ပသးသမူကဘီသုတဟးဂီၤတဂ့ၤ (မၤတၢ် ၂၇း၁၀-၁၃)

 

ဒီးစံးဘၣ်အီၤ, ပှၤကညီသ့ၣ်ဧၢ, ယသ့ၣ်ညါလၢ ပလဲၤတၢ်လၢ ပီၣ်လဲၣ်အံၤ, ကအိၣ်ဒီး တၢ်ဟးဂူာ်ဟးဂီၤ, ဒီး တၢ်ဟါမူၤဟါမၢ် အါအါကလဲာ်, ထဲကဘီ, ဒီးတၢ်ဖိတၢ်လံၤဧိၤ တမ့ၢ်ဘၣ်, မ့ၢ်လၢပသးတဖၣ် စ့ၢ်ကီးလီၤ. ဘၣ်ဆၣ်ဒီး ပှၤသုးဖိ တကယၤအခိၣ်, နာ်ကဘီခိၣ် ဒီးကဘီကစၢ် အါန့ၢ် တၢ်လၢ စီၤပီလူး ကတိၤဝဲ တက့ၢ်လီၤ. ဒီးကဘီ သန့တမုာ်ဘၣ်လၢ အကအိၣ်လၢ တၢ်ဂိၢ် အကတီၢ်န့ၣ်ဘၣ်ဒီး, ပှၤကူၣ်ထီၣ်ဖးလီၤဝဲ အါတက့ၢ်, လၢအကဟးထီၣ်ကွံာ်ဖဲန့ၣ် စ့ၢ်ကီး, ဒီးမ့ၢ်သ့ ဒီးကလဲၤတုၤလၢ ဖံၤနံက့ၤ, ဒ်သိး အကအိၣ်ဖဲန့ၣ်လၢ တၢ်ဂိၢ်အကတီၢ်လီၤ. မ့ၢ်ကဘီသန့ ဘၣ်ဃးဒီးကြ့တ့ၤ, ဒီးကွၢ်ဃီၤလၢ မုၢ်နုာ်ကလံၤစိး, ဒီးမုၢ်နုာ်ကလံၤထံး တခီလီၤ. ဒီးတုၤကလံၤဟဲထီၣ်လၢ ကလံၤထံး သြီသြီဒီး, ဆိကမိၣ်ဝဲလၢ အလဲၤတၢ်ဒ် အကူၣ်ပာ်ဝဲအသိးကသ့ သတးဒီး, ထုးထီၣ်နီၣ်သက့ၤ, ဒီးလဲၤဘူးဝဲဒီး ကြ့တ့ၤ အသရ့ၤလီၤ. (မၤတၢ် ၂၇း၁၀-၁၃)

တၢ်ကတိၤလၢညါ

ပတၢ်အိၣ်မူလၢ ဟီၣ်ခိၣ်ချၢအံၤ လီၤဂာ်ဒ်သိး ဒီး ပအိၣ်လၢကဘီပူၤ ဒီးလဲၤတၢ်လၢပီၣ်လဲၣ်ပူၤ န့ၣ်လီၤ. တဘျီတခီၣ် လၢပတၢ်လဲၤအပူၤ ပကလဲၤခီဖျိဘၣ် ပီၣ်လဲၣ်ဂၢၢ်တပၢၢ်, တဘျီတခီၣ် လပီတဖၣ် ဟူးဝးဆှဲးဆှိး, ဒီး တဘျီတခီၣ်, ကလံၤမုၢ်တွၤ ကလီၤဝဲန့ၣ်လီၤ. 

ယသ့ၣ်နီၣ်ထီၣ်တဘျီ, ဖဲယလဲၤမၤလိတၢ်လၢ နၣ်ကးလဲ, ကိၤလၤသူကီၢ်အဆၢကတီၢ်, မ့ၢ်လၢကစၢ်ယွၤ အဘျုးအဖှိၣ်အဃိ ပဒိးန့ၢ်ပသကိး ကညီဖိလၢ အဟဲမၤလိတၢ်လၢ နၣ်ကးလဲ လၢအအိၣ်လၢ အၤဒမၤ ကီးလၢ အဘၣ်ထွဲဒီးကိၤလၤသူကီၢ်န့ၣ်လီၤ. ဖဲပမၤလိတၢ် ခံနံၣ်တနံၣ်အဆၢကတီၢ်, ယၤဒီးယသကိးအဂၤသၢဂၤ ပလဲၤပိာ်ပသကိး လၢအဟဲလၢ အၤဒမၤ တဂၤအခံ လၢအတၢ်အိၣ်တၢ်ဆိးအလီၢ်န့ၣ်လီၤ. နၣ်ကးလဲဆူ ကၤလၤကၤတါ န့ၣ် ပဘၣ်လဲၤဒိးဒီး လ့ၣ်မ့ၣ်အူ ခံနံၤခံနၤ န့ၣ်လီၤ. ဝံၤ, လၢကၤလၤကၤတါ ဆူ ကီးအၤဒမၤ န့ၣ် ပဘၣ်ဒိးထီၣ် ကဘီဖးဒိၣ် တဘ့ၣ် န့ၣ်လီၤ. ပဘၣ်ဒိးအီၤ သၢနံၤသၢနၤ မး ပလဲၤတုၤဆူ အၤဒမၤ အဝ့ၢ်ခိၣ် ဖီးဘျဲယါ န့ၣ်လီၤ. တၢ်လဲၤဆူအၤဒမၤ ဒီးတၢ်ဟဲက့ၤကဒါက့ၤ တုၤလၢ ကၤလၤကၤတါ တစု မ့ၢ်ဒၣ် ပဘၣ်ဒိးကဘီ ဒီးခီဂာ် အၤဒမၤ ပီၣ်လဲၣ်န့ၣ်လီၤ. ပလဲၤတၢ်အဆၢကတီၢ်ဂ့ၤ, ပဟဲက့ၤအဆၢကတီၢ်ဂ့ၤ တၢ်အိၣ်သး ဘၣ်လီၢ်ဘၣ်ဆး အဃိ ပတဘၣ်သဂၢၢ်ဒီး ကလံၤမုၢ်တွၤဘၣ်. ဘၣ်ဆၣ် လပီတဖၣ် ဟဲဒိဘၣ် ကဘီတလီၢ်လီၢ်အဃိ, ပဝဲလၢပတဒိးညီနုၢ် ကဘီတဖၣ်, လီၤဂာ်ဒ် ပခိၣ်မူၤဒီး ပသးကလဲၤအသိး န့ၣ်လီၤ. သၢနံၤသၢနၤ အတီၢ်ပူၤ, အိၣ်ဒၣ်လၢ ပီၣ်လဲၣ်ပူၤ ဒီးထံၣ်ဒၣ်ထဲထံန့ၣ်လီၤ. ဒီးဖဲထံၣ်ကီးဖိ တဖျၢၣ်ဂ့ၤတဖျၢၣ်ဂ့ၤ အဆၢကတီၢ် ဖျါလီၤဂာ်ဒ် တၢ်မုၢ်လၢ်အိၣ်ထီၣ် ဖဲ ကလံၤမုၢ်တွၤမ့ၢ်လီၤအခါ ကလဲၤတုၤဘၣ်ဆူ ကီးဖိတဖျၢၣ်ဂ့ၤတဖျၢၣ်ဂ့ၤ အအိၣ် လၢအချ့အဂီၢ် န့ၣ်လီၤ. 

စီၤပီလူး လဲၤမံးရှၢၣ်နရ့ၣ် အတၢ်လဲၤ သၢဘျီတဘျီ ဝံၤအလီၢ်ခံ, အဝဲဘၣ်တၢ်ဖီၣ်အီၤလၢ ဝ့ၢ်ယရူၤရှလ့ၣ် န့ၣ်လီၤ. ဝံၤအလီၢ်ခံ ဘၣ်အိၣ်ဝဲဒၣ်လၢ ကဲၤစါရံၤ အဃိၣ်ပူၤ လၢခံနံၣ်အတီၢ်ပူၤန့ၣ်လီၤ. မ့ၢ်လၢ အဝဲမ့ၢ် ရိမ့ၤ အထံဖိကီၢ်ဖိ တဂၤအဃိ, အဝဲပတံထီၣ်ဝဲလၢ ကလဲၤထံၣ်လိာ်အသးဒီး ရိမ့ၤအစီၤပၤဖးဒိၣ် လၢကီၢ်အံၤတလံၤ န့ၣ်လီၤ. ခီဖျိ လၢအတၢ်ပတံထီၣ်အဃိ, စီၤပီလူး ဘၣ်တၢ်ဆှၢအီၤဆူ ဝ့ၢ်ရိမ့ၤ လၢ ပီၣ်လဲၣ်ကျဲ တကပၤန့ၣ်လီၤ. ဘၣ်လဲၤခီဖျိဝဲ မဲးဒံးထၢၣ်ရ့နယၢၣ်ပီၣ်လဲၣ် ဒီးဘၣ်လဲၤခီဖျိဝဲ ကီးတဘျုးဖျၢၣ်မး ကလဲၤတုၤဝဲဆူ ကီၢ်အံၤတလံၤ န့ၣ်လီၤ. လဲၤလၢကျဲအခါ ဖဲကြ့တ့ၤ န့ၣ်, ဘၣ်သဂၢၢ်ဒီး ကလံၤမုၢ်ဖးဒိၣ် အဃိ ကဘီအံၤ ဟးဂီၤကွံာ်ဝဲန့ၣ်လီၤ. 

စီၤပီလူး အကဘီဘၣ်သဂၢၢ်ဒီး ကလံၤမုၢ်ဒီးဟးဂီၤဝဲအံၤ ပကထံၣ်ဘၣ်အီၤလၢ လံာ်မၤတၢ် ၂၇း၁၃-၁၅ န့ၣ်လီၤ. ဘၣ်ဃး ဒီး ကဘီအတၢ်ဘၣ်သဂၢၢ်ဒီးကလံၤမုၢ် ဒီး ကဘီအတၢ်ဟးဂီၤအံၤ ပကမၤလိ တၢ်ဂ့ၢ်လၢအမ့ၢ် ပသးသမူကဘီ သုတဟးဂီၤတဂ့ၤအဂီၢ် တၢ်လၢပကဘၣ်မၤအီၤ မ့ၢ်တၢ်မနုၤတဖၣ်လဲၣ် န့ၣ်လီၤ. 

၁. အိၣ်ဒီးတၢ်သူၣ်စူၤသးစူၤ

ဒီးစံးဘၣ်အီၤ, ပှၤကညီသ့ၣ်ဧၢ, ယသ့ၣ်ညါလၢ ပလဲၤတၢ်လၢ ပီၣ်လဲၣ်အံၤ, ကအိၣ်ဒီး တၢ်ဟးဂူာ်ဟးဂီၤ, ဒီးတၢ်ဟါမူၤဟါမၢ် အါအါကလဲာ်, ထဲကဘီ, ဒီးတၢ်ဖိတၢ်လံၤဧိၤတမ့ၢ်ဘၣ်. မ့ၢ်လၢ ပသးတဖၣ်စ့ၢ်ကီးလီၤ. (မၤတၢ် ၂၇း၁၀)

ပကထံၣ်ဘၣ်ဖဲအံၤ, စီၤပီလူး မ့ၢ်ဃိၣ်ဖိတဂၤ လၢအအိၣ်လၢကဘီပူၤ လၢကလဲၤဆူ ဝ့ၢ်ရိမ့ၤ, ဒီးဟးထီၣ်လၢ ကီၢ်ပၤလၤစတဲၣ် န့ၣ်လီၤ. အဝဲသ့ၣ် လဲၤခီဂာ် ပီၣ်လဲၣ်ဖးဒိၣ် မဲၤဒံၤထၢၣ်ရ့နယၢၣ် ဒီး ပာ်လီၤ ကဘီအနီၣ်သက့ၤ လၢကြ့ၤတ့ၤ လၢအမ့ၢ်ကီးဖးဒိၣ်တဖျၢၣ် န့ၣ်လီၤ. ကစၢ်ယွၤတဲဘၣ် စီၤပီလူး လၢ ကတဲဘၣ် ပှၤကဘီဖိတဖၣ် ဒ်သိး အသုတဟးထီၣ်လၢ ကဘီသန့တဂ့ၤ, မ့ၢ်လၢ ကလံၤမုၢ်ဖးဒိၣ် ကလီၤဝဲအဃိ န့ၣ်လီၤ. ဘၣ်ဆၣ် ပှၤကဘီဖိတဖၣ် တဒိကနၣ်စီၤပီလူး အကလုၢ်ဘၣ်. လၢတၢ်န့ၣ်အဃိ, လီၢ်ခံကတၢၢ် အကဘီဟးဂီၤကွံာ်ဝဲန့ၣ်လီၤ. 

ဘၣ်မနုၤတၢ်ကဲထီၣ်အသး ဒ်အံၤလဲၣ်. မ့ၢ်လၢ အဝဲသ့ၣ်တဖၣ် တအိၣ်ဒီး တၢ်သူၣ်စူၤသးစူၤ ဘၣ် အဃိန့ၣ်လီၤ. အဝဲသ့ၣ်အိၣ်ဒီးတၢ်ရဲၣ်တၢ်ကျဲၤလၢ ကဘၣ်လူၤပိာ်ထွဲဝဲန့ၣ်လီၤ. (မၤတၢ် ၂၇း၉-၁၂). တၢ်မၤလိဖဲအံၤန့ၣ် မ့ၢ်ဝဲ, ဖဲတၢ်သူၣ်စူၤသးစူၤ တအိၣ်ဒီးပှၤအခါ, ပညီနုၢ်ကတၢၢ်ဒၣ်လၢ ကလံၤမုၢ်တွၤ အပူၤန့ၣ်လီၤ. 

တၢ်အိၣ်ဖှိၣ်သရၣ်တဂၤကွဲးဝဲ, "ယကတိၤတၢ်ဒီး ပှၤလၢ အအိၣ်ဒီးတၢ်ကီတၢ်ခဲလၢ အတၢ်အိၣ်မူအပူၤ တဘျုးဂၤ, တနီၤနီၤ အသးတစူၤလၢကဘၣ်အိၣ်ခိးတုၤ တၢ်တ့တၢ်ဖျီဝံၤတစုဘၣ်, တနီၤနီၤ အသးတစူၤလၢ ကဘၣ်အိၣ်ခိးတၢ်မၤအသီဘၣ်, ဒီးတနီၤနီၤ အသးတစူၤလၢ ကဘၣ်ခိးကနၣ် မ့ၢ်ကဘၣ်သုးအလီၢ်အခါဖဲလဲၣ် န့ၣ်ဘၣ် လီၤ. အဝဲသ့ၣ်တဟံးန့ၢ်တၢ်ဆၢကတီၢ် လၢ ကဃ့တၢ်ဟ့ၣ်ကူၣ်လၢ ကစၢ်ယွၤအအိၣ်ဘၣ် အဃိ, အဝဲသ့ၣ် လဲၤတဘျီဃီဆူ ကလံၤမုၢ်တွၤ အအိၣ်န့ၣ်လီၤ." 

နသးမ့ၢ်တစူၤလၢ နကအိၣ်ခိး ယွၤအတၢ်ဃုထၢ နသးသမူအတံၤသကိးလၢ နဂီၢ်ဘၣ်န့ၣ်, လီၢ်ခံကတၢၢ် နကတုၤဆူ ပှၤကမၣ် တဂၤအစုပူၤ, ဒီးနသးသမူ ဒီတစိၤညါ ကပှဲၤဒီး တၢ်သးဘၣ်ဖှီၣ် န့ၣ်လီၤ. လၢနဟံၣ်ဖိဃီဖိ အကျိၣ်အစ့အဂီၢ်, နတၢ်ဆၢတဲာ်မ့ၢ်တပၣ်ဒီး ကစၢ်ယွၤဘၣ်န့ၣ်, လီၢ်ခံကတၢၢ် နကအိၣ်ပှဲၤဒီး ဒ့ၣ်ကမၣ်တဖၣ် လၢ အနံၣ်တဖၣ်အပူၤန့ၣ်လီၤ. တဘျီတခီၣ် ဖဲကစၢ်ယွၤတဲ "တသ့ဘၣ်" အဆၢကတီၢ်န့ၣ်, အခီပညီတမ့ၢ် "နီတဘျီဘၣ်" ဘၣ် န့ၣ်လီၤ. တၢ်လၢအတဲဝဲန့ၣ် "တမ့ၢ်ခဲအံၤဒံးဘၣ်" န့ၣ်လီၤ. ဒီးတၢ်လၢ ကစၢ်ယွၤပာ်ဃာ်လၢ နဂီၢ်န့ၣ်, အိၣ်ဝဲအါမး ဒီး ဂ့ၤလၢနဂီၢ်, အဃိ ဂ့ၤလၢ နအိၣ်ခိးအီၤ န့ၣ်လီၤ. 

အဃိ ပကမ့ၢ်ပှၤလၢ အအိၣ်ဒီးတၢ်သူၣ်စူၤသးစူၤ တက့ၢ်. ဒ်လံာ် ထါစံးထီၣ်ပတြၢၤ ၃၇း၃၄ စံးဝဲအသိး, "မုၢ်လၢ်တၢ်လၢယွၤ, ဒီးတိၢ်န့ၢ်အကျဲတက့ၢ်. ဒီးကပာ်ထီထီနၤ, ဒ်သိးနကန့ၢ်ဘၣ်သါ ထံဧိၤကီၢ်ဧိၤန့ၣ်လီၤ." မ်ပကမ့ၢ်ပှၤလၢ အမုၢ်လၢ်တၢ်လၢယွၤ ဒီး အိၣ်ခိး ကနၣ် ကစၢ်ယွၤ ကစံးဘၣ်နၤ ဒ်လဲၣ်ဒ်လဲၣ်, ဒီးမၤထွဲအီၤန့ၣ်တက့ၢ်. 

 

၂. ဒိကနၣ်ယွၤအကလုၢ်

ဘၣ်ဆၣ်ဒီး ပှၤသုးဖိ တကယၤအခိၣ်, နာ်ကဘီခိၣ် ဒီးကဘီကစၢ် အါန့ၢ်တၢ်လၢ စီၤပီလူးကတိၤဝဲ တက့ၢ်လီၤ. (မၤတၢ် ၂၇း၁၁)

ဖဲလံာ်မၤတၢ် ၂၇း၁၁ အပူၤ ပကထံၣ်ဘၣ် တၢ်ဂ့ၢ်ခံခါ ဒ်သိးပကသ့ ဟးဆှဲး သးသမူကဘီ အတၢ်ဟးဂီၤ ဒ်လဲၣ်န့ၣ်လီၤ. (၁) တဘၣ်ဟံးတၢ်ဟ့ၣ်ကူၣ်လၢ ပှၤဟ့ၣ်ကူၣ်ကမၣ်နၤ တၢ်အအိၣ်တဂ့ၤ, ပှၤလၢအစံးလီၤအသးလၢ အသ့အဘၣ်ထဲလဲၣ်ထဲလဲၣ် ဘၣ်ဆၣ်, အတၢ်ဟ့ၣ်ကူၣ်ကမၣ်သ့ဝဲ န့ၣ်လီၤ. လံာ်မၤတၢ်တဲဘၣ်ပှၤလၢ "ပှၤသုးဖိ တကယၤအခိၣ်, နာ်ကဘီခိၣ် ဒီးကဘီကစၢ် အါန့ၢ် တၢ်လၢစီၤပီလူး ကတိၤဝဲ တက့ၢ်လီၤ." ဖဲအံၤ ပကထံၣ်ဘၣ်လၢ ကဘီကစၢ်န့ၣ် မ့ၢ်ပှၤသ့ပှၤဘၣ်လၢ တၢ်ကူၣ်လဲၤမၤကၤ တကပၤ, ဒီး ကဘီခိၣ်န့ၣ် မ့ၢ်ပှၤသ့ပှၤဘၣ်လၢ တၢ်လဲၤလၢထံတကပၤ န့ၣ်လီၤ. ဘၣ်ဆၣ်သနာ်က့, ပှၤခံဂၤလၢာ်န့ၣ် တသ့ၣ်ညါ တနၢ်ဟူ ကစၢ်ယွၤအကလုၢ်ဘၣ်. ပှၤလၢ အဖျိးစိလၢ တၢ်ကူၣ်ဘၣ်ကူၣ်သ့တကပၤတဖၣ်, ကဟုကယာ်နၤလၢ နနီၢ်သး အတၢ်ဒိၣ်ထီၣ် တသ့ဘၣ်. 

ဖဲနလိၣ်ဘၣ် တၢ်ကဟုကယာ်နၤလၢ နနီၢ်သးအတၢ်ဒိၣ်ထီၣ်အဆၢကတီၢ် မ့ၢ်နကလဲၤဖဲလဲၣ်. 

လံာ် ၁သ့းစၤလနံ ၅း၁၂-၁၃ စံးဝဲ -

ဒီးပုၢ်သ့ၣ်ဝဲၢ်သ့ၣ်ဧၢ, ပှၤလၢအမၤတၢ်လၢ သုကျါ, ဒီးအိၣ်လၢ သုဖီခိၣ် လၢကစၢ်အပူၤ, ဒီးသိၣ်က့ၤသီက့ၤ သုတဖၣ်န့ၣ်, ပဃ့ကညးသုဒ်သိး သုကသ့ၣ်ညါအီၤ, ဒီးပာ်ဒိၣ်အီၤလၢ တၢ်အဲၣ်တၢ်ကွံအပူၤ လၢအမၤတၢ်အဃိ ဒိၣ်မးလီၤ. ဒီးအိၣ်ဃူလိာ်ဖိးလိာ် သုသးသကိးသကိး တက့ၢ်. 

နဘၣ်လဲၤဆူ ခိၣ်နၢ်လၢ အမၤကစၢ်ယွၤအတၢ်မၤတဖၣ်အအိၣ်, ခိၣ်နၢ်လၢ နအဲၣ်အီၤ ဒီး နပာ်ကဲအီၤ အအိၣ်န့ၣ်လီၤ. 

(၂) သ့ၣ်နီၣ်ထီၣ်လၢ တဘျီတခီၣ် ပှၤအါဂၤ အတၢ်ဆၢတဲာ်န့ၣ် ကမၣ်သ့စ့ၢ်ကီးလီၤ. မၤတၢ် ၂၇း၁၂ စံးဘၣ်ပှၤလၢ ပှၤကူၣ်ထီၣ်ဖးလီၤဝဲ အါတက့ၢ်, လၢအကဟးထီၣ်ကွံာ်ဖဲန့ၣ်စ့ၢ်ကီး, ဒီးမ့ၢ်သ့ ဒီးကလဲၤတုၤလၢ ဖံၤနံက့ၤ, ဒ်သိး အကအိၣ်ဖဲန့ၣ်လၢ တၢ်ဂိၢ် အကတီၢ်လီၤ. ဖဲန့ၣ်ပကထံၣ်ဘၣ်လၢ, ပှၤအါဂၤ အတၢ်ဘၣ်သးန့ၣ် ကမၣ်သ့စ့ၢ်ကီးလီၤ. 

ဖဲစီၤမိၤရှ့စးထီၣ်ဆှၢ ပှၤအံၣ်စရ့လးဖိ ဆူကီၢ်တၢ်စံးပာ် အဆၢကတီၢ် တၢ်ကဲထီၣ်အသးဒ်လဲၣ်. ပှၤအါဂၤ အဲၣ်ဒိးက့ၤက့ၤဆူ ကီၢ်အဲၤကူပတူး အပူၤန့ၣ်လီၤ. ဘၣ်ဆၣ်, အဝဲသ့ၣ် အတၢ်ပာ်သးန့ၣ် ကမၣ်ဝဲဒၣ် န့ၣ်လီၤ. လၢတၢ်န့ၣ်အဃိ, အဝဲသ့ၣ်ဘၣ်တူၢ်တၢ်လၢ ပှၢ်မုၢ်ကနၢအပူၤ န့ၣ်လီၤ. ဖဲပပိာ်ပှၤဂၤအတၢ်ဟ့ၣ်ကူၣ်, ဒီးဖဲပမၤထွဲဒ် ပှၤအါဂၤ မၤဝဲအသိးအဆၢကတီၢ်န့ၣ်, ပကမၣ် သ့ဝဲန့ၣ်လီၤ. လၢတၢ်န့ၣ်အဃိ, ဒိကနၣ်ကစၢ်ယွၤအကလုၢ် တက့ၢ်, ဒီး နတၢ်လဲၤကျဲ တကမၣ်ဝဲနီတဘျီဘၣ်. 

၃. ပျဲယွၤပၢဆှၢနတၢ်အိၣ်မူ

ဒီးတုၤကလံၤဟဲထီၣ်လၢ ကလံၤထံးသြီသြီဒီး, ဆိကမိၣ်ဝဲလၢ အလဲၤတၢ်ဒ် အကူၣ်ပာ်ဝဲအသိးကသ့ သတးဒီး, ထုးထီၣ် နီၣ်သက့ၤ, ဒီးလဲၤဘူးဝဲဒီး ကြ့တ့ၤအသရ့ၤလီၤ. (မၤတၢ် ၂၇း၁၃)

ထဲတၢ်အိၣ်သးတမံၤဧိၤ ပၢဆှၢ နတၢ်အိၣ်မူ တသ့ဘၣ်. မၤတၢ် ၂၇း၁၃-၁၅ စံးဘၣ်ပှၤ - 

ဒီးတုၤကလံၤဟဲထီၣ်လၢ ကလံၤထံးသြီသြီဒီး, ဆိကမိၣ်ဝဲလၢ အလဲၤတၢ်ဒ် အကူၣ်ပာ်ဝဲအသိး ကသ့သတး ဒီး, ထုးထီၣ်နီၣ်သက့ၤ, ဒီးလဲၤဘူးဝဲဒီး ကြ့တ့ၤ အသရ့ၤလီၤ. ဘၣ်ဆၣ်ဒီး တယံာ်တမီၢ်ဘၣ်ဒီး, ကလံၤမုၢ်သဝံး, ကိးဝဲလၢ အူၤရကျူဒိၣ်, ဟဲထီၣ်ဘၣ်အီၤလီၤ. ဒီးတုၤကဘီဘၣ်ဝဲဒီး, စါကလံၤတသ့ဘၣ်ဒီး ပပျဲတၢ်, ဒီးလဲၤထွဲ အခံလီၤ. 

ပမ့ၢ်ကွၢ်လၢ အဲကလံးကျိာ်န့ၣ် "ကလံၤဟဲထီၣ်လၢ ကလံၤထံးသြီသြီ" န့ၣ် ပထုးထီၣ်အခီပညီသ့လၢ ကလံၤဟဲထီၣ်လၢ ကလံၤထံးကဖီလီ န့ၣ်လီၤ. ကလံၤဖိဟဲအူဝဲဒၣ် ကဖီလီ အဃိ ပှၤဒိးကဘီအါဂၤ ဆိကမိၣ်ဝဲလၢ စးထီၣ် အတၢ်လဲၤသ့လီၤ. ဘၣ်ဆၣ် ပသ့ၣ်ညါသ့လၢ, ပမ့ၢ်တကနၣ် ကစၢ်ယွၤ အကလုၢ်န့ၣ် လီၤဂာ်ဒ်သိးပကဲ ပှၤအပျုၢ်, ဖဲ နထံၣ်လၢ တၢ်အိၣ်သး ဘၣ်ဘျီးဘၣ်ဒါဝဲ အဆၢတီၢ်ဒၣ်လဲာ်န့ၣ်လီၤ. အခဲအံၤ, လၢနဂီၢ် တၢ်ခဲလၢာ်ခဲဆ့ ဘၣ်လီၢ်ဘၣ်ဆးဝဲ ဘၣ်ဆၣ် ဖဲနလဲၤတၢ်အဆၢကတီၢ် နလဲၤအီၤလိၤလိၤဆူ ကလံၤမုၢ်တွၤ အကျါ သ့ဝဲန့ၣ်လီၤ. နကတဲလီၤနသးလၢ "ယတၢ်ဆၢတဲာ် ကဘၣ်မ့ၢ်တၢ်လၢအဂ့ၤလီၤ, မ့ၢ်လၢ ယတူၢ်ဘၣ်လၢ အဂ့ၤစ့ၢ်ကီးလီၤ." ပတၢ်တူၢ်ဘၣ်, ပတၢ်ကလၢၣ်ဘၣ် တဖၣ်, လီအီၣ်ပှၤသ့ဝဲန့ၣ်လီၤ. ဖဲကစၢ်ယွၤစံးဘၣ်နၤ, "အိၣ်ခိးလၢ ကဘီသန့တက့ၢ်" အခါ ကြၢးလၢ နအိၣ်ခိးန့ၣ်လီၤ. မ့တမ့ၢ်ဘၣ်ဒီး မုၣ်ကီၤလံၢ် ကသုးကျဲၤ တၢ်အိၣ်သးလၢ အတဂ့ၤတဘၣ်တဖၣ် လၢနမဲာ်ညါ လၢပီၣ်လဲၣ်ပူၤန့ၣ်လီၤ. 

လၢတၢ်န့ၣ်အဃိ, ဖဲနအိၣ်ဒီး တၢ်ဆၢတဲာ်လၢ အရ့ဒိၣ်လၢ နတၢ်အိၣ်မူအပူၤန့ၣ် သ့ၣ်နီၣ်ထီၣ်က့ၤလံာ်စီဆှံ အဆၢလၢလာ်အံၤတက့ၢ်. 

လံာ်ထါစံးထီၣ်ပတြၢၤ ၅း၈

ယွၤဧၢ, ဆှၢယၤလၢ နတၢ်တီတၢ်လိၤ အပူၤလၢ ယဒုၣ်ယဒါ အဃိန့ၣ်တက့ၢ်. မၤလိၤနကျဲလၢ ယမဲာ်ညါတက့ၢ်. 

လံာ်ထါစံးထီၣ်ပတြၢၤ ၂၅း၅

ဒုးလဲၤယၤလၢ နတၢ်မ့ၢ်တၢ်တီအပူၤ, ဒီးသိၣ်လိယၤတက့ၢ်. အဂ့ၢ်ဒ်အံၤ, နမ့ၢ်တၢ်အုၣ်က့ၤခီၣ်က့ၤ ယၤအကစၢ်လီၤ. ယအိၣ်ခိးနၤသ့တနံၤ ကျၢၤလီၤ. 

လံာ်ထါစံးထီၣ်ပတြၢၤ ၂၇း၁၁

ယွၤဧၢ, ဒုးနဲၣ်ယၤလၢနကျဲ, ဒီးဆှၢယၤလၢကျဲလိၤတဘိအပူၤလၢ ယဒုၣ်ယဒါ အဃိန့ၣ်တက့ၢ်. 

လံာ်ထါစံးထီၣ်ပတြၢၤ ၁၄၃း၁၀

ဒ်သိးယကမၤတၢ်လၢ အဘၣ်နသးဒီး, သိၣ်လိယၤတက့ၢ်. အဂ့ၢ်ဒ်အံၤ, နမ့ၢ်ယကစၢ် လီၤ. မ်နသး လၢအဂ့ၤ န့ၣ်ဆှၢယၤဆူ ကီၢ်အတီအလိၤ တက့ၢ်. 

ဖဲနဘါထုကဖၣ်ဒ် လံာ်ထါစံးထီၣ်ပတြၢၤ အဆၢဖိတဖၣ်အံၤ အသိးန့ၣ်, ကစၢ်ယွၤကဆှၢနၤဆူ ကျဲလၢ အဘၣ် န့ၣ်လီၤ. 

တၢ်ကတိၤလၢခံ

ဖဲစီၤမိၤရှ့ဆှၢ ပှၤအံၣ်စရ့လးဖိ ဖဲအဘူးကတုၤလၢ ကီၢ်တၢ်စံးပာ် အဆၢကတီၢ်, စီၤမိၤရှ့ဆှၢလီၤ ပှၤကွၢ်ဟုၣ်တၢ်, တၢ်မဲာ်ချံ, တဆံခံဂၤ လၢ ကလဲၤကွၢ်ဟုၣ် ကီၢ်ဒီတဘ့ၣ်ညါ အတၢ်အိၣ်သးန့ၣ်လီၤ. ပှၤတဆံခံဂၤ န့ၣ်လဲၤကွၢ်ဟုၣ် ကီၢ်တၢ်စံးပာ်အံၤလၢ အနံၤလွံၢ်ဆံ အတီၢ်ပူၤန့ၣ်လီၤ. ကွၢ်ဟုၣ်ဝဲဝံၤဒီး ဟဲက့ၤတီၣ်ဖျါထီၣ်တၢ်လၢ အထံၣ်ဝဲတဖၣ်န့ၣ်လီၤ. 

ပှၤတဆံခံဂၤအကျါ အဂၤတဆံ ပာ်ဖျါထီၣ်ဝဲ - 

ဒီးစံးဘၣ်တဲဘၣ်အီၤ, ဒီးစံးဝဲဒၣ်, ပလဲၤနုာ်ကီၢ်န့ၣ်ဖဲ နမၢပလဲၤ, ဒီးယွၤမးဝဲဒီး တၢ်နုၢ်ထံဒီးကနဲစီ လီၤ. ဒီးအဝဲအံၤမ့ၢ် အတၤသၣ်လီၤ. ဘၣ်ဆၣ်ဒီး ပှၤဂီၢ်မုၢ်လၢအအိၣ်ဝဲဆိးဝဲလၢကီၢ်ပူၤ န့ၣ် အဂံၢ်အဘါဆူၣ်, ဒီးအဝ့ၢ်တဖၣ်အိၣ်ဒီး အခိၣ်ဒူ, ဒိၣ်မး, ဒီးပထံၣ်ဘၣ်စ့ၢ်ကီး စီၤဧနး အဖိအလံၤ ဖဲန့ၣ်လီၤ. (၄မိၤရှ့ ၁၃း၂၇-၂၈)

ပှၤတဆံခံဂၤအကျါ ခံဂၤလၢအမ့ၢ် စီၤယိၤရှူဒီးစီၤကၤလ့း ပာ်ဖျါထီၣ် -

မ်ပလဲၤထီၣ်တဘျီဃီဒီး မၤန့ၢ်အီၤတက့ၢ်. အဂ့ၢ်ဒ်အံၤ, ပမၤနၢၤမၤဃၣ်အီၤသ့ကစီဒီလီၤ. (၄မိၤရှ့ ၂၃း၃၀)

ပှၤအဂၤတဆံတဲလၢ ပလဲၤဒုးအဝဲသ့ၣ်တန့ၢ်ဘၣ်. မ့မ့ၢ်ပှၤထဲခံဂၤ တဲဝဲလၢ ပလဲၤဒုးအဝဲသ့ၣ်န့ၢ်ကစီဒီ, ခီဖျိလၢယွၤအဂံၢ်အဘါအဃိန့ၣ်လီၤ. 

ပှၤဂီၢ်မုၢ် ကဒိကနၣ် ပှၤဖဲလဲၣ်တဖုအကလုၢ်လဲၣ်. ပှၤအဂၤတဆံအကလုၢ်, မ့တမ့ၢ် ပှၤခံဂၤ အကလုၢ်လဲၣ်. ပမ့ၢ်အိၣ်ဘၣ်ဖဲအဆၢကတီၢ်ဖဲန့ၣ် ပကဒိကနၣ်စ့ၢ်ကီး ပှၤအဂၤတဆံအကလုၢ်လီၤ. မ့ၢ်လၢ အနီၣ်ဂံၢ် အါဝဲအဃိန့ၣ်လီၤ. 

ဘၣ်ဆၣ် ပှၤခံဂၤအကလုၢ်န့ၣ် အိၣ်ဒီး တၢ်စိတၢ်ကမီၤ မ့ၢ်လၢ အမ့ၢ်တၢ်ကတိၤလၢ ကစၢ်ယွၤအခၢၣ်စး အဃိန့ၣ်လီၤ. 

ဒိကနၣ်ကစၢ်ယွၤအကလုၢ်တက့ၢ်, ဖဲကစၢ်ယွၤတဲအိၣ်ခိးအခါ အိၣ်ခိးအီၤ တက့ၢ်. မ့တမ့ၢ်ဘၣ်ဒီး နကလဲၤနုာ်လီၤဘၣ်ဆူ ကလံၤမုၢ်တွၤအပူၤန့ၣ်လီၤ. ပျဲယွၤပၢဆှၢနတၢ်အိၣ်မူတက့ၢ်. ဒီးယွၤကဟ့ၣ်နၤ တၢ်မၤနၢၤလၢ နတၢ်အိၣ်မူအပူၤန့ၣ်လီၤ. 

မ်ယွၤဆိၣ်ဂ့ၤအကလုၢ်ကထါ ဒီးဆိၣ်ဂ့ၤပဝဲကိးဂၤဒဲးတက့ၢ်.