မ့ၢ်ကစၢ်ယွၤဆှၢနၤဆူ စၤရဖၤသးဧါ.

ဂဲၤဆၢထၢၣ် လဲၤဆူစၤရဖၤသး လၢအဘၣ်ဃးဒီး စံဒိၣ်, ဒီးအိၣ်ဖဲန့ၣ် တက့ၢ်. (၁ စီၤပၤ ၁၇း၈).

ထံကျိလၢ ဝံအ့ၤလံယၤ အီဝဲတဘိန့ၣ် လီၤသံးကွံၥ်လံ, ဒီး စီၤဝၣ်ဃးစ့ၢ်ကီး တဟဲဆှၢန့ၢ်လၢၤ ဝံအ့ၤလံယၤ အတၢ်အီၣ်လၢၤဘၣ်. ဖဲတၢ်ကဲထီၣ်အသးဒ်န့ၣ်အဆၢကတီၢ်, ကစၢ်ယွၤဂုၥ်ကျဲးစၢးလၢ ကဒိးန့ၢ်နတၢ်သး စၢၢ်ဆၢ အဂီၢ်လီၤ. အဝဲဒၣ်အဲၣ်ဒိးလၢ နကအိၣ်ကတဲၥ်ကတီၤနသးလၢ နကလဲၤဆူညါ အဂီၢ်လီၤ.

 
ဝံၤအလီၢ်ခံ, ကစၢ်ယွၤဆှၢ ဝံအ့ၤလံယၤဆူ မုၣ်ကမဲလၢ အအိၣ်လၢ စၤရဖၤသး, ဒီးတဲဝဲလီၤတံၢ်လီၤဆဲး လၢ မုၣ်ကမဲအံၤ ကလုၢ်အီၣ်လုၢ်အီအီၤလီၤ. ခိၣ်နၢ်လၢ အတီခိၣ်ရိၥ်မဲတ့ၢ် ပှၤအါဂၤအဂီၢ်, တၢ်န့ၣ်ကမ့ၢ်တၢ်လၢ အကီဒိၣ်မးလီၤ.

 
ဝံအ့ၤလံယၤ ထံၣ်န့ၢ် မုၣ်ကမဲတဂၤလၢ တၢ်သၣ်ဝံၤလီၤဒိ အဆၢကတီၢ်, ဖီအီၣ်တၢ်အီၣ်လၢ လီၢ်ခံကတၢၢ် တဘျီ လၢအကစၢ်ဒၣ်ဝဲအဂီၢ် ဒီးလၢအဖိခွါ အဂီၢ်လီၤ. သနၥ်က့, အဝဲဒၣ် တၤတၢ်ဒီး မုၣ်ကမဲန့ၣ်လၢ ကဒိကနၣ် ကစၢ်ယွၤအဂီၢ်, ဒီးအၢၣ်လီၤအီၤလၢ, “ယွၤအံၣ်စရ့လးအကစၢ် စံးဒ်အံၤ, ထံဒၢသ့ၣ်အကိၣ်ကမူၣ်တလၢာ်, ဒီးပလီ အသိတလီၤစှၤဘၣ်တုၤ ယွၤကမၢတၢ်ဟဲစူၤလၢ ဟီၣ်ခိၣ်ချၢလီၤ.” (၁ စီၤပၤ ၁၇း၁၄).

တၢ်လၢအဟ့ၣ်လီၤ ဝံအ့ၤလံယၤလၢ တၢ်နာ်လၢ အကစံးတၢ်ဒ်န့ၣ် မ့ၢ်တၢ်မနုၤလဲၣ်. မ့ၢ်လၢ အထံၣ်တ့ၢ်ဝဲ ကစၢ်ယွၤ အတၢ်သးတီ လၢအတၢ်အိၣ်မူအပူၤအဃိလီၤ. နကတိၤတၢ်လၢ တၢ်နာ်အပူၤသ့ ဖဲ နလဲၤတၢ်လၢတၢ်နာ်အပူၤ လီၤ. ဒီးနတၢ်မၤသကိးတၢ်ဒီး ပှၤလၢ အအိၣ်ဒီးတၢ်နာ်န့ၣ် သူၣ်ထီၣ်နတၢ်နာ် စ့ၢ်ကီးလီၤ. တၢ်ကဲထီၣ်အသး လၢ မုၣ်ကမဲ တဂၤန့ၣ်အဂီၢ် ဒ်န့ၣ် စ့ၢ်ကီးလီၤ. မုၣ်ကမဲဒီးအဖိခွါန့ၣ် မ့ၢ်တအီၣ်ဘၣ်တၢ်အီၣ် ဂ့ၤဂ့ၤဘၣ်ဘၣ် ဘၣ်ဆၣ်, ကစၢ်ယွၤ အၢၣ်လီၤအီၤလၢ တုၤလၢတၢ်သၣ်ဝံၤလီၤဒိ ဝံၤတစု အဝဲသ့ၣ်ကအိၣ်ဒီး တၢ်အီၣ်လၢကမူဝဲအဂီၢ်လီၤ.

 
အဃိ, နမ့ၢ်တအိၣ်ဒီး တၢ်ကိးမံၤဒဲးလၢနအဲၣ်ဒိးအီၤ အခဲအံၤဘၣ်န့ၣ်, ဒိကနၣ်ယွၤ ဒီးနာ်အီၤ လၢတၢ်လၢ အဟ့ၣ်တ့ၢ်နၤအပူၤ, ဒီးဖဲ တၢ်ဆၢကတီၢ် ဘၣ်ဝဲအခါ အဝဲကမၤအါထီၣ်န့ၢ်နၤလီၤ.

 
ဖဲအံၤ, မုၣ်ကမဲဒီး ဝံအ့ၤလံယၤခံဂၤလၢာ် အတၢ်နာ်စ့ၢ်ကီး ဘၣ်တၢ်မၤကွၢ်အီၤလီၤ. အဃိ, နမ့မ့ၢ် ပှၤနာ်တၢ်သီသီ တဂၤမ့ၢ်ဂ့ၤ, ပှၤကဲထီၣ်တ့ၢ်လံပှၤခရံာ်ဖိဖးယံာ်လံ မ့ၢ်ဂ့ၤ, သ့ၣ်ညါလၢ တၢ်မၤကွၢ် နတၢ်နာ် ကဟဲဆူနကျဲအပူၤ လီၤ. အခဲအံၤ မ့ၢ်ကစၢ်ယွၤဆှၢနၤဆူ နကစၢ်ဒၣ်နဲ အစၤရဖၤသး လံဧါ. တဘၣ်တဲဂ့ၢ်လိာ်တၢ်တဂ့ၤ. “လဲၤတဘျီဃီ တက့ၢ်.” မ့ၢ်လၢ ကစၢ်ယွၤ အတၢ်ဆိၣ်ဂ့ၤဆိၣ်ဝါ အိၣ်ကတီၤဃာ်အသး ဖဲနဒိကနၣ်တၢ်အခါလီၤ.