ပှၤစီဆှံတဖၣ်အတၢ်ပၢ (Reign of Saints) (တၢ်မၤလိလံာ်တၢ်လီၣ်ဖျါ

ပှၤစီဆှံတဖၣ် အတၢ်ပၢအံၤ အိၣ် သၢကုာ်, စးထီၣ်အသးလၢ ပှၤစီဆှံတဖၣ် ပၢတၢ် အနံၣ်တကထိ, လၢအဘၣ်တၢ်ကိးညီနုၢ်အီၤလၢ နံၣ်တကထိအတၢ်ပၢ, လၢ တၢ်လီၣ်ဖျါ ၂၀း၁-၁၀ အပူၤန့ၣ်လီၤ.

နံၣ်တကထိ အတၢ်ပၢ. တၢ်ထံၣ်တခါအံၤ အပူၤ စီၤယိၤဟၣ်ထံၣ် ကလူးတဂၤ ဟဲလီၤလၢမူခိၣ် ဒီးစၢတံၢ် ပယိၤဖးဒိၣ်, လၢအမ့ၢ် မုၣ်ကီၤလံၢ် န့ၣ်လီၤ. စီၤယိၤဟၣ်ထံၣ်၀ဲလၢ တၢ်အံၤ၀ံၤ အနံၣ်တကထိ န့ၣ်, မုၣ်ကီၤလံၢ် အံၤ ကအိၣ်လၢ တၢ်စၢဃာ်အလီၢ် ဒီးဖဲန့ၣ် ခရံာ်ဖိအမၤထူရၤ လၢအသးတီတဖၣ် ကမူထီၣ်ကဒါက့ၤ ဒီးပၢဃုာ်တၢ်ဒီး ခရံာ်န့ၣ်လီၤ. စီၤယိၤဟၣ်ထံၣ်စ့ၢ်ကီး၀ဲလၢ အနံၣ်တကထိ ပူၤကွံာ်၀ံၤအလီၢ်ခံ, တၢ်ကပျဲလီၤကွံာ် မုၣ်ကီၤလံၢ် ဒ်သိး ကပာ်ဖှိၣ် ဘီမုၢ်တဖၣ် လၢကဒုးတၢ်ဒီးယွၤ လၢတၢ်ဒုးလၢခံကတၢၢ်အဂီၢ်, ဒ် တၢ်လီၣ်ဖျါ ၁၉ စံး၀ဲအသိး န့ၣ်လီၤ. တၢ်ဒုးဖးဒိၣ် အံၤ၀ံၤအလီၢ်ခံ, ယွၤအဒုၣ်အဒါ ခဲလၢာ် ကဘၣ်တၢ် မၤလီၤပှီၢ်အီၤ လီၤစိၤလီၤထီ န့ၣ်လီၤ. မုၣ်ကီၤလံၢ်အနီၣ်ကစၢ် ဒၣ်၀ဲ ကဘၣ်တၢ်တ့ၢ်လီၤကွံာ်အီၤလၢ နိၣ်မ့ၣ်အူဒီး ကးအီၣ်တၢ်အပူၤ လီၤစိၤလီၤထီ န့ၣ်လီၤ.

ပှၤကျိာ်ထံတၢ် အါတက့ၢ် စံး၀ဲလၢ ဒ်စီၤယိၤဟၣ်အတၢ်ကွဲး ဘၣ်ဃး တၢ်ထံၣ်တၢ်လၢညါခီ တဖၣ်အသိး, လံာ်တၢ်လီၣ်ဖျါ ၂၀ အံၤစ့ၢ်ကီး မ့ၢ်တၢ်အဒိအတဲာ် တခါန့ၣ်လီၤ. ဒီးပှၤနာ်တၢ်ဖိတဖၣ် ကျိာ်ထံ၀ဲ တၢ်အဒိအတဲာ်တဖၣ် လၢကျဲတဘျုးဘိညါ န့ၣ်လီၤ. အနီၢ်ကီၢ်န့ၣ်, လံာ်တၢ်လီၣ်ဖျါ ၂၀ အံၤ လၢလံာ်တၢ်လီၣ်ဖျါ ဒီတဘ့ၣ်ညါ အပူၤ မ့ၢ်တၢ်ဂ့ၢ်လၢ တၢ်တဲဂ့ၢ်လိာ်အီၤ အါကတၢၢ် န့ၣ်လီၤ.

ပမ့ၢ်ဘၣ်တဲလၢ အတကွီၢ်လဲၢ် န့ၣ်, ပှၤကျိာ်ထံ လံာ်တၢ်လီၣ်ဖျါ ၂၀ အံၤ အိၣ်၀ဲ လွံၢ်ကလုာ် ညါန့ၣ်လီၤ. တၢ်ကျိာ်ထံ တခါစုာ်စုာ် ဘၣ်တၢ်ဟ့ၣ်အီၤ အမံၤဒ် အတၢ်နၢ်ပၢၢ် အနံၣ်တကထိ လၢ လံာ်စီဆှံတတီၤ အံၤ အပူၤန့ၣ်လီၤ. တၢ်ကျိာ်ထံ လွံၢ်ကလုာ်အံၤ မ့ၢ်၀ဲ - စံၣ်စိၤနုာ် တချုးအနံၣ်တကထိ (Historic Premillennialism), တကတီၢ်ဘၣ်တကတီၢ် တချုးအနံၣ်တကထိ (Dispensational Premillennialism), အနံၣ်တကထိ၀ံၤ (Postmillennialism), ဒီး အနံၣ်တကထိ အဖၢမုၢ် (Amillennialism) တဖၣ်န့ၣ်လီၤ.

စံၣ်စိၤနုာ် တချုးအနံၣ်တကထိ ဒီး တကတီၢ်ဘၣ်တကတီၢ် တချုးအနံၣ်တကထိ ခံဖုလၢာ် နာ်တၢ်ဘၣ်ဃး တချုးအနံၣ်တကထိ, အခီပညီန့ၣ် အ၀ဲသ့ၣ်နာ် ၀ဲလၢ ကစၢ်ခရံာ်ကဟဲက့ၤ တချုး အနံၣ်တကထိ စးထီၣ်အသး န့ၣ်လီၤ. လၢ အဂၤတကပၤတခီ, အနံၣ်တကထိ ၀ံၤ, ဒီး အနံၣ်တကထိ အဖၢမုၢ်တဖၣ် မ့ၢ် ပှၤနာ်တၢ်ဘၣ်ဃး အနံၣ်တကထိ၀ံၤ, အခီပညီ အ၀ဲသ့ၣ်နာ်၀ဲလၢ ကစၢ်ခရံာ်ကဟဲက့ၤ ကဒါက့ၤ လၢအနံၣ်တကထိ ကတၢၢ်ကွံာ်၀ဲ အခါန့ၣ်လီၤ. ခဲအံၤ ပကကွၢ် သကိး တဖုစုာ်စုာ် အဂ့ၢ်လီၤတံၢ်လီၤဆဲး တက့ၢ်.

စံၣ်စိၤနုာ် တချုးအနံၣ်တကထိ (Historic Premillennialism) အံၤ ဘၣ်တၢ်ကိးအီၤလၢ စံၣ်စိၤနုာ် မ့ၢ်လၢ အမ့ၢ် တချုးအနံၣ်တကထိ အတၢ်စူၢ်တၢ်နာ် တခါလၢ ပှၤကရူၢ်အါဖု ဒီး ပှၤကူၣ်ဘၣ်ကူၣ်သ့အါဂၤ လၢတၢ်အိၣ်ဖှိၣ် တၢ်စံၣ်စိၤတဲစိၤအပူၤ တဖၣ် နာ်၀ဲဒၣ် န့ၣ်လီၤ. အ၀ဲသ့ၣ် သိၣ်လိ၀ဲလၢ ကစၢ်ခရံာ်ဟဲက့ၤ ၀ံၤအလီၢ်ခံ, မုၣ်ကီၤလံၢ် ကဘၣ်တၢ်စၢတံၢ်ဃာ်အီၤ ဒီး ဟီၣ်ခိၣ်ကအိၣ်ဒီး တၢ်မုာ်တၢ်ခုၣ် ဒီးတၢ်လဲၤထီၣ်လဲၤထီ လၢအနံၣ်တကထိ အတီၢ်ပူၤန့ၣ်လီၤ. ပှၤနာ်တၢ်ဖိတဖၣ် ကဒိးန့ၢ် တၢ်ဂဲၤထၢၣ်သမူထီၣ်က့ၤ အက့ၢ်အဂီၤ ဖဲအနံၣ်တကထိ စးထီၣ်အသး အဆၢကတီၢ်န့ၣ်လီၤ. ပှၤလၢအတနာ်ခရံာ်တဖၣ် တဒိးန့ၢ် တၢ်ဂဲၤထၢၣ်သမူထီၣ်က့ၤ အက့ၢ်အဂီၤ အံၤဘၣ်. အ၀ဲသ့ၣ် ကအိၣ်မူဘၣ်ဖးယံာ်ညါ ဘၣ်ဆၣ် အ၀ဲသ့ၣ်ကသံဒံးလီၤ. ဖဲအနံၣ်တကထိ ကတၢၢ်၀ဲန့ၣ်, မုၣ်ကီၤလံၢ် ကစးထီၣ်ထီဒါတၢ်, ဒီး ပိာ်ထွဲထီၣ်အခံဒီး တၢ်စံၣ်ညီၣ်ဖးဒိၣ် အလီၢ်ခံကတၢၢ်တဘျီ န့ၣ်လီၤ. ၀ံၤအလီၢ်ခံ ယွၤအတၢ်ပၢလီၤစိၤလီၤထီလၢ မူခိၣ်အသီ ဒီးဟီၣ်ခိၣ်အသီ အဖီခိၣ် ကစးထီၣ်အသး န့ၣ်လီၤ. တၢ်နာ်တခါအံၤ နၢ်ပၢၢ် တၢ်လီၣ်ဖျါ ၂၀ မ့ၢ်လံာ်စီဆှံတတီၤလၢ အပိာ်ထွဲ တၢ်လီၣ်ဖျါ ၁၉ အခံန့ၣ်လီၤ.

တကတီၢ်ဘၣ်တကတီၢ် တချုးအနံၣ်တကထိ (Dispensational Premillennialism) ဘၣ်တၢ်စးထီၣ်သိၣ်လိအီၤလၢ ခ.န. ၁၈၃၀ နံၣ် အခိၣ်အဃၢၤ န့ၣ်လီၤ. လၢတၢ်နာ်အံၤအပူၤ တၢ်နာ်အိၣ်ဒံး၀ဲ တဘျုးခါညါ, လၢအဘၣ်ဃးဒီး တၢ်ဆၢကတီၢ်လၢ တၢ်ကမၤအသးလီၢ်ခံကတၢၢ် တချုး အနံၣ်တကထိ တုၤဃီၤအခါန့ၣ်လီၤ. ဘၣ်ဆၣ် အါဒၣ်တၢ်တက့ၢ်, တကတီၢ်ဘၣ်တကတီၢ် တချုးအနံၣ်တကထိ သိၣ်လိ၀ဲလၢ ဖဲကစၢ်ခရံာ်ဟဲက့ၤကဒါက့ၤန့ၣ်, အ၀ဲကသူၣ်ထီၣ်က့ၤ အံၣ်စရ့လးအဘီအမုၢ်, ဒီးကပၢ ဘီမုၢ်တဖၣ်လၢဟီၣ်ခိၣ်ချၢ ဒီတဘ့ၣ်ညါ လၢအလီၢ်ပစိာ်လၢ ၀့ၢ်ယရူၤရှလ့ၣ် အပူၤန့ၣ်လီၤ. ဘူးအနံၣ်တကထိ ကကတၢၢ်ကွံာ်၀ဲအဆၢကတီၢ်, မုၣ်ကီၤလံၢ် ကစးထီၣ်ထီဒါတၢ်, ဘၣ်ဆၣ် ယွၤ ကမၤနၢၤကွံာ် မုၣ်ကီၤလံၢ်ဒီး အသုးမုၢ် လၢာ်လၢာ်ဆ့ဆ့န့ၣ်လီၤ. ၀ံၤအလီၢ်ခံ တၢ်စံၣ်ညီၣ်လၢခံကတၢၢ် ကမၤအသး, ၀ံၤအလီၢ်ခံ ယွၤအတၢ်ပၢလီၤစိၤလီၤထီလၢ မူခိၣ်အသီ ဒီး ဟီၣ်ခိၣ်အသီ အဖီခိၣ် ကစးထီၣ်အသးန့ၣ်လီၤ. ဒ် စံၣ်စိၤနုာ် တချုးအနံၣ်တကထိ နာ်၀ဲအသိး ပှၤတဖုအံၤ စ့ၢ်ကီး နၢ်ပၢၢ်၀ဲလၢ တၢ်လီၣ်ဖျါ ၂၀ ပိာ်ထွဲထီၣ် တၢ်လီၣ်ဖျါ ၁၉ အခံန့ၣ်လီၤ.

လၢအဂၤတကပၤန့ၣ်, အနံၣ်တကထိ၀ံၤ (Postmillennialism) သိၣ်လိ၀ဲလၢ ကစၢ်ခရံာ်ကဟဲက့ၤလၢ အနံၣ်တကထိ၀ံၤ အလီၢ်ခံ န့ၣ်လီၤ. အနံၣ်တကထိအံၤ ဘၣ်တၢ်ဆိကမိၣ်အီၤလၢ အမ့ၢ် တၢ်ဆၢကတီၢ်ဒီကတီၢ်ညါ လၢ ကစၢ်ခရံာ်အတၢ်ဟဲတၢတဘျီ ဒီး ခံဘျီတဘျီအဘၢၣ်စၢၤ, မ့တမ့ၢ် လီၢ်ခံနံၣ်တကထိ တချုး ခရံာ်ဟဲက့ၤကဒါက့ၤ န့ၣ်လီၤ. ဒ်လဲၣ်ဂ့ၤဒ်လဲၣ်ဂ့ၤ, ဖဲအနံၣ်တကထိအဆၢကတီၢ် ကစၢ်ခရံာ်ပၢတၢ်လၢ မူခိၣ် ခီဖျိ အတၢ်အိၣ်ဖှိၣ်လၢအအိၣ်လၢ ဟီၣ်ခိၣ်အံၤ န့ၣ်လီၤ. ဒီးအဘီအမုၢ် လဲၢ်ထီၣ်၀ဲ တကတီၢ်ဘၣ်တကတီၢ် တုၤအ၀းဟီၣ်ခိၣ် ဒီတဖျၢၣ် န့ၣ်လီၤ.

အနံၣ်တကထိ အဖၢမုၢ် (Amillennialism) အခီပညီလိၤလိၤမ့ၢ် ""အနံၣ်တကထိတအိၣ်ဘၣ်" န့ၣ်လီၤ. အမံၤဟဲအသး ခီဖျိ အ၀ဲသ့ၣ်သမၢ အနံၣ်တကထိ အဃိန့ၣ်လီၤ. အ၀ဲသ့ၣ်သိၣ်လိ၀ဲလၢ အနံၣ်တကထိ အံၤပၣ်ဃုာ်ဒီး ကစၢ်ခရံာ် အတၢ်ပၢ ဟီၣ်ခိၣ်, လၢအအိၣ်လၢ မူခိၣ်အလီၢ်ပစိာ်အပူၤ ခီဖျိ အတၢ်အိၣ်ဖှိၣ် န့ၣ်လီၤ. ၀ံၤကစၢ်ခရံာ်ကဟဲကဒါက့ၤ လၢအနံၣ်တကထိ၀ံၤအလီၢ်ခံ န့ၣ်လီၤ.

အနံၣ်တကထိအဖၢမုၢ် (Amillennialism) အံၤ လီၤဆီလိာ်အသးဒီး အနံၣ်တကထိ၀ံၤအလီၢ်ခံ (Postmillennialism) လၢကျဲအါဘိ န့ၣ်လီၤ. တၢတမံၤန့ၣ်, ပှၤနာ်အနံၣ်တကထိအဖၢမုၢ် ကိးဂၤဒဲး စံးလၢ အနံၣ်တကထိန့ၣ် မ့ၢ်တၢ်ဆၢကတီၢ်ဒီကတီၢ်လၢ ခရံာ်အတၢ်ဟဲ တၢတဘျီ ဒီးခံဘျီတဘျီ အဘၢၣ်စၢၤ န့ၣ်လီၤ. ခံမံၤတမံၤန့ၣ်, ပှၤနာ် အနံၣ်တကထိအဖၢမုၢ် ကိးဂၤဒဲး တစံး၀ဲလၢ လၢအနံၣ်တကထိအတၢ်ပၢအပူၤ ခရံာ်အဘီအမုၢ် က၀းဟီၣ်ခိၣ်ချၢဒီတဘ့ၣ်ညါ န့ၣ်ဘၣ်. ပှၤလၢ အနာ်အနံာ်တကထိ အဖၢမုၢ်တဖၣ် အဂီၢ်, ပှၤခရံာ်ဖိတဖၣ် ကဘၣ်လဲၤခီဖျိ တၢ်ဆိၣ်ဂ့ၤလၢအဟဲလၢ ယွၤအဘီအမုၢ်အပူၤ, ဒီး တၢ်တူၢ်ဘၣ်ခီၣ်ဘၣ် လၢအအိၣ်လၢဟီၣ်ခိၣ်ချၢတဖၣ် တုၤလၢ တၢ်မၤနၢၤလီၢ်ခံကတၢၢ် ဘၣ်တၢ်မၤန့ၢ်အီၤ ဖဲခရံာ်ဟဲက့ၤခံဘျီတဘျီ န့ၣ်လီၤ.

ပှၤပိာ်ခရံာ်အခံတဖၣ် ကသ့ၣ်ညါလၢ တၢ်သးခုကစီၣ်အပှၤနာ်တၢ်ဖိ (Evangelical Believers) တဖၣ် တတူၢ်လိာ်၀ဲ အနံၣ်တကထိအဖၢမုၢ်အံၤ ထီဘိန့ၣ်ဘၣ်. ဒီး တၢ်သံကွၢ်ဘၣ်ဃး အနံၣ်တကထိအံၤ လၢတၢ်စံၣ်စိၤတဲစိၤအပူၤ တၢ်ဘၣ်ဂံာ်ဂူာ်အိၣ်ထီဘိ န့ၣ်လီၤ. ပမ့ၢ်ဟံးန့ၢ် တၢ်နာ်ဖဲလဲၣ် တခါဂ့ၤတခါ ဂ့ၤ ဘၣ်ဆၣ်, တၢ်သးခုကစီၣ်ပှၤခရံာ်ဖိတဖၣ် တူၢ်လိာ်၀ဲလၢ ကစၢ်ခရံာ်ကဟဲက့ၤ ဒီးကဒိးန့ၢ် တၢ်မၤနၢၤ တၢ်အၢတၢ်သီ အလီၢ်ခံကတၢၢ်တဘျီ, ဒီး မုၣ်ကီၤလံၢ် ကဘၣ်တၢ်မၤနၢၤအီၤလၢာ်လၢာ်ဆ့ဆ့, ဒီးယွၤအပှၤဂီၢ်မုၢ် ကမူလီၤထူလီၤယိာ် လၢခရံာ်အတၢ်ပၢအဖီလာ် လၢ တၢ်ဘၣ်တ့လၢအသီထီၣ်က့ၤ အပူၤန့ၣ်လီၤ. ပ၀ဲသ့ၣ်ကိးဂၤဒဲး ပတူၢ်လိာ် တၢ်ဂ့ၢ်အံၤ သ့၀ဲန့ၣ်လီၤ. လၢတၢ်န့ၣ်အဃိ, ပထံၣ်န့ၢ် တၢ်မၤမုာ်ပှၤဖးဒိၣ် ဒီး တၢ်ဟ့ၣ်ဂံၢ်ဟ့ၣ်ဘါပှၤ သ့လၢ လံာ်စီဆှံ အတၢ်သိၣ်လိပှၤ ဘၣ်ဃး အနံၣ်တကထိ အဂ့ၢ်အပူၤ န့ၣ်လီၤ.

ခံကုာ်တကုာ် လၢအဘၣ်ဃး ဒီး တၢ်ထံၣ်ဘၣ်ဃး ပှၤစီဆှံတဖၣ်အတၢ်ပၢအံၤ တဲတၢ်ဘၣ်ဃးဒီး တၢ်စံၣ်ညီၣ်လီၢ်ခံကတၢၢ်လၢ ယွၤအဒုၣ်အဒါ တဖၣ်အဂီၢ် လၢလံာ်တၢ်လီၣ်ဖျါ ၂၀း၁၁-၁၅ အပူၤန့ၣ်လီၤ.

တၢ်စံၣ်ညီၣ်လီၢ်ခံကတၢၢ်လၢ ယွၤအဒုၣ်အဒါတဖၣ်အဂီၢ်. လၢတၢ်ထံၣ်လၢညါခီ အံၤအပူၤ, စီၤယိၤဟၣ်ထံၣ်ဝဲ ယွၤဒုးအိၣ်ထီၣ် တၢ်စံၣ်ညီၣ် လၢခံကတၢၢ် လၢပှၤကိးဂၤဒဲးအဂီၢ်, ဒိးသန့ၤထီၣ်အသးလၢ အတၢ်ဖံးတၢ်မၤ ဒၣ်ဝဲစုာ်စုာ် န့ၣ်လီၤ. တၢ်စံၣ်ညီၣ်အဝဲအံၤ ပၣ်ဃုာ်ပှၤကိးဂၤဒဲး အဂီၢ်န့ၣ်လီၤ. ပှၤနာ်တၢ်ဖိ လၢအမံၤအိၣ်ကွဲးလီၤအသးလၢ လံာ်တၢ်မူအပူၤတဖၣ် တတူၢ်ဘၣ် ယွၤအတၢ်သးဒိၣ်ထီၣ်လၢ အအၢအသီဘၣ်. ဘၣ်ဆၣ် ပှၤအဂၤ တဖၣ်ကဘၣ်တၢ်စံၣ်ညီၣ်အီၤလၢ အတၢ်ဒဲးဘးအဃိ န့ၣ်လီၤ. တၢ်စံၣ်ညီၣ်လၢခံကတၢၢ်အံၤ မၤပျီကွံာ်ဝဲ တၢ်ဒဲးဘးလၢ ဟီၣ်ခိၣ်ချၢအံၤခဲလၢာ်ခဲဆ့, ဒီးဒုးအိၣ်ထီၣ်ကျဲလၢ မူခိၣ်အသီ ဒီးဟီၣ်ခိၣ်အသီ အဂီၢ်န့ၣ်လီၤ.

လီၢ်ခံကတၢၢ်, တၢ်သၢကုာ်တကုာ်လၢ အတဲဘၣ်ဃး ပှၤစီဆှံတဖၣ် အတၢ်ပၢ တဲတၢ်ဘၣ်ဃး တၢ်စံၣ်ညီၣ်လၢခံကတၢၢ်လၢ ယွၤအပှၤဂီၢ်မုၢ်အဂီၢ် လၢလံာ်တၢ်လီၣ်ဖျါ ၂၁း၁-၈ အပူၤန့ၣ်လီၤ.

တၢ်စံၣ်ညီၣ်လၢခံကတၢၢ်လၢ ယွၤအပှၤဂီၢ်မုၢ်အဂီၢ်. စီၤယိၤဟၣ်ထံၣ်လၢ တၢ်စံၣ်ညီၣ်လၢခံကတၢၢ် လၢယွၤအပှၤဂီၢ်မုၢ်အဂီၢ် ကမ့ၢ် တၢ်ဆိၣ်ဂ့ၤဖးဒိၣ် န့ၣ်လီၤ. မူခိၣ်ဒီးဟီၣ်ခိၣ် ကဘၣ်တၢ်တ့ကဒါက့ၤအီၤလၢအသီ, ဒီးဝ့ၢ်ယရူၤရှလ့ၣ်အသီ ကဟဲလီၤလၢမူခိၣ် ဒ်၀့ၢ်ခိၣ်လၢ ဟီၣ်ခိၣ်အသီအဂီၢ် န့ၣ်လီၤ. တၢ်ပနီၣ်တခါအံၤ ဒုးနဲၣ်ပှၤလၢ လၢမူခိၣ်အသီ ဒီး ဟီၣ်ခိၣ်အသီ အပူၤ, ယွၤကအိၣ်ကဆိးဒီး အပှၤဂီၢ်မုၢ်န့ၣ်လီၤ. ယွၤမၤ၀ဲဒ်အံၤလၢအပူၤကွံာ် လၢဧ့ၤဒ့ၣ် တၤသၣ်လီၢ်အပူၤ, ဒီးလၢ ဒဲစီဆှံ အပူၤ, ဒီးလၢ တၢ်လုၢ်ဟံၣ် အပူၤန့ၣ်လီၤ. ဒီးခဲအံၤ အဝဲ အိၣ်ဆိးဒီးပှၤ လၢခရံာ်အပူၤန့ၣ်လီၤ. ဘၣ်ဆၣ် လၢမူခိၣ်အသီဒီး ဟီၣ်ခိၣ်အသီအပူၤ, ပတၢ်ရ့လိာ်ပသးဒီးယွၤ ကဂ့ၤဒိၣ်ထီၣ်, မ့ၢ်လၢ အဝဲပာ်ဖျါထီၣ် အတၢ်လၤကပီၤလၢ ပသိးပကျါ, ဒီးပကအိၣ်ဆိးဃုာ်ဒီးအီၤ လီၤစိၤလီၤထီန့ၣ်လီၤ.