တၢ်ထံၣ်တၢ်လၢညါခီ တခါအံၤ ကဲထီၣ်အသးလၢ မဲးမုၢ်ခိၣ် န့ၣ်လီၤ. တၢ်လီၣ်ဖျါ ၁၇း၁ စံး၀ဲအသိး, တၢ်ထံၣ်တၢ်လၢညါခီ ဒီတခါအံၤ ပာ်ဖျါထီၣ် တၢ်စံၣ်ညီၣ် ဃဲသဲမုၣ်ဖးဒိၣ်, လၢအပၣ်ဃုာ်ဒီး ကစၢ်ခရံာ် အတၢ်ဟဲက့ၤခံဘျီတဘျီ, တၢ်ဒုးဖးဒိၣ်လၢခံကတၢၢ် တဘျီဖဲ တၢ်အၢတၢ်သီ အသုးမုၢ်တဖၣ် ဘၣ်တၢ်မၤနၢၤကွံာ်အီၤခဲလၢာ်, ပှၤလၢအသးတီဒီးခရံာ်တဖၣ် အတၢ်ပၢ, ဒီး တၢ်မၤသီထီၣ် က့ၤ မူခိၣ်ဒီးဟီၣ်ခိၣ် အလီၢ်ခံကတၢၢ်တဘျီ န့ၣ်လီၤ. စီၤယိၤဟၣ် ဒုးအိၣ်ထီၣ် တၢ်ဂ့ၢ်အံၤ ဒ်သိး ကဒုးအိၣ်ထီၣ် အပှၤဖးလံာ်ဖိတဖၣ် အတၢ်သးစၢၢ်ဆၢ ဘၣ်ဃး တၢ်ဆိၣ်ဂ့ၤလၢခံကတၢၢ် လၢပှၤလၢ အသးတီဒီးခရံာ် တဖၣ်အဂီၢ်, ဒီး တၢ်ဆိၣ်အၢ ထီရီၤ လၢပှၤလၢ အတသးတီဒီး ခရံာ်တဖၣ်အဂီၢ် န့ၣ်လီၤ. တၢ်ခံခါအံၤ ကဟ့ၣ်ဂံၢ်ဟ့ၣ်ဘါ အပှၤဖးလံာ်ဖိတဖၣ် လၢကဃုယွၤ အတၢ်ဆိၣ်ဂ့ၤ ဒီး ပဒ့ၣ်ကွံာ် ယွၤအတၢ်စံၣ်ညီၣ် ကသ့အဂီၢ်န့ၣ်လီၤ.
တၢ်ထံၣ်တၢ်လၢညါခီ ဖုၣ်ကိာ်ဖိ ခံမံၤ အိၣ်လၢ တၢ်ထံၣ်တၢ်လၢညါခီ ဘၣ်ဃး တၢ်စံၣ်ညီၣ်ဃဲသဲမုၣ်ဖးဒိၣ် အပူၤန့ၣ်လီၤ. တၢ်တၢတခါ တဲဘၣ်ဃး ယွၤအတၢ်စံၣ်ညီၣ် ဘၤဘူလိၣ်, ဒီးခံခါတခါ တဲဘၣ်ဃး ပှၤစီဆှံတဖၣ်အတၢ်ပၢ န့ၣ်လီၤ. ပကကွၢ် တၢ်ဂ့ၢ်အံၤ ခံခါလၢာ်, ဒီးပကစးထီၣ်ဆိအီၤလၢ တၢ်စံၣ်ညီၣ် ဘၤဘူလိၣ် လၢလံာ် တၢ်လီၣ်ဖျါ ၁၇း၁ - ၁၉း၂၁ အပူၤန့ၣ်လီၤ.
တၢ်စံၣ်ညီၣ်ဘၤဘူလိၣ်
ဒ်စီၤယိၤဟၣ်အတၢ်ထံၣ် ဘၣ်ဃးတၢ်ပနီၣ်တဖၣ်, ကွဲၤတဖၣ်, တၢ်စံၣ်စိၤတဲစိၤ အပနီၣ်တဖၣ်, ဒီး လီခီထူတဖၣ် အသိး, အတၢ်ထံၣ် လၢအဘၣ်ဃးဒီး တၢ်စံၣ်ညီၣ်ဘၤဘူလိၣ်စ့ၢ်ကီး တဲကဒါက့ၤ တၢ်အိၣ်ဖှိၣ်အတၢ်စံၣ်စိၤတဲစိၤ စ့ၢ်ကီးန့ၣ်လီၤ.လၢ တၢ်လီၣ်ဖျါ ၁၇း၁-၆ အပူၤ, ၀့ၢ်ဘၤဘူလိၣ် အံၤဘၣ်တၢ်ဒိလီၤအီၤဒ် ဃဲသဲမုၣ် အသိးန့ၣ်လီၤ. ပိာ်မုၣ်အံၤ ကူသိး၀ဲလၢ တၢ်လုးတကုာ်, ဒီးတၢ်အဂီၤဆှုၣ်ကလာ်, ဒီးကယၢကယဲ အသးဒီး ထူဒီးတၢ်မျၢ်, ဒီး တၢ်မျၢ်ပလဲ န့ၣ်လီၤ. အတၢ်အိၣ်ဖျါ ဒီး အတၢ်မၤလၢအဘၣ်ဃး တၢ်မၤကမၣ်မုၣ်ကမၣ်ခွါ တဖၣ် မ့ၢ် တၢ်ပနီၣ်လၢ တၢ်မၤမုာ်လၤသးခုသး အဂီၢ်, လၢကထုးယံၤကွံာ် ယွၤအပှၤဂီၢ်မုၢ်လၢ တၢ်ဘူၣ်တၢ်ဘါအမ့ၢ်အတီ ဒီး တၢ်အိၣ်မူတီတီလိၤလိၤ အအိၣ်န့ၣ်လီၤ. ဘၣ်ဆၣ် ဖဲအံၤ အတၢ်အိၣ်ဖျါ ထီၣ်အလီၢ်မ့ၢ် မဲးမုၢ်ခိၣ်, အဃိ အတၢ်မုာ်လၤသးခု တဖၣ် မၤဖျါထီၣ်၀ဲ တသ့ဘၣ်. တကးဒံးဘၣ်, အ၀ဲစိာ်၀ဲဒီး လီခီထူ လၢအပှဲၤ ၀ဲဒီး တၢ်သးဘၣ်အၢတဖၣ်, ဒီး တၢ်မၤဘၣ်အၢ ဘၣ်ဃး ဒီး အတၢ်မၤကမၣ်မုၣ် ကမၣ်ခွါ လီၤ.
 |
| ပိာ်မုၣ်တဂၤလၢတၢ်ဒူတၢ်ဃိၤအလိၤ, ဒ်ပှၤတ့တၢ်ဂီၤတဂၤ တ့ကလွၤတၢ်ဂီၤအသိး |
ပိာ်မုၣ်တဂၤအံၤ ဆ့ၣ်နီၤလၢ တၢ်ဒူတၢ်ဃိၤ ဂီၤဆှုၣ်ကလာ် တဒုအလိၤ လၢအအိၣ်ဒီး ခိၣ်နွံဖျၢၣ်, ဒီးအနၢၤဆံဆဲၣ်ဘိ န့ၣ်လီၤ. တၢ်ဒူတၢ်ဃိၤ တဒုအံၤ မ့ၢ်တၢ်ဒူ တၢ်ဃိၤ တဒုဃီလၢ အဟဲလၢပီၣ်လဲၣ် အပူၤ လၢဘၣ်တၢ်ပာ်ဖျါထီၣ် အဂ့ၢ်လၢ တၢ်လီၣ်ဖျါ ၁၃ အပူၤန့ၣ်လီၤ. တၢ်ဒူတၢ်ဃိၤတဒုအံၤ လၢပှဲၤ၀ဲဒီး တၢ်အမံၤတဖၣ် ဘၣ်ဃး တၢ်ဒုၣ်ဒွဲၣ်ယွၤ, လၢအပာ်ဖျါထီၣ် အကစၢ်ဒၣ်၀ဲ အတၢ်ဂံၢ်စၢ်ဘါစၢ် ဒီး ပှၤလၢအပိာ်အခံတဖၣ် အဂ့ၢ်န့ၣ်လီၤ.
ဃဲသဲမုၣ်တဂၤအံၤ မ့ၢ်ပှၤဒ်လဲၣ်, ဒီး တၢ်ဒူတၢ်ဃိၤ အံၤ မၤသးဒ်လဲၣ်န့ၣ် ပမ့ၢ်ဆဲးဖးအီၤဆူညါ ကအိၣ်ဖျါထီၣ်၀ဲ န့ၣ်လီၤ. ဒ် တၢ်ထံၣ်ဘၣ်ဃး တၢ်ပနီၣ်တဖၣ်, ကွဲၤတဖၣ်, တၢ်စံၣ်စိၤတဲစိၤ အပနီၣ်တဖၣ်, ဒီး လီခီထူ တဖၣ်အသိး, တၢ်ထံၣ်တၢ်လၢညါခီ တခါအံၤစ့ၢ်ကီး ပာ်ဖျါထီၣ် တၢ်စံၣ်ညီၣ် ဒီးတၢ်သယုၢ် အတၢ်ကစီၣ်ဃုခါ ၀ံၤ ပိာ်ထွဲထီၣ်အခံလၢ တၢ်ဘၢၣ်စၢၤ တခါန့ၣ်လီၤ. ဘၣ်ဆၣ် ဖဲတၢ်ကစီၣ်နွံခါတခါအလီၢ်န့ၣ် တၢ်ထံၣ်တၢ်လၢညါခီ အံၤ ကတၢၢ်ကွံာ်၀ဲလၢ တၢ်ဒုးတၢ်ယၤ န့ၣ်လီၤ.
တၢ်ကစီၣ်တၢတခါ, ပကထံၣ်အီၤဖဲ တၢ်လီၣ်ဖျါ ၁၇း၇-၁၈ အပူၤ, ပာ်ဖျါထီၣ် တၢ်ထံၣ်ဘၣ်ဃး ဃဲသဲမုၣ် ဒီး တၢ်ဒူတၢ်ဃိၤအံၤ အဂ့ၢ်လီၤတံၢ်လီၤဆဲး န့ၣ်လီၤ. ပတဲဖုၣ်လီၤ တၢ်ကစီၣ်အံၤ သ့ခီဖျိ ပစံးလၢ ယွၤကမၤဟးဂီၤ ပှၤကိးဂၤဒဲး ဒီး တၢ်ကိးမံၤဒဲး လၢ အထီဒါ အီၤန့ၣ်လီၤ.
တၢ်ကစီၣ်ခံခါတခါ, ပကထံၣ်အီၤဖဲ တၢ်လီၣ်ဖျါ ၁၈း၁-၃ အပူၤ, တဲဘၣ်ဃး တၢ်မၤနၢၤ ဘၤဘူလိၣ် ဒီး ဘီမုၢ်ခဲလၢာ်, စီၤပၤတဖၣ်, ဒီး ပှၤကူၣ်လဲၤမၤကၤ တၢ်ဖိတဖၣ်လၢ ပိာ်မုၣ်အံၤ ကွဲန့ၢ်လွဲန့ၢ်၀ဲ တဖၣ်န့ၣ်လီၤ.
တၢ်ကစီၣ်သၢခါတခါ, ပကထံၣ်အီၤဖဲ တၢ်လီၣ်ဖျါ ၁၈း၄-၈ အပူၤ, ကိးထီၣ် ယွၤအပှၤဂီၢ်မုၢ် လၢသုတတူၢ်လိာ် ဘၤဘူလိၣ်တဂ့ၤ, ဒီး အိၣ်လီၤဖးလိာ်အသး ဒီး အတၢ်သးဘၣ်အၢ တဖၣ်အဂီၢ် န့ၣ်လီၤ.
ဒီးတၢ်ကစီၣ်လွံၢ်ခါတခါ, ဘၣ်တၢ်ပာ်ဖျါထီၣ်အီၤလၢ တၢ်လီၣ်ဖျါ ၁၈း၉-၂၀ အပူၤ, ပၣ်ဃုာ်ဒီး တၢ်သယုၢ် သၢခါ လၢစီၤပၤတဖၣ်, ပှၤကူၣ်လဲၤမၤကၤတၢ်တဖၣ်, ဒီး ပှၤကဘီဖိ တဖၣ် လၢအဘါထီၣ် တၢ်ဒူတၢ်ဃိၤ ဒီးဒိးန့ၢ် တၢ်မုာ်တၢ်ခုၣ် လၢဘၤဘူလိၣ် အအိၣ်န့ၣ်လီၤ. ဘၣ်ဆၣ် လၢတၢ်သးအုးအပူၤ, တၢ်သယုၢ် တဖၣ်အံၤ တမၤစၢၤပှၤ သ့ၣ်တဖၣ်န့ၣ်လၢ ကပီၢ်ယၢ်လီၤက့ၤအသး ဒီး အိၣ်ဒီး တၢ်နာ်ကစၢ်ခရံာ် န့ၣ်ဘၣ်. မ့မ့ၢ်တခီ, စီၤပၤတဖၣ်, ပှၤကၤတၢ်ဖိတဖၣ်, ဒီးပှၤကဘီ ဖိတဖၣ်, ကွၢ်က့ၤတၢ်လၢအပူၤကွံာ် ဖဲ ဘၤဘူလိၣ် လဲၤထီၣ်လဲၤထီဒံး အခါ န့ၣ်လီၤ.
တၢ်ကစီၣ်တခါစုာ်စုာ်အပူၤ ပကထံၣ်ဘၣ်လၢ, ဘၤဘူလိၣ် အိၣ်ဖျါထီၣ်ဒ် ဘီမုၢ် ဒီး တၢ်ကရၢကရိ လၢ အထီဒါ ခရံာ် အတၢ်ပၢ န့ၣ်လီၤ. တၢ်ကစီၣ်တဖၣ် အံၤ ဟ့ၣ်ဂံၢ်ဟ့ၣ်ဘါ ပှၤပိာ်ခရံာ်အခံတဖၣ် ခီဖျိ စံး၀ဲလၢ ယွၤကမၤလီၤပှီၢ်ကွံာ် အဒုၣ်အဒါခဲလၢာ်, ဒီး ပှၤလၢအထီဒါခရံာ်တဖၣ် ကသးအုးလၢ အတၢ်မုာ်တၢ်ခုၣ်လၢ တၢ်ဒဲးဘးအပူၤ ဟါမၢ်ကွံာ် ၀ဲအဃိ န့ၣ်လီၤ. ဘၣ်ဆၣ် တၢ်ကစီၣ်တဖၣ် အံၤ ဟ့ၣ်ပလီၣ် တၢ်အိၣ်ဖှိၣ်လၢ အသုတမၤတၢ်ဒဲးဘး အံၤတဂ့ၤ, ဒ်သိး ပသုတလီၤတဲာ်ကွံာ်လၢ တၢ်စံၣ်ညီၣ် တခါဃီအံၤ အပူၤတဂ့ၤ အဂီၢ်န့ၣ်လီၤ.
တၢ်ကစီၣ်ယဲၢ်ခါတခါ လၢတၢ်စံၣ်ညီၣ် ဘၤဘူလိၣ်အပူၤ န့ၣ် အိၣ်ဖျါထီၣ်လၢ တၢ်လီၣ်ဖျါ ၁၈း၂၁-၂၄ အပူၤ, လၢအတဲဘၣ်ဃး တၢ်မၤလီၤပှီၢ် ဘၤဘူလိၣ် လၢာ်လၢာ်ဆ့ဆ့ န့ၣ်လီၤ.
တၢ်ကစီၣ်ဃုခါတခါ ဘၣ်တၢ်ပာ်ဖျါထီၣ်အီၤလၢ တၢ်လီၣ်ဖျါ ၁၉း၁-၈ အပူၤ, လၢအပၣ်ဃုာ်ဒီး ယွၤအပှၤဂီၢ်မုၢ် အတၢ်စံးထီၣ်ပတြၢၤယွၤ လၢမူခိၣ် န့ၣ်လီၤ. ဖဲယွၤစံၣ်ညီၣ် ဘၤဘူလိၣ်အဆၢကတီၢ်, ယွၤအပှၤဂီၢ်မုၢ်လၢ အတီဒီးအီၤ တဖၣ် စံးထီၣ်ပတြၢၤအီၤ န့ၣ်လီၤ. ဒီး အ၀ဲသ့ၣ် အတၢ်စံးထီၣ်ပတြၢၤယွၤ ဆဲးလဲၤဒံး အသးဆူညါ မ့ၢ်လၢ အ၀ဲသ့ၣ် သ့ၣ်ညါ၀ဲလၢ တၢ်စံၣ်ညီၣ်ဘၤဘူလိၣ် ဒုးအိၣ်ထီၣ်ကျဲလၢ တၢ်တ့တၢ်ဖျီ လၢ သိဖိ, လၢအမ့ၢ်ကစၢ်ခရံာ်, ဒီးအတလးမူးပိာ်မုၣ်, လၢအမ့ၢ်တၢ်အိၣ်ဖှိၣ် အဂီၢ် န့ၣ်လီၤ.
၀ံၤအလီၢ်ခံ, တၢ်ဘၢၣ်စၢၤ မၤတံာ်တာ် တၢ်ကစီၣ်တဖၣ် လၢ တၢ်လီၣ်ဖျါ ၁၉း၉-၁၀ အပူၤန့ၣ်လီၤ. လၢတၢ်ဘၢၣ်စၢၤအံၤအပူၤ, စီၤယိၤဘၣ် ဘၣ်တၢ်မၢလီၤအီၤလၢ ကကွဲးလီၤ တၢ်ဆိၣ်ဂ့ၤဆိၣ်၀ါ တဖၣ် လၢပှၤလၢ အအိၣ်လၢ သိဖိ အတၢ်တ့တၢ်ဖျီ အဟါတၢ်အီၣ် အမူးပူၤ တဖၣ်အဂီၢ်န့ၣ်လီၤ.
လီၢ်ခံကတၢၢ်, တၢ်ထံၣ်တၢ်လၢညါခီ တခါအံၤ ကတၢၢ်ကွံာ် ၀ဲဖဲ တၢ်ဒုးလၢခံကတၢၢ် လၢယွၤဒီး အဒုၣ်အဒါ တဖၣ်အဘၢၣ်စၢၤ, လၢဘၣ်တၢ်ပာ်ဖျါထီၣ်အီၤဖဲ တၢ်လီၣ်ဖျါ ၁၉း၁၁-၂၁ အပူၤန့ၣ်လီၤ. ကစၢ်ခရံာ် အိၣ်ဖျါထီၣ်ဒ် ယွၤအပှၤဒုးတၢ်တဂၤ လၢအဒုးဖျိးကွံာ် ယွၤအဒုၣ်အဒါ တဖၣ်န့ၣ်လီၤ. အဒုၣ်အဒါ တဖၣ်အံၤ ဘၣ်တၢ်ပၢဆှၢအီၤလၢ တၢ်ဒူတၢ်ဃိၤ ဒီး ၀ံအဘျၣ်, လၢ အမ့ၢ် တၢ်ဒူတၢ်ဃိၤလၢ အဟဲလၢပီၣ်လဲၣ်ပူၤ ဒီး တၢ်ဒူတၢ်ဃိၤလၢ အဟဲလၢခိ လၢ လံာ်တၢ်လီၣ်ဖျါ ၁၃ အပူၤန့ၣ်လီၤ. ဒီးဖဲန့ၣ် တၢ်ဒူတၢ်ဃိၤ ဒီး ၀ံအဘျၣ် ဘၣ်တၢ်မၤနၢၤကွံာ်အီၤ လီၤစိၤလီၤထီ န့ၣ်လီၤ. ပကဒိကနၣ်သကိး လံာ်တၢ်လီၣ်ဖျါ ၁၉း၂၀ တဲဘၣ်ဃး အ၀ဲသ့ၣ်အတၢ်လီၤပှီၢ် တက့ၢ်.
ဒီးတၢ်ဖီၣ်ဃာ် တၢ်ဒူတၢ်ဃိၤ, ဒီး၀ံအဘျၣ် အိၣ်ဒီး အီၤလၢ အမၤတၢ်ပနီၣ် လီၤလးလၢအမဲာ်ညါ, ဒီးလီပှၤအိၣ်ဒီး တၢ်ဒူတၢ်ဃိၤ အတၢ်ပနီၣ် လၢအလိၤ, ဒီးဘါ အတၢ်ဂီၤ တဖၣ်လီၤ. အ၀ဲခံဂၤ ဘၣ်တၢ်တ့ၢ်လီၤကွံာ်အီၤ မူဒံး၀ဲ, ဆူနိၣ်မ့ၣ်အူ ဒီး ကးအီၣ်ကွံာ်တၢ် အပူၤလီၤ. (တၢ်လီၣ်ဖျါ ၁၉း၂၀).တၢ်ဒုးလၢခံကတၢၢ် မၤကတၢၢ်ကွံာ် တၢ်ဒုးခဲလၢာ် လၢယွၤဒုး၀ဲလၢ အပှၤဂီၢ်မုၢ် အခၢၣ်စး, ဒီးမၤလၢပှဲၤ တၢ်မၤနၢၤလၢ ခရံာ်မၤနၢၤအီၤ လၢထူၣ်စုညါ အလိၤ န့ၣ်လီၤ.
){kind=link}
0 Comments