တၢ်ကတိၤလၢညါ
အခဲအံၤ မ့ၢ်တၢ်ကီတၢ်ခဲ အဆၢကတီၢ်, ဒီး ပှၤအါဂၤ ဘၣ်အိၣ်ဒၣ်လၢ တဂၤလၢ အဟံၣ်အဃီ ဒ်သိး ကပူၤဖျဲးဒီး တၢ်ဆါ ခိးဝံး - ၁၉ အဂီၢ်လီၤ. ပှၤအါဂၤ အိၣ်ဒီး တၢ်ကိၢ်တၢ်ဂီၤ, ဒီးပှၤအါဂၤ ဘၣ်ယိၣ်ဝဲလၢ တၢ်ဆါအံၤ မ့ၢ်ကဟဲဘၣ် အဟံၣ်ဖိဃီဖိ တဂၤဂၤဧါ န့ၣ်လီၤ. ဖဲတၢ်မၤသး ဒီး ပှၤဒ်အံၤအဆၢကတီၢ်, မ့ၢ်ပဘၣ် ကွၢ်ဃီၤ တၢ်ဆူ မတဂၤအအိၣ်လဲၣ်. ဆူ ပဒိၣ်ပပှၢ် အအိၣ်ဧါ. ဆူ ကသံၣ်သရၣ် သရၣ်မုၣ်အအိၣ်ဧါ. ဒ်ပမ့ၢ် ပှၤခရံာ်ဖိတဖၣ်အသိး ဂ့ၤလၢ ပကွၢ်ဃီၤတၢ်ဆူ ယွၤအသိဖိ အအိၣ်န့ၣ်လီၤ.ယွၤအသိဖိ မ့ၢ်မတဂၤလဲၣ်.
တၢ်လီၣ်ဖျါ ၅း၆ စံးဝဲ -
ဒီးယထံၣ်သိဖိ, ဒ်အဘၣ် တၢ်မၤသံအီၤအသိး, ဆၢထၢၣ်ဝဲလၢ လီၢ်ပစိာ် အသးကံၢ်ပူၤ လၢ တၢ်အသးလွံၢ်ဒု အကျါ, ဒီးလၢ ပှၤသူၣ်က့သးပှၢ် အကျါ န့ၣ်, အိၣ်ဝဲဒီး အနၢၤနွံဘိ, ဒီး အမဲာ်နွံတိၣ် လၢအမ့ၢ် ယွၤအသးနွံဖျၢၣ် လၢတၢ်မၢလီၤအီၤဆူ ဟီၣ်ခိၣ် ချၢသကုၤဆးဒး န့ၣ်လီၤ.ယိၤဟၣ် ၁း၂၉ စံးဘၣ်ပှၤ -
မုၢ်ဆ့ၣ်ထီၣ်တနံၤန့ၣ်, စီၤယိၤဟၣ် (စီၤယိၤဟၣ်ဘျၢတၢ်) ထံၣ်ဘၣ်ယ့ၣ်ရှူးဟဲဆူအအိၣ် ဒီးစံးဝဲဒၣ်, ကွၢ်ကွၢ်, ယွၤအသိဖိလၢ အစိာ်ထီၣ်ကွံာ် ပှၤဟီၣ်ခိၣ်ဖိ အတၢ်ဒဲးဘးလီၤ.
သိဖိအံၤ မ့ၢ်ကစၢ်ယ့ၣ်ရှူးခရံာ်န့ၣ်လီၤ.
သိဖိလၢ စီၤယိၤဟၣ်ထံၣ်ဝဲ လၢလံာ်တၢ်လီၣ်ဖျါ အဆၢဒိၣ် ၅ အပူၤအံၤ မ့ၢ်သိဖိလၢ အအိၣ်ဖျါထီၣ်ဒ် အဘၣ်တၢ်မၤသံအီၤအသိးန့ၣ်လီၤ.
လံာ်တၢ်လီၣ်ဖျါ အဆၢဒိၣ် ၅ စးထီၣ်အသးလၢ ယွၤအိၣ်လၢ လီၢ်ပစိာ်အဖီခိၣ် ဒီး တၢ်အသးလွံၢ်ဒု အိၣ်ဝး တရံးအီၤ (လီၣ်ဖျါ ၄း၆) လၢအစံးထီၣ်ပတြၢၤအီၤ တဘိယူၢ်ဃီ န့ၣ်လီၤ. လၢအယံၤဒီးအီၤ တစဲးန့ၣ် အိၣ်ဒီး လီၢ်ဆ့ၣ်နီၤ ၂၄ ဖျၢၣ် လၢပှၤသူၣ်က့သးပှၢ် ၂၄ ဂၤဆ့ၣ်နီၤလၢ အလိၤန့ၣ်လီၤ. လၢယွၤအစုလိၤန့ၣ် အိၣ်ဒီး လံာ်ထူတထူ လၢအအိၣ်ဒီး တၢ်စဲပနီၣ်ဃာ်နွံဖျၢၣ်, မ့ၢ်တၢ်စံၣ်စိၤတဲစိၤ အလံာ်ထူ, မ့ၢ်တၢ်စံၣ်စိၤတဲစိၤ အကတၢၢ်အလံာ်ထူ, မ့ၢ်လံာ်ထူတထူလၢ အဟဲစိာ် တၢ်လၢတၢ်ပှဲၤလၢ ယွၤအတၢ်သုးတၢ်ကျဲၤ ခဲလၢာ်လၢ ဟီၣ်ခိၣ်အံၤ အဂီၢ် န့ၣ်လီၤ.
ကလူးတဂၤကိးထီၣ်ဝဲ, မ့ၢ်မတၤကြၢးအိးထီၣ်လံာ်, ဒီး မၤသ့ၣ်ဖး အတၢ်စဲပနီၣ် ဃာ်တဂၤလဲၣ် (လီၣ်ဖျါ ၅း၂). မတဂၤမး အိးထီၣ်အီၤ တသ့နီတဂၤဘၣ်. စီၤယိၤဟၣ် လၢအကွဲးလံာ် တၢ်လီၣ်ဖျါ အနီၢ်ကစၢ်ဒၣ်ဝဲ စံးဝဲလၢ အဟီၣ်နးမး မ့ၢ်လၢ ပှၤလၢအကြၢး အိးထီၣ်လံာ် ဒီးကွၢ်အီၤန့ၣ် တအိၣ်ဘၣ်နီတဂၤဘၣ်.
ဘၣ်ဆၣ်, ပှၤသူၣ်က့သးပှၢ် အကျါတဂၤ စံးဘၣ်အီၤ, "ဟီၣ်တဂ့ၤ. ကွၢ်ကွၢ်, ခ့ယုၢ်ဘၣ်ဃးဒီး ယူဒၤအဒူၣ်, ဒီးစီၤဒၤဝံး အဂံၢ်တဂၤ, မၤနၢၤ တၢ်ဒ်သိး အကအိးထီၣ်လံာ်, ဒီးအတၢ်စဲပနီၣ်ဃာ် နွံဖျၢၣ်န့ၣ်လီၤ." (လီၣ်ဖျါ ၅း၅).
ခဲအံၤ ပကကွၢ်ကဒါက့ၤ ခ့ယုၢ်ဘၣ်ဃးဒီး ယူဒၤအဒူၣ် တစဲး.
၁ မိၤရှ့ ၄၉း၉-၁၀ စံးဝဲ -
ယူဒၤမ့ၢ် ခ့ယုၢ်အဆံးတဒု, လၢတၢ်ယာ်သံကွံာ်အအိၣ် နလဲၤထီၣ်လံ, ယဖိခွါဧၢ, သကူးလီၤအသး, ကိာ်လီၤဝဲဒ် ခ့ယုၢ်အသိး, ဒီးဒ်ခ့ယုၢ်မိၢ်အသိးလီၤ. မ့ၢ်မတၤကထိၣ်ဂဲၤအီၤလဲၣ်. စီၤပၤအနီၣ်ထိး တဟးထီၣ်လၢယူဒၤအအိၣ်, ပှၤဟ့ၣ်တၢ်သိၣ်တၢ်သီ တဟးထီၣ်ကွံာ်လၢ အခီၣ်ကဆူး, တုၤတၢ်မၤ ဃူမၤဖိးတၢ်ဟဲ, ဒီးပှၤဂီၢ်မုၢ် ကဒိကနၣ် အကလုၢ်လီၤ.
ပမ့ၢ်ကွၢ်လံာ်စီဆှံတတီၤအံၤ ပကထံၣ်ဘၣ်လၢ စီၤယၤကိာ် ဒိလီၤ အဖိခွါ ယူဒၤ ဒ်ခ့ယုၢ်အသိး, ဒီးစီၤပၤ ကဟဲကဲထီၣ်လၢအီၤန့ၣ်လီၤ. စီၤဒၤဝံးမ့ၢ် ပှၤလီၤစၢၤလီၤသွဲၣ်လၢ ယူဒၤ အဒူၣ်, ဒီး ကစၢ်ခရံာ်အနီၢ်ကစၢ်ဒၣ်ဝဲ လီၤစၢၤလၢ စီၤဒၤဝံး န့ၣ်လီၤ.
ဖဲပှၤသူၣ်က့သးပှၢ်တဂၤ တဲဘၣ်စီၤယိၤဟၣ်လၢ ခ့ယုၢ်ဘၣ်ဃး ယူဒၤအဒူၣ်, ဒီး စီၤဒၤဝံးအဂံၢ်တဂၤ အခါ, နဆိကမိၣ် စီၤယိၤဟၣ် အသးပူၤ ကထံၣ်ဝဲတၢ်မနုၤလဲၣ်. ပဝဲကိးဂၤဒဲး ပကဆိကမိၣ်လၢ ကထံၣ်ဝဲ ခ့ယုၢ်တဒုန့ၣ်လီၤ. ဘၣ်ဆၣ်, ပှၤသးပှၢ်တဂၤအံၤ တဲတၢ်ဝံၤအခါ, စီၤယိၤဟၣ်ကွၢ်ဃီၤတၢ် ဒီး တထံၣ်ဝဲခ့ယုၢ် ဘၣ်. မ့မ့ၢ်တခီ ထံၣ်ဝဲ သိဖိ, ဒ်အဘၣ်တၢ်မၤသံအီၤအသိး, ဆၢထၢၣ်ဝဲလၢလီၢ်ပစိာ် အသးကံၢ်ပူၤ လၢတၢ်အသး လွံၢ်ဒုအကျါ, ဒီးလၢပှၤသူၣ်က့သးပှၢ် အကျါန့ၣ်, အိၣ်ဝဲဒီး အနၢၤနွံဘိ, ဒီးအမဲာ်နွံတိၣ် လၢအမ့ၢ် ယွၤအသးနွံဖျၢၣ် လၢတၢ်မၢလီၤအီၤဆူ ဟီၣ်ခိၣ်ချၢ သကုၤဆးဒး န့ၣ်လီၤ. (လီၣ်ဖျါ ၅း၆).
သိဖိန့ၣ် ဒ်ပသ့ၣ်ညါအသိး မ့ၢ်ဆၣ်ဖိကီၢ်ဖိ တကလုာ်လၢ အဂံၢ်စၢ်ဘါစၢ် ဒိၣ်မးန့ၣ်လီၤ. တကးဒံးဘၣ်, သိဖိလၢ စီၤယိၤဟၣ်ထံၣ်ဝဲအံၤ မ့ၢ်သိဖိလၢအလီၤဂာ်ဒ် အဘၣ်တၢ်မၤသံအီၤ အသိးန့ၣ်လီၤ. ဘၣ်ဆၣ်, လံာ်စီဆှံတဆၢအံၤ တဲဘၣ်ပှၤလၢ သိဖိအံၤ တမ့ၢ်သိဖိလၢ အဂံၢ်စၢ်ဘါစၢ် တဒုဘၣ်. မ့ၢ်လၢ သိဖိအံၤ အိၣ်ဒီး အနၢၤနွံဘိ, ဒီး အမဲာ်ချံနွံတိၣ် အဃိန့ၣ်လီၤ.
တၢ်အနၢၤနွံဘိလီၣ်ဖျါထီၣ် တၢ်စိတၢ်ကမီၤ အပနီၣ်, တၢ်စိတၢ်ကမီၤခဲလၢာ်အိၣ်ဒီး သိဖိတဒုန့ၣ်လီၤ.
ဒီးယ့ၣ်ရှူးဟဲဃီၤ, ဒီးကတိၤတၢ်ဒီးအီၤ, ဒီးစံးဝဲဒၣ်, တၢ်ဟ့ၣ်လီၤလံယၤလၢ ကယဲၢ်တၢ်စိတၢ်ကမီၤလၢ မူခိၣ်, ဒီးလၢဟီၣ်ခိၣ်ချၢလီၤ. မးသဲ ၂၈း၁၈
အမဲာ်ချံနွံတိၣ် လီၣ်ဖျါထီၣ် ယွၤအသးနွံဖျၢၣ်လၢ အဆှၢလီၤဆူ ဟီၣ်ခိၣ်ချၢ သကုၤဆးဒး န့ၣ်လီၤ.
ဒီးသိၣ်လိသီလိအီၤ, ဒ်သိး အကတိၢ်န့ၢ် ကယဲၢ်တၢ်လၢ ယမၤလိာ်တ့ၢ်သု ခဲလၢာ် တက့ၢ်. ဒီးကွၢ်ကွၢ်, ယအိၣ်ဒီးသုကိးမုၢ်နံၤမုၢ်နၤဒဲး, တုၤတၢ်အစိၤကတၢၢ်လီၤ. အၤမ့ၣ်. မးသဲ ၂၈း၂၀
သိဖိတဒုအံၤ ဟဲဖျါထီၣ်ဝံၤအလီၢ်ခံ, ပမ့ၢ်ကွၢ်လၢ လီၣ်ဖျါ ၅း၉-၁၀ အပူၤ ပကထံၣ်ဘၣ်လၢ ပှၤသးပှၢ် ၂၄ ဂၤဒီး တၢ်အသးလွံၢ်ဒု အုၣ်တၢ်, သးဝံၣ်တၢ်လၢ ထါအသီ ဒီးစံးဝဲဒၣ် -
နဂ့ၤဟံးန့ၢ်လံာ်န့ၣ်, ဒီးအိးထီၣ်အတၢ်စဲပနီၣ်ဃာ်လီၤ. အဂ့ၢ်ဒ်အံၤ, နဒိးသံနသး, ဒီးနပှ့ၤက့ၤပှၤလၢ နသွံၣ်, လၢယွၤအဂီၢ် လၢကယဲၢ်ပှၤအဒူၣ်, ဒီးပှၤကတိၤတၢ်အကျိာ် အကလုာ်ကလုာ်, ဒီးကယဲၢ် ပှၤဂီၢ်မုၢ်, ဒီးကယဲၢ် ပှၤအကလုာ်တဖၣ်အကျါ လီၤ. ဒီးနပာ်အီၤလၢဘီမုၢ်, ဒီးပှၤလုၢ်တၢ်အဒိၣ် လၢယွၤအမဲာ်ညါ, ဒီးအဝဲသ့ၣ် ကပၢ တၢ်လၢဟီၣ်ခိၣ်ချၢလီၤ.
ဖဲအံၤပကထံၣ်ဘၣ်လၢ, ခီဖျိလၢကစၢ်ခရံာ်ဒိးသံ အသးဒီး ပှ့ၤက့ၤပှၤလၢ အသွံၣ်အဃိ, အဝဲဟံးန့ၢ်လံာ်ထူ န့ၣ်, ဒီးအိးထီၣ်တၢ်စဲပနီၣ်ဃာ် သ့ဝဲန့ၣ်လီၤ. ကစၢ်ခရံာ်အတၢ်သံန့ၣ် မ့ၢ်တၢ်ဂ့ၢ်အရ့ဒိၣ်တခါလၢ အဝဲမ့ၢ်ပှၤလၢ အကြၢးဝဲဘၣ်ဝဲလၢ ကဟံးန့ၢ်လံာ်ထူအံၤ ဒီးအိးထီၣ်ဝဲ အဂီၢ်န့ၣ်လီၤ.
လၢတၢ်ကစီၣ် တနံၤအံၤအဂီၢ် ပကမၤလိသကိး -
၁. ဘၣ်မနုၤကစၢ်ယ့ၣ်ရှူးခရံာ် ကြၢးဝဲဘၣ်ဝဲလဲၣ်.
- က. ခီဖျိအဝဲပှ့ၤက့ၤအပှၤဂီၢ်မုၢ်လၢအသွံၣ်စီဆှံ
- ခ. ခီဖျိ အတၢ်ဂဲၤထၢၣ်သမူထီၣ်က့ၤ
၂. ကစၢ်ယ့ၣ်ရှူးခရံာ် အတၢ်ကြၢးဝဲဘၣ်ဝဲအံၤ အုၣ်ကီၤပှၤလၢ မနုၤလဲၣ်.
၁. ဘၣ်မနုၤကစၢ်ယ့ၣ်ရှူးခရံာ် ကြၢးဝဲဘၣ်ဝဲလဲၣ်.
လံာ်စီဆှံ စံးဘၣ်ပှၤလၢ သိဖိလၢအဒိးသံအသးန့ၣ် ကြၢးဝဲဘၣ်ဝဲလီၤ. ဘၣ်ဆၣ်, လၢဟီၣ်ခိၣ် အတၢ်စံၣ်စိၤတဲစိၤအပူၤ, ပှၤလၢအဘၣ် တၢ်မၤသံအီၤအိၣ်အါမးလီၤ. ဘၣ်ဆၣ် အဝဲသ့ၣ်တဖၣ် တကြၢးဝဲဘၣ်ဝဲလၢ ကဟံးန့ၢ် လံာ်ထူဒီး အိးထီၣ်အီၤဘၣ်.ကစၢ်ခရံာ် အတၢ်ဒိးသံ အသးန့ၣ် တမ့ၢ်ဒ်သိး ပှၤအါဂၤလၢ ဟီၣ်ခိၣ် အတၢ်စံၣ်စိၤတဲစိၤ အပူၤ အတၢ်ဒိးသံ အသးဘၣ်. ပမ့ၢ်ကွၢ်လၢ လီၣ်ဖျါ ၅း၉ အပူၤစံးဝဲ -
... အဂ့ၢ်ဒ်အံၤ, နဒိးသံနသး, ဒီးနပှ့ၤက့ၤပှၤလၢ နသွံၣ်, လၢယွၤအဂီၢ်လၢ ကယဲၢ်ပှၤအဒူၣ်, ဒီးပှၤကတိၤတၢ် အကျိာ် အကလုာ်ကလုာ်, ဒီးကယဲၢ်ပှၤဂီၢ်မုၢ်, ဒီးကယဲၢ်ပှၤအကလုာ် တဖၣ်အကျါလီၤ.
က. ခီဖျိအဝဲပှ့ၤက့ၤအပှၤဂီၢ်မုၢ်လၢအသွံၣ်စီဆှံ
ကစၢ်ခရံာ် ကြၢးဝဲဘၣ်ဝဲလၢ ကအိးထီၣ်လံာ်ထူအံၤ မ့ၢ်လၢ အပှ့ၤက့ၤပှၤဂီၢ်မုၢ်လၢ အသွံၣ်စီဆှံ အဃိန့ၣ်လီၤ.တၢ်ကတိၤ တၢ်ပှ့ၤက့ၤန့ၣ် တၢ်သူတ့ၢ်အီၤလၢ လံာ်စီဆှံ အလီၢ်လံၤအပူၤ လံၤလံၤလံလီၤ. ပမ့ၢ်ကွၢ်လၢ လံာ်ထါစံးထီၣ်ပတြၢၤ ၄၉း၇-၈, ဒီး ၁၅ န့ၣ်ပကထံၣ်ဘၣ် -
ပှၤကညီပှ့ၤက့ၤ အဒီပုၢ်ဝဲၢ် တသ့ဘၣ်လ့ၤတက့ၤ ဘၣ်. ဟ့ၣ်တၢ်မၤပူၤဖျဲးအီၤလၢ ယွၤတသ့ဘၣ်. အဂ့ၢ်ဒ်အံၤ, အသးအပှ့ၤ မ့ၢ်တၢ်လုၢ်ဒိၣ်ပှ့ၤဒိၣ်, ဒီးဆိတ့ၢ်ဝဲ လီၤထူလီၤယိာ် ... မ့မ့ၢ်ယွၤကပှ့ၤက့ၤ ယသးလၢ ပျုၤပူၤ အစုပူၤလီၤ. အဂ့ၢ်ဒ်အံၤ, ကတူၢ်လိာ်ယၤလီၤ.ဖဲအံၤ, ပှၤကွဲးလံာ်ထါစံးထီၣ်ပတြၢၤ တဂၤအံၤ ဖျါလီၤဂာ်လၢ အကဲကုၢ်လၢ တၢ်သံအဖီလာ်လီၤ. အဝဲလိၣ်ဘၣ် တၢ်ပှ့ၤက့ၤအီၤလီၤ. ဘၣ်ဆၣ် ပှၤကညီပှ့ၤက့ၤအီၤ တသ့ဘၣ်. မ့ၢ်လၢ အသးသမူအံၤ အလုၢ်အပှ့ၤဒိၣ် တုၤဒၣ်လဲာ် ပှၤထူးပှၤတီၤကတၢၢ်တဂၤ ပှ့ၤဝဲတန့ၢ်ဘၣ်. အဃိ, လီၤဂာ်ဒ်သိး တၢ်မုၢ်လၢ်တအိၣ် လၢၤဘၣ်. ဘၣ်ဆၣ်ယွၤအိၣ်ဒီး တၢ်ထူးတၢ်တီၤခဲလၢာ်လီၤ. ထဲယွၤတဂၤ ပှ့ၤက့ၤအီၤ သ့လီၤ.
ပှၤကွဲးထါစံးထီၣ်ပတြၢၤတဂၤအံၤ တစံးဝဲ ကစၢ်ယွၤကပှ့ၤ အသးသမူဒ်လဲၣ်ဒ်လဲၣ်ဘၣ်. အကစၢ်ဒၣ်ဝဲ အိၣ်မူဝဲ တချုး ထူၣ်စုညါအဆၢကတီၢ်ဒ်ဘၣ် အဃိအဝဲတသ့ၣ်ညါဝဲဘၣ်. ဘၣ်ဆၣ်အတၢ်မုၢ်လၢ် အိၣ်လၢ ယွၤအပူၤလီၤ. အဝဲသ့ၣ်ညါဝဲလၢ တၢ်ပှ့ၤက့ၤအံၤ လိၣ်ဝဲသပှၢ်ကတၢၢ်, ဒီးထဲယွၤတဂၤ ပှ့ၤက့ၤဝဲသ့ န့ၣ်လီၤ.
မ့မ့ၢ်လၢလံာ်စီဆှံ အသီအပူၤ ကစၢ်ခရံာ်အနီၢ်ကစၢ်ဒၣ်ဝဲစံးဝဲ -
အဂ့ၢ်ဒ်အံၤ, ပှၤကညီဖိခွါအံၤ, တဟဲဘၣ်ဝဲဒ်သိး ပှၤကမၤအီၤလၢ အခ့အပှၤ အတၢ်ဘၣ်. မ့ၢ်ဒ်သိး အကမၤ အခ့အပှၤ အတၢ်မၤ, ဒီး ဟ့ၣ်လီၤအသး လၢပှၤကညီ အါဂၤအပှ့ၤ လီၤ. မၢ်ကူး ၁၀း၄၅
စီၤပီလူးကွဲးန့ၢ် ပှၤအ့းဖ့းစူးဖိတဖၣ် လၢ လံာ်အ့းဖ့းစူး ၁း၇ အပူၤစံးဝဲလၢ -
လၢအဝဲဒၣ်အပူၤ, ပအိၣ်ဒီး တၢ်ပှ့ၤက့ၤပှၤလၢ အသွံၣ်, တၢ်ပျၢ်ပတၢ်ကမၣ်, ဒ်အဘျုးထူး အဖှိၣ်တီၤ အသိး -ဒီးကွဲးန့ၢ် ပှၤကရံၣ်သူးဖိတဖၣ် လၢ ၁ကရံၣ်သူး ၆း၂၀ န့ၣ်စံးဝဲလၢ -
အဂ့ၢ်ဒ်အံၤ, တၢ်ပှ့ၤက့ၤသုလၢအပှ့ၤလီၤ. မၤသးဒ်န့ၣ်ဒီး, မၤလၤကပီၤယွၤလၢ သုနီၢ်ခိနီၢ်ကစၢ်တက့ၢ်.ကစၢ်ခရံာ်အတၢ်ပှ့ၤက့ၤပှၤအံၤ မ့ၢ်တၢ်လၢ အလုၢ်အပှ့ၤဒိၣ်နီၢ်မးလီၤ. ပှ့ၤက့ၤပှၤလၢအသွံၣ် လၢ သ့ၣ်ဖျၢၣ်ထူၣ်စုညါအလိၤ လၢကရၤနံ အဒီခိၣ် န့ၣ်လီၤ.
စီၤပီလူး စံးဝဲလၢ ၁ကရံၣ်သူး ၁း၂၃-၂၄ အပူၤ -
မ့မ့ၢ်ပဝဲဒၣ်အံၤ, ပစံၣ်တဲၤတဲလီၤ ခရံာ်ဒိးသံအသး လၢထူၣ်စုညါအလိၤ, လၢပှၤယူဒၤဖိ အမဲာ်ညါ, တၢ်လီၤဃံၤအလီၢ်, ဒီးပှၤဟ့းလ့ၣ်ဖိ အမဲာ်ညါ, တၢ်ကလီကလီလီၤ.ပှၤလၢအဘၣ် ဒိးသံအသးလၢ ထူၣ်စုညါအလိၤ, လၢကစၢ်ယ့ၣ်ရှူးခရံာ်အစိၤအဆၢကတီၢ် အါတက့ၢ် မ့ၢ်ဒၣ်ထဲ ပှၤအၢပှၤသီ, ပှၤတၢ်ဒဲးဘးဖိ, ဒီးပှၤလၢ အထီဒါ ရိမ့ၤ တၢ်ပၢတၢ်ပြး တဖၣ်န့ၣ်လီၤ. ပှၤလၢအဘၣ် တၢ်ပျၤထီအီၤလၢ ထူၣ်စုညါ အလိၤတဖၣ်, မ့ၢ်တၢ်လီၤမဲာ်ဆှး ဖးဒိၣ် လၢအဝဲသ့ၣ်အဂီၢ်န့ၣ်လီၤ.
တကးဒံးဘၣ်, ကရၤနံမ့ၢ် တၢ်လီၢ်တတီၤလၢ ပှၤပျၤထီ မၤသံကွံာ် ပှၤအၢပှၤသီ သ့ၣ်တဖၣ် အလီၢ်န့ၣ်လီၤ. ဘၣ်ဆၣ်ကစၢ်ခရံာ် ဆီၣ်လီၤအသး, ဟံးန့ၢ်တၢ်မဲာ်ဆှးလၢ ပဝဲဟီၣ်ခိၣ်ဖိ တဖၣ်အဂီၢ်, ယိးထီၣ်ဝဲအထူၣ်စုညါ, လဲၤထီၣ်ကယီကယီဆူ ကရၤနံအဒီခိၣ်, ဒိးဘၣ်တၢ်ပျၤထီအီၤလၢ ထူၣ်စုညါလိၤ, အသွံၣ်ဘၣ်ယွၤလီၤ, ဒီးအသးသမူ ဘၣ်ဟးထီၣ်ကွံာ်ဝဲ န့ၣ်လီၤ. တၢ်လၢအမၤဝဲတဖၣ်အံၤ မ့ၢ်ဒ်သိး ကပှ့ၤက့ၤ ပှၤလၢ တၢ်သံလီၤထူလီၤယိာ်အဂီၢ်န့ၣ်လီၤ. ဒီး အတၢ်ဒိးသံအသးအံၤ, ကြၢးဝဲဘၣ်ဝဲလၢ ကဟံးန့ၢ်လံာ်ထူ လၢယွၤ အစုထွဲလိၤ, ဒီး အိးထီၣ်အီၤ န့ၣ်လီၤ.
အဃိ လံာ်တၢ်လီၣ်ဖျါ အဆၢဒိၣ် ၅း၉-၁၀ အပူၤ ပှၤသူၣ်က့သးပှၢ် ၂၄ ဂၤ ဒီး တၢ်အသးလွံၢ်ဒု စံးထီၣ်ပတြၢၤ အီၤဒီး စံးဝဲ -
ဒီး အဝဲသ့ၣ်တဖၣ်န့ၣ် အုၣ်တၢ်လၢထါအသီ, ဒီးစံးဝဲဒၣ်, နဂ့ၤဟံးန့ၢ်လံာ်န့ၣ်, ဒီးအိးထီၣ်အတၢ်စဲပနီၣ်ဃာ်လီၤ. အဂ့ၢ်ဒ်အံၤ, နဒိးသံနသး, ဒီးနပှ့ၤက့ၤပှၤလၢနသွံၣ်, လၢယွၤအဂီၢ်လၢ ကယဲၢ်ပှၤအဒူၣ်, ဒီးပှၤကတိၤတၢ် အကျိာ်အကလုာ်ကလုာ်, ဒီးကယဲၢ်ပှၤဂီၢ်မုၢ်, ဒီးကယဲၢ်ပှၤအကလုာ်တဖၣ်အကျါ လီၤ. ဒီးနပာ်အီၤလၢဘီမုၢ်, ဒီးပှၤလုၢ်တၢ်အဒိၣ်လၢယွၤ အမဲာ်ညါ, ဒီးအဝဲသ့ၣ် ကပၢတၢ်လၢ ဟီၣ်ခိၣ်ချၢလီၤ.ထဲကစၢ်ခရံာ်အတၢ်သံလၢထူၣ်စုညါအလိၤ အဃိ အဝဲကြၢးဝဲဘၣ်ဝဲလၢ ကဟံးန့ၢ်လံာ်ထူဒီး အိးထီၣ်ဝဲဧါ. တမ့ၢ်ဘၣ်. ကဘၣ်ဂဲၤထၢၣ်သမူထီၣ်က့ၤ လၢတၢ်သံစ့ၢ်ကီးန့ၣ်လီၤ.
ခ. ခီဖျိ အတၢ်ဂဲၤထၢၣ်သမူထီၣ်က့ၤ
စီၤယိၤဟၣ်အတၢ်ထံၣ်တၢ်လၢညါခီအပူၤ စံးဝဲလၢ စီၤယိၤဟၣ်ဟီၣ်နးမး မ့ၢ်လၢပှၤလၢ အကြၢးအိးထီၣ် လံာ်, ဒီးကွၢ်အီၤန့ၣ်, တအိၣ်ဘၣ်နီတဂၤဘၣ်. (လီၣ်ဖျါ ၅း၄). နဆိကမိၣ်ကွၢ်, ပှၤသးပှၢ်အကျါတဂၤ မ့ၢ်တဲအီၤ, တဘၣ်ဟီၣ်တဂ့ၤ. ခ့ယုၢ်ဘၣ်ဃးဒီးယူဒၤအဒူၣ်, ဒီးစီၤဒၤဝံးအဂံၢ်တဂၤ မၤနၢၤတၢ်ဒ်သိး အကအိးထီၣ်လံာ်, ဒီးအတၢ်စဲပနီၣ်ဃာ်နွံဖျၢၣ်န့ၣ်လီၤ. ဘၣ်ဆၣ် မၤဝဲခဲအံၤတသ့ဒံးဘၣ်. မ့ၢ်လၢအသံအဃိ န့ၣ်လီၤ.အမ့ၢ်ကတိၤတၢ်ဒ်အံၤ, တၢ်ကမၤအသးဒီး စီၤယိၤဟၣ်ဒံးလဲၣ်. မ့ၢ်ကပတုာ် အတၢ်ဟီၣ်စ့ၢ်ကီးဧါ. ပှၤလၢအကြၢးဝဲဘၣ်ဝဲတဂၤသံလံအဃိ.
ဒ်သိးကကြၢးဝဲဘၣ်ဝဲအဂီၢ်ကဘၣ်ဒိးသံအသးလၢသ့ၣ်ဖျၢၣ် ထူၣ်စုညါအလိၤန့ၣ်လီၤ. ဘၣ်ဆၣ်ဒ်သိး ကကြၢးဝဲဘၣ်ဝဲအဂီၢ် ကဘၣ်ဂဲၤဆၢထၢၣ်သမူထီၣ်က့ၤစ့ၢ်ကီးန့ၣ်လီၤ.
ကစၢ်ခရံာ်အနီၢ်ကစၢ်ဒၣ်ဝဲစံးဝဲဖဲ ယိၤဟၣ် ၁၁း၂၅ အပူၤ -
ယ့ၣ်ရှူးစံးဘၣ်အီၤ, ယဲဒၣ်အံၤ ယမ့ၢ်တၢ်ဂဲၤထၢၣ်က့ၤဒီးတၢ်မူလီၤ. ပှၤလၢအစူၢ်က့ၤနာ်က့ၤယၤ န့ၣ်, မ့ၢ်သံဘၣ်ဆၣ်ဒီး, ကမူထီၣ်ဝဲလီၤ.စီၤပီလူးကွဲးန့ၢ်ပှၤကရံၣ်သူးဖိတဖၣ် ဖဲ ၁ကရံၣ်သူး ၁၅း၁၇ အပူၤစံးဝဲ -
ဒီးခရံာ်မ့ၢ်တဂဲၤဆၢထၢၣ်က့ၤဘၣ်ဒီး, သုနာ်တၢ်မ့ၢ်တၢ်ကလီကလီ, သုအိၣ်ဒံးမးလၢ သုတၢ်ဒဲးဘး အပူၤလီၤ.စီၤပီလူးကွဲးန့ၢ် ပှၤရိမ့ၤဖိတဖၣ် ဖဲရိမ့ၤ ၈း၃၄ အပူၤ စံးဝဲ -
ပှၤလၢအဒိးသံအသးလၢ ပဂီၢ်န့ၣ်, မ့ၢ်ခရံာ်လီၤ. လၢန့ၣ်အခိၣ်တလိာ်, ဂဲၤဆၢထၢၣ်က့ၤဝဲ, ဒီးဆ့ၣ်နီၤဝဲလၢ ယွၤအစုထွဲ, ဒီးဃ့တၢ်လၢပဂီၢ်လီၤ.ကစၢ်ခရံာ်သံသၢသီဝံၤ, ဒီးဂဲၤထၢၣ်သမူထီၣ်က့ၤဝဲလီၤ. ခီဖျိ အတၢ်ဒိးသံအသးဒီး အတၢ်ဂဲၤထၢၣ်သမူထီၣ် က့ၤအဃိ အဝဲကြၢးဒိးန့ၢ် ပတၢ်စံးထီၣ်ပတြၢၤဒီး တၢ်လၤတၢ်ကပီၤ န့ၣ်လီၤ. ပကြၢးတီၤလီၤကဒွံကျိၤ လၢအမဲာ်ညါ ဒီး စံးလၢ ယ့ၣ်ရှူးခရံာ်မ့ၢ်ကစၢ် လၢအဟဲလီၤအုၣ်က့ၤခီၣ်က့ၤပှၤန့ၣ်လီၤ.
ဖံးလံးပံၤ ၂း၁၀-၁၁ စံးဘၣ်ပှၤ -
ဒ်သိးကယဲၢ် တၢ်အိၣ်လၢမူခိၣ်, ဒီးတၢ်အိၣ်လၢဟီၣ်ခိၣ်, ဒီးတၢ်အိၣ်လၢဟီၣ်ခိၣ်လာ်ခဲလၢာ်, ကချံးလီၤအခီၣ် လၢယ့ၣ်ရှူးအမံၤ, ဒီးကယဲၢ်ပှၤအပျ့ၤကအၢၣ်လီၤအီလီၤလၢ ယ့ၣ်ရှူးခရံာ်မ့ၢ်ကစၢ်, လၢပၢ်ယွၤအလၤအကပီၤ အဂီၢ်လီၤ.တၢ်လီၣ်ဖျါ ၅း၁၃ စံးဝဲ -
ဒီးကယဲၢ်တၢ်ဘၣ်တ့အသးလၢမူခိၣ်, ဒီးလၢဟီၣ်ခိၣ်ချၢ, ဒီးလၢဟီၣ်ခိၣ်အဖီလာ်, ဒီးလၢပီၣ်လဲၣ်အဖီခိၣ်, ဒီးကယဲၢ်တၢ်အိၣ်လၢ တၢ်န့ၣ်တဖၣ်အပူၤ ခဲလၢာ်န့ၣ်, ယနၢ်ဟူလၢအစံး, တၢ်စံးထီၣ်ပတြၢၤ, ဒီးတၢ်ယူးတၢ်ယီၣ်, ဒီးတၢ်လၤကပီၤ, ဒီးတၢ်ဂံၢ်တၢ်ဘါတဖၣ်န့ၣ်, မ်အအိၣ်ဒီးပှၤလၢ အဆ့ၣ်နီၤလၢလီၢ်ပစိာ် အဖီခိၣ်, ဒီးသိဖိန့ၣ် အစိၤစိၤအဃၣ်ဃၣ် တက့ၢ်.တၢ်ဘၣ်တ့ခဲလၢာ်အံၤ ပၣ်ဃုာ်ဒီး နၤယၤ ပဝဲဟီၣ်ခိၣ်ဖိ ခဲလၢာ်ခဲဆ့န့ၣ်လီၤ. ပကစံးထီၣ်ပတြၢၤ ယ့ၣ်ရှူးခရံာ် ခီဖျိ အတၢ်ဟဲလီၤတူၢ်သံသးလၢပဂီၢ်, ပှ့ၤက့ၤပတၢ်ဒဲးဘးလၢသ့ၣ်ဖျၢၣ်ထူၣ်စုညါအလိၤ, ဒီး ဂဲၤထၢၣ်သမူထီၣ်က့ၤ ဒ်သိး ပကဂဲၤထၢၣ်သမူထီၣ်က့ၤဃုာ်ဒီး အီၤ အဂီၢ်န့ၣ်တက့ၢ်.
၂. ကစၢ်ယ့ၣ်ရှူးခရံာ်အတၢ်ကြၢးဝဲဘၣ်ဝဲအံၤ အုၣ်ကီၤပှၤလၢ မနုၤအဂီၢ်လဲၣ်.
ကစၢ်ခရံာ်အနီၢ်ကစၢ်ဒၣ်ဝဲစံးဝဲဖဲ ယိၤဟၣ် ၁၁း၂၅ အပူၤ -ယ့ၣ်ရှူးစံးဘၣ်အီၤ, ယဲဒၣ်အံၤ ယမ့ၢ်တၢ်ဂဲၤထၢၣ်က့ၤဒီးတၢ်မူလီၤ. ပှၤလၢအစူၢ်က့ၤနာ်က့ၤယၤ န့ၣ်, မ့ၢ်သံဘၣ်ဆၣ်ဒီး, ကမူထီၣ်ဝဲလီၤ.ယ့ၣ်ရှူးစံးဝဲလၢ, ပမ့ၢ်စူၢ်က့ၤနာ်က့ၤအီၤ န့ၣ်, ပမ့ၢ်သံဘၣ်ဆၣ်ဒီး, ပကမူထီၣ်ဝဲလီၤ.
ဘၣ်ဆၣ်လၢပဂီၢ်အခဲအံၤ ဖဲတၢ်ကီတၢ်ခဲ တၢ်တတၢာ်တနါ, တၢ်ဆါသံသတြိာ်အဆၢကတီၢ်, တၢ်အုၣ်ကီၤသး လၢပဂီၢ်အိၣ်တမံၤမံၤဧါ.
လံာ်တၢ်လီၣ်ဖျါ ၁၃း၁-၁၀ အပူၤတဲပှၤဘၣ်ဃး တၢ်ဒူတၢ်ဃိၤ အိၣ်ဒီး အခိၣ်နွံဖျၢၣ်, ဒီးအနၢၤဆံဆဲၣ်ဘိ တဒုအဂ့ၢ်လီၤ. ပတတဲလၢၤအဂ့ၢ်ထီထီလၢၤဘၣ်. တၢ်လၢပကတဲအီၤန့ၣ်, ဖဲအဆၢဖိနွံအပူၤ စံးဘၣ်ပှၤ -
ဒီးတၢ်ဟ့ၣ်အဒုးတၢ်ဒီး ပှၤစီဆှံဒီးမၤနၢၤအီၤလီၤ. ဒီးတၢ်ဟ့ၣ်လီၤအစိအကမီၤ လၢကယဲၢ်ပှၤအဒူၣ်, ဒီးကယဲၢ်ပှၤဂီၢ်မုၢ်, ဒီးပှၤကတိၤတၢ်အကျိာ်တဖၣ်, ဒီးပှၤကလုာ်ကလုာ် အဖီခိၣ်လီၤ. ဒီးကယဲၢ်ပှၤလၢအအိၣ်ဝဲလၢ ဟီၣ်ခိၣ်ချၢ, လၢအမံၤတအိၣ်ကွဲးအသးလၢသိဖိ, လၢအဒိးသံအသးလၢ ဟီၣ်ခိၣ်အခီၣ်ထံးလံၤလံၤ န့ၣ်, အလံာ်မူပူၤတဖၣ်န့ၣ်, ဘူၣ်ထီၣ်ဘါထီၣ်အီၤ ခဲလၢာ်လီၤ.အစိၤအဆၢကတီၢ်ခဲအံၤ မ့ၢ်စိၤဆၢကတီၢ်လၢ တၢ်ဟ့ၣ်လီၤ တၢ်ဒူတၢ်ဃိၤ လၢတၢ်စိတၢ်ကမီၤ ဒ်သိးကဒုး တၢ်ဒီး ပှၤစီဆှံ ဒီးမၤနၢၤအီၤလီၤ. ဘၣ်ဆၣ်, မၤနၢၤ ပှၤစီဆှံ တဖၣ်တန့ၢ်ဘၣ်. ပှၤစီဆှံတဖၣ် တတီၤလီၤကဒွံကျိၤလၢ အမဲာ်ညါ ဒီးဘူၣ်ထီၣ်ဘါထီၣ်အီၤဘၣ်. ပှၤလၢအမံၤအိၣ်ကွဲးလီၤအသးလၢသိဖိ လၢအဒိးသံအသးလၢ ဟီၣ်ခိၣ်အခီၣ်ထံးလံၤလံၤ တဖၣ်န့ၣ် မ့ၢ်ပှၤစီဆှံလီၤ.
ပှၤစီဆှံတဖၣ်မ့ၢ်ပှၤဒ်လဲၣ်. မ့ၢ်ပှၤလၢ အမံၤအိၣ်ကွဲးလီၤအသးလၢသိဖိ အလံာ်တၢ်မူအပူၤလီၤ. နၤယၤပကိးလီၤပသးလၢ ခရံာ်ဖိတဖၣ် ပတဲလၢပမ့ၢ်ပှၤစီဆှံ သ့ဧါ.
သ့ဝဲလီၤ. လံာ်တၢ်လီၣ်ဖျါ ၁၄း၁၂ စံးဘၣ်ပှၤ -
ဖဲအံၤမ့ၢ်ပှၤစီဆှံ အတၢ်ဝံသးစူၤ, ပှၤလၢအတိၢ်န့ၢ်ယွၤအကလုၢ်အကထါ, ဒီးတၢ်နာ်ဘၣ်ဃးဒီး ယ့ၣ်ရှူးန့ၣ်လီၤ.လံာ်စီဆှံကိၤလၤဝါကျိာ်တဲပှၤ -
Here is the patience of the saints: here are they that keep the commandments of God, and the faith of Jesus. Revelation 14:12 (KJV)
ပှၤလၢအတိၢ်န့ၢ် ယွၤအကလုၢ်အကထါ, ဒီး အတၢ်နာ်ဘၣ်ဃးဒီး ယ့ၣ်ရှူးခရံာ်န့ၣ် မ့ၢ်ပှၤစီဆှံ ခဲလၢာ်န့ၣ်လီၤ.
ခီဖျိလၢနမ့ၢ်ပှၤစီဆှံအဃိ ကစၢ်ခရံာ်အနီၢ်ကစၢ်ဒၣ်ဝဲ အုၣ်ကီၤနၤလၢ လံာ်တၢ်လီၣ်ဖျါ ၂း၁၀ အပူၤ စံးဝဲ -
တၢ်နးတၢ်ဖှီၣ်လၢ အကဘၣ်နၤန့ၣ် သုတပျံၤအီၤနီတမံၤတဂ့ၤ. ကွၢ်ကွၢ်ဒ်သိးကလ့ပစီသုဒီး, မုၣ်ကီၤလံၢ် ကဒၢနုာ်သုလၢဃိာ်ပူၤတနီၤ, ဒီးသုကဘၣ်တၢ်နးတၢ်ဖှီၣ် ဆံဆဲၣ်သီလီၤ. အိၣ်နဲဆိးနဲလၢ နကလုၢ်တီ တုၤနသံတက့ၢ်. ဒီးယကဟ့ၣ်နၤလၢ တၢ်မူအခိၣ်သလုးန့ၣ်လီၤ.ကစၢ်ခရံာ်အနီၢ်ကစၢ်ဒၣ်ဝဲအုၣ်ကီၤပှၤလၢ ပမ့ၢ်အိၣ်ဆိးလၢပကလုၢ်တီတုၤပသံန့ၣ်, အကစၢ်ဒၣ်ဝဲ, ကဟ့ၣ်ပှၤလၢတၢ်မူအခိၣ်သလုးလီၤ. တမ့ၢ်ပှၤအဂၤဘၣ်. တမ့ၢ်မူခိၣ်ကလူးဘၣ်. အကစၢ်ဒၣ်ဝဲ ကဖျီၣ်ထီၣ်န့ၢ်ပှၤ တၢ်မူအခိၣ်သလုးလီၤ.
တကးဒံးဘၣ်, လၢပှၤစီဆှံတဖၣ်အဂီၢ်, တၢ်အုၣ်ကီၤအိၣ်လၢ တၢ်မူလီၤထူလီၤယိာ်လၢ မူခိၣ်အသီဒီး ဟီၣ်ခိၣ်အသီအပူၤန့ၣ်လီၤ.
တၢ်လီၣ်ဖျါ ၂၂း၁-၅ စံးဘၣ်ပှၤ -
ဒီးဒုးနဲၣ်ယၤလၢ ထံမူအကျိဆှံဝဲဒ် လၢၢ်ဖျါကလၤ အသိး, ဟဲထီၣ်လၢယွၤဒီးသိဖိ အလီၢ်ပစိာ်အပူၤလီၤ. ဒီးလၢအကျဲအသးကံၢ်ပူၤ ဒီးလၢထံကျိ ဝၢ်ယၢ်ခီန့ၣ် အိၣ်ဒီး သ့ၣ်တၢ်မူလၢ အသၣ်ထီၣ်တၤသၣ် တဆံခံကလုာ်, ဒီးသၣ်ထီၣ်ဝဲ တလါတဘျီ တလါတဘျီလီၤ. ဒီးသ့ၣ်အလၣ်န့ၣ်, မ့ၢ်လၢ တၢ်မၤဘျါ က့ၤပှၤကလုာ်ကလုာ် အဂီၢ်လီၤ. ဒီးတၢ်ဆိၣ်အၢ တအိၣ်လၢၤဘၣ် နီတမံၤဘၣ်. ဒီးယွၤဒီးသိဖိအလီၢ်ပစိာ် ကအိၣ်လၢ အပူၤ, ဒီးအခ့အပှၤကမၤအတၢ်လီၤ. ဒီးအဝဲသ့ၣ်ကထံၣ်ဘၣ် အမဲာ်, ဒီးအမံၤကအိၣ်လၢ အမဲာ်တူၢ်ခိၣ်လီၤ. ဒီးမုၢ်နၤတအိၣ်လၢၤဘၣ်. ဒီးမ့ၣ်အူဒၢအကပီၤ, ဒီးမုၢ်အကပီၤန့ၣ်, မၤဝဲအလီၢ်တအိၣ်လၢၤဘၣ်. အဂ့ၢ်ဒ်အံၤ, ကစၢ်ယွၤ ကမၤကပီၤထီၣ် တၢ်လၢအဝဲသ့ၣ် အဂီၢ်, ဒီးအဝဲသ့ၣ် ကပၢတၢ်အစိၤစိၤ အဃၣ်ဃၣ်လီၤ.
မုာ်ဝဲဆံးဒိၣ်လဲၣ်. ပတဲအလီၢ်တအိၣ်လၢၤဘၣ်. အဝဲအံၤမ့ၢ် တၢ်န့ၢ်သါ, ဒီးတၢ်အုၣ်ကီၤ လၢပှၤစီဆှံ အဂီၢ် န့ၣ်လီၤ.
တၢ်ကတိၤလၢခံ
ကစၢ်ခရံာ်အတၢ်သံ ဒီး အတၢ်ဂဲၤထၢၣ်သမူထီၣ်က့ၤ အမုၢ်နံၤ တနံၣ်အံၤ, ပထံၣ်ဘၣ်လၢ မ့ၢ်တၢ်ကီတၢ်ခဲ အဆၢကတီၢ်လၢ ဟီၣ်ခိၣ်ချၢဒီတဘ့ၣ်ညါ အံၤ အပူၤန့ၣ်လီၤ. ပှၤခရံာ်ဖိအါဒံအါဂၤ တမၤလၤကပီၤဘၣ် ခရံာ်အတၢ်ဂဲၤထၢၣ်သမူထီၣ်က့ၤ လၢတၢ်သဘျ့အပူၤဘၣ်. ခီဖျိလၢ တၢ်ဆါသံသတြိာ်အံၤ အဃိန့ၣ်လီၤ. မ့ၢ်နာ်သက့ဒ်န့ၣ်ဒီး, ဒ်ပမ့ၢ်ပှၤခရံာ်ဖိတဖၣ်အသိး တဂၤလၢပလီၢ်ဒၣ်ပဝဲ မ်ပကမၤလၤကပီၤသိဖိ လၢအမ့ၢ်ကစၢ်ခရံာ်, လၢအဟဲလီၤတူၢ်သံသးလၢပဂီၢ်, ဒီး ပကစံးထီၣ်ပတြၢၤအီၤ, ဒီး ပကတီၤလီၤကဒွံကျိၤ, ဒီးကွၢ်ထီၣ်ဆူအအိၣ်တက့ၢ်.ပကနာ်အီၤ, ဒီးတိၢ်န့ၢ်အတၢ်မၤလိာ်, ဒ်သိး ပကမ့ၢ်ပှၤစီဆှံတဖၣ်လၢ အမံၤအိၣ်ကွဲးလီၤအသးလၢ သိဖိအလံာ် တၢ်မူအပူၤန့ၣ်တက့ၢ်.
ပကမ့ၢ်ပှၤသ့ၣ်တဖၣ်လၢအိၣ်ဆိးလၢ ပကလုၢ်တီတုၤပသံတက့ၢ်.
ကစၢ်ခရံာ်အၢၣ်လီၤပှၤလၢ ကဟ့ၣ်ပှၤတၢ်မူအထူအယိာ်လီၤ. ကစၢ်ခရံာ်အၢၣ်လီၤပှၤလၢ ကဟ့ၣ်ပှၤတၢ်မူ အခိၣ်သလုးန့ၣ်လီၤ. ကစၢ်ခရံာ်အၢၣ်လီၤပှၤလၢ ကဟ့ၣ်ပှၤမူခိၣ်အသီဒီး ဟီၣ်ခိၣ်အသီလၢ ပကအိၣ်ဆိးလၢ အပူၤအဂီၢ်န့ၣ်လီၤ.
အဃိ, မ်ပကကွၢ်ဃီၤဆူ ယွၤအသိဖိ အအိၣ်တက့ၢ်.
0 Comments