်အဘီအမုၢ်ခဲလၢာ် ဒီးဖဲ အတၢ်စံၣ်ညီၣ်လၢခံကတၢၢ် ၀ံၤအလီၢ်ခံန့ၣ်လီၤ. ကစၢ်ခရံာ်ကဟဲက့ၤ ဒ်သိး ကမၤသီထီၣ်ဟီၣ်ခိၣ်, အလၤကပီၤကလီၣ်ဖျါထီၣ်အသး လၢလၢပှဲၤပှဲၤ, ဒီးယွၤကပၢအတၢ်ဘၣ်တ့ ခဲလၢာ်လၢအနီၣ်ကစၢ်ဒၣ်၀ဲ န့ၣ်လီၤ.
တၢ်ထံၣ်တၢ်လၢညါခီ သၢခါတခါ တဲတၢ်ဘၣ်ဃး တၢ်ကမၤအသးဆူညါ ခီဖျိ တၢ်ပနီၣ်နွံမံၤလၢ တၢ်စံၣ်စိၤတဲစိၤအပူၤ လၢလံာ်တၢ်လီၣ်ဖျါ ၁၂း၁ - ၁၄း၂၀ အပူၤန့ၣ်လီၤ.
တၢ်ပနီၣ်နွံမံၤလၢ တၢ်စံၣ်စိၤတဲစိၤအပူၤ (Seven Histories)
တၢ်ထံၣ်တၢ်လၢညါခီ ဘၣ်ဃး တၢ်ပနီၣ်နွံမံၤ လၢတၢ်စံၣ်စိၤတဲစိၤအပူၤ လီၤဂာ်ဒီး တၢ်ထံၣ်တၢ်လၢညါခီ ဘၣ်ဃး တၢ်ပနီၣ်နွံခါ ဒီး ကွဲၤနွံဖျၢၣ်အသိး, တၢ်စံၣ်စိၤတဲစိၤ အခီၣ်ထံး ဃုခါ ဘၣ်တၢ်တဲအီၤတပူၤဃီ, ၀ံၤပိာ်ထွဲထီၣ်အခံဒီး တၢ်ဘၢၣ်စၢၤတခါ, ၀ံၤမး နွံခါတခါ ပိာ်ထွဲထီၣ်အခံန့ၣ်လီၤ. ဘၣ်ဆၣ် ဖဲတၢ်ထံၣ်တၢ်လၢညါခီ ဘၣ်ဃး တၢ်ပနီၣ်တဖၣ် ဒီး ကွဲၤတဖၣ် တဲဘၣ်ဃး ယွၤအတၢ်စံၣ်ညီၣ်အခါ, တၢ်စံၣ်စိၤတဲစိၤ နွံမံၤ အံၤ တဲဘၣ်ဃး နီၣ်သး အတၢ်သဘံၣ်ဘုၣ် ဘၣ်ထွဲ မုၣ်ကီၤလံၢ် ဒီး ယွၤအပှၤဂီၢ်မုၢ် တဖၣ်န့ၣ်လီၤ. တၢ်စံၣ်စိၤတဲစိၤတဖၣ်အံၤ တဲတၢ်ဘၣ်ဃးဒီး ပိာ်မုၣ်, ပယိၤ, တၢ်ဒူတၢ်ဃိၤဟဲလၢပီၣ်လဲၣ်ပူၤ, တၢ်ဒူတၢ်ဃိၤဟဲလၢခိ, ပှၤနာ်တၢ်ဖိ အဂၤ တကလီၢ်လွံၢ်ကလးလွံၢ်ကထိဂၤ, ကလူးလၢအဆှၢတၢ်ကစီၣ်, ဒီး ပှၤကညီအဖိခွါ န့ၣ်လီၤ.တၢ်ပနီၣ်အခီၣ်ထံးကတၢၢ်တခါ မ့ၢ် ပိာ်မုၣ်လၢအအိၣ်ဒီးအဟုးအသးတဂၤ လၢအကူသိး၀ဲဒီးမုၢ် န့ၣ်လီၤ. အတၢ်စံၣ်စိၤတဲစိၤန့ၣ် ပကထံၣ်န့ၢ်အီၤသ့ဖဲ တၢ်လီၣ်ဖျါ ၁၂း၁-၁၇ အပူၤ, လၢအဒုးသ့ၣ်နီၣ်ထီၣ်က့ၤပှၤ ယ့ၣ်ရှူးအတၢ်ဟဲအိၣ်ဖျဲၣ်ထီၣ်ဒီး စီၤပၤဟ့ၤရိာ် အတၢ်ဃုမၤသံအီၤ န့ၣ်လီၤ. ပိာ်မုၣ်, လၢအမ့ၢ် အံၣ်စရ့လးဖိလၢ အသးတီ, အိၣ်ဖျဲၣ်ထီၣ် မ့ၤရှံအၤ, လၢအမ့ၢ် ယ့ၣ်ရှူးခရံာ်န့ၣ်လီၤ. အဖိခွါ ဘၣ်တၢ်စိာ်ထီၣ်အီၤ ဆူမူခိၣ်, လၢအတဲဘၣ်ဃးဒီး ခရံာ်အတၢ်ဂဲၤဆၢထၢၣ်သမူထီၣ်က့ၤဒီး အတၢ်က့ၤထီၣ်ဆူမူခိၣ် န့ၣ်လီၤ. ဘၣ်ဆၣ်, ပိာ်မုၣ်တဂၤအံၤ အိၣ်တ့ၢ်လၢ ဟီၣ်ခိၣ်ချၢ ဒီး ဘၣ်တၢ်မၤအၢမၤနးအီၤလၢ ပယိၤဖးဒိၣ်န့ၣ်လီၤ. ယွၤကဟုကယာ်အီၤအဃိ ပယိၤမၤနၢၤအီၤ တန့ၢ်ဘၣ်, ဘၣ်ဆၣ်အ၀ဲ ဘၣ်တူၢ်တၢ် ဒံးမ့ၢ်လၢ တၢ်သဘံၣ်သဘုၣ် အဃိ န့ၣ်လီၤ. တၢ်စံၣ်စိၤတဲစိၤ အပနီၣ်တခါအံၤ တဲဘၣ်ဃး ယ့ၣ်ရှူးဟဲလီၤစၢၤလီၤသွဲၣ် လၢ ယွၤအပှၤဂီၢ်မုၢ်လၢ အသးတီတဖၣ်, ဒီး ပှၤနာ်တၢ်ဖိလၢအမ့ၢ်အတီတဖၣ် ကဆဲးတူၢ်ဘၣ်တၢ် မ့ၢ်လၢ မုၣ်ကီၤလံၢ် ဒီး အဘီအမုၢ်အဃိ န့ၣ်လီၤ. စီၤယိၤဟၣ်အပှၤဖးလံာ် ဖိတဖၣ် ကနၢ်ပၢၢ်၀ဲတဘျီဃီလၢ တၢ်ဘၣ်ဂံာ်ဂူာ်တခါအံၤ မ့ၢ်အ၀ဲသ့ၣ် အတၢ်ကီတၢ်ခဲအဂံၢ်ထံး, ဒီးကဒိးန့ၢ် တၢ်ဟ့ၣ်ဂံၢ်ဟ့ၣ်ဘါ ခီဖျိ ကစၢ်ယွၤ အတၢ်ကဟုကယာ် ပိာ်မုၣ်အံၤ န့ၣ်လီၤ. တကတီၢ်ဃီန့ၣ်, အ၀ဲသ့ၣ် ကနၢ်ပၢၢ်လၢ အကဘၣ်အိၣ်သးစူၤဒံး, မ့ၢ်လၢ တၢ်ဘၣ်ဂံာ်ဂူာ်တကတၢၢ် တဘျီဃီဘၣ် န့ၣ်လီၤ.
တၢ်စံၣ်စိၤတဲစိၤအပနီၣ် ခံခါတခါ ပာ်ဖျါထီၣ် ပယိၤဖးဒိၣ်လၢအဂီၤဆှူၣ်ကလာ်တဘိ, ဒီးပကထံၣ်အီၤလၢ တၢ်လီၣ်ဖျါ ၁၂း၃-၁၇ အပူၤန့ၣ်လီၤ. တၢ်စံၣ်စိၤတဲစိၤ အပနီၣ်တခါအံၤ ဟဲဖျါထီၣ်၀ဲတပူၤဃီဒီး ပိာ်မုၣ်တဂၤန့ၣ်အဂ့ၢ်, ဘၣ်ဆၣ် တၢ်လီၣ်ဖျါ ၁၂း၃ အပူၤ ပာ်ဖျါထီၣ်၀ဲလၢ မ့ၢ်တၢ်ပနီၣ်လၢ အလီၤဆီလိာ်အသးတခါ န့ၣ်လီၤ. ပယိၤအံၤ ဘၣ်တၢ်ပာ်ဖျါထီၣ်အီၤလၢ အအိၣ်ဒီး ခိၣ်နွံဖျၢၣ် ဒီး နၢၤ အဘိတဆံ, ဒီးအိၣ်ဒီး ခိၣ်သလုး နွံဖျၢၣ်လၢ အခိၣ်တဖၣ်အလိၤန့ၣ်လီၤ. လၢအဆၢဖိ ၉ အပူၤန့ၣ် ပကထံၣ်ဘၣ်လၢ ပယိၤအံၤမ့ၢ် မုၣ်ကီၤလံၢ် အကစၢ်ဒၣ်၀ဲန့ၣ်လီၤ. လၢစီၤယိၤဟၣ် အတၢ်ထံၣ်တၢ်လၢညါခီအပူၤ ပယိၤအမဲၢ် ထုးလီၤကွံာ် ဆၣ်သၢပူတပူ လၢအအိၣ်လၢမူခိၣ်ဆူ ဟီၣ်ခိၣ်န့ၣ်လီၤ. တၢ်မၤအံၤ အဲၣ်ဒိးတဲ၀ဲ ဘၣ်တဘၣ်ကမ့ၢ် မူခိၣ်ကလူး သၢပူတပူ လၢအလီၤတဲာ်ဒီး ကဲထီၣ် တၢ်၀ံတၢ်နါတဖၣ်, မ့တမ့ၢ် ကမ့ၢ်တၢ်ဒ် ၀ံယရှါယၤစံး၀ဲ ဖဲ ယရှါယၤ ၃၄း၄ အပူၤ, ဒီးလံာ်မၢ်ကူး ၁၃း၂၅ အပူၤအသိးန့ၣ်လီၤ. ပယိၤအံၤ မၤဒၢၣ် ပိာ်မုၣ် ဒီးအဖိ, လၢအအဲၣ်ဒိးပာ်ဖျါထီၣ် တၢ်သဘံၣ်ဘုၣ်လၢ မုၣ်ကီၤလံၢ် ဒီး ယွၤအပှၤဂီၢ်မုၢ်တဖၣ် အဘၢၣ်စၢၤန့ၣ်လီၤ.
လၢပယိၤအတၢ်စံၣ်စိၤတဲစိၤအပူၤအံၤ, ပကထံၣ်ဘၣ်လၢ တၢ်ဒုးသုးအိၣ်ထီၣ်လၢ မူခိၣ်, ဖဲကလူး မံၤက့လး ဒီး မူခိၣ်ကလူးအဂၤတဖၣ် ဒုးတၢ်ဒီး ပယိၤအံၤ န့ၣ်လီၤ. မံၤက့လး တၢၤလီၤကွံာ် ပယိၤ ဒီး အကလူးတဖၣ် ဆူဟီၣ်ခိၣ်န့ၣ်လီၤ. ဖဲအအိၣ်လၢ ဟီၣ်ခိၣ်လိၤအခါ, အ၀ဲဂုာ်ကျဲးစၢး မၤအၢမၤသီပိာ်မုၣ်လၢ အဆံးစၢ် အဖိပိာ်ခွါ န့ၣ်လီၤ. ဘၣ်ဆၣ် ယွၤကဟုကယာ်အီၤ, အဃိ မုၣ်ကီၤလံၢ် ဂုာ်ကျဲးစၢးလၢ ကမၤအၢမၤသီ အဖိခွါ, လၢအမ့ၢ် ပှၤနာ်တၢ်ဖိ လၢအကနၣ်ခရံာ်အကလုၢ် ဒီး ဟံးဃာ် ခရံာ်အတၢ်ကစီၣ် တဖၣ်န့ၣ်လီၤ. တၢ်စံၣ်စိၤတဲစိၤ အပနီၣ်တခါအံၤ ကမၤစၢၤ စီၤယိၤဟၣ် အပှၤဖးလံာ်ဖိတဖၣ်လၢ ကနၢ်ပၢၢ် ဘၣ်ဃး အ၀ဲသ့ၣ်ဘၣ်တၢ်မၤအၢ မၤနး အီၤ မ့ၢ်လၢ မုၣ်ကီၤလံၢ် သးဟ့ကစၢ်ယွၤအဃိ, ဒီးမ့ၢ်နီၣ်သး တၢ်ဒုး န့ၣ်လီၤ. မုၣ်ကီၤလံၢ် ဘၣ်တၢ်မၤနၢၤအီၤလံအဃိ, တၢ်အိၣ်ဖှိၣ် ကဘၣ်လဲၤခီဖျိ တၢ်မၤအၢမၤနး တုၤဒၣ်ထဲလၢ ပယိၤအတၢ်ဆၢကတီၢ် လၢဘၣ်တၢ်ဟ့ၣ်လီၤအီၤ လၢဟီၣ်ခိၣ်အံၤကတၢၢ်ကွံာ်၀ဲ အခါန့ၣ်လီၤ.
တၢ်စံၣ်စိၤတဲစိၤ အတၢ်ပနီၣ် သၢခါတခါ မ့ၢ် တၢ်ဒူတၢ်ဃိၤဟဲလၢပီၣ်လဲၣ်ပူၤ, ဒီးပကထံၣ်န့ၢ်အီၤဖဲ တၢ်လီၣ်ဖျါ ၁၃း၁-၁၀ န့ၣ်လီၤ. တၢ်ဒူတၢ်ဃိၤအံၤ အိၣ်ဒီးအသကဲာ်ပ၀းဒ် ခ့ယုၢ်, တၤသူ, ဒီးခ့စံၣ်ပိၢ် အသိး, လၢအလီၤဂာ်ဒီး ဒၤနံၤယ့လး ၇ လၢအတဲဘၣ်ဃး ဘီမုၢ်လၢအဘါတၢ်ဂီၤတၢ်ဖီၣ်တဖၣ်န့ၣ်လီၤ. အဃိ, တၢ်ဒူတၢ်ဃိၤ ဟဲလၢပီၣ်လဲၣ် လီၤဂာ်ဒ် ဘီမုၢ်လၢ အအိၣ်ဒီးအစိကမီၤတဖၣ် လၢအထီဒါ ခရံာ်အဘီအမုၢ် န့ၣ်လီၤ. စီၤယိၤဟၣ် တဲစ့ၢ်ကီး၀ဲလၢ တၢ်ဒူတၢ်ဃိၤအံၤ အိၣ်ဒီး အတၢ်ပူၤလီၢ်အလီၢ် လၢအပူၤကွံာ် ဘၣ်တၢ်ကျီအီၤ သအုးသပှီၤန့ၣ်လီၤ.
ပယိၤဟ့ၣ်လီၤ တၢ်ဒူတၢ်ဃိၤ လၢအဟဲလၢပီၣ်လဲၣ်ပူၤတဒုန့ၣ် တၢ်စိတၢ်ကမီၤ လၢ ဘီမုၢ်လၢဟီၣ်ခိၣ်ချၢခဲလၢာ် အဖီခိၣ်, အဃိ တၢ်ခဲလၢာ်ခဲဆ့လၢအအိၣ်လၢ ဟီၣ်ခိၣ်ချၢ တဖၣ် ဘါထီၣ်တၢ်ဒူတၢ်ဃိၤအံၤ န့ၣ်လီၤ. ဘၣ်တၢ်ဟ့ၣ်လီၤစ့ၢ်ကီး တၢ်စိတၢ်ကမီၤ လၢကဒုးတၢ်ဒီး ပှၤစီဆှံတဖၣ် ဒီးကမၤနၢၤ အ၀ဲသ့ၣ် အဂီၢ်န့ၣ်လီၤ. စီၤယိၤဟၣ် အပှၤဖးလံာ်ဖိတဖၣ် ကစံးလၢ တၢ်ဒူတၢ်ဃိၤအံၤ ကမ့ၢ် ရိမ့ၤ အစီၤပၤ မ့တမ့ၢ် ရိမ့ၤအဘီအမုၢ်, ဃုာ်ဒီး တၢ်ဘူၣ်ထီၣ်ဘါထီၣ် ရိမ့ၤအစီၤပၤန့ၣ်လီၤ. အ၀ဲသ့ၣ် ကထံၣ် တၢ်လိၣ်လၢ ကဘၣ်သ့ထီဒါ တၢ်ဒူတၢ်ဃိၤအံၤ, ဒီးအိၣ်ဆိးလၢ တၢ်သးတီဒီး ခရံာ် အပူၤန့ၣ်လီၤ.
တၢ်စံၣ်စိၤတဲစိၤ အတၢ်ပနီၣ် လွံၢ်ခါတခါ မ့ၢ် တၢ်ဒူတၢ်ဃိၤခံဒုတဒု, လၢအဟဲလၢ ဟီၣ်ခိၣ်လာ် န့ၣ်လီၤ. ပကထံၣ်ဘၣ်အီၤလၢ တၢ်လီၣ်ဖျါ ၁၃း၁၁-၁၈ အပူၤန့ၣ်လီၤ. တၢ်ဒူတၢ်ဃိၤ တဒုအံၤ အိၣ်ဒီး အနၢၤခံဘိ ဒ်သိဖိအသိး, ဘၣ်ဆၣ်ကတိၤတၢ်ဒ် ပယိၤ အသိးန့ၣ်လီၤ. တၢ်ဒုတၢ်ဃိၤတဒု အံၤ မၤန့ၢ် တၢ်ဒူတၢ်ဃိၤလၢအဟဲလၢပီၣ်လဲၣ် တဒုအတၢ်မၤ, ဒီး မၤတၢ်လီၤလးတဖၣ် ဒ်သိး ကမၢ ဟီၣ်ခိၣ် ဘါထီၣ် တၢ်ဒူတၢ်ဃိၤ လၢအဟဲလၢ ပီၣ်လဲၣ် အံၤန့ၣ်လီၤ. အ၀ဲမၢန့ၢ်ဆူၣ်စ့ၢ်ကီး ပှၤဂီၢ်မုၢ်လၢ ကဒိးန့ၢ် တၢ်ပနီၣ် လၢအစုထွဲအလိၤ, မ့တမ့ၢ် လၢအခိၣ်တိသၣ်အလိၤန့ၣ်လီၤ. တၢ်ဒူတၢ်ဃိၤ ခံဒုလၢာ်အံၤ ဂုာ်ကျဲးစၢး၀ဲတပူၤဃီ ဒ်သိး ကမၤနၢၤ ဟီၣ်ခိၣ်ဒီဘ့ၣ်န့ၣ်လီၤ.
စီၤယိၤဟၣ် အပှၤဖးလံာ်ဖိတဖၣ် ကဘၣ်သဂၢၢ်ဒီး တၢ်ဒူတၢ်ဃိၤခံဒုတဒု အံၤ လၢအမ့ၢ်၀ဲ ရိမ့ၤတၢ်ဘူၣ်တၢ်ဘါကရူၢ်ဖိ တနီၤ လၢအမၢန့ၢ်ဆီၣ်ခံ ပှၤဂၤတဖၣ် လၢကဘါထီၣ် ရိမ့ၤအစီၤပၤ, ဒီးပှၤလၢတဘါထီၣ်စီၤပၤဘၣ်တခီ တဲပျံၤတဲဖုး၀ဲလၢ ကမၤသံအ၀ဲသ့ၣ် န့ၣ်လီၤ. ဒ်တၢ်ပနီၣ်ဘၣ်ဃး တၢ်ဒူတၢ်ဃိၤလၢအဟဲလၢ ပီၣ်လဲၣ်ပူၤအသိး, တၢ်တခါအံၤစ့ၢ်ကီး ကဟ့ၣ်ဂံၢ်ဟ့ၣ်ဘါအ၀ဲသ့ၣ် လၢကထီဒါ တၢ်ဘါတၢ်ဂီၤတၢ်ဖီၣ် ဒီး သးတီဒီးခရံာ်န့ၣ်လီၤ.
တၢ်စံၣ်စိၤတဲစိၤ အတၢ်ပနီၣ် ယဲၢ်ခါတခါ မ့ၢ် ပှၤနာ်တၢ်ဖိ အဂၤ တကလီၢ်လွံၢ်ကလး လွံၢ်ကထိဂၤ လၢအဘၣ်ဃးဒီးယွၤ, ဒီးပကထံၣ်ဘၣ်အီၤလၢ တၢ်လီၣ်ဖျါ ၁၄း၁-၅ အပူၤန့ၣ်လီၤ. ပမ့ၢ်ကွၢ်လၢ ယွၤအမံၤ အိၣ်ကွဲးလီၤအသးလၢ အခိၣ်တိသၣ်အလိၤ န့ၣ်, ကမ့ၢ်ပှၤတဖုဃီ လၢ ဘၣ်တၢ်ပာ်ဖျါထီၣ်အီၤလၢ တၢ်လီၣ်ဖျါ ၇း၁-၈ အပူၤ န့ၣ်လီၤ. ယွၤအမံၤ အိၣ်ကွဲးလီၤအသးလၢ အ၀ဲသ့ၣ် အခိၣ်တိသၣ်အလိၤအံၤ ထီဒါလိာ် အသးဒီး တၢ်ဒူတၢ်ဃိၤ အတၢ်ပနီၣ် လၢအအိၣ်လၢ ပှၤလၢအဒိကနၣ် တၢ်ဒူတၢ်ဃိၤ အံၤ အခိၣ်လိၤ န့ၣ်လီၤ. လၢစီၤယိၤဟၣ်အတၢ်ထံၣ် တၢ်လၢညါခီအပူၤ, ပှၤတကလီၢ် လွံၢ်ကလး လွံၢ်ကထိအံၤ ဆၢထၢၣ်ဒီး သိဖိ လၢ ကစၢၢ်စံယိၣ်အလိၤ ဒီးစံးထီၣ်ပတြၢၤ ကစၢ်ယွၤန့ၣ်လီၤ.
တၢ်စံၣ်စိၤတဲစိၤ အတၢ်ပနီၣ်အံၤ အုၣ်အသးဆူ စီၤယိၤဟၣ်အပှၤဖးလံာ်ဖိတဖၣ်အအိၣ်လၢ ပှၤနာ်တၢ်ဖိ အမ့ၢ်အတီတဖၣ် လီၢ်ခံကတၢၢ် ကပူၤဖျဲးလၢ ပယိၤဒီး တၢ်ဒူတၢ်ဃိၤ တဖၣ် အစုပူၤ ဒီးကဒိးန့ၢ် ယွၤ အတၢ်ဆိၣ်ဂ့ၤဆိၣ်၀ါ န့ၣ်လီၤ. တၢ်မၤအၢမၤနး မ့ၢ်အိၣ် တပယူာ်ဃီဘၣ်ဆၣ်, ပှၤနာ်တၢ်ဖိလၢ အသးတီတဖၣ် ကဘၣ်တၢ်ထံၣ်န့ၢ်အီၤလၢ အအိၣ်စီအိၣ်ဆှံ ဒီး တၢ်သံၣ်သူမီၤကျာ် တအိၣ်ဘၣ် န့ၣ်လီၤ.
တၢ်စံၣ်စိၤတဲစိၤ အတၢ်ပနီၣ် ဃုမံၤတမံၤ မ့ၢ် တၢ်ထံၣ်ဘၣ်ဃး ကလူးဆှၢ တၢ်ကစီၣ် သၢဂၤ, ဒီးပကထံၣ်န့ၢ်အီၤလၢ တၢ်လီၣ်ဖျါ ၁၄း၆-၁၁ အပူၤန့ၣ်လီၤ. လၢစီၤယိၤဟၣ် အတၢ်ထံၣ်အပူၤ, ကလူးအခီၣ်ထံးတဂၤ စံးဘၣ်တဲဘၣ် တၢ်သးခုကစီၣ်လီၤထူ လီၤယိာ်အဂ့ၢ်, ကိးပှၤကိးဂၤဒဲးလၢ ကပျံၤယွၤဒီး ဒီးဘါထီၣ်အီၤ န့ၣ်လီၤ. ကလူးခံဂၤတဂၤ ဘိးဘၣ်ရၤလီၤ ဘၣ်ဃး တၢ်ဒိၣ်ဘၤဘူလိၣ် အတၢ်လီၤပှီၢ်အဂ့ၢ်, ၀့ၢ်ခိၣ်လၢ ပှၤလၢ အထီဒါ ကစၢ်ခရံာ်အဘီအမုၢ်တဖၣ်အိၣ်၀ဲ အလီၢ်န့ၣ်လီၤ. ဒီး ကလူးသၢဂၤတဂၤ ကိးသတြီထီၣ် ဘၣ်ဃး တၢ်စံၣ်ညီၣ်လီၢ်ခံကတၢၢ်လၢ ပှၤကိးဂၤဒဲးလၢ အပိာ်ဒီး ဘါထီၣ် တၢ်ဒူတၢ်ဃိၤ အဂီၢ်န့ၣ်လီၤ. ကလူးတဖၣ် အံၤ စံးဘၣ်တဲဘၣ်ပှၤလၢ ခရံာ် အတၢ်သးခုကစီၣ် ကမၤနၢၤ ဘီမုၢ်အဂၤတဖၣ်ခဲလၢာ်, ဒီးဖဲ ခရံာ်ဟဲက့ၤကဒါက့ၤ အခါ အဒုၣ်အဒါခဲလၢာ် ကဘၣ်တၢ်စံၣ်ညီၣ် လီၤထူလီၤယိာ် န့ၣ်လီၤ.
စီၤယိၤဟၣ် အတၢ်ထံၣ်ဘၣ်ဃး မူခိၣ်ကလူးတဖၣ်အံၤ ကမၤစၢၤ အပှၤဖးလံာ်ဖိတဖၣ် လၢ, တဘျီတခီၣ် မ့ၢ်လီၤဂာ်လၢ တၢ်အိၣ်ဖှိၣ် ဘၣ်တၢ်မၤနၢၤအီၤ ဘၣ်ဆၣ်, လီၢ်ခံကတၢၢ် ခရံာ်အဘီအမုၢ် ကမၤနၢၤတၢ် န့ၣ်လီၤ. ဒီး စီၤယိၤဟၣ် အပှၤဖးလံာ်ဖိတဖၣ် အကျါ မ့ၢ်ဆိကမိၣ်လၢ ကဘါထီၣ်ရိမ့ၤ အစီၤပၤ ဒ်သိးအသုတဘၣ်တၢ်မၤအၢ မၤသီအီၤတဂ့ၤအဂီၢ် န့ၣ်, တၢ်ဂ့ၢ်အံၤ ကဟ့ၣ်ပလီၣ် အ၀ဲသ့ၣ်လၢ ကထီဒါကွံာ် တၢ်လ့ပစီအံၤ န့ၣ်လီၤ.
ကလူးအတၢ်ကစီၣ် ၀ံၤအလီၢ်ခံ, စီၤယိၤဟၣ်ထၢနုာ် တၢ်ဘၢၣ်စၢၤ ဖုၣ်ဖုၣ်ဖိတခါ လၢတၢ်လီၣ်ဖျါ ၁၄း၁၂-၁၃ အပူၤန့ၣ်လီၤ. လၢတၢ်ဘၢၣ်စၢၤတခါအံၤအပူၤ, စီၤယိၤဟၣ် ဟ့ၣ်ဂံၢ်ဟ့ၣ်ဘါ ယွၤအပှၤဂီၢ်မုၢ်တဖၣ် ဒ်သိး ကဆိးသီ, ဒ်သိးကထီဒါ ပှၤလၢအဘါထီၣ်တၢ်ဂီၤတဖၣ် လၢအအိၣ်၀းတရံးအီၤ န့ၣ်လီၤ. ဒီးတၢ်ကလုၢ်သီၣ်ထီၣ် လၢမူခိၣ် စံး၀ဲ ပှၤလၢ အသးတီတဖၣ် လီၢ်ခံကတၢၢ် ကဒိးန့ၢ် ယွၤအတၢ်ဆိၣ်ဂ့ၤဒီး တၢ်အိၣ်ဘှံး န့ၣ်လီၤ.
တၢ်စံၣ်စိၤတဲစိၤ အတၢ်ပနီၣ် အလီၢ်ခံကတၢၢ်တခါ တဲတၢ်ဘၣ်ဃး ပှၤတဂၤလၢ အလီၤဂာ်ပှၤကညီအဖိခွါ, လၢအဆ့ၣ်နီၤလၢ တၢ်အၢၣ်၀ါတလိၣ်အလိၤ ဒီးဟဲဒ်သိး ကကူးက့ၤ ဘုန့ၣ်လီၤ. ပကထံၣ်န့ၢ်အီၤဖဲ တၢ်လီၣ်ဖျါ ၁၄း၁၄-၂၀ အပူၤန့ၣ်လီၤ. တၢ်ကတိၤ "ပှၤကညီအဖိခွါ" အံၤ ဘၣ်တၢ်သူစ့ၢ်ကီးအီၤလၢ တၢ်လီၣ်ဖျါ ၁း၁၃, လၢအမ့ၢ် ယ့ၣ်ရှူး န့ၣ်လီၤ. ဒီးလၢ တၢ်လီၣ်ဖျါ ၁၄အပူၤ တၢ်ကွဲးတဖၣ်ပာ်ဖျါထီၣ်လၢ ပှၤကညီအဖိခွါအံၤ မ့ၢ်ခရံာ်စ့ၢ်ကီးန့ၣ်လီၤ. တၢ်ကွဲးအံၤ ဟဲန့ၢ်အသးလၢ ဒၤနံၤယ့လး ၇း၁၃ အပူၤ, ဖဲပှၤတဂၤ လၢ "လီၤဂာ်ပှၤကညီအဖိခွါ" ဟဲလီၤလၢတၢ်အၢၣ်ကျါ ဒ်သိး ကနုာ်လီၤဆူ ယွၤအမူခိၣ်ဘီမုၢ် အလီၢ်ပစိာ် အပူၤန့ၣ်လီၤ.
တၢ်စံၣ်စိၤတဲစိၤ အပနီၣ်နွံမံၤ အကျါ အခီၣ်ထံးကတၢၢ်တခါ လၢအမ့ၢ် တၢ်ပနီၣ် ဘၣ်ဃးပိာ်မုၣ်န့ၣ်, ယ့ၣ်ရှူးဘၣ်တၢ်ဒိလီၤအီၤဒ် ဖိသၣ် လၢအဘၣ်တၢ်က့ၤ စိာ်အီၤဆူ မူခိၣ်န့ၣ်လီၤ. ဘၣ်ဆၣ် တၢ်ဂ့ၢ်တဖၣ်အံၤ၀ံၤ, ယ့ၣ်ရှူးဘၣ်တၢ်ဒိ လီၤက့ၤအီၤလၢ ပှၤကညီအဖိခွါ လၢအကူးက့ၤအဘုလၢအမ့ၢ် ပှၤပိာ်အခံလၢ အသးတီ တဖၣ်န့ၣ်လီၤ. ၀ံၤအလီၢ်ခံ, ပှၤကူးက့ၤတၢ်ခံဂၤတဂၤ, လၢအမ့ၢ် မူခိၣ်ကလူး, ကူးက့ၤ ပှၤလၢအအိၣ်တ့ၢ်လၢ ဟီၣ်ခိၣ်ချၢတဖၣ် ဒီး ဖၢလီၤ၀ဲလၢ ယွၤအတၢ်သးဒိၣ် ထီၣ်အနီၣ်စံၢ် စပံးသၣ် အကျိးဖးဒိၣ် အပူၤလီၤ. တၢ်ထံၣ်တခါအံၤ တဲဘၣ်ပှၤဘၣ်ဃး ခရံာ်အတၢ်မၤနၢၤ အလၢအပှဲၤလၢ ခါလၢအကဟဲအပူၤ န့ၣ်လီၤ. တၢ်အံၤဒုးနဲၣ်ပှၤလၢ, တၢ်စံၣ်စိၤတဲစိၤန့ၣ် သုးအသးဆူ တၢ်လၢတၢ်ပှဲၤ, ဖဲပှၤလၢအသးတီဒီး ခရံာ်တဖၣ် ကဘၣ်တၢ်မၤလၤကပီၤအီၤ, ဘၣ်ဆၣ် ပှၤလၢအသးတတီဒီးခရံာ်တဖၣ် ကဘၣ်တၢ်မၤဟးဂီၤအီၤ န့ၣ်လီၤ.
စီၤယိၤဟၣ်အပှၤဖးလံာ် အခီၣ်ထံးခီၣ်ဘိတဖၣ် ကြၢးထံၣ်တၢ်အံၤ လၢကဟ့ၣ်ဂံၢ်ဟ့ၣ်ဘါ အ၀ဲသ့ၣ်အဂီၢ်န့ၣ်လီၤ. အ၀ဲသ့ၣ် ကဘၣ်သ့ၣ်ညါ၀ဲလၢ အတၢ်တူၢ်ဘၣ်ခီၣ်ဘၣ်တဖၣ် တမ့ၢ်တၢ်တီတမံၤဘၣ်, မ့ၢ်ဘၣ်ထိၣ်သတြီၤဒီး ကစၢ်ယွၤ အတၢ်သးဒိၣ်ထီၣ် လူလီၤလၢ အဒုၣ်အဒါ အလိၤ န့ၣ်လီၤ. ဒီး အ၀ဲသ့ၣ် ကအိၣ်ဒီး တၢ်မုၢ်လၢ် ဒီးတၢ်နာ်န့ၢ်လီၤသး မ့ၢ်လၢ လီၢ်ခံကတၢၢ် အ၀ဲသ့ၣ်ကဘၣ် တၢ်မၤလၤကပီၤအီၤ ဒီး ကဘၣ်ဆိၣ်ဂ့ၤဆိၣ်၀ါ န့ၣ်လီၤ.
ဘၣ်ဃးဒီး တၢ်ထံၣ်တၢ်လၢညါခီ လၢအမ့ၢ် တၢ်စံၣ်စိၤတဲစိၤ အပနီၣ်တဖၣ်အံၤ, စီၤယိၤဟၣ် အပှၤဖးလံာ်အခီၣ်ထံးခီၣ်ဘိတဖၣ် ကြၢးသ့ၣ်နီၣ်ထီၣ် က့ၤလၢ ခရံာ်မၤနၢၤလံ မုၣ်ကီၤလံၢ် လၢ ထူၣ်စုညါအလိၤလံ. ဒီးဖဲခရံာ်ဟဲတၢတဘျီအခါ မုၣ်ကီၤလံၢ် မၤနၢၤအီၤ တန့ၢ်ဘၣ်အသိး, ပှၤနာ်တၢ်ဖိတဖၣ် ကဘၣ်အိၣ်ဒီးတၢ် နာ်သပှၢ်ကတၢၢ်လၢ တၢ်တဘျီအံၤစ့ၢ်ကီး မုၣ်ကီၤလံၢ် ကဃၣ်ကွံာ် ၀ဲန့ၣ်လီၤ. ဒီးဖဲတစိၢ်တလီၢ်အတီၢ်ပူၤအံၤ, ပှၤနာ်တၢ်ဖိတဖၣ် ဘၣ်လဲၤခီဖျိ တၢ်မၤအၢမၤနး မ့ၢ်လၢ ဒုၣ်ဒါလၢအဃၣ်ကွံာ်တဂၤ အတၢ်စှီၤတံၢ်ဃာ်တၢ်ဖဲအဘူး ထီၣ်ကသံ အဆၢကတီၢ် အဃိန့ၣ်လီၤ.
အခဲအံၤ ပကွၢ်သကိး တၢ်ပနီၣ်နွံခါ, ကွဲၤနွံဖျၢၣ်, ဒီး တၢ်စံၣ်စိၤတဲစိၤ အပနီၣ် နွံခါ၀ံၤလံအဃိ, ပကလဲၤဆူ တၢ်ထံၣ်လွံၢ်ခါတခါ လၢအဘၣ်ဃးဒီး တၢ်ကမၤအသးခါဆူညါ, လၢအမ့ၢ် ယွၤအတၢ်သးဒိၣ် အလီခီထူနွံဖျၢၣ် လၢလံာ်တၢ်လီၣ်ဖျါ ၁၅ ဒီး ၁၆ အပူၤန့ၣ်လီၤ.
လီခီထူနွံဖျၢၣ် (Seven Bowls)
တၢ်ထံၣ်တၢ်လၢညါခီ ဘၣ်ဃးလီခီထူနွံဖျၢၣ် အံၤမ့ၢ် ကလူးနွံဂၤ လၢအလူလီၤ ယွၤအတၢ်သးဒိၣ် အလီခီထူနွံဖျၢၣ် ဆူပှၤ လၢတသ့ၣ်ညါယွၤ တဖၣ်အလိၤ န့ၣ်လီၤ. တၢ်ထံၣ်တခါအံၤ ပိာ်ထွဲထီၣ်စ့ၢ်ကီး တၢ်ထံၣ်လၢညါတဖၣ် အခံလၢအမ့ၢ် လီခီထူဃုဖျၢၣ် ၀ံၤအလီၢ်ခံ တၢ်ဘၢၣ်စၢၤပိာ်ထွဲထီၣ်အခံတခါ, ၀ံၤအလီၢ်ခံ လီခီထူနွံဖျၢၣ်တဖျၢၣ် ဘၣ်တၢ်လူလီၤအီၤ န့ၣ်လီၤ.တၢ်လဲၤတပူၤဃီ အိၣ်စ့ၢ်ကီး ၀ဲန့ၣ်လီၤ. အဒိ, ဒ်ကွဲၤအခီၣ်ထံးလွံၢ်ဖျၢၣ် အသိး, လီခီထူအခီၣ်ထံးလွံၢ်ဖျၢၣ် မၤဟးဂီၤ တၢ်အရ့ဒိၣ်လၢ ဟီၣ်ခိၣ်ချၢ လွံၢ်ခါ လၢအမ့ၢ် ခိသူခိၣ်, ပီၣ်လဲၣ်, ထံကဆှီ, ဒီး မူကပိာ်လိၤ န့ၣ်လီၤ. တၢ်စံၣ်ညီၣ်လၢအဟဲလၢကွဲၤအသီၣ် မၤဘၣ်ဒိ ဟီၣ်ခိၣ်သၢပူတပူ, ဘၣ်ဆၣ် လီခီထူ မၤဟးဂီၤ ဟီၣ်ခိၣ်ချၢဒီတဘ့ၣ် န့ၣ်လီၤ.
လီခီထူအခီၣ်ထံးတဖျၢၣ် ဆှၢလီၤ တၢ်ဆါအုၣ်လီၤသလဲးအအၢအသီ ဆူပှၤလၢ အအိၣ်ဒီး တၢ်ဒူတၢ်ဃိၤအပနီၣ်လၢအလိၤ, ဒီးဘါထီၣ်တၢ်ဒူတၢ်ဃိၤ တဖၣ် အအိၣ်န့ၣ်လီၤ. လီခီထူခံဖျၢၣ်တဖျၢၣ် ဒုးကဲထီၣ်ပီၣ်လဲၣ်ထံလၢ တၢ်သွံၣ် န့ၣ်လီၤ. လီခီထူ သၢဖျၢၣ်တဖျၢၣ် ဒုးကဲထီၣ် ထံကဆှီ ဒီး ထံထီၣ်ပၢၢ် တဖၣ် လၢ တၢ်သွံၣ် န့ၣ်လီၤ. ဒီး လီခီထူလွံၢ်ဖျၢၣ်တဖျၢၣ် ဒုးအိၣ်ထီၣ် မုၢ်အတၢ်ကိၢ် လၢအဆူၣ် န့ၣ်လီၤ. တၢ်ဆါသံသတြိာ် မ့ၢ်အိၣ်အါထဲလဲၣ်ဘၣ်ဆၣ်, ပှၤကညီ တဖၣ် ဆိၣ်အၢယွၤ ဒီး သမၢလၢ ကပီၢ်ယၢ်လီၤက့ၤ အသးန့ၣ်လီၤ.
လီခီထူ ယဲၢ်ဖျၢၣ်တဖျၢၣ် ဘၣ်တၢ်လူလီၤအီၤလၢ တၢ်ဒူတၢ်ဃိၤ အလီၢ်ဆ့ၣ်နီၤ အလိၤန့ၣ်လီၤ. တၢ်လီၣ်ဖျါ ၁၃ အပူၤ, ပကထံၣ်ဘၣ်လၢ တၢ်ဒူတၢ်ဃိၤအံၤ မ့ၢ် တၢ်ဒူတၢ်ဃိၤ လၢအဟဲလၢပီၣ်လဲၣ်ပူၤ, ဒီးဘၣ်တၢ်မၤစၢၤအီၤလၢ တၢ်ဒူတၢ်ဃိၤ လၢအဟဲလၢ ဟီၣ်ခိၣ်ပူၤ န့ၣ်လီၤ. လီခီထူအံၤ ဒုးကဲထီၣ် တၢ်ဒူတၢ်ဃိၤအဘီ အမုၢ်လၢ တၢ်ခံးတၢ်နၤ, ဘၣ်ဆၣ် ပှၤလၢပိာ် တၢ်ဒူတၢ်ဃိၤ အခံတဖၣ် ဆိၣ်အၢဒံးယွၤ, ဒီးသမၢလၢ ကပီၢ်ယၢ်လီၤက့ၤအသးန့ၣ်လီၤ. ဖဲ လီခီထူ ဃုဖျၢၣ်တဖျၢၣ် ဘၣ်တၢ်လူလီၤအီၤအခါ, ဒုးဃ့ထီကွံာ် ထံကျိဖးဒိၣ် ဖရၤသး, ဒီးဒုးအိၣ်ထီၣ် ကျဲလၢ စီၤပၤလၢမုၢ်ထီၣ်တဖၣ် ကနုာ်လီၤဂုာ်န့ၢ် ကီၢ်တၢ်စံးပာ် န့ၣ်လီၤ.
တၢ်လီၣ်ဖျါ ၁၆း၁၆ စံးလၢ, တၢ်ဒုးဖးဒိၣ် ကအိၣ်ထီၣ်လၢ စီၤပၤလၢ မုၢ်ထီၣ် တဖၣ်ဒီး ယွၤအခ့အပှၤ တဖၣ်အဘၢၣ်စၢၤ ဒီး တၢ်ဒုးအံၤကကဲထီၣ်လၢ အၢ်မက့းဒိၣ် (Armageddon) မ့တမ့ၢ် ကစၢၢ် မကံဒိၣ် အလိၤ န့ၣ်လီၤ. ဖဲအံၣ်စရ့လးလၢပျၢၤ အစိၤအခါ မကံဒိၣ် မ့ၢ်၀့ၢ်တ၀့ၢ်လၢ အအိၣ်လၢ ကျဲမုၢ် ဒိၣ်လၢ မဲၤဆိၤဖိၤထ့မံယါ ဒီးဆူ အဲၤကူပတူး အကပၤ န့ၣ်လီၤ. သုးမုၢ်ဖးဒိၣ် အိၣ်ဆီလီၤ အသး လၢ ယံးစရ့လး တၢ်တြီၤပူၤ လၢအအိၣ်ဘူးဒီး မကံဒိၣ် သ့၀ဲန့ၣ်လီၤ. ဒီးဖဲမကံဒိၣ်န့ၣ် ယွၤအပှၤဂီၢ်မုၢ် မၤနၢၤ အဒုၣ်အဒါဖဲန့ၣ် စ့ၢ်ကီးန့ၣ်လီၤ. အဃိ မကံဒိၣ် ကဲထီၣ်တၢ်ပနီၣ်တခါလၢ တၢ်ဒုးသုးဒုးသံၣ်လၢ ယွၤအခ့အပှၤဒီး အဒုၣ်အဒါ အဘၢၣ်စၢၤ န့ၣ်လီၤ.
၀ံၤအလီၢ်ခံ, စီၤယိၤဟၣ် အတၢ်ထံၣ် ပတုာ်တစိၢ်ဖိ ခီဖျိ တၢ်ဘၢၣ်စၢၤ တခါလၢ တၢ်လီၣ်ဖျါ ၁၆း၁၅ အပူၤ, လၢအဘိးဘၣ်သ့ၣ်ညါ၀ဲ -
ကွၢ်ကွၢ်, ယဟဲဒ် တၢ်ဘျၣ်အသိးန့ၣ်လီၤ. ပှၤလၢ အဆိးသီ, ဒီးဟံးဃာ် အကူအသိး ဒ်သိး အသုတလဲၤအိၣ် ဘ့ၣ်ဆ့တဂၤ, ဒီးပှၤသုတထံၣ် အတၢ်မဲာ်ဆှး တဂ့ၤ တဖၣ်န့ၣ်, ဘၣ်ဆိၣ်ဂ့ၤ၀ဲလီၤ. (တၢ်လီၣ်ဖျါ ၁၆း၁၅)ပမ့ၢ်ကွၢ် တၢ်ပရၢဆူ စၢ်ဒံ လၢလံာ်တၢ်လီၣ်ဖျါ ၃ အပူၤ, ပကထံၣ်ဘၣ်လၢ ကစၢ်ခရံာ် သဆၣ်ထီၣ် ပှၤပိာ်အခံတဖၣ်လၢ ကဆိးသီဒီး တီဒီအီၤ လၢကိးဆၢကတီၢ်ဒဲး အပူၤန့ၣ်လီၤ.
တၢ်ဘၢၣ်စၢၤအံၤ ၀ံၤအလီၢ်ခံ, လီခီထူ နွံဖျၢၣ်တဖျၢၣ် ဟ့ၣ်ထီၣ် တၢ်ဟးဂူာ်ဟးဂီၤ လီၢ်ခံကတၢၢ် လၢ ပှၤတနာ်ယွၤတဖၣ် အဂီၢ်န့ၣ်လီၤ. လီသီၣ်လီသဲ ဒီး လီ၀ၢ်ဒံး တဖၣ် အိၣ်ဖျါထီၣ်၀ဲ, ဒီးဟီၣ်ခိၣ်ဟူး၀း လၢ ဘီမုၢ်တဖၣ် အ၀့ၢ်တဖၣ် အပူၤ န့ၣ်လီၤ. ကီးတဖၣ်စ့ၢ် ကီးလီၤဘျၢကွံာ် ၀ဲ, ကစၢၢ်ကလိတဖၣ် စ့ၢ်ကီးဒံကွံာ်ဒံဖျိး ကွံာ်၀ဲန့ၣ်လီၤ. သူၣ်ဖးဒိၣ် တဖၣ်လီၤ ဘၣ် ပှၤကညီအလိၤ န့ၣ်လီၤ. အအံၤ မ့ၢ်၀ဲ မုၢ်နံၤလၢခံကတၢၢ်, တၢ်မၤဟးဂီၤ ဟီၣ်ခိၣ်အံၤ ကမၤအသးဖဲ ခရံာ်ဟဲက့ၤ ကဒါက့ၤန့ၣ်လီၤ.
){kind=link}
0 Comments