အဝဲဒၣ်ဘၣ်တၢ်မၤလိာ်အီၤဒ်န့ၣ်ဒီး, ဒၢနုာ်အီၤလၢဃိာ်ပူၤ လၢညါတတီၤ, ဒီးသိးဃာ်အခီၣ်လၢ သိးအပူၤလီၤ. ဒီးလၢ ဖးဖီမုၢ်န့ၣ် စီၤပီလူးဒီး စီၤစံလၤဘါထုကဖၣ်တၢ်, ဒီးသးဝံၣ်သးဆၢယွၤ, ဒီးပှၤဃိာ်ဖိကနၣ်ဝဲလီၤ. (မၤတၢ် ၁၆း၂၄-၂၅).ကၠီဘျၤခၤ မ့ၢ်ဝဲ မံးရှၢၣ်နရံၣ် အခီၣ်ထံးကတၢၢ်တဖၣ် အကျါတဂၤလၢအလဲၤဆူ ယူရပၤမုၢ်ထီၣ်တခီ ဖဲ ၂၀ ယၤဖှိၣ်နံၣ်အပူၤန့ၣ်လီၤ. အဝဲဃုထၢဝဲ ကီၢ်ယူၤကိၤစလါဘံယါ လၢကလဲၤမၤမံးရှၢၣ်အတၢ်မၤအဂီၢ် ဖဲ ၁၉၃၀ နံၣ် ဒီး ၁၉၅၀ နံၣ် အဘၢၣ်စၢၤန့ၣ်လီၤ. လၢအတၢ်ကွဲးလီၤအကစၢ်ဒၣ်ဝဲအဂ့ၢ်အကျိၤအပူၤ, အဝဲဒၣ်ကွဲးလီၤဝဲ ဘၣ်ဃး အတၢ်အိၣ်လၢဃိာ်ပူၤ အဂ့ၢ် လၢတၢ်လီၢ်တတီၤလၢ အမံၤမ့ၢ် ကၠၤနိစ့း အပူၤန့ၣ်လီၤ.
ဖဲတၢ်သံကွၢ်သံဒိးအီၤအဆၢကတီၢ်, ပှၤသံကွၢ်အီၤ, “နဟဲမၤမနုၤဖဲကၠၤနိစ့းလဲၣ်.”
အဝဲစံးဆၢဝဲ, “ပှၤကွဲမုာ်ယၤဖဲအံၤလၢယကဟဲဖျီတၢ်အဂီၢ်.”
ဖဲန့ၣ်ပှၤတဂၤန့ၣ် တဲအီၤ, “ယကသိၣ်လိနၤတၢ်မၤလိတခါ, နတဘၣ်ဟးဖဲအံၤဖဲန့ၣ် ဒီးတဲပှၤဘၣ်ဃး ယွၤလၢ အတအိၣ်ဘၣ်တဂၤအဂ့ၢ်လၢၤတဂ့ၤ.”
တဘျီဃီဖဲန့ၣ် ပှၤတဂၤန့ၣ် လၤအဝဲဒၣ်အမဲာ်လီၤ. ဖဲအလၤ ကၠီဘျၤခၤ အမဲာ်အခါ သံကွၢ်ဝဲ, “ကစၢ်ယွၤအိၣ်ဧါ.”
ကၠီဘျၤခၤစံးဆၢအီၤ, “မ့ၢ်, အဝဲတ့လီၤတၢ်ခဲလၢာ်လီၤ.”
အဝဲဒၣ်တီၢ်ဝဲ ကၠီဘျၤခၤဒ်အါထီၣ် ဒီးသံကွၢ်ဝဲ, “မ့မ့ၢ်ဒ်န့ၣ်, ဘၣ်မနုၤကစၢ်ယွၤပျဲတၢ်ဒုးတၢ်ယၤလဲၣ် (တၢ်ဒုးခံဘျီ တဘျီ)”
ကၠီဘျၤခၤစံးဆၢအီၤ, “တမ့ၢ်ကစၢ်ယွၤဘၣ်. မ့ၢ်ဒၣ်ပှၤကညီအတၢ်သးဟ့ ဒီး တၢ်ဒဲးဘးအတၢ်အၢတၢ်သီ လၢပှၤကညီ အသးပူၤ ဒုးကဲထီၣ်တၢ်ဒုးတၢ်ယၤလီၤ.”
ကၠီဘျၤခၤ ဘၣ်တၢ်တီၢ်အီၤ တုၤလၢ အသးပ့ၤနီၣ်အသးဒီး ဘူးလၢအကသံလီၤ. ပှၤသံကွၢ်တၢ်တဂၤန့ၣ် စးထီၣ်ပျံၤ ထီၣ်တၢ်, မ့ၢ်လၢ ကီၢ်ခိၣ်ထံထိၣ် ဒုးအိၣ်ထီၣ်တၢ်သိၣ်တၢ်သီလၢ မ့တမ့ၢ်လၢ ပှၤတဂၤဂ့ၤတဂၤဂ့ၤ ဘၣ်တၢ်သမံ သမိးအီၤ လီၤတံၢ်လီၤဆဲးလၢ ကွီၢ်အပူၤဘၣ်န့ၣ် တၢ်မၤသံပှၤဃိၣ်ဖိန့ၣ် တၢ်တတူၢ်လိာ်အီၤဘၣ်. ဖဲန့ၣ် ပှၤသံကွၢ် တၢ်တဂၤန့ၣ် ကိးန့ၢ်ဝဲ ပၢၤကီၢ်ဖိတဂၤ ဒ်သိး အကပျၢ်ကွံာ်ကၠီဘျၤခၤအဂီၢ်လီၤ.
ကၠီဘျၤခၤမၤကတၢၢ်အတၢ်ကွဲးလၢ, “အဝဲသ့ၣ်ဟဲက့ၤဆူဟံၣ်, ဒီးလၢကျဲန့ၣ် အဝဲသ့ၣ်စံးထီၣ်ပတြၢၤကစၢ်ယွၤ လၢအဟ့ၣ်လီၤအီၤ တၢ်ဝံသးစူၤ ဒီး ဂံၢ်ပှၤလၢ ပှၤတူၢ်ဘၣ်တၢ်လၢအဂီၢ်ဒ် ပှၤတၢ်မၢဖိတဖၣ်အသိး အဃိလီၤ.”
ပှၤခရံာ်ဖိလၢအဒိၣ်တုာ်ခိၣ်ပှဲၤတဂၤ အတၢ်ပနီၣ်န့ၣ် မ့ၢ်ဝဲ ပှၤလၢအသ့စံးထီၣ်ပတြၢၤယွၤ ဖဲတၢ်အိၣ်သးကီခဲ အဆၢကတီၢ်လီၤ. တနွံအံၤ လၢနတၢ်ထုကဖၣ်အပူၤ, စံးထီၣ်ပတြၢၤယွၤ ဖဲနထံၣ်လီၤနသးလၢ နအိၣ်လၢ တၢ်အိၣ်သးတမံၤဂ့ၤတမၠိဂ့ၤ အပူၤန့ၣ်တက့ၢ်.”
ကၠဲးဂိဧ့စံးဝဲ, “ယသ့ၣ်ညါလၢ တၢ်ဂ့ၤလၢအဘၣ်ယၤန့ၣ် ဟဲလၢယွၤအအိၣ်, တၢ်အၢလၢအဘၣ်ယၤန့ၣ်, ကစၢ်ယွၤ ပျဲအီၤ, ဒီးယဃုထၢလၢ ကစံးဘျုးယွၤလၢ တၢ်ခံမံၤလၢာ်အံၤအဃိလီၤ.”
ကစၢ်ယွၤအကလုၢ်ကထါစံးဝဲ, “လၢအဝဲန့ၣ်အဃိ သုသူၣ်ဖှံသးညီ, ဘၣ်ဆၣ် ခဲကနံၣ်အံၤ အလီၢ်မ့ၢ်အိၣ်ဒီး, သုသူၣ်အုးသးအုး တစိၢ်လၢ တၢ်လ့ပစီအါမံၤအဃိ, ဒ်သိးသုတၢ်နာ် အတၢ်မၤကွၢ်အီၤ, လၢအမ့ၢ် တၢ်လုၢ်တၢ်ပှ့ၤ ဒိၣ်န့ၢ်ထူ, လၢအဘၣ် တၢ်မၤကွၢ်အီၤလၢမ့ၣ်အူ နာ်သက့ဒီး ဟးဂီၤဝဲန့ၣ်, ကအိၣ်ဖျါထီၣ်လၢ တၢ်စံးထီၣ်ပတြၢၤ, ဒီး တၢ်ယူးတၢ်ယီၣ်, ဒီးတၢ်လၤကပီၤအဂီၢ်, ဖဲယ့ၣ်ရှူးခရံာ် အတၢ်အိၣ်ဖျါထီၣ်န့ၣ်လီၤ. အဝဲဒၣ်န့ၣ်သုတထံၣ် ဘၣ်အီၤ ဘၣ်ဒီး သုအဲၣ်အီၤလီၤ. ခဲကနံၣ်အံၤသုတထံၣ်ဘၣ်နာ်သက့ဒီး, သုနာ်အီၤဒီး, သုသးခုဒီး တၢ်သးခုလၢ ပစံးတသ့ ဘၣ်, ဒီး လၢပှဲၤဝဲဒီး တၢ်လၤကပီၤ, ဒီးသုဒိးန့ၢ်သုတၢ်နာ် အကတၢၢ်န့ၣ်, တၢ်အုၣ်က့ၤခီၣ်က့ၤသုသးလီၤ.” (၁ ပ့းတရူး ၁း၆-၉).
(ကွဲးကျိးထံက့ၤ Peter Kennedy အတၢ်ကွဲးလၢ ၂၀၁၆ နံၣ်အပူၤန့ၣ်လီၤ.)
0 Comments