တၢ်မ့ၢ် "မိၢ်" လၢအဂ့ၤ (မိၢ်မုၢ်နံၤ တၢ်ကစီၣ်) (၂မိၤၡ့ ၂း၁-၁၀)



ဒီးပှၤလၢ လ့ၤဝံအပှၤဟံၣ်ဖိ အကျါတဂၤ လဲၤန့ၢ်မါလၢ ပှၤလ့ၤဝံဖိမုၣ် တဂၤလီၤ. ဒီးပိာ်မုၣ်န့ၣ် ဒၢထီၣ်, ဒီးဆံးစၢ်န့ၢ်အဖိခွါ, ဒီးထံၣ်ဘၣ်ဝဲလၢအမ့ၢ် အဂ့ၤ, ဒီးပာ်ခူသူၣ်အီၤ သၢလါလီၤ. ဒီးပာ်ခူသူၣ်ဝဲ တသ့လၢၤဘၣ် ဒီး, ဟံးန့ၢ်ဆှဲကိမ့ၤ အချံဖိ, ဒီးဖှူဝဲဒီး ကျဲတံးကိၢ်လိၣ်, ဒီးဆှိအထုး, ဒီးပာ်ဖိသၣ်ပိာ်ခွါ လၢအပူၤ, ဒီးပာ်လီၤအီၤလၢဆှဲကျါ လၢထံမိၢ်ပှၢ်အနံၤ န့ၣ်လီၤ. ဒီးတၢ်ကမၤအီၤ ဒ်လဲၣ်ဒ်လဲၣ် န့ၣ်, ဒ်သိးအကသ့ၣ်ညါ ဒီး, အဝဲၢ်မုၣ်တဂၤဆၢထၢၣ် စၢၢ်တလၢၢ် လီၤ. ဒီးဖၤရိၤအဖိမုၣ်တဂၤ ဟဲလီၤလုၣ်ထံ လၢထံမိၢ်ပှၢ်, ဒီးအကုၢ်အပှၤ ပိာ်မုၣ်တဖၣ် ဟးဝဲလၢ ထံမိၢ်ပှၢ်နံၤ, ဒီးထံၣ်ဘၣ်ချံဖိ အိၣ်လၢဆှဲကျါ, ဒီးမၢအကုၢ်ပိာ်မုၣ် တဂၤ လဲၤဟံးန့ၢ်ဝဲလီၤ. ဒီးအိးထီၣ် ဝဲ, ဒီးထံၣ်ဘၣ်ဖိသၣ်ပိာ်ခွါ, ဒီးကွၢ်ကွၢ်, ဖိသၣ်န့ၣ် ဟီၣ်ဝဲလီၤ. ဒီးသးကညီၤအီၤ, ဒီးစံးဝဲဒၣ်, အဝဲအံၤ မ့ၢ်ပှၤဧ့ၤဘြံၤဖိ အဖိသၣ်ပိာ်ခွါတဂၤလီၤ. ဒီးအဝဲၢ်မုၣ်စံးဘၣ် ဖၤရိၤအဖိမုၣ်, ယဘၣ် လဲၤကိးန့ၢ်နၤလၢ ပှၤဧ့ၤဘြံၤမုၣ်လၢ အဒုးအီၣ်နုၢ်တၢ်တဂၤ, ဒ်သိး အကဒုးအီၣ်နုၢ်ဖိသၣ်အံၤ လၢနဂီၢ်စ့ၢ်ကီး ဧါ. ဒီးဖၤရိၤအဖိမုၣ်န့ၣ်စံးဘၣ်အီၤ, လဲၤတက့ၢ်. ဒီးပမုၣ်ကနီၤ တဂၤန့ၣ်လဲၤကိးန့ၢ်ဖိသၣ်အမိၢ်လီၤ. ဒီးဖၤရိၤ အဖိမုၣ်န့ၣ်စံးဘၣ်အီၤ, က့ၤစိာ်ဖိသၣ်တဂၤအံၤ, ဒီးဒုးအီၣ်နုၢ်အီၤလၢ ယဂီၢ်တက့ၢ်. ဒီးယကဟ့ၣ်နဘူးနလဲ လီၤ. ဒီးပိာ်မုၣ်န့ၣ် ဟံးန့ၢ်ဖိသၣ်, ဒီးဒုးအီၣ်နုၢ်အီၤလီၤ. ဒီးဖိသၣ်ပိာ်ခွါန့ၣ် ဒိၣ်ထီၣ်, ဒီးအမိၢ်ဟဲက့ၤစိာ်အီၤဆူ ဖၤရိၤအဖိမုၣ်အအိၣ်, ဒီးကဲထီၣ်လၢ အဖိခွါ, ဒီးယုၢ်ဝဲအမံၤလၢ စီၤမိၤရှ့, အဂ့ၢ်ဒ်အံၤ, စံးဝဲဒၣ်, ယထုးထီၣ် အီၤလၢ ထံကျါ လီၤ. (၂ မိၤရှ့ ၂း၁-၁၀)


တၢ်ကတိၤလၢညါ

မိၢ်အမုၢ်နံၤ တနံၤအံၤ အဲၣ်ဒိးဆၢဂ့ၤဆၢဝါဘၣ် မိၢ်သ့ၣ်တဖၣ်လၢ အအိၣ်လၢ တၢ်အိၣ်ဖှိၣ်အပူၤ မ့ၢ်ဂ့ၤ, မိၢ်သ့ၣ်တဖၣ်လၢ ဟီၣ်ခိၣ်ချၢဒီတဘ့ၣ်ညါ မ့ၢ်ဂ့ၤ သ့ၣ်တဖၣ်န့ၣ်လီၤ. မ်ယွၤကဆိၣ်ဂ့ၤဘၣ် မိၢ်သ့ၣ်တဖၣ် ကိးဂၤဒဲးန့ၣ်တက့ၢ်.

မိၢ်သ့ၣ်တဖၣ် အတၢ်ဟ့ၣ်လီၤအသး လၢအဖိ တဖၣ်အဂီၢ် မ့ၢ်တၢ်လၢ အလုၢ်အပှ့ၤဒိၣ်မး တုၤဒၣ်လဲာ် အဖိတဖၣ် မ့ၢ်ဟ့ၣ်ဆၢက့ၤန့ၣ် ဟ့ၣ်က့ၤဝဲအပှ့ၤ တန့ၢ်ဘၣ်. လၢလံာ်စီဆှံအပူၤမ့ၢ်ဂ့ၤ, လၢတၢ်စံၣ်စိၤတဲစိၤ အပူၤ မ့ၢ်ဂ့ၤ, လၢပစိၤပဆၢကတီၢ် ခဲအံၤမ့ၢ်ဂ့ၤ, မိၢ်လၢ ပဂ့ၤကွၢ်လိ လၢအအိၣ်ဒီး တၢ်စူၢ်တၢ်နာ် အဂၢၢ်အကျၢၤ လၢကစၢ်ယွၤအပူၤ လၢအဖိအဂီၢ် အိၣ်ဝဲအါမး န့ၣ်လီၤ. လၢအကျါ, ပကမၤလိသကိး စီၤမိၤရှ့ အမိၢ်အတၢ် စူၢ်တၢ်နာ် န့ၣ်လီၤ.

၂မိၤရှ့ ၂း၁-၁၀ အပူၤ တဲဘၣ်ပှၤ မိၢ်တဂၤအဂ့ၢ်, ဘၣ်ဆၣ် တတဲဖျါထီၣ်မိၢ်တဂၤအံၤ အမံၤဘၣ်. ဘၣ်ဆၣ်, မိၢ်တဂၤအံၤအမံၤ ပကထံၣ်ဘၣ်အီၤ ဖဲ ၂မိၤရှ့ ၆း၂၀ ဒီး ၄မိၤရှ့ ၂၆း၅၉ လၢအမ့ၢ် နီၢ်ယိကဘ့ၣ် န့ၣ်လီၤ. နီၢ်ယိကဘ့ၣ်အံၤ အိၣ်ဒီးအဖိသၢဂၤလၢအမ့ၢ် နီၢ်မံးရယၣ်, စီၤအၤဟရိၣ်, ဒီး စီၤမိၤရှ့ န့ၣ်လီၤ.

နီၢ်ယိကဘ့ၣ် အဝၤ အမံၤမ့ၢ် စီၤဧၤမရၣ် လၢအမ့ၢ်အကစၢ်ဒၣ်ဝဲ အဖိဒိၣ်ခွါ န့ၣ်လီၤ. ဖဲအစိၤအဆၢကတီၢ် ဖဲန့ၣ်, တၢ်သိၣ်တၢ်သီ တတြီအဝဲသ့ၣ်နီတမံၤဘၣ် ဃးဟံၣ်ဖိဃီဖိ အတၢ်ဆီဟံၣ်ဆီဃီ န့ၣ်ဘၣ်. အဂ့ၢ်ဒ်အံၤ, ဖဲပှၤအံၣ်စရ့လးဖိ တဖၣ်လဲၤဆူကီၢ်အဲၤကူပတူး အပူၤအခါ, အပှၤနီၣ်ဂံၢ်အိၣ် အဂၤနွံဆံဂၤ န့ၣ် မ့ၢ်ဟံၣ်ဖိဃီဖိ ဒၣ်ဝဲ, ဒီးဟံၣ်ဖိဃီဖိ ကဒဲကဒဲ ထီၣ်ပှၢ်လီၤဖး ဒီး ဖဲစီၤမိၤရှ့အစိၤ (ဖဲအဝဲသ့ၣ်အိၣ်ဆိးလၢ ကီၢ်အဲၤကူပတူး အပူၤ အနံၣ်လွံၢ်ကယၤဃၣ်ဃၣ်အဆၢကတီၢ်) အပှၤနီၣ်ဂံၢ်အိၣ်တုၤ အဂၤလၢအကကွဲၢ် န့ၣ်လီၤ.

နီၢ်ယိကဘ့ၣ် အဂ့ၢ်န့ၣ် လံာ်စီဆှံပာ်ဖျါထီၣ်ဒၣ်အီၤထဲ ၂မိၤရှ့ ၂း၁-၁၀ အပူၤန့ၣ်လီၤ. ပဝဲအါဒံအါဂၤ ပဆိကမိၣ်လၢ လံာ်စီဆှံတတီၤအံၤ ဘၣ်ထွဲဒီး စီၤမိၤရှ့ အနီၢ်ဆံးခါ အဂ့ၢ်န့ၣ်လီၤ. ဘၣ်ဆၣ် ပမ့ၢ်ကွၢ်အီၤထံထံ န့ၣ်, ပကိးအီၤသ့လၢ အမ့ၢ် နီၢ်ယိကဘ့ၣ် အဂ့ၢ်, ပိာ်မုၣ်တဂၤလၢ ပှၤခရံာ်ဖိအါဂၤ တပာ်သူၣ်ပာ်သး လၢအဂ့ၢ်ဘၣ်န့ၣ်လီၤ.

ပမ့ၢ်ဖးလံာ်စီဆှံတတီၤ အံၤလီၤတံၢ်လီၤဆဲးန့ၣ် ပကထံၣ်ဘၣ် နီၢ်ယိကဘ့ၣ် အိၣ်ဒီးအတၢ်နာ် ဂၢၢ်ဂၢၢ်ကျၢၤကျၢၤလၢ ကစၢ်ယွၤအပူၤန့ၣ်လီၤ. တၢ်နာ်လၢအအိၣ်ဒီး နီၢ်ယိကဘ့ၣ်အံၤ တမ့ၢ် တၢ်နာ်လၢ အအိၣ်ခိး ကစၢ်ယွၤကမၤတၢ်လၢ အဖိခွါအဂီၢ် န့ၣ်ဘၣ်. နီၢ်ယိကဘ့ၣ် မ့ၢ်မိၢ်တဂၤလၢ အလဲၤတၢ်လၢတၢ်နာ် အပူၤလီၤ, တမ့ၢ်ဘၣ်လၢ ထံၣ်တၢ်ဘၣ်. ၂ကရံၣ်သူး ၅း၇ စံးဝဲ, "အဂ့ၢ်ဒ်အံၤ, ပလဲၤတၢ်လၢတၢ်နာ်, တမ့ၢ်ဘၣ်လၢ ထံၣ်တၢ်ဘၣ်." နီၢ်ယိကဘ့ၣ် လဲၤတၢ်လၢတၢ်နာ်, တၢ်နာ်လၢအအိၣ်ဒီး တၢ်မၤန့ၣ်လီၤ.

တနံၤအံၤပကမၤလိသကိး နီၢ်ယိကဘ့ၣ် အဂ့ၢ်လၢအဖျါလၢ ၂မိၤရှ့ ၂း၁-၁၀ အပူၤ ဒ်လာ်အံၤအသိးန့ၣ်လီၤ.
 ၁. နီၢ်ယိကဘ့ၣ် အတၢ်နာ်လၢအအိၣ်ဒီး တၢ်သူၣ်ဒူသးဒူ
၂. နီၢ်ယိကဘ့ၣ် အတၢ်နာ်လၢ အအိၣ်ဒီးတၢ်မၤ
၃. နီၢ်ယိကဘ့ၣ်အတၢ်နာ်အလုၢ်အပှ့ၤ

၁. နီၢ်ယိကဘ့ၣ် အတၢ်နာ်လၢ အအိၣ်ဒီး တၢ်သူၣ်ဒူသးဒူ

ပမ့ၢ်ဖးလၢ လံာ် ၂မိၤရှ့ အဆၢဒိၣ် ၁ ဒီး ၂ အပူၤ ပကထံၣ်ဘၣ်လၢ ပှၤအံၣ်စရ့လးဖိ အတၢ်အိၣ်အသးဖဲ အစိၤအဆၢကတီၢ်ဖဲန့ၣ် မ့ၢ်တၢ်ခံးသူ အဆၢကတီၢ်, တၢ်ကိၢ်တၢ်ဂီၤ တၢ်ကီတၢ်ခဲ အဆၢကတီၢ်န့ၣ်လီၤ. ၂မိၤရှ့ အဆၢဒိၣ် ၁ အဆၢဖိ ၈ စံးဘၣ်ပှၤလၢ အဲၤကူပတူးအစီၤအပၤအသီ အိၣ်ထီၣ်တဂၤလၢ တသ့ၣ်ညါဘၣ် စီၤယိၤသးဘၣ်, ဒီးထံၣ်ဘၣ် ပှၤအံၣ်စရ့လးဖိ တဖၣ် အိၣ်ဝဲအါအါဂီၢ်ဂီၢ်လၢ အဘီအမုၢ် အပူၤအဃိ, ဒုးကဲထီၣ် ပှၤအံၣ်စရ့လးဖိတဖၣ် လၢကုၢ် ဒီး ဒုးမၤအဝဲသ့ၣ်အတၢ်မၤ ဆူၣ်ဆူၣ်ကိၤကိၤ, အၢအၢသီသီ န့ၣ်လီၤ. တကးဒံးဘၣ်, ဟ့ၣ်လီၤစ့ၢ်ကီးတၢ်ကလုၢ်လၢ တၢ်ကဘၣ်မၤသံ ပိာ်ခွါဖိသၣ် လၢအအိၣ်ဖျဲၣ်ထီၣ်သီ တဖၣ် ဒ်သိး ကမၤလီၤတူာ်ကွံာ် ပှၤအံၣ်စရ့လးဖိ အစၢၤ အဂီၢ်န့ၣ်လီၤ. မ့ၢ်မၤဝဲဒ်န့ၣ်ဒီး, အံၣ်စရ့လးဖိ ဆူမဲာ်ညါတစိၤ မ့တမ့ၢ် ခံစိၤတစိၤန့ၣ်, အစၢၤကလီၤတူာ်ကွံာ် ခဲလၢာ်လီၤ. နီၢ်ယိကဘ့ၣ် သ့ၣ်ညါစီၤပၤ အတၢ်ကလုၢ်, ဘၣ်ဆၣ် တပျံၤဝဲဘၣ်.

နီၢ်ယိကဘ့ၣ် သ့ၣ်ညါဝဲလၢ အကအိၣ်ဖျဲၣ်ထီၣ်အဖိ အသီတဂၤ, ဒီး မ့မ့ၢ်ပိာ်ခွါန့ၣ် ကဘၣ်တၢ်တၢၤကွံာ်အီၤလၢ ထံမိၢ်ပှၢ်အပူၤ (Nile River) အပူၤကိးဂၤဒဲးလီၤ. မိၢ်ပၢ်တဖၣ် မ့တပိာ်ထွဲ တၢ်ကလုၢ်အံၤဘၣ်န့ၣ်, ကဘၣ်တၢ်မၤသံကွံာ်အီၤခဲလၢာ်လီၤ. (၂မိၤရှ့ ၁း၂၂). တၢ်မၤအသးအခါဖဲန့ၣ်, မ့ၢ်တၢ်တၤတၢ်ဒီး နီၢ်ယိကဘ့ၣ် လၢ တၢ်တၤဖးဒိၣ်အပူၤန့ၣ်လီၤ. ဘၣ်ဆၣ် နီၢ်ယိကဘ့ၣ် တပာ်ဖျါထီၣ် အတၢ်သူၣ်ပျံၤသးဖုး, ဒီး အတၢ်သးဆံးဘၣ်. မ့မ့ၢ်တခီ အဝဲအိၣ်ဒီး တၢ်သူၣ်ဒူသးဒူ ဒီး တၢ်မုၢ်လၢ်ဖးဒိၣ် န့ၣ်လီၤ. ဖဲအဖိ အိၣ်ဖျဲၣ်ထီၣ်အဆၢ ကတီၢ် ပသ့ၣ်ညါဘၣ်လၢ အဖိတဂၤအံၤ တမ့ၢ်ပိာ်မုၣ်ဘၣ်, မ့ၢ်ပိာ်ခွါဖိ ဒီး ဖဲ ၂မိၤရှ့ ၂း၁၀ အပူၤန့ၣ် ပကထံၣ်ဘၣ်လၢ ပိာ်ခွါဖိအံၤ တၢ်ယုၢ်န့ၢ်အမံၤလၢ စီၤမိၤရှ့န့ၣ်လီၤ.

နီၢ်ယိကဘ့ၣ် အတၢ်နာ် အလၢၢ်ခၢၣ်သနၢၣ် (Foundation) မ့ၢ်တၢ်မနုၤလဲၣ်. နီၢ်ယိကဘ့ၣ် မ့ၢ်ပှၤကူပှၤကညီ ဒ်သိးနၤယၤပဝဲသ့ၣ်တဖၣ် န့ၣ်လီၤ. အဝဲအိၣ်ဒီး တၢ်တူၢ်တၢ်ခီၣ်ဘၣ် ဒ်နၤယၤအသိး စ့ၢ်ကီးန့ၣ်လီၤ. အဝဲထံၣ်ဘၣ်တၢ်ကီတၢ်ခဲ ဒ်နၤယၤအသိး စ့ၢ်ကီးန့ၣ်လီၤ. ဘၣ်ဆၣ် ဖဲတၢ်ကီတၢ်ခဲအဆၢကတီၢ်, အဝဲအိၣ်ဒီး တၢ်သူၣ်ဒူတၢ်သးဒူ, ဒီး တၢ်မုၢ်လၢ်ဖးဒိၣ်န့ၣ်လီၤ. အတၢ်သူၣ်ဒူသးဒူ ဒီး အတၢ်မုၢ်လၢ်အံၤ ဒိးသန့ၤထီၣ်အသး လၢမနုၤတမံၤလဲၣ်. တၢ်စံးဆၢန့ၣ်မ့ၢ်ဝဲ, ဒိးသန့ၤထီၣ်အသးလၢ ကစၢ်ယွၤအကလုၢ်ကထါ အတၢ်အၢၣ်လီၤအီလီၤ အဃိန့ၣ်လီၤ.

စီၤမိၤရှ့အမိၢ်အပၢ်ခံဂၤလၢာ် သ့ၣ်ညါဆိဝဲလၢ အံၣ်စရ့လး အဖိတဖၣ် တဟးဂူာ်ဟးဂီၤ နီတဘျီဘၣ်, မ့ၢ်လၢ ကစၢ်ယွၤအိၣ်ဒီး အတၢ်အၢၣ်လီၤအီလီၤ ဒီးအပၢ်ဖးဒိၣ် စီၤအၤဘြၤဟၣ် အဃိန့ၣ်လီၤ. (၁မိၤရှ့ ၁၂း၃). နီၢ်ယိကဘ့ၣ် သ့ၣ်ညါပာ်စၢၤ ကစၢ်ယွၤအတၢ်စံးပာ် ဘၣ်ဃး တၢ်လဲၤကဲကုၢ်လၢအဲၤကူပတူးအပူၤ လၢအဝဲသ့ၣ် လဲၤခီဖျိဝဲ ခဲအံၤန့ၣ်လီၤ.

ကစၢ်ယွၤတဲဘၣ်စီၤအၤဘြၤဟၣ် ဖဲလံာ် ၁မိၤရှ့ ၁၅း၁၃-၁၄ အပူၤဒ်အံၤ -
ဒီးစံးဘၣ်စီၤအၤဘြၣ်, သ့ၣ်ညါသပှၢ်တၢၢ်လၢ နချံနသၣ် ကကဲထီၣ်ပှၤတမှံၤလၢ ကီၢ်တဘ့ၣ်အပူၤ လၢအတမ့ၢ်ဘၣ် အတၢ်ဘၣ်, ဒီးကမၤပှၤကီၢ်ဖိန့ၣ်အတၢ်, ဒီးအဝဲသ့ၣ်ကမၤနးမၤဖှီၣ်အီၤ အနံၣ်လွံၢ်ကယၤ န့ၣ်တက့ၢ်. လၢန့ၣ်အမဲာ်ညါ ပှၤတကလုာ်လၢအဝဲသ့ၣ် ကမၤအတၢ်န့ၣ် ယကစံၣ်ညီၣ်အီၤလီၤ. လၢခံက့ၤဒီး ကဟးထီၣ်အိၣ်ဒီး အတၢ်ဖိတၢ်လံၤ အါအါကလဲာ်လီၤ.

ဒ်ကစၢ်ယွၤစံးဘၣ် စီၤအၤဘြၤဟၣ်အသိး, ဖဲနီၢ်ယိကဘ့ၣ် သ့ၣ်ညါဝဲလၢ အစိၤအဆၢကတီၢ်ခဲအံၤ မ့ၢ်စိၤဆၢကတီၢ်လၢ ကစၢ်ယွၤအတၢ်အၢၣ်လီၤအီလီၤ ဘူးကတုၤဝဲ အခါန့ၣ်လီၤ. လီၤဂာ်ဒ်သိးဒီး, ကစၢ်ယွၤ တဲကတိၤကသွံတၢ်ဒီးအီၤ လၢ အဝဲအဖိခွါတဂၤလၢအမ့ၢ် စီၤမိၤရှ့အံၤ ကမ့ၢ်ပှၤတဂၤလၢ ကစၢ်ယွၤကသူအီၤ လၢကထုးထီၣ်ကွံာ် အပှၤဂီၢ်မုၢ်လၢ ကီၢ်အဲၤကူပတူး အပူၤန့ၣ်လီၤ. အဝဲတူၢ်ဘၣ်လၢ ကစၢ်ယွၤအိၣ်ဒီး တၢ်တိာ်လီၤဆီလၢ အဖိတဂၤအံၤ အဂီၢ်န့ၣ်လီၤ. အဝဲအံၤမ့ၢ် လၢၢ်ခၢၣ်သနၢၣ်လၢ နီၢ်ယိကဘ့ၣ် အတၢ်နာ် အဂီၢ်န့ၣ်လီၤ.

လံာ်ဧ့ၤဘြံၤ ၁၁း၂၃ စံးဘၣ်ပှၤ -
လၢတၢ်နာ်, စီၤမိၤရှ့အိၣ်ဖျဲၣ်ဒီး, အမိၢ်အပၢ်ပာ်ခူသူၣ်အီၤ သၢလါလီၤ. အဂ့ၢ်ဒ်အံၤ, ထံၣ်ဝဲလၢ ဖိသၣ် အက့ၢ်အဂီၤဂ့ၤ, ဒီးတပျံၤဘၣ် စီၤပၤအတၢ်မၤလိာ်ဘၣ်.

စီၤမိၤရှ့ ဘၣ်တၢ်ပာ်ခူသူၣ်အီၤလၢဟံၣ် သၢလါ, ဝံၤအလီၢ်ခံ အမိၢ်ဟံးန့ၢ်ဆှဲကိမ့ၤ အချံဖိ, ဒီးဖှူဝဲဒီး ကျဲတံးကိၢ်လိၣ်, ဒီးဆှိအထုး, ဒီးပာ်ဖိသၣ်ပိာ်ခွါလၢ အပူၤ, ဒီးပာ်လီၤအီၤလၢဆှဲကျါလၢထံမိၢ်ပှၢ်အနံၤ န့ၣ်လီၤ. (၂မိၤရှ့ ၂း၃). တမ့ၢ်လၢ နီၢ်ယိကဘ့ၣ် ဘၣ်ယိၣ်တၢ်လၢအဖိခွါအဂီၢ်အဃိ, မၤဝဲဒ်အံၤဘၣ်. တမ့ၢ်စ့ၢ်ကီးလၢ အဝဲအဲၣ်အဖိခွါဒိၣ်ဒိၣ်ကလဲာ်အဃိ ထိၣ်လီၤထွံကွံာ်အဖိခွါလၢ ထံမိၢ်ပှၢ်အပူၤန့ၣ်ဘၣ်. အဝဲအံၤ ခီဖျိ လၢတၢ်နာ်အဃိ ပာ်ခူသူၣ်အဖိအံၤ, တမ့ၢ်လၢ တၢ်ပျံၤအဃိဘၣ်. စီၤမိၤရှ့ အမိၢ်အပၢ် နာ်ကစၢ်ယွၤ အတၢ်အၢၣ်လီၤအီလီၤလၢအမ့ၢ် အနံၣ်လွံၢ်ကယၤဝံၤအလီၢ်ခံ ကစၢ်ယွၤကထုးထီၣ်ကွံာ်အဝဲသ့ၣ်လၢ အဲၤကူပတူး အပူၤ, ဒီးအဝဲသ့ၣ် အဖိခွါ တဂၤအံၤ မ့ၢ်ဖိသၣ်လၢအက့ၢ်အဂီၤဂ့ၤ, အဃိ ဖဲအဖိအိၣ်ဖျဲၣ်လီၤသီအဆၢကတီၢ် ဒ်စီၤပၤအကလုၢ်အသိး တတ့ၢ်လီၤကွံာ်အဖိဆူ ထံမိၢ်ပှၢ်အကျိပူၤ ဘၣ်အမဲာ်ညါ ပာ်ခူသူၣ်ဝဲသၢလါ ညါ လၢအဟံၣ်ဝံၤမး, အးလီၤက့ၤဝဲဆူ ကစၢ်ယွၤအအိၣ်န့ၣ်လီၤ.

၂. နီၢ်ယိကဘ့ၣ် အတၢ်နာ်လၢအအိၣ်ဒီး တၢ်မၤ

နီၢ်ယိကဘ့ၣ် အတၢ်နာ် အံၤ ပာ်ဖျါထီၣ်ဝဲလၢ အတၢ်မၤန့ၣ်လီၤ. အဝဲတဆ့ၣ်နီၤ ဒီးကအုကစွါ ဘၣ်ဃး တၢ်အိၣ်သးလၢအစိၤအဆၢကတီၢ်အဝဲန့ၣ် ဒီးစံး, "ဖိသၣ်တဂၤအံၤ မ့ကဲထီၣ်ပှၤလၢအထုးထီၣ် ပှၤအံၣ်စရ့လး ဖိန့ၣ်, ကစၢ်ယွၤကမၤတၢ်လၢ အဂီၢ်တမံၤမံၤလီၤ. ပမၤတၢ်တသ့နီတမံၤဘၣ်. အဃိ ပကတ့ၢ်လီၤအီၤဆူ ထံကျိပူၤလီၤ. ကစၢ်ယွၤမ့ၢ်အဲၣ်ဒိးအီၤန့ၣ်, ကမၤပူၤဖျဲးအသးသမူလီၤ." နီၢ်ယိကဘ့ၣ် တတဲဝဲဒ်န့ၣ်ဘၣ်. အဝဲသ့ၣ်ညါလၢ ကစၢ်ယွၤ အဲၣ်ဒိးပမၤစ့ၢ်ကီးဒ်ပမၤသ့အသိး, ဒီးတၢ်လၢ ပမၤလၢပကစၢ်သ့န့ၣ် ကစၢ်ယွၤတမၤန့ၢ်ခဲး တၢ်လၢပဂီၢ်ဘၣ်.

လၢတၢ်န့ၣ်အဃိ, နီၢ်ယိကဘ့ၣ် ပာ်ခူသူၣ် စီၤမိၤရှ့လၢသၢလါအတီၢ်ပူၤ, ဒီးတုၤ စီၤမိၤရှ့ အကဖုဒိၣ်ထီၣ်တစဲးဖိအခါ ကဲထီၣ်တၢ်ကီတၢ်ခဲလၢအဝဲအဂီၢ် လၢကပာ်ခူသူၣ် အဖိခွါန့ၣ်လီၤ. ဒီးပာ်ခူသူၣ်ဝဲတသ့လၢၤဘၣ် ဒီး, ဟံးန့ၢ်ဆှဲကိမ့ၤအချံဖိ, ဒီးဖှူဝဲဒီး ကျဲတံးကိၢ်လိၣ်, ဒီးဆှိအထုး, ဒီးပာ်ဖိသၣ်ပိာ်ခွါလၢအပူၤ, ဒီး ပာ်လီၤအီၤလၢဆှဲကျါလၢ ထံမိၢ်ပှၢ်အနံၤန့ၣ်လီၤ. (၂မိၤရှ့ ၂း၃). တုၤအမၤဝဲ တၢ်လၢအမၤဝဲသ့တဖၣ်ဝံၤ, ပျဲလီၤဝဲ အဖိမုၣ်ဒိၣ် နီၢ်မ့ရယၣ် လၢကကွၢ်ဟုၣ် အပုၢ်အဂီၢ်န့ၣ်လီၤ. အဝဲအံၤ မ့ၢ်နီၢ်ယိကဘ့ၣ် အတၢ်နာ်လၢ အအိၣ်ဒီး တၢ်မၤန့ၣ်လီၤ. လၢအဝဲတခီအမၤဝဲဒ် အမၤသ့အသိး, ဒီးအိၣ်တ့ၢ်က့ၤလၢ ကစၢ်ယွၤကမၤက့ၤတၢ်န့ၣ်လီၤ. ဖဲအံၤ ပကထံၣ်ဘၣ်လၢ, ဒ်စီၤပၤအကလုၢ်အသိး နီၢ်ယိကဘ့ၣ် မၤထွဲဝဲလီၤ. ဘၣ်ဆၣ်, အဝဲဒီသဒၢ အဖိခွါဒ်သိး အသုတလီၤဘျၢလၢ ထံကျါတဂ့ၤန့ၣ်လီၤ.

နီၢ်ယိကဘ့ၣ်အံၤ ဒ်အသ့အသိး, ဒ်သိးအဖိခွါ အသးသမူ ကပူၤဖျဲးအဂီၢ် မၤလံဝဲလံ. မ့မ့ၢ်ပဝဲတခီလဲၣ်. ပသးသမူအံၤလုၢ်ဒိၣ်ပှ့ၤဒိၣ်န့ၢ် တၢ်မျၢ်ပလဲတက့ၢ်လီၤ. ပပှ့ၤအီၤလၢထူလၢစ့ တန့ၢ်ဘၣ်. ပဝဲအါဂၤ ပကစံးလၢ နီၢ်ယိကဘ့ၣ် ထီဒါ စီၤပၤဖၤရိၤအကလုၢ်လီၤ. ဘၣ်ဆၣ်စီၤပၤဖၤရိၤအကလုၢ်န့ၣ် မ့ၢ်တၢ်မနုၤလဲၣ်. မ့ၢ်ဒ်သိး ကမၤသံတၢ်အဂီၢ်လီၤ.

အစိၤဆၢကတီၢ်ခဲအံၤ မ့ၢ် ခိၣ်ရိနၣ်တၢ်ဆါ အဆၢကတီၢ်န့ၣ်လီၤ. ခိၣ်ရိနၣ်တၢ်ဆါအံၤ မ့ၢ်ဒ်သိးကမၤသံ တၢ်အဂီၢ်လီၤ. ဘၣ်ဆၣ်ကစၢ်ယွၤဟ့ၣ်လီၤပှၤ ထံကီၢ်ခိၣ်နၢ်လၢအကူၣ်ဘၣ်ကူၣ်သ့တဖၣ် ဒ်သိး ကမၤပူၤဖျဲးပသးသမူလၢ တၢ်ဆါအံၤအဂီၢ်န့ၣ်လီၤ. အဝဲသ့ၣ်ရဲၣ်ကျဲၤလီၤတဆီဘၣ်တဆီ ဒ်သိး ပကမူအဂီၢ်န့ၣ်လီၤ. လၢနီၢ်ယိကဘ့ၣ်အစိၤ ထံကီၢ်အတၢ်ကလုၢ်န့ၣ် မ့ၢ်တၢ်မၤသံတၢ်, ဘၣ်ဆၣ် လၢပစိၤပဆၢကတီၢ်အံၤ ထံကီၢ်အတၢ်ကလုၢ်န့ၣ် မ့ၢ်တၢ်မၤမူတၢ်လီၤ. ဒ်သိးပကမူအဂီၢ် ပကဘၣ်မၤထွဲဒ် ထံကီၢ်ခိၣ်နၢ် နဲၣ်ပှၤကျဲအသိး န့ၣ်လီၤ. ပကစံးလၢ ပနာ်ကစၢ်ယွၤ, ကစၢ်ယွၤန့ၣ် ဒိၣ်န့ၢ်ဒံး တၢ်ဆူးတၢ်ဆါတက့ၢ်လီၤ. မ့ၢ်ဒၣ်ကယၢာ်, ဘၣ်ဆၣ် ကစၢ်ယွၤဟ့ၣ်ပှၤ တၢ်သးဆး ဒ်သိး ပသးသမူ ကပူၤဖျဲးအဂီၢ်လီၤ. ဒ်ခိၣ်နၢ် ဟ့ၣ်ပှၤတၢ်နဲၣ်ကျဲ အသိး ပမ့ၢ်မၤပိာ်ထွဲန့ၣ်, ကစၢ်ယွၤကမၤ န့ၢ်ခဲးတၢ်လၢပဂီၢ်လီၤ.

၃. နီၢ်ယိကဘ့ၣ်အတၢ်နာ် အလုၢ်အပှ့ၤ

၂မိၤရှ့ အဆၢဒိၣ် ၂ အဆၢဖိ ၄ ဒီးဆူမဲာ်ညါန့ၣ် ပကထံၣ်ဘၣ် ကစၢ်ယွၤအတၢ်ဖံးတၢ်မၤ န့ၣ်လီၤ. အဆိကတၢၢ်, ကစၢ်ယွၤ ဒုးဟူးဝး ပှၤတခီဘီမုၢ်ဖိအစီၤပၤ အဖိမုၣ်, တကတီၢ်ဃီဖဲ စီၤမိၤရှ့အိၣ်လၢ ထံကျိမိၢ်ပှၢ် အနံၤန့ၣ် အဝဲဟဲလီၤဒ်သိး အကလုၢ်ထံ အဂီၢ်န့ၣ်လီၤ. စီၤပၤဖၤရိၤ အဖိမုၣ်အဟဲလီၤလုၢ်ထံလၢ ထံကျိမိၢ်ပှၢ် အနံၤန့ၣ် တမ့ၢ်တၢ်လၢ အညီနုၢ်မၤအသးဘၣ်. မ့ၢ်လၢ ထံကျိမိၢ်ပှၢ် Nile River အံၤ မ့ၢ်ထံကျိလၢ အတကဆှီဘၣ်, လၢပှၤတၢၤကွံာ် တၢ်အုၣ်တၢ်ကျၣ်န့ၣ်လီၤ. လၢတၢ်စံၣ်စိၤတဲစိၤအပူၤ ပကထံၣ်ဘၣ်လၢ  စီၤပၤဖၤရိၤ အစိၤအဆၢကတီၢ်န့ၣ်, အိၣ်ဒီး တၢ်လုၢ်ထံလီၢ်ဒိၣ်ဒိၣ်မုၢ်မုၢ်တဖၣ် လၢအနီပူၤဒၣ်ဝဲအပူၤ န့ၣ်လီၤ. ဘၣ်ဆၣ်, ၂မိၤရှ့ ၂း၅ တဲပှၤလၢ ဖၤရိၤအဖိမုၣ် ဟဲလီၤဒ်သိး ကလုၢ်ထံလၢထံကျိပူၤ, ဃုာ်ဒီး အကုၢ်အပှၤ ပိာ်မုၣ်တဖၣ် ဟးဝဲလၢထံမိၢ်ပှၢ်နံၤန့ၣ်လီၤ.

ဖဲဟးဝဲလၢ ထံမိၢ်ပှၢ်နံၤ အဆၢကတီၢ်, ထံၣ်ဘၣ်ချံဖိ အိၣ်လၢဆှဲကျါ, ဒီးမၢအကုၢ်ပိာ်မုၣ် တဂၤလဲၤဟံးန့ၢ် ဝဲလီၤ. အဝဲအံၤမ့ၢ် ကစၢ်ယွၤ မၤလၢပှဲၤ မိၢ်တဂၤအံၤ အတၢ်နာ်န့ၣ်လီၤ. ဖဲအအိးထီၣ်ကွၢ်ဝဲ ချံဖိအံၤ ဒီး ထံၣ်ဝဲလၢ အမ့ၢ်ဧ့ၤဘြံၤဖိ အဖိသၣ်ပိာ်ခွါ တဂၤလီၤ. ပကြၢးသ့ၣ်နီၣ်ထီၣ်က့ၤလၢ ပိာ်မုၣ်တဂၤအံၤ မ့ၢ်စီၤပၤဖၤရိၤ အဖိမုၣ်, အဃိ ဒ်စီၤပၤအကစၢ်ဒၣ်ဝဲအသိး အဝဲဒၣ်စ့ၢ်ကီး သးဟ့ပှၤဧ့ၤဘြံၤဖိ ဒိၣ်မးန့ၣ်လီၤ.

ဘၣ်ဆၣ် လံာ်စီဆှံစံးဝဲဖဲ အဝဲအိးထီၣ်ချံဖိအံၤအခါ, ဖိသၣ်န့ၣ်ဟီၣ်ဝဲလီၤ. (၂မိၤရှ့ ၂း၆). ဘၣ်တဘၣ် ကစၢ်ယွၤ ထံၣ်လၢ တၢ်ဆၢကတီၢ်အဝဲန့ၣ် ဖိသၣ်ကြၢးဟီၣ်လီၤ. အဂ့ၢ်ဒ်အံၤ, ဖိသၣ်အတၢ်ဟီၣ်န့ၣ် မၤကပုာ်လီၤကွံာ် ပိာ်မုၣ်အသး သ့ဝဲန့ၣ်လီၤ. ဖဲပိာ်မုၣ်အသး ဒီး ဖိသၣ်အမဲာ်ထံ ထံၣ်လိာ်သးအခါ, တၢ်ကဲထီၣ်အသး တမံၤမံၤလီၤ. လၢတၢ်န့ၣ်အဃိ, စီၤပၤဖၤရိၤအဖိမုၣ်အံၤ ပာ်လီၤအသးကျၢၤမူဆှုလၢ ကဒီသဒၢ ဖိသၣ် တဂၤအံၤလီၤ.

ကစၢ်ယွၤအတၢ်တိာ်လၢ ကအုၣ်က့ၤခီၣ်က့ၤ ပှၤအံၣ်စရ့လးဖိအံၤ ဒိးသန့ၤထီၣ်အသးလၢ တၢ်ဆၢကတီၢ် တစိၢ်ဖိဖဲ ဖိသၣ်ပိာ်ခွါဖိ ဟီၣ်ဝဲဒၣ်အခါန့ၣ်လီၤ. ဖိသၣ်ပိာ်ခွါဖိအတၢ်ဟီၣ်အံၤ မၤဘၣ်ဒိ ဖၤရိၤအဖိမုၣ်အသး ဒ်မိၢ်တဂၤအသိး, အဃိ စီၤမိၤရှ့ အသးသမူ ပူၤဖျဲးကွံာ်ဝဲန့ၣ်လီၤ.

ဖဲန့ၣ်အဆၢကတီၢ် စီၤမိၤရှ့ အဝဲၢ်ပိာ်မုၣ် လၢအမ့ၢ်နီၢ်မ့ရယၣ် လၢအအိၣ်တဘူးတယံၤဒီးအဝဲသ့ၣ်, စံးဘၣ် ဖၤရိၤအဖိမုၣ်, ယဘၣ်လဲၤကိးန့ၢ်နၤလၢ ပှၤဧ့ၤဘြံၤမုၣ်လၢ အဒုးအီၣ်နုၢ်တၢ်တဂၤ, ဒ်သိးအကဒုးအီၣ်နုၢ်ဖိသၣ်အံၤလၢနဂီၢ်စ့ၢ်ကီးဧါ. (၂မိၤ ၂း၇). ဒီးစီၤပၤအဖိမုၣ်န့ၣ်တဲဘၣ်အီၤလၢ ကလဲၤကိးန့ၢ် ဧ့ၤဘြံၤမုၣ်လၢ ကဒုးအီၣ်နုၢ်ဖိသၣ်အံၤ အဂီၢ်န့ၣ်လီၤ. အဝဲလဲၤကိးန့ၢ်အမိၢ်ဝံၤ, ဖၤရိၤဖိမုၣ် တဲဘၣ်အီၤလၢ, "က့ၤစိာ်ဖိသၣ်တဂၤအံၤ, ဒီးဒုးအီၣ်နုၢ်အီၤလၢယဂီၢ် တက့ၢ်. ဒီးယကဟ့ၣ်နဘူးနလဲလီၤ." (၂မိၤ ၂း၉). နီၢ်ယိကဘ့ၣ် အတၢ်နာ်အံၤ တၢ်ဘူးတၢ်လဲလၢ အဒိးန့ၢ်ဝဲန့ၣ် မ့ၢ်ဝဲ အိၣ်ဘၣ်က့ၤတပူၤဃီ ဒီးအဖိခွါ န့ၣ်လီၤ. တကးဒံးဘၣ်, ခီဖျိလၢ ကွၢ်ထွဲဝဲအဖိခွါ တဂၤအံၤအဃိ အဝဲဒိးန့ၢ် တၢ်ဘူးတၢ်လဲ လၢစီၤပၤအဖိမုၣ် အအိၣ်န့ၣ်လီၤ. အဝဲအလိၣ်ကိၢ်ဂီၤလၢ ကဘၣ်မၤတၢ်ဆှူၣ်ဆှူၣ်ဘှဲၣ်ဘှဲၣ်ကိၢ်ကိၢ်ဂီၤဂီၤ ဒ်ကုၢ်အသိးလၢၤဘၣ်. တကးဒံးဘၣ်, အဝဲသိၣ်လိဘၣ်အဖိခွါ လၢထူကလုၢ်ယွၤကထါ, ဒီးတၢ်အဲၣ်အပှၤအကလုာ်န့ၣ်လီၤ. မ့ၢ်လၢ လံာ်စီဆှံစံးဘၣ် ပှၤလၢ, ဖဲဖိသၣ်ဒိၣ်ထီၣ်တုၤအနၢ်ပၢၢ်တၢ်မး အမိၢ်ဟဲက့ၤစိာ်အီၤဆူ ဖၤရိၤအဖိမုၣ်အအိၣ်, ဒီးကဲထီၣ်ဖၤရိၤအဖိမုၣ်န့ၣ် အဖိခွါန့ၣ်လီၤ. (၂မိၤရှ့ ၂း၁၀).

တၢ်ကတိၤလၢခံ

ပတၢ်အိၣ်မူအပူၤအံၤ, ဒ်နီၢ်ယိကဘ့ၣ်အသိး, ပတၢ်နာ်ဂၢၢ်ကျၢၤထဲလဲၣ်န့ၣ် ဘၣ်တၢ်မၤကွၢ်အီၤလီၤ. စီၤပ့းတရူး တဲဘၣ်ပှၤလၢ လံာ်၁ပ့းတရူး ၁း၇ အပူၤစံးဝဲ -
ဒ်သိးသုတၢ်နာ် အတၢ်မၤကွၢ်အီၤ, လၢအမ့ၢ်တၢ်လုၢ်တၢ်ပှ့ၤဒိၣ်န့ၢ်ထူ, လၢအဘၣ်တၢ်မၤကွၢ်အီၤလၢ မ့ၣ်အူနာ်သက့ဒီး ဟးဂီၤဝဲန့ၣ်, ကအိၣ်ဖျါထီၣ်လၢ တၢ်စံးထီၣ်ပတြၢၤ, ဒီးတၢ်ယူးတၢ်ယီၣ်, ဒီးတၢ်လၤကပီၤအဂီၢ်, ဖဲယ့ၣ်ရှူး ခရံာ် အတၢ်အိၣ်ဖျါထီၣ်န့ၣ်လီၤ.

တၢ်မၤကွၢ်ပတၢ်နာ်ဟဲလၢကျဲ အဘိဘိန့ၣ်လီၤ. တၢ်မၤကွၢ်တဖၣ်အံၤ ပဝဲတဂၤဒီးတဂၤ ပဘၣ်လဲၤခီဖျိအီၤ လီၤဆီလိာ်အသးန့ၣ်လီၤ. ပှၤတနီၤနီၤအဂီၢ်, တၢ်ဖှီၣ်တၢ်ယာ်ကဟဲဝဲ, ပှၤတနီၤနီၤအဂီၢ် အတံၤသကိးကမၤသးအုးအီၤ, အဖိကဟ့ၣ်အီၤလၢ သးတၢ်ဆါ, တၢ်အိၣ်ဆူၣ်အိၣ်ချ့တလၢတပှဲၤ, တၢ်ဆူးတၢ်ဆါအကလုာ်ကလုာ်, ပှၤလၢအအဲၣ်ကပာ်လီၤတဲာ်အီၤ, တၢ်မၤကွၢ်အကလုာ်ကလုာ် ဒ်သိးအံၤတဖၣ်န့ၣ်လီၤ. တၢ်မၤကွၢ် ကဟဲဘၣ်ပှၤဒ်လဲၣ်ဒ်လဲၣ်ဂ့ၤ, ပကသ့ၣ်နီၣ်ထီၣ်လၢ ကစၢ်ယွၤအိၣ်လၢအလီၢ်ဆ့ၣ်နီၤအလိၤ, ဒီးသုးကျဲၤ တၢ်အဂ့ၤကတၢၢ်လၢ ပဝဲလၢပနာ်အီၤ တဖၣ်အဂီၢ်န့ၣ်လီၤ. တၢ်မၤကွၢ်လၢ ပဘၣ်လဲၤခီဖျိအီၤတဖၣ်အံၤ, ပဘၣ်သ့ၣ်ညါ လၢအမ့ၢ် ကစၢ်ယွၤအတၢ်သုးတၢ်ကျဲၤ ပဂီၢ် လၢပကဒိးန့ၢ်ဘၣ် တၢ်ဆိၣ်ဂ့ၤဆိၣ်ဝါ ဒိၣ်ဒိၣ်မုၢ်မုၢ် အဂီၢ်န့ၣ်လီၤ.

လၢတၢ်န့ၣ်အဃိ, ပဝဲလၢအမ့ၢ်ပှၤခရံာ်ဖိတဖၣ် ပကအိၣ်ဒီး တၢ်နာ်ဒ် နီၢ်ယိကဘ့ၣ်အသိး, တၢ်နာ်လၢ အအိၣ်ဒီးတၢ်သူၣ်ဒူသးဒူ, ဒီး တၢ်နာ်လၢအအိၣ်ဒီး တၢ်မၤ န့ၣ်တက့ၢ်.

မ်ယွၤဆိၣ်ဂ့ၤအကလုၢ်ကထါဒီး ဆိၣ်ဂ့ၤပဝဲကိးဂၤဒဲးတက့ၢ်.

Post a Comment

0 Comments