တၢ်မၤအီၣ်ညၣ်တၢ်မၤလိ (၄)

... သုးဃီၤကဘီဆူထံယိာ်, ဒီးဒ်သိး သုကန့ၢ်အီၣ်ညၣ်ဒီး, ပျၢ်လီၤသုစၤတက့ၢ်. (လူၤကၣ် - ၅း၄).

တၢ်မၤလိ (၄) - ကစၢ်ယွၤအတၢ်သုးတၢ်ကျဲၤလၢပတၢ်အိၣ်မူအဂီၢ် ထီဘိန့ၣ် ပၣ်ဃုာ်ဒီး တၢ်ညိကွံာ်ပသး လီၤ. ဘၣ်မနုၤအဃိလဲၣ်. မ့ၢ်လၢအဝဲအဲၣ်ဒိးလၢ နကအိၣ်မူလၢ တၢ်နာ်အပူၤလီၤ. ယ့ၣ်ရှူးတဲဘၣ် စီၤပ့းတရူး, “သုးဃီၤ ကဘီဆူထံယိာ်” န့ၣ် နဆိကမိၣ် မ့ၢ်အဘၣ်မနုၤလဲၣ်. မ့ၢ်လၢ ဖဲန့ၣ် ညၣ်လၢအဒိၣ်တဖၣ် အိၣ်ဝဲအဃိလီၤ.

 
အခဲအံၤ ပှၤအါတက့ၢ် အိၣ်ဝဲလၢ အတၢ်အိၣ်မူအထံဒီၣ်အပူၤလီၤ. အဝဲသ့ၣ်အိၣ်မူဒၣ်ဖှံဖှံညီညီဖိလီၤ. အဝဲသ့ၣ်အထံယိာ်မ့ၢ် အိၣ်ထီၣ်ဘၣ်ဆၣ်, ဂဲၤပျုၢ်ဂဲၤဆှးဝဲဒၣ်လၢ တၢ်ကနူၤအလိၤ, သနာ်က့ တနုာ်လီၤဝဲဆူ ထံယိာ်အပူၤနီတဘျီဘၣ်. ဘၣ်မနုၤအဃိလဲၣ်. မ့ၢ်လၢထံဒီၣ်အလီၢ်န့ၣ် မ့ၢ်တၢ်ပူၤဖျဲးကတၢၢ်အလီၢ်လီၤ. အဝဲသ့ၣ် ဆိကမိၣ်ဝဲလၢ, “ယမ့ၢ်နုာ်လီၤဆူ ထံယိာ်အပူၤန့ၣ် လပီတဖၣ်အိၣ်ဝဲသ့လီၤ. လပီတဖၣ် ကဒိဘၣ်ယချံ, ဒီး ယချံ ကလီၤတကျၢၢ်ဘၣ်ဖုးလီၤ. အဃိ, ယကအိၣ်ဒၣ်ဖဲအံၤ ဒီး ဝၢ်ဒၣ်ယချံအံၤလီၤ.”

 
ပတအဲၣ်ဒိးလၢ ပခီၣ်ပကဘၣ်စီၣ်ဘၣ်, မ့ၢ်လၢ ပပျံၤလၢ ပကဘၣ်စီၣ်ဒီတဂၤအဃိလီၤ. ပဆိကမိၣ်လၢ, “ယမ့ၢ်ဟ့ၣ်လီၤအးလီၤယသးလၢာ်လၢာ်ဆ့ဆ့ ဆူကစၢ်ယွၤအအိၣ်န့ၣ်, အဝဲကဒုးကဲထီၣ်ယၤလၢ ပှၤလီၤဆီကတၢၢ် တဂၤလီၤ. ယဟံၣ်ဖိဃီဖိ ကသးအုးဒိၣ်မးလီၤ. ယတံၤသကိးတဖၣ်ကဆိမိၣ်ယၤဒ်လဲၣ်. ကစၢ်ယွၤမ့ၢ်မၢယၤ တၢ်လၢ ယမၤတသ့ဘၣ်မီၣ်.” အဃိ, ပအိၣ်ဒၣ်လၢ ထံဒီၣ်အလီၢ်, အဃိ တၢ်အါမံၤ လဲၤပူၤကွံာ်ပှၤ သ့ဝဲလီၤ.

 
နမ့နၢ်ပၢၢ်တၢ်အံၤန့ၣ်, ကစၢ်ယွၤအတၢ်သုးတၢ်ကျဲၤလၢနတၢ်အိၣ်မူအဂီၢ်န့ၣ် မ့ၢ်တၢ်သုးတၢ်ကျဲၤလၢအဂ့ၤအဘၣ်, လၢအကမၤတၢ်လၢနတၢ်ဘၣ်ဘျုးအဂီၢ်လီၤ (ကွၢ် ယံးရမံယၤ ၂၉း၁၁-၁၄). အဝဲဒၣ်ကတဲနၤ, “ပျဲယနုာ်လီၤဆူ နကဘီပူၤတက့ၢ်. ပျဲယလဲၤဒီးနၤ ဖဲနလဲၤတပူၤလၢ်လၢ် - လၢနမုၢ်ကျိၤဝဲၤကွာ်အပူၤ, လၢနတၢ်ဖံးတၢ်မၤအပူၤ, လၢ နဟံၣ်ဖိဃီဖိအပူၤ, လၢနတၢ်ဆီဟံၣ်ဆီဃီအပူၤ, ဒီးလၢနတၢ်အိၣ်မူကိးကပၤဒဲးအပူၤ တက့ၢ်. ပျဲယပၢဆှၢ နတၢ်လဲၤ ကျဲတက့ၢ်. မၤသကိးဃုာ်တၢ်ဒီး ယတၢ်သုးတၢ်ကျဲၤ, ဒီးယကဆိၣ်ဂ့ၤနၤ အါန့ၢ်ဒံး တၢ်လၢနအဲၣ်ဒိးအီၤ တဖၣ်လီၤ. တနံၤအံၤ, မ်ပကဟံးန့ၢ် အတၢ်ကတိၤတဖၣ်, ဒီး သုးဃီၤဆူထံယိာ်လၢတၢ်နာ်အပူၤတက့ၢ်.