ဖိသၣ်မ့ၢ်တၢ်န့ၢ်သါဟဲလၢယွၤ (စံးထီၣ်ပတြၢၤ ၁၂၇း၃-၅)

 

ကွၢ်ကွၢ်, ပဖိပလံၤန့ၣ်မ့ၢ် တၢ်န့ၢ်သါလၢယွၤလီၤ. ဒီးပှၤဒၢလီၢ်အတၤသၣ်န့ၣ် မ့ၢ်တၢ်အဘူးအလဲလီၤ. ဒ်ပျၢ်ဧိၤစၤဧိၤ အိၣ်လၢ ပှၤအဆူၣ် အစုပူၤအသိးန့ၣ် ပှၤသးစၢ်အဖိ မ့ၢ်ဒ်န့ၣ် အသိးလီၤ. ပှၤလၢအလၢပီၤပှဲၤဒီး အီၤန့ၣ် ဘၣ်ဆိၣ်ဂ့ၤဝဲလီၤ. တုၤအကတိၤတၢ်ဒီး အဒုၣ်အဒါလၢ ပဲတရီပူၤဒီး, အမဲာ်တဆှးဘၣ်လီၤ. (စံးထီၣ်ပတြၢၤ ၁၂၇း၃-၅)

တၢ်ကတိၤလၢညါ

တနွံအံၤ မုၢ်အိၣ်ဘှံးနံၤ ဟီၣ်ခိၣ်ဒီဘ့ၣ် ပာ်ပနီၣ်ဝဲလၢအမ့ၢ် ဖိသၣ်မုၢ်နံၤန့ၣ်လီၤ. ဒ်အမ့ၢ်ဖိသၣ်အမုၢ်နံၤ အသိး, တၢ်ကစီၣ်လၢပကမၤလိသကိး အခဲအံၤ အခိၣ်တီမ့ၢ်ဝဲ, "ဖိသၣ်မ့ၢ်တၢ်န့ၢ်သါဟဲလၢယွၤ" န့ၣ်လီၤ. လၢလံာ်စီဆှံ အပူၤဖိသၣ်အိၣ်တဘျုးဂၤလၢ တၢ်ပာ်ဖျါထီၣ်လၢ အဂ့ၢ်န့ၣ်လီၤ. ကစၢ်ခရံာ်အနီၢ်ကစၢ်ဒၣ်ဝဲ, ဖဲအဟးစံၣ်တဲၤတဲလီၤတၢ် အဆၢကတီၢ် သိၣ်လိပှၤဂီၢ်မုၢ်တဖၣ် ခီဖျိ ဟံးန့ၢ်တၢ်အဒိအတဲာ်လၢ ဖိသၣ်န့ၣ်, အိၣ်ဝဲစ့ၢ်ကီးန့ၣ်လီၤ. 

ပကကွၢ်အဒိဖဲ မးသဲ ၁၈း၂-၅ -

ဒီးယ့ၣ်ရှူးကိးန့ၢ်ဖိသၣ် တဂၤဆူအအိၣ်, ဒီးပာ်လီၤအီၤလၢ အဝဲသ့ၣ်အသးကံၢ်ပူၤ, ဒီးစံးဝဲဒၣ်, ယစံးဘၣ်တဲဘၣ်သုတီတီအံၤ, သုမ့ၢ်တဃၣ်က့ၤဘၣ်သုသး, ဒီးကဲထီၣ်ဒ်ဖိသၣ် အသိးဘၣ်ဒီး, သုတလဲၤနုာ်ဘၣ်ဆူ မူခိၣ်အဘီအမုၢ်အပူၤ လ့ၤတက့ၤဘၣ်. မၤသးဒ်န့ၣ်ဒီး ဖဲဒၣ် ပှၤလၢအဆီၣ်လီၤအသးဒ် ဖိသၣ်တဂၤအံၤ အသိးန့ၣ်, အဝဲဒၣ်မ့ၢ်အဒိၣ်ကတၢၢ်လၢ မူခိၣ်အဘီအမုၢ်အပူၤ လီၤ. ဒီးဖဲဒၣ်ပှၤလၢ အတူၢ်လိာ်ဖိသၣ်ဒ်အံၤ အသိးတဂၤလၢ ယမံၤအဃိ တဂၤဂၤန့ၣ်, မ့ၢ်အတူၢ်လိာ်ယၤလီၤ. (မးသဲ ၁၈း၂-၅)

တကးဒံးဘၣ်, ဖိသၣ်တဖၣ် ကစၢ်ခရံာ်ဒိလီၤအီၤလၢ မူခိၣ်အဘီဖိမုၢ်ဖိန့ၣ်လီၤ. 

ဘၣ်ဆၣ်ဒီး ယ့ၣ်ရှူးကိးအီၤ ဒီးစံးဝဲဒၣ်, ဒုးဟဲဖိသၣ် တဖၣ်န့ၣ်ဆူယအိၣ်ဒီး တြီအီၤတဂ့ၤ. အဂ့ၢ်ဒ်အံၤ, ယွၤအဘီအမုၢ်န့ၣ် မ့ၢ်ပှၤဒ်န့ၣ်အသိးလီၤ. (လူၤကၣ် ၁၈း၁၆)

ဖိသၣ်န့ၣ် မ့ၢ်မူခိၣ်ဘီမုၢ်ဖိတဖၣ်န့ၣ်လီၤ. တကးဒံးဘၣ်, ဖိသၣ်မ့ၢ် ယွၤအတၢ်ဟ့ၣ်လၢ မိၢ်ပၢ် တဖၣ်အဂီၢ်န့ၣ်လီၤ. ဘၣ်ထွဲဒီး လံာ်စီဆှံလၢပဖးထီၣ်အီၤလၢ အမ့ၢ် ထါစံးထီၣ်ပတြၢၤ ၁၂၇း၃-၅ အပူၤအံၤ ပကမၤလိသကိး ဘၣ်ဃး တၢ်ဂ့ၢ်သၢမံၤ လၢအမ့ၢ် -

၁. ဖိသၣ်မ့ၢ်ယွၤအတၢ်ဟ့ၣ်

၂. ဖိသၣ်လီၤဂာ်ပျၢ်ဧိၤစၤဧိၤလၢပဘၣ်ကျ့အီၤဒီးပညိၣ်အီၤ

၃. ဖိသၣ်မ့ၢ်ဟံၣ်ဃီအတၢ်ဂံၢ်တၢ်ဘါ န့ၣ်လီၤ.

၁. ဖိသၣ်မ့ၢ်ယွၤအတၢ်ဟ့ၣ်

ကွၢ်ကွၢ်, ပဖိပလံၤန့ၣ် မ့ၢ်တၢ်န့ၢ်သါလၢယွၤလီၤ. ဒီးပှၤဒၢလီၢ် အတၤသၣ်န့ၣ် မ့ၢ်တၢ်အဘူးအလဲလီၤ. (စံးထီၣ်ပတြၢၤ ၁၂၇း၃)

ပမ့ၢ်ကွၢ်လံာ်စီဆှံတဆၢအံၤ, ပကထံၣ်ဘၣ်လၢ ဖိသၣ်န့ၣ် ဟဲလိၤလိၤလၢ ကစၢ်ယွၤအအိၣ်န့ၣ်လီၤ. ဖိသၣ်တဖၣ် မ့ၢ်တၢ်ဟ့ၣ်လၢအဟဲလၢ မူခိၣ်ဘီမုၢ်ဆူ ဟီၣ်ခိၣ်ချၢန့ၣ်လီၤ. လံာ်စီဆှံတဲဘၣ်ပှၤလၢ ကစၢ်ယွၤဟံးန့ၢ်မူဒါ လၢလၢပှဲၤပှဲၤ ဖဲဖိသၣ် အိၣ်လၢ အမိၢ်အဒၢလီၢ်ပူၤအခါ လံၤလံၤန့ၣ်လီၤ. 

ဒီးယွၤကနၣ်နီၢ်လ့ၤအၤအကလုၢ်, ဒီးအဝဲဒၣ်ဒၢထီၣ်ဝဲ, ဒီးဆံးစၢ်န့ၢ်အဖိခွါလၢ စီၤယၤကိာ်အဂီၢ်ယဲၢ်ဂၤတဂၤ လီၤ. (၁မိၤရှ့ ၃၀း၁၇)

ဒီးကျ့ထီၣ်အမဲာ်, ဒီးထံၣ်ပိာ်မုၣ် ဒီးအဖိတဖၣ်, ဒီးစံးဝဲဒၣ်, ပှၤအိၣ်ဒီးနၤန့ၣ် မ့ၢ်မတၤတဖၣ်လဲၣ်. ဒီးစံးဝဲဒၣ်, ဖိသၣ်တဖၣ်လၢ ယွၤဟ့ၣ်သးကညီၤ နကုၢ်နပှၤလီၤ. (၁မိၤရှ့ ၃၃း၅)

ဒီးစီၤယိၤသးစံးဘၣ်အပၢ်, မ့ၢ်ယဖိခွါလၢ ယွၤဟ့ၣ်လီၤယၤဖဲအံၤလီၤ. ဒီးစံးဝဲဒၣ်, ဟဲစိာ်လၢ်အီၤဆူ ယအိၣ်တက့ၢ်. ဒီးယကဆိၣ်ဂ့ၤအီၤလီၤ. (၁မိၤရှ့ ၄၈း၉)

ဒီးကအဲၣ်နၤ, ဒီးဆိၣ်ဂ့ၤနၤ, ဒီးမၤအါထီၣ်နၤလီၤ. ဒီးကဆိၣ်ဂ့ၤ နဒၢလီၢ်အသၣ်, ဒီးနဟီၣ်ခိၣ်အတၤသၣ်, နဘုဧိၤဟုဧိၤ, ဒီးနစပံးထံ, ဒီးနသိ, နဂီၤဖံးအထီၣ်ဖိ, ဒီးနသိအထီၣ်ဖိလၢ ထံဧိၤကီၢ်ဧိၤအပူၤ လၢအဆိၣ်တၢ်ဒီး နပၢ်တဖၣ် လၢ အကဟ့ၣ်လီၤနၤလီၤ. (၅မိၤရှ့ ၇း၁၃)

ဖိသၣ်မ့ၢ်တၢ်န့ၢ်သါဟဲလၢယွၤ, ဒီးမ့ၢ်ကျဲတဘိလၢ ပကထုးထီထီၣ် ပဟံၣ်ဖိဃီဖိ ဆူစိၤလၢကဟဲ ခါဆူညါ အဂီၢ်န့ၣ်လီၤ. ပဝဲအါဒံအါဂၤ, ပလိၣ်ဘၣ်လၢ ပှၤကသ့ၣ်နီၣ်ထီၣ်ပှၤ ဖဲပလဲၤပူၤကွံာ်ဟီၣ်ခိၣ်ဝံၤအလီၢ်ခံ န့ၣ်လီၤ. နမ့ၢ်ကဲမိၢ်ပၢ်န့ၣ်, ဖဲနလဲၤပူၤကွံာ်ဟီၣ်ခိၣ်ဝံၤအလီၢ်ခံ နဖိတဖၣ် ကသ့ၣ်နီၣ်နၤန့ၣ်လီၤ. 

ပှၤဒီမါဝၤ အိၣ်ဝဲအါဂၤ လၢမၤန့ၢ်အဖိတသ့ဘၣ်, ခီဖျိလၢ တၢ်ဂ့ၢ်အါမံၤအဃိ န့ၣ်လီၤ. ဘၣ်ဆၣ် လံာ်စီဆှံတဆၢအံၤ, တတဲပှၤလၢ နဖိမ့ၢ်တအိၣ်ဘၣ်န့ၣ် မ့ၢ်ယွၤအတၢ်စံၣ်ညီၣ်လီၤ န့ၣ်ဘၣ်. လံာ်စီဆှံတဆၢအံၤတဲပှၤယိယိ ဖိလၢ ဖိသၣ်တဖၣ်မ့ၢ် တၢ်ဆိၣ်ဂ့ၤဟဲလၢယွၤန့ၣ်လီၤ. 

ဖဲပကွၢ် ပဖိတဖၣ်အတၢ်ဒိၣ်ထီၣ် ဒီးလဲၤဆူထူကျဲယွၤကျဲ, တၢ်ဘၣ်ယွၤအသး ပှၤကညီအသးန့ၣ်, မ့ၢ်တၢ်သးမုာ်ကတၢၢ်လၢ မိၢ်ပၢ်တဖၣ်အဂီၢ် န့ၣ်လီၤ. အဝဲသ့ၣ်မ့ၢ်လီၤဂာ်ဒီးနၤဘၣ်ဆၣ်, တၢ်လီၤဆီအိၣ်ဝဲအါမး န့ၣ်လီၤ. အဝဲသ့ၣ်မ့ၢ်ဟးဒ်သိးနၤ, မ့ၢ်ကတိၤတၢ်ဒ်သိးနၤ, တၢ်နံၤတၢ်အ့ မ့ၢ်ဒ်သိးနၤဘၣ်ဆၣ်, အဝဲသ့ၣ်အိၣ်ဒီး အကစၢ်ဒၣ်ဝဲ အတၢ်ဆိကမိၣ် အတၢ်တိာ်သူၣ်ပာ်သး န့ၣ်လီၤ. 

လံာ် ၃ယိၤဟၣ် ၁း၄ စံးဘၣ်ပှၤ -

ယတၢ်သးခုဒိၣ်န့ၢ် ယနၢ်ဟူလၢ ယဖိတဖၣ် လဲၤတၢ်လၢ တၢ်မ့ၢ်တၢ်တီ အပူၤန့ၣ် တအိၣ်ဘၣ်နီတမံၤဘၣ်. 

ဒ်ပမ့ၢ်ခရံာ်ဖိတဖၣ်အသိး, ပတၢ်တိာ်အဒိၣ်ကတၢၢ် လၢပဖိတဖၣ်အဂီၢ် ကဘၣ်မ့ၢ် တၢ်လဲၤတၢ်လၢ တၢ်မ့ၢ်တၢ်တီ အပူၤန့ၣ်လီၤ. ပတိာ်န့ၢ်အီၤမ့ၢ်ထီထီ, တုၤအမၤန့ၢ်ဒံၣ်ကရံၣ် တဖၣ်ဘၣ်ဆၣ်, မ့ၢ်တလဲၤတၢ်လၢ ထူကျဲယွၤကျဲ, တၢ်မ့ၢ်တၢ်တီအပူၤဘၣ်န့ၣ် လၢအဂီၢ်မ့ၢ်တၢ်ကလီကလီ လီၤ. အဃိ, ဒ်ပဖိပလံၤမ့ၢ် တၢ်န့ၢ်သါဟဲလၢယွၤ အသိး, ပကြၢးအဲၣ်ပဖိတဖၣ် ဒ်ကစၢ်ခရံာ် အဲၣ်ဖိသၣ်တဖၣ်အသိး, ဒီးအိၣ်ဒီးတၢ်တိာ်လၢအဂီၢ် လၢအမ့ၢ် တၢ်လဲၤတၢ်လၢ တၢ်မ့ၢ်တၢ်တီ အပူၤန့ၣ်တက့ၢ်.

၂. ဖိသၣ်လီၤဂာ်ဒီးပျၢ်ဧိၤစၤဧိၤလၢပဘၣ်ကျ့အီၤဒီပညိၣ်အီၤ

ဒ်ပျၢ်ဧိၤစၤဧိၤ အိၣ်လၢပှၤအဆူၣ်အစုပူၤ အသိးန့ၣ် ပှၤသးစၢ်အဖိ မ့ၢ်ဒ်န့ၣ် အသိးလီၤ. (စံးထီၣ်ပတြၢၤ ၁၂၇း၄)

ပျၢ်ဧိၤစၤဧိၤန့ၣ် မ့ၢ်တၢ်လၢအဆံးလီၤ, ဘၣ်ဆၣ်အဂံၢ်အဘါဆူၣ်ဒိၣ်မး. ဆိကမိၣ်, ပဖိတဖၣ်မၤမနုၤသ့လဲၣ်. ပျၢ်ဧိၤစၤဧိၤန့ၣ် ပဘၣ်ကျ့အီၤဂ့ၤဂ့ၤလီၤ. ဒ်န့ၣ်အသိး ပဖိသ့ၣ်တဖၣ် ဖဲအနီၣ်ဆံးအခါ ကြၢးလၢ ပသိၣ်လိအီၤလၢ ထူကလုၢ်ယွၤကထါ ဃံးဃံး စ့ၢ်ကီးန့ၣ်လီၤ. ပျၢ်န့ၣ် ဃ့ၢ်တၢ်ယံၤမး, ဒီး ပဖိတဖၣ် ကလဲၤတုၤဖဲလဲၣ်န့ၣ် ပတသ့ၣ်ညါဘၣ်. ပျၢ်ဘိဒ်သိး ကဘၣ် တၢ်ပညိၣ် လီၢ်အဂီၢ်, ပဘၣ်ပညိၣ်အီၤ လီၤတံၢ်လီၤဆဲးအသိး, လၢနဖိအတၢ်အိၣ်မူ ခါဆူညါ အဂီၢ် ပဘၣ်ပညိၣ်န့ၢ်တၢ်လၢ အဂီၢ်လီၤတံၢ်လီၤဆဲး စ့ၢ်ကီးန့ၣ်လီၤ. 

ပှၤခးချံၣ်ဖိတဂၤ ဟံးန့ၢ်တၢ်ဆၢကတီၢ် ဖးယံာ်ဒ်သိး ကကတဲာ်ကတီၤ အပျၢ်အဂီၢ်န့ၣ်လီၤ. အဝဲ ဘၣ်ဃုထၢ သ့ၣ်အဘိ လီၤတံၢ်လီၤဆဲး, သွဲၣ်အီၤဒ်သိး ကကဲထီၣ်ပျၢ်အဘိအသိး, ဒီးဟံးန့ၢ်တၢ်ဆၢကတီၢ် လၢအနၣ်ရံၣ်တဖၣ် ဒ်သိး ကဖူးဘျ့အီၤ, ထၢနုာ်ထိၣ်ဆူၣ်လၢ ပျၢ်အခံတကပၤ, ဒီး ပီၤပျၢ်အခိၣ်လၢထး ဒီးထၢနုာ်အီၤ တပူၤဃီလၢ ပျၢ်အခိၣ်ထိးအလိၤန့ၣ်လီၤ. ဒ်သိးကခးဝဲအဂီၢ်, ဘၣ်ပညိၣ်ဝဲလီၤတံၢ်လီၤဆဲး မ့ၢ်လၢ ပျၢ်အံၤ လဲၤတလံာ်တပျာ် ဒီးမၤဆါတၢ်သ့အဃိန့ၣ်လီၤ. 

ဒ်န့ၣ်အသိး, ပဖိတဖၣ် စ့ၢ်ကီးလီၤဂာ်ဒ် ပျၢ်ဧိၤစၤဧိၤ အသိးန့ၣ်လီၤ. ဖဲအနီၢ်ဆံးဒံးအခါ, ကြၢးပကျ့အီၤလီၤတံၢ် လီၤဆဲးဒ်သိးဖဲအဒိၣ်ထီၣ်အခါ ကလဲၤတၢ်လၢ တၢ်မ့ၢ်တၢ်တီအပူၤအဂီၢ်န့ၣ်လီၤ. 

ပှၤအါဂၤကနၢ်ဟူဘၣ် တၢ်တဲဖိတယုၢ် လၢအမ့ၢ် မုၣ်ကမဲ ဒီးအဖိခွါတဂၤအဂ့ၢ် န့ၣ်လီၤ. မုၣ်ကမဲ တဂၤ အိၣ်ဒီး အဖိခွါတဂၤလီၤ. ဖဲအဖိခွါအံၤ အနီၢ်ဆံးဒံးအခါ, ပျဲအမၤဒ် တၢ်ဘၣ်အသးအသိးန့ၣ်လီၤ. အဖိမၤတၢ် မ့ၢ်ကမၣ် ဘၣ်ဆၣ် တတဲဝဲ တၢ်နီတမံၤဘၣ်. မ့ၢ်လၢအဖိခွါ အိၣ်ထဲတဂၤဒီး အဲၣ်ဝဲဒိၣ်မးအဃိ န့ၣ်လီၤ. ဘၣ်ဆၣ် ဖဲအဖိခွါအံၤ ဒိၣ်ထီၣ်န့ၣ်, တၢ်စံးဝဲလၢ ကဲထီၣ်တမျိၤတမျာ် ဒီးဟးမၤသံတၢ်န့ၣ်လီၤ. လၢခံကတၢၢ် ပှၤဖီၣ်န့ၢ်အီၤဒီး ပှၤထၢနုာ်အီၤဆူ ဃိာ်ပူၤန့ၣ်လီၤ. မ့ၢ်လၢအတၢ်ကမၣ်ဒိၣ်ဝဲအဃိ, တၢ်စံၣ်ညီၣ်လၢခံကတၢၢ်လၢ အဂီၢ်မ့ၢ် တၢ်မၤသံ အီၤန့ၣ်လီၤ. ဖဲအအိၣ်လၢ တၢ်မၤသံအီၤ အလီၢ်အဆၢကတီၢ်, ဃ့ဝဲတၢ်ခွဲးတၢ်ယာ်လၢ ကကတိၤကသွံတၢ်ဒီး အမိၢ်အဂီၢ်န့ၣ်လီၤ. ဒ်အဃ့ထီၣ်တၢ်ခွဲးတၢ်ယာ် အသိး, တၢ်ဟ့ၣ်အီၤတၢ်ပျဲန့ၣ်လီၤ. အမိၢ်လဲၤဃီၤဆူအကပၤ ဒီး ဟီၣ်ဒီးယၢၤ, ဒီး ဖဲအဝဲကကတိၤကသွံတၢ်ဒီး အမိၢ်အခါ, အ့ၣ်ဝဲအမိၢ်အနၢ်ကု ဒီးတဲဝဲ, မိၢ်ဧၢ, လၢယနီၢ်ဆံးအခါ မ့ၢ်လၢ နတသိၣ်ယၤ တသီယၤ, တဆှၢယၤလၢ ကျဲအဘၣ် ဘၣ်အဃိ အခဲအံၤ ယကဘၣ်သံဒ်အံၤလီၤ.

တၢ်ဃဲၤပူဖိတယုၢ်အံၤ မ့ၢ်တီထဲလဲၣ် ဒုတသ့ၣ်ညါဘၣ်. ဘၣ်ဆၣ်, တၢ်လၢပမၤလိန့ၢ်အီၤန့ၣ် မ့ၢ်ဝဲ ဖဲပဖိသ့ၣ်တဖၣ် အနီၢ်ဆံးခါလံၤလံၤ ပကဘၣ်သိၣ်လိအီၤ လၢ တၢ်မ့ၢ်တၢ်တီယွၤကလုၢ်ကထါ, ဒ်သိး တုၤအဒိၣ်ထီၣ်ဒီး သုတဟးဖးဒီးအီၤ တဂ့ၤအဂီၢ်န့ၣ်လီၤ. ဖဲအနီၢ်ဆံးအခါ ပမ့ၢ်တကျ့အီၤလၢဟံၣ်လၢဃီ, လၢအိၣ်ဘှံးနံၤ တၢ်မၤလိ ဘၣ်န့ၣ်, နီၢ်ခိတၢ်ကူၣ်ဘၣ်ကူၣ်သ့လၢ ကၠိလၢကီၢ် ကဟ့ၣ်လီၤအီၤလၢ ကစၢ်ယွၤ တအိၣ်ဘၣ်န့ၣ်လီၤ. အဃိ, ဒ်ပှၤခးချံၣ်ဖိတဂၤ, ကတဲာ်ကတီၤ အပျၢ်ဘိအသိး, မ်ပကကတဲာ်ကတီၤ ပဖိတဖၣ်လၢ အတၢ်ဒိၣ်ထီၣ်အဂီၢ် န့ၣ်တက့ၢ်. 

၃. ဖိသၣ်မ့ၢ်ဟံၣ်ဃီအတၢ်ဂံၢ်တၢ်ဘါ

ပှၤလၢ အလၢပီၤပှဲၤဒီးအီၤန့ၣ် ဘၣ်ဆိၣ်ဂ့ၤဝဲလီၤ. တုၤအကတိၤတၢ်ဒီး အဒုၣ်အဒါလၢ ပဲတရီပူၤဒီး, အမဲာ်တဆှး ဘၣ်လီၤ. (စံးထီၣ်ပတြၢၤ ၁၂၇း၅)

လံာ်စီဆှံတဆၢအံၤ, ဖျါလီၤဂာ်လၢ အတဲပှၤ ပှၤလၢအဟံၣ်ဖိဃီဖိအါတဖၣ် မ့ၢ်ကစၢ်ယွၤအတၢ်ဆိၣ်ဂ့ၤဆိၣ်ဝါ အပနီၣ်န့ၣ်လီၤ. ဘၣ်ဆၣ်, အလၢပီၤပှဲၤန့ၣ်, မ့ၢ်အပှဲၤထဲလဲၣ်မး ပစံးလၢအပှဲၤလံလဲၣ်. ပတဲလၢပှၤတဂၤအခိၣ် သူထီ, ဘၣ်ဆၣ် ခိၣ်သူထီထဲလဲၣ်မး ပတဲလၢအခိၣ်သူထီသ့လဲၣ်. လံာ်စီဆှံတတဲပှၤလၢ နကဘၣ်အိၣ်ဒီး နဖိဆံးအါဆံးအါလဲၣ်န့ၣ်ဘၣ်. ဘၣ်ဆၣ်, လံာ်စီဆှံ စံးဘၣ်ပှၤလၢ ဖိသၣ်တဖၣ် မ့ၢ်တၢ်န့ၢ်သါဟဲလၢယွၤ န့ၣ်လီၤ. 

လံာ်စီဆှံအပူၤ, ပကထံၣ်ဘၣ်ဟံၣ်ဖိဃီဖိ အိၣ်ဝဲအါဒူၣ်န့ၣ်လီၤ. ဟံၣ်ဖိဃီဖိတနီၤန့ၣ်, အိၣ်ဒီး အဖိထဲစှၤဂၤ, ဘၣ်ဆၣ် အါတက့ၢ်အဖိအိၣ်အါဂၤ န့ၣ်လီၤ. လၢပစိၤပဆၢကတီၢ်ခဲအံၤတခီ, အါတက့ၢ် ပဟံးဒၣ်ပဖိထဲ စှၤဂၤလီၤ. မ့ၢ်လၢပကွၢ်တၢ်လၢ အကပၤကပၤ အဃိန့ၣ်လီၤ. 

ကစၢ်ယွၤတပာ်ပနီၣ်, နီၢ်ဒီမါဝၤခံဂၤ ကဘၣ်ဟံးအဖိထဲလဲၣ် န့ၣ်ဘၣ်. အဃိ, တၢ်လၢအရ့ဒိၣ်ကတၢၢ်န့ၣ်, ဖဲပဖိတဖၣ် အနီၢ်ဆံးဒံးအခါ, ကြၢးပသိၣ်လိအီၤလၢ တၢ်အဲၣ်တၢ်ကွံ, တၢ်အဲၣ်မိၢ်ပၢ်, တၢ်အဲၣ်ကစၢ်ယွၤ ဒီး တုၤလၢ အနီၢ်ဒိၣ်ထီၣ်, ဒီးဖဲပသးပှၢ်ထီၣ်အဆၢကတီၢ် အဝဲသ့ၣ်ကဟ့ၣ်ပှၤ တၢ်အဲၣ်တၢ်ကွံ, ကကဟုကယာ်ပှၤ န့ၣ်လီၤ. မ့တမ့ၢ်ဘၣ်ဒ်န့ၣ်ဒီး, ဒ်ကလုာ်ဂၤတဖၣ်အသိး ပကလဲၤအိၣ်ဘၣ်လၢ ပှၤသးပှၢ် အဟံၣ်န့ၣ်လီၤ. 

ပဖိလၢအအိၣ်ဒီး တၢ်သ့ၣ်ညါယွၤ, တၢ်သ့ၣ်ညါ အဲၣ်အမိၢ်အပၢ် န့ၣ်, မ့ၢ်ဟံၣ်ဃီ အတၢ်ဂံၢ်တၢ်ဘါန့ၣ်လီၤ. ပမ့ၢ်အိၣ်ဒီး ပဖိဒ်န့ၣ်အသိးတဖၣ်, ကကဲထီၣ်တၢ်ဂံၢ်တၢ်ဘါလၢ ပဂီၢ်, တကးဘၣ် ပမဲာ်တဆှးဘၣ်လၢ အဝဲသ့ၣ် အဃိနီတဘျီဘၣ် န့ၣ်လီၤ. 

တၢ်ကတိၤလၢခံ

ပှၤအံၣ်စရ့လးဖိ လၢပျၢၤတဖၣ် တၢ်နဲၣ်လီၤအီၤလၢ ကဘၣ်သိၣ်လိအဖိ ဃံးဃံးဖဲအနီၣ်ဆံးဒံးအခါ ဒၣ်လဲာ်န့ၣ်လီၤ. 

ဒီးနဘၣ် သိၣ်က့ၤသီက့ၤ နဖိနလံၤလၢအီၤ, ဒီးတုၤနဆ့ၣ်နီၤ လၢနဟံၣ်ပူၤ, ဒီးတုၤနပိာ်ကျဲ, ဒီးတုၤနမံလီၤ, ဒီးတုၤ နဂဲၤဆၢထၢၣ်ဒီး, နဘၣ်ကတိၤတၢ်လၢအဂ့ၢ်အကျိၤလီၤ. (၅မိၤရှ့ ၆း၇)

ပှၤအံၣ်စရ့လးဖိတဖၣ်, ခီဖျိလၢ အတၢ်သိၣ်ဖိသိၣ်လံၤ လၢနီၢ်ဆံးဒံးအခါ ဒၣ်လဲာ်အဃိ, ပထံၣ်ဘၣ်လၢ တုၤလၢ မုၢ်မဆါတနံၤအံၤ ပှၤအံၣ်စရ့လးဖိတဖၣ် ဟံးဃာ်ဂၢၢ်ကျၢၤဒံး မိၢ်ပၢ် ဖံဖုလၢပျၢၤသ့ၣ်တဖၣ် အတၢ်စူၢ်တၢ်နာ် ဒံးန့ၣ်လီၤ. 

အဃိ, ဒ်ပမ့ၢ်ပှၤခရံာ်ဖိတဖၣ်စ့ၢ်ကီး, အလီၢ်အိၣ်လၢ ပကသိၣ်လိ ပဖိပလံၤတဖၣ် လၢအနီၢ်ဆံးခါ လံၤလံၤဒၣ်လဲာ်, ဒ်သိး မုၢ်ကအိၣ်တနံၤ ကကဲထီၣ်ပှၤလၢအပိာ်ထူကျဲယွၤကျဲ, ဒီးပိာ်တၢ်မ့ၢ်တၢ်တီအခံ အဂီၢ်န့ၣ်လီၤ. 

အန့ၣ်မး ဒ်စီၤယိၤဟၣ်သးပှၢ် စံးဝဲအသိး ပကစံးသကိး လၢ, "ယတၢ်သးခုဒိၣ်န့ၢ် ယနၢ်ဟူလၢ ယဖိတဖၣ် လဲၤတၢ်လၢတၢ်မ့ၢ်တၢ်တီအပူၤ န့ၣ်တအိၣ်ဘၣ်နီတမံၤဘၣ်," န့ၣ်လီၤ. 

မ်ယွၤဆိၣ်ဂ့ၤအကလုၢ်ကထါ, ဆိၣ်ဂ့ၤဖိသၣ်တဖၣ်, ဒီးဆိၣ်ဂ့ၤပဝဲကိးဂၤဒဲးတက့ၢ်.