မၤလိတၢ်လၢစီၤမိၤရှ့ အအိၣ် (ဧ့ၤဘြံၤ ၁၁း၂၄-၂၇)

 

လၢတၢ်နာ်, စီၤမိၤရှ့ဒိၣ်ထီၣ်ဒီး, တအၢၣ်လီၤအီလီၤ ဘၣ်လၢ ပှၤကကိးအီၤလၢ စီၤပၤဖၤရိၤ အဖိမုၣ်န့ၣ် အဖိခွါဘၣ်. ဘၣ်နးဘၣ်ဖှီၣ် ဃုာ်ဒီး ယွၤအပှၤဂီၢ်မုၢ်န့ၣ်, ဘၣ်အသးဒိၣ်န့ၢ် အမုာ်လၤတၢ်လၢ တၢ်ဒဲးဘး အတၢ်မုာ်တၢ်လၤ အပူၤ တစိၢ်တလီၢ်န့ၣ် တက့ၢ်လီၤ. ဆိကမိၣ်ဝဲလၢ ခရံာ်အတၢ်ဒုၣ်ဒွဲၣ်, မ့ၢ်တၢ်အထူးအတီၤ ဒိၣ်န့ၢ် အဲၤကူပတူး အတၢ်လုၢ်ဒိၣ်ပှ့ၤဒိၣ် တက့ၢ်လီၤ. အဂ့ၢ်ဒ်အံၤ, ကွၢ်ဃီၤဝဲဆူ တၢ်အဘူးအလဲလီၤ. 

လၢတၢ်နာ်, တပျံၤဘၣ် စီၤပၤအသးဒိၣ်ထီၣ် ဘၣ်, ဒီးဟးထီၣ်ကွံာ်လၢ အဲၤကူပတူး အပူၤလီၤ. အဂ့ၢ်ဒ်အံၤ, သူၣ်ဂၢၢ်သးကျၢၤဒ် အထံၣ်ပှၤလၢ အတအိၣ်ဖျါဘၣ် တဂၤအသိးလီၤ. (ဧ့ၤဘြံၤ ၁၁း၂၄-၂၇)

တၢ်ကတိၤလၢညါ

ပဝဲကညီဖိတဖၣ် ခီဖျိလၢ ပထံပကီၢ် တဘၣ်တၢ်ပာ်ပနီၣ်န့ၢ်ပှၤ, တကးဘၣ် ခီဖျိလၢ ဒုၣ်ဒါ တဖၣ်ဂုာ်န့ၢ်ဆူၣ် ပတၢ်လီၢ်တၢ်ကျဲတဖၣ် အဃိ လၢအပူၤကွံာ် ပဘၣ်အိၣ်ကဒုလၢ ကီၢ်ကၠီၣ်တဲၣ်အပူၤ ဒ်ပှၤဘၣ်ကီဘၣ်ခဲ တဖၣ်အသိး န့ၣ်လီၤ. ဘၣ်ဆၣ်ခီဖျိလၢ ကစၢ်ယွၤအဘျုးအဖှိၣ်အဃိ, ထံဒိၣ်ကီၢ်လဲၢ်တဖၣ် တူၢ်လိာ် ပှၤကညီ ဘၣ်ကီဘၣ်ခဲတဖၣ်အဃိ ကညီဖိအါဒံအါဂၤ လဲၤအိၣ်လဲၤဆိးဘၣ်လၢ ပကိးလၢ ကီၢ်သၢဘ့ၣ်တဘ့ၣ် အပူၤန့ၣ်လီၤ. 

ပဝဲအါဒံအါဂၤ ပလဲၤတုၤဘၣ်လၢ ကီၢ်သၢဘ့ၣ်တဘ့ၣ် တနီၤန့ၢ်လံအနံၣ်လၢ အဆံဘျဲၣ်ဒီး ကဲထီၣ်ဘၣ် ထံကီၢ်န့ၣ် အထံဖိကီၢ်ဖိလံ. ပဝဲအါဂၤ ကဲထီၣ်တၢ်သူၣ်မံသးမုာ်လၢ ပဂီၢ်ခီဖျိလၢ ပအိၣ်ဘၣ်လၢ ထံကီၢ်လၢ အလဲၤထီၣ်လဲၤထီ တကးဘၣ်, ဟ့ၣ်ပှၤတၢ်ပျဲလၢ ပကကဲထီၣ်ဘၣ်အထံဖိကီၢ်ဖိ ဒီး အိၣ်ဒီး ပကစၢ်ဒၣ်ပဝဲ ပဟံၣ်ပဃီ အဃိန့ၣ်လီၤ. ဘၣ်ဆၣ် ပအိၣ်တပူၤဂ့ၤတပူၤဂ့ၤ ပကဘၣ်သ့ၣ်ညါ ပတၢ်မ့ၢ်တၢ် မ့ၢ်တၢ်မနုၤလဲၣ်န့ၣ်လီၤ. စီၤမိၤရှ့ မ့ၢ်ဒိၣ်ထီၣ်ဘၣ်လၢ ဖၤရိၤအနီပူၤဒ် စီၤပၤဖိခွါ တဂၤအသိးဘၣ်ဆၣ်, အတၢ်မ့ၢ်တၢ်မနုၤလဲၣ်န့ၣ် သ့ၣ်ညါဝဲလီၤ. အဃိ, တနံၤအံၤ ပကမၤလိန့ၢ်တၢ်လၢ စီၤမိၤရှ့အအိၣ် ခီဖျိ တၢ်ဂ့ၢ်လွံၢ်မံၤဒ် လံာ်ဧ့ၤဘြံၤ ၁၁း၂၄-၂၇ စံးဘၣ်ပှၤ အသိးန့ၣ်လီၤ. 

၁. နဘၣ်သ့ၣ်ညါလီၤနသးလၢ နမ့ၢ်မတၤ

လၢတၢ်နာ်, စီၤမိၤရှ့ဒိၣ်ထီၣ်ဒီး, တအၢၣ်လီၤအီလီၤ ဘၣ်လၢ ပှၤကကိးအီၤလၢ စီၤပၤဖၤရိၤ အဖိမုၣ်န့ၣ် အဖိခွါဘၣ်. (ဧ့ၤဘြံၤ ၁၁း၂၄)

စီၤမိၤရှ့ အိၣ်ဖျဲၣ်ထီၣ်ဒ် ပှၤဧ့ၤဘြံၤဖိတဂၤအသိး, ဘၣ်ဆၣ် အဝဲဒိၣ်ထီၣ်ဘၣ်လၢ နူၢ်ပူၤစီၤပူၤ ဒ်စီၤပၤဖၤရိၤ အဖိမုၣ် န့ၣ် အဖိခွါအသိးန့ၣ်လီၤ. မ့ၢ်လၢ အဘၣ်တၢ်သ့ၣ်ညါအီၤဒ် စီၤပၤအဖိမုၣ်န့ၣ် အဖိခွါအဃိ, လၢကီၢ်အဲၤကူပတူးအပူၤ အဝဲကဲဘၣ် စီၤပၤဖိခွါ တဂၤန့ၣ်လီၤ. ဘၣ်ဆၣ် စီၤမိၤရှ့ သ့ၣ်ညါ ကစၢ်ယွၤကိးအီၤ န့ၣ်လီၤ. ကစၢ်ယွၤ ကိးအီၤဒ်သိး အကကဲထီၣ်ပှၤတဂၤလၢ အထုးထီၣ်ကွံာ် အပှၤကလုာ်လၢ ကီၢ်အဲၤကူပတူးအပူၤ န့ၣ်လီၤ. လၢတၢ်န့ၣ်အဃိ, အဝဲ ဘၣ်မၤတၢ်ဆၢတဲာ်န့ၣ်လီၤ. ယကဘၣ်မၤဒ်လဲၣ်. ယတမ့ၢ် ပှၤအဲၤကူပတူးဖိ တဂၤဘၣ်. ယကဲပှၤဧ့ၤဘြံၤဖိ လီၤ. ဘၣ်ဆၣ်, အခဲအံၤ ပှၤပာ်ကဲယၤဒ် စီၤပၤဖိခွါ တဂၤအသိးလီၤ. 

စီၤမိၤရှ့ ဒိးန့ၢ်တၢ်မုာ်တၢ်လၤခဲလၢာ် ဖဲအအိၣ်လၢ နူၢ်ပူၤစီၤပူၤ အခါန့ၣ်လီၤ. ဒ်စီၤပၤဖိခွါ တဂၤအသိး အိၣ်ဆိးဝဲလၢ နူၢ်ပူၤစီၤပူၤ လၢအသးသမူဒီတစိၤညါ သ့ဝဲလီၤ. မ့မ့ၢ်နၤ နကမၤဒ်လဲၣ်. စီၤမိၤရှ့ ဆၢတဲာ်တၢ်လၢ အဘၣ်န့ၣ်လီၤ. ဘၣ်ဆၣ် အတၢ်ဆၢတဲာ်အံၤ ဟ့ၣ်အီၤလၢ ကဘၣ်ဟးဝ့ၤဝီၤလၢ ပှၢ်မုၢ်ကနၢ အပူၤ လၢအနံၣ်ဃိးဆံ အတီၢ် ပူၤန့ၣ်လီၤ. 

ပဝဲသ့ၣ်တဖၣ် ပသ့ၣ် ညါ တၢ်ပာ်မၤသး မ့ၢ်တၢ်မနုၤလဲၣ်န့ၣ်လီၤ. စီၤမိၤရှ့ ပာ်မၤအသးဒ် စီၤပၤဖိခွါ တဂၤအသိး, ဒီးအိၣ်ဆိးဝဲလၢနူၢ်ပူၤစီၤပူၤ တစိၤသး သ့ဝဲလီၤ. ဘၣ်ဆၣ်, အဝဲပာ်တ့ၢ်ကွံာ်တၢ်ပာ်မၤသး အံၤန့ၣ်လီၤ. ဖဲပပာ်ပတုာ်ကွံာ် ပတၢ်ပာ်မၤသး အခါ, ပကဲထီၣ်က့ၤပှၤသဘျ့ တဂၤ, ဒီးပတူၢ်လိာ် ကစၢ်ယွၤအတၢ်သုးတၢ်ကျဲၤ လၢ ပတၢ်အိၣ်မူအပူၤ သ့ဝဲဒၣ်န့ၣ်လီၤ. စီၤမိၤရှ့ မ့ၢ်ဆဲးအိၣ်ဒၣ်လၢ နီပူၤ တစိၤသးန့ၣ်, မ့ၢ်ပကဖးဘၣ် အဂ့ၢ်စ့ၢ်ကီးဧါ. ဘၣ်တဘၣ် ပကထံၣ်ဘၣ်အီၤဒ် အဲၤကူပတူး အမါမံၤ အသိးလၢ တၢ်ကွၢ်ကီတၢ် အလီၢ်န့ၣ်လီၤ. ဘၣ်ဆၣ်, အဝဲဆၢတဲာ်တၢ်ဆၢတဲာ် လၢအကီအခဲအံၤ, ဘၣ်ဆၣ် လၢတၢ်အိၣ်မူလၢတၢ်သံဝံၤ အလီၢ်ခံအဂီၢ် မ့ၢ်ဝဲ တၢ်ဂ့ၤကတၢၢ် လၢအဂီၢ်န့ၣ်လီၤ. 

၂. နဘၣ်ဟံးမူဒါလၢ နသးသမူအဂီၢ် 

လၢတၢ်နာ်, စီၤမိၤရှ့ဒိၣ်ထီၣ်ဒီး, တအၢၣ်လီၤအီလီၤ ဘၣ်လၢ ပှၤကကိးအီၤလၢ စီၤပၤဖၤရိၤ အဖိမုၣ်န့ၣ် အဖိခွါ ဘၣ်. ဘၣ်နးဘၣ်ဖှီၣ် ဃုာ်ဒီး ယွၤအပှၤဂီၢ်မုၢ်န့ၣ်, ဘၣ်အသး ဒိၣ်န့ၢ် အမုာ်အလၤ တၢ်လၢ တၢ်ဒဲးဘး အတၢ်မုာ်တၢ်လၤ အပူၤ တစိၢ်တလီၢ်န့ၣ် တက့ၢ်လီၤ. (ဧ့ၤဘြံၤ ၁၁း၂၄-၂၅)

အခီၣ်ထံးတမံၤန့ၣ်, ပကထံၣ်ဘၣ်လၢ စီၤမိၤရှ့ သမၢဝဲလၢ အကဲစီၤပၤအဖိမုၣ်န့ၣ်အဖိခွါ န့ၣ်လီၤ. ခံမံၤတမံၤ ပကထံၣ်ဘၣ်လၢ စီၤမိၤရှ့ ဃုထၢလၢ ကလဲၤဒ် ကစၢ်ယွၤ အတၢ်တိာ်ကျဲၤ အသိးန့ၣ်လီၤ. တၢ်လၢပကဘၣ်မၤလိ န့ၢ်ဖဲအံၤမ့ၢ်ဝဲ, တၢ်တဘၣ်န့ၣ် ပမၤပှဲၤက့ၤအီၤလၢ တၢ်အဘၣ် သ့ဝဲလီၤ. တမ့ၢ်နပာ်ပတုာ် နမၤတၢ်ဘၣ်, မ့မ့ၢ်တခီ နမၤတၢ်လၢ အသီတခါ န့ၣ်လီၤ. 

ပှၤခရံာ်ဖိအတၢ်အိၣ်မူန့ၣ် တမ့ၢ်တၢ်အိၣ်မူလၢ အပှဲၤဒီး တၢ်သိၣ်တၢ်သီ လၢအတဂ့ၤတဘၣ် ဘၣ်တဖၣ်န့ၣ်ဘၣ်. မ့ၢ်တၢ်ဘၣ်ထွဲလိာ်သးဒီး ကစၢ်ယွၤ, ဒီးပှၤလၢပဃၢၤ, ဒီး ပကစၢ်ဒၣ်ပဝဲ န့ၣ်လီၤ. သ့ၣ်နီၣ်ထီၣ်, စီၤမိၤရှ့ မၤတၢ်ဆၢတဲာ် ဖဲအဒိၣ်တုာ်ခိၣ်ပှဲၤ အဆၢကတီၢ်န့ၣ်လီၤ. ဖဲစီၤမိၤရှ့ကဲဒံးဖိသၣ်အခါ အမ့ၢ်တအိၣ်ဒီး တၢ်ဆၢတဲာ်နီ တမံၤလၢ အကစၢ်ဒၣ်ဝဲအဂီၢ်ဘၣ်ဆၣ် တၢ်ကီတၢ်ခဲတအိၣ်နီတမံၤဘၣ်. ဘၣ်ဆၣ် ဖဲအဒိၣ်တုာ်ခိၣ်ပှဲၤ အဆၢကတီၢ်, အဝဲကဘၣ်မၤတၢ်ဆၢတဲာ်န့ၣ်လီၤ. အကဘၣ်ဟံးန့ၢ်မူဒါလၢ အသးသမူဒၣ်ဝဲ အဂီၢ်, ဒီးဆဲးလဲၤဆူညါ န့ၣ်လီၤ. 

ပပာ်တၢ်ကမၣ်လၢ ပှၤဂၤအလိၤန့ၣ် သ့ညီကဒၣ်လီၤ. "ယကလဲၤဒ်ကစၢ်ယွၤ ဆှၢယၤအသိး ဖဲယတၢ်အဲၣ်တီ, မ့တမ့ၢ် ယမိ, ယပါ မ့တမ့ၢ် ယမါ, ယဝၤ မ့လဲၤဒ် ကစၢ်ယွၤဆှၢအီၤအသိး အခါလီၤ." မ့တမ့ၢ်, "ယမ့ၢ်အိၣ်ဒီး မိၢ်ဂ့ၤပၢ်ဝါန့ၣ် ယတၢ်အိၣ်မူကဂ့ၤဒိၣ်န့ၢ် ဒံးအခဲအံၤလီၤ." တၢ်အိၣ်သးလၢ ကဟဲနုာ်လီၤလၢ နတၢ်အိၣ်မူ အပူၤန့ၣ်, နဃုထၢအီၤတသ့ဘၣ်. ဘၣ်ဆၣ် တၢ်လၢနဃုထၢသ့န့ၣ် မ့ၢ်ဝဲ တၢ်အိၣ်သးတဖၣ်အံၤ ကဒုးကဲထီၣ်နၤ ပှၤအၢပှၤသီ ဧါ မ့တမ့ၢ် ပှၤဂ့ၤပှၤဝါဧါ န့ၣ်လီၤ. လီၢ်ခံကတၢၢ်, ပှၤလၢ အမၤဟးဂီၤ နတၢ်အိၣ်မူသ့န့ၣ် မ့ၢ်ဒၣ်နကစၢ်ဒၣ်နဲလီၤ. တမ့ၢ်ပှၤအဂၤဘၣ်. မုၣ်ကီၤလံၢ် မၤဟးဂီၤနၤ တသ့ဘၣ် မ့ၢ်လၢ အတၢ်စိတၢ်ကမီၤ တအိၣ်လၢလၢပှဲၤပှဲၤ လၢကမၤဟးဂီၤနၤ အဂီၢ်န့ၣ်လီၤ. ကစၢ်ယွၤ တမၤဟးဂီၤနၤ ဘၣ်, မ့ၢ်လၢ အအဲၣ်နၤအဃိလီၤ. အဃိ, ဃုထၢလၢ နကမၤဒ်ကစၢ်ယွၤ အတၢ်ဘၣ်သးအသိးတက့ၢ်.

 ၃. နဘၣ်ဆၢတဲာ် တၢ်လၢအလိၣ်ဒိၣ်ကတၢၢ်လၢနဂီၢ်

ဆိကမိၣ်ဝဲလၢ ခရံာ်အတၢ်ဒုၣ်ဒွဲၣ်, မ့ၢ်တၢ်အထူးအတီၤ ဒိၣ်န့ၢ် အဲၤကူပတူး အတၢ်လုၢ်ဒိၣ်ပှ့ၤဒိၣ် တက့ၢ်လီၤ. အဂ့ၢ်ဒ်အံၤ, ကွၢ်ဃီၤဝဲဆူ တၢ်အဘူးအလဲလီၤ. (ဧ့ၤဘြံၤ ၁၁း၂၆)

ဖဲစီၤမိၤရှ့ အစိၤအဆၢကတီၢ်, ဟီၣ်ခိၣ်ဒီဘ့ၣ်ညါ အတၢ်ထူးတၢ်တီၤန့ၣ် ဘၣ်တၢ်ပာ်ကီၤဃာ်အီၤလၢ ကီၢ်အဲၤကူ ပတူးအပူၤန့ၣ်လီၤ. အဃိ ဒ်စီၤပၤအဖိမုၣ်န့ၣ် အဖိခွါ အသိး တၢ်အိၣ်ဒီးအီၤလၢလၢပှဲၤပှဲၤ ဖဲပှၤအါဂၤ ဘၣ်မၤ လၢာ်ကပၢၤကဝါ ဒ်သိးကဒိးန့ၢ်ဝဲ အဂီၢ်န့ၣ်လီၤ. တၢ်မံၤဒိၣ်သၣ်ဒိၣ်, တၢ်အိၣ်မုာ်အိၣ်ခုၣ်, တၢ်အိၣ်လၢအိၣ်ပှဲၤ ခဲလၢာ် အိၣ်ဒီးအီၤလီၤ. ဘၣ်ဆၣ်, ကစၢ်ယွၤ မၢအီၤ လၢကမၤတၢ်လၢ အရ့ဒိၣ်တမံၤ, ဒီးအဝဲမၤဝဲလီၤ. မ့ၢ်တၢ်လၢ အလိၣ်ဒိၣ်ကတၢၢ် လၢအဂီၢ်လီၤ. တၢ်လၢ စီၤမိၤရှ့မၤသ့န့ၣ် မ့ၢ်ဝဲ, "ကုၢ်အတၢ်မၤအံၤ တဂ့ၤဘၣ်. ယအိၣ်ဒ် စီၤပၤဖိခွါ တဂၤအသိး ဒီး မၤဂ့ၤထီၣ်က့ၤအီၤ သ့လီၤ." ပဝဲအါဒံအါဂၤ ပအဲၣ်ဒိး မၤတၢ်ဒ်န့ၣ်အသိးလီၤ. ဘၣ်ဆၣ် တၢ်ကီတၢ်ခဲအိၣ်ဝဲတမံၤ လၢအမ့ၢ် တၢ်မံၤဒိၣ်သၣ်ဒိၣ်န့ၣ် အယူာ်တထီ ဘၣ်. 

ပဝဲတနီၤ ပကသံ ကွၢ်, ပအိၣ်ဒီး တၢ်မံၤဒိၣ်သၣ်ဒိၣ်, ဒီး တၢ်ထူးတၢ်တီၤ န့ၣ် မ့ၢ်တၢ်ကမၣ်ဧါ. တကမၣ်နီတမံၤ ဘၣ်. လၢလံာ်စီဆှံအပူၤ ပှၤမံၤဟူသၣ်ဖျါ အိၣ်အါဂၤ လၢ အအိၣ်ဒီး တၢ်ထူးတၢ်တီၤ အါမးန့ၣ်လီၤ. လၢအကျါ မ့ၢ်စီၤအၤဘြၤဟၣ် ဒီး စီၤပၤရှလိၤမိၤ န့ၣ်လီၤ. ဘၣ်ဆၣ် ကစၢ်ခရံာ်စံးဝဲဖဲ လံာ်လူၤကၣ် ၁၂း၁၅ န့ၣ် - 

ဒီးစံးဘၣ် ပှၤတဖၣ်, တၢ်ပံာ်တၢ်ကီခဲလၢာ်န့ၣ်, တိၢ်သုသးဒီး ဟးဆှဲးတက့ၢ်. အဂ့ၢ်ဒ်အံၤ, ပှၤကညီ အတၢ်မူ တမ့ၢ်ဘၣ် အစုလီၢ်အခီၣ်ခိၣ် အိၣ်အါအါကလဲာ် န့ၣ်ဘၣ်. (လူၤကၣ် ၁၂း၁၅)

တၢ်ထူးတၢ်တီၤ တဟ့ၣ်ပှၤ တၢ်သးခုဘၣ်. သံကွၢ်ပှၤလၢ အအိၣ်ဒီးတၢ်ထူးတၢ်တီၤ တဖၣ်တက့ၢ်. "ဒ်သိးနကန့ၢ်ဘၣ် တၢ်သးခုအဂီၢ် နဘၣ်မၤလၢနကျိၣ်နစ့ဆံးအါလဲၣ်." တၢ်စံးဆၢမ့ၢ်ဝဲ, ဘၣ်မၤလၢာ်ဒၣ်အီၤ တစဲးဖိလီၤ. ကျိၣ်စ့န့ၣ် မ့ၢ်လၢ ပကသူအီၤအဂီၢ်လီၤ. တမ့ၢ်လၢ ပကအဲၣ်အီၤ အဂီၢ်ဘၣ်. ကစၢ်ယွၤအဲၣ်ဒိးလၢ ပကသူ တၢ်ဖိတၢ်လံၤ, ဒီး အဲၣ်ပှၤလၢပဃၢၤ န့ၣ်လီၤ. ဘၣ်ဆၣ် ပမ့ၢ်အဲၣ် တၢ်ဖိတၢ်လံၤန့ၣ်, လီၢ်ခံကတၢၢ် ပသူဒၣ် ပှၤကညီန့ၣ်လီၤ. စီၤမိၤရှ့ ဃုထၢ တၢ်လၢအရ့ဒိၣ်ကတၢၢ်လၢအဂီၢ် န့ၣ်လီၤ. အဝဲပာ်တ့ၢ်ကွံာ် အတၢ်စုလီၢ်ခီၣ်ခိၣ် တဖၣ်, မ့ၢ်လၢ တၢ်အိၣ်ဝဲတမံၤလၢ အရ့ဒိၣ်လၢအတၢ်အိၣ်မူအဂီၢ် လၢအမ့ၢ် တၢ်မၤယွၤ အတၢ်ဘၣ်သးအကျဲ န့ၣ်လီၤ. 

၄. နဘၣ်ပာ်နသးကျၢၤမူဆှူဖဲတၢ်ကီတၢ်ခဲအဆၢကတီၢ်

လၢတၢ်နာ်, တပျံၤဘၣ် စီၤပၤအသးဒိၣ်ထီၣ်ဘၣ်. ဒီးဟးထီၣ်ကွံာ်လၢ အဲၤကူပတူး အပူၤလီၤ. အဂ့ၢ်ဒ်အံၤ, သူၣ်ဂၢၢ်သးကျၢၤ ဒ်အထံၣ်ပှၤလၢ အတအိၣ်ဖျါဘၣ် တဂၤအသိးလီၤ. (ဧ့ၤဘြံၤ ၁၁း၂၇)

ပမ့ၢ်ကွၢ်စီၤမိၤရှ့ အတၢ်အိၣ်မူန့ၣ် ပကွဲးဖုၣ်လီၤအီၤ သ့လၢ, "အဝဲပာ်အသးကျၢၤမူဆှူ" န့ၣ်လီၤ. လၢပတၢ်အိၣ်မူ အပူၤပကထံၣ်ဘၣ်, ပမ့ၢ်တအိၣ်ဒီး တၢ်တူၢ်ဘၣ်ခီၣ်ဘၣ် ဘၣ်န့ၣ် ပမၤနၢၤတၢ်တသ့ဘၣ်. ပမ့ၢ်တပာ်တ့ၢ်ကွံာ် ပတၢ်ဝံဃၢ ဘၣ်န့ၣ်, ပလဲၤတၢ်ဆူညါ တသ့ဘၣ်. ပမ့ၢ်တထံၣ်ဘၣ် တၢ်ကီတၢ်ခဲဘၣ်န့ၣ် ပဒိၣ်တုာ်ခိၣ်ပှဲၤ တသ့ဘၣ်. 

စီၤမိၤရှ့သ့ၣ်ညါ လၢ တၢ်ကီတၢ်ခဲန့ၣ် အိၣ်ဒီး ပှၤကိးဂၤဒဲးလီၤ. ဘၣ်ဆၣ် အဝဲသ့ၣ်ညါ ကဘၣ်မၤဒ်လဲၣ် ဒ်သိး ကလဲၤတၢ်ဆူညါ အဂီၢ်န့ၣ်လီၤ. ဒ်န့ၣ်အသိး, ပဝဲသ့ၣ်တဖၣ်စ့ၢ်ကီး ပကြၢးမၤလိန့ၢ်တၢ် လၢစီၤမိၤရှ့ အအိၣ်န့ၣ်လီၤ. 

ဒ်ပမ့ၢ်ပှၤခရံာ်ဖိတဖၣ်အသိး, ပတကြၢး မၢတၢ်ကီတၢ်ခဲ မၤနၢၤပှၤဘၣ်. ပကဘၣ် ပာ်ကဲ တၢ်ကီတၢ်ခဲလၢ ကဆှၢပှၤဘူးဒီး ကစၢ်ယွၤ န့ၣ်လီၤ. ကစၢ်ယွၤ ဟ့ၣ်တၢ်ပျဲလၢ တၢ်အိၣ်အသးလၢပတၢ်အိၣ်မူအပူၤ လီၤလီၤဆီဆီ ကဟဲဘၣ်ပှၤဒ်သိး ပကဒိၣ်တုာ်ခိၣ်ပှဲၤ ထီၣ်အဂီၢ် န့ၣ်လီၤ. ဘၣ်ဆၣ်, တၢ်ပာ်သးကျၢၤမူဆှူ မ့တအိၣ်ဘၣ်န့ၣ်, ပလဲၤယံၤယံၤတသ့ဘၣ်. 

ဘၣ်ဆၣ် ပဘၣ်သ့ၣ်ညါလၢ, ဖဲကစၢ်ယွၤ ကိးပှၤဒ်သိး ပကမၤ အတၢ်မၤအခါ, အဝဲဒုးဆူၣ်ထီၣ်ပှၤ ဒီးဟ့ၣ်ပှၤ တၢ်ဂံၢ်တၢ်ဘါ န့ၣ်လီၤ. အဝဲလဲၤဆူညါ လၢနမဲာ်ညါ, ဒီး ဟ့ၣ်နၤ တၢ်ကိးမံၤဒဲးလၢ နလိၣ်ဘၣ်န့ၣ်လီၤ. ဖဲနအၢၣ်လီၤ အတၢ်သုးတၢ်ကျဲၤ လၢနတၢ်အိၣ်မူအဂီၢ်အခါ အဆၢထၢၣ်လၢ အတၢ်အၢၣ်လီၤအီလီၤ အပူၤ ဒ်ရိမ့ၤ ၈း၂၈ စံးဝဲအသိးန့ၣ်လီၤ. 

ဒီးပသ့ၣ်ညါလၢ ပှၤလၢအအဲၣ်ယွၤ, ပှၤလၢအဘၣ် တၢ်ကိးအီၤ, ဒ်တၢ်ကူၣ်ပာ်အသိး တဖၣ်န့ၣ်, တၢ်ခဲလၢာ် မၤဃုာ်အသး, လၢတၢ်ဂ့ၤအဂ့ၢ် လၢအဂီၢ်လီၤ. (ရိမ့ၤ ၈း၂၈)

တၢ်ကတိၤလၢခံ

လၢတၢ်န့ၣ်အဃိ, တၢ်လၢပမၤလိဘၣ်လၢ စီၤမိၤရှ့အအိၣ်လၢ တနံၤအံၤန့ၣ်မ့ၢ်ဝဲ 

၁. နဘၣ်သ့ၣ်ညါလီၤနသးလၢနမ့ၢ်မတၤ

၂. နဘၣ်ဟံးမူဒါလၢ နသးသမူအဂီၢ်

၃. နဘၣ်ဆၢတဲာ်တၢ်အလိၣ်ဒိၣ်ကတၢၢ်လၢနဂီၢ်

၄. နဘၣ်ပာ်နသးကျၢၤမူဆှူဖဲ တၢ်ကီတၢ်ခဲအဆၢကတီၢ် 

အန့ၣ်မးနကအိၣ်မူ တၢ်အိၣ်မူလၢ အဘၣ်ဆိၣ်ဂ့ၤဆိၣ်ဝါ လၢအဟဲလၢယွၤအအိၣ် န့ၣ်လီၤ.